ꓟꓷꓽ ꓠꓷꓹ ꓝ ꓒ ꓳ-ꓐ-ꓓ-ꓬ

ꓳ-ꓐ-ꓓ-ꓬ ꓕꓳꓽ ꓶ ꓔꓯ ꓐꓳ ꓢꓴ ꓟꓷꓽ ꓠꓷꓹ ꓝ ꓒ ꓳ-ꓐ-ꓓ-ꓬ ꓐꓰ ꓕꓲ ꓪꓽ ꓢꓲꓽ ꓫꓬ ꓕꓳꓽ ꓶ ꓗꓪ ꓳ-ꓐ-ꓓ-ꓬ ꓟꓬꓱꓺ ꓔ ꓟ ꓡ ꓞꓳ 13 ꓣꓳ ꓙꓳˍ ꓡꓳ= ꓳ-ꓐ-ꓓ-ꓬ ꓐꓯ ꓟ ꓠꓬ ꓮ ꓠꓱ ꓬꓲ-ꓢꓷ-ꓡꓰ ꓟꓵꓽ ꓗꓪ ꓮ ꓘꓶꓸ ꓣꓱꓽ ꓟꓬꓽˍ ꓟ ꓟꓬꓱꓺ ꓕꓲ ꓟ ꓥ ꓐꓷ= ꓟꓬꓱꓺ ꓕꓱ ꓟ ꓠꓬ “ꓢꓲꓺ ꓒ ꓚꓳ ꓑꓸ” ꓟꓽ ꓥ ꓠꓬ “ꓢꓲꓺ ꓒꓽ ꓔꓯ ꓦ ꓡꓱ ꓢꓴ” ꓐꓯ ꓟ ꓬꓲ ꓟꓸ ꓟꓲꓽ꓾ ꓬꓲꓸ ꓬꓲ ꓢꓲ ꓥ ꓡꓳ=

The Twelve Minor Prophets ꓟꓷꓽ ꓠꓷꓹ ꓝ ꓒ ꓬꓲ ꓤ ꓤ 12 ꓣꓳ ꓘꓴꓽ ꓗꓪ ꓕꓲ ꓣꓳ ꓥ ꓟ ꓳ-ꓐ-ꓓ-ꓬ ꓚꓱꓹ ꓔꓯ ꓠꓬ ꓳ-ꓐ-ꓓ-ꓬ ꓕꓳꓽ ꓶ ꓗꓪ ꓚꓳꓸ ꓗꓳꓸ ꓗꓷ ꓠꓬ ꓠꓱꓸ ꓐꓯ ꓗꓪ ꓬꓲ ꓚꓱꓹ ꓔꓯ ꓐꓳ ꓚꓲꓸ ꓔ ꓟ ꓟꓽ ꓙꓳ= ꓬꓲ ꓕꓱꓹ ꓕꓲꓽ ꓕꓱ꓾ ꓬꓲ ꓝꓲꓸ ꓤ 21 ꓝꓲꓸˍ ꓡꓰꓽ ꓙꓳˍ ꓟ꓾ ꓢꓲꓽ ꓫꓬ ꓕꓳꓽ ꓶ ꓐꓴ ꓘꓴꓽ ꓗꓪ ꓠꓬꓱꓸ ꓓꓰ ꓡꓰ ꓟ ꓳ-ꓐ-ꓓ-ꓬ ꓕꓳꓽ ꓶ ꓗꓪ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓐ-ꓐꓲ-ꓡꓶꓽ ꓐꓴ ꓡꓰ ꓓꓶꓽ ꓧꓪꓸ ꓡꓰ ꓢꓲ ꓡꓳ ꓒꓱ ꓔꓯ ꓒꓬꓹ ꓗꓷ ꓗ ꓠꓯꓸ ꓮ ꓘꓶꓸ ꓫ ꓙꓵˍ ꓟ ꓦꓬꓼ ꓠꓬꓲ ꓗꓪ ꓟꓷꓽ ꓠꓷꓹ ꓝ ꓒ ꓳ-ꓐ-ꓓ-ꓬ ꓠꓬ ꓫꓸ ꓙꓵˍ ꓟ ꓦꓬꓼ ꓠꓬꓲ ꓗꓳꓸ ꓔꓬꓹ ꓪ ꓟ ꓔꓯ ꓚꓬꓹ ꓪ ꓓꓹ ꓡꓳ=

ꓬꓲ-ꓢꓷ-ꓡꓰ ꓐꓴ ꓐ-ꓐꓲ-ꓡꓶ ꓚꓳ ꓑꓸ ꓬꓰˍ ꓟ ꓦꓬꓼ ꓠꓬꓲ ꓗꓪ ꓞꓳ ꓙꓳ ꓗꓷ ꓟ ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ꓾ ꓬꓲ-ꓫꓲ-ꓚꓰ꓾ ꓓ-ꓠꓲ-ꓡꓰ ꓐꓴ ꓐꓰ ꓕꓲ ꓡꓰꓹ ꓬꓲ ꓦꓬꓼ ꓠꓬꓲ ꓕꓲ ꓟꓽˍ ꓗꓪ ꓡꓰꓽ ꓞꓳ ꓙꓳ ꓗꓷꓳ꓾ ꓐꓰ ꓚꓬꓹ ꓪ ꓡꓳ=

ꓳ-ꓐ-ꓓ-ꓬ ꓬꓲ ꓟꓷꓽ ꓠꓷꓹ ꓝ ꓘꓶꓽ ꓐꓴ ꓗꓪ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓐꓬ ꓡꓰ ꓝꓲˍ ꓟ ꓗꓪ ꓬꓰ ꓙ ꓗꓷ ꓟ ꓑꓶꓸ ꓓꓴ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓛꓴꓽ ꓙꓳ ꓢꓴ ꓥ ꓟ ꓬꓲ-ꓢꓳ-ꓟꓷ ꓐꓴ ꓔꓯ ꓪꓴ-ꓢ ꓡꓰ ꓐꓯ ꓟꓴ ꓘꓶꓽ ꓠꓹ ꓟ ꓚꓱꓹ ꓔꓯ ꓐꓳ ꓔ ꓡꓳ=

ꓳ-ꓐ-ꓓ-ꓬ ꓐꓯ ꓘꓶꓽ ꓗꓪ ꓪꓴ-ꓢ ꓠꓬ ꓬꓲ ꓡ ꓞꓳ ꓐꓴ ꓔꓯ ꓬꓲ ꓪ ꓐꓴ ꓚꓳꓺ ꓑ ꓬꓰˍ ꓟ ꓤꓶꓻ ꓗꓪ ꓡꓰꓽ ꓟꓽ ꓔꓬ ꓝꓲ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓬꓲ ꓑ ꓫꓬ ꓐꓴ ꓜꓲꓽ ꓐ ꓡˍ ꓟ ꓫꓸ ꓙꓵꓻ ꓓꓴ ꓙꓳꓺ ꓓꓴ ꓗꓪ ꓐꓰ ꓕꓲ ꓝꓸ ꓪꓴ-ꓢ ꓬꓲ ꓔꓶꓺ ꓙꓱꓼ ꓔꓯ ꓐꓲ ꓡꓰ ꓝꓲ ꓠꓹ ꓟ ꓥ ꓡꓳ= ꓳ-ꓐ-ꓓ-ꓬ ꓬꓲ ꓟꓷꓽ ꓠꓷꓹ ꓝ ꓘꓶꓽ ꓕꓲ ꓐꓱ ꓠꓬ ꓬꓰ-ꓡꓲ-ꓟꓲ ꓕꓳꓽ ꓶ 49 ꓕꓱ ꓗꓪ ꓟ ꓟꓷꓽ ꓠꓷꓹ ꓝ ꓘꓶꓽ ꓐꓰ ꓪꓽ ꓡꓯ ꓘꓳ꓾ ꓫꓱꓸ ꓡꓯ ꓘꓳˍ ꓡꓳ=

(2) ꓪ ꓔꓲ ꓙꓻ ꓙꓵꓽ ꓢꓴ

ꓬꓲ ꓠꓬ ꓥꓶˍ ꓟ ꓪ ꓔꓲ ꓬ-ꓧ ꓬꓲ ꓪ ꓔꓲ ꓙꓻ ꓔꓯ ꓙꓵꓽ ꓢꓴ ꓟꓬꓱꓽ ꓬꓰ ꓔꓬ ꓥ ꓟꓲ꓾ ꓪ ꓔꓲ ꓬ-ꓧ ꓐꓰ ꓥꓶˍ ꓟ ꓪ ꓔꓲ ꓟ ꓬꓰ-ꓫꓲ-ꓑꓰ ꓐꓴ ꓡꓯꓽ ꓒꓯꓹ ꓗꓪ ꓐꓰ ꓬꓰ-ꓧꓳ-ꓧꓪ ꓬꓲ ꓟꓷꓽ ꓠꓷꓹ ꓝꓸ ꓢꓴ 100 ꓣꓳ ꓔꓯ ꓭꓸ ꓘꓴ ꓗꓪ ꓚꓵ ꓔ ꓢꓲ ꓘꓳ ꓫꓱ ꓫꓱˍ ꓐꓰ ꓑ ꓑ ꓐꓰ ꓬꓲꓻ ꓙꓬ ꓔꓯꓹ ꓖꓶ ꓢꓴ ꓥ ꓡꓳ= ꓪ ꓔꓲ ꓬ-ꓧ ꓐꓰ ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓐꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓙ ꓡꓯ ꓘꓳ ꓢꓴ ꓕꓲ ꓣꓳˍ ꓟꓲ ꓬꓰ ꓗꓷꓳ (1 ꓪ ꓔꓲ 18ꓽ1-16)=

(3) ꓪ ꓔꓲ ꓓ-ꓪꓵ ꓞꓲꓼ ꓤ ꓡꓯꓹ ꓤ

ꓯ-ꓣꓷ-ꓠ-ꓟꓷ ꓬꓲ ꓤ ꓐꓰ ꓫꓱ-ꓘꓷ-ꓠꓷ-ꓬ ꓬꓲ ꓐꓹ ꓐ ꓠꓬ ꓳ-ꓐ-ꓓ-ꓬ ꓥ ꓡꓳ= ꓬꓲ ꓠꓬ ꓢꓳ-ꓡꓳ-ꓑ-ꓑꓷ ꓗꓪ ꓐꓰ ꓟꓶ ꓔ ꓟ ꓪ ꓔꓲ ꓓ-ꓪꓵ ꓬꓲ ꓞꓲꓼ ꓤ ꓡꓯꓹ ꓤ ꓥ ꓡꓳ꓾ ꓐꓰ 1 ꓚꓺ ꓟꓲ 3ꓽ21 ꓗꓪ ꓐꓳ ꓔ ꓡꓳ=

(4) ꓬꓲ-ꓢ-ꓘꓷ ꓞꓲꓼ ꓤ ꓡꓯꓹ ꓤ

ꓬꓲ-ꓢ-ꓘꓷ ꓞꓲꓼ ꓤ ꓡꓯꓹ ꓤ ꓥ ꓟ꓾ ꓬꓲ-ꓝ-ꓣ-ꓬ ꓬꓲ ꓤ ꓐꓴ ꓗꓪ ꓟ ꓕꓲ ꓣꓳ ꓔꓯ ꓳ-ꓐ-ꓓ-ꓬ ꓐꓰ ꓟꓬꓱꓺ ꓔ ꓡꓳ= ꓬꓲ ꓠꓬ ꓞꓳ ꓫꓵꓽ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓘꓴꓽ ꓗꓪ ꓟ ꓕꓲ ꓣꓳ ꓥ ꓡꓳ= (1 ꓚ ꓟꓲꓽ 7ꓽ3)

(5) ꓢꓳ-ꓡꓳ ꓞꓲꓼ ꓤ ꓡꓯꓹ ꓤ

ꓳ-ꓐ-ꓓ-ꓬ ꓟꓬꓱ ꓔ ꓟ ꓐꓰ-ꓠꓬ-ꓟꓲ ꓞꓳ ꓫꓵꓽ ꓠꓬ ꓪ ꓔꓲ ꓢꓳ-ꓡꓳ ꓞꓲꓼ ꓤ ꓡꓯꓹ ꓤ ꓥ ꓟ ꓮ-ꓜꓷ-ꓡ ꓬꓲ ꓤ ꓛꓳꓼ ꓫꓵꓸ ꓟ ꓗꓪ ꓕꓲ ꓣꓳ ꓥ ꓡꓳ= ( 1 ꓚ ꓟꓲ 8ꓽ38 ꓸ 9ꓽ44)

(6) ꓫꓱ-ꓟ-ꓬ ꓬꓲ ꓤ

ꓳ-ꓐ-ꓓ-ꓬ ꓟꓬꓱ ꓔ ꓟ ꓡꓱ-ꓬꓲ ꓡ ꓞꓳ ꓕꓲ ꓣꓳ ꓠꓬ ꓐ-ꓐꓲ-ꓡꓶ ꓚꓳ ꓑꓸ ꓣꓱꓽ ꓗꓷ ꓗ ꓠꓯꓸ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓬꓲꓼ ꓡ ꓗꓷ ꓟ ꓬꓴ-ꓔ ꓡ ꓞꓳ ꓐꓴ ꓘꓴꓽ ꓗꓪ ꓐ ꓗꓷꓳ= ꓬꓲ ꓠꓬ ꓫꓱ-ꓟ-ꓬ ꓬꓲ ꓤ ꓥ ꓡꓳ= (1 ꓚ ꓟꓲꓽ 9ꓽ16)

(7) ꓓ-ꓪꓵ ꓬꓲ ꓪꓽ ꓠꓬꓲ ꓢꓴ ꓟꓯꓼ ꓗꓪ ꓟ ꓕꓲ ꓣꓳ

ꓳ-ꓐ-ꓓ-ꓬ ꓠꓬ ꓤꓲ-ꓘꓷ-ꓡ ꓡꓳ ꓒꓱ ꓗꓪ ꓓ-ꓪꓵ ꓬꓲ ꓟꓯꓼ ꓜꓴ ꓔꓯ ꓬꓰ ꓙ ꓗꓷˍ ꓟ ꓗꓪ ꓔ ꓗꓷ ꓟ ꓖꓷ-ꓔꓷ ꓕꓲ ꓪꓳꓼ ꓢꓴ ꓘꓴꓽ ꓗꓪ ꓐꓰ ꓪꓽ ꓠꓬꓲˍ ꓟ ꓟꓯꓼ ꓞꓲ ꓕꓲ ꓣꓳ ꓘꓴꓽ ꓗꓪ ꓠ ꓑ ꓠꓬꓲꓽ ꓕꓲ ꓣꓳ ꓥ ꓡꓳ= ꓬꓲ ꓪ ꓐꓴ ꓠꓬ ꓡꓽ ꓢꓯꓹ (ꓚꓬꓽ ꓢꓲꓽ) ꓡꓰ ꓐꓰ ꓢꓯꓼ ꓙꓳ ꓪꓽ ꓠꓬꓲ ꓢꓲ ꓛꓵˍ ꓡꓰ ꓐꓰ ꓪꓽ ꓚꓲ ꓗꓪ ꓔꓷꓹ ꓓꓯ ꓙꓰ ꓢꓴ ꓥ ꓡꓳ= ꓬꓲ ꓪ ꓗꓳ ꓡꓳ ꓗꓪ ꓙꓵꓽ ꓪ ꓣꓳ ꓓꓰ ꓡꓰ ꓢꓴ ꓠꓬ ꓕꓲ ꓦꓬ ꓔꓯ ꓢꓰꓼ ꓟꓶ ꓘꓴ ꓢꓲ ꓠꓬꓲ꓾ ꓙꓵꓽ ꓪ ꓪꓴꓽ ꓓꓰ ꓡꓰ ꓢꓴ ꓠꓬ ꓕꓲ ꓔꓴ ꓣꓳ ꓔꓯ ꓢꓰꓼ ꓟꓶ ꓘꓴ ꓢꓴ ꓥ ꓡꓳ ꓐꓰ꓾ 1 ꓚ ꓟꓲꓽ 12ꓽ8-14 ꓗꓪ ꓐꓯ ꓔ ꓡꓳ=

(8) ꓬꓲ-ꓫꓵ-ꓟꓯ-ꓬ ꓬꓲ ꓐꓹ ꓐꓽ

ꓓ-ꓪꓵ ꓪ ꓔꓲ ꓣꓱꓽˍ ꓟ ꓦꓬꓼ ꓠꓬꓲ ꓕꓯ ꓬꓲ-ꓫꓵ-ꓟꓯ-ꓬ ꓠꓬ ꓢꓲ-ꓑꓴ-ꓡꓶ ꓕꓲ ꓪꓳꓽ ꓔꓯ ꓙꓵꓽ ꓢꓴ ꓥ ꓡꓳ= ꓬꓲ-ꓫꓵ-ꓟꓯ-ꓬ ꓬꓲ ꓐꓹ ꓐ ꓠꓬ ꓳ-ꓐ-ꓓ-ꓬ ꓥ ꓡꓳ= (1 ꓚ ꓟꓲ 27ꓽ19)

(9) ꓟꓯꓼ ꓢꓲꓽ ꓒꓽ

ꓪ ꓔꓲ ꓬꓳ-ꓫ-ꓩ ꓬꓲ ꓠꓯꓸ ꓘꓪ ꓗꓪ ꓟ ꓢꓲꓽ ꓒ ꓕꓲ ꓣꓳ ꓔꓯ ꓬꓴ-ꓔ ꓡꓳ ꓒꓱ ꓐꓴ ꓗꓪ ꓪꓴ-ꓢ ꓐꓯ ꓘꓶ ꓟꓸ ꓝꓲ ꓠꓹ ꓟ ꓝꓲ ꓩꓴ ꓔ ꓟ ꓟꓶ ꓢꓴ ꓐꓴ ꓗꓪ ꓟ ꓕꓲ ꓣꓳ ꓔꓯ ꓳ-ꓐ-ꓓ-ꓬ ꓐꓰ ꓟꓬꓱ ꓔ ꓡꓳ= (2 ꓚ ꓟꓲ 17ꓽ7)

(10) ꓟꓬꓱꓽ ꓧꓳꓽ ꓢꓴ

ꓳ-ꓐ-ꓓ-ꓬ ꓟꓬꓱ ꓔ ꓟ ꓡꓱ-ꓬꓲ ꓡ ꓞꓳ ꓕꓲ ꓣꓳ ꓠꓬ ꓬꓳ-ꓢꓲ-ꓬ ꓪ ꓔꓲ ꓣꓱꓽˍ ꓟ ꓦꓬꓼ ꓠꓬꓲ ꓕꓯ ꓢꓲꓽ ꓫꓬ ꓦꓲ ꓔꓯ ꓫꓬ ꓡꓰ ꓝꓲ ꓢꓲ꓾ ꓢꓲꓽ ꓫꓬ ꓦꓲ ꓫꓬꓹ ꓑꓱˍ ꓟ ꓟꓬꓱꓽ ꓗꓪ ꓧꓳꓽ ꓣꓱꓽ ꓗꓷꓳ= (2 ꓚ ꓟꓲ 34ꓽ12)

(11) ꓙꓳ-ꓮ-ꓐꓷ ꓞꓲꓼ ꓤ ꓡꓯꓹ ꓤ

ꓳ-ꓐ-ꓓ-ꓬ ꓕꓱ ꓕꓲ ꓣꓳ ꓠꓬ ꓙꓱ-ꓦꓲ-ꓡꓷ ꓬꓲ ꓤ ꓥ ꓢꓲ ꓠꓬꓲ ꓙꓳ-ꓮ-ꓐꓷ ꓕꓲ ꓦꓲ ꓗꓪ ꓪꓴꓸ ꓓꓵ ꓣꓱꓽ ꓢꓴ ꓥ ꓡꓳ= ꓬꓲ ꓠꓬ ꓱ-ꓢꓶ-ꓡ ꓐꓰ ꓕꓲ ꓪꓽ ꓚꓳ ꓑ ꓬꓰˍ ꓟ ꓗꓪ ꓐꓰ ꓬꓲꓼ ꓡ ꓗꓷ ꓟ ꓡ ꓞꓳ 218 ꓣꓳ ꓕꓲ ꓜꓴꓻ ꓔꓯ ꓧꓳꓽ ꓪꓴꓸ ꓟꓴ ꓗꓷꓳ= (ꓱ-ꓢꓶ-ꓡ 8ꓽ9)

(12) ꓢꓷꓸ ꓙ ꓟꓳ ꓙ ꓢꓴ

ꓟꓷꓽ ꓠꓷꓹ ꓝ ꓒ ꓱ-ꓢꓶ-ꓡ ꓐꓰ ꓠꓲ-ꓬ-ꓟ-ꓬ ꓐꓴ ꓦꓬꓼ ꓠꓬꓲ ꓕꓯ꓾ ꓳ-ꓐ-ꓓ-ꓬ ꓠꓬ ꓔꓲꓺ ꓒ ꓕꓲ ꓣꓳ ꓥ ꓢꓲ ꓪꓴ-ꓢ ꓙꓵꓽ ꓗ ꓐꓴ ꓔꓯ ꓘꓳꓹ ꓣꓴ ꓠꓹ ꓟ ꓘꓶꓽ ꓫꓵꓽ ꓬꓰ ꓢꓲ ꓕꓳꓽ ꓶ ꓗꓪ ꓔꓳꓹ ꓠꓷꓼ ꓓꓴ ꓔꓳꓹ ꓠꓷꓼ ꓔ ꓟ ꓬꓴ-ꓔ ꓐꓴ ꓔꓯ ꓧꓳꓽ ꓣꓱꓽ ꓢꓴ ꓕꓲ ꓣꓳ ꓥ ꓡꓳ= (ꓠꓲ-ꓬ-ꓟ-ꓬ 10ꓽ1-27)

(13) ꓗ ꓘꓶꓽ ꓦꓴ ꓠꓬꓹ ꓢꓴ

ꓟꓷꓽ ꓠꓷꓹ ꓝ ꓒ ꓠꓲ-ꓬ-ꓟ-ꓬ ꓦꓬꓼ ꓠꓬꓲ ꓕꓯ ꓶꓻ ꓫ ꓗꓳꓹ ꓔꓯ ꓦꓴ ꓠꓬꓹ ꓔꓬ ꓟ ꓗ ꓘꓶꓽ ꓦꓴ ꓠꓬꓹ ꓢꓴ ꓕꓲ ꓣꓳ ꓔꓯ ꓳ-ꓐ-ꓓ-ꓬ ꓐꓰ ꓟꓬꓱꓺ ꓔ ꓡꓳ= (ꓠꓲ-ꓬ-ꓟ-ꓬ 12ꓽ25)

ꓕꓱ ꓟ ꓮ ꓙꓵꓽ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓟ ꓳ-ꓐ-ꓓ-ꓬ ꓟꓬꓱ ꓔ ꓢꓴ 13 ꓣꓳ ꓟ ꓚꓱꓹ ꓥ ꓡꓳ=