ꓟꓷꓽ ꓠꓷꓹ ꓝ ꓒ ꓟꓲ-ꓘꓷ

ꓦꓲ-ꓐꓱ-ꓣꓴ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓟꓲ-ꓘꓷ ꓠꓬ ꓬꓴ-ꓔ ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓟꓲ-ꓘꓷ ꓢꓲꓽ ꓫꓬ ꓕꓳꓽ ꓶ ꓑꓷꓠꓽ ꓔꓯ ꓐꓳ ꓢꓴ ꓕꓲ ꓣꓳ ꓥ ꓡꓳ= ꓟꓲ-ꓘꓷ ꓐꓯ ꓟ ꓬꓲ ꓟꓸ ꓟꓲꓽ ꓠꓬ ꓪꓴ-ꓢ ꓔꓯ ꓫꓱꓸ ꓢꓴ꓾ ꓐꓯˍ ꓟ ꓥ ꓡꓳ= ꓬꓲ ꓔꓯ ꓠꓬ ꓟꓷꓽ ꓠꓷꓹ ꓝ ꓒ ꓤ 12 ꓣꓳ (Twelve Minor Prophets) ꓘꓴꓽ ꓗꓪ ꓟ ꓕꓲ ꓣꓳ ꓥꓳ꓾ ꓐꓰ ꓢꓷꓸ ꓙ ꓟꓳ ꓙ ꓔ ꓟ ꓥ ꓢꓲ ꓠꓬꓲ ꓟꓷꓽ ꓠꓷꓹ ꓝ ꓒ ꓐꓴ ꓥ ꓟ ꓬꓲ-ꓢ-ꓬ꓾ ꓮ-ꓟꓳ-ꓢꓲ꓾ ꓧꓳ-ꓫꓲ-ꓬ ꓐꓴ ꓤꓶꓻ ꓦꓬꓼ ꓠꓬꓲ ꓗꓪ ꓬꓲ ꓥˍ ꓟꓲ ꓟꓷꓽ ꓠꓷꓹ ꓝ ꓗꓷꓳ=

ꓟꓲ-ꓘꓷ ꓠꓬ ꓬꓴ-ꓔ ꓟꓵꓽ ꓐꓶ ꓓꓵꓽ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓙꓳˍ ꓟ꓾ ꓟꓳ-ꓣ-ꓫꓵ ꓢꓴ ꓥ ꓡꓳ= ꓬꓲ ꓠꓬ ꓬꓴ-ꓔ ꓪ ꓔꓲ ꓐꓴ ꓥ ꓟ ꓪ ꓔꓲ ꓬꓳ-ꓕ꓾ ꓪ ꓔꓲ ꓬ-ꓧ-ꓢꓶ ꓐꓰ ꓪ ꓔꓲ ꓧꓷ-ꓫꓲ-ꓘꓷ-ꓬ ꓐꓴ ꓙꓵꓽˍ ꓟ ꓦꓬꓼ ꓠꓬꓲ ꓗꓪ ꓟꓷꓽ ꓠꓷꓹ ꓝ ꓟꓬꓱꓽ ꓬꓰ ꓗꓷ ꓢꓴ ꓥ ꓡꓳ=

ꓟꓲ-ꓘꓷ ꓕꓳ ꓶ ꓠꓬ ꓢ-ꓟ-ꓡꓲ ꓢꓴ ꓐꓴ ꓐꓰ ꓙꓱ-ꓣꓴ-ꓢ-ꓡꓱ ꓢꓴ ꓐꓴ ꓔꓯ ꓐꓯˍ ꓟ ꓟꓷꓽ ꓠꓷꓹ ꓝ ꓘꓶꓽ ꓥ ꓡꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓰ ꓢ-ꓟ-ꓡꓲ ꓡꓳ ꓒꓱ ꓐꓬ ꓡꓰˍ ꓟ ꓔꓯ ꓟꓷꓽ ꓠꓷꓹ ꓝ ꓗꓷ ꓢꓲ꓾ ꓬꓴ-ꓔ ꓡ ꓞꓳ ꓐꓴ ꓟꓽ ꓙꓲꓻ ꓟꓽ ꓔꓱꓹ ꓟ ꓬꓰˍ ꓟ ꓐꓰ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓔꓯ ꓦ ꓡꓱ ꓪꓴꓸ ꓓꓵ ꓕꓱꓽˍ ꓟ ꓑꓶꓸ ꓓꓴ ꓬꓲ ꓪ ꓔꓯ ꓟꓸ ꓖꓶ ꓑꓱ ꓖꓶ ꓗꓷꓳ=

ꓟꓲ-ꓘꓷ 5ꓽ2 ꓗꓪ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓙꓳˍ ꓟ ꓐꓱ-ꓡꓱ-ꓦꓱ ꓡꓳ ꓒꓱ ꓗꓪ ꓠꓬ ꓬꓲ-ꓢꓷ-ꓡꓰ ꓔꓯ ꓙꓵꓽ ꓢꓴ ꓕꓲ ꓣꓳ ꓓꓳ ꓡˍ ꓥꓳ꓾ ꓐꓰ ꓟꓲ-ꓢ-ꓬ ꓔꓯ ꓖꓴ ꓢꓲ ꓟꓷꓽ ꓠꓷꓹ ꓝ ꓔ ꓡꓳ=

ꓟꓷꓽ ꓠꓷꓹ ꓝ ꓒ ꓟꓲ-ꓘꓷ ꓡꓰ ꓬꓲ ꓪꓴꓸ ꓟꓷꓽ ꓠꓷꓹ ꓝ ꓔ ꓟ ꓗꓪ ꓠꓬ ꓢ-ꓟ-ꓡꓲ ꓐꓰ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓠꓬꓲꓽ ꓟ ꓡꓱꓸꓼ ꓠꓬ ꓬꓲ ꓪ ꓝꓴꓲꓸ ꓑꓶꓸ ꓓꓴ ꓐꓬ ꓡꓰˍ ꓥꓳ꓾ ꓐꓰ ꓐꓯ ꓔ ꓡꓳ=

ꓢ-ꓟ-ꓡꓲ ꓡ ꓞꓳ ꓐꓴ ꓠꓬ ꓬꓲ ꓪ ꓦꓬꓽ ꓛꓳ ꓧꓪ ꓔ ꓟ ꓒꓴ ꓗꓪ ꓐꓰ ꓪꓴꓻ ꓔ ꓟ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓐꓴ ꓔꓯ ꓪꓴꓸ ꓓꓵ ꓕꓱꓽˍ ꓟ ꓑꓶꓸ ꓓꓴ ꓬꓲ ꓪ ꓐꓴ ꓔꓯ ꓟꓸ ꓖꓶ ꓗꓷꓳ= ꓟꓷꓽ ꓠꓷꓹ ꓝ ꓒ ꓟꓲ-ꓘꓷ ꓠꓬ ꓙꓱ-ꓣꓴ-ꓢ-ꓡꓱ ꓐꓬ ꓡꓰˍ ꓟ ꓚꓱꓹ ꓔꓯ ꓟꓷꓽ ꓠꓷꓹ ꓝ ꓢꓴ ꓬꓲ ꓪꓴꓸ ꓕꓲ ꓣꓳ ꓟ ꓥ ꓡꓳ= ꓬꓲ ꓡꓰ ꓐꓯ ꓔ ꓟ ꓠꓬ ꓡꓳ ꓒꓱ ꓗꓪ ꓔꓬ ꓢꓴ ꓐꓴ ꓔꓯ ꓫꓸ ꓙꓵꓻ ꓡꓰ ꓝꓲˍ ꓟ ꓟꓽ ꓔꓱꓹ ꓜꓳꓽ ꓟ ꓚꓱꓹ ꓣꓱꓽ ꓢꓲ ꓡꓳ ꓒꓱ ꓔꓯ ꓐꓲꓻ ꓫꓴꓽ ꓔ ꓟ ꓑꓶꓸ ꓓꓴ ꓡꓳ ꓒꓱ ꓠꓬ ꓐꓬ ꓡꓰ ꓠꓯꓹ ꓡꓳ꓾ꓪꓴ-ꓢ ꓡꓰ ꓬꓲ ꓪ ꓔꓯ ꓟꓸ ꓙꓽ ꓡˍ ꓥꓳ꓾ ꓐꓰ ꓐꓯ ꓔ ꓡꓳ=

ꓬꓲ ꓡꓰ ꓟꓷꓽ ꓠꓷꓹ ꓝ ꓔ ꓟ ꓝꓮꓲ ꓕꓲ ꓫꓵꓽ ꓠꓬ ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓬ ꓡꓰˍ ꓟ ꓐꓰ ꓜꓲ-ꓬꓴ ꓠꓬ ꓦ ꓟꓲ ꓟꓽˍ ꓔ ꓟ ꓡꓰ ꓐꓰ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓔ ꓡꓳ=(ꓟꓲ-ꓘꓷ 3ꓽ11-12) ꓕꓱ ꓟ ꓔꓯ ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ(26ꓽ18) ꓗꓪˍ ꓟꓲ ꓖꓴ ꓟꓳꓸ ꓖꓶ ꓔ ꓡꓳ=

ꓦꓬꓼ ꓠꓬꓲ ꓖꓳ ꓟ ꓗꓪ ꓐꓰ ꓪꓴꓸ ꓔꓴ ꓢꓲ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓠꓬ 3 ꓧꓪꓹ ꓢꓴ ꓡꓰ ꓒꓬˍ ꓟ ꓟꓶ ꓗꓷ ꓢꓲ ꓬꓲ ꓪꓴꓸ ꓕꓲ ꓧꓪꓹ ꓟ ꓠꓬ ꓟꓲ-ꓘꓷ ꓬꓲ ꓟꓷꓽ ꓠꓷꓹ ꓝ ꓗꓷ ꓟ ꓐꓲ ꓡꓰ ꓟ ꓥ ꓡꓳ= ꓟꓲ-ꓘꓷ ꓠꓬ ꓕꓱ ꓟ ꓔꓯ ꓟꓷꓽ ꓠꓷꓹ ꓝ ꓗꓷ ꓟ 150ꓘꓳꓼ ꓙꓳ ꓡˍ ꓕꓯ꓾ ꓐꓚ 586 ꓕꓯ ꓐ-ꓐꓲ-ꓡꓶ ꓞꓳ ꓫꓵꓽ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓗꓷꓳ= ꓝꓮꓲ ꓠꓬ ꓟꓲ-ꓢ-ꓬ ꓡˍ ꓥꓳ꓾ ꓐꓯ ꓟ ꓟꓷꓽ ꓠꓷꓹ ꓝ ꓘꓶꓽ ꓥˍ ꓟꓲ ꓚꓵ ꓚꓵ ꓐꓲ ꓡꓰꓳ=

ꓟꓲ-ꓘꓷ ꓕꓳ ꓶ ꓗꓪ ꓐꓰ ꓣꓳ ꓚꓲꓸ ꓔ ꓠꓯꓹ ꓟ ꓠꓬ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓗꓪ ꓐꓰ ꓢꓲ ꓡꓲ ꓟ ꓖꓶ ꓢꓴ ꓪ ꓔꓲ ꓕꓲ ꓣꓳ ꓓꓳ ꓡ ꓠꓯꓹ ꓟˍ ꓐꓰ꓾ ꓣꓳ ꓠꓬ ꓔꓱꓹ ꓜꓳꓽˍ ꓟ ꓬꓰ ꓢꓲ꓾ ꓢꓴ ꓔꓯ ꓫꓱꓸ ꓤ ꓢꓲ ꓠꓬꓲ꓾ ꓙ ꓣꓳꓽ ꓠꓲꓹ ꓡꓰ ꓪꓴ-ꓢˍ ꓐꓰ ꓙ ꓡꓯ ꓘꓳˍ ꓟ ꓔꓯ ꓪꓴ-ꓢ ꓠꓵˍ ꓡꓳ꓾ ꓐꓯˍ ꓟ ꓕꓱ ꓟ ꓥ ꓡꓳ=