ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ ꓟꓸ ꓟꓲꓽ

ꓧꓶꓸ ꓕꓯ ꓕꓲ ꓞꓲꓼ ꓗꓪ ꓪꓴ-ꓢ ꓠꓬ ꓐꓯ ꓘꓶꓽ ꓞꓳ ꓤ ꓔꓬ ꓗꓪ ꓛꓲ ꓬꓰ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓞꓳ ꓑ ꓐꓰ ꓤ ꓟꓶ ꓤ ꓮꓽ ꓟꓬꓹ ꓔꓯ ꓢꓲꓺ ꓗꓷꓳ= ꓢꓲꓺ ꓔ ꓟ ꓟꓶ ꓡꓰ ꓢꓴ ꓥ ꓕ ꓑꓳꓸ ꓠꓬ ꓠꓱꓸ ꓐꓯꓼ ꓑ ꓫꓬ ꓕꓯꓽ ꓢꓲ ꓶ ꓙꓳ ꓫꓱꓹ ꓙꓳ ꓢꓴ꓾ ꓥ ꓠꓬ꓾ ꓞꓳ ꓐꓳ꓾ ꓥ ꓠꓬ꓾ ꓢꓷꓸ ꓠꓲꓹ ꓙ ꓜꓲꓼ ꓠꓲꓹ ꓙꓳ ꓢꓴ꓾ ꓥ ꓠꓬ꓾ ꓒꓬꓱꓽ ꓐꓲ ꓢꓴ ꓐꓴ ꓟꓽ ꓥ= ꓬꓲ ꓪ ꓠꓬ ꓞꓳ ꓙꓲꓻ ꓞꓳ ꓔꓱꓹ ꓥ ꓟ ꓑꓶꓸ ꓓꓴ ꓪꓴ-ꓢ ꓡꓰ ꓬꓲ ꓪ ꓔꓯ ꓢꓲꓺ ꓗꓷ ꓟ ꓥꓳ= ꓕꓲ ꓖ ꓕꓲ ꓧꓪꓹ ꓢꓲꓺ ꓔ ꓟ ꓟꓶ ꓢꓴ ꓠꓬ ꓟꓷꓽ ꓠꓷꓹ ꓝ ꓢꓴ ꓬꓰ ꓠꓲꓹ ꓟꓽ ꓫꓵ= ꓮ ꓫꓵꓽ ꓪꓴꓸ ꓠꓬꓲ ꓥ ꓐꓯ ꓠꓬ꓾ ꓬꓲ ꓪ ꓐꓴ ꓔꓳꓹ ꓜꓳꓽ ꓪˍ ꓟ ꓫꓸ ꓙꓵ ꓓꓴ ꓔꓯ ꓬꓲ ꓪ ꓢꓷꓸˍ ꓠꓬꓲ ꓥ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓪ ꓔꓳꓹ ꓜꓳꓽ ꓪˍ ꓟ ꓫꓸ ꓙꓵ ꓓꓴ ꓐꓴ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓐꓱ ꓶ ꓪꓴ-ꓢ ꓡꓰ ꓬꓲ ꓪ ꓔꓯ ꓢꓯꓼ ꓪꓽ ꓖꓶˍ ꓡꓳ=

ꓢꓲꓺ ꓔ ꓟ ꓟꓶ ꓢꓴ ꓐꓴ ꓗꓪ ꓟ ꓬꓰ-ꓡꓲ-ꓟꓲ ꓠꓬ ꓔꓱꓹ ꓚꓵ ꓢꓴ ꓕꓲ ꓣꓳ ꓥꓳ= ꓬꓲ ꓠꓬ ꓔꓲꓺ ꓒ ꓫꓵꓽ ꓗꓪ ꓐꓰ ꓡ ꓢꓴ ꓥ ꓠꓬꓲ ꓪꓴ-ꓢ ꓬꓲ ꓔꓯ ꓘꓴˍ ꓕꓯ ꓬꓲ ꓤꓶꓻ ꓗꓪ ꓫ ꓙꓵ ꓓꓴ ꓔꓳꓹ ꓜꓳꓽ ꓪˍ ꓟ ꓔꓯ ꓢꓷˍ ꓠꓬꓲ ꓬꓲ ꓮ ꓘꓶꓸ ꓙꓳꓺ ꓛꓱꓽˍ ꓡꓳ= ꓬꓲ ꓡꓰ ꓾ ꓪꓴ-ꓢꓺꓳ ꓾ ꓮ ꓡꓲ ꓫ ꓕꓱ ꓠꓯˍ ꓟ ꓥꓪ ꓟꓽ ꓢꓷꓸ= ꓥꓪ ꓠꓽ ꓞꓲꓼ ꓣꓳˍ ꓢꓰꓽ ꓡꓳ꓾ ꓐꓯ ꓖꓶˍ ꓡꓳ=

ꓪꓴ-ꓢ ꓡꓰ ꓬꓲ ꓙꓳꓺ ꓔꓬ ꓟ ꓔꓯ ꓢꓷˍ ꓠꓬꓲ ꓠꓱꓸ ꓑꓴ ꓙꓵꓻ ꓒ ꓔꓯ ꓥꓳꓽ ꓟꓸ ꓖꓶ ꓗꓷꓳ= ꓠꓱꓸ ꓑꓴ ꓙꓵꓻ ꓒ ꓠꓬ ꓛꓬꓼ ꓡꓯꓼ ꓗꓪ ꓠꓱꓸ ꓑꓴ ꓙꓵꓻ ꓟꓬꓱꓽ ꓬꓰ ꓔꓬ ꓡꓳ= ꓬꓲ ꓫꓬꓹ ꓔꓬ ꓟ ꓠꓱꓸ ꓡꓴꓻ ꓮ ꓘꓶꓸ ꓟꓽ ꓙꓲ ꓠꓬꓲ ꓖꓳ ꓟ ꓔꓯ ꓣꓴ ꓢꓲ꓾ ꓠꓱꓸ ꓑꓴ ꓙꓵ ꓬꓲ ꓮ ꓡꓲ ꓠꓲꓹ ꓫꓵˍ ꓠꓬ ꓖꓳ ꓡꓱ ꓝꓮꓲ ꓕꓲ ꓧꓪꓹ ꓫꓬꓹ ꓡꓳ=

ꓪꓴ-ꓢ ꓡꓰ ꓬꓰ-ꓡꓲ-ꓟꓲ ꓔꓯ ꓾ ꓥꓪ ꓡ ꓞꓳ ꓐꓴ ꓠꓬ ꓠꓱꓸ ꓑꓴ ꓙꓵꓻ ꓒ ꓡꓯꓽ ꓒꓯꓹ ꓗꓪ ꓟ ꓠꓱꓸ ꓠꓲ ꓠꓴꓽ ꓔꓯ ꓫꓱꓸˍ ꓡꓳ= ꓬꓲ ꓪ ꓐꓴ ꓥꓶˍ ꓟ ꓙ ꓖꓴ ꓗꓪ ꓙꓰˍ ꓠꓬ ꓥꓪ ꓡꓰ ꓬꓲ ꓪ ꓔꓯ ꓐꓬ ꓡꓰ ꓝꓲˍ ꓥꓳ= ꓖꓳ ꓡꓱ ꓥ ꓟꓲ ꓬꓲ ꓪ ꓥꓪ ꓙꓵꓽ ꓗ ꓔꓯ ꓒꓵꓽ ꓛꓳˍ ꓠꓬ ꓬꓲ ꓪ ꓔꓯ ꓙꓲˍ ꓟ ꓗꓷ ꓡꓰ ꓝꓲ ꓢꓲ ꓪꓽ ꓠꓬꓲ ꓡ ꓝꓲˍ ꓥꓳ= ꓕꓱ ꓟ ꓐꓱ ꓶ ꓥꓪ ꓡꓰ ꓠꓴ ꓔꓯ ꓢꓲꓺ ꓗꓷ ꓟ ꓪꓴꓸ ꓠꓬꓲ ꓕꓽ ꓙꓳꓺ꓾ ꓐꓯˍ ꓡꓳ= ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓬꓰ-ꓡꓲ-ꓟꓲ ꓠꓬ ꓪꓴ-ꓢ ꓟꓬꓱꓽ ꓬꓰ ꓠꓹ ꓟ ꓟꓽ ꓙꓳꓺ ꓗꓷ ꓡꓰꓳ=

ꓬꓰ-ꓡꓲ-ꓟꓲ ꓠꓬ ꓪꓴ-ꓢ ꓢꓲꓺ ꓔ ꓢꓴ ꓥ ꓡꓳ= ꓐ-ꓐꓲ-ꓡꓶꓽ ꓟꓯꓼ ꓜꓴ ꓐꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓰ ꓟꓯꓼ ꓓꓶꓽ ꓡꓯ ꓘꓳ ꓡ ꓥꓳ꓾ ꓐꓰ ꓙꓳꓺ ꓗꓽ ꓖꓶ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓟꓽ ꓠ ꓠꓹ= ꓬꓰ-ꓡꓲ-ꓟꓲ ꓡꓰ ꓬꓲ ꓪ ꓗꓴꓷꓼ ꓔꓯ ꓡꓳꓺ ꓗꓷ ꓢꓲ ꓙꓰ ꓠꓹ ꓟ ꓐꓯ ꓖꓶˍ ꓟꓲ ꓬꓲ-ꓢꓷ-ꓡꓰ ꓐꓴ ꓠꓬ ꓖꓳ ꓗꓪ ꓔꓬ ꓢꓲ ꓟꓯꓼ ꓓꓶꓽ ꓡꓯ ꓘꓳꓹ ꓡꓳ= ꓕꓱ ꓡꓱ ꓐꓰ ꓬꓲ ꓐꓯ ꓟ ꓔꓯ ꓬꓲ ꓪ ꓟꓽ ꓠ ꓠꓹ ꓠꓬꓲ ꓬꓰ-ꓡꓲ-ꓟꓲ ꓠꓲꓹ ꓟ ꓫꓸ ꓡꓳ=

ꓬꓰ-ꓡꓲ-ꓟꓲ ꓐꓯ ꓘꓶꓽ ꓮ ꓙꓵꓽ ꓒꓬꓱꓼ ꓡˍ ꓠꓬꓲ ꓡꓳ ꓒꓱ ꓘꓴꓽ ꓗꓪ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓬꓲ ꓔꓯ ꓟꓽ ꓠꓲꓹ ꓒꓴ= ꓬꓲ ꓪ ꓠꓬ ꓪ ꓔꓲ ꓔꓬ ꓗꓪ ꓙꓰ ꓢꓲ ꓬꓰ-ꓡꓲ-ꓟꓲ ꓔꓯ ꓒꓳꓹ ꓔꓳ ꓠꓹ ꓟ ꓢꓯꓼ ꓕꓵꓼˍ ꓡꓳ= ꓬꓲ ꓪ ꓡꓰ ꓾ ꓬꓰ-ꓡꓲ-ꓟꓲ ꓠꓬ ꓙꓵꓽ ꓗ ꓔꓯ ꓛꓬꓻ ꓢꓴ ꓥ ꓟ ꓪꓴꓸ ꓬꓲ ꓔꓯ ꓖꓽ ꓓꓳ ꓗꓷ ꓠꓯꓹ ꓡꓳ꓾ ꓐꓯ ꓖꓶˍ ꓡꓳ= ꓪ ꓔꓲ ꓠꓬ ꓡꓳ ꓒꓱ ꓗꓪ ꓙꓵꓽ ꓪ ꓙꓳ ꓢꓴ ꓡꓳ ꓒꓱ ꓙꓵꓽ ꓢꓴ ꓐꓴ ꓔꓯ ꓒꓳꓹ ꓔꓳ ꓠꓹ ꓟ ꓙꓳꓺˍ ꓠꓬꓲ꓾ ꓠꓴ ꓪ ꓠꓲꓹ ꓫꓵˍ ꓟ ꓡꓰ ꓬꓰ꓾ ꓐꓰ ꓐꓯ ꓖꓶˍ ꓡꓳ=

ꓬꓰ-ꓡꓲ-ꓟꓲ ꓠꓬ ꓪꓴ-ꓢ ꓡꓰ ꓢꓲꓺ ꓔ ꓢꓴ ꓥ ꓠꓬꓲ ꓣꓳꓽ ꓬꓲ ꓔꓯ ꓢꓰꓼ ꓗꓷ ꓟꓽ ꓓ꓾ ꓐꓰ ꓬꓲ ꓪ ꓚꓲ ꓛꓬ ꓬꓲ ꓪ ꓐꓯ ꓔꓬ ꓡꓳ= ꓡꓳꓹ ꓬꓰ ꓗꓪ ꓬꓲ ꓪ ꓠꓬ ꓬꓰ-ꓡꓲ-ꓟꓲ ꓔꓯ ꓬꓲꓻ ꓚꓴꓸ ꓘꓴ ꓗꓪ ꓧꓳꓽ ꓗꓷ ꓢꓲ ꓦꓰꓼ ꓟꓷꓼ ꓫꓵꓻ ꓝꓲ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ= ꓖꓳ ꓡꓱ ꓠꓬꓲ ꓕꓲ ꓟꓶꓽ ꓘꓶꓼ ꓗꓪ ꓬꓲ ꓪ ꓠꓬ ꓬꓲ ꓔꓯ ꓣꓴ ꓢꓲ ꓬꓲꓻ ꓚꓴꓸ ꓘꓴ ꓗꓪ ꓧꓳꓽ ꓗꓷꓹ ꓡꓳ=

ꓪ ꓔꓲ ꓙꓻ ꓗꓪ ꓟ ꓕꓲ ꓣꓳ ꓠꓬ ꓡꓳ ꓒꓱ ꓙꓵꓽ ꓢꓴ ꓐꓴ ꓬꓰ ꓗꓷ ꓟ ꓔꓯ ꓟꓳ ꓡꓰ ꓠꓬꓲ ꓪ ꓔꓲ ꓔꓬ ꓗꓪ ꓙꓰ ꓢꓲ꓾ ꓪ ꓔꓲꓸꓳ꓾ ꓡꓳ ꓒꓱ ꓙꓵꓽ ꓢꓴ ꓐꓴ ꓡꓰ ꓬꓰ-ꓡꓲ-ꓟꓲ ꓔꓯ ꓬꓲꓻ ꓚꓴꓸ ꓘꓴ ꓗꓪ ꓧꓳꓽ ꓗꓷꓳ= ꓬꓲ ꓖꓳ ꓗꓪ ꓔꓬ ꓠꓬ ꓦꓰꓼ ꓟꓷꓼ ꓢꓲ ꓫꓵꓻˍ ꓥꓳ= ꓬꓲ ꓫꓵꓻˍ ꓠꓬ ꓣꓳ ꓕꓯꓽ ꓢꓲ ꓗꓪ ꓫꓸ ꓙꓵ ꓓꓴ ꓬꓯꓼ ꓡˍ ꓥꓳ= ꓬꓲ ꓠꓬ ꓪꓴ-ꓢ ꓡꓰ ꓢꓲꓺ ꓔ ꓢꓴ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓬꓲ ꓔꓯ ꓚꓬꓴꓸ ꓙ ꓠꓯꓹ ꓡꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓢꓲ ꓪ ꓔꓲ ꓡꓰ ꓬꓰ-ꓡꓲ-ꓟꓲ ꓔꓯ ꓩꓴ ꓗꓷ ꓠꓹ ꓟ ꓐꓯ ꓖꓶ ꓠꓬꓲ꓾ ꓪ ꓔꓲ ꓙꓻ ꓠꓬ ꓬꓲꓻ ꓚꓴꓸ ꓘꓴ ꓗꓪ ꓦꓲ ꓚ ꓞꓳꓹ ꓚ ꓡꓳꓺ ꓩꓴ ꓗꓷ ꓢꓲ ꓬꓰ-ꓡꓲ-ꓟꓲ ꓔꓯ ꓚꓵꓹ ꓓꓳ ꓗꓷꓳ=

ꓪꓴ-ꓢ ꓙꓵꓽ ꓗ ꓔꓯ ꓟꓽ ꓛꓳ ꓫꓱꓽ ꓠꓬ ꓪꓴ-ꓢ ꓡꓰ ꓟꓸ ꓙꓽˍ ꓟ ꓔꓯ ꓮ ꓠꓱ ꓕꓯ ꓟ ꓟꓷꓽ ꓠꓷꓹ ꓝ ꓒ ꓐꓴ ꓡꓰ ꓑ ꓫꓬ ꓐꓴ ꓔꓯ ꓐꓯ ꓟꓸ ꓖꓶ ꓗꓷꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓠ ꓠꓹ꓾ ꓬꓲ ꓪ ꓠꓲꓹ ꓟ ꓔꓯˍ ꓟꓲ ꓟꓽ ꓡꓶꓸ ꓗꓷ= ꓮ ꓘꓶꓸ ꓪꓽ ꓠꓬꓲˍ ꓟ ꓐ-ꓐꓲ-ꓡꓶꓽ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓡꓳꓹ ꓬꓰˍ ꓕꓯ ꓙꓱ-ꓣꓴ-ꓢ-ꓡꓱ ꓔꓯ ꓓꓶꓽ ꓧꓪꓸ ꓡꓰꓳ= ꓡꓳ ꓒꓱ ꓗꓪ ꓒꓵꓽˍ ꓟ ꓮ ꓙꓵꓽ ꓔꓯˍ ꓟꓲ ꓣꓴ ꓔꓯꓹ ꓙꓰ ꓗꓷꓳ= ꓬꓳ-ꓔ ꓪ ꓔꓲ ꓬꓲꓸ ꓟꓶꓽ ꓕꓲ ꓣꓳ ꓥ ꓟ ꓜꓷ-ꓓꓷ-ꓘꓷ-ꓬ ꓔꓯˍ ꓟꓲ ꓛꓳꓹ ꓔꓯꓹ ꓙꓰꓳ= ꓪꓴ-ꓢ ꓡꓰ ꓬꓲ ꓡ ꓞꓳ ꓐꓴ ꓔꓯ ꓠꓲꓹ ꓟ ꓦꓶꓹ ꓟ ꓪꓴꓸ ꓠꓬꓲ ꓬꓲ ꓪ ꓔꓯ ꓬꓲ ꓡꓰ ꓡꓳꓺ ꓒꓰꓹ ꓗꓷꓳ=   

ꓝꓮꓲ ꓬꓳ-ꓔ ꓡ ꓞꓳ ꓡꓰ ꓪꓴ-ꓢ ꓙꓵꓽ ꓗ 10 ꓙꓰꓽ ꓔꓯ ꓖꓼ ꓛꓳ ꓠꓹ ꓟ ꓟꓲ ꓡꓰ ꓔꓬ ꓡꓳ= ꓖꓳ ꓕꓯ ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ ꓡꓰ ꓬꓲ ꓪ ꓐꓴ ꓪꓴ-ꓢ ꓙꓵꓽ ꓗ ꓟꓽ ꓛꓳ ꓠꓬ ꓫꓸ ꓙꓵ ꓓꓴ ꓓꓽ ꓟ ꓔꓳꓹ ꓜꓳꓽˍ ꓥꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓬꓳ-ꓔ ꓡ ꓞꓳ ꓐꓴ ꓠꓬ ꓬꓲ ꓔꓯ ꓟꓽ ꓠ ꓠꓹ=

ꓖꓳ ꓗꓸ ꓠꓯꓸ ꓐ-ꓐꓲ-ꓡꓶ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓡꓰ ꓬꓲ ꓪ ꓡꓳ ꓒꓱ ꓔꓯ ꓟꓯꓼ ꓓꓶꓽ ꓡꓯ ꓘꓳ ꓡˍ ꓡꓳ= ꓐ-ꓐꓲ-ꓡꓶ ꓟꓯꓼ ꓜꓴ ꓡꓰ ꓬꓲ ꓪ ꓦꓲ ꓮꓽ ꓙꓵꓽ ꓮꓸ ꓔꓳ ꓛꓴ ꓗꓷꓳ= ꓬꓲ ꓪ ꓠꓬ ꓢꓲꓽ ꓫꓬ ꓦꓲ ꓗꓪ ꓟ ꓒꓵꓽˍ ꓡꓳ ꓫꓵꓽ ꓮ ꓙꓵꓽ ꓫ ꓔꓯꓹ ꓙꓰ ꓗꓷꓳ= ꓬꓳ-ꓔ ꓡ ꓞꓳ ꓐꓴ ꓔꓯˍ ꓟꓲ ꓬꓲ ꓪ ꓚꓳ ꓑ ꓣꓱꓽ ꓠꓹ ꓟ ꓐ-ꓐꓲ-ꓡꓶꓽ ꓗꓪ ꓡꓳꓽ ꓔꓯꓹ ꓙꓰ ꓗꓷꓳ=

ꓬꓳ-ꓔ ꓡ ꓞꓳ ꓐꓴ ꓠꓬ ꓮ ꓘꓶꓸ ꓐꓲˍ ꓟ ꓐ-ꓐꓲ-ꓡꓶꓽ ꓗꓪ ꓛꓲ ꓬꓰ ꓥˍ ꓟꓲ ꓬꓲ ꓪ ꓔꓬ ꓟꓵꓽ ꓬꓯ ꓡꓰꓽ ꓢꓲꓼ ꓙꓬ ꓔꓬ ꓡꓳ= ꓬꓲ ꓪ ꓐꓴ ꓠꓬ ꓬꓳ-ꓔ ꓟꓴꓽ ꓖꓪ ꓔꓯ ꓟꓽ ꓠꓽ ꓠꓽ ꓖꓪ ꓢꓲ ꓬꓲ ꓪ ꓟꓽ ꓗꓹ ꓛꓲꓽ ꓟ ꓟꓳꓸ ꓖꓶ ꓔꓬ ꓡꓳ=  ꓑ ꓫꓬ ꓐꓴ ꓠꓬ ꓥꓳ ꓡꓳꓸ ꓓꓴ ꓒꓲꓼ ꓬꓰ ꓟꓶꓽ ꓬꓰ ꓔꓬ ꓠꓬꓲ꓾ ꓪꓴ-ꓢ ꓠꓬ ꓬꓲ ꓟꓷꓽ ꓠꓷꓹ ꓝ ꓒ ꓐꓴ ꓥ ꓟ ꓬꓰ-ꓡꓲ-ꓟꓲ ꓐꓰ ꓬꓲ-ꓫꓲ-ꓚꓰꓼ ꓔꓯ ꓘꓴˍ ꓡꓳ=

ꓪꓴ-ꓢ ꓡꓰ ꓬꓲ ꓪ ꓔꓯ ꓾ ꓥꓳ ꓡꓳꓸ ꓓꓴ ꓟꓽ ꓒꓲꓼ ꓟꓽ ꓟꓶꓽ ꓬꓰ ꓝꓲ ꓠꓹ ꓟ ꓥꓪ ꓑ ꓫꓬ ꓐꓴ ꓔꓯ ꓐꓯ ꓖꓶ= ꓥꓪ ꓠꓬ ꓬꓲ ꓪ ꓐꓴ ꓐꓰ ꓕꓲ ꓪꓽ ꓔꓬ ꓢꓰꓽ ꓡꓳ= ꓬꓲ ꓪ ꓐꓴ ꓔꓯ ꓮ ꓟꓶ ꓠꓬ ꓐ-ꓐꓲ-ꓡꓶꓽ ꓗꓪ ꓡꓰ ꓔꓬ꓾ ꓕꓲ ꓠꓬꓲ ꓙꓳˍ ꓠꓬ ꓬꓲ ꓪ ꓟꓵꓽ ꓐꓰ ꓬꓲ ꓪ ꓗꓹ ꓛꓲꓽ ꓓꓴ ꓥꓪ ꓡꓰ ꓬꓲ ꓪ ꓔꓯ ꓝꓮꓲꓸ ꓕꓲ ꓧꓪꓹ ꓖꓶˍ ꓥꓳ꓾ ꓐꓰ ꓐꓯ ꓖꓶꓽ꓾ ꓐꓯˍ ꓡꓳ=

ꓬꓰ-ꓡꓲ-ꓟꓲ ꓐꓰ ꓬꓲ-ꓫꓲ-ꓚꓰꓼ ꓐꓴ ꓥ ꓟꓲ ꓪꓴ-ꓢ ꓐꓯ ꓔ ꓟ ꓕꓲ ꓡꓰꓹꓼ ꓐꓯ ꓖꓶꓽˍ ꓡꓳ= ꓐ-ꓐꓲ-ꓡꓶꓽ ꓗꓪ ꓟ ꓬꓳ-ꓔ ꓡ ꓞꓳ ꓐꓴ ꓠꓬ ꓝꓮꓲ ꓕꓲ ꓧꓪꓹ ꓥꓳ ꓡꓳꓸ ꓓꓴ ꓙꓳ ꓡ ꓗꓷꓳ= ꓪꓴ-ꓢ ꓠꓬ ꓬꓲ ꓪ ꓐꓴ ꓐꓰ ꓔꓬ ꓟ ꓐꓰ ꓧˍ ꓟ ꓙꓲˍ ꓟ ꓦꓬꓼ ꓠꓬꓲꓼ ꓠꓶꓽ ꓡ ꓔꓬ ꓟ ꓬꓲ ꓪ ꓢꓷꓸ ꓡꓰꓳ= ꓪꓴ-ꓢ ꓡꓰ ꓾ ꓥꓪ ꓠꓬ ꓥꓪ ꓑ ꓫꓬ ꓐꓴ ꓐꓰ ꓝꓮꓲ ꓕꓲ ꓧꓪꓹ ꓘꓶꓽ ꓫꓵꓽ ꓫꓵꓼ ꓬꓰˍ ꓥꓳ= ꓬꓲ ꓪ ꓛꓬꓻ ꓗꓷ ꓥꓳꓽ ꓗꓷ ꓟ ꓝꓴꓲꓸ ꓮ ꓙꓵꓽ ꓥꓪ ꓖꓽ ꓖꓶˍ ꓥꓳ꓾ ꓐꓯˍ ꓡꓳ=