ꓟꓷꓽ ꓠꓷꓹ ꓝ ꓟ ꓩꓴ-ꓡ-ꓓ ꓟꓸ ꓟꓲꓽ

ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓩꓴ-ꓡ-ꓓ ꓠꓬꓮꓽ ꓟ ꓥ ꓡ?

ꓩꓴ-ꓡ-ꓓ ꓠꓬ ꓪ ꓔꓲ ꓬꓳ-ꓢꓲ-ꓬ ꓙꓵꓽˍ ꓟ ꓦꓬꓼ ꓠꓬꓲ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓟꓷꓽ ꓠꓷꓹ ꓝ ꓟ ꓕꓲ ꓣꓳ ꓥ ꓡꓳ= ꓪ ꓔꓲ ꓬꓳ-ꓢꓲ-ꓬ ꓠꓬ ꓬꓴ-ꓔ ꓪ ꓔꓲ ꓐꓴ ꓘꓴꓽ ꓗꓪ ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ꓾ ꓪꓴ-ꓢ ꓙꓵꓽ ꓗˍ ꓐꓰ ꓙꓵꓽ ꓚꓱꓹ ꓮ ꓙꓵꓽ ꓔꓯ ꓬꓲ ꓜꓶ ꓒꓵꓽ ꓛꓳˍ ꓟ ꓪ ꓔꓲ ꓕꓲ ꓣꓳ ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓩꓴ-ꓡ-ꓓ ꓚꓱꓹ ꓔꓯ ꓬꓲ ꓔꓬ ꓖꓴ ꓐꓰ ꓬꓲ ꓮꓽ ꓟ ꓥ ꓟ ꓚꓱꓹ ꓗꓪ ꓐꓰ ꓗꓳꓸ ꓙꓰ ꓠꓬ ꓩꓴ-ꓡ-ꓓ ꓟꓸ ꓟꓲꓽ ꓔꓯ ꓮ ꓟꓬꓹ ꓖꓴ ꓟꓸ ꓖꓶ ꓔ ꓟ ꓟꓽ ꓙꓳ= (2 ꓚ ꓟꓲꓽ  34ꓽ22) ꓕꓲ-ꓘꓷ-ꓪ ꓬꓲ ꓤ ꓫꓲ-ꓡꓷ-ꓠꓷ ꓬꓲ ꓤ ꓟꓶ꓾ ꓟꓷ ꓠꓷꓹ ꓝꓸ ꓟ ꓩꓴ-ꓡ-ꓓ꓾ ꓐꓰ ꓐꓯ ꓔ ꓟ ꓔꓯ ꓟꓳꓻ ꓪ ꓓꓹ ꓡꓳ= ꓖꓳ ꓡꓱ ꓥ ꓟꓲ ꓩꓴ-ꓡ-ꓓ ꓬꓲ ꓟꓷ ꓠꓷꓹ ꓝꓸ ꓟꓬꓱꓽ ꓠꓬ ꓮ ꓘꓶꓸ ꓓꓵꓽ ꓙ ꓮ' ꓡꓰ ꓓꓴ ꓥ ꓡꓳ=

ꓫꓵꓽ ꓪꓴ ꓕꓱ ꓟ ꓠꓬ ꓟꓳ-ꓫꓲ ꓗꓪ ꓐꓰ ꓖꓶ ꓔ ꓟ ꓪꓴ-ꓢ ꓬꓲ ꓙꓵꓽ ꓗ ꓕꓳ ꓶ ꓔꓯ ꓔꓲ ꓒ ꓦꓱ-ꓘꓷ-ꓬ ꓡꓰ ꓧꓪ ꓟꓶ ꓡꓰꓳ= ꓙꓵꓽ ꓗ ꓕꓳ ꓶ ꓑꓷꓠꓽ ꓕꓱ ꓟ ꓠꓬ ꓒꓲꓼ ꓬꓰ ꓟ ꓥ ꓢꓲ ꓔꓲ ꓒ ꓦꓱ-ꓘꓷ-ꓬ ꓡꓰ ꓧꓪ ꓟꓳ ꓡꓰ ꓕꓯ ꓪ ꓔꓲ ꓵ ꓠꓹ ꓟ ꓪ ꓔꓲ ꓬꓳ-ꓢꓲ-ꓬ ꓔꓯ ꓖꓶˍ ꓡꓳ= ꓬꓲ ꓘꓳꓼ ꓟꓶ ꓤ ꓗꓪ ꓛꓲꓺ ꓞꓳ ꓫꓵꓽ ꓕꓲ ꓪꓳꓼ ꓡꓰ ꓕꓲ ꓪꓳꓼ ꓡꓳꓹ ꓬꓰˍ ꓥ ꓟꓲ ꓙꓵꓽ ꓗ ꓕꓳꓽ ꓶ ꓒꓲꓼ ꓡꓰ ꓟ ꓔꓯ ꓟꓸ ꓟꓲꓽ ꓕꓱ ꓟ ꓗꓪ ꓫꓬꓽ ꓫꓬꓽ ꓡꓰꓽ ꓟꓳꓸ ꓖꓶ ꓔ ꓟ ꓥ ꓡꓳ= ꓪꓴ-ꓢ ꓡꓰ ꓟꓳ-ꓫꓲ ꓗꓪ ꓐꓰ ꓞꓳ ꓤ ꓐꓴ ꓔꓯ ꓖꓶ ꓔ ꓟ ꓙꓵꓽ ꓗ ꓕꓳ ꓶ ꓑꓷꓠꓽ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓟ ꓙꓵꓻ ꓠꓲꓹ ꓚꓱꓹ ꓐꓰ ꓗꓴꓷꓼ ꓙꓵꓽ ꓚꓱꓹ ꓕꓲ ꓟ ꓡꓱꓸꓼ ꓬꓲ ꓚꓳꓻ ꓟꓶ ꓥ ꓡꓳ꓾ ꓬꓲ ꓚꓰꓺ ꓥ ꓡꓳ= ꓮ ꓡꓰ ꓔ ꓠꓬꓲ ꓬꓲ ꓘꓳꓼ ꓟꓶ ꓫꓵ ꓡꓰ ꓗꓪ ꓛꓲꓺ ꓒꓲꓼ ꓡꓰ ꓟꓶꓽ ꓡꓰ ꓡ꓾ ꓐꓯ ꓟ ꓠꓽ ꓓꓵꓽ ꓙ ꓟꓶ ꓓꓴ ꓥ ꓡꓳ= ꓙꓵꓽ ꓗ ꓕꓳꓽ ꓶ ꓔꓯ ꓟꓽ ꓒꓵꓽ ꓒꓵꓽ ꓞꓳ ꓙꓳ ꓔꓬ ꓟ ꓠꓬ ꓟ-ꓠ-ꓢꓲ ꓐꓰ ꓮ-ꓟꓳ-ꓢꓲ ꓐꓴ ꓙꓵꓽˍ ꓟ ꓦꓬꓼ ꓠꓬꓲ ꓐꓴ ꓗꓪ ꓙꓵꓻ ꓠꓲꓹ ꓔꓯ ꓮ ꓡꓲ ꓟꓬ ꓗꓪ ꓛꓲꓺ ꓟꓽ ꓒꓵꓽ꓾ ꓡꓳ ꓒꓰꓹ ꓔ ꓟ ꓔꓯ ꓟꓳꓸ ꓖꓶ ꓔꓬ ꓟ ꓥ ꓡꓳ=

ꓕꓳꓽ ꓶ ꓡꓲꓺ ꓖꓳ ꓟ ꓔꓯ ꓵꓻ ꓗꓷ ꓕꓯ ꓬꓴ-ꓔ ꓡ ꓞꓳ ꓐꓴ ꓪꓴ-ꓢ ꓔꓯ ꓟꓽ ꓒꓵꓽ ꓛꓳ ꓟ ꓔꓯ ꓪ ꓔꓲ ꓬꓳ-ꓢꓲ-ꓬ ꓟꓳꓻ ꓡꓰ ꓢꓲ ꓬꓲ ꓠꓬ ꓠꓲꓹ ꓟ ꓫ ꓠꓬꓲ ꓐꓰ ꓬꓲ ꓐꓵ ꓞꓶꓽ ꓚꓵꓹ ꓧꓽ ꓗꓷˍ ꓡꓳ ( 2 ꓚꓺ ꓟꓲꓽ 34ꓽ19)= ꓪ ꓔꓲ ꓬꓳ-ꓢꓲ-ꓬ ꓠꓬ ꓕꓳ ꓶ ꓕꓱ ꓟ ꓬꓲ ꓟꓸ ꓘꓶꓽ ꓮ ꓡꓲ ꓥ ꓟ ꓔꓯ ꓖꓴ ꓟꓸ ꓖꓶ ꓢꓴ ꓣꓱꓽ ꓞꓹ ꓟ ꓪꓴꓸ ꓠꓬꓲ꓾ ꓪꓴ-ꓢ ꓗꓪ ꓐꓰ ꓫ ꓕꓱ ꓡˍ ꓟ ꓔꓯ ꓠ ꓠꓬꓲ ꓬꓰ ꓠꓹ ꓟ ꓟꓷ ꓠꓷꓹ ꓝ ꓟ ꓩꓴ-ꓡ-ꓓ ꓔꓬ ꓗꓪ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓝꓲ ꓩꓴ ꓗꓷˍ ꓡꓳ (2 ꓚꓺ ꓟꓲꓽ 34ꓽ21)=

ꓟꓷꓽ ꓠꓷꓹ ꓝ ꓟ ꓩꓴ-ꓡ-ꓓ ꓠꓬ ꓪ ꓔꓲ ꓬꓲ ꓡ ꓞꓳ ꓐꓴ ꓔꓯ ꓪꓴ-ꓢ ꓐꓯ ꓘꓶꓽ ꓐꓯ ꓟꓸ ꓖꓶˍ ꓡꓳ= ꓬꓲ ꓡꓰ ꓪ ꓔꓲ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓪ ꓠꓬ ꓪꓴ-ꓢ ꓔꓯˍ ꓐꓰ ꓧꓹ ꓙꓰ ꓢꓲ꓾ ꓠꓱꓸ ꓐꓯꓼ ꓢꓲ ꓔꓯ ꓫꓳꓸ ꓛꓴ ꓖꓶˍ ꓠꓬꓲ ꓗꓴꓷꓼ ꓗꓪ ꓥꓶˍ ꓟ ꓒꓬꓱꓼ ꓡˍ ꓥꓳ (2 ꓚꓺ ꓟꓲꓽ 34ꓽ23-25)= ꓖꓳ ꓡꓱ ꓥˍ ꓟꓲ ꓪ ꓔꓲ ꓬꓳ-ꓢꓲ-ꓬ ꓐꓱ ꓶ ꓐꓯ ꓘꓶꓽ ꓕꓲ ꓟ ꓙꓳˍ ꓢꓰꓽ ꓡꓳ= ꓙꓵꓽ ꓗ ꓟꓽ ꓙꓳ ꓥˍ ꓟꓲ꓾ ꓪ ꓔꓲ ꓬꓳ-ꓢꓲ-ꓬ ꓠꓬ ꓬꓴ-ꓔ ꓐꓰ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓐꓴ ꓗꓪ ꓢꓲꓺ ꓐꓬꓱꓽ ꓮ ꓙꓵꓽ ꓔꓯ ꓒꓬꓹ ꓦ ꓗꓷ ꓢꓲ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓗꓷꓳ (2 ꓚꓺ ꓟꓲꓽ 34ꓽ1-7)= ꓕꓱ ꓡꓱ ꓬꓰˍ ꓟ ꓑꓶꓸ ꓓꓴ ꓪ ꓔꓲ ꓬꓳ-ꓢꓲ-ꓬ ꓬꓲ ꓕꓲ ꓤꓶꓻ ꓗꓪ ꓬꓴ-ꓔ ꓟꓵꓽ ꓟꓽ ꓐꓬ ꓡꓰ ꓝꓲꓳ= ꓟꓷꓽ ꓠꓷꓹ ꓝ ꓟ ꓩꓴ-ꓡ-ꓓ ꓗꓪ ꓐꓰ ꓪꓴ-ꓢ ꓡꓰ ꓐꓯ ꓡꓳ꓾ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓠꓲꓹ ꓟ ꓡꓶꓸ ꓢꓲ ꓠꓴ ꓚꓲ ꓛꓬ ꓙꓽ ꓣꓳ ꓡꓰ ꓝꓲ ꓢꓲ ꓠꓬꓲ꓾ ꓐꓵ ꓞꓶꓽ ꓚꓵꓹ ꓧꓽ ꓗꓷ ꓢꓲ꓾ ꓥꓪ ꓒꓬꓱꓽ ꓕꓯ ꓗꓪ ꓥꓴꓻ ꓢꓲ ꓥꓪ ꓔꓯ ꓘꓴ ꓓꓰꓽˍ ꓟ ꓥꓪ ꓑ ꓙꓽ ꓡꓰꓳ꓾ ꓐꓰ ꓪꓴ-ꓢ ꓡꓰ ꓐꓯ ꓡꓳ= ꓠꓴ ꓕꓲ ꓧꓳꓽ ꓐꓰ ꓕꓱ ꓗꓪ ꓔꓬ ꓢꓴ ꓔꓯ ꓗꓷ ꓡꓰ ꓝꓲˍ ꓐꓰ ꓬꓰˍ ꓟ ꓐꓬ ꓡꓰ ꓓꓴ ꓔꓯ ꓠꓴ ꓕꓲ ꓤꓶ ꓗꓪ ꓟꓽ ꓗꓷ ꓡꓰ ꓝꓲꓳ꓾ ( 2 ꓚꓺ ꓟꓲꓽ 34ꓽ27-28)=

ꓐꓯ ꓘꓶꓽ ꓕꓱ ꓟꓬꓽ ꓠꓬ ꓟꓷꓽ ꓠꓷꓹ ꓝ ꓟ ꓩꓴ-ꓡ-ꓓ ꓗꓪ ꓐꓰ ꓕꓲ ꓝꓸ ꓪꓴ-ꓢ ꓡꓰ ꓐꓯ ꓖꓶ ꓗꓷ ꓟ ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓟꓷꓽ ꓠꓷꓹ ꓝ ꓟ ꓩꓴ-ꓡ-ꓓ ꓚꓱꓹ ꓠꓬ ꓕꓱ ꓗꓪ ꓛꓲˍ ꓡꓰꓽ ꓟꓳꓸ ꓖꓶ ꓔ ꓡꓳ=