ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓔꓯꓺ ꓥꓳꓽ

ꓪꓴ-ꓢ ꓬꓲ ꓔꓯꓺ ꓥꓳꓽ ꓕꓲ ꓟ ꓠꓬ ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓟꓸ ꓟꓲꓽ ꓥ ꓢꓲ ꓠꓬꓲ ꓟꓸ ꓟꓲꓽ ꓠꓬ ꓕꓱ ꓡꓱ ꓥꓳ=

ꓬꓰ-ꓢꓴ ꓙꓲ-ꓢꓴ ꓟꓲ ꓠꓯ ꓗꓪ ꓞꓳ ꓙꓳ ꓔꓬ ꓕꓯ ꓬꓲ ꓠꓬ ꓞꓳ ꓤ ꓐꓴ ꓔꓯ ꓟꓸ ꓟꓲꓽ ꓣꓱꓽ ꓢꓲ ꓟꓸ ꓖꓶˍ ꓡꓳ= ꓬꓲ ꓡꓰ ꓟꓸ ꓖꓶˍ ꓟ ꓟꓸ ꓟꓲꓽ ꓐꓴ ꓔꓯ ꓔꓯꓺ ꓥꓳꓽ ꓐꓰ ꓐꓯ ꓟ ꓥꓳ= ꓕꓲ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓳ-ꓔ ꓡ ꓞꓳ ꓐꓴ ꓔꓯ ꓢ-ꓟ-ꓡꓲ ꓟꓵꓽ ꓗꓪ ꓐꓰ ꓡˍ ꓟ ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓕꓲ ꓣꓳ ꓔꓯꓺ ꓥꓳꓽ ꓔꓯ ꓐꓯ ꓟꓸ ꓖꓶˍ ꓡꓳ= ꓙꓵꓽ ꓗ ꓔꓯ ꓟꓳꓸ ꓓꓻ ꓒ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓡ? ꓐꓰ ꓠ ꓠꓬꓲˍ ꓟ ꓗꓪ ꓐꓰ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓕꓱ ꓟ ꓐꓯ ꓟꓸ ꓖꓶˍ ꓟ ꓥ ꓡꓳ= ꓬꓲ ꓠꓬ ꓙꓵꓽ ꓗ ꓔꓯ ꓟꓳꓸ ꓓꓻ ꓒ ꓕꓲ ꓣꓳ ꓥ ꓠꓬꓲ ꓙꓵꓽ ꓗ ꓮ ꓙꓵꓽ ꓬꓲ ꓢꓷꓸ ꓔ ꓟ ꓪꓴꓸ ꓠꓬꓲ ꓬꓲ ꓠꓽ ꓐꓲ ꓜꓲꓼ ꓢꓴ ꓕꓲ ꓣꓳ ꓥꓳ꓾ ꓐꓰ ꓓꓵꓽ ꓙ ꓔꓬ ꓡꓳ= ꓬꓰ-ꓢꓴ ꓡꓰ ꓬꓲ ꓔꓯ ꓮ ꓡꓲ ꓐꓰ ꓒꓳꓹ ꓖꓶ ꓡˍ ꓟ ꓔꓯ ꓡꓰ ꓠꓲꓹ ꓫꓵˍ ꓟ ꓥ ꓡꓳ=

ꓥ ꓡꓳ꓾ ꓡ ꓞꓳ ꓒ ꓕꓱ ꓕꓲ ꓣꓳ ꓟ ꓮ ꓫꓵꓽ ꓓꓵꓽ ꓙ ꓔꓬ ꓟ ꓔꓯ ꓢꓷˍ ꓠꓬꓲ ꓙꓵꓽ ꓗ ꓕꓳꓽ ꓶ ꓗꓪ ꓮ ꓫꓵꓽ ꓐꓳ ꓔ ꓡ? ꓐꓰ ꓬꓰ-ꓢꓴ ꓡꓰ ꓠ ꓠꓬꓲˍ ꓡꓳ= ꓙꓵꓽ ꓗ ꓕꓳ ꓶ ꓗꓪ ꓠꓬ ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓶ ꓟꓬ ꓡꓱꓸꓼ꓾ ꓕꓲ ꓢꓯꓼ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓢꓲ ꓒꓽ ꓪꓴ-ꓢ ꓔꓯ ꓠꓲꓹ ꓠꓵ= ꓚꓲ ꓛꓬ ꓔꓯ ꓠꓲꓹ ꓠꓵˍ ꓟ ꓡꓰ ꓠꓶꓽ ꓛꓳꓽ ꓕꓲ ꓛꓳꓽ ꓔꓯ ꓠꓲꓹ ꓠꓵ꓾ ꓐꓰ ꓐꓳ ꓔ ꓡꓳ= ꓖꓳ ꓡꓱ ꓠꓬꓲ ꓥꓪ ꓠꓶꓽ ꓛꓳꓽ ꓕꓲ ꓛꓳꓽ ꓮꓽ ꓟ ꓥ ꓡ? ꓐꓰ ꓬꓰ-ꓢꓴ ꓔꓯ ꓠ ꓠꓬꓲˍ ꓡꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓕꓱ ꓟ ꓣꓱꓽ ꓢꓲ ꓙꓵꓽ ꓗ ꓒ ꓔꓯ ꓒꓳꓹ ꓖꓶˍ ꓡꓳ=

ꓡ ꓞꓳ ꓕꓲ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓙꓱ-ꓡꓱ-ꓘꓳ ꓗꓪ ꓬꓯꓼ ꓙꓰ ꓔꓬ ꓕꓯ ꓧꓶꓽ ꓚꓱꓸ ꓓꓶꓽ ꓒ (ꓞꓳ ꓘꓴꓽ ꓛꓬ ꓔꓳꓥꓸ꓾ ꓦꓴꓻ ꓜꓽ ꓢꓴ) ꓕꓲ ꓜꓴꓻ ꓡꓰ ꓬꓲ ꓔꓯꓹ ꓡˍ ꓟ ꓖꓴꓽ ꓙꓴꓽ ꓮ ꓙꓵꓽ ꓔꓯ ꓦꓴꓻ ꓔꓯ ꓙꓰ ꓢꓲ ꓠꓬꓲ ꓬꓲ ꓔꓯ ꓠꓽ ꓓꓶꓽ ꓠꓬꓲ ꓔꓲꓸ ꓠꓬꓲ ꓟꓽ ꓫꓵꓻ ꓟꓽ ꓢꓯꓸ ꓡꓳꓺ ꓔꓲꓸ ꓬꓰˍ ꓡꓳ=

ꓬꓰ-ꓢꓴ ꓐꓯ ꓟꓳꓸ ꓖꓶˍ ꓟ ꓔꓯꓺ ꓥꓳꓽ ꓠ ꓠꓹ ꓔꓬ ꓢꓴ ꓐꓴ ꓠꓬ ꓬꓳ-ꓔ ꓡ ꓞꓳ ꓐꓴ ꓥ ꓢꓲ ꓠꓬꓲ꓾ ꓔꓯꓺ ꓥꓳꓽ ꓗꓪ ꓟ ꓙꓻ ꓖꓴ ꓔꓯ ꓓꓵꓽ ꓙ ꓠꓬꓲ ꓔꓬ ꓖꓴˍ ꓡꓳ= ꓬꓰ-ꓢꓴ ꓡꓰ ꓔꓯꓺ ꓥꓳꓽ ꓔꓯ ꓝ ꓢꓲ ꓐꓯ ꓟꓸ ꓖꓶˍ ꓡꓳ= ꓖꓳ ꓗꓪ ꓔꓲꓺ ꓒ ꓕꓲ ꓣꓳ ꓬꓯꓼ ꓡ ꓔꓬ ꓟ ꓥ ꓢꓲ꓾ ꓬꓲ ꓔꓯ ꓟꓳ ꓗꓷ ꓠꓬ ꓖꓳ ꓫꓬꓼ ꓗꓪ ꓐꓰ ꓗꓳꓸ ꓙꓰˍ ꓡꓳ= ꓪꓴ-ꓢ ꓔꓯ ꓔꓲꓺ ꓖꓶ ꓔꓬ ꓟ ꓔꓲꓺ ꓒ ꓕꓲ ꓣꓳ ꓠꓽ ꓬꓰ ꓙˍ ꓥꓳ꓾ ꓬꓰ ꓙ ꓡ ꓗꓴˍ ꓥꓳ ꓐꓰ ꓢꓪꓸ ꓔ ꓓꓴ ꓙꓳˍ ꓡꓳ= ꓖꓳ ꓡꓱ ꓥˍ ꓟꓲ ꓔꓲꓺ ꓒ ꓠꓽ ꓟꓽ ꓬꓰ ꓙ ꓙ ꓬꓲ ꓔꓯˍ ꓐꓰ ꓗꓳꓸ ꓙꓰˍ ꓡꓳ=

ꓬꓰ-ꓢꓴ ꓡꓰ ꓝ ꓢꓲ ꓐꓯ ꓟ ꓠꓬ꓾ ꓔꓲꓺ ꓒ ꓐꓴ ꓔꓯ ꓣꓱꓽ ꓙ ꓔꓬ ꓟ ꓡꓱ-ꓬꓲ ꓡ ꓞꓳ ꓕꓲ ꓣꓳ ꓠꓬ ꓖꓳ ꓗꓪ ꓡ ꓢꓲ ꓡ ꓞꓳ ꓖꓳ ꓕꓲ ꓣꓳ ꓔꓯ ꓟꓳˍ ꓕꓯ ꓬꓲ ꓥˍ ꓟꓲ ꓗꓳꓸ ꓙꓰˍ ꓡꓳ=ꓬꓲ ꓥˍ ꓟꓲ ꓟꓽ ꓫꓵꓻ ꓟꓽ ꓢꓯꓸ ꓓꓳꓽ ꓔꓬ ꓟ ꓡ ꓞꓳ ꓔꓯ ꓟꓽ ꓬꓰ ꓙ ꓗꓷ=

ꓡꓳꓹ ꓬꓰˍ ꓗꓪ ꓢ-ꓟ-ꓡꓲ ꓕꓲ ꓣꓳ ꓙꓻ ꓖꓴ ꓖꓳ ꓟ ꓗꓪ ꓬꓯꓼ ꓡˍ ꓡꓳ= ꓕꓱ ꓗꓪ ꓣꓳ ꓢꓷꓸ ꓔ ꓓꓴ ꓠꓬ ꓢ-ꓟ-ꓡꓲ ꓡ ꓞꓳ ꓠꓽ ꓢ-ꓟ-ꓡꓲ ꓗꓪ ꓐꓰ ꓡˍ ꓟ ꓥ ꓡꓳ= ꓢ-ꓟ-ꓡꓲ ꓠꓬ ꓪꓴ-ꓢ ꓬꓲ ꓑ ꓫꓬꓼ ꓥ ꓟ ꓬꓳ-ꓔ  ꓡ ꓞꓳ ꓐꓴ ꓔꓬ ꓟ ꓬꓲ-ꓢꓷ-ꓡꓰ ꓒ ꓕꓲ ꓗꓪ ꓓꓹ ꓡꓳ= ꓢ-ꓟ-ꓡꓲ ꓐꓰ ꓬꓲ-ꓢꓷ-ꓡꓰ ꓠꓶꓽ ꓡꓯ ꓘꓳꓹ ꓥˍ ꓟꓲ ꓞꓳ ꓫꓵꓽ ꓕꓲ ꓫꓵꓽ ꓐꓰ ꓕꓲ ꓫꓵꓽ ꓠꓬ ꓟꓽ ꓪꓽ ꓡꓯ ꓘꓳ= ꓟꓽ ꓧꓳ ꓡꓯ ꓘꓳ= ꓢ-ꓟ-ꓡꓲ ꓡ ꓞꓳ ꓐꓰ ꓬꓳ-ꓔ ꓡ ꓞꓳ ꓐꓴ ꓟꓽ ꓠꓲꓹ ꓒꓴ ꓡꓯ ꓘꓳ ꓟꓽ ꓧꓳ ꓡꓯ ꓘꓳ ꓟ ꓪꓴꓸ ꓠꓬꓲ ꓔꓯꓺ ꓥꓳꓽ ꓕꓱ ꓟ ꓔꓯ ꓠ ꓠꓹ ꓔꓬ ꓢꓴ ꓐꓴ ꓠꓬ ꓢ-ꓟ-ꓡꓲ ꓡ ꓞꓳˍ ꓟꓲ ꓓꓳꓽ ꓓꓹ ꓟ ꓡ ꓞꓳ ꓒ ꓔꓯ ꓬꓰ ꓙ ꓥꓳ꓾ ꓐꓰ ꓟꓽ ꓥꓳ ꓡꓳꓸ ꓔ=

ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓬ ꓔꓯꓺ ꓥꓳꓽ ꓔꓯ ꓝ ꓢꓲ ꓐꓯ ꓟꓸ ꓖꓶˍ ꓡꓳ= ꓢ-ꓟ-ꓡꓲ ꓡ ꓞꓳ ꓠꓽ ꓖꓳ ꓕꓲ ꓣꓳ ꓔꓯ ꓟꓳ ꓗꓷ ꓕꓯ ꓫꓱꓸ ꓤ ꓔꓴ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓻ ꓓꓴ ꓔꓯ ꓮ ꓛꓬꓽ ꓞꓶ  ꓟꓰ ꓖꓶ ꓢꓲ ꓕꓱꓹ ꓖꓶˍ ꓡꓳ= ꓗ ꓠꓯꓸ ꓬꓲ ꓔꓯ ꓕꓳꓽ ꓡ ꓟꓴꓽ ꓗꓪ ꓚꓰꓹ ꓗꓷ ꓢꓲ ꓪꓰ ꓤ ꓦꓲ ꓗꓪ ꓧꓳꓽ ꓔꓯ ꓙꓰ ꓢꓲ ꓬꓲ ꓔꓯ ꓣꓱꓽ ꓙˍ ꓡꓳ= ꓗ ꓠꓯꓸ ꓕꓲ ꓠꓬꓲ ꓗꓪ ꓬꓲ ꓠꓬ ꓪꓰ ꓤ ꓢꓲꓺ ꓒꓽ ꓔꓯ ꓒꓴ ꓔꓯꓹ ꓖꓶ ꓗꓷ ꓢꓲ꓾ ꓬꓲ ꓔꓯ ꓠꓬꓲ ꓙ ꓡꓳꓸ ꓙ= ꓥꓪ ꓬꓲꓼ ꓡ ꓕꓯ ꓬꓲ ꓐꓱ ꓶ ꓣꓱꓽ ꓗꓷ ꓟ ꓮ ꓙꓵꓽ ꓥꓪ ꓡꓰ ꓠꓴ ꓔꓯ ꓚꓱꓹ ꓖꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓧꓶꓽ ꓚꓱꓸ ꓓꓶꓽ ꓒ (ꓞꓳ ꓘꓴꓽ ꓛꓬ ꓔꓳꓥꓸ꓾ ꓦꓴꓻ ꓜꓽ ꓢꓴ) ꓡꓯ ꓒꓯꓹ ꓗꓪ ꓔꓳꓹ ꓜꓳꓽ ꓪ ꓡꓰ ꓢꓴ ꓬꓲ ꓠꓶꓽ ꓛꓳꓽ ꓕꓲ ꓛꓳꓽ ꓠꓽ ꓮ ꓡꓲ ꓕꓲ ꓣꓳ ꓟ ꓥ ꓡ? ꓐꓰ ꓬꓰ-ꓢꓴ ꓡꓰ ꓠ ꓠꓬꓲˍ ꓡꓳ= ꓙꓵꓽ ꓗ ꓒ ꓠꓽ ꓢ-ꓟ-ꓡꓲ ꓐꓯ ꓟ ꓕꓲ ꓘꓶꓽ ꓔꓯ ꓐꓯ ꓓꓳ ꓡ ꓠꓲꓹ ꓟꓽ ꓫꓵ ꓠꓬꓲ꓾ ꓬꓲ ꓔꓯ ꓫꓱꓸ ꓤ ꓢꓴ ꓖꓳ ꓕꓲ ꓣꓳ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ= ꓠꓴˍ ꓟꓲ ꓙꓰ ꓢꓲ ꓬꓲ ꓡꓰ ꓐꓰ ꓬꓰ꓾ ꓐꓰ ꓬꓰ-ꓢꓴ ꓡꓰ ꓐꓯ ꓖꓶˍ ꓡꓳ=

ꓝꓮꓲ ꓕꓲ ꓚꓱꓹ ꓐꓯ ꓪˍ ꓠꓬ ꓙꓰ ꓢꓲ ꓣꓳ ꓠꓲꓹ ꓙꓳꓺ ꓢꓴ꓾ ꓞꓳ ꓤ ꓐꓴ ꓡꓰ ꓡꓳꓺ ꓒꓰꓹ ꓔ ꓢꓴ ꓐꓴ ꓔꓬ ꓗꓪ ꓙꓰ ꓢꓲ ꓠꓵ ꓠꓲꓹ ꓟꓸ ꓖꓶ= ꓣꓳ ꓠꓵ ꓠꓲꓹ ꓟꓸ ꓖꓶˍ ꓕꓯ ꓣꓳ ꓠꓬ ꓬꓰ-ꓢꓴ ꓔꓯ ꓠ ꓡꓳˍ ꓟ ꓥ ꓡꓳ= ꓪꓴ-ꓢ ꓙꓵꓽ ꓗ ꓔꓯ ꓛꓳꓽ ꓫꓱꓽ ꓔꓬ ꓕꓲ ꓖꓼ ꓠꓬ ꓬꓲ ꓔꓯ ꓠ ꓡꓳˍ ꓟ ꓟꓽ ꓥ= ꓐꓯ ꓠꓲꓹ ꓫꓵˍ ꓟ ꓠꓬ ꓮ ꓙꓵꓽ ꓟ ꓕꓯ ꓢꓲꓽ ꓬꓲ ꓔꓯ ꓠꓲꓹ ꓠꓵ ꓢꓲ ꓠꓬꓲ ꓣꓳ ꓔꓳꓹ ꓜꓳꓽ ꓪ ꓢꓴ꓾ ꓣꓳ ꓠꓶꓽ ꓛꓳꓽ ꓐꓴ ꓔꓯ ꓪꓴ-ꓢ ꓬꓲ ꓠꓵ ꓠꓲꓹ ꓟꓸ ꓖꓶˍ ꓟ ꓥ ꓡꓳ= ꓕꓱ ꓟ ꓠꓽ ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓟꓸ ꓟꓲꓽ ꓥ ꓡꓳ=