ꓟꓷꓽ ꓠꓷꓹ ꓝ ꓒ ꓓ-ꓠꓲ-ꓡꓰ ꓐꓰ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ

ꓬꓰ-ꓧꓳ-ꓬ-ꓘꓷ-ꓟꓷ ꓬꓴ-ꓔ ꓪ ꓔꓲ ꓣꓱꓽˍ ꓟ ꓢ ꓘꓳꓼ ꓕꓲ ꓘꓳ ꓗꓪ꓾ ꓐ-ꓐꓲ-ꓡꓶ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓡꓰ ꓙꓱ-ꓣꓴ-ꓢ-ꓡꓱ ꓔꓯ ꓓꓶꓽ ꓧꓪꓸ ꓡꓰ ꓢꓲ ꓬꓲ ꓡꓰ ꓢꓲꓽ ꓫꓬ ꓦꓲ ꓗꓪ ꓟ ꓡꓴꓻ ꓗꓶꓸ ꓡꓴ ꓟꓲ ꓔꓯ ꓔꓯꓹ ꓙꓰˍ ꓟ ꓡꓰ ꓟꓽ ꓞꓲ ꓬꓴ-ꓔ ꓞꓳ ꓫꓵꓽ ꓐꓴ ꓔꓯˍ ꓟꓲ ꓚꓳꓺ ꓑ ꓬꓰ ꓝꓲ ꓠꓹ ꓟ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰˍ ꓡꓳ=

ꓖꓳ ꓗ ꓠꓯꓹ ꓪ ꓔꓲ ꓡꓰ ꓙꓵꓽ ꓢꓲꓽ ꓒ ꓯ-ꓫꓵ-ꓒꓱ-ꓠ ꓔꓯ ꓬꓲ-ꓢꓷ-ꓡꓰ ꓞꓳ ꓪꓴꓽ ꓫꓵꓽ ꓗꓪ ꓐꓰ꓾ ꓛ ꓖꓴ ꓟꓽ ꓙꓳ ꓢꓲ ꓒꓬꓱꓽ ꓐꓲꓻ ꓖꓪ ꓜꓳꓽˍ ꓟ ꓐꓰ ꓙꓽ ꓗꓴꓸ ꓠꓲꓹ ꓐꓰ ꓢꓷꓸ ꓠꓲꓹ ꓙꓳˍ ꓟ꓾ ꓝꓮꓲ ꓠꓬ ꓢꓷꓸ ꓠꓲꓹ ꓢꓳ ꓝꓳ ꓢꓲ ꓙꓽ ꓜꓲꓼ ꓐ ꓡ ꓟ ꓤ ꓖꓴꓽ ꓡꓯꓸ ꓕꓲ ꓧꓳꓽ ꓢꓲ ꓓꓳ ꓡ ꓢꓲ꓾ ꓬꓲ ꓪ ꓔꓯ ꓐ-ꓐꓲ-ꓡꓶ ꓥꓳꓽˍ ꓐꓰ ꓕꓳ ꓶ ꓟꓸ ꓖꓶ꓾ ꓐꓰ ꓕꓵꓼ ꓪ ꓖꓶˍ ꓡꓳ=

ꓠꓬꓲꓽ ꓢ ꓠꓬꓲ ꓛꓲꓺ ꓕꓯ ꓬꓲ ꓪ ꓡꓰ ꓡꓳꓽ ꓔꓯꓹ ꓡ ꓗꓷ ꓟ ꓘꓴꓽ ꓗꓪ ꓐꓰ ꓙꓵꓽ ꓢꓲꓽ ꓒ ꓯ-ꓫꓵ-ꓒꓱ-ꓠ ꓡꓰ  ꓧꓪ ꓟꓶ ꓢꓴ ꓐꓴ ꓥ ꓟ ꓓ-ꓠꓲ-ꓡꓰ ꓾ ꓧ-ꓠ-ꓠ-ꓬ꓾ ꓟꓲ-ꓫ-ꓡ ꓐꓰ ꓱ-ꓢ-ꓡꓲ-ꓬ ꓬꓲ ꓪ ꓡꓲꓸ ꓣꓳ ꓔꓯ ꓧꓳꓽ ꓔ ꓢꓲ ꓪ ꓔꓲ ꓔꓬ ꓗꓪ ꓡˍ ꓡꓳ= ꓬꓲ ꓡꓰ꓾ ꓪ ꓔꓲꓳ꓾ ꓕꓱ ꓡꓲꓸ ꓣꓳ ꓠꓬ ꓣꓳ ꓡꓳꓽ ꓔꓯꓹ ꓡ ꓟ ꓘꓴꓽ ꓗꓪ ꓙꓽ ꓜꓲꓼ ꓠꓲꓹ ꓙꓳˍ ꓟ ꓢꓯꓼ ꓙꓳ ꓪ ꓠꓬꓲ ꓢꓴ ꓐꓴ ꓥ ꓡꓳ꓾ ꓐꓯ ꓖꓶˍ ꓡꓳ=

ꓖꓳ ꓕꓯ ꓪ ꓔꓲ ꓡꓰ꓾ ꓜꓳꓽˍ ꓥꓳ= ꓠꓹ ꓠ꓾ ꓠꓴ ꓪ ꓮꓽ ꓙꓵꓽ ꓠꓬ ꓪ ꓔꓲ ꓦꓲꓻ ꓗꓪ ꓙꓳˍ ꓟ ꓟꓽ ꓓ ꓙꓲˍ ꓟ ꓜꓽ ꓓꓴ ꓟꓶˍ ꓥꓳ= ꓠꓴ ꓪ ꓠꓬ ꓧꓪꓽ ꓜ ꓢꓲ ꓛꓱꓼ ꓡꓱꓼ ꓙꓵꓻ ꓓꓳ ꓢꓲ ꓠꓬꓲ ꓠꓴ ꓪ ꓔꓯ ꓘꓪꓽ ꓡ (ꓒꓸ ꓡ) ꓝꓲˍ ꓥꓳ= ꓖꓳ ꓕꓯ ꓓ-ꓠꓲ-ꓡꓰ ꓡꓰ ꓪ ꓔꓲꓳ ꓥꓪ ꓠꓴꓽ ꓔꓯ ꓠꓴ ꓔꓯ ꓣꓱꓽ ꓙ ꓠꓹ ꓟ ꓢꓲꓺ ꓖꓶˍ ꓟ ꓪꓴꓸ ꓠꓬꓲ ꓥꓪ ꓠꓴꓽ ꓮ ꓘꓶꓸ ꓗꓹ ꓛꓲˍ ꓡꓳ= ꓖꓳ ꓡꓱ ꓥˍ ꓟꓲ ꓠꓴ ꓔꓯ ꓕꓲ ꓫꓵꓽ ꓓꓰꓽ ꓓꓴ ꓙꓳˍ ꓡꓳ= ꓥꓪ ꓠꓴꓽ ꓜꓽ ꓟꓽ ꓓ ꓐꓰ ꓚꓬꓹ ꓔ ꓟ ꓜꓽ ꓫꓵꓽ ꓠꓬ ꓥꓪ ꓠꓴꓽ ꓔꓯ ꓕꓽ ꓜ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ=ꓘꓶꓽ ꓫꓵꓽ ꓡꓵ ꓗꓪ ꓞꓲ ꓒꓯꓹ ꓡꓲ ꓐꓽ ꓙꓳ ꓢꓲ ꓛꓲ ꓗꓪ ꓡꓯꓼ ꓗꓪ ꓡꓰ ꓫꓱꓽ ꓙꓰˍ ꓟ ꓮ ꓙꓵꓽ ꓔꓯ ꓟꓽ ꓫꓬ ꓚꓬꓹ ꓔ ꓟ ꓪꓴꓸ ꓠꓬꓲ ꓓ-ꓠꓲ-ꓡꓰ ꓠꓬ ꓪ ꓔꓲ ꓜꓽ ꓓꓴ ꓜ ꓗꓷ ꓠꓬ ꓟꓽ ꓫꓬ ꓗꓷ ꓡꓰ ꓠꓲꓹ ꓟꓽ ꓫꓵ ꓠꓬꓲ ꓪ ꓔꓲ ꓔꓯ ꓓꓰꓽˍ ꓟ ꓥ ꓡꓳ=( ꓡꓱ-ꓬꓲ=11ꓽ27)  ꓖꓳ ꓡꓱ ꓠꓬꓲ ꓪ ꓔꓲ ꓐꓰ ꓙꓵꓽ ꓢꓴ ꓐꓴ ꓠꓬ ꓬꓲ ꓪ ꓔꓯ ꓪꓳꓽ ꓒꓬꓽ ꓠꓲꓹ ꓛꓵꓼˍ ꓡꓰꓽ ꓖꓶ ꓜꓽˍ ꓡꓳ=

ꓪꓴ-ꓢ ꓡꓰ ꓤ ꓖꓴ ꓡꓯꓸ ꓡꓲꓸ ꓣꓳ ꓔꓯ ꓕꓳ ꓶ ꓢꓳˍ ꓟ ꓐꓰ ꓢꓷꓸ ꓠꓲꓹ ꓢꓳˍ ꓟ ꓗꓪ ꓙꓽ ꓗꓴꓸ ꓠꓲꓹˍ ꓐꓰ ꓙ ꓜꓲꓼ ꓠꓲꓹ ꓖꓶˍ ꓡꓳ= ꓓ-ꓠꓲ-ꓡꓰ ꓠꓽ ꓦ ꓐꓬꓱꓽˍ ꓐꓰ ꓬꓲꓼ ꓟꓬ ꓘꓳꓻˍ ꓟ ꓬꓲ ꓫꓵꓽ ꓬꓲ ꓙꓰꓽ ꓔꓯˍ ꓟꓲ ꓙꓽ ꓜꓲꓼ ꓐ ꓡ ꓢꓴ ꓥ ꓡꓳ= ꓓ-ꓠꓲ-ꓡꓰ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓢꓷꓸ ꓠꓲꓹ ꓢꓳ ꓓꓳ ꓡꓰ ꓠꓬ ꓬꓲ ꓪ ꓐꓴ ꓔꓯ ꓙꓵꓽ ꓢꓴ ꓐꓴ ꓡꓰ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓔꓬ ꓗꓪ ꓧꓳꓽ ꓙꓰˍ ꓡꓳ= ꓖꓳ ꓕꓯ ꓪ ꓔꓲ ꓡꓰ ꓬꓲ ꓪ ꓐꓴ ꓐꓰ ꓫ ꓕꓱ ꓡꓯ ꓘꓳ ꓗꓷ ꓠꓬ꓾ ꓤ ꓖꓴ ꓡꓯꓸ ꓐꓴ ꓗꓳ ꓡꓳ ꓗꓪ꓾ ꓓ-ꓠꓲ-ꓡꓰ ꓐꓰ ꓧ-ꓠ-ꓠ-ꓬ ꓐꓰ ꓟꓲ-ꓫ-ꓡˍ ꓐꓰ ꓱ-ꓢ-ꓡꓲ-ꓬ ꓔꓯ ꓖ ꓟꓶ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓪ ꓔꓲ ꓡꓰ ꓬꓲ ꓪ ꓔꓯ ꓠ ꓠꓬꓲˍ ꓟ ꓙꓽ ꓜꓲꓼ ꓠꓲꓹ ꓐꓰ ꓢꓷꓸ ꓠꓲꓹ ꓮ ꓡꓲ ꓕꓲ ꓫꓵꓽ ꓔꓯ ꓟꓳꓸˍ ꓟꓲ ꓬꓲ ꓪ ꓠꓬ ꓐ-ꓐꓲ-ꓡꓶ ꓕꓲ ꓗꓴꓷꓼ ꓡꓱꓸꓼ ꓗꓪ ꓟ ꓡꓯꓼ ꓕꓵ ꓢꓴˍ ꓐꓰ ꓗꓴ ꓤ ꓡꓳꓸ ꓗꓴ ꓢꓴ ꓥ ꓕ ꓑꓳꓸ ꓕꓯꓽ ꓢꓲ ꓞꓲ ꓝꓸ ꓙꓽ ꓜꓲꓼˍ ꓟ ꓔꓯ ꓪ ꓔꓲ ꓡꓳꓸ ꓓꓳ ꓡˍ ꓡꓳ=

ꓠꓱ-ꓐꓴ-ꓘꓹ-ꓠꓱ-ꓤ ꓪ ꓔꓲ ꓣꓱꓽˍ ꓟ ꓠꓬꓲꓽ ꓘꓳꓼ ꓕꓲ ꓘꓳꓼ ꓗꓪ ꓬꓲ ꓠꓬ ꓬꓲꓼ ꓟꓬ ꓕꓲ ꓟ ꓘꓳꓻ ꓗꓷ ꓢꓲ꓾ ꓬꓲ ꓓꓵꓽ ꓙ ꓟꓬꓽ ꓠꓬꓲ ꓬꓲꓼ ꓟꓶ ꓟꓽ ꓓ ꓗꓷ ꓡꓰꓳ= ꓝꓮꓲ ꓕꓲ ꓦꓬꓽ ꓬꓲꓼ ꓟꓶˍ ꓕꓯˍ ꓟꓲ ꓖꓳ ꓟ ꓔꓯ ꓡꓰ ꓬꓲꓼ ꓟꓬ ꓘꓳꓻ ꓡ ꓠꓬꓲ ꓮ ꓘꓶꓸ ꓓꓵꓽ ꓙ ꓟꓬꓽ ꓡꓰ ꓢꓲ ꓙꓵꓽ ꓢꓲꓽ ꓒ ꓔꓯ ꓘꓴ ꓢꓲ ꓗꓴꓷꓼ ꓘꓴꓽ ꓗꓪ ꓙꓳˍ ꓟ ꓥ ꓟꓬꓱꓽ ꓬꓰ ꓢꓴ꓾ ꓡꓯꓼ ꓕꓵ ꓗꓴꓸ ꓢꓴˍ ꓐꓰ ꓗꓴ ꓤ ꓡꓳꓸ ꓗꓴꓸ ꓢꓴ꓾ ꓓꓽ ꓫꓵ ꓒ ꓐꓴ ꓔꓯ ꓬꓲꓼ ꓟꓬ ꓖꓳ ꓟ ꓒꓶ ꓝꓲ ꓠꓹ ꓟ ꓘꓴ ꓔꓯꓹ ꓡ ꓝꓲˍ ꓡꓳ=

ꓬꓲ ꓪ ꓐꓴ ꓜꓲꓼ ꓛꓲ ꓡ ꓠꓬ ꓪ ꓔꓲ ꓡꓰ ꓬꓲ ꓪ ꓔꓯ꓾ ꓥꓪ ꓬꓲꓼ ꓟꓬ ꓕꓲ ꓟ ꓘꓳꓻ ꓗꓷ ꓟ ꓬꓲ ꓒꓶ ꓘꓶꓽ ꓟꓽ ꓢꓷꓸ ꓠꓬꓲ ꓥꓪ ꓠꓬ ꓠꓲꓹ ꓟ ꓫ ꓔꓬ ꓡꓳ= ꓥꓪ ꓠꓬ ꓬꓲꓼ ꓟꓬ ꓖꓳ ꓟ ꓬꓲ ꓒꓶ ꓘꓶꓽ ꓢꓷꓸ ꓠꓲꓹ ꓫꓵˍ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓗꓴ ꓤ ꓡꓳꓸ ꓗꓴꓸ ꓢꓴ ꓡꓰ꓾ ꓪ ꓔꓲꓳ꓾ ꓠꓴ ꓠꓬ ꓤꓶ ꓙꓳ ꓟꓯ ꓙꓳ ꓝꓲ= ꓠꓴ ꓬꓲꓼ ꓟꓬ ꓮ ꓡꓲ ꓘꓳꓻ ꓗꓷ ꓟ ꓠꓴ ꓚꓳ ꓑꓸ ꓐꓴ ꓥꓪ ꓠꓴꓽ ꓔꓯ ꓚ ꓟꓸ ꓖꓶ ꓡꓯ= ꓥꓪ ꓠꓴ ꓡꓰ ꓒꓶ ꓟꓸ ꓖꓶ ꓛꓵˍ ꓡꓳ꓾ ꓐꓰ ꓐꓯ ꓖꓶˍ ꓡꓳ=

ꓳꓧ ꓠꓴ ꓪ ꓠꓽ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓙꓳ ꓢꓴ ꓥ ꓟ ꓪꓴꓹ ꓠꓬꓲ ꓥꓪ ꓬꓲꓼ ꓟꓬ ꓮꓸ ꓫꓵꓽ ꓥ ꓟ ꓐꓰ ꓮꓸ ꓫꓵꓽ ꓔꓯ ꓐꓯ ꓟ ꓔꓯ ꓧꓶꓸ ꓕꓯ ꓒꓶ ꓟꓸ ꓖꓶ ꓡꓯ= ꓟꓽ ꓥ ꓠꓬ ꓠꓴ ꓪ ꓔꓯ ꓬꓲ ꓧꓶꓽ ꓕꓳꓹ ꓗꓷ ꓢꓲ ꓠꓴ ꓪ ꓦꓲˍ ꓟꓲ ꓒꓬꓹ ꓗꓷ ꓠꓹ ꓟ ꓥꓪ ꓓꓵꓽ ꓙ ꓞꓷꓹ ꓗꓷꓳ=ꓖꓳ ꓡꓱ ꓥˍ ꓟꓲ ꓠꓴ ꓪ ꓡꓰ ꓥꓪ ꓬꓲꓼ ꓟꓬˍ ꓐꓰ ꓬꓲ ꓒꓶ ꓘꓶꓽ ꓐꓯ ꓟꓸ ꓖꓶ ꓡˍ ꓠꓬ ꓠꓴ ꓪ ꓔꓯ ꓡꓯꓼ ꓫꓴ ꓐꓰ ꓒꓶ ꓒꓵꓽ ꓐꓰ ꓟꓬꓱ ꓓꓳꓽ ꓓꓽ ꓟ ꓟꓶ ꓡꓰ ꓝꓲˍ ꓥꓳ꓾ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓬꓲ ꓪ ꓐꓴ ꓡꓰ꓾ ꓪ ꓔꓲꓳ꓾ ꓠꓴ ꓬꓲꓼ ꓟꓬ ꓘꓳꓻ ꓗꓷ ꓟ ꓠꓴ ꓡꓰ ꓟꓽ ꓐꓯ ꓟꓸ ꓖꓶ ꓡ ꓠꓬ ꓮꓽ ꓟˍ ꓟꓲ ꓬꓲꓼ ꓟꓬ ꓒꓶ ꓟꓽ ꓐ ꓡ꓾ ꓫꓸ ꓟꓳ ꓠꓬꓲ ꓐꓯ ꓖꓶ ꓡꓯ꓾ ꓐꓰ ꓐꓯ ꓡꓳ= ꓖꓳ ꓕꓯ ꓪ ꓔꓲ ꓠꓬ ꓮ ꓘꓶꓸ ꓠꓲꓹ ꓟ ꓦꓶ ꓡꓰ ꓢꓲ꓾ ꓐ-ꓐꓲ-ꓡꓶ ꓗꓪ ꓟ ꓙꓽ ꓗꓴꓸ ꓠꓲꓹ ꓙꓳ ꓢꓴ ꓮ ꓙꓵꓽ ꓔꓯ ꓢꓰꓼ ꓗꓷ ꓠꓹ ꓟ ꓕꓵꓼ ꓪ ꓖꓶˍ ꓡꓳ=

ꓓ-ꓠꓲ-ꓡꓰ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓓꓳꓽ ꓕꓱ ꓟ ꓔꓯ ꓑ ꓙˍ ꓕꓯ꓾ ꓕꓱ ꓟ ꓠꓬ ꓙꓳꓺ ꓛꓱꓽ ꓓꓴ ꓧˍ ꓟ ꓓꓳꓽ ꓥꓳ= ꓪꓴ-ꓢ ꓡꓰ ꓫꓱꓸ ꓤ ꓢꓲ ꓬꓲꓼ ꓟꓬ ꓚꓵ ꓘꓶꓽ ꓟꓳꓸ ꓖꓶ ꓠꓹ ꓟ ꓓꓰꓽ ꓡꓯ꓾ ꓟꓽ ꓥ ꓠꓬ ꓫꓵꓽ ꓪꓴ ꓕꓱ ꓟ ꓗꓪ ꓐꓰ ꓝꓴꓲꓸ ꓟꓽ ꓙꓳ ꓢꓴ ꓮꓽ ꓙꓵꓽ ꓫꓵꓻ ꓖꓴˍ ꓥꓳ꓾ ꓐꓯ ꓢꓲ ꓬꓲ ꓪ ꓐꓴ ꓪꓽ ꓘꓴˍ ꓡꓳ= ꓖꓳ ꓡꓱ ꓠꓬ ꓟꓴ ꓗꓪ ꓗꓪ ꓟ ꓪꓴ-ꓢ ꓡꓰ ꓚꓵ ꓘꓶꓽ ꓖꓳ ꓟ ꓢ ꓘꓪ ꓕꓯ ꓦ ꓐꓬꓱꓽ ꓗꓪ ꓐꓰ ꓓ-ꓠꓲ-ꓡꓰ ꓔꓯ ꓟꓳꓸ ꓖꓶ ꓡˍ ꓡꓳ=

ꓖꓳ ꓗꓸ ꓠꓯꓸ ꓓ-ꓠꓲ-ꓡꓰ ꓠꓬ ꓪ ꓔꓲ ꓡꓰ ꓐ-ꓐꓲ-ꓡꓶ ꓗꓪ ꓟ ꓙꓽ ꓗꓴꓸ ꓠꓲꓹ ꓙꓳꓢꓴ ꓐꓴ ꓔꓯ ꓢꓰꓼ ꓢꓴ ꓢꓲ ꓚꓰꓸ ꓔ ꓟ ꓮ-ꓡꓲ-ꓪꓳ-ꓘꓶ ꓔꓬ ꓗꓪ ꓓꓵꓽ ꓙꓰ ꓢꓲ꓾ ꓐ-ꓐꓲ-ꓡꓶ ꓗꓪ ꓟ ꓙ ꓗꓴꓸ ꓠꓲꓹ ꓙꓳ ꓒ ꓐꓴ ꓔꓯ ꓕꓽ ꓢꓰꓼ= ꓥꓪ ꓔꓯ ꓪ ꓔꓲ ꓟꓲ ꓙꓬꓽ ꓗꓪ ꓠꓲꓹ ꓞ ꓧꓳꓽ ꓓꓵꓽ ꓙꓰ ꓡꓯ= ꓥꓪ ꓡꓰ ꓪ ꓔꓲ ꓔꓯ ꓬꓲ ꓬꓲꓼ ꓟꓬ ꓒꓶ ꓟꓸ ꓖꓶˍ ꓥꓳ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓮ-ꓡꓲ-ꓪꓳ-ꓘꓶ ꓡꓰ ꓓ-ꓠꓲ-ꓡꓰ ꓔꓯ ꓪ ꓔꓲ ꓟꓲ ꓙꓬꓽ ꓗꓪ ꓠꓲꓹ ꓞ ꓧꓳꓽ ꓓꓵꓽ ꓡꓰ ꓢꓲ꓾ ꓪ ꓔꓲꓳ꓾ ꓥꓪ ꓠꓬ ꓪꓳꓽ ꓞꓹ ꓟ ꓬꓴ-ꓔ ꓡ ꓞꓳ ꓗꓳ ꓡꓳ ꓗꓪ ꓠꓴ ꓬꓲꓼ ꓟꓬ ꓒꓶ ꓐ ꓡ ꓢꓴ ꓕꓲ ꓣꓳ ꓧꓪ ꓟꓶ ꓡꓰꓳ꓾ ꓐꓯ ꓖꓶˍ ꓡꓳ= ꓪ ꓔꓲ ꓡꓰ ꓓ-ꓠꓲ-ꓡꓰ ꓔꓯ ꓥꓪ ꓬꓲꓼ ꓟꓬˍ ꓐꓰ ꓬꓲ ꓒꓶ ꓘꓶꓽ ꓥꓪ ꓔꓯ ꓐꓯ ꓖꓶ ꓐ ꓡ ꓡ? ꓐꓯ ꓡꓳ= ꓚꓵ ꓘꓶ ꓒꓶ ꓟꓸ ꓖꓶ ꓢꓴ ꓠꓬ ꓥꓪ ꓟꓽ ꓥ꓾ ꓟꓴ ꓗꓪ ꓗꓪ ꓟ ꓪꓴ-ꓢ ꓥ ꓡꓳ= ꓬꓲ ꓠꓬ ꓚꓵ ꓘꓶ ꓟꓳꓸ ꓖꓶ ꓢꓴ ꓥ ꓡꓳ=

ꓪ ꓔꓲꓳ꓾ ꓠꓴ ꓠꓬ ꓬꓲꓼ ꓟꓬ ꓘꓳꓻˍ ꓗꓪ꓾ ꓪꓽ ꓠꓬꓲˍ ꓟ ꓐꓰ ꓮ ꓘꓶꓸ ꓐꓬꓱꓼ ꓡꓱꓼ ꓡꓱꓼ ꓟˍ ꓐꓰ ꓙꓳꓺ ꓦꓲꓸ ꓓꓴ ꓞꓳ ꓐꓬꓱꓽ ꓕꓲ ꓟ ꓠꓬ ꓠꓴ ꓟꓲ ꓙꓬꓽ ꓗꓪ ꓔꓳꓹ ꓞꓹ ꓟ ꓔꓯ ꓟꓳ ꓗꓷꓳ= ꓞꓳ ꓐꓬꓱꓽ ꓖꓳ ꓟ ꓬꓲ ꓪꓴꓸ ꓓꓵ ꓠꓬ ꓫꓵꓺ ꓫꓬ ꓥ ꓡꓳ=  ꓳ’ ꓟꓶꓽˍ ꓐꓰ ꓡꓯ ꓪꓵꓽ ꓠꓬ ꓒꓴ ꓥ ꓡꓳ= ꓦꓰꓼ ꓛꓲꓽˍ ꓐꓰ ꓒꓲꓽ ꓢꓰ ꓠꓬ ꓙꓲꓽ ꓥ ꓡꓳ= ꓛꓲ ꓪꓵꓽ ꓠꓬ ꓧꓳ ꓥ ꓡꓳ= ꓛꓲ ꓒꓯꓹ ꓠꓬ ꓧꓳˍ ꓐꓰ ꓠꓱꓸ ꓠꓲ ꓠꓴꓽ ꓦꓱꓹ ꓔ ꓟ ꓥ ꓡꓳ=

ꓠꓴ ꓡꓳꓸ ꓔꓬ ꓕꓯ꓾ ꓞꓳ ꓤ ꓡꓯꓽ ꓒꓯꓹ ꓡꓰ ꓟꓽ ꓜꓰ ꓔ ꓟ ꓭꓸ ꓛꓲ ꓕꓲ ꓘꓴꓸ ꓡꓰ ꓞꓳ ꓐꓬꓱꓽ ꓖꓳ ꓟ ꓗꓪ ꓟ ꓧꓳˍ ꓐꓰ ꓠꓱꓸ ꓠꓲ ꓠꓴꓽ ꓦꓱꓹ ꓔ ꓟ ꓛꓲ ꓒꓯꓹ ꓔꓯ ꓔꓲꓸ ꓬꓯꓼ ꓗꓷ ꓢꓲ ꓧꓶꓽ ꓡꓰꓳ= ꓖꓳ ꓕꓯ ꓧꓳˍ ꓐꓰ ꓠꓱꓸ ꓠꓲ ꓠꓴꓽˍ ꓐꓰ ꓙꓲꓽˍ ꓐꓰ꓾ ꓒꓴ ꓐꓰ ꓫꓵꓺ ꓮ ꓙꓵꓽ ꓠꓬ ꓕꓲ ꓡꓰꓹˍ ꓧꓶꓽ ꓡꓰ ꓢꓲ꓾ ꓜ ꓫ ꓝꓲꓸ ꓕꓯ ꓜ ꓗꓷ ꓓꓰ ꓗꓪ ꓟ ꓬꓲ ꓒꓲꓹˍ ꓡꓰ ꓐꓰ꓾ ꓬꓲ ꓧꓶꓽ ꓖꓳ ꓟ ꓧꓪ ꓟꓽ ꓟꓳ ꓠ ꓛꓲ ꓟꓲꓽ ꓦꓲ ꓡꓰ ꓙꓱꓼ ꓔꓯꓹ ꓙꓰꓳ= ꓞꓳ ꓐꓬꓱꓽ ꓖꓳ ꓟ ꓔꓯ ꓔꓲꓸ ꓗꓷ ꓟ ꓭꓸ ꓛꓲ ꓠꓬ꓾ ꓪꓽ ꓚꓲ ꓓꓽ ꓟ ꓕꓲ ꓚꓲ ꓒꓬꓱꓼ ꓡ ꓢꓲ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓐꓲ ꓡꓰꓳ=

ꓕꓱ ꓟ ꓠꓬ ꓠꓴ ꓘꓳꓻ ꓗꓷ ꓟ ꓬꓲꓼ ꓟꓬ ꓥꓳ= ꓬꓲ ꓒꓶ ꓘꓶ ꓠꓬ ꓕꓱ ꓡꓱ ꓥꓳ= ꓪ ꓔꓲꓳ꓾ ꓠꓴ ꓠꓬ ꓪ ꓔꓲ ꓕꓯꓽ ꓢꓲ ꓟ ꓪ ꓔꓲ ꓥ ꓠꓬꓲ ꓫꓵꓺ ꓪꓴꓸ ꓓꓵ ꓖꓳ ꓟ ꓠꓬ ꓠꓴ ꓥꓳ= ꓖꓳ ꓡꓱ ꓢꓲ ꓠꓴ ꓗꓸ ꓠꓯꓸ ꓠꓬ꓾ ꓠꓴ ꓔꓯ ꓖꓼ ꓟꓽ ꓟꓶ ꓟ ꓗꓴꓷꓼ ꓬꓲ ꓔꓱꓹ ꓬꓲ ꓕꓲ ꓗꓴꓷꓼ ꓓꓳ ꓡˍ ꓥꓳ= ꓖꓳ ꓗ ꓠꓯꓸ ꓠꓬ ꓙꓲꓽ ꓔꓯ ꓔꓯ ꓔ ꓟ ꓢ ꓗꓴꓷꓼ ꓕꓲ ꓗꓴꓷꓼ ꓓꓳ ꓡ ꓢꓲ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓙꓵꓽˍ ꓥꓳ=

ꓡꓲ ꓗꓴꓷꓼ ꓕꓲ ꓗꓴꓷꓼ ꓠꓬ ꓧꓳˍ ꓡꓰ ꓐꓰ ꓢꓯꓼ ꓙꓳˍ ꓥꓳ= ꓧꓳ ꓠꓬ ꓮ ꓫꓵꓽ ꓔꓯˍ ꓟꓲ ꓔꓲꓸ ꓧꓶꓽ ꓡꓰ ꓘꓴˍ ꓟˍ ꓡꓰ ꓐꓰ꓾ ꓗꓴꓷꓼ ꓖꓳ ꓟ ꓡꓰ ꓠꓱꓸ ꓐꓯꓼ ꓗꓴꓷꓼ ꓔꓯ ꓔꓲꓸ ꓧꓶꓽ ꓡꓰ ꓝꓲˍ ꓥꓳ= ꓖꓳ ꓡꓱ ꓢꓲ ꓬꓲ ꓛꓲ ꓒꓯꓹˍ ꓐꓰ ꓛꓲ ꓠꓲ ꓠꓬ꓾ ꓠꓱꓸ ꓑꓴ ꓙꓵ ꓬꓲ ꓠꓱꓸ ꓠꓲ ꓠꓴꓽˍ ꓐꓰ ꓧꓳ ꓥ ꓟ ꓔꓯ ꓠꓴ ꓡꓳꓸ ꓟꓳˍ ꓟˍ ꓡꓰ ꓐꓰ꓾ ꓗꓴꓷꓼ ꓖꓳ ꓟ ꓠꓬ ꓬꓲ ꓖꓳ ꓡꓱ ꓗꓷ ꓡꓰˍ ꓥꓳ= ꓧꓳ ꓠꓬ ꓠꓱꓸ ꓠꓲ ꓠꓴꓽˍ ꓐꓰ ꓠꓷꓼ ꓡꓰ ꓟꓽ ꓓ ꓟˍ ꓡꓰ ꓐꓰ꓾ ꓪꓽ ꓡꓯ ꓘꓳ ꓧꓳꓸ ꓡꓯ ꓘꓳ ꓟꓽ ꓠ꓾ ꓐꓰ ꓗꓹ ꓥꓳ= ꓞꓳ ꓤ ꓡꓯ ꓒꓯꓹ ꓡꓰ ꓟꓽ ꓜꓰ ꓔ ꓟ ꓭꓸ ꓛꓲ ꓠꓬ ꓪꓽ ꓚꓲ ꓗꓪ ꓐꓰ ꓡꓱꓸ ꓡ ꓢꓲ꓾ ꓧꓳ꓾ ꓙꓲꓽ꓾ ꓠꓱꓸ ꓠꓲ ꓠꓴꓽ꓾ ꓒꓴ ꓐꓰ ꓫꓵꓺ ꓔꓯ ꓔꓲꓸ ꓧꓶꓽ ꓡꓰ ꓟ ꓦ ꓐꓬꓱꓽ ꓠꓬ ꓕꓱ ꓡꓱ ꓥꓳ= ꓟꓴ ꓗꓪ ꓗꓪ ꓟ ꓪꓴ-ꓢ ꓡꓰ ꓕꓲ ꓞꓲꓼ ꓕꓲ ꓑ ꓐꓬ ꓡꓰ ꓟꓽ ꓓ ꓟ ꓗꓴꓷꓼ ꓕꓲ ꓗꓴꓷꓼ ꓔꓶ ꓗꓷˍ ꓥꓳ= ꓗꓴꓷꓼ ꓖꓳ ꓟ ꓔꓯ ꓠꓬ ꓮꓽ ꓟˍ ꓟꓲ ꓓꓶꓽ ꓧꓪꓸ ꓡꓰ ꓟꓽ ꓘꓴ= ꓗꓴꓷꓼ ꓖꓳ ꓟ ꓡꓰ ꓠꓱꓸ ꓐꓯꓼ ꓗꓴꓷꓼ ꓮ ꓙꓵꓽ ꓔꓯ ꓔꓲꓸ ꓧꓶꓽ ꓡꓰ ꓝꓲ ꓢꓲ꓾ ꓗꓴꓷꓼ ꓖꓳ ꓟ ꓠꓬ ꓕꓲ ꓞꓲꓼ ꓕꓲ ꓑ ꓕꓶ ꓞꓹ ꓥꓳ= ꓪꓽ ꓠꓬꓲˍ ꓟ ꓪꓴ-ꓢ ꓡꓰ ꓕꓱ ꓡꓱ ꓖꓳ ꓑꓳ ꓒꓬꓱꓼ ꓡ ꓠ ꓗꓹ ꓟ ꓪ ꓔꓲ ꓠꓴ ꓔꓯ ꓢꓷꓸ ꓝꓲˍ ꓟ ꓥꓳ= ꓪ ꓔꓲ ꓠꓴ ꓘꓳꓻ ꓗꓷ ꓟ ꓬꓲꓼ ꓟꓬ ꓠꓬ ꓔꓱꓹˍ ꓟ ꓥ ꓢꓲ꓾ ꓬꓲ ꓒꓶ ꓘꓶꓽˍ ꓟꓲ ꓦ ꓡꓱ ꓐꓳˍ ꓟ ꓥꓳ꓾ ꓐꓯ ꓖꓶˍ ꓡꓳ=

Add new comment

14 + 1 =