ꓙꓱ-ꓡꓱ-ꓘꓳ (ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓡꓳ ꓒꓱ ꓚꓱꓹ)

ꓣꓳ ꓔꓬ ꓟ ꓟꓲ ꓠꓯ ꓕꓱ ꓟ ꓕꓯꓽ ꓢꓲ ꓗꓪ ꓙꓳ ꓔꓬ ꓟ ꓡꓳ ꓒꓱ ꓐꓴ ꓘꓴꓽ ꓗꓪ ꓬꓲꓸ ꓞꓲꓼ ꓟꓽ ꓓ ꓪꓴꓽ ꓓꓰ ꓡꓰˍ ꓟ ꓡꓳ ꓒꓱ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓥ ꓡꓳ= ꓡꓳ ꓒꓱ ꓕꓱ ꓟ ꓠꓬ ꓬꓲ ꓪꓴꓸ ꓔꓶˍ ꓕꓯ ꓡꓰ ꓠꓬꓲꓸ ꓠꓬꓲ ꓗꓪ ꓛꓲꓺ ꓞꓳ ꓤ ꓔꓬ ꓗꓷ ꓟ ꓮ ꓠꓱ ꓕꓯ ꓟ ꓡꓳ ꓒꓱ ꓐꓴ ꓘꓴꓽ ꓗꓪ ꓕꓲ ꓟ ꓥ ꓡꓳ=

ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ West Bank ꓗꓪ ꓙꓳˍ ꓟ ꓩꓱ-ꓡꓲ-ꓫꓵ ꓟꓵꓽ ꓗꓪ ꓟ ꓡꓳ ꓒꓱ ꓕꓲ ꓟ ꓥ ꓢꓲ꓾ ꓡꓳ ꓒꓱ ꓐꓶ ꓓꓳ ꓗꓪ ꓬꓳ-ꓔ ꓬꓲꓻ ꓟ ꓐꓰ ꓐꓶ ꓓꓵꓽ ꓗꓪ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓓꓹ ꓡꓳ= ꓡꓳ ꓒꓱ ꓕꓱ ꓟ ꓠꓬ ꓩꓱ-ꓡꓲ-ꓫꓵ ꓐꓴ ꓡꓰ ꓙꓵꓽ ꓔꓬ ꓟ ꓡꓳ ꓒꓱ ꓕꓲ ꓟ ꓥ ꓢꓲ ꓑ ꓫꓬ 20416 ꓣꓳ ꓔꓬ ꓟ ꓥ ꓢꓲ ꓠꓬꓲ꓾ ꓡꓳ ꓒꓱ ꓗꓪ ꓩꓲꓸ ꓛꓲ ꓟꓵꓽ ꓛꓵꓽ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓔꓶ ꓜ ꓔꓶ ꓓꓳˍ ꓟ ꓗꓪ ꓮ ꓘꓶꓸ ꓢꓯꓼ ꓟꓶˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓲꓽ ꓫꓬ ꓕꓳ ꓶ ꓗꓪ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓠꓬ꓾ ꓪꓴ-ꓢ ꓡꓰ ꓢꓷꓸ ꓡꓰ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓗꓷ ꓟ ꓡꓳ ꓒꓱ ꓐꓰ ꓐꓯ ꓢꓲ꓾ ꓞꓳ ꓤ ꓮ ꓟꓬꓹ ꓢꓷ ꓔ ꓟ ꓥ ꓪ= ꓡꓳ ꓒꓱ ꓔꓯ ꓠꓬ꓾ ꓬꓳ-ꓔ ꓬꓲꓻ ꓟ ꓔꓯ ꓗꓳꓸ ꓢꓲ꓾ ꓪꓴ-ꓢ ꓡꓰ ꓖꓶˍ ꓥꓳ ꓐꓰ ꓐꓯ ꓔ ꓟ ꓟꓵꓽ ꓮ ꓙꓵꓽ ꓟ ꓗꓪ ꓬꓲ-ꓢꓷ-ꓡꓲ ꓐꓴ ꓬꓲꓸ ꓪꓴꓸ ꓓꓶꓽ ꓧꓪꓸ ꓡꓰ ꓗꓷ ꓟ ꓡꓳ ꓒꓱ ꓕꓲ ꓟ ꓥ ꓡꓳ= (ꓬꓳ-ꓫꓴ=5ꓽ13 - 6ꓽ23)

ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓢꓲꓺ ꓒ ꓬꓰ-ꓢꓴ ꓟꓬꓱꓽ ꓐꓬꓱꓽ ꓘꓶꓽ ꓗꓪ ꓮ ꓟꓬꓹ ꓟꓳꓻ ꓪ ꓓꓹ ꓡꓳ=

ꓢꓲꓺ ꓒ ꓬꓰ-ꓢꓴ ꓟꓬ ꓔꓶ ꓕꓲ ꓣꓳ ꓔꓯ ꓠꓬꓲ ꓟꓳꓻ ꓡ ꓝꓲˍ ꓟ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓒ ꓕꓲꓺ ꓗꓪ ꓥ ꓡꓳ= (ꓟ-ꓕꓲ 20ꓽ29-34) ꓬꓰ-ꓢꓴ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓗꓳꓸ ꓙꓰˍ ꓕꓯ ꓝꓲꓸ ꓫ ꓪꓴꓸ ꓓꓵ ꓣꓱꓽ ꓢꓴ ꓢ-ꓘꓰ-ꓬꓴ ꓐꓰˍ ꓟꓲ ꓜꓲ ꓡꓯ ꓘꓳ ꓗꓷ ꓟ= (ꓡꓴ-ꓘ 19ꓽ1-10)

ꓢꓲꓺ ꓒ ꓬꓰ-ꓢꓴ ꓦꓬꓼ ꓠꓬꓲ ꓗꓪ ꓒꓴꓻ ꓫꓵꓺ ꓮ ꓟꓬꓹ ꓙꓳˍ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓓꓰꓽ ꓜꓽ ꓢꓴ꓾ ꓞꓳ ꓫꓸ ꓐꓴ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓔꓯ ꓘꓶꓽ ꓫꓵꓽ ꓫꓵꓼ ꓕꓳꓽ ꓶ ꓗꓪ ꓖꓴ ꓟꓸ ꓖꓶ ꓔ ꓡꓳ= (ꓟ-ꓕꓲ 20ꓽ24-34) (ꓟ-ꓘꓳ 10ꓽ46-52) (ꓡꓴ-ꓘ 18ꓽ15-43)

ꓝꓮꓲ ꓘꓶꓽ ꓫꓵꓽ ꓡꓵꓺ ꓗꓪ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓙꓲꓽ ꓫꓴꓽ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓙꓲꓽ ꓫꓴꓽ ꓡꓳ ꓒꓱ ꓐꓰ ꓘꓴ ꓔ ꓟ ꓙꓳˍ ꓡꓳ (ꓙꓵꓽ ꓗ ꓐꓯ ꓟꓸ 34ꓽ3꓾ ꓐꓯ ꓟꓴ ꓫꓬꓹ ꓒ 1ꓽ16ꓹ 3ꓽ13꓾ 2 ꓚ ꓟꓲꓽ 28ꓽ5) =

ꓟꓷꓽ ꓠꓷꓹ ꓝ ꓒ ꓟꓳ-ꓫꓲ ꓫꓵꓻ ꓗꓷ ꓗ ꓠꓯꓸ ꓠꓴ-ꓠꓷ ꓬꓲ ꓤ ꓬꓳ-ꓫꓴ ꓔꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓪꓴꓸ ꓓꓵ ꓣꓱꓽ ꓠꓹ ꓟ ꓢꓲꓺ ꓗꓷꓳ= ꓪꓴ-ꓢ ꓡꓰ ꓖꓴ ꓟꓳꓸ ꓖꓶˍ ꓟ ꓗꓪ ꓐꓰ ꓬꓲ ꓪ ꓐꓴ ꓠꓬ ꓘꓷ-ꓠ ꓗꓪ ꓬꓲꓼ ꓙꓰ ꓢꓲ ꓘꓷ-ꓠ ꓡꓳ ꓒꓱ ꓔꓯ ꓣꓴ ꓗꓷꓳ= ꓬꓲ-ꓢꓷ-ꓡꓰ ꓚ ꓚꓱꓹ ꓗꓪ ꓙꓳˍ ꓟ ꓬꓲ ꓪꓴꓸ ꓟ ꓡꓳ ꓒꓱ ꓠꓬ ꓙꓱ-ꓡꓱ-ꓘꓳ ꓥ ꓢꓲ ꓠꓬꓲ꓾ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓠꓬ ꓮ ꓘꓶꓸ ꓟꓴˍ ꓟ ꓚꓬꓹ ꓚꓱꓹ ꓡꓰ ꓗꓽ ꓔ ꓡꓳ=

ꓬꓳ-ꓫꓴ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓬꓲ ꓙꓲꓻ ꓕꓺ ꓠꓬꓲ ꓠꓹ ꓟ ꓘꓳ ꓫꓱ ꓫꓱˍ ꓐꓰ ꓡ ꓞꓳ ꓠꓬꓲꓽ ꓣꓳ ꓝꓲ ꓩꓴ ꓗꓷˍ ꓡꓳ= ꓖꓳ ꓟ ꓔꓯ ꓪ ꓔꓲ ꓢꓷꓸ ꓡꓰ ꓠꓬ ꓡ-ꓧꓳ ꓔꓬ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ ꓠꓴ ꓦꓲꓻ ꓗꓪ ꓔꓬ ꓡꓹ ꓟ ꓣꓳ ꓟꓵꓽ ꓔꓯ ꓕꓺ ꓠꓬꓲ ꓢꓴ ꓖꓳ ꓠꓬꓲꓽ ꓣꓳ ꓔꓯ ꓘꓴ ꓓꓳ ꓡꓯ ꓐꓯˍ ꓡꓳ= ꓖꓳ ꓡꓱ ꓥ ꓟꓲ ꓡ-ꓧꓳ ꓠꓬ ꓬꓲ-ꓢꓷ-ꓡꓰ ꓪꓴ-ꓢ ꓡꓰ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓒꓬꓹ ꓗꓷˍ ꓐꓰ ꓬꓰˍ ꓟ ꓔꓯ ꓢꓷꓸ ꓡꓰ ꓠꓬꓲ ꓕꓺ ꓠꓬꓲ ꓢꓴ ꓬꓲ-ꓢꓷ-ꓡꓰ ꓡ ꓞꓳ ꓠꓬꓲꓽ ꓣꓳ ꓔꓯ ꓑꓬ ꓔꓬꓹ ꓝꓲ ꓢꓲ ꓪ ꓔꓲ ꓡꓯ ꓒꓯꓹ ꓗꓪ ꓐꓰ ꓡꓲꓹ ꓗꓷ ꓠꓹ ꓟ ꓬꓰ ꓙ ꓖꓶˍ ꓡꓳ=

ꓙꓱ-ꓡꓱ-ꓘꓳ ꓢꓰꓼ ꓡꓯ ꓘꓳ ꓦꓬꓼ ꓠꓬꓲ ꓟꓽ ꓛꓲꓺ ꓡ ꓢꓰꓽ ꓕꓯ ꓡꓳ ꓒꓱ ꓔꓯ ꓕꓲ ꓠꓬꓲ ꓕꓲ ꓧꓪꓹ ꓐꓰ ꓛꓳꓼ ꓠꓬꓲ ꓚꓳꓻ ꓙꓰ ꓠꓹ ꓟ ꓪꓴ-ꓢ ꓡꓰ ꓕꓵꓼ ꓪ ꓖꓶˍ ꓡꓳ= ꓖꓳ ꓡꓱ ꓚꓳꓻ ꓙꓰˍ ꓟ ꓗꓪ ꓔꓲꓺ ꓒ ꓫꓵꓽ ꓣꓳ ꓠꓬ ꓮ ꓣꓳ ꓑꓸ ꓪꓴꓸ ꓛꓲ ꓡꓰ ꓫꓬꓹ ꓔ ꓟ ꓐꓵ ꓞꓲ ꓕꓲ ꓣꓳ ꓕꓲ ꓕꓷꓹ ꓔꓯꓹ ꓔ ꓢꓲ ꓘꓶꓽ ꓫꓵꓽ ꓝꓲꓸ ꓖꓶ ꓑꓱꓸ ꓢꓲ ꓚꓳꓻ ꓙꓰ ꓠꓹ ꓟ ꓐꓰ ꓫꓵꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓡꓳ ꓒꓱ ꓔꓯ ꓫꓵꓽ ꓧꓪꓹ ꓚꓳꓻ ꓙꓰ ꓢꓲ ꓑ ꓫꓬ ꓮ ꓙꓵꓽ ꓥˍ ꓟꓲ ꓖꓳ ꓟ ꓔꓯ ꓒꓵꓽ ꓛꓳ ꓠ ꓗꓹ ꓡꓳ꓾ ꓐꓰ ꓬꓳ-ꓫꓴ ꓔꓯ ꓐꓯ ꓖꓶ ꓗꓷꓳ= ꓬꓳ-ꓫꓴ ꓥˍ ꓟꓲ ꓖꓳ ꓟ ꓡꓰ ꓐꓰ ꓬꓰ ꓗꓷꓳ=

ꓫꓵꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓡꓳ ꓒꓱ ꓚꓬꓹ ꓮ ꓙꓵꓽ ꓐꓱꓽ ꓙꓰ ꓗꓷ ꓢꓲ ꓟꓯꓼ ꓜꓴ ꓐꓴ ꓠꓬ ꓔꓱ ꓔꓱꓹ ꓓꓵꓽ ꓙꓰ ꓢꓲ ꓠꓬꓲ ꓡꓳ ꓒꓱ ꓔꓯ ꓣꓴ ꓟꓶ ꓡꓰꓳ= ꓖꓳ ꓪꓴꓽ ꓟ ꓡꓽ-ꓧꓳ ꓐꓰ ꓬꓲ ꓕꓲ ꓦꓲꓻ ꓢꓴ ꓔꓯ ꓠꓽ ꓟꓽ ꓢꓰꓼ ꓗꓷ= ꓗꓷ-ꓠ ꓗꓴꓷꓼ ꓔꓯ ꓣꓴ ꓟꓶ ꓗꓷˍ ꓟ ꓬꓲ ꓪꓴꓸ ꓟ ꓡꓳ ꓒꓱ ꓕꓲ ꓟ ꓡꓱꓸꓼ ꓔꓯ ꓪꓴ-ꓢ ꓔꓯ ꓡꓯꓼ ꓙꓱ ꓖꓶˍ ꓡꓳ= (ꓬꓳ-ꓫꓴ 6ꓽ17)

ꓢꓰꓼ ꓡꓯ ꓘꓳꓹ ꓟ ꓗꓪ ꓐꓰ ꓟꓶˍ ꓟ ꓒꓴ꓾ ꓫꓵꓺ꓾ ꓙꓲꓽ ꓐꓰ ꓧꓳꓺ ꓕꓱ ꓟꓬ ꓫꓵꓽ ꓡꓰ ꓫꓬꓹ ꓔ ꓟ ꓖꓴꓽ ꓙꓴꓽ ꓔꓯ ꓚꓲꓸ ꓛꓬ ꓐꓱ ꓶ ꓟꓽ ꓣꓴ ꓣꓴ꓾ ꓪꓴ-ꓢ ꓐꓱ ꓶ ꓚꓰꓸ ꓔ ꓢꓲ ꓬꓲ ꓒꓵꓽ ꓶꓽ ꓗꓹ ꓗꓪ ꓔꓯꓹ ꓧꓳꓽ ꓡꓯ ꓐꓰ ꓬꓳ-ꓫꓴ ꓡꓰ ꓐꓯ ꓖꓶˍ ꓡꓳ= (ꓬꓳ-ꓫꓴ 6ꓽ19)

ꓖꓳ ꓡꓱ ꓢꓲ ꓠꓬꓲ ꓬꓲ-ꓢꓷ-ꓡꓰ ꓐꓴ ꓔꓯ ꓧꓪꓸ ꓡꓰ ꓝꓲˍ ꓟ ꓪꓴ-ꓢ ꓐꓱ ꓶ ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ ꓞꓲꓺ ꓐꓱ ꓕꓲ ꓐꓱ ꓒꓬꓱꓼ ꓡ ꓗꓷꓳ= ꓪꓴ-ꓢ ꓬꓲ ꓑ ꓫꓬ ꓐꓴ ꓧꓪꓸ ꓡꓰˍ ꓟ ꓬꓲ ꓪꓴꓸ ꓕꓲ ꓧꓪꓹ ꓥ ꓟ ꓑꓶꓸ ꓓꓴ ꓧꓪꓸ ꓡꓰ ꓟ ꓑꓮꓲꓽ ꓔꓯ ꓬꓲ ꓓꓽ ꓟ ꓬꓰ ꓗꓷ ꓢꓲ ꓙꓱ-ꓡꓱ-ꓘꓳ ꓐꓬ ꓡꓰ ꓗ ꓠꓯꓸ ꓫꓬꓹ ꓜꓶꓻ ꓢꓴ ꓔꓯ ꓬꓳ-ꓫꓴ ꓡꓰ ꓙꓱꓽ ꓘꓶꓽ ꓖꓶ ꓗꓷꓳ= (ꓬꓳ-ꓫꓴ 6ꓽ26) ꓮ-ꓘꓷ-ꓠ ꓟꓬꓱꓺ ꓔ ꓟ ꓡ ꓞꓳ ꓕꓲ ꓣꓳ ꓠꓬ ꓕꓽ ꓣꓴ ꓐꓯ ꓔ ꓟ ꓖꓴꓽ ꓙꓴꓽ ꓣꓴ ꓗꓷ ꓟ ꓪꓴꓸ ꓠꓬꓲ ꓬꓲ ꓐꓰ ꓬꓲ ꓕꓲ ꓦꓲ ꓢꓴ ꓔꓯ ꓪꓴ-ꓢ ꓠꓲꓹ ꓟ ꓦꓶꓻ ꓡꓰ ꓢꓲ ꓬꓲ ꓕꓲ ꓦꓲꓻ ꓢꓴ ꓮ ꓙꓵꓽ ꓫꓵꓻꓳ= 

ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓐꓰ ꓬꓲ-ꓡꓲ-ꓫ ꓦꓬꓼ ꓠꓬꓲ ꓥ ꓟ ꓬꓲ ꓘꓳꓼ 500 ꓘꓳꓼ ꓗꓪ ꓛꓲꓺ ꓟꓽ ꓐꓬ ꓡꓰ ꓡꓰ ꓕꓶꓺ ꓞꓹ ꓗꓷꓳ=

ꓖꓳ ꓗ ꓠꓯꓸ ꓐꓱ-ꓕꓷ-ꓡꓲ ꓢꓴ ꓦꓲ-ꓡꓷ ꓡꓰ ꓙꓱ-ꓡꓱ-ꓘꓳ ꓡꓳ ꓒꓱ ꓚꓬꓹ ꓔꓯ ꓫꓬꓹ ꓜꓶ ꓗꓷ ꓠꓬꓲ ꓬꓲ ꓤ ꓠꓬꓲꓽ ꓣꓳ ꓫꓵꓻ ꓗꓷ ꓕꓯ ꓠꓬ ꓬꓳ-ꓫꓴ ꓐꓯ ꓔꓲꓸ ꓬꓰ ꓟ ꓐꓯ ꓘꓶꓽ ꓮ ꓙꓵꓽ ꓠꓬ ꓐꓲ ꓡꓰꓳ= ꓟꓳ-ꓮ-ꓐꓷ ꓪ ꓔꓲ ꓰ-ꓗꓷ-ꓡꓳ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓟꓳ-ꓮ-ꓐꓷ ꓪ ꓔꓲ ꓰ-ꓗꓷ-ꓡꓳ ꓔꓯ 18 ꓘꓳꓼ ꓣꓱꓽ ꓙ ꓠ ꓗꓷ ꓡꓰꓳ= (ꓐꓯ ꓟꓴ ꓫꓬꓹ ꓒ 3ꓽ14)

1 ꓚ ꓟꓲ 19ꓽ5 ꓗꓪ ꓫꓸ ꓔꓳ ꓡꓰ ꓢꓲ ꓬꓲꓼ ꓡ ꓟꓽ ꓑꓶꓸ ꓟ ꓚꓳ ꓑꓸ ꓐꓴ ꓔꓯ ꓪ ꓔꓲ ꓓ-ꓪꓵ ꓠꓬ ꓟꓷꓼ ꓝꓲ ꓣꓱꓻ ꓡ ꓗꓪ ꓛꓲ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓔꓬ ꓠꓹ ꓟ ꓐꓯ ꓖꓶ ꓗꓷꓳ꓾ ꓐꓰ ꓐꓯ ꓔ ꓡꓳ= 2 ꓪ ꓔꓲ 2ꓽ4-18 ꓗꓪ ꓡꓳꓸ ꓠꓬꓲ ꓗꓷ ꓠꓬ ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ ꓟꓷꓽ ꓠꓷꓹ ꓝ ꓢꓴ ꓐꓴ ꓢꓳ ꓣꓴ ꓖꓴ ꓦꓲˍ ꓡꓰ ꓐꓰ ꓥ ꓪ= 2 ꓪ ꓔꓲ 2ꓽ19-22 ꓗꓪ ꓠꓬ ꓙꓱ-ꓡꓱ-ꓘꓳ ꓗꓪ ꓟ ꓬꓲꓻ ꓙꓬ ꓔꓯ ꓬꓲ-ꓡꓲ-ꓫ ꓡꓰ ꓫꓬ ꓡꓰ ꓝꓲ ꓗꓷ ꓟ ꓢꓷꓸ ꓡꓰ ꓓꓴ ꓔꓯˍ ꓟꓲ ꓖꓴ ꓟꓳꓸ ꓖꓶ ꓔ ꓡꓳ=

ꓪ ꓔꓲ ꓬ-ꓧ-ꓢꓶ ꓦꓬꓼ ꓠꓬꓲ ꓗꓪ ꓡꓳꓽ ꓔꓯꓹ ꓡ ꓢꓴ ꓕꓲ ꓜꓴ ꓔꓯ ꓐꓵ ꓞꓶꓽ ꓖꓶ ꓖꓪꓽ ꓠꓬꓲ꓾ ꓜꓽ ꓓꓴ ꓖꓶ ꓜꓽ ꓠꓬꓲ꓾ ꓠꓻ ꓓꓴ ꓓꓴ ꓡꓰ ꓢꓴ ꓔꓯ ꓮꓽ ꓛꓬꓽ ꓞꓶ ꓟꓰ ꓖꓶ ꓗꓷ ꓢꓲ꓾ ꓢꓯꓼ ꓐꓽ ꓢꓴ ꓔꓯ ꓠꓬ ꓕꓳꓽ ꓡ ꓟꓴ ꓜꓶꓽ ꓝꓲ ꓢꓲ ꓙꓲ ꓫꓴꓽ ꓜꓲ ꓡꓳ ꓒꓱ ꓟꓬꓱꓺ ꓔ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓗꓪ ꓬꓲ ꓪ ꓫꓵꓽ ꓤ ꓧꓪ ꓤ ꓔꓬ ꓟ ꓗꓪ ꓧꓳꓽ ꓦ ꓬꓰˍ ꓡꓳ꓾ ꓐꓰ 2 ꓚꓺ ꓟꓲꓽ 28ꓽ15 ꓗꓪ ꓐꓯ ꓔ ꓡꓳ=

ꓙꓱ-ꓡꓱ-ꓘꓳ ꓡꓳ ꓒꓱ ꓚꓱꓹ ꓔꓯ ꓟꓳꓸ ꓘꓶꓽ ꓫꓵ ꓡꓵꓺ ꓗꓪ ꓟꓳꓻ ꓪˍ ꓟ ꓡꓳꓹ ꓬꓰˍ ꓕꓲ ꓟ ꓠꓬ ꓚꓬ-ꓡꓷ-ꓔꓲ ꓟꓯꓼ ꓜꓴ ꓐꓴ ꓛꓰꓹ ꓙꓰ ꓗꓷ ꓢꓲ ꓪ ꓔꓲ ꓜꓷ-ꓓꓳ-ꓘꓷ-ꓬ ꓔꓯ ꓣꓴ ꓟꓶˍ ꓗꓪ ꓛꓲˍ ꓡꓰꓽ ꓥ ꓡꓳ= ꓱ-ꓢꓶ-ꓡ 2ꓽ34 ꓐꓰ ꓠꓲ-ꓬ-ꓟ-ꓬ 7ꓽ 36 ꓗꓪ ꓐꓯ ꓔ ꓟ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓢꓳ-ꓡꓳ-ꓑ-ꓑꓷ ꓐꓴ ꓡꓰ ꓧꓳꓽ ꓬꓲꓼ ꓡ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓢꓴ ꓠꓬ 345 ꓣꓳ ꓥ ꓟ ꓐꓰ꓾ ꓬꓲ ꓪ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓔꓯ ꓫꓬꓹ ꓔꓶˍ ꓟ ꓗꓪ ꓐ ꓗꓷ ꓟ ꓥ ꓡꓳ꓾ ꓐꓰ ꓐꓯ ꓔ ꓟˍ ꓟꓲ ꓙꓳˍ ꓡꓳ=

ꓘꓶꓽ ꓫꓵꓽ ꓫꓵꓼ ꓗꓪ ꓟ ꓙꓱ-ꓡꓱ-ꓘꓳ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓖꓴ ꓪꓴꓸ ꓔꓯ ꓟꓳꓸ 1 ꓕꓷꓹ ꓶꓽˍ ꓟ ꓪ ꓓꓰꓺ ꓗꓪ ꓓꓹ ꓡꓳ=

ꓠꓬꓲꓸ ꓠꓬꓲ ꓗꓪ ꓟ ꓙꓱ-ꓡꓱ-ꓘꓳ ꓡꓳ ꓒꓱ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓟ ꓡꓳ ꓒꓱ ꓐꓰ ꓘꓶꓽ ꓫꓵꓽ ꓫꓵꓼ ꓗꓪ ꓟ ꓡꓳ ꓒꓱ ꓠꓬꓲꓽ ꓖ ꓡꓱꓸꓼ ꓗꓪ ꓓꓹ ꓟ ꓥ ꓡꓳ=