ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓪ ꓔꓲ ꓐꓴ ꓡꓰ ꓢꓰꓼ ꓟ ꓚꓱ,

 ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓪ ꓔꓲ ꓐꓴ ꓡꓰ ꓢꓰꓼ ꓟ ꓚꓱ,

ꓣꓳ‐ꓟ ꓪ ꓔꓲ Septimius Severus ꓣꓳ‐ꓟ ꓗꓴꓷꓼ ꓗꓪ ꓪ ꓔꓲ ꓒꓬꓱꓼ ꓗꓷ ꓗ. ꓠꓯ (50) ꓘꓳꓼ ꓟꓶ ꓫꓵˍ ꓡꓰ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ‐ꓟ ꓪ ꓔꓲ ꓐꓴ ꓡꓰ ꓢꓰꓼ ꓟ ꓗꓪ ꓐꓰ ꓮ ꓟꓬ, ꓟꓽ ꓔꓳ, ꓜꓳ ꓡ ꓟ ꓙꓵ, ꓟꓲ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓘꓴ ꓗꓪ ꓗꓴꓷꓼ ꓙꓵꓽ ꓚꓱ, ꓗꓪ ꓟꓽ ꓪ ꓡꓯ ꓘꓳ, ꓓꓴ ꓮ ꓟꓬ, ꓫꓵꓽ ꓙꓳˍ ꓟ ꓙꓵ, ꓟꓲ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓟꓯꓼ ꓜꓴꓻ ꓠꓬ ꓣꓳ‐ꓟ ꓗꓴꓷꓼ ꓔꓯ ꓗꓽ ꓕ ꓟ ꓙꓵ, ꓟ ꓥ ꓡꓳ꓿ ꓪ ꓔꓲ ꓠꓬ ꓣꓳ‐ꓟ ꓟꓯꓼ ꓜꓴꓻ ꓔꓯ ꓔꓳ, ꓔ ꓠꓬ ꓪ ꓔꓲ ꓔꓯ ꓠꓽ ꓡꓰ ꓝꓲ ꓟ ꓙꓵ, ꓟꓲ ꓥ ꓡꓳ꓿ ꓕꓱ ꓡꓱ ꓐꓰ ꓣꓳ‐ꓟ ꓗꓴꓷꓼ ꓙꓵꓽ ꓚꓱ, ꓗꓪ ꓮ ꓟꓬ, ꓫꓵꓽ ꓟꓽ ꓪ ꓡꓯ ꓘꓳ, ꓓꓴ ꓙꓳˍ ꓟ ꓙꓵ, ꓥ ꓟ ꓪꓴ. ꓠꓬꓲ ꓣꓳ‐ꓟ ꓪ ꓔꓲ ꓠꓬ ꓑ ꓫꓬ ꓐꓴ ꓔꓯ ꓬꓰ ꓙ ꓠ, ꓟ ꓫ. ꓔ ꓟ ꓙꓵ, ꓟꓲ ꓥ ꓡꓳ꓿  

ꓖꓳ ꓕꓲ ꓙꓵ, ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓚꓲ ꓛꓬ ꓦꓲꓻ ꓐꓰ ꓪꓴ‐ꓢ ꓪꓽ ꓘꓴ ꓠ, ꓟ ꓪꓽ ꓘꓴ ꓦꓲꓻ ꓔꓯ ꓥ ꓟꓲ ꓫꓬ, ꓠ, ꓟ ꓙꓵꓽ ꓪ ꓮ ꓔꓲ. ꓤ ꓪ ꓟ ꓙꓵ, ꓟꓲ  ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓲ ꓠꓯ ꓗ, ꓛꓲ ꓓꓴ ꓗꓪ ꓡꓰ ꓙꓰ ꓢꓲ ꓠꓬꓲ ꓙꓵꓻ ꓠꓲ, ꓮ ꓟꓬ, ꓟꓽ ꓙꓳ ꓡ ꓟ ꓚꓱ, ꓔꓯ ꓡꓳ. ꓟꓳ ꓪ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓪ ꓔꓲ ꓐꓴ ꓡꓰ ꓫ. ꓓꓴ ꓟꓶ ꓓꓴ ꓖꓶ  ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓕꓲ ꓐꓱ ꓠꓬ ꓙꓵꓻ ꓠꓲ, ꓝꓮꓲ ꓙꓳˍ ꓡ ꓟ ꓥ ꓡꓳ꓿ ꓖꓳ ꓡꓰ ꓥ ꓟꓲ ꓕꓲ ꓐꓱ ꓠꓬ ꓣꓳ‐ꓟ ꓪ ꓔꓲ ꓐꓴ ꓔꓯ ꓢꓰꓼ ꓡ ꓟ ꓔꓯ ꓙꓳꓺ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓦꓻ ꓡꓱ ꓔꓬ ꓢꓴ  ꓐꓴ ꓟꓲ ꓮ ꓟꓬ, ꓙꓳˍ ꓟ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓕꓲ ꓐꓱ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓙꓰ ꓟ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓠꓲꓽ ꓔꓯ ꓦꓻ ꓡꓱ ꓢꓴ ꓐꓴ ꓙꓳˍ ꓡ ꓟ ꓥ ꓡꓳ꓿ ꓕꓲ ꓐꓱ ꓠꓬ ꓒꓴ ꓫꓵꓽ ꓖꓶ ꓢꓲ ꓠꓬꓲ ꓠꓲꓽ ꓔꓯ ꓦꓻ ꓡꓱ ꓗꓷ ꓐꓰ ꓕꓳ ꓶ ꓑꓬ ꓔꓯ ꓪꓴꓻ ꓢꓴ ꓙꓳˍ ꓡ ꓟ ꓥ ꓡꓳ꓿ ꓕꓱ ꓡꓱ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳꓻ ꓗꓷ ꓟ ꓠꓯ, ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓟꓽ ꓞꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓔꓲꓺ ꓒ ꓐꓴ ꓐꓰ ꓔꓲꓺ ꓒ ꓓ ꓐꓴ ꓥ ꓟꓲ ꓙꓳˍ ꓡ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓣꓳ‐ꓟ ꓪ ꓔꓲ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓢꓰꓼ ꓟ ꓟꓽ ꓙꓳˍ ꓡꓰ ꓟ ꓙꓵ, ꓕꓯ ꓗꓳ. ꓗꓷ ꓟ ꓙꓵ, ꓕꓯ ꓙꓵꓻ ꓠꓲ, ꓚꓱ, ꓔꓯ ꓡꓳꓻ ꓗꓷ ꓢꓴ ꓐꓴ ꓠꓬ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓝꓮꓲ ꓒꓬꓱꓼ ꓡ ꓠꓲ, ꓫꓵˍ ꓟ ꓥ ꓡꓳ꓿ ꓖꓳ ꓡꓱ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓶ ꓡꓰ ꓟ ꓤ ꓝꓮꓲ ꓡꓳ. ꓟꓳ ꓟ ꓔꓯ ꓥꓳꓽ ꓡꓰ ꓐꓰ ꓙꓵꓻ ꓠꓲ, ꓙꓳˍ ꓢꓴ ꓒꓬꓱꓼ ꓡ ꓠꓲ, ꓫꓵꓽ ꓥꓳꓽ ꓡꓰ ꓟ ꓝꓴꓲ ꓔꓯ  ꓓꓵ ꓙ ꓒꓳ, ꓡꓶ ꓡ ꓟ ꓥ ꓡꓳ꓿

ꓕꓱ ꓡꓱ ꓐꓰ ꓝꓮꓲ ꓬꓯꓼ ꓡ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓘꓴ ꓜꓲꓼ ꓞꓳ ꓠꓯ ꓗꓪ ꓝꓮꓲ ꓘꓳ ꓣꓴ ꓠ, ꓟ ꓟꓽ ꓘꓳ, ꓣꓴ ꓠ, ꓟ ꓫꓵꓽ ꓪꓴꓻ ꓮ ꓟꓬ, ꓙꓳ ꓟ ꓥ ꓡꓳ꓿ ꓣꓳ‐ꓟ ꓡꓳ ꓒꓱ ꓗꓪ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓔꓲꓺ ꓒ Novatian ꓠꓬ ꓝꓮꓲ ꓬꓯꓼ ꓡ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓝꓴꓲ ꓔꓯ ꓖꓽ ꓖꓶ ꓟꓽ ꓐ ꓡ ꓐꓰ ꓐꓯ ꓔ ꓡꓳ꓿ ꓔꓲꓺ ꓒ ꓪ ꓔꓲ Cornelius ꓠꓬ ꓝꓮꓲ ꓬꓯꓼ ꓡ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓖꓶ ꓗꓷ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓝꓮꓲ ꓬꓯꓼ ꓡ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓧꓻ ꓙꓰ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓬꓲ. ꓫꓵꓼ ꓕꓲ ꓟ ꓔꓶ ꓗꓷ ꓟ ꓥ ꓡꓳ꓿ 
    ꓖꓳ ꓡꓱ ꓥ ꓟꓲ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓠꓬ ꓧꓻ ꓡꓰ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓮꓲ ꓘꓳ ꓣꓴ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓔꓯ ꓥꓳꓽ ꓡꓰ ꓟ ꓛꓬꓻ ꓡꓰ ꓟ ꓝꓴꓲ ꓔꓯ ꓭ ꓗꓷ ꓟ ꓥ ꓡꓳ꓿ ꓗ. ꓠꓯ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓕꓲ ꓠꓬꓲꓽ ꓡꓰ ꓕꓲ ꓠꓬꓲ ꓟꓬ, ꓡ ꓟ ꓥ ꓡꓳ꓿