ꓟꓷꓽ ꓠꓷꓹ ꓝ ꓒ ꓬꓲ-ꓢ ꓟꓸ ꓟꓲꓽ

ꓮ-ꓐ-ꓡ-ꓦ ꓬꓲ ꓞꓲꓼ 100 ꓘꓳꓼ ꓙꓳ ꓡˍ ꓕꓯ ꓬꓲ-ꓢ ꓔꓯ ꓦꓵꓻ ꓡ ꓗꓷꓳ= ꓢ-ꓣ ꓠꓬ ꓬꓲ-ꓢ ꓐꓰ ꓕꓲ ꓪˍ ꓬꓲ ꓪ ꓐꓴ ꓐꓳ ꓶꓼ ꓔꓯ ꓐꓱ ꓣꓴ ꓠꓹ ꓟ ꓬꓲ-ꓫꓵ-ꓟ-ꓡꓲ ꓔꓯ ꓖꓶꓽ ꓠꓹ ꓟ ꓟꓽ ꓠꓲꓹ ꓒꓴ ꓠꓬꓲ꓾ ꓫꓬ-ꓚꓬ ꓐꓰ ꓬꓲ-ꓫꓵ-ꓟ-ꓡꓲ ꓔꓯ ꓖꓼ ꓓꓳ ꓗꓷ ꓠꓹ ꓟ ꓮ-ꓐ-ꓡ-ꓦ ꓔꓯ ꓐꓯ ꓖꓶˍ ꓡꓳ= ꓫꓬ-ꓚꓬˍ ꓠꓬ ꓚꓳ ꓟ ꓥ ꓢꓲ ꓬꓲ-ꓫꓵ-ꓟ-ꓡꓲ ꓠꓬ ꓮ-ꓐ-ꓡ-ꓦ ꓐꓰ ꓫꓬ-ꓚꓬ ꓐꓴ ꓗꓪ ꓐꓰ ꓦꓵꓻ ꓔ ꓟ ꓤ ꓥ ꓡꓳ= ꓖꓳ ꓡꓱ ꓢꓲ ꓮ-ꓐ-ꓡ-ꓦ ꓠꓬ ꓬꓲ ꓪ ꓐꓴ ꓔꓯ ꓙꓰ ꓝꓲ ꓗꓷꓳ= ꓬꓲ ꓪ ꓐꓴ ꓠꓽ ꓐꓰ-ꓫꓵ-ꓐ ꓡꓲ ꓛꓲ ꓗꓪ ꓶꓻ ꓚꓳ ꓔꓬ ꓡꓳ= ꓬꓲ ꓪ ꓐꓴ ꓓꓳ ꓓꓴ ꓬꓲꓻ ꓙꓬ ꓖꓴ ꓡꓰ ꓕꓯ ꓟꓴ ꓗꓪ ꓝꓲ ꓓꓴ ꓕꓲ ꓣꓳ ꓓꓳ ꓡ ꓢꓲ꓾ ꓬꓲꓻ ꓙꓬ ꓘꓴ ꓕꓲ ꓘꓴ ꓟꓳ ꓡꓰ ꓝꓲˍ ꓡꓳ= ꓖꓳ ꓟ ꓪꓴꓸ ꓠꓬꓲ꓾ ꓬꓲ-ꓫꓵ-ꓟ-ꓡꓲ ꓠꓬ ꓒ-ꓣ-ꓠ ꓡꓲ ꓛꓲ ꓗꓪ ꓐꓰ ꓪꓴꓽ ꓡˍ ꓡꓳ= ꓪꓴ-ꓢ ꓠꓬ ꓬꓲ-ꓫꓵ-ꓟ-ꓡꓲ ꓐꓰ ꓕꓲ ꓪˍ ꓔꓬ ꓢꓲ꓾ ꓬꓲ ꓠꓬ ꓡꓲ ꓛꓲ ꓗꓪ ꓧꓪꓽ ꓖꓼ ꓒ ꓕꓲ ꓣꓳ ꓒꓬꓱꓼ ꓡꓺ ꓳ= ꓝꓮꓲ ꓬꓲꓸ ꓟꓹ ꓟ ꓡꓰ ꓬꓲ-ꓙꓲ ꓟꓵꓽ ꓗꓪ ꓐꓰ ꓬꓲ ꓔꓯ ꓤ ꓟꓶꓻ ꓕꓲ ꓣꓳ ꓧꓪ ꓖꓶˍ ꓡꓳ=  ꓬꓲ-ꓫꓵ-ꓟ-ꓡꓲ ꓔꓯ ꓤ  ꓠꓱ 12 ꓣꓳ ꓦꓵꓻ ꓗꓷꓳ=

ꓖꓳ ꓗꓸ ꓠꓯꓸ ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ “ ꓠꓴ ꓤ ꓾ꓠꓴ ꓠꓲꓹ ꓠꓵˍ ꓟ ꓕꓲ ꓣꓳˍ ꓟ ꓠꓴ ꓤ ꓬꓲ-ꓢ ꓔꓯ ꓧꓳꓽ ꓔ ꓢꓲ ꓟꓳ-ꓡꓲ-ꓬ ꓪꓽ ꓚꓲ ꓗꓪ ꓙꓰ꓾ ꓖꓳ ꓗꓪ ꓬꓲ ꓔꓯ ꓛꓴ ꓔꓲ ꓓꓴ ꓬꓰ” ꓐꓯ ꓖꓶˍ ꓡꓳ= ꓮ-ꓐ-ꓡ-ꓦ ꓠꓬ ꓬꓲ-ꓢ ꓐꓰ ꓕꓲ ꓪˍ ꓟꓳ-ꓡꓲ-ꓬ ꓪꓽ ꓚꓲ ꓗꓪ ꓙꓰˍ ꓡꓳ= ꓬꓲ-ꓢ ꓡꓰ ꓛꓴ ꓔꓲ ꓖꓶ ꓓꓴ ꓮ ꓡꓲ ꓗꓪ ꓓˍ ꓡ ꓐꓰ ꓠ ꓠꓬꓲˍ ꓕꓯ ꓾ ꓮ-ꓐ-ꓡ-ꓦ ꓡꓰ “ꓥꓪ ꓤꓳ꓾ ꓛꓴ ꓔꓲ ꓓꓴ ꓐꓱ ꓶ ꓪꓴ-ꓢ ꓡꓰ ꓙꓽ ꓖꓶ ꓡˍ ꓥꓳ” ꓐꓰ ꓒꓳꓹ ꓖꓶˍ ꓡꓳ= ꓬꓲ ꓪ ꓐꓴ ꓟꓳ-ꓡꓲ-ꓬ ꓪꓽ ꓚꓲ ꓗꓪ ꓛꓲꓺ ꓬꓰ ꓕꓯ꓾ ꓮ-ꓐ-ꓡ-ꓦ ꓠꓬ ꓔꓲ ꓖꓴ ꓫꓬꓹ ꓢꓲ ꓾ ꓬꓲ-ꓢ ꓔꓯ ꓛꓳꓹ ꓗꓷ ꓢꓲ ꓠꓬꓲ ꓔꓲ ꓖꓴ ꓕꓯꓽ ꓢꓲ ꓗꓪ ꓚꓰꓹ ꓗꓷˍ ꓡꓳ=ꓗꓸ ꓠꓯꓸ ꓮ ꓕꓽ ꓣꓴ ꓢꓲ ꓬꓲ-ꓢ ꓔꓯ ꓢꓰꓼˍ ꓐꓰ ꓬꓰˍ ꓕꓯ ꓟꓴ ꓗꓪ ꓝꓲ ꓓꓴ ꓡꓰ “ꓬꓲ ꓔꓯ ꓮ ꓡꓲ ꓕꓽ ꓗꓷ ꓡꓰ ꓝꓲ= ꓠꓴ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓲ꓾ ꓠꓴ ꓤ ꓔꓯ ꓖꓶꓽ ꓟꓽ ꓬꓯꓼ ꓟꓽ ꓗꓹ ꓟ ꓥꓪ ꓟꓳ ꓡꓰꓳ=” ꓐꓰ ꓐꓯ ꓖꓶˍ ꓡꓳ= ꓝꓮꓲ ꓬꓲ ꓪ ꓐꓴ ꓗꓸ ꓠꓯꓸ ꓢꓲ ꓗꓪ ꓟ ꓢꓲꓹ ꓑꓳ ꓗꓪ ꓮ ꓣꓳ ꓑꓸ ꓕꓲ ꓟ ꓔꓯ ꓟꓳˍ ꓠꓬꓲ ꓾ ꓬꓲ ꓤ ꓬꓲ-ꓢ ꓬꓲ ꓛꓲ ꓖꓳ ꓟ ꓔꓯ ꓢꓰꓼ ꓔꓲ ꓖꓶˍ ꓡꓳ= ꓗꓸ ꓠꓯ ꓬꓲ ꓔꓯ ꓝꓮꓲ ꓕꓲꓽ ꓧꓪꓹ ꓐꓯ ꓖꓶ ꓡ ꓢꓲ꓾ “ꓠꓴ ꓠꓬ ꓠꓴ ꓤ ꓔꓲꓸ ꓥꓪ ꓔꓯ ꓖꓶꓽ ꓟꓽꓬꓯꓼ ꓐꓰ ꓟꓽ ꓗꓹ ꓠꓬꓲ꓾ ꓪꓴ-ꓢ ꓥꓪ ꓠꓬ ꓥꓪ ꓚꓲ ꓛꓬ ꓔꓯ ꓖꓴ ꓢꓲ ꓪꓵꓼ ꓞꓷꓹ ꓗꓷꓳ= ꓥꓪ ꓠꓬ ꓚꓵꓺ ꓚꓵꓺ ꓠꓴ ꓔꓯ ꓶꓼ ꓤ ꓫꓱꓹ ꓤ ꓖꓶ ꓢꓲ꓾ ꓠꓴ ꓞꓲꓼ ꓤ ꓡꓯꓹ ꓤ ꓔꓯ ꓠꓬ ꓟꓴ ꓗꓪ ꓗꓪ ꓟ ꓗꓴ ꓤˍ ꓐꓰ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓟ ꓧꓶꓽ ꓚꓲˍ ꓡꓰ ꓐꓰ ꓟꓬꓽ ꓡ ꓝꓲˍ ꓥꓳ= ꓬꓲ ꓪ ꓡꓰ ꓛꓴꓽ ꓙꓳ ꓢꓴ  ꓔꓯ ꓧꓪꓸ ꓡꓰ ꓢꓲ ꓬꓲ ꓪ ꓡꓳ ꓒꓱ ꓔꓯˍ ꓟꓲ ꓦꓴ ꓟꓶ ꓡꓰˍ ꓥꓳ= ꓠꓴ ꓠꓬ ꓥꓪ ꓔꓯ ꓠ ꓡꓳˍ ꓠꓬꓲ꓾ ꓠꓴ ꓞꓲꓼ ꓤ ꓡꓯꓹ ꓤ ꓐꓴ ꓶꓼ ꓛꓳ ꓫꓱꓹ ꓛꓳˍ ꓟ ꓡꓰˍ ꓐꓰ꓾ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳˍ ꓟꓲ ꓶꓼ ꓛꓳ ꓫꓱꓹ ꓛꓳˍ ꓥꓳ”꓾ ꓐꓯˍ ꓡꓳ=

ꓢ-ꓣ ꓫꓵꓻˍ ꓟ

ꓢ-ꓣ ꓠꓬ ꓬꓲꓸ ꓞꓲꓼ 127 ꓘꓳꓼ ꓕꓯ ꓫꓵꓻꓳ= ꓮ-ꓐ-ꓡ-ꓦ ꓠꓬ ꓢ-ꓣ ꓑꓶꓸ ꓓꓴ ꓮ ꓛꓬꓹ ꓙꓱ ꓠꓬꓲ ꓐꓰ ꓬꓲ ꓐꓱ ꓶ ꓥꓴꓻˍ ꓡꓳ= ꓝꓮꓲ ꓬꓲ ꓠꓬ ꓖꓳ ꓕꓲ ꓟꓵꓽ ꓗꓪ ꓞꓳ ꓬꓯꓼ ꓟꓴ ꓢꓴ ꓥ ꓠꓬꓲ꓾ ꓢ-ꓣ ꓔꓯ ꓔꓵꓸ ꓠꓹ ꓟ ꓟꓵꓽ ꓕꓲꓽ ꓡꓯꓼ ꓪꓴ ꓖꓶ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓕꓯ ꓧꓷ-ꓕꓷ ꓡ ꓞꓳ ꓐꓴ ꓡꓰ ꓮ-ꓐ-ꓡ-ꓦ ꓔꓯ ꓒꓵꓽˍ ꓟ ꓪꓴꓸ ꓠꓬꓲ ꓢ-ꓣ ꓔꓯ ꓔꓵꓸ ꓠꓹ ꓟ ꓟꓵꓽ ꓔꓯ ꓬꓲꓸ ꓒꓵꓽ ꓟꓽ ꓣꓴ ꓣꓴ ꓐꓰ ꓮ ꓔꓳ ꓖꓶꓽˍ ꓡꓳ= ꓖꓳ ꓡꓱ ꓥˍ ꓟꓲ ꓮ-ꓐ-ꓡ-ꓦ ꓠꓬ ꓞꓳ ꓫꓵꓻ ꓔꓵꓸ ꓖꓴ ꓟꓵꓽ ꓬꓲ ꓒꓵꓽ ꓖꓶ ꓠꓹ ꓟ ꓐꓯ ꓞꓷꓹ ꓗꓷ ꓢꓲ ꓡꓳꓹ ꓬꓰˍ ꓕꓯ ꓒꓴ ꓡꓲ ꓦꓬ ꓫꓱ-ꓘꓷ-ꓡꓷ ꓐꓰ ꓪꓴꓻ ꓞꓷꓹ ꓗꓷ ꓢꓲ ꓠꓬꓲ ꓢ-ꓣ ꓔꓯ ꓖꓳ ꓗꓪ ꓔꓵꓸ ꓗꓷꓳ=

ꓬꓲ-ꓢ ꓠꓬ ꓤ-ꓐꓱ-ꓘꓹ ꓐꓰ ꓡꓯꓽ ꓒꓯꓹ ꓝ ꓟ ꓽ

ꓮ-ꓐ-ꓡ-ꓦ ꓠꓬ ꓮ ꓘꓶꓸ ꓞꓲꓼ ꓟꓳꓽ ꓡꓺꓳ= ꓬꓲ ꓠꓬ 40ꓘꓳꓼ ꓙꓳˍ ꓟ ꓬꓲ ꓤ ꓬꓲ-ꓢ ꓔꓯ ꓡꓯꓽ ꓒꓯꓹ ꓝ ꓝꓲ ꓠꓲꓹ ꓫꓵˍ ꓡꓳ= ꓬꓲ ꓪ ꓐꓴ ꓠꓬ ꓘꓷꓹ-ꓠ ꓟꓵꓽ ꓗꓪ ꓔꓬ ꓥˍ ꓟꓲ ꓘꓷ-ꓠ ꓗꓪ ꓟ ꓤ ꓟꓶꓻ ꓤ ꓐꓰ ꓡꓯꓽ ꓒꓯꓹ ꓝ ꓝꓲ ꓠꓲꓹ ꓟꓽ ꓫꓵ= ꓟꓽ ꓠꓲꓹ ꓒꓴ= ꓖꓳ ꓟ ꓪꓴꓸ ꓠꓬꓲ ꓮ-ꓐ-ꓡ-ꓦ ꓠꓬ ꓬꓲ ꓔꓯ ꓣꓱꓽ ꓙ ꓢꓴ ꓥ ꓕ ꓑꓳꓸ ꓔꓯ ꓙꓵꓽ ꓢꓴ꓾ ꓮ ꓙꓵꓽ ꓕꓯꓽ ꓢꓲ ꓞꓲꓼ ꓪꓴꓽ ꓢꓴ ꓔꓯ ꓬꓲꓸ ꓦꓵꓻ ꓟꓵꓽ ꓥ ꓟ ꓟꓲ-ꓢꓳ-ꓒꓳ-ꓔ-ꓟꓲ ꓟꓵꓽ꓾ ꓬꓲꓸ ꓮ ꓬꓲꓼ ꓠ-ꓧꓳ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ=ꓬꓲ-ꓢ ꓠꓬ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓟꓵꓽ ꓔꓯ ꓡꓳꓺ ꓗꓷ ꓟꓽ ꓓ ꓟ ꓪꓴꓸ ꓠꓬꓲ꓾ ꓣꓱꓽ ꓙ ꓢꓴ ꓠꓬ ꓬꓲ-ꓢ ꓔꓬ ꓗꓪ ꓤ ꓟꓶꓻ ꓧꓳꓽ ꓔꓯꓹ ꓡ ꓠꓹ ꓟ ꓪꓵꓼ ꓙꓱꓼ ꓪ ꓡꓰꓳ=ꓣꓱꓽ ꓙ ꓢꓴ ꓖꓳ ꓕꓲ ꓣꓳ ꓡꓰ ꓡꓳꓽ ꓕꓳ ꓞꓲ ꓘꓹ ꓗꓪ ꓒꓵꓽ ꓶꓽ ꓮꓽ ꓟꓬꓹ ꓚꓰꓹ ꓔ ꓢꓲ ꓟꓲ-ꓢꓳ-ꓑꓳ-ꓔ-ꓟꓲ ꓟꓵꓽ ꓡꓳ ꓪꓴꓸ ꓔꓯ ꓟꓳꓸ ꓗꓪ ꓙꓰˍ ꓡꓳ=

ꓤ ꓟꓶ ꓤ ꓮ ꓡꓰ ꓕꓲ ꓣꓳ ꓟ ꓠꓬ ꓫꓱꓸ ꓤ ꓠꓲꓹ ꓟꓳꓸ ꓖꓶ ꓢꓲ ꓬꓲ ꓐꓰ ꓡꓳ ꓕꓳ ꓔꓯ ꓬꓲꓻ ꓙꓬ ꓖꓶꓽ ꓓꓳ ꓡˍ ꓠꓬ ꓾ ꓖꓳ ꓤ ꓟꓶ ꓤ ꓠꓽ ꓬꓲ-ꓢ ꓤ ꓟꓶꓻ ꓥꓳ꓾ ꓐꓰ ꓣꓱꓽ ꓙ ꓢꓴ ꓡꓰ ꓓꓵꓽ ꓙ ꓔ ꓡꓳ= ꓬꓲ ꓖꓳ ꓗꓪ ꓛꓲꓺ ꓬꓰˍ ꓕꓯ꓾ ꓒꓬꓱꓽ ꓐꓲꓻˍ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓬꓲ ꓐꓰ ꓬꓲ ꓡꓳ ꓕꓳ ꓐꓴ ꓔꓯ ꓓꓳ ꓓꓴ ꓬꓲꓻ ꓙꓬ ꓖꓶꓽ ꓡˍ ꓡꓳ=  ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓠ-ꓧꓳ ꓬꓲꓸ ꓮ ꓟꓲꓽ ꓤ-ꓐꓱ-ꓘꓹ ꓥ ꓡꓳ=  ꓤ ꓟꓶ ꓤ ꓕꓲ ꓦꓲ ꓢꓴ ꓐꓴ ꓐꓰ ꓟꓳ ꓡꓯꓽ ꓘꓳ ꓗꓷ ꓗꓸ ꓠꓯ꓾ ꓬꓲ ꓡꓰ ꓤ ꓟꓶ ꓤ ꓔꓯ ꓠꓺ ꓪꓳꓽˍ ꓐꓰ ꓡꓯꓼ ꓙꓴ ꓖꓶ ꓓꓱꓼ ꓗꓷ ꓢꓲ꓾ ꓤ-ꓐꓱ-ꓘꓹ ꓕꓲ ꓦꓲ ꓢꓴˍ ꓟꓲ ꓬꓲ-ꓢ ꓐꓰ ꓡꓯꓽ ꓒꓯꓹ ꓝ ꓠꓹ ꓟ ꓬꓲ ꓔꓯ ꓩꓴ ꓗꓷˍ ꓡꓳ=

ꓮ-ꓐ-ꓡ-ꓦ ꓐꓰ ꓬꓲ-ꓫꓵ-ꓟ-ꓡꓲ ꓦꓬꓼ ꓠꓬꓲ ꓡꓳꓹ ꓬꓰˍ ꓟꓽꓽ

ꓮ-ꓐ-ꓡ-ꓦ ꓠꓬ ꓘꓷ-ꓕꓴ-ꓡ (Catherine) ꓟꓬꓱꓺ ꓔ ꓟ ꓤ ꓟꓶ ꓤ ꓔꓯ ꓝꓮꓲ ꓕꓲ ꓣꓳ ꓫˍ ꓡꓳ= ꓬꓲ ꓪ ꓐꓴ ꓗꓪ ꓐꓰ ꓦꓵꓻ ꓗꓷ ꓟ ꓠꓬ ꓤ 6 ꓣꓳ꓾ ꓡꓲꓸ ꓑ 5 ꓣꓳ ꓐꓰ ꓾ ꓡꓲꓸ ꓒꓲꓼ 3 ꓣꓳ ꓙꓳ ꓡꓰ ꓗꓷꓳ= ꓮ-ꓐ-ꓡ-ꓦ ꓠꓬ ꓬꓲ ꓞꓲꓼ 175 ꓘꓳꓼ ꓗꓪ ꓫꓵꓻꓳ= ꓬꓲ ꓤ ꓬꓲ-ꓢ ꓐꓰ ꓬꓲ-ꓫꓵ-ꓟ-ꓡꓲ ꓠꓬꓲꓽ ꓫꓵꓸ ꓡꓰ ꓮ-ꓐ-ꓡ-ꓦ ꓔꓯ ꓬꓲ ꓡꓰ ꓪꓴꓻ ꓔ ꓟ ꓦ ꓟꓲ ꓗꓪ ꓟ ꓟꓷ-ꓒꓲ-ꓡ ꓭꓸ ꓘꓴꓽ ꓗꓪ ꓔꓴꓸ ꓗꓷꓳ= ꓮ-ꓐ-ꓡ-ꓦ ꓠꓬ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓬꓲ-ꓢ ꓔꓯ ꓖꓶ ꓔꓲꓸ ꓬꓰ ꓗꓷꓳ= ꓠꓱꓸ ꓐꓯꓼ ꓤ ꓐꓴ ꓔꓯ ꓥˍ ꓟꓲ ꓡꓯꓼ ꓫꓴ ꓖꓶ ꓗꓷ ꓢꓲ ꓬꓲ ꓤ ꓬꓲ-ꓢ ꓗꓪ ꓐꓰ ꓶꓻ ꓤ ꓗꓪ ꓙꓰ ꓝꓲˍ ꓡꓳ= ꓬꓲ-ꓫꓵ-ꓟ-ꓡꓲ ꓠꓬ ꓬꓲꓸ ꓞꓲꓼ 137 ꓘꓳꓼ ꓗꓪ ꓫꓵꓻ ꓳ=

ꓦꓰꓼ ꓟꓷꓼ ꓘꓳꓼ ꓓꓳ ꓡˍ ꓟ

ꓖꓳ ꓕꓲ ꓟꓵꓽ ꓗꓪ ꓮ-ꓐ-ꓡ-ꓦ ꓦꓬꓼ ꓠꓬꓲ ꓗꓪ ꓟ ꓦꓰꓼ ꓟꓷꓼ ꓘꓳꓼ ꓟꓽ ꓥ ꓥ꓾ ꓦꓰꓼ ꓟꓷꓼ ꓘꓳꓼ ꓬꓲ ꓔꓱꓹ ꓬꓲ ꓕꓲ ꓟ ꓓꓳ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ-ꓢ ꓠꓬ ꓖꓲ-ꓣ ꓡꓳ ꓒꓱ ꓗꓪ ꓟ ꓩꓱ-ꓡꓲ-ꓫꓵ ꓪ ꓔꓲ ꓮ-ꓐꓲ-ꓟ-ꓡꓷ ꓔꓯ ꓙꓰˍ ꓡꓳ= ꓬꓲꓸ ꓥˍ ꓟꓲ ꓬꓲꓸ ꓐꓹ ꓐ ꓮ-ꓐ-ꓡ-ꓦ ꓬꓰ ꓗꓷ ꓟ ꓕꓲ ꓡꓰꓹ ꓾ ꓬꓲꓸ ꓤ ꓟꓶ ꓤ-ꓐꓱ-ꓘꓹ ꓮ ꓘꓶꓸ ꓐꓲꓻˍ ꓟ ꓪꓴꓸ ꓠꓬꓲ ꓖꓲ-ꓣ ꓡꓳ ꓒꓱ ꓢꓴ ꓐꓴ ꓡꓰ ꓢꓰꓼ ꓡˍ ꓟ ꓔꓯ ꓗꓳ ꓚꓱ ꓠꓬꓲ ꓾ ꓬꓲ ꓤ ꓟꓶꓻ ꓔꓯ ꓬꓲꓸ ꓠꓬꓲ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓪ ꓔꓲ ꓮ-ꓐꓲ-ꓟ-ꓡꓷ ꓡꓰ ꓬꓲ-ꓢ ꓠꓬ ꓤ-ꓐꓱ-ꓘꓹ ꓐꓰ ꓢꓳꓸ ꓡꓯꓽ ꓘꓳ ꓔꓬ ꓟ ꓔꓯ ꓟꓳ ꓡꓰ ꓢꓲ꓾ ꓬꓲ ꓪ ꓐꓴ ꓡꓯꓽ ꓒꓯꓹ ꓝ ꓗꓷ ꓟ ꓔꓯ ꓢꓷꓸ ꓡꓰꓳ= ꓖꓳ ꓡꓱ ꓠꓬꓲ ꓪ ꓔꓲ ꓠꓬ ꓬꓲ-ꓢ ꓔꓯ ꓘꓴ ꓢꓲ ꓫꓵꓽ ꓪꓴ ꓖꓳ ꓟ ꓔꓯ ꓠ ꓠꓬꓲˍ ꓡꓳ= ꓬꓲˍ ꓟꓲ ꓬꓲ ꓐꓹ ꓐ ꓮ-ꓐ-ꓡ-ꓦ ꓡꓰ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓡꓱ ꓠꓬ ꓮ-ꓐꓲ-ꓟ-ꓡꓷ ꓡꓰ ꓑ ꓫꓬꓼ ꓐꓴ ꓔꓯ꓾ ꓡ ꓞꓳ ꓕꓱ ꓕꓲ ꓣꓳˍ ꓐꓰ ꓬꓲ ꓦꓲ ꓢꓲ ꓟ ꓔꓯ ꓮꓽ ꓟ ꓛꓬˍ ꓠꓬ ꓾ ꓬꓲ ꓔꓯ ꓫꓵꓻ ꓝꓲˍ ꓥꓳ ꓐꓰ ꓐꓯ ꓒꓬꓱ ꓗꓷˍ ꓡꓳ=

ꓬꓲ-ꓢ ꓠꓬ ꓖꓳ ꓕꓲ ꓟꓵꓽ ꓗꓪ ꓔꓬ ꓢꓲ ꓦ ꓟꓲ ꓬꓰˍ ꓡꓳ= ꓪꓴ-ꓢ ꓡꓰ ꓬꓲ ꓔꓯ ꓶꓼ ꓛꓳ ꓝꓲˍ ꓠꓬꓲ ꓬꓲ ꓠꓬꓕꓲ ꓘꓳꓼ ꓗꓪ ꓕꓲꓽ ꓦꓬ ꓝꓸ ꓫ ꓟꓶˍ ꓡꓳ=ꓬꓲ ꓠꓬ ꓮꓽ ꓟꓬꓹ ꓒꓳꓹ ꓟꓶ ꓢꓲ ꓞꓳ ꓐꓳ ꓓꓽ ꓟ ꓒꓬꓱꓼ ꓡꓺꓳ= ꓛꓵꓼ ꓜꓴ꓾ ꓣꓳ ꓜꓴ꓾ ꓮ ꓠꓬꓲꓽ ꓜꓴˍ ꓐꓰ ꓚꓳ ꓑꓸ ꓚꓳ ꓟ ꓮꓽ ꓟꓬꓹ ꓙꓳˍ ꓠꓬꓲ ꓩꓱ-ꓡꓲ-ꓫꓵ ꓡ ꓞꓳ ꓡꓰ ꓬꓲ ꓔꓯ ꓟꓬ ꓔꓳꓹ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓐꓴ ꓠꓬ ꓮ-ꓐ-ꓡ-ꓐ-ꓦ ꓦꓬꓼ ꓠꓬꓲ ꓗꓪ ꓚꓴꓸ ꓔ ꓟ ꓬꓲꓻ ꓚꓴꓸ ꓘꓴ ꓮ ꓙꓵꓽ ꓗꓪ ꓠꓱꓸ ꓦꓱꓽ ꓧꓳꓽ ꓐꓲ ꓡꓰ ꓝꓲˍ ꓡꓳ=

ꓬꓲ-ꓢ ꓠꓬ ꓩꓱ-ꓡꓲ-ꓫꓵ ꓞꓳ ꓫꓵꓽ ꓐꓴ ꓢꓶꓸ ꓟꓽ ꓞꓲ ꓪꓽ ꓠꓬꓲ ꓡ ꓠꓬꓲ꓾ ꓮ-ꓐꓲ-ꓟ-ꓡꓷ ꓠꓬ ꓬꓲ ꓪ ꓐꓴ ꓔꓬꓹ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓬꓲ-ꓢ ꓔꓯ ꓐꓯ ꓖꓶˍ ꓡꓳ= ꓖꓳ ꓡꓱ ꓢꓲ ꓬꓲ-ꓢ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓖꓲ-ꓣ ꓡꓳꓻ ꓖꓳ ꓗꓪ ꓟꓶ ꓔꓶꓸ ꓦꓲ ꓚꓵꓹ ꓔꓶꓸ ꓢꓲ ꓠꓬꓲ ꓖꓳ ꓗꓪ ꓔꓬ ꓡꓳ= ꓮ-ꓐ-ꓡ-ꓦ ꓫꓵꓻ ꓗ ꓠꓯꓸ ꓩꓱ-ꓡꓲ-ꓫꓵ ꓡ ꓞꓳ ꓡꓰ ꓧꓳꓽ ꓛꓵꓽ ꓗꓷ ꓟ ꓮ-ꓐ-ꓡ-ꓦ ꓦꓬꓼ ꓠꓬꓲ ꓗꓪ ꓚꓴꓸ ꓔ ꓟ ꓬꓲ ꓚꓴꓸ ꓘꓴ ꓮ ꓙꓵꓽ ꓔꓯ ꓬꓲ-ꓢ ꓡꓰ ꓫꓬꓹ ꓚꓴꓸ ꓢꓲ꓾ ꓬꓲ ꓐꓹ ꓐꓽ ꓡꓰ ꓬꓲꓻ ꓚꓴꓸ ꓘꓴ ꓔꓯ ꓮ ꓡꓲ ꓟꓬꓱ ꓔ ꓠꓬ ꓬꓲˍ ꓟꓲ ꓖꓳ ꓡꓱ ꓘꓴˍ ꓡꓳ=

ꓖꓲ-ꓣ ꓗꓪ ꓟ ꓮ ꓣꓳ ꓡꓳꓸ ꓢꓴ ꓐꓴ ꓬꓲꓻ ꓙꓬ ꓘꓴ ꓔꓯ ꓟꓳꓻˍ ꓕꓯ ꓖꓳ ꓟ ꓠꓬ ꓬꓲ ꓪ ꓔꓯ ꓟ ꓥ ꓡꓳ ꓐꓯ ꓢꓲ ꓬꓲ-ꓢ ꓮ ꓣꓳ ꓡꓳꓸ ꓢꓴ ꓐꓴ ꓐꓰ ꓢꓯꓼ ꓡꓯꓽ ꓘꓳˍ ꓡꓳ= ꓖꓳ ꓡꓱ ꓐꓰ ꓠꓬꓲꓽ ꓧꓪꓹ ꓛꓲ ꓗꓷ ꓡꓰ ꓟ ꓪꓴꓸ ꓠꓬꓲ꓾ ꓬꓲ ꓢ ꓠꓬ ꓐꓰ-ꓫꓵ-ꓐ ꓗꓪ ꓚꓵꓸ ꓙꓰ ꓢꓲ꓾ ꓪꓴ-ꓢ ꓔꓯ ꓔꓲ ꓖꓶꓽ ꓖꓴ ꓕꓲ ꓟ ꓫꓬꓹ ꓡꓳ=

ꓬꓲ-ꓢ ꓠꓬ ꓮ ꓡꓲ ꓘꓶ ꓛꓲ ꓶꓼ ꓛꓳ ꓫꓱꓹ ꓛꓳˍ ꓟ ꓔꓯ ꓟꓳ ꓗꓷ ꓕꓯ꓾ ꓪ ꓔꓲ ꓮ-ꓐꓲ-ꓟ-ꓡꓷ ꓠꓬ ꓬꓲ-ꓢ ꓔꓬ ꓗꓪ ꓙꓰ ꓢꓲ꓾ ꓖꓲ-ꓣ ꓗꓪ ꓧꓳꓽ ꓔꓯꓹ ꓙꓰ ꓢꓲ ꓠꓬꓲ ꓬꓲ-ꓢ ꓐꓰ ꓪꓵꓼ ꓙꓱꓽ ꓡꓯꓽ ꓘꓳˍ ꓡꓳ=

Add new comment

4 + 2 =