ꓟꓷꓽ ꓠꓷꓹ ꓝ ꓒ ꓬꓳ-ꓠ ꓐꓰ ꓥꓪꓸ ꓓꓽ ꓟ ꓟꓸ ꓟꓲꓽ

ꓬꓳ-ꓠ ꓠꓬ ꓮ ꓠꓱ ꓕꓯ ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓔꓬ ꓟ ꓮ ꓘꓶꓸ ꓙ ꓙꓲꓼ ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓥꓳ= ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓬꓲ ꓔꓯ ꓠꓲꓹ ꓠꓵ ꓢꓲ ꓒꓵꓽ ꓛꓳˍ ꓡꓳ= ꓬꓲ ꓪ ꓫꓵꓽ ꓪꓴ ꓔꓯ ꓐꓯ ꓟꓴ ꓫꓬꓹ ꓠꓹ ꓟ ꓬꓲ ꓔꓬ ꓗꓪ ꓡˍ ꓡꓳ꓾ ꓬꓲ ꓔꓯ ꓚꓴꓽ ꓬꓲ ꓓꓰꓽ ꓡ ꓢꓲ꓾ ꓬꓲ ꓥˍ ꓟꓲ ꓬꓲ ꓔꓯ ꓡ ꓢꓴ ꓮ ꓙꓵꓽ ꓔꓯ ꓬꓰ ꓙ ꓖꓶˍ ꓡꓳ= ꓬꓳ-ꓠ ꓠꓬ ꓞꓳ ꓤ ꓔꓯ ꓬꓰ ꓙˍ ꓟ ꓙꓲˍ ꓟ ꓡ ꓞꓳ ꓕꓲ ꓣꓳ ꓥ ꓠꓬꓲ ꓪꓴ-ꓢˍ ꓟꓲ ꓬꓲ ꓔꓯ ꓮ ꓘꓶꓸ ꓠꓲꓹ ꓠꓵˍ ꓡꓳ= ꓬꓳ-ꓠˍ ꓟꓲ ꓪꓴ-ꓢ ꓔꓯ ꓠꓲꓹ ꓠꓵ ꓢꓲ ꓪꓴ-ꓢ ꓡꓰ ꓟꓸ ꓖꓶˍ ꓟ ꓔꓯ ꓠ ꓠꓹ ꓒꓵꓽ ꓛꓳ ꓢꓲ ꓪꓴ-ꓢ ꓔꓯ ꓮ ꓕꓯˍ ꓟꓲ ꓪꓽ ꓘꓴˍ ꓡꓳ=

ꓠꓲ-ꓠꓲ-ꓪꓱ ꓡꓳ ꓒꓱ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓒ ꓕꓲ ꓗꓪ ꓓꓹ ꓡꓳ= ꓡꓳ ꓒꓱ ꓖꓳ ꓟ ꓗꓪ ꓔꓬ ꓟ ꓡ ꓞꓳ ꓐꓴ ꓠꓬ ꓮ ꓘꓶꓸ ꓥꓶˍ ꓔꓯ ꓡꓰꓽ ꓬꓰ ꓔꓬ ꓡꓳ= ꓬꓲ ꓪ ꓠꓽ ꓪꓴ-ꓢ ꓔꓯˍ ꓟꓲ ꓟꓽ ꓛꓳ= ꓟꓽ ꓙꓲꓻ ꓟ꓾ ꓟꓽ ꓧ ꓟ ꓟꓬꓱꓽ ꓮ ꓙꓵꓽ ꓬꓰ ꓢꓴ ꓥꓳ= ꓬꓲ ꓪ ꓠꓬ ꓟꓽ ꓓ ꓥꓶˍ ꓟ꓾ ꓟꓬ ꓠꓯꓸ ꓢꓴ ꓡꓰꓽ ꓥ ꓢꓲ ꓕꓲ ꓣꓳ ꓐꓰ ꓕꓲ ꓣꓳ ꓓꓶꓽ ꓡꓯ ꓘꓳ ꓔꓲꓸ ꓡꓯ ꓘꓳ ꓠꓬꓲ ꓬꓰ ꓔꓬ ꓖꓴˍ ꓡꓳ= ꓬꓲ ꓪ ꓐꓴ ꓕꓱ ꓡꓰ ꓟꓽ ꓙꓲꓻ ꓟ ꓬꓰˍ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓬꓲ ꓪ ꓔꓯ ꓮ ꓘꓶꓸ ꓠꓲꓹ ꓟ ꓦꓶˍ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓬꓳ-ꓠ ꓔꓯ ꓫꓸ ꓕꓱ ꓡ ꓢꓲ꓾ ꓬꓲ ꓐꓱ ꓶ ꓟꓬꓱꓽ ꓕꓲ ꓟ ꓬꓰ ꓠꓹ ꓟ ꓘꓴ ꓡˍ ꓡꓳ= ꓬꓳ-ꓠ ꓳ ꓠꓴ ꓔꓯ ꓥꓪ ꓐꓯ ꓓꓴ ꓕꓲ ꓙꓰꓽ ꓙꓳˍ ꓡꓳ= ꓬꓲ-ꓢꓷ-ꓡꓰ ꓗꓴꓷꓼ ꓐꓰ ꓮ ꓘꓶꓸ ꓟꓽ ꓶ ꓟ ꓗꓪ ꓠꓲ-ꓠꓲ-ꓪꓰ ꓟꓬꓱꓺ ꓔ ꓟ ꓡꓳ ꓒꓱ ꓕꓲ ꓟ ꓙꓳˍ ꓡꓳ= ꓖꓳ ꓗꓪ ꓔꓬ ꓢꓴ ꓐꓴ ꓮ ꓡꓰ ꓘꓶ ꓛꓲ ꓥꓶˍ ꓟ ꓥꓪ ꓟꓳꓻ ꓗꓷꓳ= ꓬꓲ ꓪ ꓐꓴ ꓠꓬ ꓖꓴꓽ ꓙꓴꓽ ꓦꓴꓻ ꓠꓬꓲ꓾ ꓚꓲ ꓛꓬ ꓬꓲ ꓤ ꓠꓬꓲ ꓤ ꓐꓴ ꓔꓯ ꓢꓰꓼ ꓠꓬꓲ꓾ ꓐꓰ ꓟꓽ ꓙꓲꓻ ꓟ ꓟꓬꓱꓽ ꓮ ꓟꓬꓹ ꓬꓰ ꓔꓬ ꓡꓳ= ꓬꓲ ꓪ ꓪ ꓔꓲˍ ꓟꓲ ꓞꓳ ꓐꓴ ꓕꓲ ꓣꓳ ꓥ ꓢꓲ꓾ ꓗꓴꓷꓼ ꓔꓯ ꓬꓲꓸ ꓙꓲ ꓟꓽ ꓙꓵꓽ= ꓡꓳ ꓒꓱ ꓗꓪ ꓟ ꓑ ꓫꓬ ꓡ ꓞꓳ ꓐꓴ ꓦꓰꓼ ꓟꓷꓼ ꓔꓬ ꓕꓯ ꓪ ꓔꓲ ꓠꓽ ꓜꓽ ꓠꓬꓲ ꓓꓳꓻ ꓠꓬꓲ ꓐꓰ ꓬꓰ ꓢꓲ ꓗꓹ ꓛꓲꓽ ꓔꓬ ꓡꓳ= ꓬꓲ ꓪ ꓕꓱ ꓡꓱ ꓬꓰˍ ꓟ ꓠꓬ ꓥꓪ ꓔꓯ ꓮ ꓘꓶꓸ ꓠꓲꓹ ꓟ ꓦꓶ ꓡ ꓝꓲ ꓢꓲ꓾ ꓬꓲ ꓪ ꓡꓳ ꓒꓱ ꓔꓯ ꓐꓬ ꓡꓰ ꓝꓲ ꓠꓹ ꓟ ꓥꓪ ꓓꓵꓽ ꓙ ꓞꓷꓹ ꓗꓷꓳ= ꓖꓳ ꓡꓱ ꓠꓬꓲ ꓠꓴ ꓠꓬ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓓꓯ ꓙꓰ ꓢꓲ ꓬꓲ ꓪ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓹ ꓟ ꓚ ꓖꓶ= ꓬꓲ ꓪ ꓟꓽ ꓒꓳꓹ ꓬꓲꓼ ꓡ ꓠꓬ ꓝꓮꓲ 40 ꓠꓬꓲ ꓘꓴꓽ ꓗꓪ ꓡꓳ ꓒꓱ ꓔꓯ ꓐꓬ ꓡꓰ ꓝꓲˍ ꓥꓳ ꓐꓰ꓾ ꓚ ꓟꓸ ꓖꓶ ꓙꓰ꓾ ꓐꓯ ꓖꓶˍ ꓡꓳ=

ꓬꓳ-ꓠ ꓡꓰ ꓪꓴ-ꓢ ꓕꓵꓼ ꓘꓶꓽ ꓟꓶ ꓡꓰ ꓠꓬꓲ ꓮ ꓘꓶꓸ ꓠꓲꓹ ꓟ ꓫꓸˍ ꓡꓰꓳ= ꓠꓲ-ꓠꓲ-ꓪꓱ ꓡꓳ ꓒꓱ ꓢꓴ ꓐꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓐꓱ ꓶ ꓛꓴꓽ ꓙꓳ ꓢꓴ ꓥ ꓟ ꓡꓰꓽ ꓟꓽ ꓞꓲ ꓬꓲ ꓪ ꓠꓬ ꓥꓶˍ ꓟ ꓡ ꓞꓳ ꓐꓴ ꓥ ꓠꓬꓲ ꓮ ꓡꓰ ꓬꓰ ꓖꓶˍ ꓟꓲ ꓓꓵꓽ ꓙ ꓒꓳꓹ ꓬꓲꓼ ꓡ ꓟꓽ ꓐ ꓡ= ꓖꓳ ꓟ ꓡꓰꓽ ꓟꓽ ꓞꓲ ꓪꓴ-ꓢ ꓐꓯ ꓘꓶꓽ ꓚ ꓖꓶ ꓙꓰˍ ꓟ ꓬꓳ-ꓠ ꓔꓯˍ ꓟꓲ ꓢꓰꓼ ꓡˍ ꓥꓳ ꓓꓵꓽ ꓙ ꓢꓲ ꓠꓲ-ꓠ-ꓪꓱ ꓡꓳ ꓒꓱ ꓗꓪ ꓟꓽ ꓙꓰ ꓙꓰ ꓠꓱꓸ ꓐꓯꓼ ꓕꓲ ꓖ ꓗꓪ ꓙꓰ ꓠꓹ ꓟ ꓬꓰˍ ꓡꓳ=

ꓬꓳ-ꓠ ꓠꓬ ꓡꓲꓺ ꓛꓲꓺ ꓔꓯ ꓗꓳꓸ ꓢꓲ ꓠꓲ-ꓠꓲ-ꓪꓱ ꓡꓳ ꓒꓱ ꓐꓰ ꓶ ꓤ ꓗꓪ ꓙꓰˍ ꓡꓳ= ꓡꓳꓹ ꓬꓰˍ ꓗꓪ ꓬꓲ ꓠꓬ ꓠꓱꓸ ꓐꓯꓼ ꓡꓳ ꓒꓱ ꓗꓪ ꓙꓰˍ ꓟ ꓡꓲ ꓕꓲ ꓟ ꓐꓰ ꓔꓳꓹ ꓜꓳꓽˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓡꓲ ꓜꓶꓽ ꓒꓵꓽ ꓐꓶ ꓗꓷ ꓢꓲ ꓕ-ꓫꓱ-ꓫꓵ ꓗꓪ ꓙꓰˍ ꓡꓳ=

ꓡꓲ ꓙꓵꓽ ꓒ ꓐꓰ ꓡꓲ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓬꓳ-ꓠ ꓡꓰ ꓦ ꓡꓱ ꓪꓴꓸ ꓓꓵ ꓕꓱ ꓔꓬ ꓟ ꓪꓴ-ꓢ ꓔꓯ ꓟꓽ ꓢꓷꓸ= ꓬꓲ ꓪ ꓐꓴ ꓠꓬ ꓭꓸ ꓛꓲ ꓐꓰ ꓢꓲꓹ ꓒꓬꓸ ꓡꓰ ꓫꓬꓹ ꓔ ꓟ ꓢꓲꓺ ꓐꓴ ꓔꓯ ꓦ ꓡꓱ ꓪꓴꓸ ꓓꓵ ꓕꓱ ꓔꓬ ꓡꓳ= ꓖꓳ ꓟ ꓔꓯ ꓬꓳ-ꓠ ꓟꓳˍ ꓟꓲ ꓬꓲ ꓪ ꓔꓯ ꓮ ꓫꓵꓽˍ ꓟꓲ ꓟꓽ ꓐꓯ꓾ ꓟꓽ ꓪꓳꓹ ꓔꓬ ꓢꓲ꓾ ꓡꓲ ꓠꓯꓸ ꓘꓪ ꓕꓲ ꓔꓱꓹ ꓗꓪ ꓙꓰ ꓢꓲ ꓬꓲꓼ ꓔ ꓔꓬ ꓡꓳ= ꓬꓳ-ꓠ ꓠꓬ ꓖꓳ ꓗꓪ ꓞ ꓞ ꓬꓲꓼ ꓟꓶ ꓡꓰˍ ꓡꓳ=

ꓖꓳ ꓕꓯ ꓬꓲꓻ ꓡꓴꓽ ꓐꓱ ꓗꓪ ꓟꓲꓽ ꓦꓲ ꓓꓽ ꓟ ꓙꓱꓼ ꓔꓴ ꓡ ꓢꓲ꓾ ꓡꓲ ꓐꓬ ꓡꓰ ꓠ ꓛꓲ ꓬꓲꓻ ꓡꓯꓼ ꓟꓰ ꓓꓽ ꓟ ꓓꓶꓽ ꓡˍ ꓡꓳ= ꓡꓲ ꓕꓯꓽ ꓢꓲ ꓔꓬ ꓢꓴ ꓮ ꓙꓵꓽ ꓠꓬ ꓮ ꓘꓶꓸ ꓙꓳꓺ ꓡꓰ ꓢꓲ ꓚꓲꓸ ꓛꓬ ꓢꓲꓺ ꓔꓯ ꓥꓴꓻ ꓢꓲ ꓪꓽ ꓘꓴˍ ꓡꓳ=

ꓬꓲꓻ ꓡꓴ ꓐꓱ ꓗꓪ ꓟꓲꓽ ꓦꓲ ꓓꓽ ꓟ ꓙꓱꓼ ꓢꓲ ꓡꓲ ꓠꓬ ꓮ ꓡꓹ ꓐꓬ ꓡꓰ ꓮ ꓡꓹ ꓐꓬ ꓡꓰ ꓐꓰ ꓓꓹ ꓟꓲ ꓬꓳ-ꓠ ꓠꓽ ꓮ ꓘꓶꓸ ꓬꓲꓼ ꓟꓶ ꓔꓬ ꓟ ꓔꓯ ꓡꓲ ꓙꓵꓽ ꓒ ꓟꓳ ꓡꓰ ꓠꓬ ꓮ ꓘꓶꓸ ꓓꓵꓽ ꓙ ꓮ’ ꓡꓰˍ ꓡꓳ= ꓬꓳ-ꓠ ꓳ ꓮ ꓟꓰꓸ ꓔꓴ꓾ ꓕꓱ ꓘꓶ ꓛꓲꓺ ꓙꓳꓺ ꓓꓴ ꓧꓹ ꓟ ꓙꓵꓹ ꓗꓪ ꓠꓴ ꓮ ꓡꓰ ꓬꓰ ꓢꓲ ꓬꓲꓼ ꓟꓶ ꓟꓲꓽ ꓔꓬ ꓢꓰꓽ꓾ ꓡꓲ ꓗꓪ ꓡ ꓞꓳ ꓮ ꓙꓵꓽ ꓠꓬ ꓚꓲꓸ ꓛꓬ ꓢꓲꓺ ꓔꓯ ꓪꓽ ꓘꓴ ꓔꓬ ꓖꓴˍ ꓡꓳ= ꓠꓴ ꓥˍ ꓟꓲ ꓠꓴ ꓦꓻ ꓡꓱ ꓔꓬ ꓟ ꓪꓴ-ꓢ ꓔꓯ ꓪꓽ ꓘꓴ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓬꓳ-ꓠ ꓡꓰ ꓕꓱ ꓟ ꓠꓬ ꓟꓲ ꓠꓯ ꓔꓯ ꓚꓰꓼ ꓢꓴ ꓕꓲ ꓣꓳˍ ꓟ ꓪꓴ-ꓢ ꓡꓰ ꓬꓰˍ ꓟ ꓥ ꓡꓳ꓾ ꓐꓯ ꓖꓶˍ ꓡꓳ= ꓬꓲ ꓪ ꓐꓴ ꓡꓰ ꓠꓴ ꓠꓬ ꓬꓲꓸ ꓠꓲꓹ ꓟ ꓦꓶ ꓡꓰ ꓠ ꓕꓲ ꓫꓵꓽ ꓫꓵꓽ ꓛꓬ ꓗꓷ ꓡ? ꓟꓲꓽ ꓦꓲ ꓓꓽ ꓟ ꓙꓱꓼˍ ꓟ ꓠꓽ ꓗꓷ ꓠꓹ ꓟ ꓥꓪ ꓠꓴꓽ ꓮ ꓫꓵꓽ ꓬꓰ ꓠꓯˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓥꓪ ꓠꓬ ꓪꓴ-ꓢ ꓐꓯ ꓘꓶꓽ ꓟꓽ ꓠ ꓠꓹ ꓐꓰ ꓬꓲ ꓔꓯˍ ꓐꓰ ꓛꓰꓹ ꓙꓰ ꓟ ꓑꓶꓸ ꓓꓴ ꓠꓴ ꓪ ꓮ ꓫꓵꓽˍ ꓟꓲ ꓬꓰ ꓟꓽ ꓛꓵꓽ= ꓥꓪ ꓔꓯ ꓬꓲ ꓙꓬ ꓘꓴꓽ ꓗꓪ ꓡꓳ ꓩꓴ ꓡꓯ꓾ ꓖꓳ ꓡꓱ ꓠꓬ ꓠꓴ ꓪ ꓚꓬꓴꓸ ꓟꓶˍ ꓥꓳ꓾ ꓐꓯ ꓖꓶˍ ꓡꓳ=  

ꓬꓲ ꓪ ꓐꓴ ꓡꓰ꓾ ꓠꓴ ꓔꓯ ꓥꓪ ꓠꓴꓽ ꓬꓲꓻ ꓙꓬ ꓘꓴꓽ ꓗꓪ ꓡꓳꓺ ꓩꓴ ꓟꓽ ꓬꓯꓼ= ꓡꓲ ꓗꓪ ꓓꓹ ꓟ ꓮꓽ ꓙꓵꓽ ꓔꓯ ꓡꓳꓺ ꓩꓴ ꓗꓷ ꓢꓲ ꓡꓲꓺ ꓔꓯ ꓡꓳ ꓡꓰ ꓠ ꓬꓰ ꓡꓯ꓾ ꓐꓯ ꓢꓲ ꓡꓲꓺ ꓗꓪ ꓙꓳˍ ꓟ ꓮ ꓙꓵꓽ ꓡꓳꓺ ꓩꓴ ꓗꓷˍ ꓡꓳ= ꓖꓳ ꓡꓱ ꓥˍ ꓟꓲ ꓟꓲꓽ ꓦꓲ ꓓ ꓟ ꓙꓱꓼˍ ꓟ ꓟꓽ ꓠꓽ ꓡꓰ ꓡꓰ ꓬꓲꓸ ꓐꓶꓹ ꓙꓱꓼ ꓔꓴ ꓡ ꓢꓲ ꓬꓲꓻ ꓡꓯꓼ ꓟꓰ ꓠꓬ ꓡꓲꓺ ꓔꓯ ꓪ ꓙꓲ ꓓꓶꓽ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓮ ꓘꓶꓸ ꓙꓳꓺ ꓡꓰ ꓢꓲ ꓬꓳ-ꓠ ꓔꓯ ꓬꓲ ꓙꓬ ꓗꓪ ꓡꓳꓺ ꓧꓳꓽ ꓗꓷ ꓠꓬꓲ ꓟꓲꓽ ꓦꓲ ꓓꓽ ꓟ ꓙꓱꓼˍ ꓟ ꓠꓽ ꓗꓷ ꓢꓲ ꓢꓲꓺ ꓡꓲꓺ ꓗꓷ ꓡꓰꓳ=

ꓬꓳ-ꓠ ꓬꓲꓻ ꓙꓬ ꓗꓪ ꓞꓰ ꓡꓰ ꓕꓯ ꓥꓪꓸ ꓓꓽ ꓟ ꓕꓲ ꓟ ꓡ ꓢꓲ ꓬꓲ ꓔꓯ ꓖꓴ ꓓꓵꓽ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓮ ꓘꓶꓸ ꓠꓯ ꓞꓲꓹ ꓟ꓾ ꓮ ꓘꓶꓸ ꓛꓱꓽ ꓠꓱꓹ ꓟ ꓥꓪꓸ ꓦꓰꓼ ꓛꓲꓽ ꓗꓪ ꓔꓬ ꓪ ꓡꓰ ꓠꓬꓲ ꓮ ꓘꓶꓸ ꓙꓳꓺ ꓔꓴ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓥꓪꓸ ꓦꓰꓽ ꓛꓲꓽ ꓗꓪ ꓔꓬ ꓢꓲ ꓪꓴ-ꓢ ꓔꓯ ꓪꓽ ꓘꓴˍ ꓡꓳ= ꓬꓳ-ꓠ ꓠꓬ ꓥꓪꓸ ꓦꓰꓼ ꓛꓲꓽ ꓗꓪ ꓢꓽ ꓠꓬꓲ ꓔꓬ ꓗꓷ ꓢꓲ꓾ ꓡꓲꓸ ꓠꓬꓲ ꓕꓲ ꓠꓬꓲ ꓗꓪ ꓪꓴ-ꓢ ꓡꓰ ꓕꓵꓼ ꓪ ꓖꓶ ꓗꓷ ꓠꓬ꓾ ꓥꓪꓸ ꓡꓰ ꓬꓳ-ꓠ ꓔꓯ ꓟꓲ ꓙꓴ ꓗꓪ ꓒꓰꓼ ꓓꓳ ꓗꓷˍ ꓡꓳ=

ꓪꓴ-ꓢ ꓡꓰ ꓬꓳ-ꓠ ꓔꓯ ꓠꓬꓲꓽ ꓧꓪꓹ ꓕꓲ ꓧꓪꓹ ꓫ ꓕꓱ ꓡ ꓢꓲ ꓾ ꓠꓲ-ꓠꓲ-ꓪꓱ ꓡꓳ ꓒꓱ ꓓꓽ ꓟ ꓗꓪ ꓙꓰ ꓢꓲ ꓠꓬꓲ ꓪꓴ-ꓢ ꓡꓰ ꓐꓯ ꓖꓶ ꓗꓷ ꓟ ꓕꓲ ꓡꓰꓹ ꓚ ꓟꓸ ꓖꓶ ꓠꓹ ꓟ ꓐꓯ ꓖꓶˍ ꓡꓳ= ꓬꓳ-ꓠ ꓠꓬ ꓪꓴ-ꓢ ꓐꓯ ꓘꓶ ꓔꓯ ꓛꓳ ꓢꓲ ꓠꓬꓲ꓾ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓙꓰˍ ꓡꓳ= ꓡꓳ ꓒꓱ ꓖꓳ ꓟ ꓠꓬ ꓮ ꓘꓶꓸ ꓪꓴꓽˍ ꓟ ꓥ ꓠꓬꓲ ꓢꓽ ꓠꓬꓲ ꓛꓲ ꓙꓻ ꓫꓱꓽ ꓪˍ ꓟ ꓥ ꓡꓳ= ꓬꓳ-ꓠ ꓠꓬ ꓡꓳ ꓒꓱ ꓗꓪ ꓓꓵꓽ ꓙꓰ ꓢꓲ ꓕꓲ ꓠꓬꓲ ꓫꓱꓽ ꓗꓷ ꓠꓬ꓾ ꓝꓮꓲ ꓡꓲ ꓞꓲ ꓠꓬꓲ ꓠꓬ ꓠꓲ-ꓠꓲ-ꓪꓱ ꓔꓯ ꓐꓬ ꓡꓰ ꓝꓲˍ ꓥꓳ꓾ ꓐꓰ ꓘꓴˍ ꓡꓳ=

ꓖꓳ ꓡꓱ ꓠꓬꓲ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓔꓬ ꓢꓴ ꓪꓴꓽ ꓪꓴꓽ ꓣꓳ ꓣꓳ ꓮ ꓙꓵꓽ ꓠꓬ ꓬꓳ-ꓠ ꓘꓴ ꓢꓯꓼ ꓔꓯ ꓑ ꓙ ꓗꓷ ꓕꓯ꓾ ꓬꓲ ꓪ ꓠꓲꓹ ꓟ ꓒꓳꓹ ꓬꓲꓼ ꓡ ꓢꓲ ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓜꓽ ꓓꓴ ꓝꓲ ꓠꓬꓲ꓾ ꓫꓸ ꓙꓽ ꓐꓵ ꓞꓶꓽ ꓖꓪꓽ ꓠꓬꓲ ꓬꓰ ꓠꓹ ꓟ ꓐꓯ ꓒꓬꓱˍ ꓡꓳ= ꓓꓳꓽ ꓕꓱ ꓟ ꓔꓯ ꓪ ꓔꓲ ꓑ ꓙ ꓗꓷ ꓠꓬ ꓬꓲ ꓠꓽ ꓙꓵꓻ ꓠꓬꓲꓸ ꓕꓲ ꓗꓪ ꓐꓰ ꓔꓴ ꓡ ꓢꓲ ꓪ ꓔꓲ ꓐꓵ ꓞꓶꓽ ꓡꓵꓸ ꓗꓷ ꓢꓲ ꓠꓬꓲ꓾ ꓓꓸ ꓖꓶꓸ ꓟꓶ ꓐꓵ ꓞꓶꓽ ꓖꓪꓽ ꓢꓲ ꓘꓴꓽ ꓦ ꓗꓪ ꓠꓬꓲ ꓔ ꓡꓳ=

ꓝꓮꓲ ꓠꓲ-ꓠꓲ-ꓪꓱ ꓪ ꓔꓲ ꓡꓰ ꓠꓲ-ꓠꓲ-ꓪꓱ ꓡꓳ ꓒꓱ ꓕꓲ ꓡꓳ ꓒꓱ ꓡꓱꓸꓼ ꓗꓪ ꓟ ꓡꓽ ꓞꓳ ꓐꓰ ꓙꓱ ꓤ ꓮꓽ ꓙꓵꓽ ꓔꓯ ꓟꓽ ꓫꓬ ꓟ ꓜꓽ ꓫꓵꓽ ꓓꓳꓻ ꓫꓵꓽ ꓜꓽ ꓓꓳꓻˍ ꓟ ꓔꓯ ꓠꓽ ꓗꓷ ꓢꓲ ꓬꓳ-ꓠ ꓡꓰ ꓦ ꓡꓱ ꓪꓴꓸ ꓓꓵ ꓕꓱꓽ ꓔꓬ ꓟ ꓬꓰ-ꓧꓳ-ꓧꓪ ꓪꓴ-ꓢ ꓔꓯ ꓪꓴꓸ ꓓꓵ ꓕꓱꓽ ꓠꓹ ꓟ ꓑ ꓫꓬ ꓡ ꓞꓳ ꓮ ꓙꓵꓽ ꓔꓯ ꓕꓵꓼ ꓪꓽ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓮ ꓘꓶꓸ ꓥꓶˍ ꓟ꓾ ꓕꓲ ꓣꓳ ꓐꓰ ꓕꓲ ꓣꓳ ꓮ ꓕꓯ ꓟꓲ ꓢꓰꓼ ꓡꓯꓽ ꓘꓳ ꓔꓬ ꓟ ꓠꓲ-ꓠꓲ-ꓪꓱ ꓡꓳ ꓒꓱ ꓢꓴ ꓐꓴ ꓠꓬ ꓬꓳ-ꓠ ꓐꓯ ꓘꓶꓽ ꓕꓲ ꓘꓶꓽˍ ꓗꓪ ꓡꓰꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓢꓲ꓾ ꓪꓴ-ꓢ ꓔꓯ ꓮ ꓘꓶꓸ ꓙꓳꓺ ꓒꓵꓽ ꓡˍ ꓡꓳ= ꓬꓲ ꓪ ꓐꓴ ꓡꓰ ꓥꓶˍ ꓟ ꓚꓱꓹ ꓐꓰ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰˍ ꓟ ꓗꓪ ꓐꓰ ꓮ ꓙꓵꓽ ꓠꓽ ꓗꓷꓳ= ꓬꓲ ꓪ ꓡꓰ ꓥꓶˍ ꓟ ꓚꓱꓹ ꓗꓪ ꓐꓰ ꓒꓳꓹ ꓬꓲꓼ ꓡˍ ꓟ ꓔꓯ ꓪꓴ-ꓢ ꓟꓳ ꓗꓷ ꓠꓬ ꓬꓲ ꓪ ꓔꓯ ꓫꓱꓸ ꓤ ꓢꓲ ꓬꓲ ꓪ ꓡꓳ ꓒꓱ ꓔꓯ ꓟꓽ ꓐꓬ ꓡꓰ ꓝꓲꓳ= ꓟꓽ ꓟꓶꓽ ꓬꓰ ꓝꓲꓳ=