ꓙꓲ-ꓢꓴ ꓢꓲ-ꓤ ꓐꓴ ꓤ ꓟꓶ ꓚꓱꓹ ꓟ ꓗ-ꓫꓵ=

ꓤ ꓟꓶ ꓚꓱꓹ ꓟ ꓗ ꓫꓵ ꓐꓯ ꓠꓬ-ꓸ ꓟꓲ ꓠꓯ ꓞꓳ ꓫꓵꓽ ꓞꓳ ꓙꓰ ꓮꓽ ꓙꓵꓽ ꓢꓴ ꓠꓯꓹ ꓗꓪ ꓚꓲꓸ ꓛꓬ ꓞꓳꓽ ꓫꓵꓽ ꓡꓲꓽ ꓒꓰꓼ ꓮꓽ ꓟ ꓔꓯ ꓥ ꓟꓲ ꓟꓽ ꓪꓽ ꓟꓽ ꓫꓱꓹ ꓟ ꓡꓲꓽ ꓒꓰꓼ ꓞꓳ ꓫꓵꓼ ꓮꓽ ꓙꓵꓽ ꓢꓴ ꓗꓳꓹ ꓡꓳ ꓗꓪ ꓙꓳ ꓞꓹ ꓡꓳ= ꓮ ꓟꓶ ꓥꓪ ꓠꓬ ꓞꓳ ꓫꓵꓼ ꓡꓲꓽ ꓒꓰꓼ ꓟ ꓥ ꓪꓴ-ꓢ ꓦ ꓡꓱ ꓢꓴ ꓙꓲ-ꓢꓴ ꓢꓲ-ꓤꓼ ꓐꓴ ꓟꓸ ꓟꓲ ꓕꓳꓽ ꓶꓽ ꓗꓰ ꓐꓰ ꓪꓴ-ꓢ ꓗ ꓫꓵꓽ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓳꓸ ꓖꓴ ꓢꓲꓸ ꓖꓪ ꓙꓱ ꓠꓲꓹ ꓫꓵ_ ꓡ=

(1) ꓚꓰꓼ ꓟ  2ꓸ ꓡ ꓞꓳ (3) ꓞꓳ ꓑ ꓤ ꓐꓰ ꓤ ꓟꓶ ꓤ (4) ꓝꓱ ꓔꓸ ꓟ (5) ꓧꓹ ꓟꓽ ꓓ (6) ꓕꓲꓽ ꓞꓲꓼ ꓠꓬꓲ ꓟ ꓡꓽ ꓞꓳ

ꓟꓸ ꓟꓲ ꓕꓱ ꓟ ꓗꓪ ꓬꓲꓸ ꓕꓱ 6 ꓕꓱ ꓙꓳ_ ꓠꓬꓲ ꓠꓬꓲꓽ ꓐꓱ ꓒꓯꓽ ꓢꓲꓸ ꓢꓳ ꓓꓴ ꓥꓳ= ꓓꓽ ꓪꓴꓸ ꓠꓬ (1) ꓗꓪ ꓐꓰ (3) ꓠꓬꓲꓽ ꓧꓪꓹ ꓟ ꓪ (4) ꓐꓰ (6) ꓗꓪ ꓛꓲ ꓢꓳ ꓥꓳ=

ꓓꓽ ꓪꓴꓸ ꓚꓰꓼ ꓟ ꓟꓸ ꓟꓲ

ꓞꓳ ꓫꓵꓽ ꓮꓽ ꓙꓵꓽ ꓢꓴ ꓠꓯꓼ ꓗꓪ ꓚꓱꓼ ꓔꓸ ꓟ ꓚ ꓟꓲꓽ ꓙꓳ_ ꓡꓳ= ꓮ ꓟꓶ ꓥꓪ ꓠꓬ ꓟꓸ ꓟꓲ ꓕꓳꓽ ꓶꓽ ꓬꓲꓸ ꓚꓰꓼ ꓬꓲꓸ ꓪꓴ ꓕꓳꓽ ꓶꓽ ꓗꓪ ꓚꓰꓼ ꓔꓸ ꓟ ꓟꓸ ꓟꓲ 1=2ꓽ ꓕꓱ ꓬꓲꓸ ꓘꓴꓽ ꓗꓪ ꓙꓳ ꓟ ꓟꓸ ꓟꓲ ꓥ ꓡꓳ= ꓟꓴ ꓗꓪ ꓟꓲ ꓠꓯ ꓗꓪ ꓙꓳ_ ꓟ ꓮꓽ ꓙꓵꓽ ꓪꓴ-ꓢ ꓠꓬ ꓛꓳ ꓠꓬꓲ ꓬꓲꓸ ꓘꓴꓽ ꓗꓪ ꓚꓰꓼ ꓔꓸ ꓡ_ ꓐꓰ ꓙꓳ ꓡꓳ= ꓪꓴ-ꓢ ꓠꓬ ꓛꓳ ꓠꓬꓲ ꓟ ꓬꓲꓸ ꓘꓴꓽ ꓗꓪ ꓟꓴ ꓗꓪ ꓟꓲ ꓠꓯ ꓟꓲ ꓟꓲ ꓦ ꓐ ꓗꓴ ꓤ ꓟꓲ ꓠꓯ ꓕꓯ ꓢꓲ ꓗꓪ ꓢꓲꓹ ꓜꓲ ꓡꓳ ꓜꓲ ꓧꓪꓹ ꓤ ꓐꓬ ꓤ ꓐꓶ ꓓꓲ ꓡꓯꓹ ꓓꓲ ꓮꓽ ꓙꓵꓽ ꓠꓬ ꓬꓲꓹ ꓒꓵ ꓬꓲ ꓟ ꓚꓰꓼ ꓓꓳ ꓡꓰꓳ= ꓖꓳ ꓡꓱ ꓥ ꓟꓲ ꓚꓰꓼ ꓔꓸ ꓟ ꓮꓽ ꓙꓵꓽ ꓔꓯ ꓙꓵꓽ ꓢꓴ ꓟꓽ ꓙꓳ= ꓟ ꓪꓴ-ꓢ ꓡꓳꓸ ꓓꓳ ꓡ ꓠꓬꓲ ꓪꓴ-ꓢ ꓬꓲꓸ ꓚꓲꓸ ꓛꓬꓽ ꓔꓯ ꓔꓯ ꓢꓲꓸ ꓞꓳ ꓤꓽ ꓚꓰꓼ ꓢꓲ ꓡꓯ ꓐꓰ ꓖꓪ ꓙꓱ ꓡꓯ ꓘꓳ ꓢꓲ ꓪꓴ-ꓢ ꓬꓲꓸ ꓚꓲꓸ ꓛꓬꓽ ꓐꓬꓱꓼ ꓔꓯ ꓔꓯ ꓢꓲꓸ ꓟꓲ ꓠꓯ ꓡ ꓞꓳ ꓞꓳ ꓑꓸ ꓤ ꓔꓯ ꓚꓰꓼ ꓡꓳ ꓐꓯ ꓡꓳ= ꓧꓪꓽ ꓤꓽ ꓐꓬꓽ ꓤꓽ ꓐꓶ ꓓꓲ ꓡꓯꓸ ꓓꓲ ꓢꓯꓸ ꓫꓵꓽ ꓮ ꓙꓵꓽ ꓬꓲꓸ ꓒꓵ ꓬꓲꓸ ꓟ ꓕꓲꓽ ꓜꓱꓽ ꓕꓲ ꓜꓱ ꓚꓰꓼ ꓢꓲ ꓡ ꓞꓳ ꓔꓯ ꓠꓬ ꓞꓳ ꓑ ꓤꓼ ꓬꓲꓸ ꓔꓲꓸ ꓕꓲ ꓣꓳ ꓡꓰ ꓚꓰꓼ ꓡꓳ ꓐꓯ ꓡꓳ= ꓚꓰꓼ ꓔ ꓡ ꓫꓵꓽ ꓮ ꓙꓵꓽ ꓔꓯ ꓪꓴ-ꓢ ꓡꓳꓸ ꓠꓬꓲ ꓠꓬ ꓮꓽ ꓙꓵꓽ ꓠꓬ ꓬꓲꓸ ꓒꓵ ꓬꓲꓸ ꓟ ꓠꓬꓲꓽ ꓟ ꓗꓹ ꓛꓲꓽ ꓛꓲꓽ ꓐꓰ ꓪꓽ ꓡꓯ ꓘꓳ ꓢꓯꓸ ꓔꓬ ꓟ ꓔꓯ ꓪꓴ-ꓢ ꓡꓳꓸ ꓟꓳ ꓕꓯ= ꓮ ꓟꓽ ꓥ ꓢꓲꓽ ꓐꓶ ꓡꓽ ꓞꓳ ꓕꓲꓽ ꓣꓳ ꓔꓵꓹ ꓔꓬꓹ ꓟꓽ ꓙꓵꓽ ꓐꓶ ꓬꓲꓸ ꓛꓳꓽ ꓒꓯ ꓕꓲ ꓣꓳ ꓚꓰꓼ ꓢꓲꓽ ꓡꓯ ꓐꓰ ꓪꓴ-ꓢ ꓙꓽ ꓟꓶ ꓓꓳ ꓡ ꓢꓲ ꓗꓪ ꓙꓱ ꓡꓯ ꓘꓳ ꓢꓲ ꓮꓸ ꓓꓯ ꓔꓯꓹ ꓬꓲꓼ ꓟꓶ ꓓꓽ ꓟ ꓬꓲꓼ ꓟꓶ ꓔꓬ ꓝꓲ ꓢꓲ ꓠꓲꓹ ꓟ ꓔꓶ ꓔꓶ ꓗꓪ ꓟ ꓠꓱ ꓖꓴꓼ ꓕꓲꓽ ꓛꓲ ꓣꓴ ꓢꓲ ꓪꓵ ꓔꓳ ꓖꓳ ꓟ ꓗꓪ ꓐꓰ ꓤ ꓟꓶ ꓤ ꓕꓲꓽ ꓣꓳ ꓚꓰꓼ ꓢꓲ ꓮꓸ ꓓꓯ ꓔꓯ ꓡꓯ ꓙꓱ ꓖꓶ ꓕꓯ ꓮꓸ ꓓꓯ ꓠꓬ ꓗꓹ ꓛꓲ ꓠꓲꓹ ꓒꓴ ꓢ ꓟ ꓐꓯ ꓖꓴ ꓟꓽ ꓓ ꓡꓰ ꓢꓲ ꓬꓲꓸ ꓮ ꓡꓰ ꓐꓯ ꓓꓳ ꓡ ꓡꓳ= ꓐꓯ_ ꓠꓬ-ꓸ (ꓕꓱ ꓟ ꓠꓬ ꓧꓹꓼꓽ ꓗꓪ ꓐꓰ ꓣꓴ ꓓꓳ ꓡ ꓢꓲ ꓥꓪ ꓪꓳꓼ ꓔꓳ ꓡꓰꓽ ꓜꓯꓸꓸ ꓔꓸ ꓟ ꓥꓪ ꓧꓪꓽ ꓡꓰ ꓐꓵꓹ ꓔꓸ ꓟ ꓥ ꓠꓬꓲ ꓬꓲꓸ ꓔꓯ ꓤ ꓟꓶ ꓤ ꓟꓬꓱ ꓖꓶ ꓥꓳ-ꓸ ꓐꓯ_ ꓡꓳ=) ꓝꓮꓲ ꓞꓳ ꓑ ꓤ ꓠꓬ ꓬꓲꓸ ꓐꓸ ꓐꓽ ꓟꓸ ꓟ ꓔꓯ ꓧꓹ ꓔꓸ ꓬꓰ ꓢꓲ ꓬꓲꓸ ꓤ ꓟꓶ ꓔꓯ ꓝꓱ ꓡꓰ ꓢꓲ ꓠꓬꓲ ꓕꓲꓽ ꓧꓪꓽ ꓡꓰ ꓗꓷ ꓡꓰ ꓥꓳ= ꓬꓲ ꓚꓰ ꓬꓲ ꓪꓴꓸ 2ꓽ21-24 ꓥ_ ꓡꓳ= ꓬꓲꓽ ꓤꓼ ꓠꓬꓲ ꓤꓼ ꓐꓴ-ꓳ-ꓸ ꓕꓯ ꓢꓲ ꓗꓪ ꓪꓴ-ꓢ ꓡꓰ ꓚꓰꓼ ꓗꓷ ꓟ ꓟꓸ ꓟꓲ ꓗꓪ ꓧꓪꓽ ꓤꓼ ꓐꓬꓽ ꓤꓼ ꓢꓯꓸ ꓫꓵꓽ ꓮꓽ ꓙꓵꓼ ꓢꓲꓹ ꓜꓲ ꓡꓳ ꓜꓲ ꓠꓬ ꓬꓲꓹ ꓒꓵ ꓬꓲꓸ ꓟ ꓚꓰꓼ ꓢꓲꓸ ꓡ ꓞꓳ ꓔꓯꓸ ꓠꓬ ꓞꓳ ꓑꓸ ꓤ ꓕꓲꓽ ꓣꓳ ꓡꓰ ꓚꓰꓼ ꓟ ꓔꓯ=

ꓠ ꓠꓬꓲ ꓘꓶꓽ ꓕꓲꓽ ꓘꓶꓽ ꓕꓲꓽ ꓘꓶꓽ ꓐꓯ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓞꓳ ꓑ ꓤꓽ  ꓔꓯ ꓧꓶꓸ ꓕꓯꓽ ꓕꓲ ꓣꓳ ꓔꓵꓼ ꓚꓰꓼ ꓡ? ꓥ ꓠꓬꓲ ꓚꓰꓼ ꓟ ꓗꓴꓸ ꓠꓲꓹ ꓥ ꓡꓽ? ꓠ ꓠꓬꓲ ꓘꓶꓽ ꓐꓯ ꓠ ꓗꓷ ꓡꓰ ꓟ ꓠꓬ ꓪꓴ-ꓢ ꓡꓰꓽ ꓮ ꓟꓶ ꓤ ꓑꓸ ꓤ ꓐꓰ ꓤ ꓟꓶ ꓤ ꓠꓬꓲꓽ ꓟ ꓡ ꓞꓳ ꓝꓱ ꓔ ꓢꓴ ꓔꓯꓹ ꓬꓲꓸ ꓠꓯꓹ ꓟ ꓚꓲꓹ ꓘꓶꓽ ꓟꓸ ꓟꓲ ꓕꓱ ꓟ ꓔꓯ ꓚꓲꓹ ꓝꓲ ꓠꓹ ꓟ ꓤ ꓟꓶ ꓤ ꓠꓬ  ꓗꓸ ꓠꓯ ꓢꓲ ꓢꓲꓸ ꓚꓰꓼ ꓢꓲꓹ ꓬꓲꓸ ꓪꓽ ꓠꓬꓲꓽ ꓫꓵꓸ ꓔꓯ ꓝꓱ ꓖꓶ ꓡꓳ= ꓐꓰ ꓟꓸ ꓟꓲ ꓕꓳꓽ ꓶ ꓗꓪ ꓐꓳ ꓔꓸ ꓡꓳ=ꓪꓴ-ꓢ ꓕꓱ ꓡꓱ ꓬꓰ ꓟ ꓟꓸ ꓟꓲ ꓠꓬ ꓮꓸ ꓓꓯ ꓐꓯ ꓘꓶꓽ ꓗꓪ ꓐꓰ ꓐꓯ ꓓꓳ ꓡꓹ ꓟ ꓥꓳ= ꓚꓲꓹ ꓘꓶꓽ ꓓꓽ ꓟ ꓥ ꓡꓳ= ꓣꓳꓽ ꓧꓪꓹ ꓛꓲꓽ ꓓꓴ=

1- ꓤ ꓑꓸ ꓤ ꓐꓴ ꓥ ꓟꓲ ꓚꓲꓹ ꓛꓬ ꓖꓳ ꓓꓱꓽ ꓗꓪ ꓐꓰ ꓣꓴ ꓓꓳ ꓦꓹ ꓢꓲꓸ ꓚꓰꓼ ꓔꓸ ꓟ ꓚꓲꓸ ꓛꓬ ꓖꓳ ꓓꓱꓼ ꓤ ꓟꓶ ꓤ=

2- ꓤ ꓟꓶ ꓤ ꓐꓴ ꓥ ꓟꓲ ꓥꓪ ꓠꓬ ꓤ ꓑ ꓤ ꓖꓳ ꓓꓱꓽ ꓗꓪ ꓐꓰ ꓚꓰꓼ ꓔꓸ ꓟ ꓖꓳ ꓓꓱꓽ ꓤ ꓟꓶ ꓤꓼ=