ꓙꓲꓻ ꓫꓬ ꓢꓴ Irenaeus ꓚꓺ ꓟꓲꓽ

 ꓙꓲꓻ ꓫꓬ ꓢꓴ Irenaeus ꓚꓺ ꓟꓲꓽ

ꓘꓴ ꓜꓲꓼ ꓞꓳ ꓚꓺ ꓟꓲ ꓗꓪ ꓐꓰ ꓙꓲꓻ ꓫꓬ ꓢꓴ Irenaeus ꓚꓺ ꓟꓲꓽ ꓥ ꓡꓳ꓿ ꓙꓲꓻ ꓫꓬ ꓢꓴ Irenaeus ꓠꓬ Lyons ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓕꓲ ꓣꓳ ꓥ ꓡꓳ꓿ ꓬꓲ. ꓠꓬ Syria ꓟꓵꓽ ꓐꓰ Asia Minor ꓟꓵꓽ ꓗꓪ ꓔꓬ ꓢꓴ ꓕꓲ ꓣꓳ ꓥ ꓡꓳ꓿ꓙꓲꓻ ꓫꓬ ꓢꓴ Irenaeusꓔꓯ  ꓙꓲꓻ ꓫꓬ ꓢꓴ Polycarp ꓡꓰ ꓪꓴ‐ꓢ ꓐꓯ ꓘꓶꓽ ꓟ. ꓢꓴ ꓥ ꓡꓳ꓿ 

ꓙꓲꓻ ꓫꓬ ꓢꓴ Irenaeus ꓔꓲꓺ ꓒ ꓓꓽ ꓙꓵꓽ ꓪ ꓡꓰ ꓘꓴ ꓜꓲꓼ ꓞꓳ ꓗꓪ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓡꓰ ꓘꓴ ꓜꓲꓼ ꓞꓳ ꓔꓯ ꓫꓵꓽ ꓪꓴꓽ ꓖꓶ ꓡ ꓟ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓙꓵ, ꓟꓲ ꓥ ꓡꓳ꓿ ꓖꓳ ꓡꓱ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓥ ꓟꓲ ꓥꓳꓽ ꓡꓰ ꓟ ꓙꓵꓻ ꓠꓲ, ꓚꓱ, ꓮ ꓟꓬ, ꓙꓳˍ ꓡ ꓟ ꓙꓵ, ꓟꓲ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓐꓴ ꓘꓴꓽ ꓗꓪ ꓐꓰ ꓢꓷ. ꓠꓲ, ꓢꓷ. ꓢꓴ ꓕꓲ ꓐꓱ ꓠꓬ Persia ꓗꓴꓷꓼ ꓡꓰ ꓐꓰ ꓟꓲ ꓠꓯ ꓢꓷ. ꓠꓲ, ꓢꓳꓻ ꓦꓲꓻ ꓮ ꓟꓬ, ꓗꓪ ꓟꓲ ꓠꓯ ꓢꓷ. ꓠꓲ, ꓢꓳ ꓣꓴ ꓪ ꓡꓰꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓢꓷ. ꓢꓴ ꓐꓴ ꓠꓬ ꓪꓴ‐ꓢ ꓐꓯ ꓘꓶꓽ ꓐꓰ ꓟꓽ ꓫꓱ ꓡꓯ ꓘꓳ, ꓟ ꓟ. ꓟꓲꓽ ꓮ ꓟꓬ, ꓔꓯ ꓙꓲ‐ꓢꓴ ꓢꓲꓺ ꓤ ꓠꓯ ꓗꓪ ꓟ. ꓖꓶ ꓡ ꓟ ꓪꓴ. ꓠꓬꓲ ꓫꓵꓽ ꓪꓴꓽ ꓮ ꓟꓬ, ꓙꓳˍ ꓡꓰ ꓟ ꓥ ꓡꓳ꓿

ꓖꓳ ꓡꓰ ꓟꓽ ꓞꓲ ꓙꓲ‐ꓢꓴ ꓢꓲꓺ ꓤ ꓐꓴ ꓘꓴꓽ ꓗꓪ ꓐꓰ ꓢꓷ. ꓠꓲ, ꓢꓷ. ꓢꓴ ꓐꓴ ꓠꓬ ꓢꓲꓽ ꓫꓬ ꓕꓳ ꓶ ꓔꓯ ꓬꓲ. ꓪ ꓓꓵꓽ ꓙ ꓪ ꓡꓰ ꓐꓰ ꓟ. ꓟꓲꓽ ꓚꓺ ꓔꓬ ꓟ ꓥ ꓡꓳ꓿ ꓕꓱ ꓥꓳꓽ ꓡꓰ ꓟ ꓙꓵꓻ ꓠꓲ, ꓚꓱ, ꓔꓯ ꓗ, ꓕꓽ ꓠ, ꓟ ꓙꓲꓻ ꓫꓬ ꓢꓴ Irenaeus ꓠꓬ ‘ Against the Heresies ꓐꓯ ꓟ ꓕꓳꓽ ꓶ ꓐꓶ ꓔ ꓐꓳ ꓢꓲ ꓠꓬꓲ ꓙꓵꓻ ꓠꓲ, ꓚꓱ, ꓗꓽ ꓖꓶ ꓗꓷꓳ꓿

ꓝꓮꓲ ꓠꓱ. ꓐꓯꓼ ꓕꓳ ꓶ ꓕꓲ ꓑꓷꓠ ꓥ  ꓟ “ The Proof of the apostolic Teaching’ ꓕꓳ ꓶ ꓔꓯ ꓥ ꓟꓲ ꓐꓳ ꓖꓶ ꓗꓷꓳ꓿ ꓕꓱ ꓕꓳ ꓶ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓟ. ꓖꓶ ꓟ ꓬꓲ. ꓪꓴ. ꓓꓽ ꓪꓴ. ꓕꓳ ꓶ ꓐꓶ ꓒꓬꓱꓼ ꓡ ꓟ ꓥ ꓡꓳ꓿

ꓕꓱ ꓕꓳ ꓶ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓚꓱ, ꓔꓯ  ꓤ ꓠꓱ ꓤ ꓐꓴ ꓢꓷ. ꓠ, ꓗꓪ ꓛꓲ ꓐꓯ ꓟ ꓔ ꓐꓳ ꓟ ꓗꓷ ꓟ ꓥ ꓡꓳ꓿ AD 202 ꓘꓳꓼ ꓕꓯ ꓙꓲꓻ ꓫꓬ ꓢꓴ Irenaeus ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓟ ꓔꓯ ꓔꓳ, ꓜꓳ ꓡꓰꓳ꓿