ꓙ-ꓡꓷ ꓟꓸ ꓟꓲꓽ

ꓙ-ꓡꓷ ꓠꓬ ꓘꓷ-ꓠ ꓪ ꓔꓲ ꓙ-ꓐꓰ-ꓠ ꓬꓲ ꓟꓯꓼ ꓜꓴꓻ ꓡꓯꓽ ꓒꓯꓹ ꓗꓪ ꓐꓰ ꓬꓲ-ꓢꓷ-ꓡꓰ ꓐꓴ ꓔꓯ ꓚꓬꓴꓸ ꓙ ꓗꓷ ꓟ ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶ ꓐꓯ ꓟꓴ ꓫꓬꓹ ꓒ ꓕꓳꓽ ꓶ ꓗꓪ ꓟ ꓓꓻ ꓟ ꓕꓲ ꓣꓳ ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓬꓲ ꓠꓬ ꓘꓷ-ꓠꓬꓲ ꓡ ꓞꓳ ꓫꓲ-ꓑꓷ ꓬꓲ ꓤ ꓟꓶ ꓥ ꓡꓳ= ꓘꓷ-ꓠꓬ ꓡ ꓞꓳ ꓐꓴ ꓠꓬ ꓟ-ꓓꓲ-ꓬ ꓡ ꓞꓳ ꓐꓴ ꓐꓰ ꓠꓶꓽ ꓡꓯ ꓘꓳˍ ꓟ ꓥ ꓡꓳ=

ꓘꓷ-ꓠ ꓪ ꓔꓲ ꓙ-ꓐꓰ-ꓠ ꓬꓲ ꓟꓯꓼ ꓢꓲꓽ ꓒ ꓢꓲ-ꓢꓲ-ꓡ ꓔꓯ ꓢꓰꓼ ꓗꓷ ꓟ ꓐꓯ ꓟꓴ ꓫꓬꓹ ꓒ ꓕꓳꓽ ꓶ ꓗꓪ ꓙ-ꓡꓷ ꓔꓯ ꓓꓻ ꓟ ꓕꓲ ꓣꓳ ꓥ ꓡꓳ ꓐꓰ ꓖꓴ ꓟꓸ ꓖꓶ ꓔ ꓡꓳ= ꓖꓳ ꓕꓲ ꓙꓵꓹ ꓕꓯ ꓪ ꓔꓲ ꓙ-ꓐꓰ-ꓠ ꓠꓬ ꓟꓷꓽ ꓠꓷꓹ ꓝ ꓟ ꓐꓰ ꓬꓲ-ꓢꓷ-ꓡꓰ ꓡ ꓞꓳ ꓗꓪ ꓟ ꓕꓲ ꓣꓳˍ ꓟ ꓐꓯ ꓟꓴ ꓫꓬꓹ ꓢꓴ ꓤ ꓟꓶ ꓤ ꓔꓷ-ꓐꓳ-ꓣ ꓧꓳꓽ ꓣꓱꓽ ꓔꓬꓹ ꓟ ꓠꓯꓸꓼ ꓗꓪ ꓔꓬ ꓟ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓟꓯꓼ ꓓꓶꓽ ꓡꓯ ꓘꓳ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ=

ꓢꓲ-ꓢꓲ-ꓡ ꓐꓰ ꓬꓲ ꓟꓯꓼ ꓐꓴ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓓꓶꓽ ꓠꓹ ꓟ ꓡ ꓔꓬ ꓕꓯ꓾ ꓔꓷ-ꓐꓳ-ꓣ ꓠꓬ ꓠ-ꓩꓴ-ꓕ-ꓡꓲ ꓕꓲ ꓪꓳꓼ ꓢꓴ ꓥ ꓟ ꓐ-ꓣ-ꓗꓷ ꓔꓬ ꓗꓪ ꓡ ꓞꓳ ꓝꓲ ꓩꓴ ꓗꓷ ꓢꓲ ꓘꓷ-ꓠ ꓡ ꓞꓳ ꓐꓴ ꓔꓯ ꓓꓶꓽ ꓢꓲ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓪ ꓔꓲ ꓙ-ꓐꓰ-ꓠ ꓡꓯ ꓒꓯꓹ ꓗꓪ ꓐꓰ ꓚꓬꓴꓸ ꓓꓳ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓐ-ꓣ-ꓗꓷ ꓠꓬ ꓔꓷ-ꓐꓳ-ꓣ ꓟꓽ ꓐ (ꓟꓽ ꓚꓬꓼ) ꓕꓯꓽ ꓠꓽ ꓬꓲ ꓠꓬ ꓟꓯꓼ ꓓꓶꓽ ꓡꓯ ꓘꓳ ꓖꓴ ꓗꓪ ꓙꓰ ꓠꓲꓹ ꓟꓽ ꓫꓵ= ꓖꓳ ꓕꓯ ꓔꓷ-ꓐꓳ-ꓣ ꓠꓬ ꓬꓲ ꓐꓰ ꓕꓲ ꓛꓳˍ ꓙꓰˍ ꓥꓳ ꓐꓯ ꓖꓶ ꓗꓷ ꓢꓲ ꓐ-ꓣ-ꓗꓷ ꓡꓰ ꓬꓲ ꓕꓲ ꓣꓳˍ ꓡꓰꓽ ꓙꓰ ꓟꓽ ꓑꓶꓸ ꓟ ꓑꓶꓸ ꓓꓴ ꓤ ꓟꓶ ꓤ ꓕꓲ ꓣꓳ ꓠꓬ ꓙ-ꓐꓰ-ꓠ ꓬꓲ ꓟꓯꓼ ꓢꓲꓽ ꓒ ꓔꓯ ꓢꓰꓼˍ ꓟ ꓗꓪ ꓟꓬꓱ ꓓꓳꓽ ꓟꓶˍ ꓥꓳ ꓐꓯ ꓖꓶˍ ꓡꓳ= (ꓐꓯ ꓟꓴ ꓫꓬꓹ ꓒ 4ꓽ4-7)=

ꓔꓷ-ꓐꓳ-ꓣ ꓟꓷꓽ ꓠꓷꓹ ꓝ ꓔ ꓟ ꓡꓰ ꓐꓰ ꓬꓲ-ꓢꓷ-ꓡꓰ ꓐꓴ ꓠꓬ ꓓꓶꓽ ꓡꓯ ꓘꓳˍ ꓟ ꓗꓪ ꓧꓪꓸ ꓡꓰ ꓕꓯ꓾ ꓢꓲ-ꓢꓲ-ꓡ ꓠꓬ ꓬꓲ ꓟꓯꓼ ꓐꓴ ꓔꓯ ꓚꓲ-ꓫꓳ-ꓠ ꓬꓲꓽ ꓟ ꓗꓪ ꓡꓳ ꓔ ꓬꓰ ꓢꓲ ꓔꓷꓹ ꓛꓰꓹ ꓙꓰ ꓗꓷꓳ (ꓐꓯ ꓟꓴ ꓫꓬꓹ ꓒ 4ꓽ16-17)= ꓪ ꓔꓲ ꓙ-ꓐꓰ-ꓠ ꓐꓰ ꓘꓷ-ꓠꓬꓲ ꓡ ꓞꓳ ꓫꓲ-ꓑꓷ ꓐꓴ ꓪꓽ ꓡꓯ ꓘꓳꓹ ꓟ ꓔꓯ ꓟꓯꓼ ꓢꓲꓽ ꓒ ꓢꓲ-ꓢꓲ-ꓡ ꓢꓷꓸˍ ꓠꓬꓲ ꓬꓲ ꓠꓬ ꓫꓲ-ꓑꓷ ꓤ ꓟꓶꓻ ꓙ-ꓡꓷ ꓟꓶ ꓔꓶꓸ ꓦꓲꓻ ꓗꓪ ꓛꓰꓹ ꓓꓵꓽ ꓡˍ ꓡꓳ= ꓫꓲ-ꓑꓷ ꓤ ꓟꓶꓻ ꓙ-ꓡꓷ ꓥ ꓟꓲ ꓬꓲ ꓔꓯ “ꓞꓳ ꓪꓴꓽꓳ꓾ ꓙꓳꓺ ꓟꓽ ꓛꓵ꓾ ꓓꓵꓽ ꓡꓯ꓾” ꓐꓯ ꓢꓲ ꓘꓳ ꓣꓴˍ ꓡꓳ (ꓐꓯ ꓟꓴ ꓫꓬꓹ ꓒ 4ꓽ18)=  ꓬꓲ ꓠꓬ ꓢꓲ-ꓢꓲ-ꓡ ꓔꓯ ꓬꓲ ꓟꓶ ꓔꓶꓸ ꓦꓲ ꓗꓪ ꓓꓵꓽ ꓙꓰ ꓝꓲ ꓢꓲ ꓬꓲꓹ ꓐꓵ ꓕꓲ ꓘꓳꓹ ꓡꓰ ꓑꓲꓸ ꓖꓶ ꓗꓷ ꓢꓲ ꓠꓬꓲ꓾ ꓓꓳ ꓓꓴ ꓮ ꓠꓬꓲꓽ ꓮ ꓚꓵꓹ ꓖꓶˍ ꓡꓳ (ꓐꓯ ꓟꓴ ꓫꓬꓹ ꓒ ꓽ18-19)=

ꓢꓲ-ꓢꓲ-ꓡ ꓠꓬ ꓮ ꓠꓬꓲꓽ ꓮ ꓚꓵꓹ ꓓꓳꓻ ꓗꓷ ꓢꓲ ꓪꓴꓽ ꓧꓶꓻ ꓠꓬꓲ ꓬꓲꓼ ꓟꓶ ꓡꓲꓽ ꓡꓰ ꓗ ꓠꓯꓸ ꓙ-ꓡꓷ ꓠꓬ ꓟꓶ ꓔꓶꓸ ꓦꓲ ꓞꓳꓹ ꓙꓴꓽ ꓐꓰ ꓓꓶꓽ ꓐꓰꓻ ꓕꓲꓽ ꓟ ꓣꓴ ꓢꓲ ꓢꓲ-ꓢꓲ-ꓡ ꓠꓸ ꓡꓵ ꓗꓪ ꓕꓯꓼ ꓗꓷ ꓠꓬ ꓟꓶ ꓔꓶꓸ ꓦꓲ ꓞꓳꓹ ꓙꓴꓽ ꓠꓬ ꓢꓲ-ꓢꓲ-ꓡ ꓠꓸ ꓡꓵ ꓗꓪ ꓙꓻ ꓙꓰ ꓗꓷꓳ= ꓖꓳ ꓟ ꓑꓶꓸ ꓓꓴ ꓢꓲ-ꓢꓲ-ꓡ ꓫꓵꓻꓳ (ꓐꓯ ꓟꓴ ꓫꓬꓹ ꓒ 4ꓽ21)=

ꓔꓷ-ꓐꓳ-ꓣ ꓟꓷꓽ ꓠꓷꓹ ꓝꓸ ꓘꓶꓽ ꓠꓬ ꓐꓲ ꓡꓺꓳ= ꓙ-ꓐꓰ-ꓠ ꓬꓲ ꓟꓯꓼ ꓢꓲꓽ ꓒ ꓔꓯ ꓢꓰꓼ ꓗꓷ ꓟ ꓟꓬꓱꓺ ꓓꓳꓽ ꓠꓬ ꓤ ꓟꓶ ꓤ ꓕꓲ ꓣꓳ ꓔꓬ ꓗꓪ ꓛꓲꓺ ꓬꓰꓳ= ꓤ ꓟꓶ ꓤ ꓖꓳ ꓟ ꓠꓬ ꓙ-ꓡꓷ ꓥ ꓡꓳ= ꓐ-ꓣ-ꓗꓷ ꓠꓬ ꓢꓲ-ꓢꓲ-ꓡ ꓔꓯ ꓙ-ꓡꓷ ꓟꓶ ꓔꓶꓸ ꓦꓲ ꓗꓪ ꓖꓼ ꓛꓲ ꓡ ꓕꓯ꓾ ꓙ-ꓡꓷ ꓡꓰ ꓬꓲ ꓔꓯ ꓞꓵ ꓬꓰ ꓢꓲ꓾ ꓟꓶ ꓔꓶꓸ ꓦꓲ ꓗꓪ ꓧꓳꓽ ꓓꓵꓽ ꓡ ꓕꓯ꓾ ꓢꓲ-ꓢꓲ-ꓡ ꓠꓽ ꓞꓳꓹ ꓙꓴꓽ ꓕꓯꓼ ꓞꓹ ꓢꓲ ꓫꓵꓻ ꓞ ꓟ ꓔꓯ ꓟꓳ ꓡꓰꓳ (ꓐꓯ ꓟꓴ ꓫꓬꓹ ꓒ 4ꓽ22)= ꓖꓳ ꓗ ꓠꓯꓸ ꓐ-ꓣ-ꓗꓷ ꓐꓰ ꓔꓷ-ꓐꓳ-ꓣ ꓐꓴ ꓠꓬ ꓟꓯꓼ ꓓꓶꓽ ꓡꓯ ꓘꓳˍ ꓟ ꓟꓴꓽ ꓖꓪ ꓖꓪ ꓢꓲ ꓟꓴꓽ ꓖꓪ ꓘꓴꓽ ꓗꓪ ꓙ-ꓡꓷ ꓟꓬꓱꓺ ꓖꓪ ꓧꓳꓽ ꓢꓲ ꓕꓱ ꓡꓱ ꓟꓬꓱꓺ ꓓꓳꓽ ꓖꓶˍ ꓡꓳ꓾

ꓘꓷ-ꓠꓬꓲ ꓢꓴ ꓫꓲ-ꓑꓷ ꓤ ꓟꓶꓻ ꓙ-ꓡꓷ ꓠꓬ꓾ ꓤ ꓟꓶ ꓤ ꓮ ꓙꓵꓽ ꓢꓶꓸ ꓟꓽ ꓞꓲ ꓶꓼ ꓙꓳˍ ꓡꓳ=

ꓟꓶ ꓔꓶꓸ ꓦꓲ ꓗꓪ ꓔꓬ ꓢꓴ ꓮ ꓙꓵꓽ ꓟꓬ ꓟꓽ ꓞꓲ ꓫꓱꓹ ꓙꓳˍ ꓡꓳ=

ꓢꓲ-ꓢꓲ-ꓡ ꓡꓰ ꓬꓲ ꓔꓯ ꓬꓲꓻ ꓙꓬ ꓓꓰꓽˍ ꓕꓯ꓾ ꓬꓲ ꓡꓰ ꓮꓽ ꓚꓵꓹ ꓖꓶ ꓓꓳˍ ꓡꓳ=

ꓞꓳ ꓪꓴꓽ ꓐꓴ ꓔꓯ ꓖꓶ ꓓꓳ ꓓꓴ ꓗꓶꓸ ꓙꓴꓹ ꓗꓪ ꓮꓽ ꓚꓵꓹ ꓚꓱ ꓖꓶ ꓓꓳˍ ꓡꓳ=

ꓬꓲ ꓡꓯꓼ ꓶꓸ ꓡꓰ ꓞꓳꓹ ꓙꓴꓽ  ꓣꓴ ꓢꓲ꓾ ꓬꓲ ꓡꓯꓼ ꓙ ꓡꓰ ꓓꓶꓽ ꓐꓰ ꓣꓴ ꓢꓲ꓾ ꓢꓲ-ꓢꓲ-ꓡ ꓠꓸ ꓡꓵ ꓗꓪ ꓕꓯꓼ ꓓꓵꓽ ꓡꓰ ꓝꓲꓳ=

ꓬꓲ ꓪꓴꓸ ꓓꓵ ꓗꓪ ꓕꓯꓼ ꓙꓻ ꓡꓰ ꓝꓲꓳ=

ꓢꓲ-ꓢꓲ-ꓡ ꓠꓬ ꓬꓲ ꓟꓲ ꓕꓯꓽ ꓗꓪ ꓓꓳꓽ ꓡꓰꓳ=

ꓙ-ꓡꓷ ꓒꓬꓱꓽ ꓕꓯꓽ ꓗꓪ ꓫꓵꓻ ꓘꓷꓽ ꓡꓰꓳ=

(ꓐꓯ ꓟꓴ ꓫꓬꓹ ꓒ 5ꓽ24-27)