ꓟꓷꓽ ꓠꓷꓹ ꓝ ꓒ ꓢ-ꓟꓴ-ꓬꓰ ꓟꓸ ꓟꓲꓽ

ꓟꓷꓽ ꓠꓷꓹ ꓝ ꓒ ꓱ-ꓡꓲ-ꓬ ꓦꓬꓼ ꓠꓬꓲ ꓗꓪ ꓧ-ꓠ ꓟꓬꓱꓺ ꓔ ꓟ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ= ꓬꓲ ꓠꓬ ꓤ ꓠꓱ ꓕꓲ ꓣꓳ ꓮ ꓘꓶꓸ ꓟꓶ ꓠꓲꓹ ꓫꓵˍ ꓡꓳ= ꓬꓲ ꓠꓬ ꓡꓯꓽ ꓒꓯꓹ ꓝ ꓗꓷ ꓟ ꓟꓶ ꓤ ꓙꓳˍ ꓟꓲ ꓤ ꓠꓱ ꓕꓲ ꓣꓳˍ ꓟꓲ ꓟꓽ ꓙꓳ= ꓖꓳ ꓡꓱ ꓠꓬꓲ ꓧ-ꓠ ꓠꓬ ꓪꓴꓸ ꓓꓵ ꓕꓱꓼ ꓖꓴ ꓗꓪ ꓙꓰ ꓢꓲ ꓬꓲ ꓔꓯ ꓤ ꓠꓱ ꓕꓲ ꓣꓳ ꓖꓶ ꓠꓹ ꓟ ꓪꓴ-ꓢ ꓔꓯ ꓪꓽ ꓘꓴˍ ꓡꓳ= ꓪꓴ-ꓢ ꓠꓴ ꓡꓰ ꓥꓪ ꓔꓯ ꓤ ꓕꓲ ꓣꓳ ꓖꓶ ꓡˍ ꓠꓬꓥꓪ ꓠꓬꓲ ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓪꓴ-ꓢ ꓠꓴ ꓔꓯ ꓖꓶ ꓡˍ ꓥꓳ꓾ ꓐꓰ ꓪꓵꓼ ꓘꓶ ꓖꓶꓽˍ ꓡꓳ=

ꓧ-ꓠ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓢꓯꓼ ꓟꓽ ꓓꓳ ꓓꓳ ꓐꓰ ꓪ ꓘꓴ ꓢꓲ ꓟꓷ ꓠꓷ ꓗꓴꓹ ꓙꓲˍ ꓡꓰꓽ ꓡꓵ ꓢꓲ ꓡꓯ ꓫꓵ ꓪꓽ ꓘꓴ ꓔꓬ ꓡꓳ= ꓖꓳ ꓟ ꓔꓯ ꓱ-ꓡꓲ-ꓬ ꓟꓳ ꓗꓷ ꓠꓬꓲ꓾ ꓧ-ꓠ ꓠꓬ ꓙꓲꓻ ꓒꓶꓽ ꓓꓳ ꓬꓲꓼ ꓡꓰꓳ ꓐꓰ ꓓꓵꓽ ꓙ ꓢꓲ ꓬꓲ ꓔꓯ ꓠꓴ ꓙꓲꓻ ꓒꓶ ꓓꓳˍ ꓟ ꓠꓽ ꓗꓷ꓾ ꓐꓯ ꓖꓶˍ ꓡꓳ=ꓖꓳ ꓕꓯ ꓧ-ꓠ ꓡꓰ ꓬꓲ ꓔꓯ ꓥꓪ ꓠꓽ ꓙꓲꓻ ꓒꓶ ꓟꓽ ꓓꓳ= ꓥꓪ ꓠꓬ ꓤ ꓕꓲ ꓣꓳ ꓟꓶ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓪꓴ-ꓢ ꓔꓯ ꓓꓰꓽ ꓔꓬ ꓟ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓕꓯ ꓱ-ꓡꓲ-ꓬ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓧꓪꓸ ꓧꓪꓸꓼ ꓐꓰ ꓬꓲꓼ ꓙꓰ=ꓪꓴ-ꓢ ꓡꓰ ꓠꓴ ꓔꓯ ꓤ ꓕꓲ ꓣꓳ ꓖꓶꓽ ꓡˍ ꓥꓳ꓾ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓧ-ꓠ ꓠꓬ ꓗꓹ ꓛꓲ ꓛꓲ ꓡꓰ ꓦꓲꓻ ꓗꓪ ꓬꓲꓼ ꓙꓰ ꓗꓷꓳ= ꓗꓸ ꓠꓯ ꓱ-ꓡꓲ-ꓬ ꓐꓯ ꓔ ꓟ ꓕꓲ ꓡꓰꓹꓼ ꓒꓬꓱꓼ ꓡ ꓢꓲ ꓧ-ꓠ ꓠꓬ ꓤ ꓕꓲ ꓣꓳ ꓦꓵꓻ ꓡ ꓢꓲ ꓠꓬꓲ꓾ ꓬꓲ ꓔꓯ ꓢ-ꓟꓴ-ꓬꓰ ꓐꓰ ꓟꓬꓱꓺ ꓖꓶˍ ꓡꓳ=

ꓢ-ꓟꓴ-ꓬꓰ ꓪꓴꓽ ꓡˍ ꓕꓯ ꓧ-ꓠ ꓡꓰ ꓪꓴ-ꓢ ꓔꓯ ꓪꓵꓼ ꓘꓶ ꓖꓶ ꓔ ꓟ ꓡꓰ ꓐꓰ ꓢ-ꓟꓴ-ꓬꓰ ꓔꓯ ꓪ ꓘꓴ ꓦꓲ ꓗꓪ ꓟꓬꓱꓽ ꓬꓰ ꓠꓹ ꓟ ꓔꓲꓺ ꓖꓶˍ ꓡꓳ= ꓖꓳ ꓡꓱ ꓢꓲ ꓤ ꓠꓱ ꓤ ꓢ-ꓟꓴ-ꓬꓰ ꓠꓬ ꓔꓲ ꓒ ꓱ-ꓡꓲ-ꓬ ꓟꓲ ꓙꓬ ꓗꓪ ꓪꓴ-ꓢ ꓔꓯ ꓣꓱꓽ ꓙ ꓔꓬ ꓡꓳ= ꓱ-ꓡꓲ-ꓬ ꓬꓲ ꓤ ꓐꓴ ꓠꓬ ꓞꓳ ꓐꓬ ꓞꓳ ꓛꓵꓽ ꓥ ꓢꓲ ꓬꓲ ꓪ ꓠꓬ ꓪꓴ-ꓢ ꓔꓯˍ ꓟꓲ ꓟꓽ ꓢꓷꓸ= ꓬꓲ ꓪ ꓐꓴ ꓥˍ ꓟꓲ ꓬꓲ ꓐꓹ ꓐ ꓱ-ꓡꓲ-ꓬ ꓐꓰ ꓕꓲ ꓪ ꓪꓽ ꓘꓴ ꓦꓲ ꓗꓪ ꓔꓬ ꓡꓳ=

ꓕꓲ ꓦꓬꓽ꓾ ꓢ-ꓟꓴ-ꓬꓰ ꓬꓲꓼ ꓔ ꓔꓬ ꓕꓯ ‘ꓢ-ꓟꓴ-ꓬꓰꓳ’ ꓐꓰ ꓘꓴˍ ꓟ ꓢꓯꓼ ꓔꓯ ꓑ ꓙˍ ꓡꓳ= ꓢ-ꓟꓴ-ꓬꓰ ꓠꓬ ꓪꓴ-ꓢ ꓬꓲ ꓔꓯ ꓘꓴˍ ꓟ ꓔꓯ ꓟꓽ ꓢꓷ꓾ ꓱ-ꓡꓲ-ꓬ ꓬꓲ ꓔꓯ ꓘꓴ ꓔꓬ ꓡꓳ ꓐꓰ ꓓꓵꓽ ꓙ ꓢꓲ꓾ ꓬꓲ ꓔꓬ ꓗꓪ ꓔꓷꓹ ꓙꓰ ꓢꓲ ꓠꓬꓲ꓾ ꓥꓪ ꓕ ꓔꓬ ꓡꓳ꓾ ꓠꓴ ꓥꓪ ꓔꓯ ꓘꓴˍ ꓡ? ꓐꓰ ꓠ ꓠꓬꓲˍ ꓡꓳ= ꓖꓳ ꓕꓯ ꓱ-ꓡꓲ-ꓬ ꓔꓴ ꓢꓲ ꓢ-ꓟꓴ-ꓬꓰ ꓔꓯ ꓡꓳꓸ ꓢꓲ ꓠꓬꓲ ‘ ꓠꓴ ꓔꓯ ꓛꓪ ꓟꓽ ꓘꓴ꓾ ꓬꓲꓼ ꓔ ꓙꓰ꓾ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓢ-ꓟꓴ-ꓬꓰ ꓠꓽ ꓬꓲꓼ ꓔ ꓙꓰˍ ꓡꓳ=

ꓢ-ꓟꓴ-ꓬꓰ ꓠꓬ ꓬꓲ ꓔꓯ ꓘꓴˍ ꓟ ꓢꓯꓼ ꓝꓮꓲ ꓕꓲ ꓧꓪꓹ ꓑ ꓙꓽˍ ꓠꓬꓲ ꓱ-ꓡꓲ-ꓬ ꓔꓬ ꓗꓪ ꓙꓰ ꓢꓲ꓾ ꓥꓪ ꓕ ꓔꓬ ꓡꓳ꓾ ꓠꓴ ꓥꓪ ꓔꓯ ꓘꓴˍ ꓡꓳ ꓟꓽ ꓥ ꓡ? ꓐꓯ ꓖꓶˍ ꓡꓳ= ꓱ-ꓡꓲ-ꓬ ꓡꓰ꓾ ꓥꓪ ꓤꓽꓳ꓾ ꓠꓴ ꓔꓯ ꓥꓪ ꓟꓽ ꓘꓴ꓾ ꓬꓲꓼ ꓔ ꓙꓰ ꓐꓯ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓔꓯ ꓘꓴˍ ꓟ ꓢꓯꓼ ꓔꓯ ꓝꓮꓲ ꓕꓲ ꓧꓪꓹ ꓑ ꓙꓽˍ ꓡꓳ= ꓖꓳ ꓡꓱ ꓠꓬꓲ ꓢ-ꓟꓴ-ꓬꓰ ꓡꓰ ꓱ-ꓡꓲ-ꓬ ꓔꓬ ꓗꓪ ꓔꓷꓹ ꓙꓰ ꓢꓲ꓾ ꓠꓴ ꓠꓬ ꓥꓪ ꓔꓯ ꓚꓵ ꓚꓵ ꓘꓴ ꓗꓷꓳ꓾ ꓥꓪ ꓕ ꓔꓬ ꓡꓳ꓾ ꓐꓯˍ ꓡꓳ=

ꓢ-ꓟꓴ-ꓬꓰ ꓔꓯ ꓪꓴ-ꓢ ꓘꓴˍ ꓟ ꓔꓯ ꓱ-ꓡꓲ-ꓬ ꓢꓷ ꓡꓰ ꓠꓬꓲ ꓢ-ꓟꓴ-ꓬꓰ ꓔꓯ꓾ ꓠꓴ ꓠꓬ ꓠꓴ ꓬꓲꓼ ꓔ ꓖꓴ ꓗꓪ ꓬꓲꓼ ꓔ ꓙꓰ= ꓠꓴ ꓔꓯ ꓘꓴˍ ꓟ ꓝꓮꓲ ꓕꓲ ꓧꓪꓹ ꓑ ꓙꓽˍ ꓠꓬ꓾ ꓪꓴ-ꓢꓺꓳ꓾ ꓫꓸ ꓕꓱ ꓡꓯ꓾ ꓠꓴ ꓚꓳ ꓑꓸ ꓥꓪ ꓠ ꓠꓹ ꓔꓬ ꓥꓳ꓾ ꓐꓯ ꓖꓶ꓾ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓢ-ꓟꓴ-ꓬꓰ ꓠꓽ ꓝꓮꓲ ꓬꓲꓼ ꓔ ꓙꓰˍ ꓡꓳ=

ꓝꓮꓲ ꓪꓴ-ꓢ ꓡꓰ ꓫꓸ ꓕꓱ ꓡ ꓢꓲ꓾ ꓢ-ꓟꓴ-ꓬꓰꓳ꓾ ꓢ-ꓟꓴ-ꓬꓰꓳ꓾ ꓐꓰ ꓘꓴˍ ꓡꓳ= ꓬꓲ ꓡꓰ ꓫ ꓕꓱ ꓡꓯ꓾ ꓠꓴ ꓚꓳ ꓑꓸ ꓥꓪ ꓠ ꓠꓹ ꓔꓬ ꓥꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓢ-ꓟꓴ-ꓬꓰ ꓔꓯ ꓫ ꓕꓱˍ ꓡꓳ= ꓪꓴ-ꓢ ꓡꓰ ꓢ-ꓟꓴ-ꓬꓰ ꓔꓯ ꓱ-ꓡꓲ-ꓬ ꓬꓲ ꓤ ꓐꓴ ꓥꓶˍ ꓟ ꓬꓰˍ ꓟ ꓑꓶꓸ ꓓꓴ ꓬꓲ ꓪ ꓐꓴ ꓔꓯ ꓟꓸ ꓙꓽˍ ꓥꓳ꓾ ꓐꓯˍ ꓡꓳ=

ꓕꓱ ꓟ ꓔꓯ ꓑ ꓙꓽ ꓡꓰ ꓕꓯ ꓢ-ꓟꓴ-ꓬꓰ ꓮ ꓘꓶꓸ ꓠꓲꓹ ꓟ ꓫꓸ ꓡꓳ= ꓗꓸ ꓠꓯꓸ ꓠꓯꓼ ꓕꓯ ꓪꓴ-ꓢ ꓐꓯ ꓖꓶ ꓡˍ ꓟ ꓮꓽ ꓙꓵꓽ ꓔꓯ ꓱ-ꓡꓲ-ꓬ ꓡꓰ ꓢꓷꓸ ꓠꓲꓹ ꓫꓵˍ ꓠꓬꓲ ꓢ-ꓟꓴ-ꓬꓰ ꓔꓯ ꓠ ꓠꓬꓲˍ ꓕꓯ ꓾ ꓱ-ꓡꓲ-ꓬ ꓡꓰ ꓬꓲ ꓤ ꓐꓴ ꓔꓯ ꓪꓴ-ꓢ ꓔꓯ ꓠ ꓡꓳꓸ ꓠꓹ ꓟ ꓟꓽ ꓟꓸ ꓖꓶ ꓔ ꓟ ꓪꓴꓸ ꓠꓬꓲ꓾ ꓬꓲ ꓪ ꓐꓴ ꓔꓯ ꓟꓸ ꓙꓽˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓗꓸ ꓠꓯꓸ ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓗꓪ ꓱ-ꓡꓲ-ꓬ ꓬꓲ ꓤ ꓐꓴ ꓫꓵꓻ ꓳ= 

ꓢ-ꓟꓴ-ꓬꓰ ꓠꓬ ꓪꓴꓽ ꓡ ꓢꓲ ꓬꓲ ꓕꓲ ꓖꓳ ꓓꓱꓽ ꓕꓲ ꓠꓲꓹ ꓟ ꓡꓱꓸꓼ ꓪꓴ-ꓢ ꓔꓯ ꓣꓱꓽ ꓙˍ ꓡꓳ= ꓢ-ꓟꓴ-ꓬꓰ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓲ ꓬꓲ-ꓢꓷ-ꓡꓰ ꓐꓴ ꓔꓯ ꓠꓲꓹ ꓪꓴꓽ ꓪꓴꓽ ꓡꓰꓽ ꓧꓳꓽ ꓪꓴꓸ ꓟꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ= ꓬꓲ ꓑ ꓫꓬ ꓐꓴ ꓔꓯ ꓟꓸ ꓖꓶ ꓠꓹ ꓟ ꓪꓴ-ꓢ ꓗꓪ ꓐꓰ ꓮꓽ ꓟꓬꓹ ꓧꓪꓹ ꓕꓵꓼ ꓪꓽ ꓘꓶꓽ ꓟꓶ ꓗꓷꓳ=