ꓟꓷꓽ ꓠꓷꓹ ꓝ ꓒ ꓱ-ꓢꓶ-ꓡ

ꓱ-ꓢꓶ-ꓡ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓝꓮꓲ ꓕꓲ ꓧꓪꓹ ꓫꓬꓹ ꓜꓶ ꓠꓹ ꓟ ꓐꓱ ꓶ ꓐ-ꓐꓲ-ꓡꓶ ꓗꓪ ꓐꓰ ꓓꓳ ꓡ ꓗꓷ ꓟ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓧꓳꓽ ꓪꓴꓸ ꓟꓴ ꓢꓴ 3 ꓣꓳ ꓘꓴꓽ ꓗꓪ ꓟ ꓠꓬꓲꓽ ꓣꓳ ꓕꓲ ꓣꓳ ꓟ ꓥ ꓡꓳ= ꓢꓳ-ꓡꓳ-ꓑ-ꓑꓷ ꓠꓬ ꓢꓲ ꓫꓬ ꓦꓲꓻ ꓔꓯ ꓫꓬꓹ ꓗꓷꓳ( ꓱ-ꓢꓶ-ꓡ 3ꓽ8)= ꓠꓲ-ꓬ-ꓟ-ꓬ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓔꓯ ꓫꓬꓹ ꓜꓶ ꓗꓷꓳ(ꓠꓲ-ꓬ-ꓟ-ꓬ 1ꓽ-2ꓽ)꓾ ꓱ-ꓢꓶ-ꓡ ꓠꓬ ꓑ ꓫꓬ ꓐꓴ ꓔꓯ ꓠꓲꓹ ꓟ ꓡꓶꓸ ꓢꓲ ꓓꓵꓽ ꓒꓳꓹ ꓬꓲꓼ ꓡ ꓝꓲ ꓗꓷ ꓠꓹ ꓟ ꓙ ꓖꓴ ꓟꓸ ꓖꓶ ꓗꓷꓳ=

ꓱ-ꓢꓶ-ꓡ ꓔꓯ ꓒ-ꓫ ꓪ ꓔꓲ ꓯ-ꓕ-ꓫꓱ ꓡꓰ ꓬꓴ-ꓔ ꓡ ꓞꓳ ꓐꓴ ꓔꓯ ꓐ-ꓐꓲ-ꓡꓶ ꓗꓪ ꓐꓰ ꓙꓱ-ꓡꓱ-ꓢ-ꓡꓱ ꓡꓳ ꓒꓱ ꓗꓪ ꓧꓳꓽ ꓔꓯꓹ ꓙꓰ ꓠꓹ ꓟ ꓪ ꓔꓲ ꓡꓰ ꓝꓲ ꓩꓴ ꓗꓷ ꓟ ꓥ ꓡꓳ (ꓱ-ꓢꓶ-ꓡ 7ꓽ8ꓹ12)= ꓱ-ꓢꓶ-ꓡ ꓠꓬ ꓐꓶꓽ ꓟ ꓐꓴ ꓔꓯ ꓫ ꓔ ꓟ ꓔꓯ ꓟꓽ ꓠꓲꓹ ꓒꓴ ꓢꓲ ꓬꓲ ꓪ ꓐꓴ ꓔꓯ ꓒꓰ ꓗꓷ ꓠꓹ ꓟ ꓐꓰ ꓟꓵꓽ ꓗꓪ ꓐꓰ ꓖꓼ ꓓꓳ ꓗꓷ ꓠꓹ ꓟ ꓬꓲꓼ ꓠꓬꓲꓸ ꓖꓶ ꓗꓷꓳ= ꓝꓮꓲ ꓬꓲ ꓠꓬ ꓦꓲ-ꓘꓳ-ꓑꓮꓲ ꓬꓰ ꓖꓶˍ ꓟ꓾ ꓢꓲꓽ ꓫꓬ ꓦꓲ ꓐꓱ ꓶ ꓡꓯꓼ ꓫꓴ ꓡꓯ ꓙꓱ ꓖꓶˍ ꓟ ꓐꓰ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓔꓯ ꓝꓮꓲ ꓕꓲ ꓧꓪꓹ ꓫꓬꓹ ꓜꓶ ꓖꓶˍ ꓟ ꓐꓴ ꓔꓯ ꓢꓯꓼ ꓧꓳꓽ ꓖꓶꓽ ꓗꓷꓳ= ꓱ-ꓢꓶ-ꓡ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓢꓳ ꓠꓹ ꓟ꓾ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓬꓲ ꓕꓲ ꓤꓶ ꓡꓱꓸꓼ ꓪꓴ-ꓢ ꓚꓱꓹ ꓐꓰ ꓕꓵꓼ ꓘꓶꓽ ꓟꓸ ꓖꓶ ꓠꓹ ꓟ ꓓꓵꓽ ꓙ ꓞꓷꓹ ꓗꓷ ꓢꓴˍ ꓟꓲ ꓥ ꓡꓳ=

ꓱ-ꓢꓶ-ꓡ ꓕꓳꓽ ꓶ ꓠꓬ 2 ꓚꓺ ꓟꓲꓽ ꓕꓳ ꓶ ꓔꓯ ꓝꓸ ꓐꓳ ꓔ ꓟ ꓬꓴ-ꓔ ꓡ ꓞꓳ ꓐꓴ ꓐ-ꓐꓲ-ꓡꓶ ꓗꓪ ꓬꓲ ꓘꓳꓼ 70 ꓘꓳꓼ ꓛꓲ ꓚꓳ ꓑ ꓣꓱꓽ ꓗꓷ ꓗ ꓠꓯꓸ ꓙꓱ-ꓣꓴ-ꓢ-ꓡꓱ ꓬꓲꓼ ꓙꓰ ꓠꓹ ꓟ ꓒ-ꓫ ꓪ ꓔꓲ ꓘꓴ-ꓣ-ꓫꓵ ꓡꓰ ꓕꓵꓼ ꓘꓶꓽ ꓖꓶ ꓗꓷ ꓟ ꓥ ꓡꓳ= ꓪꓴ-ꓢ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓙꓵꓽ ꓔꓬ ꓟ ꓥ ꓢꓲ ꓬꓲ ꓡ ꓞꓳ ꓐꓴ ꓚꓳ ꓑꓸ ꓬꓰˍ ꓟ ꓗꓪ ꓐꓰ ꓩꓴ ꓗꓷ ꓟꓶ ꓠꓹ ꓟ ꓐꓱ ꓶ ꓒ-ꓫ ꓪ ꓔꓲ ꓕꓲ ꓣꓳ ꓔꓯ ꓣꓱꓽ ꓐ ꓡ ꓗꓷꓳ=

ꓱ-ꓢꓶ-ꓡ ꓔꓯ ꓬꓲ ꓡ ꓞꓳ ꓐꓴ ꓔꓯ ꓪꓴ-ꓢ ꓙꓵꓽ ꓗ ꓟꓸ ꓖꓶ ꓠꓹ ꓟ ꓐꓱ ꓶ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓟ ꓗꓪ ꓣꓱꓽ ꓞꓹ ꓟ ꓣꓱꓽ ꓫꓵꓽ ꓣꓱꓽ ꓙꓰꓽ ꓔꓳꓹ ꓙ ꓓꓴ ꓐꓱ ꓶ ꓪꓴ-ꓢ ꓠꓬ ꓒ-ꓫ ꓪ ꓔꓲ ꓝꓮꓲ ꓕꓲ ꓣꓳ ꓥ ꓟ ꓯ-ꓕ-ꓫꓱ ꓔꓯ ꓣꓱꓽ ꓗꓷꓳ= ꓪ ꓔꓲ ꓕꓱ ꓕꓲ ꓣꓳ ꓟ ꓠꓬ ꓠꓲ-ꓬ-ꓟ-ꓬ ꓡꓰ ꓪꓴ-ꓢ ꓬꓲ ꓢꓲꓽ ꓫꓬ ꓟ ꓡꓳ ꓒꓱ ꓔꓯ ꓫꓬꓹ ꓜꓶˍ ꓟ ꓗꓪ ꓬꓰ ꓙ ꓖꓶꓽ ꓗꓷꓳ=

ꓱ-ꓢꓶ-ꓡ ꓬꓲ ꓬꓰ ꓗꓷ ꓟ ꓟꓬꓱꓽ ꓗꓪ ꓠꓬ ꓪꓴ-ꓢ ꓬꓲ ꓐꓯ ꓘꓶꓽ ꓔꓯ ꓟꓸ ꓖꓶˍ ꓟ꓾ ꓪꓴ-ꓢ ꓬꓲ ꓑ ꓫꓬ ꓔꓯ ꓙ ꓖꓴ ꓫꓬꓹ ꓔꓱꓹ ꓖꓶꓽˍ ꓟ꓾ ꓪꓴ-ꓢ ꓔꓯ ꓦ ꓡꓱ ꓚꓱꓹ ꓫꓬꓹ ꓜꓶ ꓖꓶˍ ꓟ ꓐꓰ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓦ ꓔꓯ ꓟꓳꓸ ꓢꓯꓼ ꓪ ꓖꓶꓽˍ ꓟ ꓟꓬꓱꓽ ꓐꓴ ꓗꓪ ꓧꓳꓽ ꓣꓱꓽ ꓗꓷ ꓟ ꓥ ꓡꓳ=

ꓱ-ꓢꓶ-ꓡ ꓠꓬ ꓐ-ꓐꓲ-ꓡꓶ ꓗꓪ ꓚꓳ ꓑ ꓬꓰˍ ꓟ ꓗꓪ ꓐꓰ ꓬꓲꓼ ꓡ ꓗꓷ ꓢꓲ ꓪꓴ-ꓢ ꓔꓯ ꓠꓲꓹ ꓒꓵꓽ ꓠꓲꓹ ꓡꓱ ꓦ ꓡꓱ ꓔꓬ ꓢꓴ ꓐꓴ ꓔꓯ ꓟꓳꓻ ꓠꓹ ꓟ ꓥꓳ ꓡꓳꓸ ꓔ ꓥˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓛꓲ ꓡ ꓕꓯ ꓠꓬ ꓬꓲ ꓥꓳ ꓡꓳꓸ ꓔ ꓟ ꓮ ꓙꓵꓽ ꓠꓬ ꓮ ꓔꓳ ꓗꓷ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓮ ꓘꓶꓸ ꓠꓲꓹ ꓟ ꓫꓸ ꓡꓳ= ꓬꓲ ꓠꓬ ꓠꓲꓹ ꓟ ꓮ ꓘꓶꓸ ꓫꓸ ꓥˍ ꓟꓲ ꓬꓲ ꓠꓽ ꓝꓸ ꓢꓲ ꓪꓴ-ꓢ ꓔꓯ ꓦ ꓡꓱˍ ꓡꓳ= ꓬꓲ ꓠꓬ ꓑ ꓫꓬ ꓐꓴ ꓣꓱꓽ ꓬꓰ ꓔꓬ ꓟ ꓚꓱꓹ ꓔꓯ ꓡꓶꓸ ꓗꓷ ꓠꓲꓹ ꓫꓵ ꓢꓲ ꓠꓬꓲ ꓡ ꓞꓳ ꓐꓴ ꓠꓲꓹ ꓟ ꓔꓯ ꓡꓶꓸ ꓟꓽ ꓐ ꓡ ꓗꓷ ꓟ ꓑꓶꓸ ꓓꓴ ꓬꓲ ꓚꓲꓸ ꓛꓬ ꓬꓲ ꓝꓴꓲꓸ ꓟꓳꓻ ꓗꓷꓳ= ꓪꓴ-ꓢ ꓬꓲ ꓐꓯ ꓘꓶꓽ ꓠꓬ ꓮ ꓡꓰ ꓟꓬ ꓛꓲ ꓬꓳꓸ ꓚꓵˍ ꓟ ꓥ ꓢꓲ ꓟꓽ ꓙꓳ ꓟꓽ ꓓ ꓣꓱꓽ ꓞꓹ ꓟ ꓔꓯ ꓞꓳ ꓤ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓮ ꓡꓰ ꓕꓲ ꓫꓵꓽˍ ꓟꓲ ꓪꓴ-ꓢ ꓔꓯ ꓦ ꓡꓱ ꓪꓴꓸ ꓓꓵ ꓕꓱꓽˍ ꓟ ꓕꓯꓽ ꓢꓲ ꓟꓽ ꓬꓳꓸ ꓚꓵˍ ꓟ ꓥ ꓡꓳ= ꓮ ꓙꓵꓽ ꓟ ꓕꓯꓽ ꓢꓲ ꓙꓵꓽ ꓪ ꓙꓳˍ ꓟ ꓪꓽ ꓠꓬꓲˍ ꓟ ꓪꓴ-ꓢ ꓠꓬ ꓬꓲ ꓤ ꓬꓲ ꓠꓱ ꓐꓴ ꓔꓯ ꓠꓬꓲ ꓙ ꓡꓳꓸ ꓙ ꓖꓶ ꓢꓲ ꓙꓳꓺ ꓓꓴ ꓮ ꓙꓵꓽ ꓗꓪ ꓐꓰ ꓗꓽ ꓔ ꓖꓶˍ ꓗꓷ ꓢꓲ ꓠꓬꓲ ꓬꓲ ꓕꓵꓼ ꓘꓶꓽ ꓔꓯ ꓮ ꓕꓯꓽ ꓟꓲ ꓐꓲꓻ ꓡꓰ ꓝꓲ ꓢꓲ꓾ ꓬꓲ ꓝꓲ ꓩꓴ ꓗꓷ ꓢꓴ ꓐꓴ ꓗꓪ ꓐꓰ ꓬꓲ ꓡ ꓞꓳ ꓐꓴ ꓔꓯ ꓢꓯꓼ ꓪꓽ ꓖꓶ ꓗꓷꓳ= (ꓱ-ꓢꓶ-ꓡ 5ꓽ1-2)

ꓪꓴ-ꓢ ꓠꓬ ꓱ-ꓢꓶ-ꓡ ꓤꓶꓻ ꓗꓪ ꓙꓳ ꓔꓬꓹ ꓟˍ ꓡꓰ ꓐꓰ ꓣꓳ ꓐꓴ ꓤꓶꓻ ꓗꓪ ꓥˍ ꓟꓲ ꓪꓴ-ꓢ ꓔꓬꓹ ꓟ ꓥ ꓢꓲ꓾ ꓱ-ꓢꓶ-ꓡˍ ꓡꓰ ꓐꓰ ꓕꓲ ꓖ ꓕꓲ ꓧꓪꓹ ꓣꓳ ꓐꓴ ꓒꓬꓱꓼ ꓡ ꓟꓽ ꓓ ꓟ ꓔꓯ ꓬꓰ ꓐ ꓡ ꓝꓲˍ ꓡꓳ= ꓱ-ꓢꓶ-ꓡ ꓠꓬ ꓬꓲ ꓪꓴ-ꓢ ꓡꓯꓽ ꓒꓯꓹ ꓗꓪ ꓓꓹ ꓟ ꓑꓶꓸ ꓓꓴ ꓒꓬꓱꓼ ꓡ ꓟꓽ ꓓ ꓡꓳ ꓫꓵꓽ ꓔꓯ ꓱ-ꓢꓶ-ꓡ ꓡꓰ ꓬꓰ ꓗꓷꓳ (ꓱ-ꓢꓶ-ꓡ 7ꓽ9)= ꓪꓴ-ꓢ ꓬꓲ ꓡꓯꓽ ꓒꓯꓹ ꓣꓳ ꓕꓯꓽ ꓢꓲ ꓗꓪ ꓓꓹ ꓕꓯꓽ ꓠꓽ ꓮ ꓟꓰ ꓕꓯ ꓠꓲꓹ ꓫꓸ ꓟꓬ ꓫꓸ ꓗꓷ ꓟ ꓠꓬ ꓠꓬꓲꓸ ꓠꓬꓲ ꓕꓯ ꓧꓪꓸ ꓡꓰ ꓟ ꓟꓶˍ ꓟ ꓥ ꓡꓳ= ꓪꓴ-ꓢ ꓬꓲ ꓡꓳ ꓒꓱ ꓔꓯ ꓫꓬꓹ ꓜꓶ ꓢꓲ ꓪꓴ-ꓢ ꓔꓯ ꓦ ꓡꓱˍ ꓟ ꓚꓱꓹ ꓔꓯ ꓫꓬꓹ ꓜꓶˍ ꓟ ꓗꓪ ꓧꓪꓸ ꓡꓰ ꓓꓴ ꓐꓱ ꓶ ꓡꓳ ꓒꓱ ꓗꓪ ꓬꓲꓼ ꓛꓲ ꓡ ꓟ ꓬꓴ-ꓔ ꓡ ꓞꓳ ꓐꓴ ꓠꓲꓹ ꓫꓸ ꓟ ꓔꓯ ꓣꓱꓽ ꓗꓷꓳ= ꓕꓱ ꓟ ꓠꓬ ꓱ-ꓢꓶ-ꓡ ꓬꓲ ꓔꓶ ꓙꓱꓼ ꓥ ꓢꓲ꓾ ꓱ-ꓢꓶ-ꓡ ꓬꓲ ꓔꓶꓺ ꓙꓱꓼ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓒꓵꓽˍ ꓟ ꓥ ꓡꓳ=