ꓟꓷꓼ ꓠꓷꓹ ꓝ ꓒ ꓬꓳ-ꓫꓴ ꓟꓸ ꓟꓲꓽ

ꓟꓷꓽ ꓠꓷꓹ ꓝ ꓒ ꓟꓳ-ꓫꓲ ꓠꓬ ꓬꓲ ꓞꓲꓼ 120 ꓘꓳꓼ ꓕꓯ ꓫꓵꓻꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓟꓳ-ꓫꓲ ꓐꓱ ꓶ 30 ꓠꓬꓲ ꓮ ꓛꓬ ꓙꓱꓼ ꓗꓷꓳ= ꓟꓳ-ꓫꓲ ꓟꓽ ꓫꓵꓻ ꓕꓯ ꓬꓲ ꓠꓬ ꓬꓲ ꓡ ꓞꓳ ꓐꓴ ꓔꓯ ꓝꓸ ꓢꓲ ꓧꓳꓽ ꓣꓱꓽ ꓠꓹ ꓟ ꓬꓳ-ꓫꓴ ꓔꓯ ꓢꓲꓺ ꓗꓷ ꓔ ꓡꓳ= ꓬꓳ-ꓫꓴ ꓠꓬ ꓟꓳ-ꓫꓲ ꓗꓸ ꓠꓯ ꓛꓳ ꓢꓴ ꓐꓴ ꓗꓪ ꓟ ꓕꓲ ꓣꓳ ꓥꓳ=

 ꓬꓲ-ꓢꓷ-ꓡꓰ ꓐꓴ ꓔꓯ ꓬꓲ-ꓙꓲ ꓡꓯꓽ ꓒꓯꓹ ꓗꓪ ꓐꓰ ꓚꓬꓴꓸ ꓓꓳ ꓗꓷ ꓢꓴ ꓟꓳ-ꓫꓲ ꓟꓳ-ꓮ-ꓐꓷ ꓪ ꓚꓲ ꓗꓪ ꓫꓵꓻ ꓗꓷ ꓟ ꓠꓬ ꓟꓶ ꓤ ꓗꓷ ꓡꓰꓳ= ꓮ ꓟꓶ ꓗꓪ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓪꓴ-ꓢ ꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓟꓵꓽ ꓗꓪ ꓧꓳꓽ ꓙꓰ ꓔꓬ ꓟ ꓠꓬ ꓟꓳ-ꓫꓲ ꓔꓯ ꓛꓳ ꓢꓴ ꓬꓳ-ꓫꓴ ꓥ ꓡꓳ=

ꓗꓸ ꓠꓯ ꓪꓴ-ꓢ ꓡꓰ ꓬꓳ-ꓫꓴ ꓔꓯ ꓫꓸ ꓕꓱ ꓡ ꓢꓲ꓾ ꓙꓵꓽ ꓗ ꓐꓴ ꓔꓯ ꓛꓳ ꓫꓱꓽ ꓠꓹ ꓟ ꓬꓳꓸ ꓚꓵˍ ꓟ ꓔꓯ ꓐꓯ ꓖꓶ ꓡˍ ꓡꓳ= ꓬꓳ-ꓫꓴ ꓠꓬ ꓬꓳ-ꓔ ꓬꓲꓽ ꓟ ꓔꓯ ꓗꓳꓸ ꓙꓰ ꓢꓲ ꓪꓴ-ꓢ ꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓟꓵꓽ ꓗꓪ ꓙꓰ ꓠꓹ ꓟ ꓙꓽ ꓖꓶ ꓗꓷꓳ= ꓬꓳ-ꓫꓴ ꓠꓬ ꓮ ꓘꓶꓸ ꓪꓽ ꓠꓬꓲ ꓢꓲ ꓢꓷꓸ ꓠꓲꓹ ꓙꓽ ꓜꓲꓼ ꓠꓲꓹ ꓙꓳ ꓢꓴ ꓥ ꓢꓲ ꓬꓲ ꓔꓯ ꓧꓪꓸ ꓡꓰ ꓘꓴ ꓢꓴ ꓟꓽ ꓙꓳ= ꓪꓴ-ꓢ ꓡꓰ ꓬꓳ-ꓫꓴ ꓔꓯ ꓮ ꓕꓯˍ ꓟꓲ ꓟꓽ ꓡꓳꓺ ꓗꓷ ꓐꓰ ꓬꓲ ꓔꓯ ꓙ ꓟꓳꓽ ꓘꓶꓽ ꓖꓶ ꓗꓷꓳ= ꓝꓮꓲ ꓟꓳ-ꓫꓲ ꓔꓯ ꓬꓰ ꓙ ꓗꓷ ꓟ ꓕꓲ ꓡꓰꓹꓼ ꓬꓲ ꓔꓯˍ ꓟꓲ ꓬꓰ ꓙ ꓥꓳ ꓐꓰ꓾ ꓐꓯ ꓖꓶ ꓗꓷꓳ=

ꓖꓳ ꓡꓱ ꓠꓬꓲ ꓬꓳ-ꓫꓴ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓧꓳꓽ ꓣꓱꓽ ꓢꓴ ꓬꓰ ꓢꓲ꓾ ꓪꓴ-ꓢ ꓡꓰ ꓖꓶ ꓔ ꓟ ꓙꓵꓽ ꓗ ꓐꓴ ꓔꓯ ꓛꓳˍ ꓥꓳ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓬꓳ-ꓫꓴ ꓔꓯ “ꓛꓳ ꓫꓱꓽ ꓠꓯꓹ ꓟ ꓙꓵꓽ ꓗ ꓐꓴ ꓔꓯ ꓟꓶꓽ ꓘꓶꓽ ꓟꓳ ꓡꓳ ꓕꓯ ꓵ ꓾ ꓝꓮꓲ ꓥꓪ ꓔꓯ ꓪꓴꓸ ꓓꓵ ꓕꓱꓽˍ ꓕꓯˍ ꓟꓲ ꓵ= ꓕꓱ ꓡꓱ ꓬꓰˍ ꓠꓬ ꓠꓴ ꓙꓰˍ ꓟ ꓥ ꓕ ꓑꓳꓸꓼ ꓗꓪ ꓬꓲ ꓙꓲꓻ ꓬꓰ ꓐ ꓡ ꓠꓹ ꓟ ꓬꓰ ꓙˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓪꓴ-ꓢ ꓠꓬ ꓬꓲ ꓐꓰ ꓕꓲ ꓪꓺꓽ ꓔꓬ ꓡꓳ= ꓬꓲ ꓠꓬ ꓮ ꓕꓯ ꓟꓲ ꓟꓽ ꓙꓳꓺ ꓛꓱꓽ ꓾ ꓮ ꓕꓯ ꓟꓲ ꓠꓲꓹ ꓟ ꓟꓽ ꓙꓬꓻ ꓡꓰ= ꓬꓲ ꓠꓲꓹ ꓟ ꓠꓬ ꓮ ꓘꓶꓸ ꓕꓶ ꓞꓹ ꓢꓲ ꓪꓽ ꓠꓬꓲˍ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓙ ꓟꓳ ꓔ ꓟ ꓟꓵꓽ ꓗꓪ ꓓꓵꓽ ꓙꓰ ꓠꓹ ꓟ ꓙꓰˍ ꓟ ꓙꓻ ꓖꓴ ꓗꓪ ꓙꓱ-ꓡꓲ-ꓘꓳ ꓟꓬꓱꓺ ꓔ ꓟ ꓡꓳ ꓒꓱ ꓕꓲ ꓟ ꓙꓳˍ ꓡꓳ= ꓬꓲ ꓪ ꓐꓴ ꓖꓳ ꓗꓪ ꓛꓲ ꓬꓰˍ ꓐꓰ ꓬꓰˍ ꓕꓯ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓟ ꓡ ꓞꓳ ꓐꓴ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓮ ꓘꓶꓸ ꓙꓳꓺ ꓡꓰ ꓠꓬꓲ ꓟꓯꓼ ꓓꓶꓽ ꓡꓯꓽ ꓘꓳ ꓠꓹ ꓟ ꓬꓰˍ ꓡꓳ=

ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓟꓯꓼ ꓓꓶꓽ ꓡꓯꓽ ꓘꓳˍ ꓟ ꓗꓪ ꓟꓽ ꓙꓰ ꓕꓯ ꓬꓲ ꓪ ꓐꓴ ꓠꓬ ꓘꓶꓽ ꓫꓵꓽ ꓝꓲꓸ ꓖꓶꓽ ꓑꓱꓸ ꓙꓰˍ ꓡꓳ= ꓘꓶꓽ ꓫꓵꓽ ꓝꓲꓸ ꓖꓶꓽ ꓠꓬ ꓬꓲ ꓑꓶꓸ ꓗꓪ ꓢꓲꓹ ꓓ ꓠꓬꓲꓽ ꓓ ꓗꓳꓸ ꓔ ꓢꓲ ꓫꓵꓻ ꓡꓰ ꓑꓲꓸ ꓔ ꓟ ꓢꓲꓸ ꓒꓬꓸ ꓝꓲꓸ ꓖꓶꓽ ꓥ ꓡꓳ=ꓖꓳ ꓟ ꓘꓴꓽ ꓗꓪ ꓠꓬ ꓙꓵꓽ ꓗ 10 ꓙꓰꓽ ꓐꓳ ꓔ ꓟ ꓡꓳꓺ ꓒꓬꓸ ꓠꓬꓲꓽ ꓒꓬꓸ ꓓꓵˍ ꓡꓳ= ꓝꓲꓸ ꓖꓶꓽ ꓖꓳ ꓟ ꓠꓬ ꓪꓴ-ꓢ ꓬꓲ ꓪ ꓐꓰ ꓕꓲ ꓪꓺꓽ ꓔꓬ ꓟ ꓬꓲ ꓪ ꓐꓴ ꓔꓯ ꓐꓯ ꓖꓶ ꓔꓬ ꓟ ꓥꓳ=

ꓬꓲ-ꓢꓷ-ꓡꓰ ꓐꓴ ꓔꓯ ꓗꓽ ꓕ ꓠꓹ ꓟ ꓐꓱ ꓶ ꓙꓱ-ꓡꓲ-ꓘꓳ ꓡꓳ ꓒꓱ ꓗ ꓘꓶ ꓓꓴꓽ ꓐꓴ ꓠꓬ ꓚꓵꓸ ꓗꓷꓳ= ꓟꓯꓼ ꓓꓶꓽ ꓡꓯꓽ ꓘꓳꓹ ꓟ ꓦꓬꓼ ꓠꓬ ꓠꓶꓽ ꓡ ꓔꓬ ꓕꓯ ꓪꓴ-ꓢ ꓠꓬ ꓬꓳ-ꓫꓴ ꓔꓯ “ꓥꓪ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓠꓴ ꓔꓯ ꓖꓶˍ ꓥꓳ= ꓠꓴ ꓐꓰ ꓠꓴ ꓑ ꓫꓬ ꓐꓴ ꓥꓪ ꓐꓯ ꓘꓶꓽ ꓔꓯ ꓖꓼ ꓛꓳˍ ꓠꓬ꓾ ꓡꓳ ꓒꓱ ꓗꓪ ꓟ ꓪ ꓔꓲ ꓐꓰ ꓬꓲ ꓪ ꓟꓯꓼ ꓐꓴ ꓔꓯ ꓠꓴ ꓔꓯ ꓟ ꓗꓷ ꓡꓰ ꓝꓲˍ ꓥꓳ” ꓐꓰ ꓐꓯ ꓖꓶˍ ꓡꓳ=

ꓬꓳ-ꓫꓴ ꓠꓬꓪꓴ-ꓢ ꓐꓯ ꓖꓶ ꓡˍ ꓟ ꓔꓯ ꓛꓳ ꓢꓲ ꓔꓲ ꓒ 7 ꓣꓳ꓾ ꓬꓲ ꓑ ꓫꓬ ꓐꓴ ꓐꓰ ꓘꓶꓽ ꓫꓵꓽ ꓝꓲ ꓖꓶ ꓔꓯꓹ ꓢꓲ ꓟꓯꓼ ꓓꓶꓽ ꓡꓯ ꓘꓳ ꓠꓹ ꓟ ꓙꓰˍ ꓡꓳ= ꓪꓴ-ꓢ ꓡꓰ ꓐꓯ ꓔ ꓟ ꓕꓲ ꓡꓰꓹ ꓬꓲ ꓪ ꓐꓴ ꓠꓬ ꓡꓳ ꓒꓱ ꓔꓯ 6 ꓠꓬꓲ ꓚꓳꓺ ꓗꓷꓳ=

ꓫꓵꓽ ꓠꓬꓲ ꓕꓲ ꓠꓬꓲ ꓟ ꓠꓯꓼ ꓗꓪ ꓬꓲ ꓪ ꓐꓴ ꓠꓬ ꓡꓳ ꓒꓱ ꓔꓯ 7 ꓧꓪꓹ ꓚꓳ ꓙꓰˍ ꓡꓳ= ꓫꓵꓽ ꓧꓪꓹ ꓕꓲ ꓧꓪꓹ ꓕꓯ ꓔꓲ ꓒ ꓐꓴ ꓠꓬ ꓮ ꓣꓳ ꓑ ꓪꓴꓸ ꓛꓲ ꓮ ꓫꓵꓸ ꓫꓵ ꓐꓰ ꓟꓵˍ ꓟ ꓔꓯ ꓑ ꓫꓬ ꓐꓴ ꓑ ꓙˍ ꓕꓯ ꓬꓲ ꓪ ꓐꓴ ꓠꓬ ꓢꓯꓼ ꓓꓽ ꓟ ꓡꓰ ꓘꓴ ꓔꓴ ꓡˍ ꓡꓳ= ꓖꓳ ꓕꓯ ꓡꓳ ꓒꓱ ꓚꓬꓹ ꓮꓽ ꓙꓵꓽ ꓐꓱꓽ ꓙꓰˍ ꓡꓳ= ꓑ ꓫꓬ ꓐꓴ ꓠꓬ ꓡꓳ ꓒꓱ ꓘꓴꓽ ꓗꓪ ꓓꓵꓽ ꓙꓰ ꓢꓲ ꓡꓳ ꓒꓱ ꓔꓯ ꓣꓴˍ ꓡꓳ=

ꓙꓱ-ꓡꓲ-ꓘꓳ ꓡꓳ ꓒꓱ ꓔꓯ ꓣꓴ ꓟꓶ ꓡꓰ ꓗꓸ ꓠꓯꓸ ꓬꓳ-ꓫꓴ ꓐꓰ ꓬꓲ ꓑ ꓫꓬ ꓐꓴ ꓠꓬ ꓡꓳ ꓒꓱ ꓮꓽ ꓟꓬꓹ ꓔꓯ ꓓꓶꓽ ꓧꓪꓸ ꓡꓰ ꓗꓷ ꓢꓲ꓾ ꓬꓲ-ꓢꓷ-ꓡꓰ ꓐꓴ ꓟꓬꓱꓺ ꓓꓳꓽ ꓮ ꓘꓶꓸ ꓙꓳ ꓡˍ ꓡꓳ=

ꓖꓳ ꓗꓸ ꓠꓯ ꓬꓲꓸ ꓘꓳꓼ ꓮꓽ ꓟꓬꓹ ꓙꓳ ꓡˍ ꓕꓯ ꓬꓳ-ꓫꓴˍ ꓟꓲ ꓞꓲꓼ ꓟꓳꓽ ꓡˍ ꓟ ꓡꓰꓽ ꓟꓽ ꓞꓲꓺ ꓬꓲ-ꓢꓷ-ꓡꓰ ꓐꓴ ꓔꓯ ꓧꓳꓽ ꓣꓱꓽ ꓟ ꓗꓪ ꓫꓸ ꓓꓴ ꓮꓽ ꓟꓬꓹ ꓔꓳꓹ ꓜꓳꓽ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ-ꓢꓷ-ꓡꓰ ꓞꓳ ꓪꓳꓼ ꓐꓴ ꓔꓯ ꓫꓱ-ꓘꓷ-ꓟꓷ ꓡꓳ ꓒꓱ ꓗꓪ ꓜꓲꓼ ꓡ ꓝꓲ ꓢꓲ ꓾ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓽ ꓠꓹ ꓟ ꓐꓰ ꓪꓴ-ꓢ ꓡꓰ ꓐꓯ ꓖꓶ ꓡˍ ꓟ ꓮꓽ ꓙꓵꓽ ꓔꓯ ꓛꓳ ꓠꓹ ꓟ ꓐꓯ ꓖꓶˍ ꓡꓳ= ꓝꓮꓲ ꓬꓲ ꓡꓰ “ꓠꓴ ꓪ ꓪꓴ-ꓢ ꓔꓯ ꓣꓱꓽ ꓙ ꓠꓲꓹ ꓟꓽ ꓫꓵ ꓠꓬ ꓠꓴ ꓪ ꓠꓲꓹ ꓫꓵˍ ꓟ ꓪꓴ-ꓢ ꓔꓯ ꓠꓴ ꓪ ꓣꓱꓽ ꓙ ꓓˍ ꓡꓳ= ꓖꓳ ꓡꓱ ꓥˍ ꓟꓲ ꓥꓪ ꓐꓰ ꓥꓪ ꓕꓲ ꓦꓲ ꓢꓴ ꓠꓬ ꓪꓴ-ꓢ ꓔꓯ ꓡꓰꓽ ꓦ ꓡꓱˍ ꓥꓳ꓾ ꓬꓲ ꓔꓯ ꓡꓰꓽ ꓣꓱꓽ ꓙˍ ꓥꓳ꓾” ꓐꓰ ꓐꓯ ꓖꓶˍ ꓡꓳ=

ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ ꓪꓴꓸ ꓠꓬꓲ ꓬꓲ ꓪ ꓐꓴ ꓠꓬ ꓪꓴ-ꓢ ꓔꓯ ꓡꓳꓺ ꓗꓷˍ ꓟ ꓐꓰ ꓠꓱꓸ ꓐꓯꓼ ꓢꓲꓺ ꓔꓯ ꓪꓴꓸ ꓓꓵ ꓕꓱꓽˍ ꓟ ꓔꓯ ꓮ ꓕꓯ ꓟꓲ ꓟꓽ ꓬꓰ ꓐꓰ ꓾ ꓬꓳ-ꓫꓴ ꓔꓯ ꓪꓵꓼ ꓘꓶꓽ ꓖꓶˍ ꓡꓳ= ꓬꓲ ꓪ ꓐꓴ ꓔꓯ ꓬꓲ-ꓙꓲ ꓡꓯꓽ ꓒꓯꓹ ꓗꓪ ꓐꓰ ꓚꓬꓴꓸ ꓙ ꓗꓷ ꓟ ꓠꓬ ꓪꓴ-ꓢ ꓡꓰꓽ ꓥ ꓟ ꓬꓲ ꓪ ꓐꓴ ꓢꓷˍ ꓡꓳ=

ꓝꓮꓲ ꓬꓳ-ꓫꓴ ꓡꓰ ꓬꓲꓸ ꓪ ꓐꓴ ꓔꓯ ꓬꓲꓸ ꓪ ꓠꓬ ꓠꓱꓸ ꓐꓯꓼ ꓪꓴ-ꓢ ꓔꓯ ꓦ ꓡꓱ ꓔꓬˍ ꓕꓯ ꓠꓽ ꓪꓴ-ꓢ ꓬꓲꓸ ꓪ ꓝꓴꓲꓸ ꓔꓯ ꓟꓽ ꓖꓼ ꓖꓶꓽ ꓳ ꓐꓰ ꓐꓯˍ ꓡꓳ= ꓬꓲꓸ ꓪ ꓐꓴ ꓪꓴ-ꓢ ꓔꓯ ꓡꓳ ꓒꓰ ꓗꓷ ꓕꓯ ꓠꓽ ꓪꓴ-ꓢ ꓠꓬ ꓝꓴꓲꓸ ꓪꓽ ꓒꓵꓽ ꓖꓶꓽˍ ꓥꓳ ꓐꓰ ꓐꓯˍ ꓡꓳ= ꓬꓲ-ꓢꓷ-ꓡꓰ ꓡꓽ ꓞꓳ ꓐꓴˍ ꓟꓲ ꓪꓴ-ꓢ ꓔꓯ ꓡꓰ ꓦ ꓡꓱˍ ꓥꓳ꓾ ꓪꓴ-ꓢ ꓙꓵꓽ ꓗ ꓔꓯˍ ꓡꓰꓽ ꓒꓵꓽ ꓛꓳˍ ꓥꓳ ꓐꓰ ꓐꓯˍ ꓡꓳ= ꓖꓳ ꓡꓱ ꓠꓬꓲ꓾ ꓬꓳ-ꓫꓴ ꓡꓰ ꓬꓲꓸ ꓪ ꓐꓴ ꓔꓯ ꓢꓲꓺ ꓐꓬꓱꓽ ꓥ ꓕ ꓑꓳꓸꓼ ꓔꓯ ꓣꓴ ꓦ ꓗꓷ ꓢꓲ꓾ ꓪꓴ-ꓢ ꓔꓯ ꓡꓰ ꓦ ꓡꓱ ꓝꓲˍ ꓡꓳ= ꓬꓲ-ꓢꓷ-ꓡꓰ ꓑ ꓫꓬ ꓐꓴˍ ꓟꓲ꓾ ꓬꓳ-ꓫꓴ ꓐꓯ ꓘꓶꓽ ꓮ ꓙꓵꓽ ꓔꓯ ꓠꓹ ꓡꓳꓸ ꓢꓲ꓾ ꓖꓼ ꓛꓳˍ ꓡꓳ=