ꓟꓷꓽ ꓠꓷꓹ ꓝꓸ ꓒ ꓮ-ꓐ-ꓡ-ꓦ ꓟꓸ ꓟꓲꓽ (2) ꓕꓱꓻ

ꓮ-ꓐ-ꓡ ꓐꓰ ꓬꓲ ꓤ ꓓꓴ ꓡꓳ-ꓔꓷ ꓐꓴ ꓠꓬ ꓐꓳ ꓶꓽˍ ꓐꓰ ꓙꓱꓽ ꓤ ꓟꓬꓽˍ ꓠꓬꓲ ꓙꓱꓽ ꓤ ꓫꓵꓸ ꓖ ꓜꓽ ꓖꓴ ꓟꓽ ꓡꓳꓼ= ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲꓽ ꓦꓲ ꓟ ꓙꓱꓽ ꓤ ꓡꓳꓸ ꓢꓴ ꓐꓴ ꓠꓬ ꓟꓽ ꓠꓽ ꓠꓽ ꓢꓯꓼ ꓡꓯꓼ ꓘꓳˍ ꓡꓳ=

ꓖꓳ ꓕꓯ ꓮ-ꓐꓷ-ꓡ ꓡꓰ ꓡꓳ-ꓔꓷ ꓔꓯ꓾ “ꓣꓳ ꓠꓬ ꓫꓵꓽ ꓤ ꓧꓪ ꓤ ꓥ ꓠꓬꓲ꓾ ꓥꓪˍ ꓐꓰ ꓠꓴ ꓢꓰꓼ ꓡꓯꓽ ꓘꓳ ꓓꓴ ꓕꓽ ꓙꓳ ꓝꓲ ꓡꓯ= ꓥꓪ ꓙꓱꓽ ꓤ ꓡꓳꓸ ꓢꓴ ꓐꓰ ꓠꓴ ꓙꓱꓽ ꓤ ꓡꓳꓸ ꓢꓴˍ ꓟꓲ ꓢꓯꓼ ꓡꓯꓼ ꓘꓳ ꓓꓴ ꓕꓽ ꓙꓳ ꓝꓲ= ꓕꓱ ꓕꓲ ꓟꓵꓽ ꓡꓱꓸꓼ ꓣꓳ ꓮ ꓡꓲ ꓗꓪ ꓔꓬ ꓠꓲꓹ ꓫꓵˍ  ꓠꓬ ꓔꓬꓹ ꓓꓹ ꓡꓳ ꓟꓽ ꓥ ꓡ? ꓣꓳ ꓠꓬ ꓕꓲ ꓣꓳ ꓕꓲ ꓖ ꓔꓬ ꓠꓹ ꓟ꓾ ꓠꓴ ꓡꓯꓼ ꓶꓸ ꓔꓯ ꓟꓳꓸ ꓙꓰ ꓠꓲꓹ ꓫꓵˍ ꓠꓬ ꓥꓪ ꓠꓽ ꓡꓯꓼ ꓙ ꓔꓯ ꓟꓳꓸ ꓙꓰ ꓛꓵˍ ꓡꓳ= ꓠꓴ ꓡꓯꓼ ꓙ ꓔꓯ ꓟꓳꓸ ꓙꓰ ꓠꓲꓹ ꓫꓵˍ ꓠꓬ ꓥꓪ ꓠꓽ ꓡꓯꓼ ꓶꓸ ꓔꓯ ꓟꓳꓸ ꓙꓰ ꓛꓵˍ ꓡꓳ=

ꓖꓳ ꓡꓱ ꓠꓬꓲ ꓡꓳ-ꓔꓷ ꓡꓳꓸ ꓠꓬꓲ ꓠꓬ ꓬꓳ-ꓔ ꓓꓰ ꓟꓵꓽ ꓢꓳ-ꓪ ꓗꓪ ꓛꓲ꓾ ꓬꓲ-ꓓꓰ ꓐꓱ꓾ ꓥ ꓠꓬ ꓬꓲ-ꓙꓲ ꓟꓵꓽˍ ꓡꓰ ꓐꓰ ꓮ ꓡꓲ ꓗꓪˍ ꓟꓲ ꓬꓲꓻ ꓙꓬ ꓙꓳˍ ꓟ ꓡꓳꓸ ꓓꓳ ꓡˍ ꓡꓳ= ꓖꓳ ꓡꓱ ꓢꓲ ꓡꓳ-ꓔꓷ ꓠꓬ ꓚꓲ ꓛꓬꓽ ꓐꓱ ꓶ ꓬꓳ-ꓔ ꓬꓲꓽ ꓟ ꓓꓰ ꓟꓵꓽ ꓮ ꓙꓵꓽ ꓔꓯ ꓢꓲ ꓣꓴ ꓢꓲ ꓐꓶ ꓓꓳ ꓔꓯ ꓟꓳꓸ ꓚꓵꓸ ꓙꓰˍ ꓡꓳ= ꓮ-ꓐꓷ-ꓡˍ ꓟꓲ ꓬꓲ ꓕꓲ ꓦꓲ ꓢꓴ ꓐꓰ ꓕꓲ ꓪ ꓧꓷ-ꓐꓴ-ꓠ ꓗꓪ ꓟ ꓟꓯ-ꓟꓷ ꓜꓲ ꓗꓪ ꓚꓵꓸ ꓙꓰˍ ꓡꓳ=

ꓖꓳ ꓗꓸ ꓠꓯꓸ ꓪꓴ-ꓢ ꓠꓬ ꓮ-ꓐ-ꓡ-ꓦ ꓔꓯ ꓫꓸ ꓕꓱ ꓡˍ ꓡꓳ= “ꓠꓴ ꓠꓬ ꓟꓳꓻˍ ꓟ ꓥ ꓕ ꓑꓳꓸ ꓔꓯꓸ ꓡꓳꓸ ꓠꓬꓲ= ꓠꓴ ꓟꓳꓻ ꓓˍ ꓟ ꓟꓵꓽ ꓮ ꓙꓵꓽ ꓠꓬ ꓠꓴ ꓐꓰ ꓠꓴ ꓞꓲꓼ ꓤ ꓡꓯꓹ ꓤ ꓮ ꓙꓵꓽ ꓔꓯ ꓕꓲ ꓞꓲꓼ ꓞꓲ ꓑ ꓥꓪ ꓖꓶ ꓠꓯꓹ ꓟ ꓟꓵꓽ ꓥꓳ= ꓟꓲ ꓠꓯ ꓗꓪ ꓟ ꓠꓱꓸ ꓦꓱꓽ ꓧꓶꓽˍ ꓡꓰ ꓐꓰ ꓠꓴ ꓞꓲꓼ ꓤ ꓡꓯꓹ ꓤ ꓟꓬꓽ ꓡ ꓝꓲˍ ꓥꓳ= ꓠꓴ ꓙꓰ ꓛꓲꓺ ꓬꓰ ꓾ ꓫꓱꓽ ꓛꓲꓺ ꓬꓰˍ ꓟ ꓟꓲ ꓠꓯ ꓮ ꓙꓵꓽ ꓠꓴ ꓔꓯ ꓖꓶˍ ꓥꓳ꓾” ꓐꓯˍ ꓡꓳ=

ꓮ-ꓐ-ꓡ-ꓦ ꓐꓰ ꓢ-ꓣ ꓐꓴ ꓠꓬ ꓘꓷ-ꓠ ꓟꓵꓽ ꓗꓪ ꓢꓲ ꓡꓲ ꓐꓰ ꓬꓲꓸ ꓘꓳꓼ ꓮ ꓟꓬꓹ ꓗꓳꓸ ꓗꓷꓳ= ꓤ ꓠꓱ ꓙꓳ ꓡ ꓢꓲ ꓞꓳ ꓫꓵꓽ ꓮ ꓙꓵꓽ ꓐꓹ ꓐ ꓒꓬꓱꓼ ꓡꓰ ꓝꓲˍ ꓥꓳ ꓐꓰ ꓬꓲ ꓪ ꓐꓴ ꓔꓯ ꓐꓯ ꓖꓶ ꓗꓷ ꓥˍ ꓟꓲ꓾ ꓮ ꓟꓶ ꓗꓪ ꓛꓲ ꓬꓲ ꓪ ꓐꓴ ꓔꓯ ꓤ ꓠꓱ ꓕꓲ ꓣꓳˍ ꓟꓲ ꓟꓽ ꓙꓳ ꓡꓰ ꓢꓰꓽ=

ꓖꓳ ꓡꓱ ꓢꓲ ꓪꓴ-ꓢ ꓡꓰ ꓙ ꓟꓳ ꓘꓶꓽ ꓙꓳˍ ꓟ ꓡꓰ ꓐꓲꓺ ꓡꓰ ꓝꓲˍ ꓥꓳ ꓐꓰ ꓐꓯˍ ꓟ ꓔꓯ ꓬꓲꓸ ꓠꓲꓹ ꓟ ꓗꓪ ꓮ ꓘꓶꓸ ꓓꓵꓽ ꓙ ꓟꓶˍ ꓡꓳ= ꓖꓳ ꓕꓯ ꓪꓴ-ꓢ ꓠꓬ ꓬꓲ ꓔꓯ ꓝꓮꓲ ꓕꓲ ꓧꓪꓹ ꓫ ꓕꓱ ꓡˍ ꓡꓳ= “ꓟꓴꓽ ꓗꓪ ꓗꓪ ꓟ ꓗꓴꓺ ꓤ ꓔꓯ ꓵꓺ ꓠꓬꓲ꓾ ꓕꓱ ꓟ ꓠꓬ ꓠꓴ ꓔꓯ ꓙꓳ ꓡ ꓠꓯꓹ ꓟ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓥ ꓡꓳ꓾” ꓐꓯ ꓢꓲ꓾ ꓮ-ꓐ-ꓡ-ꓦ ꓬꓲꓸ ꓠꓲꓹ ꓫꓵˍ ꓟ ꓤ ꓕꓲ ꓣꓳ ꓟꓶˍ ꓟ ꓡꓰꓽ ꓟꓽ ꓞꓲꓺ ꓬꓲꓸ ꓔꓯ  ꓵ ꓖꓴ ꓟꓽ ꓓ ꓟ ꓟꓴꓽ ꓗꓪ ꓗꓪ ꓟ ꓗꓴ ꓤ ꓡꓪ ꓐꓰ ꓬꓲꓸ ꓔꓯ ꓞꓲꓼ ꓤ ꓡꓯꓹ ꓤ ꓮꓽ ꓟꓬꓹ ꓙꓳ ꓡˍ ꓟ ꓔꓯ꓾ ꓪꓴ-ꓢ ꓡꓰ ꓝꓮꓲ ꓕꓲ ꓧꓪꓹ ꓐꓯ ꓖꓶ ꓗꓷꓳ= ꓪꓴ-ꓢ ꓬꓲ ꓙ ꓟꓳ ꓘꓶꓽ ꓠꓬ ꓒꓬꓱꓼ ꓡ ꓟꓽ ꓓ ꓟˍ ꓡꓰ ꓐꓰ ꓗꓹ ꓥˍ ꓟꓲ꓾ ꓮ-ꓐ-ꓡ-ꓦ ꓠꓬ ꓖꓳ ꓟ ꓔꓯ ꓙꓵꓻ ꓢꓲ꓾ ꓬꓲ ꓙꓵꓻ ꓠꓲꓹ ꓗꓪ ꓐꓰ ꓪꓴ-ꓢ ꓟꓲꓽ ꓙꓬꓼ ꓗꓪ ꓔꓱꓹ ꓜꓳꓽ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ=