ꓙꓵꓻ ꓠꓲꓹ ꓐꓯˍ ꓟ ꓮ ꓫꓵꓽ ꓥ ꓡ

ꓢꓲ ꓒ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ= ꓕꓱ ꓕꓲ ꓠꓽ ꓗꓪ ꓠꓬ "ꓥꓪ ꓙꓵꓻˍ ꓡꓳ" ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ= ꓙꓵꓻ ꓠꓲꓹ ꓐꓯ ꓟ ꓮ ꓫꓵꓽ ꓥ ꓡ꓾ ꓮ ꓫꓵꓽ ꓔꓯ ꓣꓳ ꓙꓵꓻˍ ꓡ? ꓕꓱ ꓕꓲ ꓠꓽ ꓪꓴ-ꓢ ꓟꓸ ꓟꓲꓽ ꓟꓸ ꓖꓶˍ ꓟ ꓗꓪ ꓣꓳ ꓠ ꓠꓹ ꓓꓴ ꓬꓰ ꓡꓯ= 

ꓙꓵꓻ ꓠꓲꓹ ꓐꓯ ꓟ ꓠꓬ ꓣꓱꓽ ꓛꓰꓽ ꓥ ꓡꓳ= ꓟꓴꓽ ꓗꓪ ꓗꓪ ꓟ ꓪꓴ-ꓢ ꓡꓰ ꓡꓯꓼ ꓫꓴ ꓟꓽ ꓖꓶ ꓡ ꓕꓯ꓾ ꓪꓴ-ꓢ ꓡꓰ ꓟꓽ ꓬꓰ ꓙ ꓡ ꓕꓯ꓾ ꓪꓴ-ꓢ ꓡꓰ ꓬꓲ ꓢꓲꓽ-ꓫꓬ-ꓟ-ꓦ ꓗꓪ ꓐꓰ ꓙꓵꓻ ꓠꓹ ꓟ ꓡꓯꓼ ꓫꓴ ꓕꓱ ꓟ ꓟꓽ ꓖꓶ ꓡ ꓠꓬ ꓬꓲ ꓔꓯ ꓮꓽ ꓟˍ ꓟꓲ ꓙꓵꓻ ꓟꓽ ꓐ ꓡ=

ꓙꓵꓻ ꓠꓲꓹ ꓕꓱ ꓟ ꓠꓬ ꓣꓱꓽ ꓛꓰꓽ ꓕꓲꓽ ꓟ ꓥ ꓡꓳ= ꓠꓴ ꓮ ꓡꓲ ꓟꓬ ꓛꓲ ꓢꓯꓼ ꓕꓵꓼˍ ꓥ ꓟꓲ꓾ ꓮ ꓡꓲ ꓘꓶꓸ ꓛꓲ ꓢꓷꓸ ꓠꓲꓹ ꓙꓳˍ ꓥ ꓟꓲ꓾ ꓮ ꓡꓲ ꓘꓶꓸ ꓓꓻˍ ꓥ ꓟꓲ꓾ ꓮ ꓡꓲ ꓘꓶꓸ ꓤ ꓘꓹ ꓥˍ ꓟꓲ ꓠꓴ ꓔꓯ ꓪꓴ-ꓢ ꓟꓽ ꓖꓶ ꓕꓯ ꓙꓵꓻ ꓠꓲꓹ ꓖꓳ ꓟ ꓔꓯ ꓟꓶ ꓟꓽ ꓓꓻ= 

ꓝꓮꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓞꓳ ꓤ ꓔꓯ ꓟꓳꓸ ꓢꓯꓼ ꓕꓵꓼ ꓠ ꓗꓹ ꓟ ꓕꓲ ꓫꓵꓽˍ ꓟꓲ ꓥ ꓡꓳ= ꓥ ꓡꓳ꓾ ꓪꓴ-ꓢ ꓠꓬ ꓙꓵꓻ ꓠꓲꓹ ꓙꓵꓻ ꓠꓹ ꓟ ꓐꓱ ꓶ ꓬꓲ ꓠꓬ ꓖꓶˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓞꓳ ꓤ ꓕꓲ ꓒꓳꓹ ꓗꓪ ꓖꓳ ꓟ ꓔꓯ ꓟꓽ ꓘꓳꓹ ꓣꓴ ꓕꓯ ꓢꓲꓽ-ꓫꓬ-ꓟ-ꓦ ꓬꓲꓼ ꓠꓬꓲꓸ ꓖꓶ ꓡˍ ꓟ꓾ ꓢꓲꓽ-ꓫꓬ-ꓟ-ꓦ ꓙꓻ ꓖꓴ ꓟꓳꓸ ꓖꓶ ꓡˍ ꓟ꓾ ꓢꓲꓽ-ꓫꓬ-ꓟ-ꓦ ꓡꓬꓸ ꓖꓶ ꓡˍ ꓟ ꓔꓯ ꓬꓲ ꓟꓽ ꓘꓳꓹ ꓣꓴ ꓕꓯ ꓬꓲ ꓠꓬ ꓙꓵꓻ ꓟꓽ ꓐ ꓡ= ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓣꓱꓽ ꓛꓰꓽ ꓕꓲ ꓟ ꓥ ꓟ ꓡꓰ ꓐꓰ ꓞꓳ ꓤ ꓔꓯ ꓛꓱꓽ ꓗꓪ ꓐꓰ ꓙꓵꓻ ꓠꓹ ꓟ ꓢꓯꓼ ꓕꓵꓼ ꓠꓯꓹ ꓟ ꓕꓲ ꓟˍ ꓟꓲ ꓥ ꓡꓳ=

ꓝꓮꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓬꓲ  ꓝꓳꓽ ꓬꓲ ꓙꓳˍ ꓡꓳ= ꓖꓳ ꓟ ꓔꓯ ꓠꓴ ꓙꓵꓻ ꓐꓯ ꓢꓲ ꓬꓲ ꓔꓯ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓟꓽ ꓠ= ꓬꓲ ꓥˍ ꓟꓲ ꓬꓲ ꓢꓲ ꓠꓲꓹ ꓫꓵˍ ꓟ ꓔꓯ ꓢꓲ ꓐ ꓡˍ ꓡꓳ= ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓔꓯ ꓙꓵꓻ ꓠꓹ ꓟ ꓐꓱ ꓶ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓟꓽ ꓠ= ꓬꓲ ꓔꓯ ꓙꓵꓻ ꓡ ꓝꓲ ꓐꓯ ꓢꓲ ꓠꓱꓸ ꓐꓯ ꓮꓽ ꓟ ꓕꓲ ꓣꓳ ꓥˍ ꓟꓲ ꓢꓯꓼ ꓪ ꓗꓪ ꓐꓰ ꓬꓲ ꓔꓯ ꓬꓲꓼ ꓠꓬꓲꓸ ꓟꓽ ꓐ ꓡ= ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓚꓲꓸ ꓛꓬ ꓠꓲꓹ ꓡꓶꓽ ꓗꓪ ꓐꓰ ꓓꓳꓻ ꓡˍ ꓟ ꓡꓯꓼ ꓫꓴ ꓕꓲ ꓟˍ ꓟꓲ ꓥ ꓡꓳ=

ꓪꓴ-ꓢ ꓖꓶˍ ꓟ ꓡꓯꓼ ꓫꓴ꓾ ꓙꓵꓻ ꓠꓲꓹ ꓡꓯꓼ ꓫꓴ ꓔꓯ ꓘꓳꓹ ꓣꓴ ꓠꓹ ꓟ ꓐꓱ ꓶ ꓚꓲꓸ ꓛꓬ ꓠꓲꓹ ꓟ ꓠꓯꓸꓼ ꓗꓪ ꓙꓵꓻ ꓠꓲꓹ ꓖꓳ ꓟ ꓔꓯ ꓘꓳꓹ ꓣꓴ ꓐ ꓡˍ ꓟ ꓙ ꓣꓳˍ ꓟ ꓠꓲꓹ ꓟ꓾ ꓢꓲꓽ-ꓫꓬ-ꓟ-ꓦ ꓢꓯꓼ ꓪ ꓙꓳ ꓠ ꓔ ꓡꓳ= ꓣꓳ ꓚꓬꓴꓸ ꓟꓶ ꓠꓹ ꓟ ꓐꓱ ꓶ ꓠꓬ ꓙꓵꓻ ꓠꓲꓹ ꓙꓳ ꓠ ꓔ ꓡꓳ=

ꓙꓵꓻ ꓠꓲꓹ ꓐꓯ ꓟ ꓠꓬ ꓮ ꓘꓶꓸ ꓬꓳꓸ ꓚꓵˍ ꓟ꓾ ꓙꓲ-ꓢꓴ ꓢꓲ ꓤ ꓐꓴ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓬꓲ ꓪꓴꓸ ꓕꓲ ꓫꓵꓽ ꓥ ꓡꓳ= ꓙꓵꓻ ꓠꓲꓹ ꓕꓱ ꓟ ꓔꓯ ꓣꓳ ꓟꓶ ꓡꓰ ꓗ ꓠꓯꓸ꓾ ꓙꓵꓻ ꓠꓲꓹ ꓕꓱ ꓟ ꓫꓵꓻˍ ꓗꓪ ꓛꓲ ꓕꓶꓻ ꓞꓹ ꓠꓹ ꓟ ꓐꓱ ꓶ ꓥˍ ꓟꓲ ꓬꓳꓸ ꓚꓵˍ ꓡꓳ= ꓠꓴ ꓠꓬꓲꓸ ꓠꓬꓲ ꓙꓵꓻ ꓢꓲ ꓢꓸ ꓠꓯ ꓟꓽ ꓙꓵꓻ ꓕꓯ ꓣꓱꓽ ꓛꓰꓽ ꓟꓽ ꓟꓶ= ꓢꓸ ꓠꓯ ꓙꓵꓻ ꓢꓲ ꓪ ꓠꓬꓲ ꓟꓽ ꓙꓵꓻ ꓕꓯ ꓣꓱꓽ ꓛꓰꓽ ꓟꓽ ꓟꓶ= ꓕꓶꓻ ꓕꓶꓻ ꓞꓹ ꓞꓹ ꓡꓰꓽ꓾ ꓢꓯꓼ ꓪ ꓙꓳ ꓙꓳ ꓡꓰꓽ ꓙꓵꓻ ꓐ ꓡ ꓢꓲꓸ ꓡꓰꓽ ꓠꓴ ꓐꓱ ꓶ ꓥꓪ ꓐꓱ ꓶ ꓢꓯꓼ ꓪ ꓟꓶˍ ꓟ ꓥ ꓡꓳ=

ꓝꓮꓲ ꓙꓵꓻ ꓠꓲꓹ ꓐꓯ ꓟ ꓠꓬ ꓣꓳ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓡꓰ ꓗꓹ ꓛꓲꓽ ꓪˍ ꓟ꓾ ꓙꓵꓻ ꓠꓲꓹ ꓐꓯ ꓟ ꓠꓬ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓡꓰ ꓪꓴ-ꓢ ꓢꓯꓼ ꓪ ꓔꓯ ꓣꓳ ꓘꓳꓹ ꓣꓴ ꓟꓶˍ ꓟ ꓙꓻ ꓖꓴ ꓕꓲ ꓟ ꓥ ꓡꓳ= ꓖꓳ ꓡꓱ ꓠꓬꓲ (2 ꓘꓳ-ꓡꓱ-ꓕꓴ 5ꓽ7) ꓗꓪ꓾ ꓥꓪ ꓠꓴꓽ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓫꓱꓽ ꓔꓬ ꓡꓳ= ꓟꓬ ꓢꓶꓽ ꓗꓪ ꓐꓰ ꓫꓱꓽ ꓔꓬ ꓟ ꓟꓽ ꓥ꓾ ꓐꓰ ꓐꓯ ꓔ ꓡꓳ= ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓙꓵꓻ ꓠꓲꓹ ꓗꓪ ꓐꓰ ꓡꓰꓽ ꓙꓻ ꓖꓴ ꓫꓱꓽ ꓔꓬ ꓡꓳ= ꓟꓳꓻ ꓓꓻˍ ꓟ꓾ ꓕꓲ ꓠꓬꓲ ꓙꓳˍ ꓠꓬ ꓐꓬ ꓡꓰˍ ꓟ ꓣꓳ ꓟꓬ ꓢꓶꓽ ꓔꓯ ꓗꓶꓸ ꓗꓴꓸˍ ꓟ꓾ ꓣꓳ ꓔꓯ ꓠꓯꓻ ꓡꓰ ꓝꓲ ꓐ ꓡˍ ꓟ ꓣꓳ ꓟꓬ ꓢꓶꓽ ꓗꓪ ꓐꓰ ꓞꓳ ꓙꓳ ꓔꓬ ꓟ ꓟꓽ ꓥ= 

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓵꓻ ꓠꓲꓹ ꓠꓬ ꓬꓳꓸ ꓚꓵˍ ꓡꓳ= ꓪꓴ-ꓢ ꓔꓯ ꓧꓶꓸ ꓕꓯ ꓣꓳ ꓙꓵꓻ ꓢꓲ ꓠꓬꓲ ꓬꓲ ꓚꓱꓹ ꓔꓯ ꓣꓳ ꓢꓷꓸ ꓐ ꓡˍ ꓡꓳ= ꓣꓳ ꓠꓱꓸ ꓐꓯ ꓗꓪ ꓠꓬ ꓢꓷꓸ ꓠꓲꓹ ꓕꓲ ꓫꓵꓽ ꓫꓵꓽ ꓗꓪ ꓥˍ ꓟꓲ꓾ ꓮ ꓡꓲ ꓗꓪ ꓥˍ ꓟꓲ ꓣꓳ ꓧꓶꓸ ꓕꓯ ꓢꓷꓸ ꓡꓰ ꓢꓲ ꓠꓬꓲ ꓙꓵꓻˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓔꓯ ꓠꓬ ꓕꓱ ꓡꓱ ꓟꓽ ꓥ= ꓣꓳ ꓧꓶꓸ ꓕꓯ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓣꓳ ꓠꓬ ꓬꓲ ꓚꓱꓹ ꓢꓷꓸ ꓡ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓙꓵꓻ ꓠꓲꓹ ꓕꓱ ꓟ ꓪ ꓜꓲ ꓪꓴꓽ ꓡ ꓠꓹ ꓟ ꓐꓱ ꓢꓯꓼ ꓕꓵꓼ ꓙꓰ ꓡꓯ= ꓪꓴ-ꓢ ꓔꓯ ꓶꓼ ꓓꓰꓽ ꓙꓰ ꓡꓯ= ꓪꓴ-ꓢ ꓠꓯꓸꓼ ꓗꓪ ꓢꓯꓼ ꓪ ꓣꓴ ꓓꓴ ꓬꓰ ꓡꓯ=