ꓟꓰ ꓞꓶꓻ ꓟꓰ ꓢꓲ ꓪꓽ ꓘꓴ ꓖꓶˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓪꓸ ꓧꓪꓸꓼ ꓔꓬ ꓡ

ꓮ ꓟꓶ ꓕꓱ ꓕꓲꓽ ꓙꓵꓹ ꓗꓪ ꓠꓬ꓾ ꓠꓻ ꓢꓴ ꓒꓬꓽ ꓢꓴ- ꓥ ꓠꓬ- ꓞꓲꓼ ꓪꓴꓽ ꓡꓲ ꓢꓴ ꓐꓴ ꓔꓯꓸ ꓟꓰ ꓞꓶꓻ ꓟꓰ ꓢꓲ ꓪꓽ ꓘꓴ ꓖꓶˍ ꓟ ꓟꓸ ꓟꓲꓽ ꓢꓳ ꓣꓴ ꓡꓯ= ꓟꓬꓱ ꓐꓬꓱꓽ ꓘꓶꓽ ꓕꓱ ꓟ ꓗꓪ ꓟꓰ ꓞꓶꓻ ꓣꓱꓽ ꓢꓲ ꓟꓰ ꓖꓶꓽ ꓢꓲ ꓪꓽ ꓘꓴ ꓖꓶˍ ꓟ ꓟꓸ ꓟꓲ (ꓬ-ꓗꓴ 5ꓽ 13-16) ꓗꓪ ꓓꓹ ꓟ ꓟꓸ ꓟꓲ ꓥꓳ=

ꓓꓽ ꓪꓴꓸ ꓧꓪꓽ ꓞꓶꓻ ꓥ ꓠꓬ- ꓟꓰ ꓞꓶꓻ ꓬꓲ ꓪꓽ ꓠꓬꓲꓹ ꓟ ꓟꓸ ꓟꓲ ꓮ ꓔꓲ ꓐꓯ ꓠꓲꓹ ꓫꓵˍ ꓡꓳ= ꓘꓶꓽ ꓫꓵꓼ ꓐꓰꓽ ꓦꓬꓼ ꓠꓬꓲ ꓗꓪ ꓔꓲꓺ ꓒ꓾ ꓟꓶꓽ ꓠꓷꓹ ꓝ ꓒ ꓥ ꓠꓬ꓾ ꓪꓺ ꓔꓲ ꓬꓰ ꓠꓹ ꓟ ꓪꓴ-ꓢ ꓢꓲꓺ ꓓꓳꓻ ꓡˍ ꓕꓯꓽ ꓓꓽ ꓪꓴꓸ ꓟꓰ ꓞꓶꓻ ꓧꓶꓸ ꓕꓯ (ꓟꓲ ꓙꓬꓼ) ꓬꓲ ꓪꓴꓸ ꓓꓵ ꓗꓪ ꓧꓳꓸ ꓕꓲꓽ ꓖꓶˍ ꓟ (1ꓢ-ꓟꓴ-ꓬꓰ 10ꓽ 1) ꓬꓲ-ꓢꓷ-ꓡꓰ ꓪꓺ ꓔꓲ ꓓꓽ ꓪꓴꓸ ꓕꓲꓽ ꓣꓳ ꓢꓳ-ꓡꓳ ꓔꓯ ꓪꓺ ꓔꓲ ꓬꓰ ꓠꓹ ꓟ ꓪꓴ-ꓢ ꓕꓵꓽ ꓪ  ꓗꓪ ꓐꓰ ꓢ-ꓟꓴ-ꓬꓰ ꓡꓰ ꓟꓰ ꓞꓶꓻ ꓟꓰ ꓖꓶˍ ꓟ꓾ ꓝꓮꓲ ꓬꓰ-ꓫꓲ ꓬꓲꓸ ꓤꓽ ꓓ-ꓪꓵ ꓔꓯ ꓥ  ꓟꓲ ꓬꓲ-ꓢꓷ-ꓡꓰ ꓪꓺ ꓔꓲ ꓠꓬꓲꓽ ꓣꓳ ꓕꓲ ꓣꓳ ꓬꓰ ꓠꓹ ꓟ ꓢ-ꓟꓴ-ꓬꓰ ꓡꓰ ꓟꓰ ꓞꓶꓻ ꓟꓰ ꓖꓶ ꓗꓷ ꓠꓬ ꓪꓴ-ꓢ ꓬꓲꓸ ꓦ ꓠꓬ ꓪꓽ ꓠꓬꓲꓹ ꓟ ꓡꓰ ꓓ-ꓪꓵ ꓔꓯ ꓬꓯꓼ ꓡ ꓢꓲ ꓖꓳ ꓕꓲꓼ ꓠꓬꓲ ꓗꓪ ꓚꓳꓸ ꓪꓴ-ꓢ ꓬꓲ ꓦ ꓠꓬ ꓬꓲꓸ ꓔꓯ ꓛꓳꓻ ꓞꓹ ꓡꓳ꓾ ꓐꓯ ꓡꓳ= (1ꓢ-ꓟꓴ-ꓬꓰ 16ꓽ13)

ꓕꓯꓽ ꓢꓲ ꓗꓪ ꓟ ꓬ-ꓗꓴ ꓕꓳ-ꓶ ꓗꓪ ꓥ ꓟꓲ꓾ ꓠꓴ ꓪꓽ ꓗꓳ ꓡꓳ ꓗꓪ ꓠꓻ ꓢꓴ ꓙꓳˍ ꓡ! ꓙꓳˍ ꓠꓬ ꓢꓲꓺ ꓒꓽ ꓟꓬꓱꓺ ꓗꓪ ꓐꓰ  ꓮꓽ ꓛꓬꓽ ꓞꓶꓻ ꓟꓰ ꓖꓶꓽ ꓢꓲ ꓬꓲ ꓐꓱ ꓶ ꓪꓽ ꓘꓴ ꓖꓶ ꓝꓲ= ꓙꓵꓻ ꓠꓲꓹ ꓡꓰ ꓪꓽ ꓘꓴˍ ꓠꓬ ꓞꓳ ꓠꓻ ꓓ ꓡꓰ ꓢꓲ ꓢꓲꓺ ꓒꓽ ꓡꓰ ꓬꓲꓸ ꓔꓯ ꓢꓯꓼ ꓙꓳ ꓡ ꓝꓲˍ ꓥꓳ=

ꓥ-ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓠꓬ ꓟꓰ ꓞꓶꓻ ꓐꓰ ꓕꓲꓽ ꓛꓳ ꓟꓬꓱꓽ ꓬꓰ ꓡ ꓢꓲ ꓪꓴ-ꓢ ꓦ ꓥ ꓟꓲ ꓐꓲ ꓡ ꓝꓲˍ ꓟ꓾ ꓝꓮꓲ ꓠꓻ ꓢꓴ ꓥ ꓟꓲ ꓓꓻ ꓡꓰ ꓢꓲ ꓢꓯꓼ ꓙꓳ ꓡˍ ꓟ꓾ ꓝꓮꓲ ꓝꓴꓲ ꓥ ꓟꓲ ꓫꓬ ꓡꓰˍ ꓟ꓾ ꓟꓸ ꓟꓲ ꓕꓯꓽ ꓢꓲ ꓗꓪ ꓡꓳꓸ ꓟꓳˍ ꓡꓳ= ꓥ- ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓬꓱꓽ ꓐꓬꓱꓽ ꓘꓶꓽ ꓕꓱ ꓟ ꓬꓳꓹ ꓚꓵˍ ꓟ ꓟꓬꓱꓽ ꓕꓲ ꓟ ꓥ ꓠꓬꓲ ꓮ ꓠꓱ ꓬꓲꓸ ꓪꓴꓸ ꓟ ꓘꓴ ꓜꓲꓼ ꓞꓳ ꓗꓪ ꓐꓰ ꓣꓱꓽ ꓪꓴꓸ ꓔꓴ ꓢꓲ ꓠꓬꓲ ꓠꓬꓲ ꓗꓪ ꓛꓲ ꓣꓱꓽ ꓔꓬ ꓟ ꓥ ꓡꓳ=

ꓝꓮꓲ ꓣꓳꓽ ꓧꓪꓸ ꓛꓲꓽ ꓓꓴ ꓕꓲꓽ ꓘꓶꓽ ꓠꓬ꓾ ꓡ ꓞꓳ ꓕꓲꓽ ꓐꓱ ꓠꓬ ꓟꓬꓱꓽ ꓐꓱꓽ ꓘꓶꓽ ꓟꓰ ꓞꓶꓻ ꓟꓰ ꓖꓶˍ ꓟ꓾ ꓕꓱ ꓟ ꓠꓬ- ꓮꓸ ꓘꓶ ꓠꓻ ꓪꓴꓽ ꓢꓴ ꓐꓱ ꓶ  ꓥ  ꓡꓳ ꓐꓰ ꓓꓵꓽ ꓙ ꓢꓴ ꓙꓳ ꓡꓳ= ꓕꓱ ꓟ ꓓꓵꓽ ꓙꓽ ꓥꓳꓽ ꓡꓰˍ ꓡꓳ= ꓮ ꓟ ꓥ ꓟꓲ ꓠꓻ ꓢꓴ ꓒꓬꓽ ꓓꓴ ꓔꓳꓹ ꓜꓳꓽ ꓔꓬ ꓕꓯ꓾ ꓞꓲꓼ ꓣꓳ ꓢꓴ ꓪꓴꓽ ꓢꓴ ꓔꓲꓺ ꓒ ꓐꓴ ꓔꓯ ꓘꓴ ꓢꓲ ꓘꓳꓹ ꓣꓴ ꓓꓹ ꓟꓸ ꓢꓮꓗꓣꓮꓟꓰꓠꓔꓴ꓾ ꓥ ꓠꓬ꓾ ꓟꓬꓱꓽ ꓐꓬꓱꓽ ꓘꓶꓽ ꓥ ꓠꓬꓲ꓾ ꓣꓱꓽ ꓬꓯꓼ ꓔꓬ ꓕꓯ ꓮ ꓕꓯ ꓥ ꓟꓲ ꓘꓳꓹ ꓣꓴ ꓡꓯ= ꓘꓳꓹ ꓣꓴ ꓓꓹ ꓡꓳ=