ꓟꓷꓽ ꓠꓷꓹ ꓝꓸ ꓒ ꓮ-ꓐ-ꓡ-ꓦ ꓟꓸ ꓟꓲꓽ (1) ꓕꓱꓻ

ꓬꓲꓻ ꓙꓬ ꓓꓽ ꓟ ꓙꓵꓽ ꓟꓶꓸˍ ꓟ ꓗꓪ ꓐꓰ ꓚꓬꓴ ꓓꓳ ꓟꓶ ꓗꓷ ꓗꓸ ꓠꓯ ꓾ ꓪꓴ-ꓢ ꓡꓰ ꓠꓳ-ꓪ ꓔꓯ ꓪꓵꓼ ꓘꓶꓽ ꓖꓶ ꓗꓷ ꓟ ꓕꓲ ꓡꓰꓹꓼ ꓠꓳ-ꓪ ꓞꓲꓼ ꓤ ꓡꓯꓹ ꓤ ꓮ ꓟꓬꓹ ꓟꓬꓽ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓞꓳ ꓤ ꓐꓴ ꓠꓬ ꓟꓬꓱꓺ ꓓꓳꓽ ꓧꓪ ꓢꓲ ꓚꓲꓸ ꓛꓬ ꓐꓱ ꓶ ꓡꓰ ꓚꓲꓸ ꓛꓬ ꓓꓵꓽ ꓙˍ ꓟ ꓠꓲꓹ ꓟ ꓡꓰꓽ ꓐꓲ ꓓˍ ꓡꓳ= “ꓠꓬꓲꓸ ꓠꓬꓲ ꓗꓪ ꓣꓳꓽ ꓠꓬ ꓮ ꓘꓶꓸ ꓪꓽ ꓠꓬꓲ ꓡꓺ ꓳ꓾ ꓣꓳꓽ ꓕꓯ ꓢꓲ ꓗꓪ ꓪꓴ-ꓢ ꓕꓲ ꓣꓳˍ ꓡꓰ ꓔꓬ ꓳ =ꓣꓳ ꓠꓬ ꓕꓲ ꓠꓲꓹ ꓕꓲ ꓪ ꓬꓰ ꓢꓲ ꓪꓴ-ꓢ ꓕꓯ ꓢꓲ ꓪꓴꓽˍ ꓟ ꓡ ꓞꓳ ꓒꓬꓱꓼ ꓡ ꓠꓹ ꓟ ꓬꓰ ꓡꓯ= ꓟꓴꓽ ꓗꓪ ꓗꓪ ꓛꓲ ꓬꓰ ꓠꓹ ꓟ ꓟꓵꓽ ꓔꓳꓹ ꓤꓶ ꓕꓲ ꓟ ꓫꓬꓹ ꓡꓯ꓾” ꓐꓯ ꓢꓲ ꓟꓵꓽ ꓔꓳꓹ ꓤꓶ ꓫꓬꓹ ꓪꓴꓸ ꓔꓴˍ ꓡꓳ= ꓬꓲ ꓪ ꓐꓴ ꓠꓬ ꓞꓽ ꓛꓬ ꓣꓱꓽ ꓢꓲ ꓕꓲ ꓝꓸ ꓑꓶꓸ ꓕꓲ ꓝꓸ ꓟꓴ ꓡ ꓠ ꓫꓬꓹ ꓡꓳ=

ꓖꓳ ꓡꓱ ꓥˍ ꓟꓲ ꓪꓴ-ꓢ ꓡꓰ ꓖꓳ ꓟ ꓔꓯ ꓟꓳ ꓗꓷ ꓕꓯ ꓞꓳ ꓤ ꓐꓴ ꓬꓰ ꓔꓬ ꓟ ꓠꓬ ꓥꓳꓽ ꓡꓰ ꓓꓴ ꓡꓰꓽ ꓬꓰ ꓔꓬ ꓟ ꓔꓯ ꓢꓷˍ ꓠꓬꓲ ꓾ ꓬꓲ ꓪ ꓐꓴ ꓠ ꓠꓹ ꓟꓽ ꓗꓴꓸ ꓠꓹ ꓟ ꓬꓲ ꓪ ꓥꓳꓽ ꓔꓯ ꓗꓪꓺ ꓡꓰ ꓝꓲˍ ꓡꓳ=ꓗꓸ ꓠꓯꓸ ꓬꓲ ꓪ ꓐꓴ ꓠꓬ ꓕꓲ ꓣꓳ ꓫꓸ ꓕꓱ ꓘꓶꓽ ꓔꓯ ꓝꓮꓲ ꓕꓲ ꓣꓳ ꓟꓽ ꓢꓷꓸ ꓾ ꓠ ꓠꓹ ꓟ ꓗꓴꓸ ꓗꓷ ꓡꓰ ꓠꓬꓲ ꓬꓲꓸ ꓪ ꓐꓴ ꓠꓬ ꓟꓵꓽ ꓔꓳꓹ ꓤꓶ ꓫꓬꓹ ꓟ ꓗꓪ ꓐꓰ ꓠꓽ ꓗꓷꓳ= ꓡꓳ ꓒꓱ ꓖꓳ ꓟ ꓔꓯˍ ꓟꓲ ꓐ-ꓐꓷ ꓐꓰ ꓟꓬꓱꓺ ꓖꓶˍ ꓡꓳ= ꓐ-ꓐꓷ ꓐꓯˍ ꓟ ꓠꓬ ꓥꓳꓽ ꓫꓵꓽ ꓥꓳꓽ ꓙꓰꓽ ꓗꓪꓺ ꓡꓰ ꓢꓲ ꓾ ꓕꓲ ꓣꓳ ꓫꓸ ꓕꓱ ꓟ ꓔꓯ ꓕꓲ ꓣꓳ ꓟꓽ ꓙꓽ ꓙꓲꓼ ꓟ ꓔꓯ ꓐꓯˍ ꓟ ꓥꓳ=

ꓠꓳ-ꓪ ꓦꓬꓼ ꓠꓬꓲ ꓖꓴ ꓡꓰ ꓢꓲ ꓬꓲꓸ ꓘꓳꓼ ꓟꓶ ꓤ ꓗꓳꓸ ꓗꓷ ꓗꓸ ꓠꓯꓸ ꓮ-ꓐ-ꓡ-ꓦ ꓐꓯˍ ꓟ ꓡ ꓞꓳ ꓕꓲ ꓣꓳ ꓓꓳ ꓡˍ ꓡꓳ= ꓬꓲꓸ ꓠꓬ ꓮ ꓣꓳ ꓜꓴ ꓐꓰ ꓟꓶ ꓔꓶꓸ ꓦꓲ ꓮ ꓟꓬꓹ ꓙꓳ ꓢꓲ ꓒꓴ ꓤ ꓫꓵ ꓤ ꓮ ꓟꓬꓹ ꓙꓳˍ ꓟ ꓞꓳ ꓐꓳ ꓓꓽ ꓟ ꓕꓲ ꓣꓳ ꓾ ꓞꓳ ꓙꓲꓻ ꓞꓳ ꓔꓱꓹ ꓕꓲ ꓣꓳꓥ ꓡꓳ= ꓬꓲ ꓠꓬ ꓬꓲ ꓤ ꓟꓶꓻ ꓢ-ꓣ-ꓬ ꓐꓰ ꓕꓲ ꓪꓺꓽ ꓧ-ꓣ-ꓠ ꓟꓵꓽ ꓗꓪ ꓔꓬ ꓡꓳ= ꓮ-ꓐꓷ-ꓡ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓕꓲ ꓣꓳ ꓥꓡꓳ= ꓖꓳ ꓡꓱ ꓥ ꓟꓲ ꓬꓲ ꓔꓯ ꓤ ꓠꓱ ꓕꓲ ꓣꓳˍ ꓟꓲ ꓟꓽ ꓙꓳ=

ꓕꓲ ꓠꓬꓲ ꓙꓳˍ ꓕꓯ ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ ꓫꓸ ꓕꓱ ꓡˍ ꓡꓳ= “ꓠꓴ ꓠꓬ ꓠꓴ ꓟꓵꓽˍ ꓐꓰ ꓠꓴ ꓫꓵꓽ ꓠꓴ ꓧꓪˍ ꓐꓰ꓾ ꓠꓴ ꓐꓹ ꓐ ꓕꓲ ꓦꓲ ꓢꓴ ꓔꓯ ꓧꓹ ꓔ ꓬꓰ ꓢꓲ ꓠꓴ ꓔꓯ ꓥꓪ ꓟꓳꓸ ꓖꓶ ꓠꓹ ꓟ ꓟꓵꓽ ꓗꓪ ꓙꓰ= ꓠꓴ ꓙꓰˍ ꓠꓬ ꓥꓪ ꓡꓰ ꓠꓴ ꓔꓯ ꓶꓼ ꓛꓳ ꓫꓱꓹ ꓛꓳ ꓝꓲ ꓢꓲ꓾ ꓠꓴ ꓞꓲꓼ ꓤ ꓡꓯꓹ ꓤ ꓟꓬꓽ ꓡ ꓝꓲ ꓢꓲ ꓠꓬꓲ ꓞꓳ ꓜꓴ ꓓꓽ ꓟ ꓒꓬꓱꓼ ꓡ ꓝꓲˍ ꓥꓳ= ꓠꓴ ꓟꓬꓱ ꓓꓳꓽ ꓔꓯˍ ꓟꓲ ꓪꓴꓽ ꓡ ꓝꓲˍ ꓥꓳ= ꓢꓴˍ ꓟꓲ ꓠꓴ ꓗꓪ ꓐꓰ ꓶꓼ ꓛꓳ ꓫꓱꓹ ꓛꓳˍ ꓥꓳ꓾” ꓐꓯ ꓖꓶˍ ꓡꓳ=

ꓖꓳ ꓕꓯ ꓮ-ꓐ-ꓡ-ꓦ ꓠꓬ ꓪꓴ-ꓢ ꓬꓲ ꓔꓯ ꓕꓵꓼ ꓪ ꓖꓶˍ ꓟˍ ꓡꓰ ꓐꓰ꓾ ꓧ-ꓣ-ꓠ ꓗꓪ ꓐꓰ ꓓꓳ ꓙꓰˍ ꓡꓳ= ꓬꓲ ꓤ ꓟꓶꓻ ꓢ-ꓣ-ꓬ ꓐꓰ ꓬꓲ ꓤ ꓓꓴ ꓡꓳ-ꓔꓷˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ= ꓬꓲ ꓪ ꓐꓴ ꓐꓰ ꓕꓲ ꓪꓽ ꓮꓸ ꓣꓳ꓾ ꓮꓸ ꓟꓴꓽ ꓐꓰ ꓕꓳ ꓡ ꓟꓴꓽ ꓐꓴ ꓔꓯ ꓧꓳꓽ ꓔꓯꓹ ꓙꓰˍ ꓡꓳ= ꓬꓲꓸ ꓪ ꓐꓴ ꓠꓬ ꓪ ꓚꓲꓺ ꓪ ꓐꓽ  ꓗꓳꓸ ꓢꓲ ꓮ ꓟꓬꓹ ꓠꓬꓲ ꓙꓰ ꓗꓷꓳ= ꓬꓲ ꓪ ꓐꓴ ꓦꓰꓼ ꓟꓷˍ ꓕꓯ ꓢꓲꓹ ꓠꓯ ꓗꓪ ꓟ ꓢꓲꓹ ꓢꓶꓽ ꓡꓳ ꓢꓶꓽ ꓜꓽ ꓢꓲ ꓾ ꓬꓲꓻ ꓙꓬ ꓢꓲꓼ ꓡˍ ꓕꓯ ꓬꓲꓻ ꓙꓬ ꓡꓳꓺ ꓗꓪ ꓟ ꓬꓲꓻ ꓙꓬ ꓐꓴ ꓔꓯ ꓓꓽ ꓓꓳ ꓗꓷꓳ= ꓝꓮꓲ ꓠꓬ ꓬꓲ ꓪ ꓐꓴ ꓪꓴꓽ ꓧꓶ ꓡˍ ꓕꓯ ꓢꓲꓹ ꓜꓲ ꓔꓲꓺ ꓗꓪ ꓪꓴꓽ ꓧꓶ ꓠꓽ ꓗꓷꓳ= ꓬꓲ ꓪ ꓐꓴ ꓠꓬ ꓪꓴ-ꓢ ꓔꓯ ꓙꓵꓻˍ ꓢꓲ ꓪꓴ-ꓢ ˍ ꓟꓲ ꓬꓲ ꓪ ꓐꓴ ꓔꓯ ꓙꓻ ꓖꓴ ꓟꓳꓸ ꓖꓶˍ ꓡꓳ= ꓮ ꓟꓬꓹ ꓠꓬꓲ ꓙꓰ ꓗꓷ ꓗꓸ ꓠꓯ ꓬꓲ ꓪ ꓐꓴ ꓠꓬ ꓘꓷ-ꓠ ꓟꓵꓽ ꓗꓪ ꓛꓲꓺ ꓬꓰꓳ= ꓖꓳ ꓟ ꓠꓬ ꓪꓴ-ꓢ ꓡꓰ ꓕꓵꓼ ꓪ ꓖꓶ ꓔ ꓟ ꓟꓵꓽ ꓥꓳ=

ꓖꓳ ꓗꓪ ꓛꓲꓺ ꓬꓰ ꓠꓬ ꓬꓲ ꓪ ꓐꓴ ꓮ ꓘꓶꓸ ꓗꓹ ꓛꓲꓽ ꓡꓰ ꓢꓲ ꓪꓴ-ꓢ ꓔꓯ ꓫꓸ ꓟꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓗꓹ ꓛꓲꓽ ꓠꓲꓹ ꓠꓬ ꓟꓶ ꓤ ꓟꓽ ꓗꓷ ꓡꓰ= ꓟꓵꓽ ꓘꓴꓽ ꓗꓪ ꓟꓶꓽ ꓦ ꓟꓽ ꓦ ꓡ ꓠꓬꓲ ꓦꓰꓼ ꓟꓷꓼ ꓘꓳꓼ ꓓꓳ ꓡˍ ꓡꓳ= ꓖꓳ ꓕꓯ ꓮ-ꓐ-ꓡ-ꓦ ꓐꓴ ꓕꓲ ꓦꓲ ꓢꓴ ꓠꓬ ꓜꓽ ꓓꓴ ꓟꓽ ꓙꓳ ꓗꓷ ꓡꓰ ꓠꓬꓲ ꓬꓲ-ꓙꓲ ꓟꓵꓽ ꓗꓪ ꓬꓯꓼ ꓙꓰˍ ꓡꓳ=

ꓬꓲ-ꓙꓲ ꓟꓵꓽ ꓫꓸ ꓗ ꓬꓲ-ꓙꓲ ꓟꓵꓽ ꓘꓶꓽ ꓗꓪ ꓛꓲꓺ ꓬꓰˍ ꓕꓯ ꓮ-ꓐ-ꓡ-ꓦ ꓠꓬ ꓬꓲ ꓤ ꓟꓶꓻ ꓢ-ꓣ-ꓬ ꓔꓯ ꓾ “ꓠꓴ ꓠꓬ ꓞꓳ ꓐꓲꓻ ꓕꓲ ꓣꓳ ꓥ ꓠꓬꓲ꓾ ꓬꓲ-ꓙꓲ ꓡ ꓞꓳ ꓠꓴ ꓔꓯ ꓟꓳꓻ ꓢꓲ ꓥꓪ ꓤ ꓟꓶꓻ ꓥ ꓟ ꓬꓲ ꓪ ꓢꓷꓸ ꓡꓰ ꓠꓬ꓾ ꓥꓪ ꓔꓯ ꓢꓰꓼ ꓗꓷ ꓢꓲ ꓾ ꓠꓴ ꓔꓯ ꓠꓬ ꓬꓲ ꓪ ꓤ ꓟꓶꓻ ꓬꓰ ꓝꓲˍ ꓥꓳ= ꓖꓳ ꓡꓱ ꓠꓬꓲ ꓠꓴ ꓑꓶꓸ ꓓꓴ ꓟꓽ ꓙꓲ ꓟ ꓮ ꓫꓵꓽ ꓟꓽ ꓗꓷ ꓡꓰ ꓠꓹ ꓟˍ ꓐꓰ ꓠꓴ ꓗꓪ ꓐꓰ ꓥꓪ ꓢꓯꓸ ꓔꓬ ꓪ ꓠꓹ ꓟ ꓾ ꓠꓴ ꓠꓬ ꓥꓪ ꓠꓬꓲ ꓟ ꓥꓳ꓾ ꓐꓰ ꓐꓯ ꓛꓵˍ ꓡꓳ ꓾ ꓐꓰ ꓐꓯˍ ꓡꓳ=

ꓮ-ꓐ-ꓡ-ꓦ ꓾ ꓢ-ꓣ-ꓬ ꓐꓰ ꓡꓳ-ꓔꓷ ꓐꓴ ꓬꓲ-ꓙꓲ ꓟꓵꓽ ꓗꓪ ꓓꓵꓽ ꓙꓰ ꓠꓬ꓾ ꓢ-ꓣ-ꓬ ꓠꓽ ꓮ ꓘꓶꓸ ꓐꓲꓻˍ ꓟ ꓤ ꓟꓶ ꓤ ꓔꓲ ꓣꓳ ꓥ ꓟ ꓔꓯ ꓬꓲ-ꓙꓲ ꓡ ꓞꓳ ꓟꓳˍ ꓡꓳ= ꓖꓳ ꓡꓱ ꓢꓲ ꓪ ꓔꓲ ꓙ ꓗꓪ ꓟ ꓢꓲꓽ ꓒ ꓣꓱꓽ ꓙ ꓢꓴ ꓐꓴ ꓠꓬ ꓢ-ꓣ-ꓬ ꓮ ꓘꓶꓸ ꓐꓲꓻˍ ꓟ ꓓꓳꓽ ꓐꓯ ꓖꓶ ꓢꓲ ꓪ ꓔꓲ ꓦꓲ ꓗꓪ ꓧꓳꓽ ꓓꓵꓽ ꓙꓰˍ ꓡꓳ= ꓖꓳ ꓡꓱ ꓠꓬ ꓤ ꓟꓶ ꓤ ꓑꓶꓸ ꓓꓴ ꓩ-ꓣꓳ ꓡꓰ ꓮ-ꓐ-ꓡ-ꓦ ꓔꓯ ꓬꓲ ꓜꓶ ꓘꓳꓹ ꓣꓴ ꓢꓲ ꓮ ꓣꓳ ꓾ ꓮ ꓠꓬꓲꓽ꓾ ꓕꓳ ꓡ ꓟꓴꓽ ꓾ ꓚꓳ ꓑ ꓚꓳ ꓟˍ ꓐꓰ ꓡꓳꓽ ꓕꓳˍ ꓟꓲ ꓖꓶˍ ꓡꓳ=

ꓖꓳ ꓡꓱ ꓢꓲ ꓩ-ꓣꓳ ꓪ ꓔꓲ ꓠꓬ ꓢ-ꓣ-ꓬ ꓔꓯ ꓫ ꓠꓹ ꓟ ꓬꓰˍ ꓡꓳ=ꓮ-ꓐ-ꓡ-ꓦˍ ꓟꓲ ꓬꓲꓸ ꓔꓯ ꓢꓰꓼ ꓗꓷˍ ꓟꓲ ꓙꓳꓺˍ ꓟ ꓪꓴꓸ ꓠꓬꓲ ꓬꓲꓸ ꓤ ꓟꓶꓻ ꓢ-ꓣ-ꓬ ꓔꓯ ꓪ ꓔꓲ ꓔꓯ ꓖꓶꓽ ꓗꓷꓳ= ꓖꓳ ꓡꓱ ꓥˍ ꓟꓲ ꓩ-ꓣꓳˍ ꓐꓰ ꓬꓲ ꓕꓲ ꓦꓲ ꓢꓴ ꓔꓯ ꓪꓴ-ꓢ ꓡꓰ ꓠꓺ ꓓꓱꓽ ꓠꓻ ꓡ ꓝꓲˍ ꓡꓳ= ꓖꓳ ꓕꓯ ꓩ-ꓣꓳ ꓡꓰ ꓬꓲꓸ ꓠꓯ ꓞꓲꓼ ꓟꓸ ꓒ ꓔꓯ ꓘꓴ ꓔꓯꓹ ꓡ ꓢꓲ ꓾ ꓬꓲꓸ ꓖꓳ ꓓꓱꓽ ꓗꓪ ꓟ ꓠꓻ ꓔꓯ ꓫꓬꓹ ꓝꓲˍ ꓕꓯ ꓾ ꓠ ꓫꓬꓹ ꓒ ꓡꓰ ꓾ ꓢ-ꓣ-ꓬ ꓠꓬ ꓠꓴ ꓔꓯ ꓟ ꓟꓽ ꓥ꓾ ꓬꓲꓸ ꓠꓽ ꓕꓲ ꓣꓳ ꓣꓳ ꓔꓯ ꓟ ꓥ ꓡꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬ ꓩ-ꓣꓳ ꓪ ꓔꓲ ꓡꓰ ꓮ ꓘꓶꓸ ꓠꓲꓹ ꓟ ꓦꓶ ꓡꓰ ꓢꓲ ꓮ-ꓐ-ꓡ-ꓦ ꓔꓯ ꓬꓲ ꓟꓲꓽ ꓙꓬ ꓗꓪ ꓡ ꓠꓹ ꓟ ꓐꓯ ꓖꓶˍ ꓡꓳ=

ꓮ-ꓐ-ꓡ-ꓦ ꓛꓲꓺ ꓡˍ ꓕꓯ꓾ ꓠꓴ ꓠꓬ ꓥꓪ ꓔꓯ ꓮ ꓫꓵꓽ ꓬꓰ ꓖꓶˍ ꓟ ꓥ ꓡ? ꓬꓲ ꓠꓬ ꓠꓴ ꓤ ꓟꓶꓻ ꓥ ꓟ ꓥꓪ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓟꓽ ꓐꓯ ꓖꓶ ꓡ ꓡ? ꓬꓲ ꓠꓬ ꓠꓴ ꓠꓬꓲ ꓟ ꓥ ꓡꓳ ꓐꓯ ꓢꓲ ꓥꓪ ꓔꓯ ꓫ ꓝꓲˍ ꓡ? ꓕꓱ꓾ ꓠꓴ ꓤ ꓟꓶꓻ꓾ ꓮ ꓟꓶ ꓬꓲ ꓔꓯ ꓧꓳꓽ ꓔꓯ ꓹ ꓙꓰ ꓢꓲ ꓙꓰꓨꓽˍ ꓐꓯˍ ꓡꓳ= ꓖꓳ ꓡꓱ ꓠꓬ ꓩ-ꓣꓳ ꓡꓰ ꓬꓲ ꓡ ꓞꓳ ꓔꓯ ꓕꓵꓽ ꓪ ꓖꓶ ꓢꓲ꓾ ꓮ-ꓐ-ꓡ-ꓦˍ ꓐꓰ ꓬꓲ ꓤ ꓟꓶꓻˍ ꓐꓰ ꓬꓲ ꓙꓳˍ ꓟ ꓥ ꓕ ꓑꓳ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓓꓳ ꓙꓰ ꓝꓲˍ ꓡꓳ=

ꓖꓳ ꓡꓱ ꓠꓬꓲ ꓮ-ꓐ-ꓡ-ꓦ ꓠꓬ ꓬꓲ ꓕꓲ ꓦꓲ ꓢꓴ ꓐꓰ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰ ꓢꓲ ꓬꓲ ꓪ ꓐꓴ ꓠꓬ ꓪꓴ-ꓢ ꓙꓽ ꓖꓶ ꓔ ꓟ ꓟꓵꓽ ꓗꓪ ꓬꓲꓼ ꓙꓰˍ ꓡꓳ=ꓮ-ꓐ-ꓡ-ꓦ ꓠꓬ ꓙꓱꓽ ꓤˍ ꓐꓰ ꓒꓴ ꓤ ꓫꓵ ꓤ ꓮꓽ ꓟꓬꓹ ꓙꓳˍ ꓟ ꓞꓳ ꓐꓳ ꓓꓽ ꓟ ꓥ ꓡꓳ= ꓬꓲ ꓔꓯ ꓛꓳ ꓙꓰ ꓔꓬ ꓟ ꓡꓳ-ꓔꓷˍ ꓟꓲ ꓛꓵꓼ ꓜꓴ ꓣꓳ ꓜꓴˍ ꓐꓰ ꓟꓶ ꓔꓶꓸ ꓦꓲˍ ꓐꓰ ꓚꓳ ꓑ ꓚꓳ ꓟ ꓙꓳ ꓢꓴ ꓥ ꓡꓳ=

ꓖꓳ ꓡꓱ ꓢꓲ ꓮ-ꓐ-ꓡ-ꓦ ꓐꓰ ꓬꓲ ꓤ ꓓꓴ ꓡꓳ-ꓔꓷ ꓐꓴ ꓠꓬ ꓐꓳ ꓶꓽˍ ꓐꓰ ꓙꓱꓽ ꓤ ꓟꓬꓽˍ ꓠꓬꓲ ꓙꓱꓽ ꓤ ꓫꓵꓸ ꓖ ꓜꓽ ꓖꓴ ꓟꓽ ꓡꓳꓼ=

ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲꓽ ꓦꓲ ꓟ ꓙꓱꓽ ꓤ ꓡꓳꓸ ꓢꓴ ꓐꓴ ꓠꓬ ꓟꓽ ꓠꓽ ꓠꓽ ꓢꓯꓼ ꓡꓯꓼ ꓘꓳˍ ꓡꓳ=

ꓖꓳ ꓕꓯ ꓮ-ꓐ-ꓡ-ꓦ ꓡꓰ ꓡꓳ-ꓔꓷ ꓔꓯ꓾ “ꓣꓳ ꓠꓬ ꓫꓵꓽ ꓤ ꓧꓪ ꓤ ꓥ ꓠꓬꓲ꓾ ꓥꓪˍ ꓐꓰ ꓠꓴ ꓢꓰꓼ ꓡꓯꓽ ꓘꓳ ꓓꓴ ꓕꓽ ꓙꓳ ꓝꓲ ꓡꓯ= ꓥꓪ ꓙꓱꓽ ꓤ ꓡꓳꓸ ꓢꓴ ꓐꓰ ꓠꓴ ꓙꓱꓽ ꓤ ꓡꓳꓸ ꓢꓴˍ ꓟꓲ ꓢꓯꓼ ꓡꓯꓼ ꓘꓳ ꓓꓴ ꓕꓽ ꓙꓳ ꓝꓲ= ꓕꓱ ꓕꓲ ꓟꓵꓽ ꓡꓱꓸꓼ ꓣꓳ ꓮ ꓡꓲ ꓗꓪ ꓔꓬ ꓠꓲꓹ ꓫꓵˍ  ꓠꓬ ꓔꓬꓹ ꓓꓹ ꓡꓳ ꓟꓽ ꓥ ꓡ? ꓣꓳ ꓠꓬ ꓕꓲ ꓣꓳ ꓕꓲ ꓖ ꓔꓬ ꓠꓹ ꓟ꓾ ꓠꓴ ꓡꓯꓼ ꓶꓸ ꓔꓯ ꓟꓳꓸ ꓙꓰ ꓠꓲꓹ ꓫꓵˍ ꓠꓬ ꓥꓪ ꓠꓽ ꓡꓯꓼ ꓙ ꓔꓯ ꓟꓳꓸ ꓙꓰ ꓛꓵˍ ꓡꓳ= ꓠꓴ ꓡꓯꓼ ꓙ ꓔꓯ ꓟꓳꓸ ꓙꓰ ꓠꓲꓹ ꓫꓵˍ ꓠꓬ ꓥꓪ ꓠꓽ ꓡꓯꓼ ꓶꓸ ꓔꓯ ꓟꓳꓸ ꓙꓰ ꓛꓵˍ ꓡꓳ=

ꓖꓳ ꓡꓱ ꓠꓬꓲ ꓡꓳ-ꓔꓷ ꓡꓳꓸ ꓠꓬꓲ ꓠꓬ ꓬꓳ-ꓔ ꓓꓰ ꓟꓵꓽ ꓢꓳ-ꓪ ꓗꓪ ꓛꓲ꓾ ꓬꓲ-ꓓꓰ ꓐꓱ꓾ ꓥ ꓠꓬ ꓬꓲ-ꓙꓲ ꓟꓵꓽˍ ꓡꓰ ꓐꓰ ꓮ ꓡꓲ ꓗꓪˍ ꓟꓲ ꓬꓲꓻ ꓙꓬ ꓙꓳˍ ꓟ ꓡꓳꓸ ꓓꓳ ꓡˍ ꓡꓳ= ꓖꓳ ꓡꓱ ꓢꓲ ꓡꓳ-ꓔꓷ ꓠꓬ ꓚꓲ ꓛꓬꓽ ꓐꓱ ꓶ ꓬꓳ-ꓔ ꓬꓲꓽ ꓟ ꓓꓰ ꓟꓵꓽ ꓮ ꓙꓵꓽ ꓔꓯ ꓢꓲ ꓣꓴ ꓢꓲ ꓐꓶ ꓓꓳ ꓔꓯ ꓟꓳꓸ ꓚꓵꓸ ꓙꓰˍ ꓡꓳ= ꓮ-ꓐ-ꓡ-ꓦˍ ꓟꓲ ꓬꓲ ꓕꓲ ꓦꓲ ꓢꓴ ꓐꓰ ꓕꓲ ꓪ ꓧꓷ-ꓐꓴ-ꓠ ꓗꓪ ꓟ ꓟꓯ-ꓟꓷ ꓜꓲ ꓗꓪ ꓚꓵꓸ ꓙꓰˍ ꓡꓳ=