ꓜꓳꓽ ꓓꓲ ꓡꓰˍ ꓟ ꓟꓽ ꓙꓳˍ ꓟ ꓡꓯꓽ ꓒꓯꓹ ꓝꓸ ꓟ (Q & A)

ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓐꓯ ꓘꓶꓽ ꓛꓹ ꓔ ꓕꓯꓽ ꓘꓶꓽ ꓫꓵꓽ ꓛꓹ ꓔ ꓕꓯꓽ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓚꓵ ꓚꓵ ꓓꓳ ꓡꓹ ꓟ ꓓꓵꓽ ꓞꓲꓹ ꓔ ꓟ ꓬꓳꓸ ꓚꓵˍ ꓡꓳ= ꓟꓮꓣꓣꓲꓮꓖꓰ ꓚꓳꓠꓢꓰꓠꓔ ꓐꓯꓹ ꓟ ꓡꓯꓽ ꓒꓯꓹ ꓝꓸ ꓔ ꓕꓯꓽ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓽ ꓛꓹ ꓔ ꓟ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓠꓬ ꓛꓹ ꓐ ꓡ ꓢꓴ ꓠꓬꓲꓽ ꓣꓳ ꓒꓬꓱꓹ ꓠꓬꓲ ꓔ ꓥ= ꓛꓹ ꓐ ꓡ ꓢꓴ ꓐꓯꓹ ꓟ ꓠꓬ ꓢꓳ ꓡꓰ ꓡꓯꓽ ꓒꓯꓹ ꓝꓸ ꓐꓯ ꓢꓲ ꓝꓸ ꓔ ꓟ ꓟꓽ ꓥ꓾ ꓢꓳ ꓡꓰ ꓘꓶꓽ ꓫꓵꓽ ꓛꓹ ꓐꓯ ꓢꓲ ꓛꓹ ꓔ ꓢꓴ ꓟ ꓥ ꓚꓵ ꓚꓵ ꓐꓰ ꓛꓹ ꓐ ꓡꓹ ꓢꓴ ꓔꓯ ꓐꓯ ꓠꓲꓹ ꓫꓵˍ ꓟ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓞꓳ ꓤꓽ ꓕꓲꓽ ꓣꓳ ꓣꓳ ꓡꓰ꓾ ꓠꓱꓸ ꓐꓯꓼ ꓞꓳ ꓤꓽ ꓡꓰ ꓟꓽ ꓝꓸ ꓟꓽ ꓓ ꓕꓱ ꓡꓲꓳ ꓫꓵꓽ ꓐꓯ ꓡꓺꓳ ꓫꓵꓽ ꓟꓽ ꓥ ꓥ ꓚꓴ ꓚꓵ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓓꓵꓽ ꓙꓽ ꓗꓴꓸ ꓢꓲ ꓛꓹ ꓐ ꓡˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ ( ꓚꓮꓠ-1057$ 1) = ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓼ ꓛꓹ ꓔ ꓟ ꓕꓱ ꓟ ꓠꓬ ꓚꓵꓸ ꓛꓬꓽ ꓠꓲꓹ ꓟ ꓗꓪ ꓚꓳꓸ ꓓꓳ ꓡꓹ ꓟ ꓥ ꓢꓲ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓠꓬꓲ ꓫꓴꓸ ꓠꓬ ꓕꓲꓽ ꓞꓲꓼ ꓟꓽ ꓧꓹ ꓡꓯꓽ ꓘꓳ ꓘꓳ ꓔꓬ ꓠꓹ ꓟ ꓐꓱ ꓶ ꓕꓲꓽ ꓦꓲꓺ ꓡꓽ ꓞꓳ ꓔꓶ ꓠꓹ ꓟ ꓐꓱ ꓶ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓐꓯ ꓘꓶꓽ ꓖꓶ ꓐ ꓡꓹ ꓟ ꓛꓹ ꓐ ꓡꓹ ꓟ ꓘꓳꓹ ꓣꓴ ꓐ ꓡꓹ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ (ꓚꓮꓠ- 1057$ 2)=

ꓕꓱ ꓡꓰ ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓐꓯ ꓘꓶꓽ ꓛꓹ ꓐ ꓡꓹ ꓟ ꓠꓯꓸꓼ ꓗꓪ ꓟꓽ ꓜꓳ ꓡꓰꓹ ꓟ ꓟ ꓜꓰ ꓡꓰꓹ ꓟ ꓠꓬ ꓮ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓡ ꓐꓯ ꓠꓬ 1ꓸ ꓕꓲꓽ ꓦꓲꓺ ꓡꓽ ꓞꓳ ꓔꓶˍ ꓟ ꓔꓯ ꓚꓵ ꓚꓵ ꓒ ꓐꓲ ꓓꓵꓽ ꓙꓽ ꓗꓴ ꓟ ꓟꓽ ꓙꓳ ꓢꓴ ꓠꓬ ꓕꓱ ꓟ ꓠꓯꓸꓼ ꓗꓪ ꓟꓽ ꓜꓰꓼ ꓡꓰꓹ ꓟ ꓥ ꓪ= 2ꓸ ꓡꓯꓽ ꓒꓯꓹ ꓝꓸ ꓓꓳ ꓡꓰ ꓠꓬ ꓕꓲꓽ ꓦꓲꓺ ꓡꓽ ꓞꓳ ꓗꓷ ꓡꓰ ꓕꓯꓽ ꓠꓬ ꓕꓲꓽ ꓦꓲꓺ ꓡꓽ ꓞꓳ ꓠꓯꓸꓼ ꓗꓪ ꓪ ꓙꓵꓽ ꓪ ꓐꓰ ꓕꓲꓽ ꓦꓲꓺ ꓡꓽ ꓞꓳ ꓔꓯ ꓟꓯ ꓠꓹ ꓟ ꓶ ꓙꓵꓽ ꓠꓹ ꓟ ꓶ ꓕꓱ ꓟ ꓔꓯ ꓒ ꓐꓲ ꓒ ꓜꓲꓼ ꓟꓽ ꓢꓷꓸ ꓔ ꓟ ꓡꓰ ꓟꓽ ꓞꓲ꓾ ꓕꓲꓽ ꓦꓲꓺ ꓡꓽ ꓞꓳ ꓔꓯ ꓐꓬ ꓡꓰ ꓠ ꓗꓪ ꓛꓲ ꓓꓵꓽ ꓙꓽ ꓟꓽ ꓗꓴ ꓔ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= 3ꓸ ꓠꓲꓹ ꓟ ꓟꓽ ꓢꓲ ꓟꓽ ꓢꓲ ꓔ ꓟ꓾ ꓥˍ ꓠꓬ ꓞꓳ ꓟꓶ꓾ ꓥˍ ꓠꓬ ꓪꓴꓸ ꓠꓶꓸ ꓟꓽ ꓐꓲꓹ ꓟ꓾ ꓠꓲꓹ ꓟ ꓒ ꓐꓲ ꓙꓽ ꓜꓲꓼ ꓟꓽ ꓐ ꓡꓹ ꓟ ꓕꓱ ꓡꓰ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ (ꓚꓮꓠ- 1056)= ꓕꓱ ꓕꓲꓽ ꓘꓴꓸ ꓗꓪ ꓣꓳꓽ ꓛꓳꓽ ꓠꓬꓲ ꓠꓬ ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓐꓯ ꓘꓶꓽ ꓛꓹ ꓐ ꓡꓹ ꓟ ꓘꓶꓽ ꓫꓵꓼ ꓛꓹ ꓐ ꓡꓹ ꓟ ꓐꓯꓹ ꓟ ꓠꓯꓸꓼ ꓗꓪ ꓟꓽ ꓜꓯꓼ ꓡꓰꓹ ꓟ ꓕꓲꓽ ꓫꓵꓽ ꓠꓬ ꓲꓠꓢꓮꓠꓲꓔꓬ ꓐꓯꓹ ꓟ ꓞꓳ ꓤꓽ ꓕꓲꓽ ꓣꓳ ꓮ ꓙꓲ ꓐꓲ ꓓꓵꓽ ꓙꓽ ꓟꓽ ꓐ ꓡꓹ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯꓹ ꓟ ꓥ ꓪ= ꓮ ꓙꓲ ꓐꓲ ꓓꓵꓽ ꓙꓽ ꓟꓽ ꓐ ꓡꓹ ꓟ ꓮꓽ ꓔꓳ ꓦ ꓓꓲ ꓗꓼ ꓕꓱ ꓡꓰ ꓓꓵꓽ ꓙꓹ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥˍ ꓡꓳ= ꓞꓳ ꓤꓽ ꓕꓲꓽ ꓣꓳ ꓠꓱꓹ ꓐꓯ ꓠꓬ ꓠꓱ ꓓꓲ ꓖꓼ ꓥꓳ꓾ ꓡꓯꓽ ꓒꓯꓹ ꓝꓸ ꓡꓯ ꓝꓸ ꓓꓲꓽ ꓖꓽ ꓥꓳ꓾ ꓧꓹ ꓡꓯꓽ ꓘꓳ ꓡꓯ꓾ ꓧꓹ ꓓꓲ ꓖꓼ ꓥꓳ ꓐꓰ ꓕꓱ ꓡꓰ ꓞꓳ ꓤꓽ ꓕꓲꓽ ꓣꓳ ꓓꓵꓽ ꓙꓽ ꓗꓴ ꓔ ꓟ ꓡꓰ ꓐꓰ ꓟꓽ ꓥ꓾ ꓬꓲ ꓠꓬ ꓮꓸ ꓫꓵꓽ ꓔꓯ ꓥˍ ꓟꓲ ꓮꓽ ꓙꓲ ꓐꓲ ꓓꓵꓽ ꓙꓽ ꓟꓽ ꓗꓴꓸ ꓔ ꓟ꓾ ꓦꓺ ꓦꓺ ꓟꓴꓺ ꓟꓴꓺ ꓓꓵꓽ ꓙꓹ ꓟ꓾ ꓞꓲꓼ ꓡꓰ ꓟꓶ ꓡꓲ ꓓꓵꓽ ꓙꓽ ꓟꓽ ꓐ ꓡꓹ ꓟ꓾ ꓠꓲꓹ ꓟ ꓔꓲꓹ ꓔꓲꓹ ꓓꓵꓽ ꓙꓽ ꓟꓽ ꓗꓴ ꓔ ꓟ꓾ ꓜꓲ ꓜꓲ ꓟꓴ ꓟꓴ ꓓꓵꓽ ꓙꓽ ꓟꓽ ꓗꓴ ꓔ ꓟ ꓔꓯ ꓐꓯꓳ ꓫꓵꓽ ꓥ ꓪ= ꓢꓰꓠꓢꓰꓡꓰꓢꓢ ꓐꓯꓳ ꓫꓵꓽ ꓥ ꓪ= ꓠꓲꓹ ꓟ ꓠꓯꓸꓼ ꓗꓪ ꓮꓸ ꓫꓵꓽ ꓡꓰ ꓟꓽ ꓙꓳ ꓕꓱ ꓡꓰ ꓔ ꓢꓴ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓲꓽ ꓐꓱ ꓠꓬ ꓧꓹ ꓡꓯꓽ ꓘꓳ ꓥˍ ꓟꓲ ꓮꓽ ꓘꓶꓸ ꓢ꓾ ꓡꓯꓽ ꓒꓯꓹ ꓝꓸ ꓠꓹ ꓟ ꓥˍ ꓟꓲ ꓮꓽ ꓘꓶꓸ ꓢ꓾ ꓠꓬꓲꓸ ꓠꓬꓲ ꓧꓹ ꓡꓯꓽ ꓘꓳ ꓗꓸ ꓠꓯꓸ ꓕꓲꓽ ꓦꓬꓼ ꓠꓬ ꓦꓲꓺ ꓢꓲ ꓒꓽ ꓪ ꓡꓰꓳ= ꓕꓱ ꓡꓰ ꓢ ꓢꓹ ꓔ ꓢꓴ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ=

2ꓸ ꓲꓖꓠꓳꓣꓮꓠꓚꓰ ꓢꓷꓸ ꓠꓬꓲ ꓔ ꓟ ꓔꓯ ꓮ ꓙꓲ ꓐꓲ ꓟꓽ ꓢꓷꓸ ꓔ ꓟ ꓔꓯ ꓐꓯꓹ ꓠꓲꓹ ꓫꓵˍ ꓟ ꓥ ꓪ= ꓔꓯ ꓥꓳꓽ ꓐꓯ ꓥꓳ ꓐꓯꓹ ꓠꓬ ꓦꓲꓺ ꓢꓲꓺ ꓒꓽ ꓦꓲꓺ ꓢꓲꓺ ꓟ ꓗꓷ ꓡ ꓕꓯ ꓠꓬ ꓮ ꓡꓰ ꓢꓲ ꓔꓬ ꓠꓬꓲ ꓔ ꓡ  ꓐꓯꓹ ꓟ ꓔꓯ ꓟꓽ ꓢꓷꓸ ꓔ ꓟ꓾ ꓦꓲꓺ ꓢꓲꓺ ꓒꓽ ꓦꓲꓺ ꓢꓲꓺ ꓟ ꓠꓬ ꓗꓷ ꓡꓰ ꓠꓬ ꓕꓲꓽ ꓓꓶꓽˍ ꓬꓲꓼ ꓔ ꓠꓬꓲ ꓔ ꓟ ꓔꓯ ꓥ ꓖꓳ ꓕꓯꓽ ꓢꓲ ꓤꓼ ꓠꓱ ꓪ ꓡ ꓓꓴ ꓥꓳ ꓐꓯꓹ ꓟ ꓔꓯ ꓟꓽ ꓢꓷꓸ ꓔ ꓟ꓾ ꓦꓲꓺ ꓢꓲꓺ ꓒꓽ ꓦꓲꓺ ꓢꓲꓺ ꓟ ꓗꓷ ꓡ ꓕꓯ ꓠꓬ ꓤꓼ ꓠꓱ ꓐꓴ ꓔꓯ ꓧꓪ ꓚꓸ ꓠꓬꓲ ꓔ ꓟ ꓡꓳꓸ  ꓠꓬꓲ ꓔ ꓗꓽ ꓕꓯꓸ ꓙ ꓖꓴꓽ ꓠꓬꓲ ꓔ ꓜꓽ ꓪꓳꓽ ꓡꓳ ꓪꓳꓽ ꓧꓪ ꓚꓸ ꓠꓬꓲ ꓔ ꓐꓯꓹ ꓟ ꓟꓽ ꓢꓷꓸ ꓔ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓲꓽ ꓐꓱ ꓠꓬ ꓡꓯꓽ ꓒꓯꓹ ꓝꓸ ꓔ ꓟ ꓠꓬ ꓮ ꓟꓬ ꓗꓪ ꓛꓲ ꓬꓳꓸ ꓚꓵꓹ ꓟ ꓔꓯ ꓟꓽ ꓢꓷꓸ ꓡꓯꓽ ꓒꓯꓹ ꓝꓸ ꓔ ꓟ ꓠꓬ ꓤꓼ ꓠꓱ ꓪ ꓡ ꓠꓹ ꓟ ꓐꓱ ꓶ ꓪ ꓡꓹ ꓟ ꓤꓼ ꓠꓱ ꓔꓯ ꓢꓷꓸ ꓠꓲꓹ ꓟꓸ ꓖꓶ ꓠꓹ ꓟ ꓐꓱ ꓶ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓠꓬ ꓕꓲꓽ ꓞꓲꓼ ꓡꓱꓸꓼ ꓬꓰ ꓙ ꓔ ꓙ ꓡꓯꓽ ꓘꓳ ꓢꓲ ꓕꓲꓽ ꓪꓼ ꓔꓬ ꓠꓬꓲ ꓔ ꓟ꓾ ꓧꓪꓽ ꓗꓳ ꓓꓱꓽ ꓐꓯꓹ ꓘꓳ ꓠꓬꓲ ꓔ ꓟ ꓔꓯ ꓟꓽ ꓢꓷꓸ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

ꓝꓮꓲ ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓞꓳ ꓤꓽ ꓥꓳꓽ ꓡꓰˍ ꓟ꓾ ꓝꓸ ꓠꓲꓹ ꓟ ꓠꓬ ꓕꓲꓽ ꓣꓳ ꓝꓸ ꓔ ꓟ ꓠꓬ ꓕꓲꓽ ꓣꓳ ꓗꓷ ꓡꓰꓹ ꓟ= ꓝꓮꓲ ꓡꓯꓽ ꓒꓯꓹ ꓝꓸ ꓔ ꓢꓴ ꓠꓬ ꓡꓯꓽ ꓒꓯꓹ ꓝꓸ ꓔ ꓢꓴ ꓕꓲꓽ ꓣꓳ ꓠꓯꓸꓼ ꓗꓪ ꓙꓳ ꓠꓬꓲ ꓔ ꓟ ꓔꓯ ꓕꓱ ꓟ ꓔꓯ ꓢꓪ ꓢꓲ ꓝꓸ ꓔ ꓟ ꓖꓳ ꓡꓰ ꓥˍ ꓟꓲ ꓥꓳꓽ ꓡꓰꓹ ꓟ꓾ ꓔꓯ ꓥꓳꓽ ꓕꓲꓽ ꓟ ꓐꓯ ꓠꓬ ꓤꓽ ꓟꓶꓼ ꓤꓼ ꓕꓲꓽ ꓣꓳ ꓠꓬ ꓟꓬ ꓞꓲꓼ ꓟꓸ ꓒꓽ ꓕꓲꓼ ꓣꓳ ꓔꓯ ꓝꓸ ꓠꓲꓹ ꓫꓵˍ ꓡꓳ= ꓖꓳ ꓡꓰ ꓢꓲ ꓟꓬ ꓞꓲꓼ ꓟꓸ ꓒꓽ ꓕꓲꓽ ꓣꓳ ꓡꓰ ꓝꓸ ꓗꓷꓳ= ꓖꓳ ꓡꓰ ꓥˍ ꓟꓲ ꓖꓳ ꓕꓲꓽ ꓣꓳ ꓠꓬ ꓟꓬ ꓞꓲꓼ ꓟꓸ ꓒꓽ ꓟꓽ ꓥ= ꓟꓬ ꓞꓲꓼ ꓟꓸ ꓒꓽ ꓕꓲꓽ ꓤꓳꓹ ꓡꓰ ꓐꓰ ꓗꓷꓸ ꓢꓲ ꓡ ꓢꓴ ꓥˍ ꓟ ꓔꓯ ꓢꓷꓸ ꓡꓰꓳ= ꓖꓳ ꓟ ꓠꓬ ꓗꓷꓸ ꓔ ꓟ ꓥˍ ꓟ ꓪꓴꓸ ꓠꓬꓲ ꓜꓳꓽ ꓓꓲ ꓡꓰꓹ ꓟ ꓡꓯꓽ ꓒꓯꓹ ꓝꓸ ꓔ ꓟ ꓟꓽ ꓘꓷ ꓡꓰ= ꓝꓮꓲ ꓞꓳ ꓤꓽ ꓕꓲꓽ ꓣꓳ ꓠꓬ ꓡꓯꓽ ꓒꓯꓹ ꓟꓽ ꓝꓸ ꓔ ꓢꓰꓼ ꓕꓯ ꓝꓸ ꓪ ꓠꓹ ꓟ ꓐꓱ ꓶ ꓗꓷꓸ ꓔ ꓟ꓾ ꓟꓼ ꓥ ꓥˍ ꓟꓲ ꓥ ꓪꓹ ꓡꓰ꓾ ꓟꓽ ꓜꓳꓽ ꓥˍ ꓟꓲ ꓜꓳ ꓪꓹ ꓡꓰ ꓕꓱ ꓡꓰ ꓗꓷꓸ ꓢꓲ ꓡꓯꓽ ꓒꓯꓹ ꓝꓸ ꓗꓷꓳ= ꓖꓳ ꓟ ꓥˍ ꓟꓲ ꓜꓳꓽ ꓓꓲ ꓡꓰꓹ ꓟ ꓡꓯꓽ ꓒꓯꓹ ꓝꓸ ꓔ ꓟ ꓠꓯꓸꓼ ꓗꓪ ꓟꓽ ꓛꓲ ꓡꓰꓹ ꓟ ꓗꓷ ꓡꓰꓹ ꓓꓴ ꓟ ꓥ ꓪ= ꓤꓽ ꓑꓸ ꓤꓼ ꓕꓲꓽ ꓣꓳ ꓠꓬ ꓬꓲ ꓔꓯ ꓠꓬ ꓟꓬ ꓞꓲꓼ ꓟꓸ ꓒꓽ ꓡꓰ ꓠꓴ ꓕꓲꓽ ꓞꓲꓼ ꓡꓱꓸꓼ ꓗꓪ ꓠꓬ ꓤꓼ ꓠꓱ ꓪ ꓟꓽ ꓓ꓾ ꓮ ꓡꓲꓳ ꓐꓯ ꓠꓬ ꓠꓴ ꓠꓬ ꓞꓳ ꓡꓱꓽ ꓢꓲ ꓥ ꓐꓯ ꓔ ꓟ ꓙꓳ꓾ ꓧꓪꓽ ꓗꓳ ꓓꓱꓽ ꓥˍ ꓟꓲ ꓐꓯꓹ ꓡꓯꓽ ꓘꓳ ꓟꓽ ꓠꓸ ꓟ ꓤꓽ ꓑꓸ ꓤꓼ ꓕꓲꓽ ꓣꓳ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓤꓽ ꓟꓶꓼ ꓤꓼ ꓔꓯ ꓗꓷ ꓢꓲ ꓬꓲ ꓠꓬ ꓞꓳ ꓙꓲ ꓕ꓾ꓽ ꓣꓳꓹ ꓡꓰ ꓐꓰ ꓡꓯꓽ ꓒꓯꓹ ꓝꓸ ꓔ ꓟ ꓕꓱ ꓟ ꓠꓬ ꓧꓶꓸ ꓕꓯꓽ ꓡꓰ ꓐꓰ ꓢꓷꓸ ꓔ ꓟ ꓗꓷꓸ ꓔ ꓟ ꓥˍ ꓟ ꓪꓴꓸ ꓠꓬꓲ ꓕꓱ ꓟ ꓥˍ ꓟꓲ ꓜꓳꓽ ꓓꓲ ꓡꓰꓹ ꓟ ꓠꓯꓸꓼ ꓗꓪ ꓟꓽ ꓛꓲ ꓡꓰꓹ ꓟ ꓥ ꓪ=

  ꓝꓮꓲ ꓕꓲꓽ ꓫꓵꓽ ꓠꓬ ꓙꓳꓹ ꓟ ꓪꓴꓸ ꓠꓬꓲ ꓥˍ ꓠꓬ ꓙꓳ ꓡꓰ ꓠ ꓬꓰꓹ ꓟ ꓪꓴꓸ ꓠꓬꓲ ꓕꓱ ꓟ ꓥˍ ꓟꓲ ꓜꓳꓽ ꓓꓲ ꓡꓰꓹ ꓟ ꓠꓯꓸꓼ ꓗꓪ ꓟꓽ ꓛꓲ ꓡꓰꓹ ꓟ ꓥ ꓪ= ꓔꓯ ꓥꓳꓽ ꓐꓯ ꓠꓬ ꓤꓽ ꓟꓶꓼ ꓤꓼ ꓕꓲꓽ ꓣꓳ ꓔꓯ ꓬꓲ ꓐꓹ ꓐꓽ ꓟꓹ ꓟ ꓡꓰ ꓤꓽ ꓑꓸ ꓤꓼ ꓖꓳ ꓕꓲꓽ ꓣꓳ ꓐꓰ ꓟꓽ ꓝꓸ ꓟꓽ ꓢꓽ ꓕꓱ ꓡꓰ ꓐꓯꓹ ꓟ ꓠꓴ ꓟꓽ ꓘꓳꓹ ꓣꓴ ꓐꓯ ꓠꓬ ꓠꓴ ꓔꓯ ꓢꓰꓼ ꓩꓴ ꓓꓴ ꓥꓳ ꓐꓰ ꓕꓱ ꓡꓰ ꓐꓯꓹ ꓟ꓾ ꓖꓳ ꓟ ꓪꓴꓸ ꓠꓬꓲ ꓤꓽ ꓟꓶꓼ ꓤꓼ ꓠꓬ ꓙꓳ ꓢꓲ ꓤꓽ ꓑꓸ ꓤꓼ ꓐꓰ ꓡꓯꓽ ꓒꓮꓹ ꓝꓸ ꓔ ꓟ ꓥˍ ꓠꓬ ꓬꓲ ꓒꓽ ꓬꓲ ꓟ ꓡꓰ ꓠꓴ ꓖꓳ ꓕꓲꓽ ꓣꓳꓹ ꓐꓰ ꓡꓯꓽ ꓒꓮꓹ ꓟꓽ ꓝꓸ ꓠꓬ ꓥꓪ ꓘꓶꓽ ꓛꓲꓽ ꓫꓵꓽˍ ꓥꓳ= ꓥꓪ ꓓꓳꓼ ꓜꓽ ꓫꓵꓽˍ ꓥꓳ= ꓕꓱ ꓡꓰ ꓐꓯꓹ ꓟ ꓖꓳ ꓟ ꓪꓴꓸ ꓠꓬꓲ ꓤꓽ ꓟꓶ ꓤꓼ ꓠꓬ ꓙꓳ ꓢꓲ ꓡꓯꓽ ꓒꓯꓹ ꓝꓸ ꓔ ꓟ ꓕꓱ ꓡꓲꓳ ꓫꓵꓼ ꓔꓯ ꓐꓯ ꓠꓲꓹ ꓫꓵˍ ꓟ ꓥˍ ꓡꓳ= ꓠꓱꓸ ꓐꓯꓼ ꓙꓳ ꓡꓰ ꓠ ꓬꓰꓹ ꓟ ꓮꓽ ꓟꓬꓹ ꓫꓵꓽ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓖꓳ ꓪꓴꓸ ꓠꓬꓲ ꓜꓳꓽ ꓓꓲ ꓡꓰꓹ ꓟ ꓡꓯꓽ ꓒꓯꓹ ꓝꓸ ꓔ ꓟ ꓐꓯꓹ ꓟ ꓠꓯꓸꓼ ꓗꓪ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓽ ꓛꓹ ꓔ ꓟ ꓕꓱ ꓠꓬꓲ ꓣꓳ ꓠꓬꓲꓽ ꓗꓴꓸ ꓚꓸ ꓗꓪ ꓚꓵ ꓚꓵ ꓐꓲ ꓜꓲꓼˍ ꓟ ꓐꓯ ꓘꓶꓽ ꓛꓹ ꓐ ꓡꓹ ꓟ꓾ ꓘꓶꓽ ꓫꓵꓽ ꓛꓹ ꓐ ꓡꓹ ꓢꓴ ꓠꓬꓲꓽ ꓣꓳ ꓕꓱ ꓡꓲꓳ ꓫꓵꓽ ꓗꓷ ꓡꓰ ꓠ ꓗꓹ ꓡꓳ= ꓮꓸ ꓫꓵꓽ ꓡꓰ ꓓꓵꓽ ꓙꓽ ꓟꓽ ꓗꓴꓸ ꓔ ꓟ 12 ꓘꓳꓼ 13 ꓘꓳꓼˍ ꓡꓰ ꓡꓳꓼˍ ꓟ ꓤꓽ ꓟꓶꓼ ꓤꓼ ꓔꓯ ꓡꓯꓽ ꓒꓮꓹ ꓝꓸ ꓔ ꓟ ꓕꓱ ꓟ ꓥˍ ꓟꓲ ꓐꓲ ꓜꓲꓼ ꓟ ꓟꓽ ꓥ= ꓖꓳ ꓟ ꓡꓰ ꓟꓽ ꓞꓲ ꓪꓴꓸ ꓠꓷꓸ ꓟꓽ ꓐꓲ ꓢꓴ ꓞꓳ ꓟꓶ꓾ ꓕꓲꓽ ꓦꓲꓺ ꓡꓽ ꓞꓳ ꓚꓱꓹ ꓢꓷꓸ ꓠꓬꓲ ꓔ ꓟ ꓔꓯ ꓢꓷꓸ ꓟꓽ ꓐ ꓡ ꓢꓴ꓾ ꓖꓳ ꓟ ꓡꓰ ꓟꓽ ꓞꓲ ꓗꓷꓸ ꓔ ꓟ ꓪꓴꓸ ꓠꓬꓲ ꓡꓯꓽ ꓒꓮꓹ ꓝꓸ ꓗꓶ ꓟ꓾ ꓙꓳ ꓢꓲ ꓡꓯꓽ ꓒꓯꓹ ꓝꓸ ꓗꓷ ꓟ ꓕꓱ ꓡꓲꓳ ꓫꓵꓽ ꓑꓶꓸ ꓓꓴ ꓠꓲ ꓕꓱ ꓟ ꓥˍ ꓟꓲ ꓐꓲ ꓜꓲꓼˍ ꓟ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓽ ꓛꓹ ꓔ ꓟ ꓟꓽ ꓥˍ ꓟ ꓪꓴꓸ ꓠꓬꓲ ꓜꓳ ꓓꓲ ꓡꓰꓹ ꓟ ꓡꓯꓽ ꓒꓮꓹ ꓝꓸ ꓔ ꓟ ꓟꓽ ꓥ= ꓕꓱ ꓡꓰ ꓗꓷ ꓡꓰ ꓢꓲ ꓫꓵꓽ ꓪꓴ ꓓꓳ ꓡ ꓕꓯꓽ ꓠꓬ ꓐꓲ ꓜꓲꓼˍ ꓟ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓼ ꓛꓹ ꓔ ꓟ ꓟꓽ ꓥˍ ꓟ ꓪꓴ ꓠꓬꓲ ꓜꓳꓽ ꓓꓲ ꓡꓰꓹ ꓟ ꓡꓯꓽ ꓒꓯꓹ ꓝꓸ ꓔ ꓟ ꓟꓽ ꓗꓷ ꓡꓰ= ꓕꓱ ꓡꓰ ꓗꓷ ꓡꓰ ꓢꓲ ꓫꓵꓽ ꓪꓴ ꓓꓳ ꓡꓹ ꓠꓬ ꓝꓮꓲ ꓕꓲꓽ ꓧꓪꓹ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓓꓰ ꓠꓹ ꓟ ꓙꓲꓽ ꓪꓽ ꓙꓳˍ ꓡꓳ=                                                                                                                                                               

Add new comment

5 + 2 =