ꓞꓼ ꓐꓳ ꓬꓲꓻ ꓘꓴ

ꓘꓷ-ꓠ ꓟꓵꓽ ꓗꓪ ꓮ-ꓐ-ꓡ-ꓦ ꓐꓰ ꓬꓲ ꓤ ꓓꓴ (ꓬꓲꓸ ꓢꓸ ꓤ) ꓡꓳ-ꓔꓷ ꓐꓴ ꓠꓬ ꓐꓳ ꓶ ꓮ ꓟꓬꓹ ꓙꓳ ꓢꓲ ꓠꓬꓲ ꓗꓹ ꓛꓲꓽ ꓛꓲꓽ ꓡꓰꓽ ꓔꓬ ꓖꓴˍ ꓡꓳ= ꓬꓲ ꓪ ꓠꓬꓲꓽ ꓣꓳ ꓔꓯ ꓙꓱꓽ ꓤ ꓐꓴ꓾ ꓚꓳ ꓑꓸ ꓚꓳ ꓑ ꓐꓴ ꓐꓰ ꓶꓻ ꓡꓯꓼ ꓟꓬꓱꓽ ꓮ ꓟꓬꓹ ꓙꓳˍ ꓟ ꓥ ꓢꓲ ꓮꓸ ꓟꓴꓽ꓾ ꓮ ꓣꓳ꓾ ꓮ ꓛꓵꓼ꓾ ꓡꓳꓽ ꓕꓳꓽ ꓐꓰ ꓮ ꓠꓬꓲꓽ ꓮ ꓟꓬꓹ ꓙꓳˍ ꓡꓳ= ꓮ-ꓐ-ꓡ-ꓦ ꓐꓰ ꓡꓳ-ꓔꓷ ꓐꓴ ꓔꓯ ꓙꓱꓽ ꓤ ꓮ ꓟꓬꓹ ꓟꓬꓽ ꓡ ꓔꓬ ꓟ ꓪꓴꓸ ꓠꓬꓲ ꓬꓲ ꓪ ꓮ ꓠꓬꓲꓽ ꓮ ꓟꓴꓽ ꓮ ꓛꓵꓼ ꓮ ꓣꓳ ꓐꓴ ꓐꓱ ꓶ ꓫꓵꓸ ꓖ ꓜꓽ ꓖꓴ ꓟꓽ ꓡꓳꓼ ꓢꓲ ꓬꓲ ꓖ ꓧꓪ ꓠ ꓗꓷ ꓡꓰꓳ=

ꓕꓲ ꓠꓬꓲ ꓙꓳˍ ꓕꓯ ꓮ-ꓐ-ꓡ-ꓦ ꓐꓰ ꓡꓳ-ꓔꓷ ꓐꓴ ꓠꓬ ꓟꓵꓽ ꓕꓲ ꓟ ꓡꓱꓸꓼ ꓔꓯ ꓡꓳꓸ ꓟꓳꓻ ꓐ ꓡ ꓠꓹ ꓟ ꓐꓱ ꓶ ꓮ ꓘꓶꓸ ꓟꓴˍ ꓟ ꓪ ꓚꓲ ꓗꓪ ꓓꓯꓻ ꓙꓰ ꓗꓷꓳ= ꓮ-ꓐ-ꓡ-ꓦ ꓠꓬ ꓬꓲ ꓤ ꓓꓴ (ꓬꓲ ꓢꓸ ꓤ) ꓡꓯꓼ ꓶꓸ ꓗꓪ ꓙꓰˍ ꓠꓬ ꓬꓲ ꓠꓽ ꓡꓯꓼ ꓙ ꓗꓪ ꓙꓰ ꓓꓴ ꓥꓳ ꓐꓯ ꓖꓶˍ ꓡꓳ= ꓖꓳ ꓕꓯ ꓡꓳ-ꓔꓷ ꓠꓬ ꓕꓲ ꓚꓳ ꓡꓳ ꓡꓳꓸ ꓗꓷ ꓕꓯ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓙꓳˍ ꓟ ꓬꓳ-ꓔ ꓬꓲꓽ ꓟ ꓔꓯ ꓟꓳꓻ ꓡꓰꓳ= ꓝꓮꓲ ꓬꓲ ꓠꓬ ꓢꓳ-ꓓꓳ-ꓟ ꓡꓳ ꓒꓱ ꓔꓯ ꓥˍ ꓟꓲ ꓟꓳꓻ ꓡꓰꓳ= ꓢꓳ-ꓓꓳ-ꓟ ꓠꓬ ꓟꓲ ꓠꓯ ꓗꓪ ꓟꓽ ꓓ ꓥꓶˍ ꓟ ꓡꓳ ꓒꓱ ꓕꓲ ꓟ ꓥ ꓟ ꓔꓯ ꓬꓲ ꓚꓬꓹ ꓟꓽ ꓪ= ꓟꓵꓽ ꓖꓳ ꓟ ꓠꓬ ꓬꓲꓻ ꓙꓬ ꓙꓳ ꓢꓲ ꓮ ꓘꓶꓸ ꓡꓳꓸ ꓐꓲˍ ꓟ ꓔꓯ ꓡꓰꓽ ꓟꓳꓻ ꓡꓰ ꓠꓬꓲ ꓖꓳ ꓗꓪ ꓬꓲ ꓔꓬꓹ ꓬꓰ ꓠꓲꓹ ꓫꓵˍ ꓡꓳ=

ꓡꓳꓹ ꓬꓰˍ ꓕꓯ ꓡꓳ-ꓔꓷ ꓠꓬ ꓮ ꓘꓶꓸ ꓐꓲˍ ꓟ ꓬꓳ-ꓔ ꓡꓳ ꓖꓳ ꓟꓵꓽ ꓔꓯ ꓢꓲ ꓣꓴ ꓗꓷ ꓢꓲ ꓬꓲ ꓕꓲ ꓦꓲꓻ ꓢꓴ꓾ ꓬꓲ ꓮ ꓣꓳ꓾ ꓮ ꓛꓵꓼ꓾ ꓮ ꓠꓬꓲꓽ ꓐꓴ ꓔꓯ ꓧꓳꓽ ꓔ ꓢꓲ ꓡꓳꓸ ꓐꓲˍ ꓟ ꓟꓵꓽ ꓗꓪ ꓙꓰˍ ꓡꓳ= ꓝꓮꓲ ꓕꓲ ꓛꓱꓽ ꓗꓪ ꓮ-ꓐ-ꓡ-ꓦ ꓠꓬ ꓘꓷ-ꓠ ꓟꓵꓽ ꓗꓪ ꓔꓲꓹ ꓬꓰˍ ꓡꓳ=

ꓡꓳ-ꓔꓷ ꓐꓰ ꓬꓲ ꓕꓲ ꓦꓲꓻ ꓢꓴ ꓐꓴ ꓠꓬ ꓡꓳꓸ ꓬꓰˍ ꓕꓯ ꓢꓳ-ꓓꓳ-ꓟ ꓡꓳ ꓒꓱ ꓗꓪ ꓛꓲꓺ ꓡˍ ꓕꓯ ꓬꓲ ꓪ ꓥꓳ ꓡꓳꓸ ꓔ ꓟ ꓐꓰ ꓕꓲ ꓡꓰꓹ ꓟꓽ ꓥ ꓟ ꓔꓯ ꓢꓷꓸ ꓡꓰˍ ꓡꓳ= ꓡꓳ ꓒꓱ ꓖꓳ ꓟ ꓠꓬ ꓝꓴꓲꓸ ꓐꓰ ꓥꓶˍ ꓟ ꓬꓰ ꓔꓬ ꓢꓴ ꓐꓴ ꓡꓰ ꓐꓲꓻ ꓓꓹ ꓡꓳ= ꓡꓳ-ꓔꓷ ꓐꓰ ꓬꓲ ꓕꓲ ꓦꓲꓻ ꓢꓴ ꓐꓴ ꓡꓰꓽ ꓪꓴ-ꓢ ꓔꓯ ꓦ ꓡꓱˍ ꓡꓳ= ꓕꓲ ꓡꓳ ꓒꓱ ꓡꓱꓸꓼ ꓗꓪ ꓬꓲ ꓪ ꓕꓲ ꓦꓲˍ ꓡꓰꓽ ꓪꓴ-ꓢ ꓔꓯ ꓣꓱꓽ ꓙ ꓢꓴ ꓐꓴ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓡꓳ ꓒꓱ ꓗꓪ ꓐꓰ ꓟꓽ ꓓꓳ ꓙꓰ=

ꓢꓳ-ꓓꓳ-ꓟ ꓡꓳ ꓒꓱ ꓠꓬ ꓝꓴꓲꓸ ꓓꓽ ꓟ ꓬꓰˍ ꓟ ꓑꓶꓸ ꓓꓴ꓾ ꓬꓲ ꓪ ꓝꓴꓲꓸ ꓮ ꓘꓶꓸ ꓪꓴꓽˍ ꓟ ꓑꓶꓸ ꓓꓴ ꓪꓴ-ꓢ ꓠꓬ ꓡꓳ ꓒꓱ ꓔꓯ ꓟꓶꓽ ꓬꓰ ꓝꓲ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ= ꓪꓴ-ꓢ ꓠꓬ ꓢꓳ-ꓓꓳ-ꓟ ꓡꓳ ꓒꓱ ꓐꓰ ꓳ-ꓟꓳ-ꓡ ꓡꓳ ꓒꓱ ꓠꓬꓲꓽ ꓟ ꓡꓱꓸꓼ ꓔꓯ ꓟꓶꓽ ꓬꓰ ꓝꓲ ꓓꓴ ꓥꓳ= ꓡꓳ-ꓔꓷ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓕꓲ ꓣꓳ ꓥˍ ꓟꓲ ꓢꓳ-ꓓꓳ-ꓟ ꓡꓳ ꓒꓱ ꓗꓪ ꓐꓰ ꓟꓽ ꓓꓳ ꓙꓰ= ꓖꓳ ꓡꓱ ꓠꓬꓲ ꓮ ꓟꓶ ꓠꓬ ꓬꓲ ꓪ ꓕꓲ ꓦꓲꓻ ꓢꓴ ꓐꓴ ꓡꓳ ꓒꓱ ꓘꓴꓽ ꓗꓪ ꓐꓰ ꓓꓳꓻ ꓙꓰ ꓠꓹ ꓟ ꓬꓲ ꓦꓬꓼ ꓠꓬꓲ ꓛꓲꓺ ꓡꓻꓳ=

ꓪꓴ-ꓢ ꓠꓬ ꓢꓳ-ꓓꓳ-ꓟ ꓐꓰ ꓳ-ꓟꓳ-ꓡ ꓡꓳ ꓒꓱ ꓔꓯ ꓒꓬꓹ ꓗꓷ ꓠꓹ ꓟ ꓐꓰ꓾ ꓬꓲ ꓔꓯ ꓙꓳꓺ ꓒꓵꓽˍ ꓟ ꓡꓳ-ꓔꓷ ꓕꓲ ꓦꓲꓻ ꓢꓴ ꓔꓯ ꓚꓬꓴꓸ ꓙ ꓠꓹ ꓟ ꓐꓱ ꓶ ꓪꓽ ꓠꓬꓲˍ ꓟ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷˍ ꓡꓳ= ꓡꓳ-ꓔꓷ ꓠꓬ ꓬꓲ ꓔꓯ ꓙꓳˍ ꓟ ꓐꓳ ꓶ ꓮ ꓙꓵꓽ ꓔꓯ ꓡꓳ ꓔꓲꓸ ꓬꓰ ꓟꓽ ꓫꓳ ꓥˍ ꓟꓲ ꓪꓴ-ꓢ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓡꓳ ꓒꓱ ꓗꓪ ꓔꓬ ꓟ ꓡ ꓞꓳ ꓐꓰ ꓡꓳ ꓒꓱ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓐꓬ ꓡꓰ ꓝꓲˍ ꓟ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓟꓸ ꓖꓶˍ ꓡꓳ=

ꓟꓴꓽ ꓗꓪ ꓝꓲ ꓓꓴ ꓐꓴ ꓡꓳ-ꓔꓷ ꓐꓰ ꓫꓸ ꓕꓱ ꓔꓬ ꓕꓯ ꓡꓳ ꓒꓱ ꓗꓪ ꓔꓬ ꓟ ꓥꓶˍ ꓟ ꓡ ꓞꓳ ꓕꓲ ꓧꓳꓽ ꓠꓬ ꓑ ꓙꓽ ꓡꓰ ꓢꓲ ꓡꓳ-ꓔꓷ ꓦꓲꓻ ꓔꓯ ꓚꓳꓸ ꓡˍ ꓡꓳ= ꓬꓲ ꓪ ꓠꓬ ꓦꓲꓻ ꓗꓹ ꓘꓶꓽ ꓔꓯ ꓐꓬ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥˍ ꓟꓲ ꓕꓱ ꓠꓬꓲꓽ ꓣꓳ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓥ ꓟ ꓬꓲ ꓪ ꓟꓽ ꓢꓷꓸ= ꓡꓳ-ꓔꓷ ꓡꓰ ꓦꓲꓻ ꓠꓱ ꓫꓳꓸ ꓟꓸ ꓗꓪ ꓓꓳ ꓙꓰ ꓢꓲ ꓕꓱ ꓘꓶ ꓛꓲ ꓥꓶˍ ꓟ ꓟꓽ ꓬꓰ ꓠꓹ ꓟ ꓐꓯ ꓖꓶˍ ꓟꓲ ꓬꓲ ꓪ ꓟꓽ ꓠ ꓠꓹ=

ꓖꓳ ꓕꓲ ꓙꓵꓹ ꓕꓯ ꓟꓴꓽ ꓗꓪ ꓝꓲ ꓓꓴ ꓐꓴ ꓠꓬ ꓡꓳ-ꓔꓷ ꓔꓯ ꓦꓲꓻ ꓘꓴꓽ ꓗꓪ ꓚꓵꓹ ꓓꓵꓽ ꓙꓰ ꓢꓲ ꓞꓳ ꓥꓶ ꓕꓲ ꓧꓳꓽ ꓟ ꓔꓯ ꓠꓬꓲ ꓟꓽ ꓟꓳꓻ ꓗꓷ ꓡꓰ ꓝꓲˍ ꓡꓳ= ꓖꓳ ꓡꓱ ꓠꓬ ꓬꓲ ꓪ ꓐꓴ ꓗꓹ ꓘꓶꓽ ꓧꓪ ꓟꓽ ꓟꓳꓻ ꓗꓷ ꓡꓰꓳ=

ꓓꓳꓻ ꓙꓰ ꓠꓹ ꓟ ꓬꓲ ꓙꓵꓹ ꓛꓲꓺ ꓡꓻꓳ꓾ ꓠꓴ ꓕꓲ ꓦꓲꓻ ꓢꓴ ꓔꓯ ꓧꓳꓽ ꓢꓲ ꓮ ꓟꓲꓸ ꓟꓲꓸ ꓓꓳꓻ ꓙꓰ꓾ ꓮ ꓡꓰ ꓗꓪˍ ꓟꓲ ꓕꓽ ꓠꓽ꓾ ꓗꓸ ꓠꓯꓸ ꓢꓲ ꓗꓪ ꓔꓲꓸ ꓒꓳꓹ ꓢꓲ ꓕꓽ ꓡꓳꓸ꓾ ꓐꓰ ꓟꓴꓽ ꓗꓪ ꓝꓲ ꓓꓴ ꓡꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓡꓳ-ꓔꓷ ꓠꓽ ꓓꓳꓻ ꓙꓰ ꓠꓲꓹ ꓟꓽ ꓫꓵ ꓠꓬꓲ ꓡꓳ-ꓔꓷ ꓐꓰ ꓬꓲ ꓕꓲ ꓦꓲꓻ ꓢꓴ ꓔꓯ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓖꓳ ꓓꓳ ꓗꓷˍ ꓡꓳ= ꓖꓳ ꓡꓱ ꓠꓬꓲ ꓡꓳ-ꓔꓷ꓾ ꓬꓲ ꓤ ꓟꓶꓻ ꓐꓰ ꓬꓲ ꓮ ꓟꓲꓽ ꓐꓴ ꓔꓷꓹ ꓙꓰ ꓔꓬ ꓕꓯ ꓡꓳ-ꓔꓷ ꓬꓲ ꓤ ꓟꓶꓻ ꓠꓬ ꓗꓸ ꓠꓯꓸ ꓢꓲ ꓗꓪ ꓔꓲꓸ ꓒꓳꓹ ꓢꓲ ꓡꓳꓸˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓞꓼ ꓐꓰ ꓞꓼ ꓐꓳ ꓬꓲꓻ ꓘꓴ ꓕꓲ ꓘꓴ ꓗꓷ ꓡꓰꓳ= ꓡꓳ-ꓔꓷ ꓠꓽ ꓗꓸ ꓠꓯꓸ ꓢꓲ ꓗꓪ ꓟꓽ ꓡꓳꓸ ꓡꓳꓸ ꓝꓸ ꓢꓲ ꓔꓷꓹ ꓙꓰˍ ꓡꓳ=

ꓡꓳ-ꓔꓷ ꓢꓳ-ꓪ ꓗꓪ ꓛꓲ ꓬꓰ ꓕꓯ ꓟꓲꓽ ꓟꓲꓽ ꓓꓳ ꓡꓻꓳ= ꓖꓳ ꓕꓯ ꓪꓴ-ꓢ ꓠꓬ ꓡꓳ ꓒꓱ ꓕꓯꓽ ꓢꓲ ꓗꓪ ꓮ ꓔꓳꓸ ꓐꓬ ꓞꓹ ꓟ ꓟꓶꓽ ꓦ ꓦ ꓝꓲ ꓢꓲ꓾ ꓕꓲ ꓡꓳ ꓒꓱ ꓡꓱꓸꓼ ꓮ ꓔꓳꓸ ꓐꓬ ꓗꓷ ꓠꓬ ꓕꓲ ꓡꓳ ꓒꓱ ꓡꓱꓸꓼ ꓮ ꓔꓳꓸ ꓟꓴꓽ ꓘꓴꓽ ꓐꓰ ꓐꓲ ꓡꓰꓳ= ꓢꓳ-ꓓꓳ-ꓟ ꓐꓰ ꓳ-ꓟꓳ-ꓡ ꓡꓳ ꓒꓱ ꓠꓬ ꓐꓬ ꓡꓰꓳ꓾ ꓟꓶꓽ ꓡꓰꓳ= ꓥꓶˍ ꓟ ꓡꓳ ꓒꓱ ꓐꓴ ꓠꓬ ꓟꓲ ꓛꓬ ꓗꓪ ꓝꓮꓲ ꓕꓲ ꓧꓪꓹ ꓟꓽ ꓓꓳꓻ ꓡꓻꓳ꓾ ꓟꓴꓽ ꓘꓴꓽ ꓐꓴ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰ ꓗꓷꓳ= ꓡꓳ-ꓔꓷ ꓬꓲ ꓤ ꓟꓶˍ ꓟꓲ ꓟꓴꓽ ꓗꓪ ꓝꓲ ꓓꓴ ꓐꓴ ꓡꓰ ꓔꓲꓸ ꓒꓳꓹ ꓢꓲ ꓕꓽ ꓡꓳꓸ ꓐꓯˍ ꓟ ꓐꓯ ꓘꓶꓽ ꓔꓯ ꓟꓽ ꓠ ꓠꓹ ꓗꓷ ꓟ ꓑꓶꓸ ꓓꓴ ꓞꓼ ꓐꓳ ꓬꓲꓻ ꓘꓴ ꓒꓬꓱꓼ ꓡꓰꓳ=

Add new comment

8 + 9 =