ꓟꓷꓽ ꓠꓷꓹ ꓝ ꓒ ꓬꓳ-ꓢꓷ ꓟꓸ ꓟꓲꓽ 1 ꓕꓱꓻ

ꓬꓳ-ꓢꓷ ꓠꓬ ꓘꓷ-ꓠ ꓟꓵꓽ ꓗꓪ ꓟ ꓾ ꓬ-ꓗꓴ ꓬꓲ ꓤ 12 ꓣꓳ ꓘꓴꓽ ꓗꓪ ꓟ ꓕꓲ ꓣꓳ ꓥ ꓡꓳ= ꓬꓲ ꓔꓯ ꓮ ꓬꓲꓼ 10 ꓣꓳ ꓐꓰ ꓠꓬꓲ ꓤ ꓕꓲ ꓣꓳ ꓙꓳˍ ꓡꓳ= ꓬꓲ ꓟꓹ ꓟ ꓠꓬ ꓬꓲ ꓠꓬꓲ ꓤ ꓔꓯ ꓦꓵꓻ ꓕꓯ ꓡꓰꓽ ꓫꓵꓻ ꓳ=

ꓬꓳ-ꓢꓷ ꓐꓰ ꓬꓲ ꓮ ꓬꓲꓼ ꓐꓴ ꓠꓬ ꓬꓲꓸ ꓐꓹ ꓐ ꓔꓯ ꓟꓬꓱꓽ ꓬꓰ ꓙ ꓔꓬ ꓡꓳ= ꓮ ꓣꓳ ꓜꓴ ꓔꓯˍ ꓟꓲ ꓡꓳꓸ ꓔꓬ ꓖꓴˍ ꓡꓳ= ꓬꓳ-ꓢꓷ ꓠꓬ ꓞꓲꓼ ꓣꓳˍ ꓕꓯ ꓡꓰ ꓬꓲ ꓐꓹ ꓐ ꓬ-ꓗꓴ ꓠꓲꓹ ꓠꓵˍ ꓟ ꓤ ꓥ ꓡꓳ= ꓬ-ꓗꓴ ꓠꓬ ꓬꓳ-ꓢꓷ ꓔꓯ ꓠꓲꓹ ꓠꓵˍ ꓟ ꓪꓴꓸ ꓠꓬꓲ ꓬꓲꓸ ꓮ ꓬꓲꓼ ꓐꓴ ꓠꓬ ꓬꓳ-ꓢꓷ ꓔꓯ ꓟꓬ ꓔꓳꓹ ꓡꓳ=

ꓬꓲ ꓞꓲ ꓫꓵꓽ ꓘꓳꓼ ꓐꓲˍ ꓟ ꓦꓵꓻ ꓦꓬꓼ ꓠꓬꓲ ꓗꓪ ꓬꓲꓸ ꓐꓹ ꓐ ꓠꓬ ꓬꓲ ꓔꓯ ꓮ ꓘꓶꓸ ꓡꓳꓸ ꓐꓲˍ ꓟ ꓐꓵ ꓞꓶꓽ ꓡꓯꓼ ꓫꓴ ꓖꓶˍ ꓡꓳ= ꓬꓳ-ꓢꓷ ꓠꓬ ꓖꓳ ꓟ ꓑꓶꓸ ꓓꓴ ꓮ ꓘꓶꓸ ꓗꓹ ꓛꓲꓽ ꓥˍ ꓟꓲ ꓬꓲꓸ ꓮ ꓬꓲꓼ ꓐꓴ ꓠꓽ ꓮ ꓘꓶꓸ ꓦꓶˍ ꓡꓳ= ꓬꓲ ꓪ ꓠꓲꓹ ꓟ ꓗꓪ ꓠꓬ ꓟꓬꓱꓽ ꓮ ꓟꓬꓹ ꓬꓰ ꓢꓯꓼ ꓕꓵꓼ ꓔꓬ ꓥˍ ꓟꓲ ꓬꓲ ꓪ ꓐꓹ ꓐ ꓠꓬ  ꓬꓲ ꓪ ꓔꓯ ꓟꓽ ꓠꓲꓹ ꓠꓵ ꓐꓰ ꓓꓵꓽ ꓙ ꓟꓶˍ ꓡꓳ=

ꓕꓲ ꓦꓬꓽ ꓙꓳˍ ꓕꓯ ꓬꓳ-ꓢꓷ ꓬꓲꓼ ꓟꓬ ꓕꓲ ꓟ ꓘꓳˍ ꓡꓳ= ꓬꓲ ꓠꓬ ꓬꓲꓸ ꓠꓲꓹ ꓟ ꓗꓪ ꓮ ꓘꓶꓸ ꓗꓹ ꓛꓲ ꓢꓲ꓾ ꓮ ꓣꓳ ꓡꓳꓸ ꓔꓬ ꓟ ꓬꓲꓸ ꓮ ꓬꓲꓼ ꓔꓯ ꓐꓯ ꓖꓶ ꓬꓰˍ ꓡꓳ= “ꓢꓲ-ꓟꓰ ꓳ ꓾ ꓮ ꓟꓰ ꓟꓶꓽ ꓘꓶꓽ ꓕꓯ ꓥꓪ ꓔꓯ ꓬꓲꓼ ꓟꓬ ꓘꓳꓹ ꓡꓳ= ꓠꓴ ꓠ ꓠꓹ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓬꓲꓸ ꓮ ꓬꓲꓼ ꓡꓰ “ꓳꓧ ꓡꓳꓸ ꓠꓬꓲ꓾ ꓐꓹ ꓐ ꓬꓲ ꓤ ꓔꓯˍ ꓟꓲ ꓬꓲꓼ ꓟꓬ ꓘꓳ ꓡˍ ꓗꓴˍ ꓐꓭ= ꓠꓴ ꓬꓲꓼ ꓟꓬ ꓘꓳ ꓟꓸ ꓟꓲꓽ ꓠ ꓠꓹ ꓠꓹ ꓟ ꓥꓪ ꓔꓯ ꓬꓲꓸ ꓙꓵꓹ ꓟꓽ ꓙꓳ= ꓕꓽ ꓘꓶꓽ ꓡꓶꓽ ꓡ꓾ ꓐꓰ ꓐꓯˍ ꓡꓳ=

ꓬꓳ-ꓢꓷ ꓡꓰ꓾ ꓠ ꓠꓹ꓾ ꓥꓪ ꓬꓲꓼ ꓟꓬ ꓘꓳꓹ ꓟ ꓗꓪ꓾ ꓣꓳ ꓠꓬ ꓦ ꓟꓲ ꓗꓪ ꓔꓬ ꓢꓲ ꓜ ꓧꓷꓹ ꓧꓷꓹ ꓔꓬ ꓕꓯ꓾ ꓥꓪ ꓔꓯ ꓕꓲ ꓧꓷꓹ ꓟ ꓔꓴ ꓡ ꓢꓲ꓾ ꓠꓴ ꓪ ꓡꓰ ꓧꓷꓹ ꓔ ꓟ ꓮ ꓙꓵꓽ ꓠꓽ ꓖꓳ ꓟ ꓚꓳ ꓡꓳ ꓗꓪ ꓜꓲꓼ ꓡ ꓢꓲ ꓠꓬꓲ꓾ ꓥꓪ ꓜ ꓧꓷꓹ ꓔꓯ ꓪꓴꓸ ꓓꓵꓺ ꓕꓱꓼ ꓡꓺ ꓳ ꓐꓰ ꓘꓳ ꓟꓶˍ ꓟ ꓔꓯ ꓐꓯ ꓖꓶˍ ꓡꓳ= ꓖꓳ ꓕꓯ ꓢꓲ-ꓟꓰ ꓡꓰ “ ꓣꓳ ꓠꓬꓲ ꓤ ꓠꓬ ꓬꓲ ꓚꓲꓸ ꓛꓬ ꓡꓰ ꓥꓶˍ ꓟ ꓡꓰꓽ ꓟꓽ ꓛꓲ ꓓꓵꓽ ꓙ ꓔ ꓟˍ ꓟꓲ ꓥꓳꓽ ꓡꓰ ꓐꓭ꓾ ꓐꓰ ꓐꓯˍ ꓡꓳ= ꓬꓳ-ꓢꓷ ꓡꓰ ꓾ ꓟꓽ ꓥ ꓝꓮꓲ ꓕꓲ ꓟ ꓙꓳˍ ꓢꓰꓽ ꓡꓳ= ꓟꓲꓽ ꓟꓲ꓾ ꓦꓻ ꓐˍ ꓐꓰ ꓗꓴ ꓤ ꓞꓲ ꓕꓲꓽ ꓢꓶꓽ ꓠꓬ ꓥꓪ ꓔꓯ ꓪꓴꓸ ꓓꓵ ꓕꓱꓼ ꓡˍ ꓟ ꓬꓲꓼ ꓟꓬ ꓘꓳ ꓟꓶ ꓡꓰꓳ꓾ ꓐꓯ ꓖꓶˍ ꓡꓳ= “ꓮ ꓟꓶ ꓠꓬ ꓠꓴ ꓥꓪ ꓠꓴ ꓔꓯ ꓪꓴꓸ ꓓꓵ ꓕꓱꓼ ꓝꓲ ꓠꓲꓹ ꓫꓵˍ ꓡ= ꓣꓳ ꓕꓱ ꓗꓪ ꓐꓰ ꓙꓰ ꓡꓯ꓾ ꓐꓰ ꓬꓲꓸ ꓮ ꓬꓲꓼ ꓕꓲ ꓣꓳ ꓡꓰ ꓐꓯˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ꓾ ꓬ-ꓗꓴ ꓠꓬ ꓬꓳ-ꓢꓷ ꓔꓯ ꓬꓲ ꓮ ꓬꓲꓼ ꓐꓴ ꓐꓰ ꓛꓵꓼ ꓜꓴ ꓐꓴ ꓔꓯ ꓮ ꓡꓲ ꓥ ꓟꓽ ꓥ ꓡꓳꓸ ꓠꓬꓲ ꓬꓰ ꓝꓲˍ ꓡꓳ= ꓬꓲ ꓪ ꓐꓴ ꓠꓬ ꓬꓳ-ꓢꓷ ꓔꓯ ꓮ ꓘꓶꓸ ꓠꓲꓹ ꓟ ꓦꓶˍ ꓟ ꓔꓯ ꓟꓳꓸ ꓫꓸ ꓕꓱ ꓡꓯꓽ ꓘꓳ ꓔꓬ ꓡꓳ= ꓬꓳ-ꓢꓷ ꓶꓽ ꓤ ꓗꓪ ꓡ ꓔꓬ ꓕꓯꓽˍ ꓡꓰ꓾ ꓬꓲ ꓮ ꓬꓲꓼ ꓐꓴ ꓬꓲ ꓔꓯ ꓟꓳˍ ꓠꓬꓲ ꓾ ꓮ ꓘꓶꓸ ꓐꓰ ꓮ ꓘꓶꓸ ꓠꓲꓹ ꓟ ꓦꓶ ꓡ ꓢꓲ ꓬꓲ ꓔꓯ ꓢꓰꓼ ꓠꓹ ꓟ ꓚꓴꓽ ꓬꓲꓹ ꓓꓶꓽˍ ꓡꓳ=

“ꓬꓲꓼ ꓟꓬ ꓘꓳ ꓒ ꓡ ꓔꓬꓳ꓾ ꓬꓲ ꓬꓲꓼ ꓟꓬ ꓘꓳ ꓗꓷ ꓟ ꓔꓯ ꓖꓳꓽ ꓡꓰ ꓝꓲ ꓠꓹ ꓟ꓾ ꓣꓳ ꓡꓰ ꓬꓲ ꓔꓯ ꓢꓰꓼ ꓢꓲ ꓟꓲ ꓘꓴ ꓗꓪ ꓡꓳ ꓧꓳꓽ ꓗꓷ ꓢꓲ ꓠꓬꓲ꓾ ꓓꓴꓽ ꓪꓴ ꓡꓰ ꓜꓽ ꓗꓷꓳ꓾ ꓐꓰ ꓐꓯ ꓡꓯ= ꓖꓳ ꓕꓯ ꓬꓲ ꓬꓲꓼ ꓟꓬ ꓘꓳ ꓗꓷ ꓟ ꓮ ꓡꓲ ꓥ ꓟꓽ ꓥ ꓣꓳ ꓡꓳꓸ ꓠꓬꓲ ꓡꓯ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ= ꓖꓳ ꓟ ꓔꓯ ꓣꓴ-ꓐꓰ-ꓠ ꓑ ꓙꓽ ꓗꓷ ꓠꓬ ꓬꓳ-ꓢꓷ ꓔꓯ ꓚꓬꓴ ꓙ ꓠꓲꓹ ꓫꓵˍ ꓠꓬꓲ꓾ ꓣꓳ ꓠꓬ ꓬꓳ-ꓢꓷ ꓔꓯ ꓕꓽ ꓢꓰꓼ ꓡꓯ= ꓬꓲ ꓔꓯ ꓟꓽ ꓢꓰꓼ ꓢꓰꓼ ꓡꓲ ꓛꓲ ꓗꓪ ꓟ ꓟꓲ ꓘꓴ ꓕꓱ ꓟ ꓗꓪ ꓡꓳ ꓧꓳꓽ ꓗꓷ ꓡꓯ꓾ ꓐꓯ ꓖꓶˍ ꓡꓳ=

ꓬꓳ-ꓢꓷ ꓠꓬ ꓬꓲ ꓮ ꓬꓲꓼ ꓐꓴ ꓔꓬ ꓗꓪ ꓛꓲ ꓡ ꓕꓯ꓾ ꓬꓲ ꓪ ꓡꓰ ꓬꓲ ꓐꓵ ꓞꓶ ꓐꓽ ꓢꓽ ꓡꓵꓸ ꓗꓷ ꓢꓲ꓾ ꓬꓲ ꓔꓯ ꓣꓴ ꓢꓲ ꓬꓲꓻ ꓙꓬ ꓟꓽ ꓙꓳ ꓟ ꓟꓲ ꓘꓴ ꓗꓪ ꓡꓳ ꓧꓳꓽ ꓗꓷˍ ꓡꓳ=

ꓢꓲ-ꓟꓰ ꓠꓬ ꓬꓲ ꓠꓬꓲ ꓤ ꓐꓱ ꓶ ꓮ ꓘꓶꓸ ꓠꓲꓹ ꓟ ꓫ ꓢꓲ꓾ ꓬꓳ-ꓢꓷ ꓔꓯ ꓚꓬꓴ ꓙ ꓠꓹ ꓟ ꓙ ꓖꓶꓽˍ ꓡꓳ= ꓖꓳ ꓗꓸ ꓠꓯꓸ ꓬꓲ ꓪ ꓠꓬ ꓠꓬꓲꓸ ꓠꓸ ꓢꓲ ꓜ ꓜꓽ ꓔꓬ ꓕꓯ꓾ ꓬꓲ-ꓫꓵ-ꓟ-ꓡꓲ ꓡ ꓞꓳ ꓠꓬ ꓡꓳꓽ ꓕꓳ ꓕꓲꓽ ꓜꓴ ꓖꓼ ꓔ ꓢꓲ꓾ ꓖꓷ-ꓡꓲ-ꓬꓼ ꓟꓵꓽ ꓗꓪ ꓐꓰ ꓫꓳ ꓠꓱ ꓧꓶꓽˍ ꓐꓰ ꓫꓳ ꓠꓱˍ ꓟ ꓢꓲꓹ ꓜꓲꓼˍ ꓐꓰ ꓟꓴ-ꓬ ꓕꓳꓽ ꓔ ꓢꓲ ꓠꓬꓲ꓾ ꓬꓲ-ꓙꓲ ꓟꓵꓽ ꓗꓪ ꓬꓯꓼ ꓙꓰˍ ꓟ ꓔꓯ ꓟꓳˍ ꓡꓳ=

ꓖꓳ ꓕꓯ ꓬꓲ ꓪ ꓐꓴ ꓗꓪ ꓟ ꓬꓴ-ꓔ ꓡꓰ꓾ ꓣꓳ ꓠꓬ ꓣꓳ ꓠꓬꓲ ꓤ ꓔꓯ ꓘꓴ ꓢꓰꓼ ꓗꓷ ꓢꓲ ꓑꓲꓸ ꓔ ꓠꓬ ꓮ ꓫꓵꓽ ꓙꓲ ꓖꓴ ꓟꓽ ꓙꓳ= ꓣꓳ ꓠꓬꓲ ꓤ ꓠꓬ ꓣꓳ ꓫꓵꓽ ꓣꓳ ꓧꓪꓽ ꓥ ꓠꓬꓲ꓾ ꓬꓲ ꓔꓯ ꓟꓽ ꓢꓰꓼ ꓢꓰꓼ ꓬꓲ-ꓫꓵ-ꓟ-ꓡꓲ ꓡ ꓞꓳ ꓔꓯ ꓪꓴꓽ ꓗꓷ ꓡꓯ꓾ ꓐꓯˍ ꓡꓳ= ꓬꓲ ꓮ ꓬꓲꓼ ꓐꓴˍ ꓟꓲ ꓬꓲ ꓔꓯ ꓓꓽ ꓔꓳꓹ ꓡꓳ= ꓖꓳ ꓕꓯ ꓬꓳ-ꓢꓷ ꓔꓯ ꓟꓲ ꓘꓴ ꓗꓪ ꓐꓰ ꓚꓵꓹ ꓓꓳ ꓡ ꓢꓲ꓾ꓟ-ꓓꓲ-ꓬ ꓢꓴ ꓶꓻ ꓡꓯꓼ ꓟꓴˍ ꓐꓰ ꓗꓳꓸ ꓙꓰ ꓔꓬ ꓢꓴ ꓔꓯ ꓫꓱ-ꓘꓷ-ꓡꓷ ꓠꓬꓲꓽ ꓞꓲ ꓒꓯꓼ ꓐꓰ ꓪꓴꓽ ꓖꓶ ꓗꓷ ꓠꓬ꓾ ꓬꓲ ꓪ ꓡꓰ ꓬꓲ ꓔꓯ ꓬꓲ-ꓙꓲ ꓟꓵꓽ ꓗꓪ ꓧꓳꓽ ꓙꓰˍ ꓡꓳ=

ꓬꓳ-ꓢꓷ ꓔꓯ ꓪꓴꓽ ꓗꓷˍ ꓕꓯ ꓣꓴ-ꓐꓰ-ꓠ ꓟꓽ ꓔꓬ= ꓬꓲ ꓬꓲꓼ ꓛꓲ ꓡ ꓕꓯ ꓬꓳ-ꓢꓷ ꓔꓯ ꓬꓲ ꓪ ꓐꓴ ꓮ ꓡꓰ ꓬꓰ ꓗꓷ ꓟ ꓢꓷꓸ ꓡꓰ ꓢꓲ ꓙꓳꓺ ꓛꓱꓽ ꓡꓰ ꓥˍ ꓟꓲ ꓬꓲ ꓮ ꓡꓲ ꓐꓯ ꓟꓽ ꓐ ꓡ=

ꓖꓳ ꓗꓸ ꓠꓯ ꓬꓲ ꓮ ꓬꓲꓼ ꓐꓴ ꓠꓬ ꓬꓳ-ꓢꓷ ꓐꓵ ꓞꓶ ꓔꓯ ꓚꓵꓹ ꓧꓽ ꓗꓷ ꓢꓲ ꓖꓳ ꓟ ꓔꓯ ꓮ ꓛꓵꓼ ꓫꓵꓽ ꓠꓶꓸ ꓗꓷˍ ꓡꓳ= ꓬꓲ ꓪ ꓐꓴ ꓬ-ꓗꓴ ꓔꓬ ꓗꓪ ꓛꓲ ꓡ ꓢꓲ꓾ ꓬꓳ-ꓢꓷ ꓔꓯ ꓡꓲ ꓛꓲ ꓗꓪ ꓟ ꓬꓲ ꓡꓽ ꓬꓲ ꓗꓳꓸ ꓡꓰ ꓘꓳꓼ ꓚꓵꓹ ꓗꓷ ꓢꓲ ꓜꓽ ꓗꓷ ꓐꓷ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓟ ꓔꓯ ꓑ ꓙꓽ ꓕꓯ ꓬ-ꓗꓴ ꓠꓬ꓾ ꓬꓲ ꓮ ꓘꓶꓸ ꓠꓲꓹ ꓠꓵˍ ꓟ ꓬꓲ ꓤ ꓬꓳ-ꓢꓷ ꓒꓲꓼ ꓬꓰ ꓟꓶꓽ ꓬꓰ ꓟ ꓪꓴꓸ ꓠꓬꓲ ꓮ ꓟꓬꓹ ꓠꓬꓲ ꓥꓴꓻ ꓗꓷꓳ=

ꓟ-ꓓꓲ-ꓬ ꓢꓴ ꓡꓰ ꓬꓳ-ꓢꓷ ꓔꓯ ꓬꓲ-ꓙꓲ ꓟꓵꓽ ꓗꓪ ꓧꓳꓽ ꓛꓲ ꓬꓰ ꓠꓬ꓾ ꓩ-ꓣꓳ ꓬꓲ ꓟꓯꓼ ꓙꓵꓽ ꓒ ꓒꓳ-ꓕꓲ-ꓩ ꓔꓯ ꓪꓴꓽ ꓖꓶˍ ꓡꓳ= ꓬꓳ-ꓢꓷ ꓠꓬ ꓟꓵꓽ ꓮ ꓘꓶꓸ ꓢꓯꓼ ꓕꓵꓼ ꓢꓲ ꓙꓽ ꓜꓲꓼ ꓠꓲꓹ ꓮ ꓟꓬꓹ ꓙꓳˍ ꓟ ꓡꓰꓽ ꓟꓽ ꓞꓲ ꓒꓬꓱꓽ ꓐꓲꓻˍ ꓟ ꓪꓴꓸ ꓠꓬꓲ ꓒꓳ-ꓕꓲ-ꓩ ꓠꓬ ꓬꓳ-ꓢꓷ ꓔꓯ ꓦꓲ ꓙꓵꓽ ꓢꓴ ꓬꓰ ꓝꓲˍ ꓡꓳ=  ꓕꓲ ꓠꓬꓲ ꓙꓳˍ ꓕꓯ ꓒꓳ-ꓕꓲ-ꓩ ꓤ ꓟꓶꓻ ꓠꓬ ꓬꓳ-ꓢꓷ ꓔꓯ ꓠꓲꓹ ꓟ ꓦꓶꓻ ꓡꓰ ꓠꓬꓲ꓾ ꓬꓲꓸ ꓤ ꓖꓴ ꓔꓯ ꓗꓶꓸ ꓢꓲ ꓪꓽ ꓗꓳꓹ ꓖꓶˍ ꓡꓳ= ꓖꓳ ꓕꓯ ꓑꓳ-ꓕꓲ-ꓩ ꓮ ꓘꓶꓸ ꓠꓲꓹ ꓟ ꓦꓶꓻ ꓢꓲ ꓬꓳ-ꓢꓷ ꓔꓯ ꓐꓱ ꓓꓴꓽ ꓗꓪ ꓧꓳꓽ ꓩꓴ ꓗꓷˍ ꓡꓳ=

ꓬꓳ-ꓢꓷ ꓐꓱ ꓓꓴꓽ ꓗꓪ ꓔꓬ ꓕꓯ ꓬꓲ ꓐꓰ ꓕꓲ ꓪꓺꓽ ꓐꓱ ꓔ ꓟꓶ ꓢꓴ ꓡ ꓞꓳ ꓠꓬꓲꓽ ꓣꓳ ꓡꓰ ꓫꓸ ꓕꓱ ꓡꓯꓽ ꓘꓳ ꓔꓬ ꓡꓳ= ꓬꓲ ꓪ ꓗꓪ ꓟ ꓕꓲ ꓣꓳ ꓠꓬ ꓪ ꓔꓲ ꓙꓻ ꓥ ꓢꓲ ꓝꓮꓲ ꓕꓲ ꓣꓳ ꓠꓬ ꓑ ꓑ ꓗꓳ ꓢꓴ ꓔꓯ ꓙꓵꓽ ꓒ ꓥ ꓡꓳ= ꓖꓳ ꓕꓯ ꓪ ꓔꓲ ꓙꓻ ꓡꓰ꓾ ꓥꓪ ꓠꓽ ꓮ ꓟꓰ ꓟꓶꓽ ꓘꓶꓽ ꓕꓯ ꓬꓲ ꓟꓬ ꓕꓲ ꓟ ꓘꓳꓹ ꓡˍ ꓡꓳ= ꓬꓲꓼ ꓟꓬ ꓕꓱ ꓟ ꓮ ꓫꓵꓽ ꓟꓸ ꓟꓲꓽ ꓥ ꓟ ꓥꓪ ꓢꓷꓸ ꓠꓲꓹ ꓫꓵˍ ꓡꓳ꓾ ꓐꓰ ꓝꓮꓲ ꓕꓲ ꓣꓳ ꓔꓯ ꓐꓯ ꓖꓶ ꓔꓬ ꓡꓳ= ꓖꓳ ꓕꓯ ꓬꓳ-ꓢꓷ ꓡꓰ꓾ ꓥꓪ ꓒꓶ ꓠꓲꓹ ꓫꓵˍ ꓡꓳ꓾ ꓠꓴ ꓬꓲꓼ ꓟꓬ ꓒꓶ ꓠꓹ ꓟ ꓐꓱ ꓶ ꓥꓪ ꓐ ꓡˍ ꓡꓳ꓾ ꓐꓯ ꓖꓶˍ ꓡꓳ=

ꓖꓳ ꓕꓲ ꓣꓳ ꓟ ꓡꓰ ꓾ ꓠꓴ ꓠꓽ ꓞꓲꓼ ꓣꓳ ꓓˍ ꓢꓰꓽ ꓡꓳ= ꓮ ꓡꓰ ꓬꓰ ꓢꓲ ꓠꓴ ꓒꓶ ꓐ ꓡˍ ꓢꓰꓽ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓬꓳ-ꓢꓷ ꓡꓰ ꓾ ꓬꓲꓼ ꓟꓬ ꓒꓶ ꓟ ꓠꓬ ꓥꓪ ꓚꓲꓸ ꓛꓬ ꓗꓪ ꓐꓰ ꓟꓽ ꓥ= ꓥꓪ ꓪꓴ-ꓢ ꓠꓬ ꓥꓪ ꓔꓯ ꓬꓰ ꓙˍ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓡꓱ ꓢꓲ ꓪ ꓔꓲ ꓙꓻ ꓠꓬ ꓬꓲ ꓬꓲꓼ ꓟꓬ ꓔꓯ ꓐꓯ ꓟꓳꓸ ꓖꓶˍ ꓡꓳ= ꓬꓳ-ꓢꓷ ꓡꓰ ꓖꓳ ꓟ ꓔꓯ ꓬꓲꓸ ꓙꓲꓻ ꓠ ꓠꓹ ꓢꓲ ꓬꓲꓸ ꓬꓲꓼ ꓟꓬ ꓘꓳꓹ ꓟ ꓔꓯ ꓒꓶ ꓟꓸ ꓖꓶˍ ꓡꓳ= ꓗꓪ ꓛꓳꓽˍ ꓳ꓾ ꓢꓽ ꓠꓬꓲ ꓗꓸ ꓠꓯꓸ ꓪ ꓔꓲꓺ ꓡꓰ ꓠꓴ ꓔꓯ ꓖꓼ ꓖꓶ ꓢꓲ ꓐꓱ ꓓꓴꓽ ꓗꓪ ꓐꓰ ꓩꓴ ꓗꓷˍ ꓥꓳ꓾ ꓐꓯ ꓖꓶˍ ꓡꓳ= ꓝꓮꓲ ꓬꓳ-ꓢꓷ ꓡꓰ꓾ ꓠꓴ ꓩꓴ ꓗꓷ ꓟꓶˍ ꓕꓯ ꓥꓪˍ ꓟꓲ ꓩꓴ ꓗꓷ ꓟꓶ ꓠꓹ ꓟ ꓪ ꓔꓲ ꓔꓯ ꓐꓯ ꓖꓶꓽ ꓙ ꓡꓯ ꓐꓰ꓾ ꓐꓯ ꓖꓶ ꓗꓷꓳ=

ꓢꓽ ꓠꓬꓲ ꓗꓸ ꓠꓯ꓾ ꓪ ꓔꓲ ꓙꓻ ꓠꓬ ꓬꓳ-ꓢꓷ ꓒꓶ ꓔ ꓟ ꓕꓲ ꓡꓰꓹ ꓐꓱ ꓓꓴꓽ ꓗꓪ ꓐꓰ ꓩꓴ ꓗꓷ ꓟꓶ ꓡꓰꓳ=ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓬꓳ-ꓢꓷ ꓐꓯ ꓔ ꓟ ꓔꓯ ꓟꓲ ꓡꓰˍ ꓗꓷꓳ= ꓖꓳ ꓟ ꓑꓶꓸ ꓓꓴ ꓬꓳ-ꓢꓷ ꓠꓬ ꓐꓱ ꓓꓴꓽ ꓗꓪ ꓠꓬꓲꓽ ꓘꓳꓼ ꓛꓲ ꓔꓬ ꓪ ꓡꓰꓳ=

ꓕꓲ ꓟꓶꓽ ꓘꓶꓽ ꓗꓪ ꓩ-ꓣꓳ ꓪ ꓔꓲ ꓔꓯ ꓬꓲꓼ ꓟꓬ ꓕꓲ ꓟ ꓘꓳꓹ ꓡ ꓢꓲ ꓬꓲ ꓠꓬ ꓬꓲꓼ ꓔ ꓟꓽ ꓓ ꓗꓷ ꓡꓰꓳ= ꓠꓯꓼ ꓠꓯꓼ ꓗꓪ ꓬꓲ ꓠꓬ ꓬꓲ ꓔꓯ ꓙꓳˍ ꓟ ꓢꓷꓸ ꓠꓲꓹ ꓙꓳ ꓒ ꓐꓰ ꓬꓲꓼ ꓟꓬ ꓒꓶ ꓗꓴꓸ ꓢꓴ ꓮ ꓙꓵꓽ ꓔꓯ ꓘꓴ ꓡꓳꓽ ꓢꓲ ꓬꓲꓼ ꓟꓬ ꓒꓶ ꓟꓸ ꓖꓶ ꓠꓹ ꓟ ꓐꓯ ꓖꓶˍ ꓡꓳ= ꓮ ꓟˍ ꓟꓲ ꓬꓲꓼ ꓟꓬ ꓖꓳ ꓟ ꓮ ꓫꓵꓽ ꓟꓸ ꓟꓲꓽ ꓥ ꓟ ꓔꓯ ꓒꓶ ꓟꓽ ꓐ ꓡ=

ꓬꓳ-ꓢꓷ ꓐꓰ ꓐꓱ ꓓꓴꓽ ꓗꓪ ꓔꓬ ꓠꓬꓲ ꓗꓷ ꓟ ꓾ꓩ-ꓣꓳ ꓪ ꓔꓲ ꓔꓯ ꓣꓱꓽ ꓙ ꓢꓴ ꓖꓳ ꓕꓲ ꓣꓳ ꓡꓰ ꓖꓳ ꓟ ꓔꓯ ꓑ ꓙˍ ꓕꓯ꓾ ꓬꓲ ꓠꓬ ꓬꓳ-ꓢꓷ ꓔꓯ ꓓꓵꓽ ꓙ ꓛꓲꓺ ꓡ ꓢꓲ꓾ ꓖꓳ ꓟ ꓔꓯ ꓪ ꓔꓲ ꓔꓯ ꓐꓯ ꓖꓶ ꓬꓰˍ ꓡꓳ= ꓬꓲ ꓔꓯ ꓣꓱꓽ ꓙ ꓢꓴ ꓐꓯˍ ꓟ ꓔꓯ ꓑ ꓙˍ ꓕꓯ ꓩ-ꓣꓳ ꓡꓰ ꓝꓲ ꓓꓴ ꓝꓲ ꓩꓴ ꓗꓷ ꓢꓲ ꓬꓳ-ꓢꓷ ꓔꓯ ꓐꓱ ꓓꓴꓽ ꓗꓪ ꓐꓰ ꓠꓲꓹ ꓞ ꓧꓳꓽ ꓓꓳ ꓡ ꓝꓲˍ ꓡꓳ=