ꓙꓲꓻ ꓫꓬ ꓢꓴ Augustine ꓚꓺ ꓟꓲꓽ (St. Augustine of Hippo)

ꓙꓲꓻ ꓫꓬ ꓢꓴ Augustine ꓚꓺ ꓟꓲꓽ

ꓙꓲꓻ ꓫꓬ ꓢꓴ Augustine ꓠꓬ 354 ꓘꓳꓼ ꓕꓯ ꓮꓝꓣꓲꓚꓮ ꓗꓴꓷꓼ ꓗꓪ ꓔꓬ ꓗꓷ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓙꓲꓻ ꓫꓬ ꓢꓴ Augustine ꓠꓬ ꓧꓲꓑꓑꓳ ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓔꓯ ꓥ ꓟꓲ ꓘꓳ, ꓣꓴ ꓗꓷ ꓢꓴ ꓥ ꓡꓳ꓿ ꓙꓲꓻ ꓫꓬ ꓢꓴ Augustine ꓠꓬ ꓬꓲ. ꓪꓴ. ꓔꓯ ꓪꓴ‐ꓢ ꓦꓻ ꓡꓱ ꓢꓴ ꓟꓽ ꓥ꓿ ꓬꓲ. ꓟ, ꓟ ꓮ ꓟꓬ, ꓪꓽ ꓘꓴ ꓖꓶ ꓥ ꓟꓲ ꓬꓲ. ꓐ‐ꓐ ꓡꓰ ꓐꓰ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓕꓲ ꓣꓳ ꓥ ꓡꓳ꓿

ꓙꓲꓻ ꓫꓬ ꓢꓴ Augustine ꓠꓬ ꓬꓲ. ꓞꓲꓼ 29 ꓘꓳꓼ ꓕꓯ Italy ꓡꓳ ꓒꓱ ꓗꓪ ꓙꓰ ꓗꓷ ꓢꓲ ꓠꓬꓲ ꓕꓲ ꓠꓬꓲ ꓙꓳ ꓕꓯ ꓙꓲꓻ ꓫꓬ ꓢꓴ Ambrose ꓡꓰ ꓚꓺ ꓗꓷ ꓟ ꓟ. ꓟꓲꓽ ꓔꓯ ꓠꓽ ꓡꓳ. ꓑ ꓙ ꓗꓷ ꓢꓲ ꓠꓬꓲ ꓪꓴ‐ꓢ ꓦꓻ ꓡꓱ ꓢꓴ ꓕꓲ ꓣꓳ ꓒꓬꓱꓼ ꓡ ꓪ꓿ ꓙꓲꓻ ꓫꓬ ꓢꓴ Augustine ꓠꓬ ꓬꓲ. ꓵꓻ ꓗꓷ ꓟ ꓕꓳꓽ ꓶ ꓠꓬ ꓢꓲꓺ ꓒ ꓬꓰ‐ꓢꓴ ꓔꓬ ꓗꓪ ꓡꓯ꓾ ꓟꓲ ꓠꓯ ꓗ, ꓛꓲꓽ ꓓꓴ  ꓔꓯ ꓡꓳꓺ ꓗꓷ ꓐꓯ ꓟ ꓕꓳꓽ ꓶ ꓔꓯ  ꓡꓳ. ꓟꓳ ꓗꓷꓳ꓿

ꓙꓲꓻ ꓫꓬ ꓢꓴ Augustine ꓠꓬ ꓬꓲ. ꓞꓲꓼ 32 ꓘꓳꓼ ꓕꓯ ꓙꓲꓻ ꓫꓬ ꓢꓴ Augustine ꓡꓯ ꓒꓯ, ꓗꓪ ꓝꓴꓲ. ꓔꓲ, ꓟꓶ ꓡꓰꓳ꓿ ꓖꓳ ꓗ, ꓠꓯ ꓙꓲꓻ ꓫꓬ ꓢꓴ Augustine ꓠꓬ ꓬꓲ. ꓕꓲ ꓞꓲꓼ ꓡꓱ ꓔꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓓꓴ ꓙ ꓗꓷꓳ꓿  ꓙꓲꓻ ꓫꓬ ꓢꓴ Augustine ꓪꓴ‐ꓢ ꓐꓯ ꓘꓶꓽ ꓔꓯ ꓢꓳ ꓣꓴ ꓗꓷ ꓢꓲ ꓠꓬꓲ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓢꓲ ꓠꓬꓲ Hippo ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓕꓲ ꓪ ꓒꓬꓱꓼ ꓡ ꓪ꓿

ꓙꓲꓻ ꓫꓬ ꓢꓴ Augustine ꓠꓬ ꓔꓲꓺ ꓟ ꓜꓴꓻ ꓔꓯ  ꓥ ꓟꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓒꓴ ꓖꓶ ꓗꓷꓳ꓿ ꓝꓮꓲ ꓬꓲ. ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓕꓱ ꓟ ꓠꓬ ꓥꓪ ꓠꓬ ꓠꓴ ꓪ ꓐꓱ ꓶ ꓔꓲꓺ ꓒ ꓓꓽ ꓥꓳ꓿ ꓠꓴ ꓪ ꓐꓰ ꓥꓪ ꓠꓬ ꓙꓲ‐ꓢꓴ ꓢꓲꓺ ꓤ ꓕꓲ ꓡꓰ ꓥ ꓡꓳ ꓐꓰ ꓐꓯ ꓟ. ꓖꓶ ꓔ ꓡꓳ꓿

ꓮꓓ 410 ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓬ ꓟ ꓟꓵꓽ ꓔꓯ ꓟꓽ ꓙꓲꓻ ꓢꓴ ꓐꓴ ꓡꓰ ꓐꓬ ꓡꓰ ꓝꓲꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ Augustine ꓠꓬ The City of God ꓟꓬꓱꓽ ꓟ ꓕꓳꓽ ꓶ ꓔ ꓥ ꓟꓲ ꓐꓳ ꓖꓶ ꓗꓷꓳ꓿

ꓕꓱ ꓕꓳꓽ ꓶ ꓐꓶ ꓗꓪ ꓣꓳ‐ꓟ ꓡꓳ ꓒꓱ ꓐꓬ ꓡꓰ ꓟ ꓠꓬ ꓙꓲ‐ꓢꓴ  ꓢꓲꓺ ꓤ ꓐꓴ ꓝꓴꓲ. ꓗꓪ ꓐꓰ ꓟꓽ ꓥ꓿ ꓟꓽ ꓙꓲꓻ ꓟ ꓟꓬꓱꓽ ꓬꓰ ꓢꓴ ꓐꓴ ꓝꓴꓲ ꓔꓯ ꓪꓴ‐ꓢ ꓡꓰ ꓝꓴꓲ. ꓖꓶ ꓔ ꓟ ꓥ ꓡꓳ ꓐꓰ ꓕꓳ ꓶ ꓗꓪ ꓐꓳ ꓔ ꓡꓳ꓿

ꓮꓓ 430 ꓘꓳꓼ ꓔꓯ ꓙꓲꓻ ꓫꓬ ꓢꓴ Augustine ꓠꓬ Hippo ꓡꓳ ꓒꓱ ꓗꓪ ꓢꓲꓺ ꓒ ꓠꓯ, ꓗꓪ ꓬꓲꓼ ꓟꓶ ꓡꓰꓳ꓿