ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓚꓱ, ( St. Gregory )

ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓚꓱ,

ꓔꓲꓺ ꓒ ꓪ ꓔꓲ Gregory (7) ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓟ ꓙꓵ, ꓗꓪ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓙꓵꓽ ꓚꓱ, ꓮ ꓟꓬ, ꓒꓳ, ꓡꓶ.  ꓗꓷꓳ꓿ ꓔꓲꓺ ꓒ ꓪ ꓔꓲ Gregory (7) ꓠꓬ AD 1028 ꓘꓳꓼ ꓕꓯ Italy ꓗꓴꓷꓼ (Aventine) ꓡꓳ ꓒꓱ ꓗꓪ ꓬꓲ ꓔꓯ ꓦꓵꓻ ꓗꓷꓳ꓿ ꓔꓲꓺ ꓒ ꓪ ꓔꓲ ꓠꓬ ꓬꓲ ꓞꓲꓼ ꓣꓳ_ ꓟ ꓙꓵ, ꓗꓪ ꓔꓲꓺ ꓒ ꓢꓳ ꓦꓲꓻ ꓗꓪ ꓟꓲ ꓠꓯ ꓢꓷ. ꓠꓲ, ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳ ꓣꓴ ꓟꓶ ꓡꓰꓳ꓿ ꓔꓲꓺ ꓒ ꓔꓲ ꓪ ꓒꓬꓱꓼ ꓡ ꓗ. ꓠꓯ. ꓔꓲꓺ ꓒ ꓪ ꓔꓲ ꓒꓬꓱꓼ ꓡ ꓪ꓿

ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓔꓲꓺ ꓒ ꓪ ꓔꓲ ꓒꓬꓱꓼ ꓡ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓟꓽ ꓙꓲ ꓟꓽ ꓔꓱ,_ ꓟ ꓚꓱ, ꓮ ꓟꓬ, ꓫꓵꓽ ꓔꓯ ꓒꓳ, ꓡꓶ. ꓗꓷꓳ꓿  AD 1075 ꓘꓳꓼ ꓕꓯ ꓔꓲꓺ ꓒ ꓪ ꓔꓲ Gregory (7) ꓡꓰ ꓔꓲꓺ ꓒ ꓐꓴ ꓦꓲꓻ ꓢꓲ ꓟ ꓟꓽ ꓧꓪ ꓠ, ꓟ ꓐꓯ ꓑꓶ ꓗꓷꓳ꓿ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓠꓬ ꓗꓴꓷꓼ ꓙꓵꓽ ꓢꓴ ꓢꓲ ꓒꓽ ꓐꓴ ꓡꓰ ꓬꓲ ꓪ ꓠꓲ, ꓫꓵˍ  ꓢꓴ ꓔꓯ ꓔꓲꓺ ꓒ ꓓꓽ ꓙꓵꓽ ꓪ ꓖꓶ_ ꓟ ꓚꓱ, ꓔꓯ ꓠꓽ ꓗꓷꓳ꓿ ꓖꓳ ꓡꓱ ꓬꓰˍ ꓟ ꓑꓶ. ꓓꓴ ꓔꓲꓺ ꓒ ꓪ ꓔꓲ ꓐꓰ Germany ꓪ ꓔꓲ ꓐꓰ ꓟꓽ ꓪ ꓡꓯꓼ ꓘꓳ ꓓꓴ ꓙꓳ ꓡꓰꓳ꓿

Germany ꓪ ꓔꓲ ꓠꓬ ꓘꓴ ꓜꓲꓼ ꓞꓳ ꓗꓪ ꓠꓽ ꓡꓰ ꓝꓲ_ ꓕꓯ ꓬꓲ. ꓬꓰ ꓥꓳꓽ ꓡꓰ ꓟ ꓝꓴꓲ ꓔꓯ ꓓꓵꓽ ꓙ ꓒꓳ, ꓡꓲꓼ ꓡ ꓟ ꓑꓶ. ꓓꓴ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ AD 1077 ꓘꓳꓼ ꓕꓯ  ꓝꓮꓲ ꓘꓳ, ꓣꓴ ꓗꓷꓳ꓿ ꓖꓳ ꓡꓱ ꓥ ꓟꓲ Germany ꓪ ꓔꓲ ꓠꓬ ꓬꓲ ꓠꓲ, ꓟ ꓝꓮꓲ ꓟꓽ ꓙꓲ ꓡ ꓟ ꓑꓶ. ꓓꓴ ꓣꓳ‐ꓟ ꓡꓳ ꓒꓱ ꓗꓪ ꓔꓬ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ Gregory (7) ꓔꓯ (Salerno) ꓟꓬꓱꓺ ꓟ ꓟꓵꓽ ꓗꓪ ꓔꓬ ꓝꓲꓳ꓿ ꓖꓳ ꓟꓵꓽ ꓗꓪ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓠꓬ ꓟꓲ ꓠꓯ ꓧꓪꓽ ꓖꓳ ꓓꓱ ꓡꓳ, ꓬꓰꓳ꓿ 

ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ Gregory (7) ꓠꓬ ꓬꓲ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓟꓽ ꓡꓳ, ꓬꓰ ꓢꓲ ꓕꓯ ꓟꓲ ꓠꓯ ꓗꓪ ꓔꓬ ꓕꓯ ꓬꓲ ꓔꓯ ꓟꓽ ꓙꓲˍ ꓟ ꓬꓰ ꓢꓴ ꓐꓴ ꓔꓯ ꓝꓴꓲ ꓖꓽ ꓖꓶ ꓡꓳ ꓐꓰ ꓐꓯ ꓢꓲ ꓠꓬꓲ ꓢꓲ‐ꓒ ꓠꓯꓼ ꓗꓪ ꓬꓲꓼ ꓟꓶ ꓡꓰꓳ꓿ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓟ ꓠꓬ ꓥꓪ ꓠꓬ ꓟꓽ ꓙꓲ_ ꓟ ꓟꓬꓱꓽ ꓔꓯ ꓟꓽ ꓠꓲ, ꓠꓵ ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓑꓶ. ꓓꓴ ꓟꓽ ꓙꓲ ꓢꓴ ꓐꓴ ꓡꓰ ꓥꓪ ꓔꓯ ꓕꓱ ꓡꓱ ꓔ ꓟ ꓟꓵꓽ ꓗꓪ ꓔꓬ ꓝꓲ ꓥ ꓟꓲ ꓥ  ꓡꓳ ꓐꓰ ꓐꓯ ꓖꓶ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓠꓬ ꓘꓴ ꓜꓲꓼ ꓞꓳ ꓔꓯ ꓠꓲ, ꓠꓵ_ ꓟ ꓑꓶ. ꓓꓴ ꓫ. ꓓꓴ ꓟꓶ ꓓꓴ ꓮ ꓟꓬ, ꓔꓳ, ꓜꓳ ꓢꓲ ꓠꓬꓲ ꓧꓪꓽ ꓖꓳ ꓓꓱ ꓡꓳ, ꓬꓰꓳ꓿   

Add new comment

3 + 11 =