ꓜꓲ-ꓬꓴ ꓡꓳ ꓒꓱ ꓚꓱꓹ

ꓜꓲ-ꓬꓴ ꓡꓳ ꓒꓱ ꓠꓬ ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶ ꓗꓪ ꓙꓱ-ꓣꓴ-ꓢ-ꓡꓱ ꓐꓰ ꓬꓲ-ꓢꓷ-ꓡꓲ ꓕꓲꓽ ꓟꓵꓽ ꓡꓱꓸꓼ ꓔꓯ ꓐꓯ ꓔ ꓟ ꓥ ꓡꓳ=

ꓜꓲ-ꓬꓴ ꓐꓯ ꓔ ꓟ ꓟꓬꓱꓺ ꓔꓯ ꓐꓚꓰ 600ꓘꓳꓼ ꓖꓼ ꓡꓯꓽ ꓖꓼ ꓙꓲ ꓦꓬꓼ ꓠꓬꓲ ꓗꓪ꓾ ꓟꓽ ꓥ ꓠꓬ꓾ ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶꓽ ꓥ ꓟ 2 ꓢ-ꓟꓴ-ꓬꓰ ꓕꓳꓽ ꓶꓽ (5ꓽ7) ꓗꓪ ꓜꓲ-ꓬꓴ ꓟꓬꓱꓺ ꓔꓯ ꓟꓳ ꓪ ꓓꓹ ꓡꓳ= ꓧꓶꓸ ꓕꓯ ꓠꓬ Mount Moriah ꓐꓰ ꓐꓯˍ ꓟ ꓟꓳ-ꓡꓲ-ꓬ ꓪꓽ ꓚꓲ ꓕꓯ ꓢꓲ ꓗꓪ ꓓꓹ ꓟ ꓙꓱ-ꓣꓴ-ꓢ-ꓡꓱ ꓗꓪ ꓟ ꓜꓲ-ꓬꓴ ꓪ ꓚꓲ ꓔꓯ ꓐꓯˍ ꓟ ꓥ ꓡꓳ= 2 ꓢ-ꓟꓴ-ꓬꓰ ꓕꓳꓽ ꓶ 5 ꓕꓱꓻ ꓗꓪ ꓡꓳꓸ ꓠꓬꓲ ꓗꓷ ꓠꓬ꓾ ꓜꓲ-ꓬꓴ ꓪ ꓚꓲ ꓠꓬ ꓓ-ꓪꓵ ꓡꓰ ꓙꓱ-ꓐꓴ-ꓢꓶ ꓧꓪꓸ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ꓾ ꓖꓳ ꓟ ꓔꓯ ꓓ-ꓪꓵ ꓡꓳ ꓒꓱ ꓐꓰ ꓟꓬꓱꓺ ꓖꓶꓽ ꓗꓷ ꓟ ꓥ ꓡꓳ=

ꓪ ꓚꓲ ꓖꓳ ꓟ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓫꓬꓹ ꓜꓶ ꓔ ꓟ ꓪꓽ ꓚꓲ ꓘꓴꓽ ꓗꓪ ꓟ ꓕꓲ ꓟ ꓥ ꓡꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓫꓬꓹ ꓜꓶ ꓔ ꓟ ꓪ ꓚꓲ ꓘꓴꓽ ꓗꓪ ꓟꓳ-ꓡꓲ-ꓬ ꓪ ꓚꓲ꓾ ꓮ-ꓛꓬ ꓪ ꓚꓲ ꓐꓴ ꓟꓲ ꓐˍ ꓡꓳ= ꓬꓲꓸ ꓘꓳꓼ ꓬꓲꓸ ꓦꓬꓻ ꓘꓳꓼ ꓟꓽ ꓛꓲꓺ ꓾ Ottoman ꓦꓬꓼ ꓠꓬꓲ ꓗꓪ ꓛꓲ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓫꓵꓼ ꓔꓯ ꓮ ꓟꓬꓹ ꓖꓺ ꓗꓪ ꓮ ꓟꓬꓹ ꓧꓪꓹ ꓫꓬꓹ ꓗꓷꓳ= ꓖꓳ ꓟ ꓪꓴꓸ ꓠꓬꓲ ꓜꓲ-ꓬꓴ ꓪ ꓚꓲ ꓐꓰ ꓘꓴˍ ꓟ ꓪ ꓚꓲ ꓠꓬ ꓡꓳ ꓒꓱ ꓚꓬꓹ ꓘꓴꓽ ꓗꓪ ꓟꓽ ꓓꓹ ꓳ ꓐꓯꓸ ꓥˍ ꓟꓲ ꓾ ꓠꓬꓲꓸ ꓠꓬꓲ ꓗꓪ ꓜꓲ-ꓬꓴ ꓪ ꓚꓲ ꓠꓬ ꓡꓳ ꓒꓱ ꓬꓲꓸ ꓐꓽ ꓢꓲ ꓗꓪ꓾ ꓠꓱ ꓫꓱꓸ ꓟꓸꓼ ꓗꓪ ꓓˍ ꓡꓳ=

ꓜꓲ-ꓬꓴ ꓠꓬ ꓪꓺ ꓔꓲ ꓓ-ꓪꓵ ꓬꓲ ꓧꓪꓸ ꓒꓱ ꓓꓹ ꓟ ꓙꓱ-ꓣꓴ-ꓢ-ꓡꓱ ꓔꓯ ꓐꓯ ꓔ ꓟ ꓥ ꓡꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓕꓲ ꓟ ꓡꓱꓸꓼ ꓔꓯˍ ꓟꓲ ꓖꓴ ꓔ ꓟ ꓥ ꓡꓳ= Temple of Mount ꓐꓰ ꓟꓬꓱꓺ ꓩꓴ ꓡˍ ꓟ ꓟꓳ-ꓡꓲ-ꓬ ꓪ ꓚꓲꓺ ꓕꓯꓽ ꓢꓲ ꓗꓪ꓾ ꓢꓳ-ꓡꓳ-ꓟꓳ ꓪ ꓔꓲ ꓡꓰ ꓢꓲ ꓫꓬ ꓦꓲ(ꓟꓶ ꓔꓶꓸ ꓦꓲ) ꓔꓯ ꓫꓬꓹ ꓗꓷ ꓢꓲ꓾ ꓗ ꓠꓯꓸ ꓠꓬ ꓜꓲ-ꓬꓴ ꓐꓯˍ ꓟ ꓠꓬ ꓢꓲ ꓫꓬ ꓦꓲ ꓪ ꓚꓲꓺ ꓐꓰ ꓢꓲ ꓫꓬ ꓦꓲ ꓙꓳ ꓖꓴ ꓪ ꓚꓲ ꓐꓰ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓰ ꓾ ꓢꓲꓽ ꓫꓬ ꓕꓳꓽ ꓶ ꓐꓰ ꓙ ꓡꓯꓽ ꓘꓳ ꓔ ꓟ ꓟꓵꓽ ꓕꓲ ꓟ ꓡꓱꓸꓼ ꓔꓯ ꓜꓲ-ꓬꓴ ꓐꓰ ꓘꓴˍ ꓟ ꓥ ꓡꓳ= ꓬꓴ-ꓔ ꓐꓴ ꓠꓬ ꓜꓲ-ꓬꓴ ꓔꓯ ꓟꓲꓽ ꓕꓯ ꓢꓲ ꓗꓪ ꓓꓳꓻ ꓡˍ ꓟ ꓗꓴꓷꓼ ꓾ ꓥ ꓠꓬ꓾ ꓡ ꓠꓹ ꓟ ꓕꓲ ꓤꓶꓻ (ꓝꓮꓲꓸ ꓕꓲ ꓤꓶꓻ) ꓐꓰ ꓘꓳꓹ ꓣꓴ ꓔ ꓟ ꓥ ꓡꓳ=

ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶꓽ

ꓚꓺ ꓟꓲꓽ ꓕꓳꓽ ꓶ ꓐꓴ ꓥ ꓟ ( 1 ꓪ ꓔꓲ ꓾ 2 ꓪ ꓔꓲ ꓾ 1 ꓢ-ꓟꓴ-ꓬꓰ ꓾ 2 ꓢ-ꓟꓴ-ꓬꓰ ꓾ 1 ꓚꓺ ꓟꓲꓽ ꓾ 2 ꓚꓺ ꓟꓲꓽ ) ꓕꓳꓽ ꓶ ꓗꓪ ꓡꓰꓽ ꓟꓽ ꓛꓲꓺ ꓾ ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶ ꓗꓪ ꓜꓲ-ꓬꓴ ꓟꓬꓱꓺ ꓔꓯ 152 ꓧꓪꓹ ꓛꓲꓺ ꓐꓳ ꓔ ꓟ ꓙꓳˍ ꓡꓳ= ꓜꓲ-ꓬꓴ ꓟꓬꓱꓺ ꓔꓯ ꓟꓷ ꓠꓷꓹ ꓝ ꓔ ꓟ ꓕꓳꓽ ꓶꓽ ꓐꓴ꓾ ꓟꓴ ꓖꓪ ꓕꓳꓽ ꓶꓽ ꓐꓰ ꓮ ꓛꓬꓺ ꓙꓱ ꓕꓳꓽ ꓶꓽ ꓗꓪ ꓮ ꓟꓬꓹ ꓧꓪꓹ ꓐꓳ ꓔ ꓡꓳ= ꓢꓳ-ꓡꓳ-ꓟꓳ ꓟꓴ ꓖꓪ ꓕꓳꓽ ꓶꓽ (3ꓽ11) ꓗꓪ ꓠꓬ “ꓜꓲ-ꓬꓴ ꓗꓪ ꓟ ꓮ ꓟꓲꓽ ꓐꓴꓳ꓾” ꓐꓯ ꓢꓲ ꓕꓲꓽ ꓧꓪꓹ ꓡꓰꓽ ꓟꓳꓸ ꓖꓶꓽ ꓔ ꓡꓳ=

152 ꓧꓪꓹ ꓟꓳꓸ ꓖꓶꓽ ꓔ ꓟ ꓘꓴꓽ ꓗꓪ 26 ꓧꓪꓹ ꓛꓲꓺ ꓠꓬ꓾ “ꓜꓲ-ꓬꓴ ꓮ ꓟꓲꓽ” ꓔꓯ ꓐꓯ ꓔ ꓡꓳ= ꓕꓱ ꓟ ꓠꓬ ꓙꓱ-ꓣꓱ-ꓢ-ꓡꓱ ꓡꓳ ꓒꓱ ꓾ ꓥ ꓠꓬ꓾ ꓡꓳ ꓒꓱ ꓗꓪ ꓟ ꓡ ꓞꓳ ꓐꓴ ꓔꓯ ꓐꓯ ꓔ ꓟ ꓥ ꓡꓳ=

ꓟꓴ-ꓖꓪ ꓕꓳꓽ ꓶ 137 ꓗꓪ꓾ ꓐ-ꓐꓲ-ꓡꓶꓽ ꓗꓪ ꓡꓳꓽ ꓔꓯꓹ ꓙꓰˍ ꓟ ꓟꓶ ꓢꓴ ꓐꓴ ꓡꓰ ꓜꓲ-ꓬꓴ (ꓙꓱ-ꓣꓴ-ꓢ-ꓡꓱ)  ꓔꓯ ꓓꓵꓽ ꓙ ꓟꓶˍ ꓟ ꓔꓯ ꓐꓯ ꓔ ꓡꓳ= “ ꓐ-ꓐꓲ-ꓡꓶ ꓠꓯ ꓬꓲꓻ ꓘꓶꓽ ꓗꓪ ꓥꓪ ꓠꓴꓽ ꓠꓬꓲꓸ ꓠꓸ ꓢꓲ꓾ ꓜꓲ-ꓬꓴ ꓔꓯ ꓓꓵꓽ ꓙ ꓛꓲ ꓡꓕꓯ ꓥꓴꓻ ꓗꓷꓳ= ꓥꓪ ꓠꓴꓽ ꓛꓲ ꓐꓶ ꓠꓬ ꓖꓳ ꓗꓪ ꓟ ꓬꓲꓻ ꓶ ꓜꓲ ꓗꓪ ꓥꓳꓺ ꓗꓷꓳ= ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓔꓯ ꓡꓳꓽ ꓔꓯꓹ ꓙꓰ ꓢꓴ ꓡꓰ ꓟꓽ ꓓ ꓟꓽ ꓞꓽ ꓥꓪ ꓠꓴꓽ ꓔꓯ ꓟꓴꓽ ꓖꓪꓽ ꓖꓪ ꓝꓲˍ ꓡꓳ= ꓒꓬꓹ ꓜꓽ ꓢꓴ ꓡꓰ ꓥꓪ ꓠꓴꓽ ꓔꓯ ꓟꓽ ꓓ ꓟꓽ ꓞ꓾ ꓜꓲ-ꓬꓴ ꓟꓴꓽ ꓖꓪ ꓕꓲ ꓚꓱꓹ ꓖꓪ ꓖꓶ ꓡꓯ꓾ ꓐꓯˍ ꓡꓳ=” ꓝꓮꓲ 8 ꓝꓲ ꓗꓪ꓾ “ꓐ-ꓐꓲ-ꓡꓶ ꓢꓴꓳ” ꓐꓰ ꓐꓯ ꓔ ꓟ ꓠꓬ ꓐ-ꓐꓲ-ꓡꓶ ꓐꓰ ꓖꓳ ꓗꓪ ꓟ ꓡ ꓞꓳ ꓐꓴ ꓔꓯ ꓐꓯ ꓔ ꓟ ꓥꓳ= “ꓥꓪ ꓠꓴꓽ ꓔꓯ ꓒꓬꓹ ꓢꓴ ꓐ-ꓐꓲ-ꓡꓶ ꓢꓴꓳ꓾ ꓥꓪ ꓠꓴꓽ ꓔꓯ ꓬꓰ ꓗꓷ ꓟˍ ꓡꓰ ꓐꓰ ꓠꓴ ꓔꓯ ꓬꓰ ꓚꓱꓹ ꓖꓶ ꓢꓴ ꓠꓬ ꓶꓼ ꓙꓳ ꓫꓱꓹ ꓙꓳˍ ꓥꓳ”꓾ ꓐꓰ ꓐꓯ ꓔ ꓡꓳ=

ꓟꓴꓽ ꓖꓪ ꓕꓳꓽ ꓶ 147 ꓗꓪ ꓣꓱꓽ ꓔ ꓟ “ꓙꓱ-ꓣꓴ-ꓢ-ꓡꓱ” ꓐꓰ “ꓜꓲ-ꓬꓴ” ꓠꓬ ꓦ ꓡꓱ ꓐꓳ ꓢꓴ ꓐꓴ ꓔꓯ ꓐꓯ ꓔ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= “ꓪꓴ-ꓢ ꓠꓬ ꓙꓱ-ꓣꓴ-ꓢ-ꓡꓱ ꓔꓯ ꓫꓬꓹ ꓜꓶ ꓔꓬ ꓢꓲ꓾ ꓖꓼ ꓒꓬꓱ ꓗꓷ ꓟ ꓬꓲ-ꓢꓷ-ꓡꓲ ꓐꓴ ꓔꓯ ꓘꓴ ꓜꓲꓼ ꓔꓬ ꓡꓳ=ꓙꓱ-ꓣꓴ-ꓢ-ꓡꓱꓳ꓾ ꓬꓰ-ꓧꓳ-ꓧꓪ ꓔꓯ ꓫꓱꓸ ꓖꓶ= ꓜꓲ-ꓬꓴꓳ ꓾ ꓠꓴ ꓪꓴ-ꓢ ꓔꓯ ꓓꓳꓹ ꓟꓴ” (ꓟꓴꓽ ꓖꓪ 147ꓽ2ꓹ12)

ꓬꓴ-ꓔ ꓢꓳꓺ

ꓢꓲ-ꓫꓬ-ꓦꓲ ꓓꓹ ꓟ ꓐꓰ꓾ ꓟꓬꓽ ꓠꓬꓲ ꓢꓲꓽ ꓫꓬ ꓖꓴ ꓠꓬ ꓬꓴ-ꓔ ꓞꓳ ꓫꓵꓽ ꓐꓴ ꓐꓱ ꓶ ꓟꓲ ꓠꓯ ꓕꓯꓽ ꓢꓲ ꓗꓪ ꓟꓽ ꓓ ꓢꓲꓽ ꓫꓬ ꓓꓰꓺ ꓡꓰˍ ꓟ ꓕꓲ ꓖꓻ ꓥ ꓢꓲ꓾ ꓪꓴ-ꓢ ꓐꓰ ꓞꓳ ꓤ ꓠꓬꓲꓽ ꓗꓴꓸ ꓚꓸꓼ ꓗꓪ ꓙ ꓡꓯꓽ ꓘꓳ ꓖꓴ ꓥ ꓡꓳ= ꓢꓲ ꓫꓬ ꓦꓲ ꓔꓯ ꓝꓮꓲ ꓫꓬꓹ ꓜꓶ ꓠꓹ ꓟ꓾ ꓟꓲ ꓠꓯ ꓔꓯ ꓚꓬꓴꓸ ꓙ ꓠꓹ ꓟ ꓐꓰ ꓟꓲ-ꓢ-ꓬ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓓꓴ ꓗꓪ ꓐꓰ ꓬꓴ-ꓔ ꓞꓳ ꓫꓵꓽ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓟ ꓢꓲ ꓫꓬ ꓦꓲ ꓪ ꓚꓲꓺ  ꓔꓯꓸ ꓟꓳꓸ ꓒꓳꓹ ꓔ ꓢꓲ ꓕꓲꓽ ꓠꓬꓲ 3 ꓧꓪꓹ ꓪꓽ ꓘꓴˍ ꓡꓳ=

ꓝꓮꓲ ꓜꓲ-ꓬꓴ ꓔꓯ ꓪꓴ-ꓢ ꓬꓲꓸ ꓙꓱ-ꓣꓴ-ꓢ-ꓡꓱ ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓫꓵꓼ ꓾ ꓢꓲꓽ ꓫꓬ ꓖꓴ ꓾ ꓝꓮꓲ ꓠꓬ ꓟ-ꓡꓲ ꓔꓯ ꓜꓲ-ꓬꓴ ꓮ ꓟꓲꓽ ꓾ꓟꓴꓽ ꓗꓪ ꓗꓴꓷꓼ꓾ (ꓣꓳ-ꓟ=9ꓽ33 ꓾ 1 ꓒꓲ-ꓕꓱ=2ꓽ6) ꓗꓪ ꓐꓯ ꓔ ꓟ ꓜꓲ-ꓬꓴ ꓗꓪ ꓟ ꓭꓸ ꓛꓲ ꓠꓬ ꓬꓰ-ꓢꓴ ꓔꓯ ꓐꓯ ꓔ ꓟ ꓥ ꓡꓳ=

ꓜꓲ-ꓬꓴ ꓠꓬ ꓧꓶꓸ ꓕꓯ ꓕꓯ ꓠꓬ ꓢꓲꓽ ꓫꓬ ꓖꓴ ꓔꓯ ꓟꓬꓱ ꓖꓶꓽ ꓗꓷˍ ꓥˍ ꓟꓲ ꓮ ꓟꓶ ꓠꓬ ꓪꓴ-ꓢ ꓔꓯ ꓙꓵꓻ ꓢꓲ ꓠ ꓡꓳꓸ ꓢꓲ ꓠꓬꓲ꓾ ꓢꓲꓺ ꓡꓲꓺ ꓐꓰ ꓔꓬꓹ ꓢꓴ ꓐꓴ ꓠꓲꓹ ꓟ ꓔꓯ ꓜꓲ-ꓬꓴ ꓐꓰ ꓐꓯˍ ꓟ ꓥ ꓡꓳ=

Add new comment

3 + 12 =