ꓘꓶꓽ ꓫꓵꓽ ꓝꓲꓸ ꓖꓶ

ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓐꓴ ꓔꓯ ꓢꓲ-ꓠ ꓪ ꓚꓲ ꓗꓪ ꓟꓳ-ꓫꓲ ꓗꓪ ꓐꓰ ꓖꓶ ꓔ ꓟ ꓙꓵꓽ ꓗ (10) ꓙꓰꓽ ꓐꓳ ꓔ ꓟ ꓭꓸ ꓒꓬꓸ ꓠꓬꓲꓽ ꓒꓬꓸ ꓧꓳꓽ ꓔ ꓟ ꓘꓶꓽ ꓫꓵꓽ ꓝꓲꓸ ꓖꓶ ꓠꓬ ꓬꓲ-ꓢꓷ-ꓡꓰ ꓐꓴ ꓡꓯ ꓒꓯꓹ ꓗꓪ ꓮ ꓕꓯ ꓟꓲ ꓓꓹ ꓟ ꓟꓽ ꓥ= ꓩꓱ-ꓡꓲ-ꓫꓵ ꓐꓴ ꓡꓯꓼ ꓛꓲꓺ ꓗꓪ ꓬꓲ ꓦꓬꓼ ꓠꓬꓲ ꓟꓶ ꓤ ꓗꓪ ꓛꓲꓺ ꓦꓴ ꓔꓯꓹ ꓙꓰˍ ꓟ ꓟꓶ ꓗꓷꓳ= ꓕꓱ ꓟ ꓔꓯ ꓐꓚ 1180 ꓘꓳꓼ ꓕꓯ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓝꓲꓸ ꓔ ꓡꓳ=

ꓘꓶꓽ ꓫꓵꓽ ꓝꓲꓸ ꓖꓶ ꓠꓬ ꓪꓴ-ꓢ ꓙꓵꓽ ꓗ (10) ꓙꓰꓽ ꓐꓳ ꓔ ꓟ ꓭꓸ ꓒꓬꓸ ꓠꓬꓲꓽ ꓒꓬꓸ ꓧꓳꓽ ꓔ ꓟ ꓫꓵꓺ ꓫꓬ ꓡꓰ ꓔꓯꓹ ꓠꓷꓼ ꓔ ꓟ ꓢꓲꓹ ꓒꓬꓸ ꓝꓲꓸ ꓖꓶꓽ ꓕꓲ ꓟ ꓥ ꓡꓳ= ꓘꓶꓽ ꓫꓵꓽ ꓝꓲꓸ ꓖꓶ ꓕꓱ ꓟ ꓔꓯ ꓠꓬ ꓟꓳ-ꓫꓲ ꓔꓯ ꓪꓴ-ꓢ ꓡꓰ ꓐꓯ ꓟꓸ ꓖꓶ ꓔ ꓟ ꓫꓬꓹ ꓚꓱꓹ ꓔꓯ ꓣꓱꓽ ꓢꓲ ꓫꓬꓹ ꓔ ꓟ ꓥ ꓡꓳ (ꓓꓳ ꓙꓰ 25ꓽ1-22ꓹ 37ꓽ1-9)= ꓘꓶꓽ ꓫꓵꓽ ꓝꓲꓸ ꓖꓶ ꓠꓬ ꓬꓲ-ꓢꓷ-ꓡꓰ ꓐꓴ ꓡꓲ ꓛꓲ ꓟꓵꓽ ꓗꓪ ꓗꓳꓸ ꓙꓰˍ ꓕꓯ ꓬꓲ-ꓢꓷ-ꓡꓰ ꓐꓴ ꓔꓯ ꓙ ꓖꓴ ꓟꓸ ꓖꓶ ꓗꓷꓳ (ꓑ ꓫꓬ ꓵ 10ꓽ33-36)ꓸ ꓘꓶꓽ ꓫꓵꓽ ꓝꓲꓸ ꓖꓶ ꓬꓲ ꓪ ꓐꓰ ꓕꓲ ꓪ ꓓꓹ ꓟ ꓠꓬ “ꓪꓴ-ꓢ ꓠꓬ ꓬꓲ ꓪ ꓐꓴ ꓐꓰ ꓕꓲ ꓪ ꓔꓬ ꓡꓳ” ꓐꓯˍ ꓟ ꓬꓲ ꓢꓷꓸ ꓡꓰ ꓓꓴ ꓕꓲ ꓟˍ ꓟꓲ ꓥ ꓡꓳ(1 ꓢ-ꓟꓴ-ꓬꓰ 4ꓽ4) =

ꓬꓲ-ꓢꓷ-ꓡꓰ ꓐꓴ ꓠꓬ ꓬꓲ ꓪ ꓡꓲ ꓛꓲ ꓟꓵꓽ ꓗꓪ ꓗꓳꓸ ꓙꓰˍ ꓕꓯ ꓐꓰ ꓬꓲ ꓪ ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳˍ ꓟ ꓗꓪ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓑꓱꓸ ꓔꓯꓹ ꓡ ꓗꓷꓳ= ꓬꓳ-ꓫꓴ ꓧꓳꓽ ꓣꓱꓽˍ ꓟ ꓠꓯꓸꓼ ꓗꓪ ꓘꓷ-ꓠ ꓟꓵꓽ ꓔꓯ ꓫ ꓠꓹ ꓟ ꓙꓽ ꓖꓶ ꓔꓬ ꓕꓯ ꓬꓲ ꓪ ꓠꓬ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓬꓲ ꓪ ꓐꓰ ꓕꓲ ꓛꓳˍ ꓔꓯꓹ ꓙꓰ ꓗꓷꓳ= ꓝꓮꓲ ꓬꓳ-ꓔ ꓬꓲꓽ ꓟ ꓠꓬ ꓠꓬꓲꓽ ꓐꓶꓽ ꓗꓷ ꓡꓰ ꓢꓲ ꓖꓳ ꓟ ꓔꓯ ꓗꓳꓸ ꓙꓰˍ ꓟ ꓗꓪˍ ꓟꓲ ꓘꓶꓽ ꓫꓵꓽ ꓝꓲꓸ ꓖꓶ ꓑꓱꓸ ꓢꓲ ꓗꓳꓸ ꓙꓰ ꓗꓷꓳ (ꓬꓳ-ꓫꓴ 3ꓽ) =

ꓬꓲ-ꓢꓷ-ꓡꓰ ꓐꓴ ꓬꓲ ꓪꓴꓸ ꓓꓶꓽ ꓧꓪꓸ ꓡꓰ ꓟ ꓡꓳ ꓒꓱ ꓥ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓣꓴˍ ꓕꓯ ꓥˍ ꓟꓲ ꓘꓶꓽ ꓫꓵꓽ ꓝꓲꓸ ꓖꓶ ꓑꓱꓸ ꓔ ꓢꓲ ꓠꓬꓲ ꓐꓵ ꓛꓲ 7 ꓟ ꓟꓵˍ ꓟ ꓔꓲꓺ ꓒ 7 ꓣꓳ ꓐꓰ ꓕꓲ ꓪꓽ ꓡꓳ ꓒꓱ ꓔꓯ ꓮ ꓟꓬꓹ ꓠꓬꓲ ꓚꓳꓻ ꓙꓰ ꓗꓷꓳ= ꓫꓵꓽ ꓠꓬꓲ ꓕꓲ ꓠꓬꓲ ꓕꓯ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓚꓬꓹ ꓐꓱꓽ ꓙꓰ ꓢꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓡꓳ ꓒꓱ ꓔꓯ ꓣꓴ ꓟꓶ ꓡꓰꓳ (ꓬꓳ-ꓫꓴ 6ꓽ)= ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓗ ꓠꓯꓸ ꓬꓳ-ꓫꓴ ꓠꓬ ꓫ-ꓬꓲ-ꓡꓳ ꓡꓳ ꓒꓱ ꓗꓪ ꓟꓶꓽ ꓔꓶꓸ ꓦꓲ ꓚꓵꓹ ꓔꓶꓸ ꓢꓲ ꓖꓳ ꓗꓪ ꓗꓶꓽ ꓫꓵꓽ ꓝꓲꓸ ꓖꓶ ꓔꓯ ꓗꓷ ꓔ ꓡꓳ=(ꓬꓳ-ꓫꓴ 18ꓽ) ꓢ-ꓟꓴ-ꓬꓰ ꓬꓲ ꓐꓹ ꓐ ꓬꓲ-ꓡꓲ-ꓘꓷ-ꓠ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓐꓰ ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳˍ ꓗꓪ ꓛꓲꓺ ꓘꓶꓽ ꓫꓵꓽ ꓝꓲꓸ ꓖꓶ ꓠꓬ ꓫ-ꓬꓲ-ꓡꓳ ꓡꓳ ꓒꓱ ꓗꓪ ꓓꓹ ꓡꓳ=

ꓬꓲ-ꓢꓷ-ꓡꓰ ꓐꓴ ꓠꓬ ꓩꓱ-ꓡꓲ-ꓫꓵ ꓐꓴ ꓔꓯ ꓓꓶꓽ ꓡꓯ ꓘꓳꓹ ꓟ ꓗꓪ ꓫꓴ ꓗꓷ ꓕꓯ꓾ ꓬꓲ ꓪ ꓐꓴ ꓠꓬ ꓝꓮꓲ ꓕꓲ ꓧꓪꓹ ꓓꓶꓽ ꓡꓯ ꓘꓳꓹ ꓕꓯ ꓧꓪꓸ ꓡꓰˍ ꓥꓳ ꓓꓵꓽ ꓙ ꓢꓲ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓰ-ꓑꓷ-ꓠꓰ-ꓜꓷ ꓗꓪ ꓔꓯꓹ ꓙꓰ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓝꓮꓲ ꓕꓲ ꓧꓪꓹ ꓫꓴ ꓡꓰ ꓢꓲ꓾ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓥˍ ꓟꓲ ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓡꓰ ꓦꓴ ꓔꓯꓹ ꓙꓰꓳ (1 ꓢ-ꓟꓴ-ꓬꓰ 4ꓽ3-5ꓹ 10ꓹ 11) = ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓢꓴ ꓡꓰ ꓦꓴ ꓔꓯꓹ ꓙꓰ ꓟ ꓓꓳꓽ ꓔꓯ ꓑ ꓙꓽ ꓡꓰ ꓕꓯ ꓫ-ꓬꓲ-ꓡꓳ ꓡꓳ ꓒꓱ ꓗꓪ ꓟ ꓔꓲꓺ ꓒ ꓬꓲ-ꓡꓮꓲ ꓥˍ ꓟꓲ ꓫꓵꓻꓳ= (1 ꓢ-ꓟꓴ-ꓬꓰ 4ꓽ12-18)

ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓠꓬ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓬꓲ ꓪ ꓡꓳ ꓒꓱ ꓥ ꓟ ꓮ-ꓫꓵ-ꓓꓳ ꓗꓪ ꓑꓱꓸ ꓔꓯꓹ ꓡ ꓢꓲ꓾ D-ꓖꓳ ꓢꓲꓺ ꓦꓲꓻ ꓗꓪ ꓗꓷ ꓔ ꓡꓳ= ꓝꓮꓲ ꓕꓲ ꓠꓯꓼ ꓗꓪ ꓓ-ꓖꓳ ꓢꓲꓺ ꓐꓬꓱꓽ ꓠꓬ ꓘꓶꓽ ꓫꓵꓽ ꓝꓲꓸ ꓖꓶ ꓟꓲꓽ ꓙꓬ ꓟꓲ ꓛꓬ ꓗꓪ ꓟꓳꓼ ꓢꓲ ꓐꓱꓽ ꓡꓰꓳ= ꓗ ꓠꓯꓸ ꓕꓲ ꓠꓯꓼ ꓗꓪˍ ꓟꓲ ꓖꓳ ꓡꓱ ꓗꓷ ꓡꓰˍ ꓡꓳ= ꓖꓳ ꓗ ꓠꓯꓸ ꓮ-ꓫꓵ-ꓓꓳ ꓡꓳ ꓒꓱ ꓗꓪ ꓠꓬ ꓠꓻ ꓓꓱꓽ ꓓꓽ ꓟ ꓒꓬꓱꓼ ꓡ ꓢꓲ꓾ ꓕꓲ ꓡꓳ ꓒꓱ ꓡꓱꓸꓼ ꓠꓻ ꓔꓬ ꓢꓴˍ ꓡꓰꓽ ꓐꓲ ꓡꓰꓳ= ꓖꓳ ꓡꓱ ꓠꓬꓲ ꓩꓱ-ꓡꓲ-ꓫꓵ ꓐꓴ ꓠꓬ ꓮ ꓘꓶꓸ ꓙꓳꓺ ꓡꓰ ꓢꓲ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓖꓯ-ꓕꓷ ꓡꓳ ꓒꓱ ꓗꓪ ꓑꓱꓸ ꓔꓯꓹ ꓙꓰˍ ꓡꓳ꓾ ꓖꓳ ꓗ ꓠꓯꓸ ꓠꓬ ꓰ-ꓘꓷ-ꓣꓷ ꓡꓳ ꓒꓱ ꓗꓪ ꓔꓯꓹ ꓙꓰ ꓗꓷꓳ꓾ ꓖꓳ ꓡꓱ ꓥˍ ꓟꓲ ꓬꓲ ꓪ ꓔꓯ ꓒꓬꓱꓼ ꓔꓬ ꓟ ꓠꓻ ꓓꓱꓽ ꓠꓻ ꓠꓬ ꓟꓽ ꓟꓶꓽ ꓡꓰ= (1 ꓢ-ꓟꓴ-ꓬꓰ 5ꓽ1-12)

ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓩꓱ-ꓡꓲ-ꓫꓵ ꓟꓵꓽ ꓗꓪ ꓦ ꓐ ꓫꓵꓽ ꓟ ꓫ ꓗꓷ ꓗ ꓠꓯꓸ꓾ ꓩꓱ-ꓡꓲ-ꓫꓵ ꓡ ꓞꓳ ꓐꓴ ꓠꓬ ꓬꓲ ꓪ ꓔꓲ ꓒ ꓐꓰ ꓡꓯꓼ ꓕꓵ ꓒ ꓐꓴ ꓡꓰ ꓐꓯ ꓖꓶ ꓡˍ ꓟ ꓔꓯ ꓛꓳꓻ ꓢꓲ ꓬꓲ ꓪ ꓠꓬ ꓒꓵꓽˍ ꓟ ꓔꓲꓺ ꓓꓴ ꓐꓰ ꓕꓲ ꓪˍ ꓬꓲ-ꓢꓷ-ꓡꓰ ꓐꓴ ꓔꓯ ꓡꓲꓸ ꓖꓶ ꓠꓹ ꓟ ꓙꓽ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓐꓱ-ꓫꓰ-ꓟꓰ-ꓫꓵ ꓗꓪ ꓔꓯꓹ ꓙꓰ ꓢꓲ꓾ ꓖꓳ ꓗ ꓠꓯꓸ ꓕꓯ ꓠꓬ ꓘꓷ-ꓙ-ꓙꓱ-ꓬ ꓡꓳ ꓒꓱ ꓗꓪ ꓑꓱꓸ ꓔꓯ ꓙꓰ ꓗꓷꓳ= ꓡꓳ ꓒꓱ ꓕꓱ ꓟ ꓗꓪ ꓠꓬ ꓘꓶꓽ ꓫꓵꓽ ꓝꓲꓸ ꓖꓶ ꓔꓯ ꓬꓲ ꓘꓳꓼ 20 ꓘꓳꓼ ꓛꓲ ꓗꓷ ꓔ ꓡꓳ (1 ꓢ-ꓟꓴ-ꓬꓰ 6ꓽ1-18ꓹ21꓾ 7ꓽ1-2)