ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓬꓰ ꓗꓷ ꓟ ꓓꓵꓽ ꓙ ꓟꓶ ꓓꓴ ꓟꓬꓱꓽ

ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓡꓰ ꓬꓰ-ꓧꓳ-ꓧꓪ ꓪꓴ-ꓢ ꓔꓯ ꓡꓳꓺ ꓒꓰꓹ ꓢꓲ꓾ ꓪꓴ-ꓢ ꓕꓵꓼ ꓪ ꓔꓯ ꓟꓽ ꓛꓳ ꓛꓳ ꓑ-ꓡꓲ ꓢꓲꓺ ꓐꓬꓱꓽ ꓔꓯ ꓦ ꓡꓱ ꓔꓬ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓛꓬꓻ ꓒꓵꓽ ꓖꓶˍ ꓐꓰ ꓬꓰ ꓔꓬ ꓟ ꓔꓯ ꓐꓯ ꓟꓸ ꓖꓶ ꓗꓷ ꓗꓸ ꓠꓯꓸ ꓬꓲ-ꓡꓲ-ꓬ ꓠꓬ ꓪ ꓔꓲ ꓬ-ꓧ ꓟꓲ ꓙꓬ ꓗꓪ ꓐꓰ ꓓꓳ ꓙꓰˍ ꓡꓳ= ꓬꓲ ꓔꓯ ꓟꓳ ꓡꓰ ꓠꓬ ꓢꓰꓼ ꓡ ꓟ ꓔꓯ ꓢꓷˍ ꓠꓬꓲ ꓬꓲ ꓠꓬ ꓡꓲꓺ ꓛꓲ ꓗꓪ ꓟ ꓡꓳ ꓗꓸ ꓘꓶꓽ ꓗꓪ ꓑꓬ ꓠꓬꓹ ꓔꓬ ꓡꓳ=

ꓖꓳ ꓕꓲ ꓙꓵꓹ ꓗꓪ ꓪꓴ-ꓢ ꓔꓯ ꓠꓲꓹ ꓙꓳˍ ꓟ ꓪ ꓔꓲ ꓬ-ꓧ ꓐꓰ ꓪ ꓔꓲ ꓟ ꓬꓰ-ꓫꓲ-ꓑꓰ ꓠꓬ ꓬꓲ-ꓡꓲ-ꓬ ꓔꓯ ꓮ ꓘꓶꓸ ꓠꓲꓹ ꓟ ꓦꓶꓻˍ ꓠꓬꓲ ꓬꓲ ꓔꓯ ꓢꓰꓼ ꓠꓹ ꓟ ꓬꓲ ꓪ ꓟꓯꓼ ꓜꓴ ꓔꓯ ꓝꓲ ꓩꓴ ꓗꓷˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓬꓲ ꓔꓯ ꓧꓪ ꓟꓽ ꓟꓶ ꓡꓰ= ꓬꓲ-ꓡꓲ-ꓬ ꓮ ꓡꓰ ꓗꓪ ꓐꓰ ꓡ ꓢꓲ ꓮ ꓡꓰ ꓗꓪ ꓙꓰ ꓗꓷ ꓟ ꓮ ꓟˍ ꓟꓲ ꓟꓽ ꓢꓷ=

ꓖꓳ ꓕꓲ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓪ ꓔꓲ ꓬ-ꓧ ꓔꓯ ꓪꓴ-ꓢ ꓐꓯ ꓔ ꓟ ꓕꓲ ꓡꓰꓹꓼ ꓬꓲ-ꓢꓷ-ꓡꓰ ꓟꓵꓽ ꓗꓪ ꓬꓹ ꓚꓵꓸˍ ꓟꓲ ꓟꓽ ꓬꓯꓼ ꓡ꓾ ꓟꓶꓽ ꓦˍ ꓟꓲ ꓟꓽ ꓦ ꓗꓷ ꓡꓰꓳ= ꓟꓵꓽ ꓗꓪ ꓟ ꓜꓽ ꓪꓳꓽ ꓡꓳ ꓪꓳꓽ꓾ ꓢꓲꓹ ꓜꓲ ꓢꓲꓹ ꓟꓲ ꓐꓴ ꓮ ꓙꓵꓽ ꓙꓴꓺ ꓡꓰ ꓖꓴꓳ= ꓙꓱꓽ ꓤ ꓐꓴ ꓟꓲ ꓮ ꓙꓵꓽ ꓫꓵꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓬꓲ-ꓡꓲ-ꓬ ꓔꓯ ꓬꓰ ꓙˍ ꓡꓳ= ꓬꓲ ꓠꓬ ꓡꓳ ꓗꓸ ꓗꓪ ꓟ ꓬꓲꓻ ꓙꓬ ꓓꓳꓻ ꓢꓲ ꓮꓸ ꓠꓯ ꓓꓽ ꓟ ꓡꓰ ꓬꓲ ꓔꓯ ꓜ ꓓꓴ ꓔꓯꓹ ꓖꓶ ꓜꓽ ꓡˍ ꓡꓳ= ꓗꓸ ꓠꓯꓸ ꓟꓶ ꓤ ꓟꓽ ꓥ ꓠꓬ ꓟꓶꓽ ꓦ ꓟꓽ ꓦ ꓡ ꓠꓬꓲ ꓡꓳ ꓗꓸ ꓗꓪ ꓟ ꓬꓲꓻ ꓙꓬ ꓮ ꓙꓵꓽ ꓫꓱꓻ ꓡꓰꓳ=

ꓖꓳ ꓕꓯ ꓬꓲ-ꓡꓲ-ꓬ ꓡꓰ ꓥꓪ ꓪꓴ-ꓢꓺꓳ꓾ ꓠꓴ ꓡ ꓞꓳ ꓐꓴ ꓠꓬ ꓮ ꓡꓰ ꓟꓶ ꓤ ꓗꓪ ꓛꓲꓺ ꓦꓰꓼ ꓟꓷꓼ ꓔꓬ ꓠꓯꓹ ꓡ= ꓬꓲ ꓪ ꓐꓴ ꓠꓬ ꓦꓰꓼ ꓟꓷꓼ ꓢꓲ ꓫꓵꓻ ꓬꓰ ꓔꓬꓳ ꓟꓽ ꓥ ꓡ? ꓠꓴ ꓠꓬ ꓮ ꓡꓰ ꓗꓹ ꓠꓬꓲ ꓕꓱ ꓟꓶ ꓤ ꓢꓲꓺ ꓡꓲꓺ ꓐꓰ ꓔꓬ ꓡ? ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓬꓲ-ꓡꓲ-ꓬ ꓔꓯ ꓠꓴ ꓠꓬ ꓢꓲ-ꓓꓳ ꓟꓵꓽ ꓢ-ꓡꓷ-ꓩ ꓡꓳ ꓒꓱ ꓗꓪ ꓙꓰ ꓢꓲ ꓖꓳ ꓗꓪ ꓔꓬ ꓬꓰ= ꓖꓳ ꓗꓪ ꓟ ꓟꓶꓽ ꓛꓵꓽ ꓟ ꓕꓲ ꓣꓳ ꓡꓰ ꓠꓴ ꓔꓯ ꓜꓽ ꓓꓴ ꓖꓶ ꓡˍ ꓥꓳ꓾ ꓐꓯ ꓖꓶˍ ꓡꓳ=

ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓢꓲ ꓬꓲ-ꓡꓲ-ꓬ ꓠꓬ ꓢꓲ-ꓓꓳ ꓟꓵꓽ ꓗꓪ ꓙꓰˍ ꓡꓳ= ꓜꓽ ꓓꓴ ꓟꓽ ꓜꓽ ꓬꓲꓻ ꓙꓬˍ ꓟꓲ ꓟꓽ ꓓꓳꓻ ꓓꓳꓻ ꓮ ꓟꓬꓹ ꓠꓬꓲ ꓫꓱꓽ ꓗꓷ ꓢꓲ ꓡꓳ ꓒꓱ ꓗ ꓘꓶ ꓗꓪ ꓛꓲ ꓬꓰ ꓕꓯ ꓢꓲꓹ ꓚꓳꓸ ꓧꓪ ꓔꓬ ꓟ ꓟꓶꓽ ꓛꓵꓼ ꓟ ꓕꓲ ꓣꓳ ꓔꓯ ꓔꓳꓹ ꓜꓳꓽ ꓡꓰ ꓠꓬꓲ꓾ ꓥꓪ ꓔꓯ ꓬꓲꓻ ꓙꓬ ꓮ ꓔꓲꓸ ꓖꓶ ꓓꓳ ꓡꓯ= ꓳ꓾ ꓑ ꓑˍ ꓟꓲ ꓮ ꓔꓲꓸ ꓔꓯꓹ ꓖꓶ ꓡꓯ꓾ ꓐꓯ ꓖꓶˍ ꓡꓳ=

ꓖꓳ ꓕꓲ ꓙꓵꓹ ꓗꓪ ꓟꓵꓽ ꓗꓪ ꓟꓶ ꓦ ꓟꓽ ꓦ ꓢꓲ꓾ ꓬꓲꓻ ꓙꓬ ꓮ ꓙꓵꓽˍ ꓟꓲ ꓫꓱꓻ ꓡꓰ ꓔꓬ ꓖꓴˍ ꓟ ꓪꓴꓸ ꓠꓬꓲ ꓗꓴꓷꓼ ꓘꓴꓽ ꓗꓪ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓟ ꓙꓵꓹ ꓥ ꓡꓳ= ꓖꓳ ꓡꓱ ꓠꓬꓲ ꓤ ꓟꓶ ꓤ ꓡꓰ ꓬꓲ-ꓡꓲ-ꓬ ꓔꓯ ꓥꓪ ꓔꓯ ꓑ ꓑ ꓟꓽ ꓙꓳ= ꓥꓪ ꓦꓲ ꓗꓪ ꓫꓪ ꓧꓶꓽ ꓕꓲ ꓡꓯꓼ ꓚꓳꓸ ꓤ꓾ ꓮ ꓛꓬꓽ ꓞꓶ ꓮ ꓔꓲꓸ ꓤꓽ ꓡꓰꓽ ꓓꓹ ꓢꓲ ꓑ ꓑ ꓗꓳ ꓠꓹ ꓟ ꓢꓲꓹ ꓚꓳꓸ ꓧꓪ ꓡ ꓟ ꓥꓳ= ꓥꓪ ꓐꓰ ꓥꓪ ꓤ ꓥꓪ ꓠꓴꓽ ꓠꓬꓲ ꓟꓸ ꓡꓼ ꓠꓬ ꓖꓳ ꓟ ꓗꓳ ꓜꓽ ꓗꓷ ꓗ ꓠꓯꓸ ꓠꓽ ꓮ ꓫꓵꓽ ꓜꓽ ꓓꓴ ꓟꓽ ꓙꓳ꓾ ꓦꓰꓼ ꓟꓷꓼ ꓫꓵꓻ ꓓꓴˍ ꓡꓰꓽ ꓥꓳ꓾ ꓐꓯ ꓖꓶˍ ꓡꓳ=

ꓖꓳ ꓕꓯ ꓬꓲ-ꓡꓲ-ꓬ ꓡꓰ ꓤ ꓟꓶ ꓤ ꓔꓯ ꓠꓴ ꓕꓽ ꓙꓽ ꓫ= ꓠꓴ ꓬꓲꓼ ꓙꓰ ꓢꓲ ꓫꓪ ꓧꓶꓽ ꓖꓳ ꓟ ꓡꓰ ꓥꓪ ꓔꓯ ꓧꓶꓸ ꓕꓯ ꓑ ꓑ ꓕꓲ ꓑꓬ ꓫꓬꓹ ꓔꓯꓹ ꓖꓶ ꓡ= ꓖꓳ ꓗꓸ ꓠꓯꓸ ꓠꓴ ꓪ ꓠꓬꓲꓽ ꓟꓸ ꓡꓼ ꓐꓱ ꓶ ꓫꓬꓹ= ꓮ ꓡꓲꓳ ꓐꓯ ꓠꓬ ꓬꓲ-ꓢꓷ-ꓡꓰ ꓐꓴ ꓪꓴ-ꓢ ꓡꓰ ꓟꓶꓽ ꓦ ꓦ ꓡ ꓝꓲˍ ꓕꓲ ꓠꓬꓲ ꓗꓪ ꓛꓲ꓾ ꓬꓲꓻ ꓪꓴ ꓗꓪ ꓟ ꓫꓪ ꓧꓶꓽˍ ꓟꓲ꓾ ꓐꓬꓻ ꓗꓪ ꓟ ꓮꓽ ꓛꓬ ꓞꓶˍ ꓟꓲ ꓟꓽ ꓖꓴ ꓡꓰ ꓝꓲ꓾ ꓐꓯ ꓖꓶˍ ꓡꓳ=

ꓤ ꓟꓶ ꓤˍ ꓟꓲ ꓬꓲ-ꓡꓲ-ꓬ ꓐꓯˍ ꓟˍ ꓡꓰ ꓐꓰ ꓬꓰˍ ꓡꓳ= ꓖꓳ ꓡꓱ ꓠꓬ ꓬꓲ-ꓡꓲ-ꓬ ꓐꓰ ꓟꓶꓽ ꓛꓵꓼ ꓟ ꓠꓬꓲꓽ ꓟꓸ ꓡꓼ ꓐꓴ ꓐꓱ ꓶ ꓕꓲ ꓠꓬꓲ ꓐꓱ ꓶ ꓕꓲ ꓠꓬꓲ ꓜꓽ ꓓꓴ ꓟꓽ ꓖꓴ ꓡꓰ= ꓑ ꓑ ꓕꓲ ꓧꓪꓹ ꓗꓳ ꓗꓷ ꓠꓬ ꓝꓮꓲ ꓕꓲ ꓧꓪꓹ ꓐꓱ ꓶ ꓬꓲꓻ ꓪꓴ ꓗꓪ ꓓꓹ ꓢꓰꓽ ꓡꓳ= ꓮꓽ ꓛꓬꓽ ꓞꓶˍ ꓟꓲ ꓟꓽ ꓖꓴꓻ ꓡꓰ=

ꓟꓶ ꓤ ꓗꓸ ꓠꓯꓸ ꓟꓶꓽ ꓛꓵꓽ ꓟ ꓬꓲ ꓤ ꓠꓬ ꓮ ꓘꓶ ꓠꓻ ꓡ ꓢꓲ ꓫꓵꓻꓳ= ꓖꓳ ꓡꓱ ꓠꓬꓲ ꓟꓶꓽ ꓛꓵꓽ ꓟ ꓡꓰ ꓮ ꓘꓶꓸ ꓠꓲꓹ ꓟ ꓫ ꓢꓲ ꓬꓲ-ꓡꓲ-ꓬ ꓔꓯ ꓪꓴ-ꓢ ꓬꓲ ꓡ ꓞꓳꓺꓳ꓾ ꓠꓴ ꓕꓱ ꓗꓪ ꓡ ꓟ ꓠꓬ ꓥꓪ ꓝꓴꓲ ꓑꓶꓸ ꓓꓴ ꓥꓪ ꓮ ꓐꓲ ꓔꓯ ꓫꓵꓻ ꓝꓲˍ ꓐꓰ ꓡ ꓟ ꓥ ꓡ? ꓐꓯ ꓖꓶˍ ꓡꓳ= ꓕꓱ ꓟ ꓔꓯ ꓬꓲ-ꓡꓲ-ꓬ ꓑ ꓙ ꓡꓰ ꓠꓬ ꓬꓲ ꓔꓯ ꓒꓳꓹ ꓖꓶ ꓢꓲ ꓠꓴ ꓮ ꓐꓲ ꓥꓪ ꓔꓯ ꓡꓯꓼ ꓙꓱ ꓡꓯ꓾ ꓐꓯ ꓢꓲ ꓔꓯꓹ ꓡ ꓠꓬ ꓬꓲ-ꓡꓲ-ꓬ ꓬꓲꓼ ꓔ ꓖꓴ ꓗꓪ ꓔꓯꓹ ꓓꓯ ꓙꓰ ꓢꓲ꓾ ꓬꓲꓼ ꓖꓴ ꓕꓯ ꓢꓲ ꓗꓪ ꓗꓶ ꓔ ꓢꓲ ꓠꓬꓲ ꓢꓯꓼ ꓓꓽ ꓟ ꓡꓰ꓾ ꓬꓰ-ꓧꓳ-ꓧꓪ ꓥꓪ ꓪꓴ-ꓢꓺꓳ꓾ ꓠꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓔꓯ ꓦꓵ ꓙ ꓡ ꓢꓴ ꓟꓶꓽ ꓛꓵꓽ ꓟ ꓕꓱ ꓕꓲ ꓣꓳ ꓬꓲ ꓮ ꓐꓲ ꓔꓯ ꓫꓵꓻ ꓝꓲ ꓢꓲ ꓬꓲ ꓔꓯ ꓠꓲꓹ ꓟ ꓫ ꓡꓰ ꓝꓲˍ ꓡ? ꓥꓪ ꓪꓴ-ꓢꓺꓳ꓾ ꓮ ꓐꓲ ꓔꓯ ꓢꓯꓸ ꓡ ꓝꓲ꓾ ꓐꓰ ꓘꓴ ꓓꓰꓽˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓬꓲ-ꓡꓲ-ꓬ ꓪꓽ ꓘꓴ ꓘꓶꓽ ꓔꓯ ꓓ ꓔꓳꓹ ꓖꓶ ꓡ ꓢꓲ ꓮ ꓐꓲ ꓔꓯ ꓢꓯꓸ ꓡ ꓝꓲꓳ=

ꓬꓲ-ꓡꓲ-ꓬˍ ꓟꓲ ꓮ ꓐꓲ ꓔꓯ ꓬꓲ ꓟꓹ ꓟ ꓔꓬ ꓗꓪ ꓡꓯꓼ ꓙꓱ ꓖꓶˍ ꓡꓳ= ꓟꓶꓽ ꓛꓵꓽ ꓟ ꓖꓳ ꓕꓲ ꓣꓳˍ ꓟꓲ ꓠꓴ ꓠꓽ ꓪꓴ-ꓢ ꓡ ꓞꓳ ꓥ ꓟˍ ꓐꓰ꓾ ꓪꓴ-ꓢˍ ꓟꓲ ꓠꓴ ꓗꓪ ꓐꓰ ꓫꓸ ꓕꓱˍ ꓟ ꓮ ꓟꓶ ꓥꓪ ꓢꓷꓸ ꓡꓰꓳ꓾ ꓐꓰ ꓬꓲ-ꓡꓲ-ꓬ ꓔꓯ ꓐꓯ ꓖꓶˍ ꓡꓳ= ꓬꓲ-ꓡꓲ-ꓬˍ ꓟꓲ ꓪꓴ-ꓢ ꓡꓰ ꓪꓺ ꓔꓲ ꓬ-ꓧ ꓔꓬ ꓗꓪ ꓙꓰ ꓝꓲˍ ꓗꓪ ꓛꓲꓺ ꓟꓶꓽ ꓛꓵꓽ ꓟ ꓦꓲ ꓗꓪ ꓔꓬ ꓗꓷꓳ=