ꓘꓴ-ꓜꓲ-ꓞꓳ ꓚꓺ ꓟꓲꓽ

ꓘꓴ-ꓜꓲ-ꓞꓳ ꓚꓻ ꓟꓲꓽ

ꓙꓲꓻ ꓫꓬ ꓢꓴ Vincent de Paul ꓚꓱꓹ

French ꓗꓴꓷꓼ ꓗꓪ ꓓꓶ: ꓡꓯ ꓘꓳ ꓓꓴ ꓐꓰ ꓢꓰꓼ ꓡꓯ ꓘꓳ ꓓꓴ ꓙꓳˍ ꓕꓯ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓮ ꓟꓬꓹ ꓫꓸ ꓓꓴ ꓔꓳ, ꓜꓳ: ꓡꓰꓳ= ꓜ: ꓓꓴ ꓓꓳꓻ ꓓꓴ ꓐꓰ ꓦꓻ ꓕꓲ ꓒꓳꓹ ꓗꓪ ꓮ ꓟꓬꓹ ꓫꓵꓽ ꓗꓪ ꓪꓴꓽ ꓟꓴ ꓡ ꓓꓴ ꓟꓽ ꓙꓳ ꓗꓷ ꓡꓰꓳ= ꓖꓳ ꓕꓲ ꓙꓵꓹ ꓗꓪ ꓪꓴ-ꓢ ꓡꓰ ꓙ ꓣꓳ ꓠꓲꓸ ꓐꓰ ꓠꓵꓻ ꓠꓲꓹ ꓐꓲ ꓞꓹ ꓟ ꓙꓲꓻ ꓫꓬ ꓢꓴ Vincent de Paul ꓔꓯ ꓪꓴ-ꓢ ꓟꓬꓱꓽ ꓐꓰ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓬꓰ ꓙ ꓠꓹ ꓟ ꓝꓲ ꓩꓴ ꓗꓷꓳ= ꓙꓲꓻ ꓫꓬ ꓢꓴ Vincent de Paul ꓠꓬ ꓫꓸ ꓢꓴ ꓟꓷꓼ ꓢꓴ ꓔꓯ ꓮ ꓟꓬꓹ ꓬꓰ ꓙ ꓗꓷꓳ= ꓪꓴ-ꓢ ꓟꓬꓱꓽ ꓟꓯ ꓢꓴ ꓔꓲꓺ ꓒ ꓕꓲ ꓣꓳ ꓥ ꓟ ꓪꓴꓸ ꓠꓬꓲ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓪꓴ-ꓢ ꓐꓯ ꓘꓶꓽ ꓐꓰ ꓧꓪꓽ ꓖꓳ ꓓꓱ ꓐꓱ ꓶ ꓬꓰ ꓙ ꓗꓷꓳ=ꓙꓲꓻ ꓫꓬ ꓢꓴ Vincent de Paul ꓡꓰ ꓬꓰ ꓙ ꓔꓬ ꓟ ꓗꓪ ꓞꓲꓼ ꓪꓴꓽ ꓢꓴ ꓞꓳ ꓟꓳꓽ ꓐꓴ ꓐꓰ ꓤ ꓠꓱ ꓮꓸ ꓐꓲ ꓮ ꓟꓬꓹ ꓙꓳˍ ꓡꓳ=

ꓙꓲꓻ ꓫꓬ ꓢꓴ Vincent de Paul ꓠꓬ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓑꓶꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓫꓸ ꓔꓬ ꓢꓴ ꓐꓴ ꓔꓯ ꓔꓬ ꓖꓴ ꓐꓰ ꓢꓷꓸ ꓠꓲꓹ ꓢꓳ ꓦꓲ ꓐꓰ ꓪꓽ ꓘꓴ ꓦꓲ ꓮ ꓟꓬꓹ ꓫꓬ ꓖꓶ ꓗꓷꓳ=ꓙꓲꓻ ꓫꓬ ꓢꓴ Vincent de Paul ꓠꓬ ꓫꓸ ꓔꓬ ꓢꓴ ꓑ ꓫꓬ ꓐꓴ ꓔꓯ ꓬꓰ ꓙ ꓔ ꓙ ꓠꓹ ꓟ ꓐꓱ ꓶ ꓡ-ꓢ-ꓣꓴ ꓟꓬꓱ ꓔ ꓟ ꓜꓴꓻ ꓔꓯ ꓒꓴ ꓗꓷ ꓢꓲ ꓠꓬꓲ ꓮ ꓟꓬꓹ ꓬꓰ ꓙ ꓗꓷꓳ=ꓙꓲꓻ ꓫꓬ ꓢꓴ Vincent de Paul ꓠꓬ ꓬꓲ ꓞꓲꓼ 85 ꓘꓳꓼ AD 1660 ꓘꓳꓼ ꓕꓯ  ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳꓹ ꓬꓰ ꓪ= ꓙꓲꓻ ꓫꓬ ꓢꓴ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳꓹ ꓬꓰ ꓗꓸ ꓠꓯꓸ 100 ꓘꓳꓼ ꓕꓯ ꓙꓲꓻ ꓫꓬ ꓢꓴ Vincent de Paul ꓟꓬꓱ ꓗꓪ ꓐꓰ ꓜꓴꓻ ꓕꓲ ꓟ ꓒꓴ ꓢꓲ ꓠꓬꓲ ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓗꓷꓳ=ꓖꓳ ꓡꓱ ꓥ ꓟ ꓪꓴꓸ ꓠꓬꓲ ꓙꓲꓻ ꓫꓬ ꓢꓴ Vincent de Paul ꓔꓲꓺ ꓒ ꓜꓴꓻ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓬ ꓢꓴ ꓔꓲꓺ ꓒ ꓔꓲꓺ ꓟ ꓮ ꓟꓬꓹ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓙꓰ ꓢꓲ ꓠꓬꓲ ꓫꓸ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓬ ꓟ ꓥ ꓡꓳ=