ꓘꓶꓽ ꓫꓵꓽ ꓡꓵꓺ ꓗꓪ ꓟ ꓘꓴ ꓜꓲꓼ ꓞꓳ ꓐꓰ ꓙꓲ-ꓢꓴ ꓟꓸ ꓟꓲꓽ

ꓬꓲ. ꓪꓴ. ꓗꓪ ꓐꓰ ꓬꓲ. ꓟꓶ: ꓗꓪ ꓛꓲ ꓪꓴ-ꓢ ꓡꓰ ꓧꓳ: ꓣꓱ: ꓢꓲ ꓘꓴ ꓜꓲꓼ ꓞꓳ ꓕꓲ: ꓟ ꓔꓶ ꓓꓳ ꓡꓰ ꓟ ꓠꓬ ꓠꓬꓲ. ꓠꓬꓲ ꓗꓪ ꓛꓲ ꓬꓲ-ꓢꓷ-ꓡꓰ ꓗꓴꓷ;꓾ ꓝꓮꓲ ꓬꓲ ꓪ ꓪ: ꓘꓴ ꓦꓲ ꓥ ꓟꓲ ꓐꓬꓱꓼ ꓡꓱꓼ ꓡꓱꓼ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓮ ꓠꓱ ꓒꓵ: ꓒ: ꓐꓴ ꓡꓰ ꓫꓬꓹ ꓔ ꓟ ꓙꓳ ꓞꓹ ꓡꓳ=

ꓘꓴ ꓜꓲꓼ ꓞꓳ ꓗꓪ ꓧꓳꓼ ꓣꓱ: ꓢꓴ ꓕꓲ: ꓝ ꓗꓳꓸ ꓕꓲ: ꓝ ꓗꓪ ꓟ ꓞꓳ ꓪꓴꓽ ꓞꓳ ꓟ ꓐꓴ ꓮ ꓙꓵꓽ ꓐꓲ ꓜꓲꓼ ꓞꓹ ꓡꓳ= ꓬꓲ ꓪ ꓠꓬ ꓮ-ꓐ-ꓡ-ꓦ ꓪꓴ-ꓢ꓾ ꓬꓲ-ꓢ ꓬ-ꓗꓴ ꓬꓲ ꓪꓴ-ꓢ꓾ ꓒꓵ: ꓒ: ꓐꓴ ꓡꓰ ꓧꓳ: ꓣꓱ: ꓡꓹ ꓟ ꓪꓴ-ꓢ ꓦ ꓡꓱ ꓚꓱꓹ ꓗꓪ ꓕꓶ ꓕꓶ ꓐꓰ ꓙꓵꓻ ꓔꓬ ꓡꓳ= ꓦꓬꓼ ꓠꓬꓲ ꓕꓱ ꓟ ꓗꓪ ꓚꓬꓴꓸ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓟꓲ ꓠꓯ ꓗꓪ ꓡ ꓟ ꓬꓲ ꓑꓶ. ꓔꓯ ꓔꓱꓹ ꓔꓱꓹ ꓐꓰ ꓥꓪ ꓠꓬ ꓬꓲ-ꓢꓷ-ꓡꓰ ꓔꓯ ꓚꓬꓴꓸ ꓢꓲ ꓒ: ꓙꓲ-ꓢꓴ ꓪ ꓔꓲ ꓟꓲ-ꓢ-ꓬ ꓥ ꓡꓳ꓾ ꓐꓰ ꓬꓴ-ꓔ ꓡ ꓞꓳ ꓗꓳ ꓡꓳ ꓗꓪ ꓟ. ꓟꓲ ꓚ ꓢꓲ ꓶꓼ ꓓꓳ ꓫꓱꓹ ꓓꓳ ꓟꓬꓱ: ꓬꓰˍ ꓡꓳ= ꓶꓼ ꓓꓳ ꓫꓱꓹ ꓓꓳ ꓟꓬꓱꓽ ꓬꓰ ꓢꓲ꓾ꓘꓴ ꓜꓲꓼ ꓞꓳ ꓔꓶꓺ ꓪꓴꓸ ꓔꓴ ꓢꓲ ꓪꓴ-ꓢ ꓚꓵ ꓚꓵ ꓥ ꓟ ꓢꓷꓸ ꓡꓰ ꓓꓴ ꓮ ꓟꓬꓹ ꓫꓵ: ꓬꓰ ꓟꓳꓸ ꓖꓶˍ ꓡꓳ=

ꓖꓳ ꓡꓱ ꓥ ꓟꓲ ꓬꓴ-ꓔ ꓡ ꓞꓳ ꓐꓴ ꓒ-ꓡꓲ-ꓢꓷ ꓐꓴ꓾ ꓔꓲ ꓒ ꓐꓴ ꓠꓬ ꓬꓰ-ꓢꓴ ꓬꓰˍ ꓟ ꓢꓷꓸ ꓡꓰ ꓓꓴ ꓔꓯ ꓡꓳ. ꓟꓳˍ ꓥ ꓟꓲ ꓬꓰ-ꓢꓴ ꓔꓯ ꓠꓬꓲ ꓣꓳ ꓢꓲ꓾ ꓠꓴ ꓠꓬ ꓬꓳ-ꓢꓷ ꓐꓰ ꓟ-ꓡꓲ-ꓬ ꓤ ꓟ: ꓥ ꓡ? ꓮ ꓡꓰ ꓢꓲ ꓚꓬꓴꓸ ꓢꓲꓺ ꓒ ꓒꓬꓱꓼ ꓡ ꓓꓹ ꓡ? ꓐꓰ ꓬꓰ-ꓢꓴ ꓔꓯ ꓔꓳꓹ ꓟ ꓐꓰ ꓕꓲ: ꓤꓶꓻ ꓗꓳꓸ ꓕꓲ: ꓤꓶꓻ ꓗꓪ ꓙꓲ-ꓢꓴ ꓔꓯ ꓟꓳꓸ ꓖꓴ ꓢꓲ ꓟꓷ ꓠꓷꓹ ꓝ. ꓘꓶ: ꓮ ꓙꓵ: ꓔꓯ ꓥ ꓟꓲ ꓟ: ꓘꓳꓹ ꓣꓴ=

ꓬꓲ ꓪ ꓥꓳ ꓡꓳꓸˍ ꓟ ꓠꓬ꓾ ꓚꓬꓴ ꓢꓲꓺ ꓒ ꓛꓲ ꓡ ꓟ ꓠꓬ ꓐꓶ: ꓞꓳ ꓮ ꓙꓵ: ꓔꓯ ꓢꓰꓼ ꓧꓪ ꓡꓰ ꓢꓲ ꓬꓲ-ꓢꓷ-ꓡꓰ ꓗꓴꓷꓼ ꓔꓶ ꓡꓹ ꓥꓳ ꓐꓰ ꓥꓳ ꓡꓳ. ꓢꓲ ꓙꓵꓻ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓟꓲ ꓠꓯ ꓕꓲ: ꓒꓳꓹ ꓗꓪ ꓟ ꓔꓯ ꓥꓳ ꓡꓳꓸ ꓗꓷꓳ=

ꓪꓴ-ꓢ ꓥꓳ ꓡꓳ.ˍ ꓟ ꓠꓬ ꓕꓲ: ꓟꓲ ꓠꓯ ꓡꓱꓼ ꓗꓪ ꓟ ꓡ ꓞꓳ ꓔꓯ ꓚꓬꓴꓸ ꓠꓹ ꓟ ꓬꓲ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡꓹ ꓟ ꓠꓬ ꓪꓴ-ꓢ ꓬꓲ ꓔꓶ ꓙꓱꓼ ꓓ ꓟ ꓥ ꓡꓳ= ꓕꓱ ꓟ ꓪꓴ. ꓠꓬꓲ ꓘꓶ: ꓫꓵꓽ ꓡꓵꓺ ꓗꓪ ꓟ ꓘꓴ ꓜꓲꓼ ꓞꓳ ꓐꓰ ꓙꓲ-ꓢꓴ ꓔꓳꓹ ꓡꓯ ꓘꓳ ꓠ ꓗꓷ ꓡꓰ ꓟ ꓥ ꓡꓳ=

ꓬꓰ-ꓢꓴ ꓡꓰ ꓝꓲ- ꓓꓴ ꓒꓲ-ꓕꓱ ꓔꓯ ꓐꓯˍ ꓟ ꓐꓯ ꓘꓶ: ꓠꓬ ꓬꓲ ꓪ ꓔꓯ ꓥ ꓟꓲ ꓐꓯ ꓬꓯꓼ ꓡꓰꓳ= ꓮ ꓡꓲꓳ ꓐꓯ ꓠꓬ ꓒꓲ-ꓕꓱ ꓔꓯ ꓢ-ꓓꓯ ꓠꓴ ꓥꓪ ꓔꓯ ꓐꓰ ꓧꓹ ꓙꓰ= ꓠꓴ ꓠ: ꓪꓴ-ꓢ ꓠꓲꓹ ꓡꓶ: ꓔꓯ ꓟ: ꓠꓲꓹ ꓥꓳ= ꓞꓳ ꓤ ꓠꓲꓹ ꓟ ꓔꓯ ꓡꓰꓽ ꓠꓲꓹ ꓥꓳ ꓡꓳ꓾ ꓐꓰ ꓐꓯ ꓟ ꓕꓲ: ꓡꓰꓹ ꓐꓰ ꓬꓴ-ꓔ ꓡ ꓞꓳ ꓐꓴ ꓥ ꓟꓲ ꓡ ꓞꓳ ꓠꓵˍ ꓟ ꓔꓯ ꓡꓰꓽ ꓛꓳ ꓢꓲ ꓪꓴ-ꓢ ꓠꓵˍ ꓟ ꓔꓯ ꓒꓰꓹ ꓡꓳ ꓗꓷ ꓠꓬꓲ ꓬꓰ-ꓢꓴ ꓔꓯ ꓝꓴꓲꓸ ꓓꓰˍ ꓡꓳ= ꓢꓯ. ꓬꓲꓼ ꓡ ꓟ ꓔꓯ ꓥ ꓟꓲ ꓢꓯ. ꓬꓲꓼ ꓡꓻꓳ꓾ ꓐꓰ ꓟ. ꓟꓲ ꓟ: ꓚ ꓠꓹ ꓟ ꓟꓯꓼ ꓒ: ꓐꓴ ꓔꓯ ꓒꓴ ꓖꓶ: ꓢꓲ ꓘꓶꓸ ꓬꓲ: ꓔꓬ ꓟ ꓫ. ꓪ ꓘꓶ: ꓠꓬ ꓠꓬꓲꓸ ꓠꓬꓲ ꓗꓪ ꓛꓲ ꓬꓴ-ꓔ ꓡ ꓞꓳ ꓐꓴ ꓗꓳ ꓡꓳ ꓗꓪ ꓟ. ꓟꓲꓽ ꓕꓱ ꓟ ꓓꓹ ꓡꓳ=