ꓟꓷꓽ ꓠꓷꓹ ꓝ ꓒ ꓠꓳ-ꓪ

ꓪꓴ-ꓢ ꓠꓬ ꓟꓲ ꓠꓯ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓚꓰꓼ ꓗꓷ ꓢꓲ꓾ ꓬꓲꓸ ꓠꓬ ꓬꓲꓸ ꓒꓬꓱꓽ ꓔꓯ ꓛꓳ ꓢꓲ ꓞꓳ ꓤ ꓔꓯ ꓚꓰꓼ ꓗꓷ ꓢꓲ ꓠꓬꓲ ꓖꓳ ꓗꓪ ꓔꓬ ꓝꓲ ꓗꓷꓳ= ꓖꓳ ꓡꓱ ꓥˍ ꓟꓲ ꓞꓳ ꓤ ꓠꓬ ꓟꓽ ꓙꓲꓻ ꓟ ꓬꓰ ꓢꓲ꓾ ꓪꓴ-ꓢ ꓘꓶꓽ ꓫꓵꓽ ꓔꓯ ꓟꓽ ꓛꓳ ꓛꓳ ꓐꓰ ꓔꓬꓹ ꓡꓳ=ꓬꓲꓸ ꓪ ꓐꓴ ꓠꓬ ꓪꓽ ꓟꓽ ꓘꓴ ꓾ ꓬꓲꓸ ꓪ ꓐꓴ ꓠꓲꓹ ꓫꓵˍ ꓟ ꓔꓯ ꓡꓰꓽ ꓛꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓟꓲ ꓠꓯ ꓗꓪ ꓟ ꓬꓲ ꓚꓰꓼ ꓔ ꓟ ꓮ ꓙꓵꓽ ꓔꓯ ꓛꓴ ꓛꓰꓹ ꓡꓰ ꓝꓲ ꓠꓹ ꓟ ꓬꓰˍ ꓡꓳ=

ꓖꓳ ꓗꓪ ꓪꓴ-ꓢ ꓔꓯ ꓠꓲꓹ ꓠꓵ ꓢꓴ ꓠꓳ-ꓪ ꓟꓬꓱꓺ ꓔ ꓟ ꓡ ꓞꓳ ꓕꓲ ꓣꓳ ꓡꓰꓽ ꓙꓳˍ ꓢꓰꓽ ꓡꓳ= ꓠꓳ-ꓪ ꓠꓬ ꓪꓴ-ꓢ ꓔꓯ ꓠꓲꓹ ꓠꓵ ꓢꓲ꓾ ꓪꓴꓸ ꓓꓵ ꓕꓱꓽˍ ꓡꓳ= ꓠꓱꓸ ꓐꓯ ꓮ ꓡꓰ ꓕꓲ ꓣꓳˍ ꓟꓲ ꓪꓴ-ꓢ ꓔꓯ ꓟꓽ ꓙꓵꓻ ꓥˍ ꓟꓲ ꓬꓲꓸ ꓠꓽ ꓮ ꓘꓶꓸ ꓙꓵˍ ꓡꓳ= ꓬꓲꓸ ꓕꓲ ꓦꓲ ꓢꓴ ꓔꓯ ꓥˍ ꓟꓲ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓟꓸ ꓖꓶˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓪꓴ-ꓢ ꓠꓬ ꓠꓳ-ꓪ ꓔꓯ ꓫꓸ ꓕꓱ ꓡˍ ꓡꓳ= “ꓠꓳ-ꓪ ꓳ ꓾ ꓠꓴ ꓠꓽ ꓙꓲꓻˍ ꓟ ꓡ ꓞꓳ ꓕꓲ ꓣꓳ ꓥꓳ= ꓠꓴ ꓠꓬ ꓔꓱꓹ ꓜꓳꓽ ꓢꓲ ꓠꓴ ꓕꓲ ꓦꓲ ꓢꓴ ꓐꓴ ꓐꓰ ꓠꓲꓹ ꓒꓵꓽ ꓠꓲꓹ ꓡꓱ ꓔꓬ ꓢꓴ ꓥꓳ= ꓖꓳ ꓡꓱ ꓥˍ ꓟꓲ ꓟꓲ ꓠꓯ ꓞꓳ ꓤ ꓐꓴ ꓠꓬ ꓥꓶˍ ꓟ ꓬꓰ ꓢꓲ ꓮ ꓙꓵꓽ ꓫꓵꓻ ꓒꓵˍ ꓡꓳ=” ꓖꓳ ꓟ ꓔꓯ ꓑ ꓙˍ ꓕꓯ ꓠꓳ-ꓪ ꓠꓬ “ꓪꓴ-ꓢ ꓳ ꓾ ꓮ ꓙꓵꓽ ꓠꓬ ꓠꓴ ꓡ ꓞꓳ ꓡꓰꓽ ꓥ ꓠꓬꓲ꓾ ꓬꓲꓸ ꓪ ꓐꓴ ꓔꓯ ꓫꓱꓸ ꓤ ꓡꓯ꓾” ꓐꓰ ꓐꓯ ꓖꓶˍ ꓡꓳ=

“ꓟꓽ ꓥ ꓠꓳ-ꓪ ꓳ꓾ ꓟꓲ ꓠꓯ ꓠꓬ ꓐꓬ ꓡꓰ ꓠꓯꓹ ꓡꓳ= ꓥꓪ ꓠꓬ ꓟꓲ ꓠꓯ ꓕꓲ ꓟ ꓡꓱꓸꓼ ꓔꓯ ꓛꓴ ꓛꓰꓹ ꓡꓰ ꓝꓲ ꓠꓹ ꓟ ꓬꓲꓻ ꓙꓬ ꓙꓵꓽ ꓟꓷꓸ ꓡꓰ ꓝꓲˍ ꓥꓳ= ꓟꓶꓽ ꓦ ꓠꓬ ꓟꓽ ꓠꓽ ꓠꓽ ꓐꓰ ꓡꓲ ꓞꓲ ꓦꓬꓼ ꓡꓲ ꓞꓲ  ꓠꓬꓲ ꓦ ꓡˍ ꓥꓳ= ꓟꓲ ꓠꓯ ꓗꓪ ꓟ ꓢꓯꓸ ꓫꓵꓽ ꓢꓯꓸ ꓙꓰꓽ ꓮ ꓙꓵꓽ ꓠꓬ ꓛꓴ ꓛꓰꓹ ꓡꓰˍ ꓥꓳ= ꓠꓴ ꓕꓽ ꓙꓳꓺ꓾ ꓠꓴ ꓠꓬ ꓙꓲ ꓫꓬ ꓢꓴ ꓕꓲ ꓣꓳ ꓥ ꓟ ꓪꓴꓸ ꓠꓬꓲ ꓠꓴ ꓐꓰ ꓠꓴ ꓕꓲ ꓦꓲ ꓢꓴ ꓔꓯ ꓚꓬꓴꓸ ꓙˍ ꓥꓳ=

ꓠꓴ ꓐꓰ ꓠꓴ ꓕꓲ ꓦꓲ ꓢꓴ ꓐꓱ ꓶ ꓦꓲ ꓡꓲ ꓕꓲ ꓟ ꓫꓬꓹ꓾ ꓕꓱ ꓟ ꓠꓬ ꓠꓴ ꓪ ꓐꓴ ꓔꓯ ꓬꓲꓻ ꓙꓬ ꓙꓵꓽ ꓟꓷꓸˍ ꓟ ꓗꓪ ꓐꓰ ꓚꓬꓴꓸ ꓙˍ ꓥꓳ=ꓠꓬꓹ ꓫꓵꓽ ꓠꓬꓹ ꓙꓰꓽ ꓐꓴ ꓙꓱꓽ ꓤ ꓐꓴ ꓟꓲ ꓠꓯ ꓗꓪ ꓟꓬꓽ ꓡ ꓓꓴ ꓬꓲꓸ ꓫꓵꓸ ꓝꓰ ꓟꓶ ꓠꓹ ꓟ ꓬꓲ ꓪ ꓐꓴ ꓔꓯ ꓠꓴ ꓪ ꓐꓴ ꓐꓰ ꓕꓲ ꓪꓺꓽ ꓦꓲ ꓡꓲ ꓘꓴꓽ ꓗꓪ ꓧꓳꓽ ꓗꓷ꓾” ꓐꓯ ꓖꓶˍ ꓡꓳ=

ꓖꓳ ꓕꓯ ꓠꓳ-ꓪ ꓡꓰ “ꓖꓳ ꓡꓱ ꓥˍ ꓟꓲ ꓪꓴ-ꓢ ꓳ ꓾ ꓥꓪ ꓠꓬ ꓦꓲ ꓡꓲ ꓔꓯ ꓮ ꓡꓰ ꓐꓰ ꓢꓲ ꓫꓬꓹ ꓗꓴˍ ꓢꓰꓽ”꓾ ꓐꓯ ꓖꓶˍ ꓡꓳ= ꓪꓴ-ꓢ ꓡꓰ꓾ ꓕꓽ ꓙꓳꓺ ꓦꓲ ꓡꓲ ꓔꓯ ꓮ ꓡꓰ ꓐꓰ ꓫꓬꓹ ꓠꓹ ꓟ ꓥꓪ ꓐꓯ ꓖꓶˍ ꓥꓳ꓾” ꓐꓰ ꓒꓳꓹ ꓖꓶˍ ꓡꓳ=

ꓝꓮꓲ ꓪꓴ-ꓢ ꓡꓰ ꓟꓲ ꓠꓯ ꓡ ꓞꓳ ꓐꓴ ꓠꓲꓹ ꓟ ꓡꓶꓸ ꓗꓷ ꓢꓲ꓾ ꓬꓲꓸ ꓔꓯ ꓒꓳꓹ ꓡꓰꓼ ꓡ ꓠꓹ ꓟ ꓐꓯ ꓖꓶ ꓬꓰ ꓝꓲˍ ꓡꓳ=

ꓠꓳ-ꓪ ꓠꓬ ꓪꓴ-ꓢ ꓐꓯ ꓖꓶˍ ꓗꓷ ꓟ ꓕꓲ ꓡꓰꓹꓼ ꓢꓲꓹ ꓜꓲ ꓐꓴ ꓔꓯ ꓓꓶꓺ ꓗꓷ ꓢꓲ ꓦꓲ ꓡꓲ ꓫꓬꓹ ꓠꓹ ꓟ ꓬꓰˍ ꓡꓳ= ꓖꓳ ꓠꓬ ꓞꓳ ꓤ ꓐꓴ ꓠꓬ ꓠꓳ-ꓪ ꓬꓰ ꓔꓬ ꓟ ꓔꓯ ꓠꓺ ꓠꓬꓲˍ ꓐꓰ ꓡˍ ꓡꓳ= ꓖꓳ ꓕꓯ ꓠꓳ-ꓪ ꓡꓰ ꓾ ꓥꓪ ꓠꓬ ꓦꓲ ꓡꓲ ꓓ ꓟ ꓕꓲ ꓟ ꓫꓬꓹ ꓔꓬ ꓡꓳ= ꓟꓲ ꓠꓯ ꓞꓳ ꓤ ꓐꓴ ꓠꓬ ꓥꓶˍ ꓟ ꓬꓰˍ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓮ ꓙꓵꓽ ꓔꓯ ꓛꓴ ꓛꓰꓹ ꓡꓰ ꓝꓲˍ ꓥꓳ=ꓕꓱ ꓟ ꓟꓽ ꓗꓷ ꓡꓰ ꓠꓹ ꓟ ꓠꓴ ꓪ ꓠꓬ꓾ ꓠꓲꓹ ꓟ ꓡꓶꓸ ꓗꓷ ꓢꓲ ꓪꓴ-ꓢ ꓔꓯ ꓙꓵꓻ= ꓟꓽ ꓙꓲꓻ ꓟ ꓕꓽ ꓬꓰ꓾ ꓠꓴ ꓪ ꓝꓴꓲꓸ ꓮ ꓙꓵꓽ ꓖꓽ ꓖꓶ ꓟꓶ ꓠꓹ ꓟ ꓪꓽ ꓘꓴ꓾ ꓖꓳ ꓡꓱ ꓬꓰˍ ꓠꓬ ꓠꓴ ꓪ ꓔꓯ ꓪꓴ-ꓢ ꓫꓱꓸ ꓤ ꓢꓲ ꓚꓬꓴꓸ ꓙˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓠꓬ ꓠꓳ-ꓪ ꓐꓯˍ ꓟ ꓔꓯ ꓟꓽ ꓙꓵꓻ ꓾ ꓝꓴꓲꓸ ꓐꓰ ꓥꓶˍ ꓟ ꓔꓯ ꓡꓰꓽ ꓝ ꓢꓲ ꓬꓰˍ ꓡꓳ=  

ꓦꓲ ꓡꓲ ꓫꓬꓹ ꓓꓳ ꓡꓰ ꓗꓸ ꓠꓯꓸ ꓠꓳ-ꓪ ꓠꓬ ꓪꓴ-ꓢ ꓕꓵꓼ ꓪ ꓙꓳˍ ꓟ ꓕꓲ ꓡꓰꓹꓼ ꓜꓽ ꓫꓵꓽ ꓜꓽ ꓙꓰꓽ ꓐꓰ꓾ ꓔꓶ ꓓꓴ ꓬꓲꓸ ꓫꓵꓸ ꓬꓲꓸ ꓫꓵꓽ ꓬꓲꓸ ꓙꓰꓽ ꓐꓰ ꓙꓱꓽ ꓤ ꓮ ꓙꓵꓽ ꓔꓯ ꓦꓲ ꓡꓲ ꓗꓪ ꓧꓳꓽ ꓓꓵꓽ ꓙꓰˍ ꓡꓳ= ꓙꓱꓽ ꓤ ꓐꓴ ꓔꓯˍ ꓟꓲ ꓕꓲ ꓫꓵꓽ ꓕꓲ ꓙꓱ ꓐꓰ ꓧꓳꓽ ꓓꓵꓽ ꓙꓰˍ ꓡꓳ=ꓗꓸ ꓠꓯꓸ ꓠꓳ-ꓪ ꓠꓬ ꓬꓲꓸ ꓦꓲ ꓡꓲ ꓗꓪ ꓓꓵꓽ ꓡ ꓠꓹ ꓟ ꓠꓱꓸ ꓐꓯꓼ ꓐꓴ ꓔꓯ ꓐꓯ ꓖꓶˍ ꓟꓲ ꓬꓲꓸ ꓪ ꓐꓴ ꓟꓽ ꓠ ꓠꓹ=

ꓪꓴ-ꓢ ꓡꓰ ꓠꓳ-ꓪ ꓔꓯ ꓕꓵꓼ ꓪ ꓖꓶ ꓗꓷ ꓟˍ ꓡꓰ ꓐꓰ ꓬꓰ ꓓꓳ ꓡꓰ ꓠꓬ ꓟꓶꓽ ꓦ ꓕꓲ ꓢꓶꓽ ꓕꓲ ꓢꓶꓽ ꓦ ꓡˍ ꓡꓳ= ꓟꓲ ꓠꓯ ꓗꓪ ꓟꓶ ꓦ ꓟꓽ ꓦ ꓟ ꓟꓶ ꓤ ꓙꓳˍ ꓟ ꓪꓴꓸ ꓠꓬꓲ꓾ ꓞꓳ ꓤ ꓐꓴ ꓠꓽ ꓓꓵꓽ ꓙ ꓮ’ ꓡꓰꓳ= ꓗꓸ ꓠꓯꓸ ꓟꓲ ꓠꓯ ꓠꓯꓸ ꓘꓪ ꓟ ꓬꓲꓻ ꓙꓬ ꓮ ꓙꓵꓽ ꓑꓳ ꓓꓳ ꓡ ꓢꓲ꓾ ꓟꓵꓽ ꓪꓴꓽ ꓗꓪ ꓟ ꓬꓲ ꓙꓬˍ ꓟꓲ ꓐꓰꓼ ꓩꓴ ꓡ ꓠꓬ꓾ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓟꓲ ꓠꓯ ꓗꓪ ꓟꓶꓽ ꓦ ꓦ ꓡˍ ꓡꓳ= ꓖꓳ ꓕꓯ ꓟꓲ ꓠꓯ ꓗꓪ ꓬꓲꓻ ꓙꓬ ꓟꓷꓸ ꓡ ꓢꓲ ꓦꓲ ꓡꓲ ꓠꓬ ꓐꓴꓻ ꓓꓯ ꓡˍ ꓡꓳ= ꓬꓲꓻ ꓙꓬ ꓡꓯꓽ ꓫꓵ ꓙꓵꓽ ꓡ ꓠꓬꓲ ꓦꓲ ꓡꓲ ꓠꓽ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓐꓴ ꓚꓳ ꓔꓬ ꓡꓳ= ꓟꓲ ꓠꓯ ꓗꓪ ꓟꓴ ꓓꓰˍ ꓟ ꓪꓽ ꓚꓲ ꓮ ꓙꓵꓽ ꓔꓯˍ ꓟꓲ ꓑꓲꓸ ꓖꓴ ꓡꓰꓳ= ꓟꓲ ꓠꓯ ꓗꓪ ꓟ ꓢꓯꓸ ꓫꓵ ꓢꓯꓸ ꓙꓰꓽ꓾ ꓦꓵꓻ ꓙꓱ ꓠꓲꓸ ꓙꓱ꓾ ꓠꓬꓹ ꓫꓵ ꓠꓬꓹ ꓙꓰ꓾ ꓐꓶꓽ ꓓꓲ ꓡꓯꓹ ꓓꓲˍ ꓐꓰ ꓞꓳ ꓤ ꓪ ꓤ ꓮ ꓙꓵꓽ ꓟꓷꓸ ꓫꓵꓻ ꓖꓴꓳ=

ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓟꓶ ꓦ ꓦ ꓗꓷ ꓗꓸ ꓠꓯꓸ ꓟꓶ ꓦ ꓦˍ ꓟ ꓠꓽ ꓡꓰꓳ= ꓬꓲꓻ ꓙꓬ ꓐꓴˍ ꓟꓲ ꓮ ꓤ ꓮ ꓤ ꓫꓱ ꓡꓰ ꓔꓬ ꓡꓳ=ꓦꓬꓼ ꓠꓬꓲ ꓟꓶ ꓤ ꓗꓷ ꓡꓰ ꓗꓸ ꓠꓯꓸ ꓠꓳ-ꓪ ꓠꓬ ꓦꓲ ꓡꓲ ꓠꓬꓲ ꓟꓳ ꓒꓰꓼ ꓒꓴ ꓢꓲ꓾ ꓬꓲꓻ ꓙꓬ ꓫꓱ ꓡꓰ ꓟꓽ ꓫꓱ ꓡꓰ ꓟ ꓢꓷꓸ ꓡꓰ ꓠꓹ ꓟ ꓮ ꓖꓴꓽ ꓕꓲ ꓟ ꓔꓯ ꓩꓴ ꓗꓷˍ ꓡꓳ= ꓮ ꓖꓴꓽ ꓠꓬ ꓠꓽ ꓖꓴ ꓧꓪ ꓟꓽ ꓟꓳ ꓟ ꓪꓴꓸ ꓠꓬꓲ ꓬꓲ ꓔꓯ ꓚꓱꓹ ꓬꓲꓼ ꓡˍ ꓡꓳ= ꓬꓲꓻ ꓙꓬ ꓠꓬ ꓟꓲ ꓠꓯ ꓕꓲ ꓚꓳ ꓡꓳ ꓗꓪ ꓙꓵꓽ ꓟꓷꓸ ꓓꓹ ꓢꓰꓽ ꓡꓳ= ꓫꓵꓽ ꓠꓬꓲ ꓗꓸ ꓠꓯ ꓠꓳ-ꓪ ꓡꓰ ꓮ ꓖꓴꓽ ꓔꓯ ꓝꓮꓲ ꓩꓴ ꓓꓳ ꓗꓷ ꓠꓬ꓾ ꓟꓶꓽ ꓘꓶꓼ ꓝꓲ ꓗꓪ ꓮ ꓖꓴꓽ ꓠꓬ ꓮꓽ ꓛꓬꓽ ꓡꓯꓸ ꓒꓬꓽ ꓕꓲ ꓒꓬꓽ ꓠꓬꓱꓹ ꓔ ꓢꓲ ꓠꓳ-ꓪ ꓔꓯ ꓬꓲꓼ ꓡ ꓠꓬꓲ꓾ ꓬꓲꓻ ꓙꓬ ꓫꓱ ꓡꓰ ꓟ ꓔꓯ ꓬꓲ ꓢꓷꓸ ꓡꓰꓳ= ꓝꓮꓲ ꓫꓵꓽ ꓠꓬꓲ ꓦꓴ ꓠꓬꓹ ꓢꓲ ꓮ ꓖꓴꓽ ꓖꓳ ꓟ ꓩꓴ ꓓꓳ ꓗꓷ ꓠꓬ ꓟꓽ ꓬꓲꓼ ꓡꓺꓳ=

ꓬꓲꓻ ꓙꓬ ꓠꓬ ꓫꓱ ꓡꓰ ꓖꓴꓳ= ꓖꓳ ꓕꓯ ꓪꓴ-ꓢ ꓡꓰ ꓠꓳ-ꓪ ꓔꓯ꓾ ꓠꓴˍ ꓐꓰ ꓠꓴ ꓤ ꓟꓶꓻ꓾ ꓠꓴ ꓤ ꓠꓴ ꓛꓲꓼ ꓟ ꓐꓴ ꓔꓯ ꓦꓲ ꓡꓲ ꓗꓪ ꓐꓰ ꓧꓳꓽ ꓓꓳ ꓙꓰ꓾ ꓐꓯˍ ꓡꓳ= ꓖꓳ ꓕꓯ ꓠꓳ-ꓪ ꓠꓬ ꓪꓴ-ꓢ ꓔꓯ ꓔꓲ ꓖꓶ ꓖꓴ ꓕꓲ ꓟ ꓜꓶ ꓢꓲ꓾ ꓫꓬꓹ ꓟ ꓚꓬꓹ ꓔ ꓟ ꓦꓵꓻ ꓙꓱꓽ ꓠꓲꓸ ꓙꓱꓽˍ ꓐꓰ ꓠꓬꓹ ꓣꓴ ꓢꓲ ꓛꓴ ꓔꓲ ꓖꓶˍ ꓡꓳ=

ꓪꓴ-ꓢ ꓡꓰ꓾ ꓡ ꓞꓳ ꓠꓬ ꓞꓲꓼ ꓣꓳˍ ꓕꓯ ꓡꓰ ꓥꓶˍ ꓬꓰˍ ꓟ ꓥˍ ꓟꓲ ꓬꓲ ꓑꓶ ꓓꓴ ꓝꓮꓲ ꓕꓲ ꓧꓪꓹ ꓟꓲ ꓠꓯ ꓔꓯ ꓥꓪ ꓟꓽ ꓙꓱꓽ ꓳ= ꓢꓯꓸ ꓫꓵ ꓢꓯꓸ ꓙꓰ ꓔꓯˍ ꓟꓲ ꓝꓮꓲ ꓕꓲ ꓧꓪꓹ ꓟꓽ ꓟꓶꓽ ꓬꓰ ꓝꓲꓳ= ꓟꓲ ꓠꓯ ꓙꓳ ꓞꓹ ꓕ ꓑꓳ꓾ ꓔꓶ ꓝꓲꓸ꓾ ꓫ ꓝꓲꓸ꓾ ꓙꓬ ꓝꓲꓸ꓾ ꓞꓻ ꓝꓲꓸ꓾ ꓟꓵꓽ ꓞꓴꓽ꓾ ꓟꓵꓽ ꓫꓱ꓾ ꓟꓳ ꓡꓳˍ ꓐꓰ ꓢ ꓘꓪ ꓬꓲ ꓑꓶꓸ ꓟ ꓞꓷꓹ ꓙꓳ ꓔꓬ ꓝꓲˍ ꓥꓳ꓾ ꓐꓯˍ ꓡꓳ= ꓝꓮꓲ ꓠꓬ ꓠꓳ-ꓪˍ ꓐꓰ ꓬꓲ ꓤ ꓐꓴ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓢꓲ꓾ ꓠꓴ ꓪ ꓠꓬ ꓤ ꓠꓱ ꓦꓵꓻ ꓠꓬꓲ ꓟꓬꓽ ꓡ ꓢꓲ꓾ ꓟꓵꓽ ꓕꓯꓽ ꓗꓳꓸ ꓕꓯꓽ ꓗꓪ ꓔꓬ ꓐꓲ ꓡꓰ ꓝꓲ꓾ ꓐꓯ ꓖꓶˍ ꓡꓳ=

 

 

 

Add new comment

7 + 6 =