ꓙꓵꓻ ꓠꓲꓹ ꓙꓳˍ ꓟ ꓤ ꓟꓶ ꓤ (12 ꓘꓳꓼ ꓡꓱꓸꓼ ꓫꓵꓽ ꓜꓲꓺ ꓓꓳ ꓠꓻ ꓗꓪ ꓐꓰ ꓓꓻ ꓡꓰ ꓢꓴ)

ꓣꓳ ꓤꓶꓻ ꓠꓯꓸꓼ ꓗꓪ ꓕꓲꓽ ꓧꓪꓹ ꓧꓪꓹ ꓗꓪ ꓒꓴꓻ ꓫꓵꓺ ꓚꓱꓹ ꓗꓪ ꓥˍ ꓟꓲ꓾ ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓓꓴ ꓕꓲ ꓒꓳꓹ ꓗꓪ ꓥˍ ꓟꓲ꓾ ꓞꓳ ꓤ ꓐꓴ ꓐꓰ ꓙ ꓡꓯꓽ ꓘꓳˍ ꓟ ꓗꓪ ꓥˍ ꓟꓲ꓾ ꓦꓻ ꓕꓲ ꓒꓳꓹ ꓗꓪ ꓥˍ ꓟꓲ ꓣꓳ ꓐꓱ ꓶ ꓪꓴꓸ ꓓꓵ ꓡꓰꓸ ꓕꓯꓽ ꓟꓽ ꓑꓶꓸ ꓗꓪ ꓛꓲ꓾ ꓞꓳ ꓤ ꓟꓲꓽ ꓙꓬ ꓗꓪ ꓓꓳꓺ ꓙꓰ ꓟꓽ ꓐ ꓡ ꓗꓪ ꓛꓲ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓡˍ ꓕꓯ ꓣꓳ ꓠꓬ ꓖꓳ ꓟ ꓔꓯ ꓮ ꓡꓰ ꓬꓰˍ ꓡ?

ꓠꓲꓹ ꓟ ꓫꓸ ꓟ ꓠꓲꓹ ꓟ ꓙꓬ ꓪˍ ꓟ ꓘꓴꓽ ꓗꓪ ꓡꓰꓽ ꓟꓽ ꓠꓽ ꓠꓽ ꓞꓰꓻ ꓓꓵꓽ ꓡꓰ ꓔꓬ ꓠꓬꓲ ꓣꓳ ꓔꓯ ꓖꓳ ꓓꓳꓺ ꓖꓶ ꓐ ꓡ ꓢꓴ ꓔꓯ ꓥꓳ ꓡꓳꓸ ꓔꓬ ꓡ? ꓟꓽ ꓥ ꓠꓬ ꓫꓸ ꓓꓴ ꓔꓯ ꓡꓰꓽ ꓪꓳ ꓫꓳꓸ ꓔ ꓢꓲ ꓡ ꓠꓹ ꓟ ꓤꓶꓻ ꓐꓱ ꓶ ꓫꓸ ꓔꓬ ꓝꓲ ꓠꓯꓹ ꓡ? ꓟꓽ ꓥ ꓠꓬ ꓣꓳꓽˍ ꓡꓰ ꓐꓰ ꓫꓸ ꓓꓴ ꓟꓽ ꓟꓬꓽ ꓢꓴ ꓐꓴ ꓔꓯ ꓡꓰꓽ ꓝꓴꓲꓸ ꓓꓰꓺ ꓢꓲ꓾ ꓠꓲꓹ ꓜꓳ ꓔꓬ ꓡ? ꓫꓸ ꓓꓴ ꓔꓳꓹ ꓜꓳꓽ ꓔꓬ ꓥ ꓟꓲ ꓟꓽ ꓡꓳꓸ ꓙ ꓖꓶ ꓟ ꓪꓴ-ꓢ ꓔꓯ ꓡꓰꓽ ꓠꓲꓹ ꓟ ꓠꓻ ꓢꓲ ꓫꓸ ꓙꓵ ꓓꓴ ꓘꓴꓽ ꓗꓪ ꓡꓰꓽ ꓞꓳ ꓙꓳ ꓔꓬ ꓠꓯꓹ ꓡ?

ꓖꓳ ꓡꓱ ꓢꓲ ꓫꓸ ꓙꓵ ꓓꓴ ꓖꓳ ꓟ ꓠꓬ ꓕꓲꓽ ꓘꓳꓼ꓾ ꓠꓬꓲꓽ ꓘꓳꓼˍ ꓡꓰˍ ꓟꓲ ꓟꓽ ꓠꓽ ꓗꓷ꓾ ꓥꓪꓽ ꓘꓳꓼ ꓛꓳꓼ ꓘꓳꓼ ꓙꓳ ꓡˍ ꓟꓲ ꓟꓽ ꓓꓻ ꓡꓰ꓾ ꓗꓴꓺ ꓘꓳꓼ ꓞꓲꓺ ꓘꓳꓼ ꓟꓽ ꓞꓲꓺ ꓔꓳꓹ ꓜꓳꓽ ꓡˍ ꓕꓯ ꓠꓲꓹ ꓟ ꓙꓬ ꓡꓰ ꓢꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓚꓲꓸ ꓛꓬ ꓡꓰ ꓢꓰꓼ ꓗꓷ ꓠꓹ ꓟ ꓓꓵꓽ ꓙ ꓟꓶˍ ꓥ ꓟꓽ ꓢꓷꓸ=

ꓕꓱ ꓡꓱ ꓬꓲ ꓞꓲꓺ ꓘꓳꓼ ꓟꓽ ꓞꓲ ꓫꓸ ꓙꓵꓻ ꓔꓬ ꓟ ꓠꓯꓸꓼ ꓗꓪ ꓐꓰ ꓡꓲꓹ ꓙꓰ ꓐ ꓡ ꓠꓹ ꓟ ꓐꓱ ꓶ ꓮ ꓟꓬꓹ ꓚꓱꓹ ꓗꓪ ꓐꓰ ꓢꓯꓼ ꓕꓵꓼ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓖꓴ ꓟꓸ ꓖꓶ ꓔ ꓡꓳ=

ꓚꓵꓺ ꓚꓵꓺ ꓢꓲꓽ ꓫꓬ ꓕꓳꓽ ꓶ ꓗꓪ ꓤ ꓟꓶ ꓤ ꓖꓳ ꓕꓲ ꓣꓳ ꓬꓲ ꓟꓬꓱꓺ ꓔꓯ ꓠꓽ ꓟꓽ ꓐꓳ ꓚꓲꓸ ꓔ= ꓖꓳ ꓡꓱ ꓥ ꓟꓲ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯ (ꓟ-ꓕꓲ 9ꓽ20-22꓾ ꓟ-ꓘꓳ 5ꓽ25-34꓾ ꓡꓴ-ꓘ 8ꓽ43-48) ꓗꓪ ꓐꓳ ꓔ ꓡꓳ= ꓖꓳ ꓡꓱ ꓠꓬꓲ ꓤ ꓟꓶ ꓤ ꓖꓳ ꓕꓲ ꓣꓳ ꓬꓲ ꓟꓸ ꓟꓲꓽ ꓔꓯ ꓐꓲꓺ ꓐꓲꓺ ꓜꓲꓼ ꓜꓲꓼ ꓐꓳ ꓔ ꓟ ꓟ-ꓘꓳ 5ꓽ25-34 ꓗꓪ ꓐꓰ ꓢꓳ ꓣꓴ ꓠꓬꓲ ꓡꓯ=

ꓟ-ꓘꓳ 5ꓽ25 “ꓖꓳ ꓗꓪ ꓫꓵꓽ ꓜꓲꓺ ꓓꓳ ꓠꓬꓲ ꓞꓲ ꓠꓬꓲꓽ ꓘꓳꓼ ꓠꓻ ꓔꓬ ꓢꓴ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ”

ꓖꓳ ꓕꓲ ꓠꓬꓲ ꓖꓳ ꓕꓲ ꓙꓵꓹ ꓕꓯ ꓙꓰ-ꓣꓴ ꓠꓬ ꓬꓲ ꓮ ꓟꓲꓽ ꓮ ꓘꓶꓸ ꓠꓻ ꓔꓬ ꓟ ꓑꓶꓸ ꓓꓴ ꓠꓻ ꓫꓬꓹ ꓖꓶ ꓠꓹ ꓟ ꓬꓰ-ꓢꓴ ꓔꓯ ꓓꓰꓽˍ ꓕꓯ ꓬꓰ-ꓢꓴ ꓠꓬ ꓙꓰ-ꓣꓴ ꓔꓯ ꓛꓳ ꓙꓰ ꓔꓬ ꓟ ꓙꓵꓹ (ꓟ-ꓘꓳ 5ꓽ21-24)꓾ ꓫꓵꓽ ꓜꓲꓺ ꓓꓳ ꓠꓬꓲ ꓠꓻ ꓔꓬ ꓟ ꓤ ꓟꓶ ꓤ ꓥ ꓟꓲ ꓬꓰ-ꓢꓴ ꓐꓰ ꓟꓽ ꓶꓽ ꓟ ꓗꓪ ꓔꓬ ꓟ ꓙꓵꓹ ꓥ ꓡꓳ=

ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓬꓲ ꓤꓶꓻ ꓠꓬ 12 ꓘꓳꓼ ꓡꓱꓸꓼ ꓫꓵꓻ ꓢꓴ ꓕꓲ ꓣꓳˍ ꓡꓰ ꓐꓰ ꓫꓸ ꓙꓵ ꓜꓲꓽ ꓗꓳꓸ ꓡ ꓢꓴ ꓥ ꓡꓳ= ꓞꓲꓼ ꓙꓳ ꓡ ꓟ ꓤ ꓟꓶ ꓤ ꓐꓴ ꓐꓱ ꓶ ꓦ ꓐ ꓕꓲ ꓟ ꓕꓲ ꓧꓪꓹ ꓗꓪ ꓫꓵꓽ ꓜꓲꓺ ꓡˍ ꓟ ꓠꓬ ꓬꓲ ꓝꓳꓽ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓙꓵꓹ ꓛꓲ ꓡ ꓕꓯ ꓟꓬꓽ ꓡꓰ ꓠꓲꓸ ꓡꓰˍ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓟꓽ ꓙꓲꓻ ꓟ꓾ ꓠꓲꓹ ꓟ ꓥˍ ꓟꓲ ꓦꓶꓻ ꓡ ꓢˍ ꓟ꓾ ꓖꓳ ꓓꓱꓽ ꓖꓳ ꓟꓲ ꓘꓳꓼ ꓠꓻˍ ꓟ ꓕꓱ ꓡꓱ ꓫꓵꓽ ꓠꓽ ꓒꓬꓱꓼ ꓡˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓫꓵꓽ ꓜꓲꓺˍ ꓟ ꓙꓵꓹ ꓗꓳꓸ ꓙꓰ ꓕꓯ ꓖꓳ ꓓꓱꓽ ꓗꓪ ꓡꓳꓻ ꓡꓰ ꓢꓲ ꓔꓬꓹ ꓢꓻ ꓡ ꓟ ꓥ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓯꓹ ꓟ ꓤ ꓟꓶ ꓤ ꓐꓱ ꓶ ꓠꓽ ꓬꓲ ꓔꓯ ꓫꓵꓽ ꓜꓲꓺˍ ꓟ ꓠꓬ ꓕꓲ ꓠꓬꓲ ꓠꓬꓲꓽ ꓠꓬꓲˍ ꓡꓰꓽˍ ꓟꓲ ꓟꓽ ꓠꓽ ꓡꓰ꓾ ꓕꓲ ꓘꓳꓼ ꓠꓬꓲꓽ ꓘꓳꓼ ꓙꓳ ꓡˍ ꓥ ꓟꓲ ꓠꓻ ꓖꓳ ꓟꓽ ꓟꓽ ꓓꓻ ꓡꓰ ꓡꓰ ꓐꓰ 12 ꓘꓳꓼ ꓙꓳ ꓡ ꓗꓷꓳ꓾ ꓐꓰ ꓐꓯ ꓔ ꓡꓳ=

ꓖꓳ ꓟ ꓑꓶꓸ ꓓꓴ ꓬꓲ ꓤꓶꓻ ꓠꓬ ꓫꓵꓻꓳ ꓐꓰ ꓐꓯ ꓟꓽ ꓠ ꓥˍ ꓟꓲ꓾ ꓟꓳ-ꓫꓲ ꓬꓲ ꓙꓵꓽ ꓗ ꓗꓪ ꓫꓵꓽ ꓜꓲꓺ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓔꓯ ꓟꓽ ꓢꓲꓽ ꓫꓬ ꓐꓰ ꓐꓯ ꓔ ꓠꓬꓲ (ꓡꓱ-ꓬꓲ 15ꓽ25-27) ꓤ ꓟꓶ ꓤ ꓖꓳ ꓕꓲ ꓣꓳ ꓐꓱ ꓶ ꓠꓬ ꓕꓲ ꓠꓬꓲꓹ ꓡꓰꓽ ꓟꓽ ꓢꓲꓽ ꓫꓬ ꓟ ꓗꓷ ꓡꓰ ꓠꓬꓲ꓾ ꓞꓳ ꓤ ꓟꓲꓽ ꓙꓬ ꓗꓪˍ ꓟꓲ ꓓꓳꓺ ꓙꓰ ꓟꓽ ꓓꓻ꓾ ꓞꓳ ꓤ ꓐꓴ ꓐꓰˍ ꓟꓽ ꓪ ꓔꓹ ꓖꓳ ꓡꓱ ꓗꓷ ꓡꓰ ꓠꓬ ꓬꓲ ꓤꓶꓻ ꓗꓪ ꓗꓹ ꓛꓲ ꓓꓴˍ ꓟꓲ ꓒꓲꓼ ꓡꓰ ꓟ ꓠꓬ 12 ꓘꓳꓼ ꓙꓳ ꓡ ꓗꓷ ꓟ ꓥ ꓡꓳ= ꓤꓶꓻ ꓗꓪ ꓗꓹ ꓛꓲꓽ ꓓꓴ ꓒꓲꓼ ꓡꓰ ꓕꓯ ꓠꓽ ꓤꓶꓻ ꓫꓵꓻ ꓔꓬ ꓟˍ ꓟꓲ 12 ꓘꓳꓼ ꓙꓳ ꓡꓰꓳ ꓐꓰ ꓐꓯ ꓓꓹ ꓟ ꓥ ꓡꓳ=

ꓬꓲ ꓠꓬ 12 ꓘꓳꓼ ꓡꓱꓸꓼ ꓫꓵꓽ ꓜꓲꓺ ꓠꓻ ꓔꓯ ꓫꓬꓹ ꓔꓬ ꓥ ꓟꓲ ꓟꓽ ꓓꓻ ꓡꓰ꓾ ꓠꓯꓻ ꓞꓲꓼ ꓫꓬꓹ ꓢꓴ ꓮ ꓙꓵꓽ ꓔꓯ ꓟꓳꓸ ꓖꓶˍ ꓥ ꓟꓲ ꓟꓽ ꓓꓻ ꓡꓰ꓾ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓖꓴ ꓡꓰˍ ꓥ ꓟꓲ ꓬꓲ ꓠꓻ ꓠꓬ ꓟꓽ ꓓꓻ ꓡꓰ ꓐꓰ ꓟ-ꓘꓳ 5ꓽ26 ꓗꓪ ꓐꓯ ꓔ ꓡꓳ= ꓠꓻ ꓥ ꓟꓲ ꓬꓲ ꓐꓷꓹ ꓠꓻ ꓡ꓾ ꓒꓴꓻˍ ꓟꓲ ꓮ ꓙꓵꓽ ꓖꓴ ꓡꓰ ꓕꓯ ꓬꓲ ꓤꓶꓻ ꓠꓬ ꓢꓯꓸ ꓔꓬ ꓥ ꓟꓲ ꓫꓵꓻ ꓟ ꓐꓰ ꓕꓲꓽ ꓡꓰꓹꓼ ꓗꓷ ꓡꓰꓳ=

ꓬꓲ ꓐꓱ ꓶ ꓥꓳ ꓡꓳꓸ ꓓꓴ ꓟꓽ ꓙꓳ ꓗꓷ ꓡꓰ ꓔꓬ ꓕꓯ ꓞꓳ ꓤ ꓮ ꓟꓬꓹ ꓐꓴ ꓡꓰ ꓟꓷꓽ ꓠꓷꓹ ꓝꓸ ꓢꓴ ꓕꓲ ꓣꓳ ꓥꓳ ꓐꓰ ꓐꓯ ꓔꓬ ꓟ ꓢꓲ ꓒ ꓬꓰ-ꓢꓴ ꓓꓳꓽ ꓔꓯ ꓤ ꓟꓶ ꓤ ꓖꓳ ꓕꓲ ꓣꓳ ꓑꓽ ꓙꓽ ꓡꓰꓳ= ꓡ ꓞꓳ ꓖꓳ ꓕꓲ ꓣꓳ ꓠꓬ ꓟꓶꓽ ꓛꓵꓼ ꓟ ꓬꓲ ꓤ ꓔꓯˍ ꓟꓲ ꓢꓯꓸ ꓬꓲꓼ ꓡ ꓝꓲ꓾ ꓟꓽ ꓑꓽ ꓙꓽ ꓢꓴ ꓠꓬꓲ ꓟꓽ ꓟꓳꓻ ꓢꓴ ꓔꓯ ꓫꓬꓹ ꓖꓶ ꓢꓴ꓾ ꓔꓸ ꓟꓼ ꓩꓴꓸ ꓓꓲꓻ ꓢꓴ ꓔꓯˍ ꓟꓲ ꓫꓬ ꓡꓰ ꓝꓲ꓾ ꓠꓲꓽ ꓜꓶꓽ ꓞꓹ ꓢꓴ ꓔꓯ ꓥˍ ꓟꓲ ꓠꓲꓽ ꓖꓼ ꓓꓳ ꓶ ꓕꓱ ꓟꓬ ꓫꓵꓽ ꓓꓵꓽ ꓙ ꓟꓶ ꓓꓴ ꓬꓰ ꓖꓶ ꓐ ꓡˍ ꓟ ꓢꓲ ꓒ ꓬꓰ-ꓢꓴ ꓓꓳꓽ ꓔꓯ ꓮ ꓕꓯ ꓟꓲ ꓑꓽ ꓙꓽ ꓡˍ ꓕꓯ ꓬꓲ ꓠꓲꓹ ꓟ ꓗꓪ “ꓥꓪ ꓠꓽ ꓬꓲ ꓐꓵ ꓞꓶꓽ ꓟꓶꓽ ꓗꓪ ꓫꓱꓹˍ ꓟꓶˍ ꓕꓲ ꓖꓼ ꓓꓻ ꓡꓰˍ ꓥꓳ” ꓐꓰ ꓓꓵꓽ ꓙ ꓟꓶ ꓡꓰꓳ꓾ ꓙꓳꓽ=

ꓬꓲ ꓖꓳ ꓡꓱ ꓥꓳ ꓡꓳꓸ ꓔ ꓟ ꓬꓲ ꓙꓵꓹ ꓛꓲ ꓡ ꓥ ꓟꓲ ꓚꓵ ꓚꓵ ꓡꓯꓼ ꓕꓲꓺ ꓬꓰ ꓠꓹ ꓟ ꓠꓽ ꓟꓽ ꓢꓻ ꓐꓭ= ꓢꓲ ꓒ ꓬꓰ-ꓢꓴ ꓙꓰ ꓔꓬ ꓟ ꓗꓪ ꓢꓲ ꓒ ꓬꓰ-ꓢꓴ ꓚꓺ ꓖꓶ ꓡˍ ꓟ ꓔꓯ ꓠꓺ ꓠꓹ ꓠꓲꓹ ꓫꓵ ꓢꓴ ꓑ ꓫꓬ ꓐꓴ꓾ ꓠꓻ ꓓꓻ ꓡꓰ ꓠꓲꓹ ꓫꓵ ꓢꓴ ꓐꓴ꓾ ꓢꓲ ꓒ ꓬꓰ-ꓢꓴ ꓔꓯ ꓕꓱ ꓟ ꓠꓬ ꓮ ꓡꓲ ꓫꓵꓽ ꓕꓲ ꓣꓳ ꓥ ꓡ꓾ ꓐꓯ ꓢꓲ ꓢꓷꓸ ꓠꓲꓹ ꓫꓵ ꓢꓴ ꓐꓴ꓾ ꓕꓱ ꓟꓬ ꓠꓬ ꓢꓲ ꓒ ꓬꓰ-ꓢꓴ ꓗꓳ ꓡꓳ ꓗꓪ ꓒ ꓐꓲꓺ ꓓꓹ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓕꓲꓺ ꓪ ꓠꓹ ꓟ ꓠꓽ ꓟꓽ ꓢꓻ ꓟ ꓥ ꓡꓳ=

ꓟꓬꓺ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓡꓰ ꓐꓰ “ꓓ-ꓪꓵ ꓬꓲ ꓤꓽꓳ ꓥꓪ ꓔꓯ ꓫꓱꓸ ꓤ ꓡꓯ” ꓐꓰ ꓘꓴꓻ ꓢꓲˍ ꓟꓲ ꓬꓰ ꓟꓽ ꓐ ꓡ ꓢꓴ ꓥ ꓠꓬꓲ ꓞꓳ ꓜꓴ ꓮ ꓟꓬꓹ ꓣꓳ ꓔꓯ ꓑꓵ ꓙꓰ ꓢꓲ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓛꓲꓺ ꓬꓰ ꓠꓹ ꓟ ꓠꓬ ꓤ ꓟꓶ ꓤ ꓖꓳ ꓕꓲ ꓣꓳ ꓐꓱ ꓶ ꓮ ꓘꓶꓸ ꓫꓸˍ ꓟ ꓥꓳ= ꓫꓵꓽ ꓜꓲꓺ ꓔꓬ ꓟ ꓤ ꓟꓶ ꓤ ꓠꓬ ꓟꓽ ꓢꓲꓽ ꓫꓬ ꓠꓬꓲ ꓞꓳ ꓤ ꓐꓴ ꓗꓳ ꓡꓳ ꓗꓪ ꓔꓬ ꓟꓽ ꓠ ꓠꓬꓲ ꓬꓲ ꓠꓬ ꓬꓲ ꓒꓬꓱꓼ ꓟꓬ ꓔꓯ ꓑꓲꓸ ꓔ ꓢꓲ ꓔꓬ ꓪ ꓢꓴ ꓥ ꓠꓬꓲ ꓢꓴ ꓑ ꓙꓽ ꓡꓰ ꓠ ꓘꓴꓻ ꓟꓽ ꓐ ꓡ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ ꓬꓲ ꓠꓬ ꓬꓲ ꓠꓻ ꓓꓻ ꓡꓰ ꓠꓲꓹ ꓫꓵˍ ꓟ ꓑꓶꓸ ꓓꓴ ꓞꓳ ꓜꓴ ꓘꓴꓽ ꓗꓪ ꓑꓵꓺ ꓓꓵꓽ ꓙꓰ ꓢꓲ ꓡꓳꓹ ꓬꓰˍ ꓕꓯ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓵ ꓞꓶꓽ ꓟꓶꓽ ꓔꓯ ꓕꓲꓺ ꓐ ꓡ ꓗꓷꓳ= ꓕꓶꓺ ꓞꓹ ꓟ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ 12 ꓘꓳꓼ ꓡꓱꓸꓼ ꓫꓵꓽ ꓜꓲꓺ ꓓꓳ ꓔꓬ ꓟˍ ꓟꓲ ꓞꓼ ꓐꓰ ꓠꓽ ꓡꓰ ꓢꓲ ꓬꓲ ꓖꓳ ꓓꓱꓽ ꓗꓪ ꓠꓻ ꓓꓻ ꓡꓰꓳ ꓐꓰ ꓚꓬꓹ ꓪ ꓡꓰꓳ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓥ ꓟꓲ ꓬꓲ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓢꓯꓼ ꓓꓳ ꓙꓰ ꓟ ꓔꓯ ꓞꓼ ꓐꓰ ꓚꓬꓹ ꓪ ꓡꓰ ꓠꓬꓲ ꓞꓳ ꓜꓴ ꓗꓳ ꓡꓳ ꓗꓪ ꓔꓲꓸ ꓒꓳꓹ ꓢꓲ꓾ ꓮꓽ ꓟ ꓡꓰ ꓥꓪ ꓐꓵ ꓞꓶꓽ ꓗꓪ ꓫꓱꓹ ꓗꓷ ꓡ? ꓐꓰ ꓠ ꓠꓬꓲˍ ꓡꓳ= ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓞꓳ ꓜꓴ ꓞꓳ ꓟꓯꓼ ꓠꓴ ꓔꓯ ꓕꓳꓽ ꓞꓹ ꓟ ꓠꓴ ꓢꓷꓸˍ ꓡꓳ= ꓕꓱ ꓘꓶ ꓟꓬꓽˍ ꓟ ꓞꓳ ꓜꓴ ꓗꓳ ꓡꓳ ꓗꓪ ꓠꓴ ꓔꓯ ꓫꓱꓹ ꓗꓷ ꓢꓴ ꓮꓽ ꓟ ꓥ ꓟ ꓮ ꓡꓲ ꓢꓷꓸ ꓓ ꓢꓰꓽ꓾ ꓐꓯˍ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓫꓱꓹ ꓢꓴ ꓔꓯ ꓢꓷꓸ ꓡꓰ ꓠꓹ ꓟ ꓚꓳ ꓡꓳ ꓡꓳ ꓡꓳꓸ ꓠꓬꓲˍ ꓡꓳ꓾ ꓐꓰ ꓟ-ꓘꓳ 5ꓽ30-32 ꓗꓪ ꓐꓯ ꓔ ꓡꓳ=

ꓚꓵ ꓚꓵ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯ ꓫꓵꓽ ꓜꓲꓺ ꓠꓻ ꓗꓪ ꓐꓰ ꓓꓻ ꓡꓰ ꓝꓲ ꓢꓴ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓮꓽ ꓟ ꓫꓱꓹ ꓗꓷ ꓟ ꓔꓯ ꓢꓷꓸˍ ꓥ ꓟꓲ ꓤ ꓟꓶ ꓤ ꓔꓯ ꓞꓳ ꓤ ꓐꓴ ꓟꓲꓽ ꓙꓬ ꓓꓳꓺ ꓡ ꓠꓹ ꓟ ꓐꓯ ꓖꓶˍ ꓟ ꓠꓬ ꓬꓲ ꓔꓶꓺ ꓙꓱꓼ ꓮ ꓟꓬꓹ ꓙꓳˍ ꓡꓳ=

• ꓤ ꓟꓶ ꓤ ꓠꓬ ꓟꓽ ꓢꓲꓽ ꓫꓬ ꓢꓴ ꓕꓲ ꓣꓳˍ ꓡꓰ ꓐꓰ ꓮ ꓟꓬꓹ ꓘꓳꓼ ꓗꓷ ꓡꓰ ꓟ ꓗꓪ ꓐꓰ ꓮ ꓟꓶ ꓕꓯ ꓠꓬ ꓬꓲ ꓠꓻ ꓓꓻ ꓡꓰ ꓢꓲ ꓢꓲꓽ ꓫꓬ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷ ꓟ ꓔꓯ ꓡ ꓞꓳ ꓮ ꓟꓬꓹ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ꓾
• ꓤ ꓟꓶ ꓤ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓵ ꓞꓶꓽ ꓟꓶꓽ ꓔꓯ ꓫꓱꓹ ꓗꓷ ꓕꓲ ꓖꓼ ꓓꓻ ꓡꓰˍ ꓥꓳ ꓐꓰ ꓓꓵꓽ ꓙ ꓔ ꓟ ꓑꓶꓸ ꓓꓴ ꓠꓻ ꓓꓻ ꓡꓰ ꓝꓲˍ ꓟ ꓬꓲ ꓪꓽ ꓠꓬꓲ ꓓꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓵ ꓞꓶꓽ ꓗꓪ ꓓꓹ ꓟ ꓟꓽ ꓥ ꓥ꓾ ꓬꓲ ꓙꓵꓻ ꓠꓲꓹ ꓑꓶꓸ ꓓꓴ ꓓꓳꓺ ꓡˍ ꓡꓳ ꓐꓯ ꓟ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ꓾
• ꓟꓽ ꓢꓲꓽ ꓫꓬ ꓟ ꓤ ꓟꓶ ꓤ ꓕꓲ ꓣꓳ ꓕꓲꓺ ꓗꓷ꓾ ꓫꓱꓹ ꓗꓷ ꓕꓲ ꓖꓼ ꓟꓽ ꓢꓲꓽ ꓫꓬ ꓢꓴ ꓒꓬꓱꓼ ꓡꓰ ꓟ ꓟꓽ ꓥ
•  ꓐꓯ ꓟ ꓔꓯ ꓗꓳ ꓡꓳ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓮ ꓟꓬꓹ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ ꓑꓶꓸ ꓓꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓥꓪ ꓔꓯ ꓮꓽ ꓟ ꓫꓱꓹ ꓗꓷ ꓡ ꓐꓰ ꓠ ꓠꓬꓲˍ ꓟ ꓥ ꓡꓳ=

ꓡꓱ-ꓬꓲ 15ꓽ19-28 ꓗꓪ ꓠꓻ ꓑꓶꓸ ꓓꓴ ꓥˍ ꓟꓲ꓾ ꓦ ꓚꓳˍ ꓕꓯ ꓥ ꓟꓲ ꓫꓵꓽ ꓬꓲꓻ ꓔꓬ ꓟ ꓤ ꓟꓶ ꓤ ꓕꓲ ꓣꓳ ꓔꓯ ꓟꓽ ꓢꓲꓽ ꓫꓬ ꓐꓰ ꓐꓯ ꓔ ꓟ ꓑꓶꓸ ꓓꓴ ꓤ ꓟꓶ ꓤ ꓖꓳ ꓕꓲ ꓣꓳ ꓔꓯ ꓟꓽ ꓕꓲꓺ ꓪ ꓡꓰ ꓠꓹ ꓟ ꓬꓴ-ꓔ ꓡ ꓞꓳ ꓐꓴ ꓠꓬ ꓮ ꓘꓶꓸ ꓤ ꓟꓳˍ ꓟ ꓥ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓖꓳ ꓡꓱ ꓒꓬꓱꓼ ꓔꓬ ꓟ ꓤ ꓟꓶ ꓤ ꓡꓰ ꓕꓲꓺ ꓗꓷ ꓟ ꓮ ꓙꓵꓽˍ ꓟꓲ ꓟꓽ ꓢꓲꓽ ꓫꓬ ꓗꓷ ꓡꓰˍ ꓡꓳ꓾ ꓐꓰ ꓐꓯ ꓔ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓕꓲꓺ ꓪ ꓡꓰ ꓟ ꓤ ꓟꓶ ꓤ ꓠꓬ ꓙꓳꓺ ꓠꓬꓲ ꓐꓰ ꓢꓲ ꓒ ꓬꓰ-ꓢꓴ ꓟꓲ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓬꓲ ꓔꓯ ꓒꓬꓱꓼ ꓗꓷ ꓟ ꓮ ꓙꓵꓽ ꓐꓯ ꓖꓶˍ ꓡꓳ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓮꓸ ꓟꓲꓽꓳ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ= ꓧꓪꓸ ꓧꓪꓸꓼ ꓙꓰ= ꓠꓴ ꓠꓬ ꓠꓻ ꓓꓴ ꓗꓪ ꓐꓰ ꓩꓴ ꓗꓷ ꓟꓶ ꓡꓰꓳ꓾ ꓐꓯ ꓖꓶˍ ꓡꓳ=

ꓚꓵ ꓚꓵ ꓖꓳ ꓕꓲ ꓠꓬꓲ꓾ ꓖꓳ ꓕꓲ ꓙꓵꓹ ꓕꓯ ꓢꓲ ꓒ ꓬꓰ-ꓢꓴ ꓒ ꓕꓲ ꓗꓪ ꓔꓬ ꓢꓴ ꓠꓬ ꓮ ꓟꓬꓹ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓡꓰ ꓫꓬꓹ ꓖꓶˍ ꓟ ꓟꓶ ꓢꓲ ꓬꓲ ꓤꓶꓻ ꓒꓳꓹ ꓡꓶꓸ ꓗꓷ ꓟ ꓣꓱꓽ ꓛꓰꓽ ꓔꓯ ꓘꓳꓹ ꓣꓴ ꓟꓶ ꓡꓰ ꓢꓴ ꓠꓬ ꓙꓵꓻ ꓠꓲꓹ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓕꓲꓺ ꓪ ꓡꓰ ꓠ ꓛꓲ ꓢꓯꓼ ꓕꓵꓼ ꓢꓴ ꓤ ꓟꓶ ꓤ ꓖꓳ ꓕꓲ ꓣꓳ ꓥ ꓡꓳ= ꓣꓳ ꓤꓶꓻ ꓗꓪ ꓥˍ ꓟꓲ ꓪꓴ-ꓢ ꓒ ꓕꓲꓺ ꓗꓪ ꓔꓬ ꓥˍ ꓟꓲ ꓬꓲ ꓪ ꓤꓶꓻ ꓮ ꓕꓯ ꓟꓲ ꓟꓽ ꓒꓳꓹ ꓗꓷ ꓢꓴ ꓮ ꓟꓬꓹ ꓙꓳˍ ꓡꓳ=

ꓮ ꓟꓶ ꓢꓲ ꓒ ꓬꓰ-ꓢꓴ ꓗꓳ ꓡꓳ ꓗꓪ ꓔꓬ ꓢꓴ ꓐꓴˍ ꓡꓰ ꓐꓰ ꓪꓴ-ꓢ ꓐꓰ ꓠꓶꓽ ꓡꓰˍ ꓕꓲ ꓖꓼ꓾ ꓪꓴ-ꓢ ꓟꓸ ꓟꓲꓽ ꓢꓷꓸ ꓡꓰ ꓕꓲꓽ ꓖꓼ ꓚꓲꓸ ꓛꓬ ꓤꓶꓻ ꓔꓯ ꓫꓬꓹ ꓔꓱꓹ ꓓꓴ ꓐꓱ ꓶ ꓟꓽ ꓡꓳꓼ꓾ ꓚꓲꓸ ꓛꓬ ꓤꓶꓻ ꓫꓬꓹ ꓔꓱꓹ ꓓꓴ ꓐꓱ ꓶ ꓠꓬ ꓚꓲꓸ ꓛꓬ ꓖꓳ ꓓꓱꓽ ꓡꓰ ꓙꓵꓻ ꓠꓲꓹ ꓒ ꓐꓲꓺ ꓬꓰ ꓢꓲ ꓢꓲ ꓒ ꓔꓯ ꓙꓰ ꓠꓹ ꓟˍ ꓟꓲ ꓣꓱꓽ ꓞꓹ ꓡꓳ ꓐꓰ ꓾ ꓫꓵꓽ ꓜꓲꓺ ꓠꓻ ꓙꓳ ꓢꓴ ꓤ ꓟꓶ ꓤ ꓟꓸ ꓟꓲꓽ ꓗꓪ ꓐꓰ ꓣꓳ ꓢꓳ ꓣꓴ ꓐ ꓡˍ ꓟ ꓥ ꓡꓳ=