ꓟꓷ ꓠꓷꓹ ꓝ ꓒ ꓧꓳ-ꓫꓲ-ꓬ ꓟꓸ ꓟꓲꓽ

ꓟꓷꓽ ꓠꓷꓹ ꓝ ꓒ ꓧꓳ-ꓫꓲ-ꓬ ꓐꓰ ꓖꓳ ꓪꓴꓽ ꓟ ꓗꓳ-ꓟꓷ

ꓧꓳ-ꓫꓲ-ꓬ ꓠꓬ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓪꓴꓽ ꓓꓰˍ ꓟ ꓟꓷꓽ ꓠꓷꓹ ꓝ ꓢꓴ ꓕꓲ ꓣꓳ ꓥꓳ= ꓬꓲ ꓠꓬ ꓪꓴ-ꓢ ꓬꓲꓸ ꓠꓯꓸˍ ꓟ ꓠꓵ ꓠꓲꓹ ꓐꓰ ꓘꓪꓽˍ ꓟ ꓙꓳ ꓫꓸ ꓔꓬ ꓫꓸ ꓟ ꓔꓯˍ ꓟꓲ ꓔꓳꓹ ꓜꓳꓽ ꓠꓬꓲ ꓢꓴ ꓥꓳ= ꓬꓲ ꓔꓬ ꓟ ꓦꓬꓼ ꓠꓬꓲ ꓗꓪ ꓠꓬ ꓗꓴꓷꓼ ꓘꓴꓽ ꓗꓪ ꓢꓲꓺ ꓡꓲꓺ ꓟ ꓟꓽ ꓙꓳ= ꓝꓮꓲ ꓠꓬ ꓮ-ꓟꓳ-ꓢꓲ ꓡꓰ ꓬꓲ-ꓢꓷ-ꓡꓰ ꓐꓴ ꓔꓯ ꓙꓳꓺ ꓗꓽ ꓔ ꓖꓶˍ ꓟ ꓕꓲ ꓡꓰꓹꓼ ꓟꓽ ꓙꓲꓻ ꓟꓽ ꓜꓳꓽ ꓟ ꓮꓽ ꓙꓵꓽ ꓠꓬ ꓟꓲ ꓠꓯ ꓗꓪ ꓐꓲ ꓡꓰˍ ꓡꓳ= ꓕꓲ ꓗꓴꓷꓼ ꓡꓱꓸꓼ ꓗꓪ ꓡ ꓞꓳ ꓢꓰꓼ ꓠꓬꓲ ꓖꓴ ꓙꓴ ꓚꓬꓹ ꓢꓲꓸ ꓦꓴꓻ ꓠꓬꓲ ꓐꓰ ꓬꓰ ꓔꓬ ꓖꓴˍ ꓡꓳ= ꓟꓽ ꓙꓳ ꓞꓳ ꓫꓸ ꓐꓴ ꓔꓯ ꓠꓬ ꓟꓽ ꓓ ꓟꓽ ꓞ ꓚꓳ ꓑ ꓬꓰ ꓝꓲˍ ꓡꓳ= ꓔꓲꓺ ꓒ ꓐꓴ ꓐꓰ  ꓐꓯ ꓟꓴ ꓫꓬꓹ ꓢꓴ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓟꓸ ꓖꓶˍ ꓟ ꓐꓰ ꓔꓱꓹ ꓚꓵˍ ꓟ ꓐꓯ ꓟꓴ ꓫꓬꓹ ꓖꓶˍ ꓟ ꓔꓯ ꓟꓽ ꓬꓰ ꓬꓰ ꓒꓴ ꓫꓵꓺ ꓮꓽ ꓟꓬꓹ ꓘꓳꓹ ꓜꓽˍ ꓡꓳ= ꓝ ꓢꓲ ꓑꓸ-ꓡꓲ ꓢꓲꓺ ꓐꓬꓱꓽ ꓔꓯˍ ꓟꓲ ꓬꓰ-ꓧꓳ-ꓧꓪ ꓪꓴ-ꓢ ꓔꓯ ꓔꓲꓺ ꓖꓶ ꓖꓴ ꓗꓪ ꓡꓰ ꓛꓴꓺ ꓔꓲꓺ ꓖꓶ ꓔꓬ ꓡꓳ=

ꓧꓳ-ꓫꓲ-ꓬ ꓠꓬ ꓥꓶˍ ꓟ ꓪ ꓔꓲ ꓐꓴ ꓡꓰ ꓙꓵꓽˍ ꓟ ꓬꓲ-ꓢꓷ-ꓡꓰ ꓖꓴ ꓪꓴꓸ ꓕꓲ ꓛꓱꓽ ꓗꓪ ꓔꓬ ꓟ ꓞꓲꓼ ꓣꓳˍ ꓟ ꓟꓷꓽ ꓠꓷ ꓝ ꓢꓴ ꓕꓲ ꓣꓳ ꓥ ꓡꓳ= ꓪꓴ-ꓢ ꓠꓬ ꓬꓲ ꓑ ꓫꓬ ꓡ ꓞꓳ ꓐꓴ ꓡꓰ ꓬꓲ ꓔꓯ ꓟꓽ ꓠ ꓠꓹ ꓥ ꓟꓲ ꓬꓲ ꓠꓬ ꓬꓲ ꓡ ꓞꓳ ꓐꓴ ꓔꓯ ꓮ ꓡꓰ ꓟꓬ ꓛꓲ ꓠꓲꓹ ꓠꓵˍ ꓟ ꓔꓯ ꓟꓸ ꓖꓶ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓠꓬꓲ ꓖꓳ ꓪꓴꓽ ꓟ ꓗꓳ-ꓟꓷ ꓔꓯ ꓫ ꓠꓹ ꓟ ꓪꓴ-ꓢ ꓡꓰ ꓧꓳ-ꓫꓲ-ꓬ ꓔꓯ ꓐꓯ ꓖꓶ ꓡˍ ꓡꓳ=

ꓖꓳ ꓪꓴꓽ ꓟ ꓗꓳ-ꓟꓷ ꓠꓬ ꓮ ꓘꓶꓸ ꓡꓳꓸ ꓐꓲˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓡꓳ= ꓪꓴ-ꓢ ꓡꓰ ꓧꓳ-ꓫꓲ-ꓬ ꓔꓯ ꓤ ꓟꓶ ꓤ ꓖꓳ ꓕꓲ ꓣꓳ ꓡꓰ ꓬꓲ ꓔꓯ ꓟꓽ ꓛꓳ ꓛꓳ ꓝꓸ ꓢꓲ ꓖꓳ ꓪꓴꓽ ꓟ ꓬꓰˍ ꓥꓳ꓾ ꓐꓰ ꓙꓳꓺ ꓗꓽ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓡꓰ ꓕꓱ ꓟ ꓠꓬ ꓬꓲ ꓪ ꓔꓯ ꓠꓲꓹ ꓠꓵˍ ꓟ ꓪꓴ-ꓢ ꓔꓯ ꓡꓳꓺ ꓔ ꓬꓰ ꓟ ꓡ ꓞꓳ ꓡꓰ ꓐꓰ ꓗꓹ ꓟ ꓬꓲꓸ ꓢꓷꓸ ꓡꓰ ꓓꓴ ꓕꓲ ꓟ ꓒꓬꓱꓼ ꓡˍ ꓥꓳ꓾ ꓐꓰ ꓧꓳ-ꓫꓲ-ꓬ ꓔꓯ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓧꓳ-ꓫꓲ-ꓬ ꓠꓬ ꓗꓳ-ꓟꓷ ꓔꓯ ꓫˍ ꓡꓳ=

ꓗꓳ-ꓟꓷ ꓠꓬ ꓤ ꓠꓱ ꓢ ꓣꓳ ꓦꓵꓻ ꓖꓶ ꓗꓷꓳ= ꓤ ꓪꓴꓽ ꓔꓯ ꓙꓰ-ꓜꓷ-ꓡꓲ ꓐꓰ ꓟꓬꓱꓺ ꓖꓶˍ ꓡꓳ= ( ꓙꓰ-ꓜꓷ-ꓡꓲ ꓐꓯˍ ꓟ ꓠꓬ ꓬꓲꓸ ꓒꓵꓽ ꓒ ꓬꓰ-ꓩꓴ ꓡꓰ ꓞꓳ ꓤ ꓮ ꓟꓬꓹ ꓢꓰꓼ ꓗꓷ ꓟ ꓡꓳ ꓒꓱ ꓟꓬꓱꓺ ꓥ ꓡꓳ=) ꓖꓳ ꓗꓸ ꓠꓯꓸ ꓦꓵꓻ ꓡˍ ꓟ ꓬꓲ ꓮꓸ ꓟꓲ ꓔꓯ ꓡꓳ-ꓣꓴ-ꓧ-ꓟ ꓐꓰ ꓟꓬꓱꓺ ꓖꓶˍ ꓡꓳ= ꓡꓳ-ꓣꓴ-ꓧ-ꓟ ꓐꓯˍ ꓟ ꓠꓬ ꓥꓪ ꓠꓬ ꓬꓲ-ꓢꓷ-ꓡꓰ ꓐꓴ ꓮ ꓡꓲ ꓗꓷ ꓡꓰˍ ꓟꓲ ꓝꓮꓲ ꓟꓽ ꓫꓱꓸ ꓤꓽꓳ ꓐꓰ ꓐꓯˍ ꓟ ꓥ ꓡꓳ=

ꓗꓳ-ꓟꓷ ꓠꓬ ꓤ ꓠꓱ ꓶ ꓡꓰ ꓢꓲ ꓤ ꓕꓲ ꓣꓳ ꓦꓵꓻ ꓡ ꓢꓰꓽ ꓡꓳ= ꓤ ꓖꓳ ꓕꓲ ꓣꓳ ꓔꓯ ꓠꓬ ꓪꓴ-ꓢ ꓡꓰ ꓡꓳ-ꓮ-ꓟꓲ ꓐꓰ ꓟꓬꓱꓺ ꓖꓶˍ ꓡꓳ= ꓡꓳ-ꓮ-ꓟꓲ ꓐꓯˍ ꓟ ꓠꓬ ꓠꓴ ꓪ ꓠꓽ ꓥꓪ ꓑ ꓫꓬꓼ ꓟꓽ ꓥ꓾ ꓥꓪˍ ꓟꓲ ꓠꓴ ꓪ ꓪꓴ-ꓢ ꓟꓽ ꓬꓰꓳ꓾ ꓐꓯˍ ꓟ ꓥ ꓡꓳ= ꓗꓳ-ꓟꓷ ꓠꓬ ꓖꓳ ꓪꓴꓽ ꓟ ꓕꓲ ꓣꓳ ꓥ ꓢꓲ ꓙꓲˍ ꓟ ꓤ ꓟꓶ ꓤ ꓟꓽ ꓥ ꓠꓬꓲ ꓬꓲ ꓠꓬ ꓧꓳ-ꓫꓲ-ꓬ ꓔꓯ ꓡꓳꓺ ꓔ ꓬꓰ ꓢꓲ ꓞꓳ ꓑ ꓤ ꓝꓮꓲ ꓕꓲ ꓣꓳ ꓔꓯ ꓠꓶꓽ ꓙꓰˍ ꓡꓳ=

ꓧꓳ-ꓫꓲ-ꓬˍ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓪꓴ-ꓢ ꓔꓯ ꓟꓽ ꓚꓱꓹ ꓬꓲꓼ ꓙꓰ ꓠꓬ ꓪꓴ-ꓢ ꓡꓰ ꓬ-ꓫꓵ ꓡ ꓞꓳ ꓐꓴ ꓔꓯ ꓝꓲ ꓩꓴ ꓗꓷ ꓢꓲ ꓠꓴ ꓪ ꓐꓴ ꓔꓯ ꓬꓲ ꓪ ꓗꓴꓷꓼ ꓗꓪ ꓡꓳꓽ ꓔꓯꓹ ꓙꓰ ꓢꓲ ꓠꓬꓲ ꓚꓳꓺ ꓑ ꓬꓰ ꓝꓲˍ ꓥꓳ꓾ ꓐꓰ ꓙꓳꓺ ꓗꓽ ꓖꓶˍ ꓡꓳ= ꓥꓶˍ ꓟ ꓟꓽ ꓙꓲꓻ ꓟ ꓢꓲꓺ ꓐꓴ ꓔꓯ ꓦ ꓡꓱ ꓢꓲ ꓪꓴ-ꓢ ꓔꓯ ꓡꓳꓺ ꓗꓷˍ ꓟ ꓗꓪ ꓐꓰ ꓠꓽ ꓗꓷ ꓠꓹ ꓟ ꓧꓳ-ꓫꓲ-ꓬ ꓡꓰ ꓬꓲ-ꓢꓷ-ꓡꓰ ꓐꓴ ꓔꓯ ꓕꓵꓼ ꓪ ꓖꓶˍ ꓡꓳ=

ꓪꓴ-ꓢ ꓡꓰ ꓬꓲ ꓪ ꓐꓴ ꓔꓯ ꓕꓲ ꓠꓬꓲ ꓙꓳˍ ꓠꓬ ꓫꓸ ꓙꓵ ꓡꓰ ꓝꓲˍ ꓟ ꓔꓯ ꓬꓲ ꓢꓷꓸ ꓡꓳ= ꓖꓳ ꓡꓱ ꓥˍ ꓟꓲ ꓗꓸ ꓠꓯ ꓠꓬ ꓬꓲ ꓪ ꓐꓴ ꓔꓯ ꓝꓮꓲ ꓬꓰ ꓙˍ ꓟ ꓥꓳ ꓡꓳꓸ ꓓꓴ ꓙꓳˍ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓐꓴ ꓔꓯ ꓠꓲꓹ ꓠꓵˍ ꓟ ꓬꓲ ꓪ ꓪꓴ-ꓢ ꓔꓯ ꓒꓳꓹ ꓬꓲꓼ ꓡˍ ꓥꓳ= ꓡꓳ-ꓣꓴ-ꓧ-ꓟ ꓥ ꓠꓬ꓾ ꓫꓱꓸ-ꓤ-ꓟꓽ-ꓟꓶ ꓐꓰ ꓘꓴ ꓗꓷ ꓢꓴ ꓔꓯ ꓫꓱꓸ ꓤ ꓠꓲꓹ ꓟꓳꓸ ꓖꓶ ꓢꓲ꓾ ꓡꓳ-ꓮ-ꓟꓲ ꓥ ꓠꓬ꓾ ꓥꓪ-ꓑ-ꓫꓬ-ꓟꓽ-ꓥ ꓐꓰ ꓟꓬꓱ ꓗꓷ ꓢꓴ ꓐꓴ ꓔꓯ ꓙꓽ ꓗꓳ ꓠꓲꓹ ꓟꓳꓸ ꓖꓶˍ ꓥꓳ= ꓖꓳ ꓡꓱ ꓢꓲ ꓬꓲ ꓪ ꓠꓬ ꓪꓴ-ꓢ ꓔꓯ꓾ ꓠꓴ ꓠꓽ ꓥꓪ ꓠꓴꓽ ꓬꓰ-ꓧꓳ-ꓧꓪ ꓪꓴ-ꓢ ꓥꓳ꓾ ꓐꓰ ꓣꓷꓠꓸˍ ꓥꓳ=

ꓖꓳ ꓡꓱ ꓢꓲ ꓗꓳ-ꓟꓷ ꓠꓬ ꓪ ꓙꓲ ꓟꓽ ꓙꓲꓻ ꓟ ꓬꓰ ꓡˍ ꓡꓳ= ꓦꓬꓽ ꓛꓳ ꓧꓪ ꓢꓲ ꓡꓳꓹ ꓬꓰˍ ꓗꓪ ꓬꓲ ꓠꓬ ꓬꓲ ꓔꓯ ꓜꓽ ꓓꓴ ꓐꓰ ꓖꓪꓽ ꓓꓴ ꓖꓶꓽ ꓟꓽ ꓐ ꓡ ꓢꓴ ꓔꓬ ꓗꓪ ꓛꓲꓺ ꓬꓰꓳ= ꓧꓳ-ꓫꓲ-ꓬ ꓠꓬ ꓬꓲ ꓤ ꓟꓶ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓟ ꓔꓯ ꓑ ꓙˍ ꓡꓳ=

ꓪꓴ-ꓢ ꓡꓰ ꓧꓳ-ꓫꓲ-ꓬ ꓔꓯ꓾ ꓬꓲ-ꓢꓷ-ꓡꓰ ꓐꓴ ꓠꓬ ꓥꓪ ꓔꓯˍ ꓐꓰ ꓧꓹ ꓙꓰ ꓢꓲ ꓠꓱꓸ ꓐꓯ ꓢꓲꓺ ꓔꓯ ꓣꓱꓽ ꓙ ꓢꓲ ꓠꓬꓲ꓾ ꓛꓱꓼ ꓡꓱꓼ ꓢꓶ ꓔꓲ ꓖꓶ ꓠꓬꓲ ꓬꓰˍ ꓟꓲ꓾ ꓥꓪ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓠꓲꓹ ꓠꓵ ꓔꓬ ꓢꓰꓽ ꓟˍ ꓡꓰ ꓐꓰ꓾ ꓠꓴˍ ꓟꓲ ꓠꓴ ꓤ ꓟꓶ ꓦꓬꓽ ꓛꓳꓽ ꓧꓪ ꓟ ꓖꓳ ꓕꓲ ꓣꓳ ꓔꓯ ꓠꓲꓹ ꓠꓵ ꓬꓰ ꓢꓰ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓧꓳ-ꓫꓲ-ꓬ ꓡꓰ ꓗꓳ-ꓟꓷ ꓐꓰ ꓕꓲ ꓪ ꓔꓬ ꓢꓴ ꓔꓯ ꓒꓴ ꓞꓲ ꓥꓪꓽ ꓫꓱ-ꓘꓷ-ꓡꓷˍ ꓐꓰ꓾ ꓤꓴ ꓕꓲꓽ ꓧꓳ-ꓟꓷ ꓐꓶꓻ ꓗꓷ ꓢꓲ ꓗꓳ-ꓟꓷ ꓔꓯ ꓫꓴꓹ ꓗꓷꓳ= ꓒꓴ ꓞꓲ ꓥꓪꓽ ꓫꓱ-ꓘꓷ-ꓡꓷˍ ꓐꓰ꓾ ꓤꓴ ꓕꓲꓽ ꓧꓳ-ꓟꓷ ꓠꓬ ꓚꓳꓺ ꓑ ꓕꓲ ꓣꓳ ꓬꓲꓸ ꓒꓵꓽ ꓥ ꓡꓳ=

ꓧꓳ-ꓫꓲ-ꓬ ꓡꓰ ꓗꓳ-ꓟꓷ ꓔꓯ ‘ꓠꓴ ꓠꓬ ꓥꓪ ꓐꓰ ꓝꓮꓲ ꓕꓲ ꓧꓪꓹ ꓔꓬ ꓪˍ ꓥꓳ= ꓠꓴ ꓠꓬ ꓦꓬꓽ ꓛꓳ ꓟꓽ ꓧꓪ ꓧꓪ ꓔꓬ꓾ ꓥꓪˍ ꓟꓲ ꓠꓴ ꓔꓯ ꓦ ꓡꓱ ꓐꓳ ꓐꓳˍ ꓡꓰ ꓦꓴ ꓠꓬꓹ ꓥꓳ꓾ ꓐꓯ ꓖꓶˍ ꓡꓳ= ꓕꓱ ꓟ ꓡꓰ ꓐꓰ ꓪꓴ-ꓢ ꓠꓬ ꓬꓲ ꓔꓯ ꓚꓱꓹ ꓬꓲꓼ ꓡ ꓢꓴ ꓐꓴ ꓔꓯ ꓶ ꓥꓳ ꓙꓱꓽ ꓖꓶˍ ꓥꓳ=

ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓠꓬ ꓟꓽ ꓡꓳꓹ ꓬꓰ ꓟ ꓪꓴ-ꓢ ꓠꓵ ꓠꓲꓹ ꓥ ꓡꓳ= ꓟꓲ ꓠꓯ ꓞꓳ ꓤ ꓝꓴꓲ ꓬꓰˍ ꓥˍ ꓟꓲ ꓪꓴ-ꓢ ꓠꓬ ꓞꓳ ꓤ ꓐꓴ ꓔꓯ ꓠꓲꓹ ꓠꓵˍ ꓢꓰꓽ ꓡꓳ= ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓪꓴ-ꓢ ꓠꓬ ꓣꓳ ꓝꓴꓲꓸ ꓔꓯ ꓣꓷꓠꓸ ꓢꓲ ꓬꓲ ꓔꓯ ꓬꓲꓼ ꓡ ꓢꓲ꓾ ꓬꓲ ꓡꓰ ꓣꓳ ꓔꓯ ꓶꓼ ꓤ ꓫꓱꓹ ꓤ ꓖꓶˍ ꓟ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=