ꓟꓵꓽ ꓚꓰꓼ ꓟꓲ ꓚꓰꓼ ꓟꓸ ꓟꓲꓽ

ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓟꓸ ꓟꓲꓽ ꓠ ꓠꓹ ꓔꓬ ꓢꓴ ꓮ ꓙꓵꓽ ꓢꓴ ꓢꓲ ꓡꓲ ꓟ ꓟꓶ ꓝꓲ= ꓕꓱ ꓕꓲ ꓙꓵꓹ ꓗꓪ ꓟꓵꓽ ꓚꓰꓼ ꓟꓲ ꓚꓰꓼ ꓟꓸ ꓟꓲꓽ ꓔꓯ ꓟꓳꓸ ꓣꓳ ꓮ ꓔꓲꓸ ꓢꓳ ꓣꓴ ꓓꓴ ꓬꓰ ꓡꓯ=

ꓢꓲꓽ ꓫꓬ ꓕꓳ ꓶ ꓟꓸ ꓟꓲꓽ ꓕꓳ ꓶ ꓗꓪ ꓬꓲ ꓚꓰ ꓬꓲ ꓪꓴꓸ ꓕꓳ ꓶ 1ꓽ1-31 ꓗꓪ ꓛꓲ ꓠꓬ꓾ ꓟꓲ ꓠꓯ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓢꓯꓸ ꓔꓬ ꓟ ꓐꓰ ꓟꓽ ꓢꓯꓸ ꓔꓬ ꓟ꓾ ꓬꓲꓻ ꓙꓬ ꓠꓯꓸꓼ ꓗꓪ ꓟ ꓮ ꓙꓵꓽ꓾ ꓝꓮꓲ ꓟꓵꓽ ꓪꓴꓽ ꓗꓪ ꓟ ꓟꓲꓽ ꓟꓲ ꓦ ꓐ ꓗꓴ ꓤ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓛꓳꓼ ꓠꓬꓲ ꓠꓯꓸꓼ ꓗꓪ ꓚꓰꓼ ꓓꓳ ꓡꓰꓳ꓾ ꓐꓰ ꓐꓯ ꓡꓳ=

ꓚꓰꓼ ꓔ ꓡꓳ ꓐꓯ ꓠꓬ ꓪꓴ-ꓢ ꓐꓯ ꓘꓶꓽ ꓕꓲ ꓘꓶꓽ ꓕꓵꓼ ꓪ ꓖꓶˍ ꓠꓬ ꓬꓲ ꓠꓲꓹ ꓫꓵˍ ꓟ꓾ ꓠꓲꓹ ꓠꓵˍ ꓟ ꓮ ꓙꓵꓽ ꓬꓲ ꓕꓵꓼ ꓪ ꓗꓪ ꓐꓰ ꓮ ꓙꓵꓽ ꓒꓬꓱꓼ ꓡ ꓙꓳ ꓡ ꓟ ꓔꓯ ꓔꓬ ꓡꓳ ꓐꓰ ꓐꓯ ꓡꓳ=  ꓮ ꓟꓶ ꓟꓲ ꓠꓯ ꓗꓪ ꓐꓬꓱꓻ ꓦꓲꓻ꓾ ꓟꓳ ꓓꓳ꓾ ꓔꓬꓹ ꓖꓴ ꓦꓲꓻ ꓐꓬꓱꓽ ꓡꓱꓼ ꓡꓱꓼ ꓗꓹ ꓟ ꓮ ꓙꓵꓽ ꓥ ꓟꓲ ꓟꓷꓽ ꓠꓷꓹ ꓫ ꓪ ꓘꓶꓽ ꓡꓰ ꓐꓯ ꓢꓲ꓾ ꓕꓵꓼ ꓪ ꓖꓶ ꓢꓲ ꓒꓬꓱꓼ ꓡ ꓟꓽ ꓓ= ꓚꓲꓸ ꓛꓬ ꓡꓯꓽ ꓒꓯꓹ ꓮ ꓟꓬꓹ ꓡꓳꓽ ꓢꓲ ꓠꓬꓲ ꓫꓬꓹ ꓐ ꓡˍ ꓡꓳ=

ꓮ ꓟꓶ ꓣꓳ ꓡꓳꓸ ꓟꓳˍ ꓟ ꓟꓲꓽ ꓟꓲ꓾ ꓦ ꓐ꓾ ꓗꓴ ꓤ ꓮ ꓙꓵꓽ ꓠꓬ ꓬꓲ ꓔꓬ ꓖꓴ ꓬꓲ ꓚꓱꓹ ꓗꓪ ꓔꓬ ꓢꓲ ꓟꓽ ꓥꓳꓽ ꓟꓽ ꓧꓶꓸ ꓡꓰ ꓠ ꓟꓬꓱꓽ ꓬꓰ ꓔꓬ ꓡꓳ= ꓬꓲ ꓪ ꓕꓱ ꓡꓱ ꓟꓬꓱꓽ ꓬꓰ ꓔꓬ ꓠꓬꓲ ꓞꓳ ꓤ ꓔꓯ ꓣꓱꓽ ꓬꓯꓼˍ ꓟ ꓗꓪ ꓖꓶꓽ ꓔꓬ ꓡꓳ=

ꓐꓯ ꓠꓲꓹ ꓫꓵˍ ꓟ ꓠꓬ ꓟꓲꓽ ꓟꓲ ꓡꓰ ꓟꓶꓽ ꓞꓻ ꓣꓳ ꓖꓶ ꓡ꓾ ꓢꓯꓸ ꓫꓵꓽ ꓮ ꓙꓵꓽ ꓔꓯ ꓢꓯꓸ ꓔꓬ ꓝꓲ ꓐ ꓡˍ ꓟ꓾ ꓟꓲ ꓠꓯ ꓔꓯ ꓞꓻ ꓝꓲꓸ ꓙꓬꓻ ꓝꓲꓸ ꓟꓶꓽ ꓦ ꓦ ꓝꓲꓸ ꓕꓱ ꓡꓱ ꓫꓵꓽ ꓬꓲ ꓝꓲꓸ ꓒꓬꓱꓼ ꓡ ꓠꓹ ꓟ ꓠꓬ ꓟꓲꓽ ꓟꓲ ꓦ ꓐ ꓗꓴ ꓤ꓾ ꓝꓮꓲ ꓟꓲ ꓠꓯ꓾ ꓕꓱ ꓟꓬ ꓫꓵꓽ ꓠꓬ ꓬꓲ ꓪꓴꓸ ꓗꓪ ꓐꓰ ꓮ ꓟꓶ ꓗꓪ ꓛꓲ ꓬꓲ ꓙꓵꓹ ꓕꓲ ꓧꓷꓹ ꓡꓰ ꓕꓲ ꓧꓷꓹ ꓟꓬꓱꓽ ꓬꓰ ꓔꓬ ꓟ ꓑꓶꓸ ꓓꓴ ꓞꓳ ꓤ ꓣꓱꓽ ꓬꓯꓼˍ ꓟ ꓪ ꓓꓹ ꓡꓳ= ꓒꓬꓱꓼ ꓡˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓣꓳ ꓠꓬ ꓣꓳ ꓔꓬ ꓟ ꓟꓵꓽ ꓕꓱ ꓕꓲ ꓘꓴ ꓗꓪ ꓔꓬ ꓢꓲ ꓡꓳꓸ ꓟꓳˍ ꓡꓳ꓾ ꓢꓷꓸˍ ꓡꓳ= ꓣꓳ ꓟꓽ ꓙꓰ ꓛꓲꓺ ꓟ ꓟꓵꓽ ꓗꓴꓷꓼ ꓾ ꓣꓳ ꓟꓽ ꓟꓳꓻ ꓠꓬꓲ ꓟ ꓢꓯꓸ ꓫꓵꓽ ꓢꓯꓸ ꓙꓰꓽ ꓓꓵꓽ ꓙ ꓟꓶ ꓓꓴ ꓓꓽ ꓟ ꓮ ꓟꓬꓹ ꓫꓵꓽ ꓮ ꓟꓬꓹ ꓖꓻ ꓗꓪ ꓙꓳ ꓞꓹ ꓢꓰꓽ ꓡꓳ= ꓕꓱ ꓟꓬ ꓫꓵꓽ ꓟ ꓮ ꓙꓵꓽ ꓥ ꓟꓲ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓡꓳ=

ꓗꓳ-ꓡꓳ-ꓫꓲ 1ꓽ16 ꓗꓪ꓾ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓟˍ ꓟꓲ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓟˍ ꓟꓲ꓾ ꓟꓳꓻ ꓓꓹ ꓡꓳ ꓫꓵꓽ ꓥˍ ꓟꓲ꓾ ꓟꓳꓻ ꓟꓽ ꓓ ꓡꓳ ꓫꓵꓽ ꓥˍ ꓟꓲ ꓚꓰꓼ ꓔ ꓡꓳ꓾ ꓐꓰ ꓐꓯ ꓡꓳ=