ꓟꓷꓽ ꓠꓷꓹ ꓝ ꓒ ꓬꓳ-ꓶ

ꓦꓲ-ꓐꓱ-ꓣꓴ ꓥꓳꓽ ꓗꓪ ꓐꓰ ꓬꓳ-ꓶ ꓐꓯ ꓟ ꓟꓬꓱꓺ ꓠꓬ “Yo'el” ꓥ ꓢꓲ ꓠꓬꓲ꓾ “ꓬꓰ-ꓧꓳ-ꓧꓪ ꓠꓬ ꓪꓴ-ꓢ ꓥ ꓡꓳ”꓾ ꓐꓯ ꓟ ꓬꓲꓸ ꓟꓸ ꓟꓲꓽ ꓥ ꓡꓳ= ꓬꓳ-ꓶ ꓠꓬ ꓒꓱ-ꓕꓴ-ꓡꓷ ꓬꓲ ꓤ ꓥ ꓢꓲ꓾ ꓬꓲ ꓠꓬ ꓬꓴ-ꓔ ꓡ ꓞꓳ ꓥ ꓡꓳ꓾ ꓐꓰ ꓚꓬꓹ ꓪˍ ꓡꓳ= ꓬꓲ ꓠꓬ ꓬꓲ ꓟꓬꓱꓺ ꓗꓪ ꓐꓰ ꓕꓳꓽ ꓶ ꓐꓳ ꓢꓴˍ ꓟꓲ ꓥ ꓡꓳ=

ꓬꓳ-ꓶ ꓕꓳꓽ ꓶ ꓠꓬ Twelve Minor Prophets ꓐꓯ ꓟ ꓟꓷꓼ ꓠꓷꓹ ꓝ ꓒ ꓤ 12 ꓣꓳ ꓡꓰ ꓟꓷꓽ ꓠꓷꓹ ꓝ ꓔ ꓟ ꓕꓳꓽ ꓶ 12 ꓑꓷꓠꓽ ꓟ ꓗꓪ ꓕꓲ ꓑꓷꓠꓽ ꓥ ꓡꓳ= ꓬꓲ ꓡꓰ ꓟꓷꓽ ꓠꓷꓹ ꓝ ꓔ ꓟ ꓠꓬ ꓬꓴ-ꓔ ꓐꓰ ꓙꓱ-ꓣꓴ-ꓢ-ꓡꓱ ꓐꓱ ꓶ ꓥ ꓡꓳ= (ꓬꓳ-ꓶ 2ꓽ1ꓹ 25ꓹ 3ꓽ1ꓹ6ꓹ18ꓹ20ꓹ21)= ꓝꓮꓲ ꓓꓵꓽ ꓙ ꓟꓶ ꓓꓴ ꓕꓲ ꓫꓵꓽ ꓠꓬ ꓬꓳ-ꓶ ꓬꓲ ꓟꓷꓽ ꓠꓷꓹ ꓝ ꓘꓶꓽ ꓗꓪ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓚꓱꓹ ꓔꓯ ꓐꓳ ꓔ ꓟ ꓟꓽ ꓙꓳ=

ꓟꓷꓽ ꓠꓷꓹ ꓝ ꓒ ꓬꓳ-ꓶ ꓠꓬ ꓬꓲ ꓕꓳꓽ ꓶ ꓐꓳ ꓔ ꓟ ꓬꓲ ꓦꓬꓼ ꓠꓬꓲ ꓔꓯˍ ꓟꓲ ꓟꓽ ꓐꓳ ꓔ= ꓖꓳ ꓡꓱ ꓥˍ ꓟꓲ ꓬꓳ-ꓶ ꓬꓲ ꓟꓷꓽ ꓠꓷꓹ ꓝ ꓗꓷ ꓟ ꓦꓬꓼ ꓠꓬꓲ ꓠꓬ ꓬꓴ-ꓔ ꓪ ꓔꓲ ꓬꓳ-ꓢꓲ-ꓬ ꓦꓬꓼ ꓠꓬꓲ ꓟꓽ ꓛꓲ ꓡꓢꓰꓽ ꓟ 700 ꓘꓳꓼ ꓖ ꓡꓯ ꓖ ꓙꓲ ꓕꓯ ꓥꓳ꓾ ꓐꓰ ꓐꓯ ꓓꓹ ꓡꓳ=

ꓬꓳ-ꓶ ꓕꓳꓽ ꓶ ꓗꓪ ꓐꓰ ꓠꓬꓲꓽ ꓫꓵꓽ ꓔꓯ ꓖꓴ ꓟꓸ ꓖꓶ ꓔꓬ ꓡꓳ= ꓬꓲ ꓪꓴꓸ ꓕꓲꓽ ꓫꓵꓽ꓾ ꓬꓳ-ꓶ 1ꓽ-2ꓽ17 ꓗꓪ꓾ ꓟꓵꓽ ꓗꓪ ꓟꓶꓽ ꓦ ꓟꓽ ꓡꓲ꓾ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰˍ ꓟ ꓡꓰꓽ ꓟꓽ ꓞꓲꓺ ꓚ ꓑꓴ ꓓ ꓟ ꓓꓳ ꓡˍ ꓟ ꓫꓸ ꓘꓶꓻ ꓓꓴ ꓔꓯ ꓖꓴ ꓟꓳꓸ ꓖꓶ ꓔ ꓡꓳ= ꓑ ꓫꓬ ꓐꓴ ꓪꓴ-ꓢ ꓔꓯ ꓟꓳꓸ ꓓꓵꓽ ꓙꓽ ꓒꓳꓹ ꓬꓲꓼ ꓡ ꓠꓹ ꓟ ꓐꓱ ꓶ ꓟꓷꓽ ꓠꓷꓹ ꓝ ꓒ ꓬꓳ-ꓶ ꓡꓰ ꓪꓴ-ꓢ ꓬꓲ ꓑ ꓫꓬ ꓐꓴ ꓔꓯ ꓓꓰꓽ ꓔ ꓟ ꓔꓯˍ ꓟꓲ ꓐꓳ ꓔ ꓡꓳ=

ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ ꓬꓰ-ꓧꓳ-ꓧꓪ ꓦꓬꓼ ꓠꓬꓲ ꓓꓽ ꓟ ꓛꓲ ꓡ ꓢꓲ꓾ ꓬꓲ ꓔꓯ ꓔꓳꓹ ꓢꓴ ꓮ ꓙꓵꓽ ꓔꓯ ꓟꓸ ꓙꓽˍ ꓟ ꓐꓰ꓾ ꓬꓲ ꓟꓶꓽ ꓗꓪ ꓠꓬ ꓪꓴ-ꓢ ꓡꓰ ꓞꓳ ꓫꓵꓽ ꓞꓳ ꓙꓰꓽ ꓪꓴꓽ ꓪꓴꓽ ꓣꓳ ꓣꓳ꓾ ꓟꓳꓽ ꓟꓳꓽ ꓡꓯꓸ ꓡꓯꓸ ꓮ ꓙꓵꓽ ꓔꓯ ꓬꓲ ꓦꓻ ꓖꓶ ꓩꓴ ꓡˍ ꓟ ꓔꓯ ꓐꓳ ꓚꓲꓸ ꓔ ꓡꓳ=

ꓢꓲꓽ ꓫꓬ ꓟ ꓦ ꓧꓳꓽ ꓡꓴꓽ ꓖꓶˍ ꓟ ꓔꓯ ꓥꓳ ꓡꓳꓸˍ ꓟ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓪꓴ-ꓢ ꓔꓯ ꓙꓵꓻ ꓢꓴ ꓐꓴ ꓗꓳ ꓡꓳ ꓗꓪ ꓮ ꓘꓶꓸ ꓪꓽ ꓠꓬꓲ ꓡꓰ ꓗꓷ ꓟ ꓥ ꓡꓳ= ꓢꓲꓽ-ꓫꓬ-ꓟ-ꓦ ꓧꓳꓽ ꓡꓴꓽ ꓖꓶˍ ꓟ ꓔꓯ ꓬꓲ ꓓꓽ ꓟ ꓥꓳ ꓡꓳꓸ ꓗꓷ ꓟ ꓥ ꓡꓳ= ꓘꓶꓽ ꓫꓵꓽ ꓫꓵꓼ ꓗꓪ ꓠꓬ꓾ Pentecost ꓐꓯ ꓟ ꓥꓪꓽ-ꓞꓲ-ꓠꓬꓲ-ꓑꓮꓲꓽ ꓦꓬꓼ ꓠꓬꓲ ꓕꓯ ꓝꓲ ꓓꓴ ꓐꓴ ꓕꓯꓽ ꓢꓲ ꓗꓪ ꓢꓲꓽ-ꓫꓬ-ꓟ-ꓦ ꓬꓯꓼ ꓡ ꓕꓯ ꓟꓷꓽ ꓠꓷꓹ ꓝ ꓒ ꓬꓳ-ꓶ ꓬꓲ ꓐꓯ ꓘꓶꓽ ꓠꓬ ꓐꓲ ꓡꓰ ꓟ ꓥ ꓡꓳ= ꓕꓱ ꓟ ꓔꓯ ꓝꓲ ꓓꓴ ꓒꓲ-ꓕꓱ ꓠꓬ ꓝꓲ ꓓꓴ ꓕꓳꓽ ꓶ 2ꓽ17-21 ꓗꓪ ꓢꓲꓽ-ꓫꓬ-ꓟ-ꓦ ꓬꓯꓼ ꓡ ꓟ ꓥꓪꓽ-ꓞꓲ-ꓠꓬꓲ-ꓑꓮꓲ ꓔꓯ “ꓬꓲ ꓪꓴꓸ ꓟ ꓟꓶꓽ ꓦ” ꓥ ꓠꓬ “ꓙꓬꓻ ꓝꓲ ꓬꓲ ꓪꓴꓸ ꓓꓵꓽ ꓡˍ ꓟ ꓶꓼ ꓤ ꓫꓱꓹ ꓤ” ꓡꓰ ꓐꓰ ꓔꓯꓺ ꓔ ꓡꓳ=

ꓢꓲꓽ-ꓫꓬ-ꓟ-ꓦ ꓠꓬ “ꓡꓳꓹ ꓬꓰˍ ꓟ ꓟꓶꓽ ꓦ” ꓥ ꓠꓬ “ꓡꓱꓻ ꓝꓲ ꓬꓲ ꓪꓴꓸ ꓟ ꓶꓼ ꓤ ꓫꓱꓹ ꓤ” ꓐꓯ ꓟ ꓟꓬꓽ ꓠꓬꓲ ꓪꓴꓽˍ ꓟ ꓦꓬꓼ ꓠꓬꓲ ꓛꓲꓺ ꓡ ꓕꓯ ꓢꓲꓺ ꓒ ꓬꓰ-ꓢꓴ ꓬꓲ ꓠꓬꓲꓽ ꓧꓪꓹ ꓕꓲ ꓧꓪꓼ ꓟꓽ ꓬꓯꓼ ꓡ ꓢꓰꓽˍ ꓕꓯ ꓟꓷꓽ ꓠꓷꓹ ꓝ ꓘꓶꓽ ꓕꓱ ꓟ ꓠꓬ ꓐꓲꓻ ꓡꓰˍ ꓥꓳ= (ꓬꓳ-ꓶ 2ꓽ23)