ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓬ ꓟꓸ ꓟꓲꓽ

ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓬ ꓦꓬꓼ ꓠꓬꓲ ꓕꓯ ꓟꓵꓽ ꓗꓪ ꓟꓶ ꓦ ꓟꓽ ꓦ ꓟ ꓮ ꓟꓬꓹ ꓘꓳꓼ ꓙꓳ ꓡꓰ ꓢꓲ ꓦꓰꓼ ꓟꓶꓼ ꓘꓳꓼ ꓓꓳ ꓡˍ ꓡꓳ= ꓬꓲ-ꓢꓷ-ꓡꓰ  ꓐꓴ ꓜꓽ ꓪꓳꓽ ꓡꓳ ꓪꓳꓽˍ ꓟꓲ ꓮ ꓙꓵꓽ ꓫꓵꓻꓳ= ꓬꓲ ꓪ ꓐꓴ ꓙꓱꓽ ꓤ ꓐꓴˍ ꓟꓲ ꓮ ꓙꓵꓽ ꓫꓵꓻ ꓢꓲ ꓬꓲ ꓪ ꓐꓴ ꓠꓬ ꓥꓳꓺ ꓡꓳꓸ ꓓꓴ ꓟꓽ ꓙꓳ ꓗꓷ ꓡꓰ ꓔꓬ ꓡꓳ= ꓕꓱ ꓟ ꓠꓬ ꓬꓲ ꓐꓴ ꓪꓴ-ꓢ ꓔꓯ ꓟꓽ ꓠ ꓡꓳꓸ ꓟ ꓐꓰ ꓟꓽ ꓙꓲꓻ ꓟꓽ ꓜꓳꓽ ꓟ ꓪ ꓔꓲ ꓬ-ꓧ ꓪꓴꓸ ꓠꓬꓲ ꓪꓴ-ꓢ ꓡꓰ ꓟꓵꓽ ꓔꓯ ꓙꓴꓺ ꓡꓰ ꓝꓲ ꓟ꓾ ꓟꓶ ꓦ ꓟꓽ ꓦ ꓝꓲ ꓟ ꓥ ꓡꓳ=

ꓪ ꓔꓲ ꓬ-ꓧ ꓠꓬ ꓪꓴ-ꓢ ꓔꓯ ꓠꓲꓹ ꓜꓳˍ ꓡꓳ= ꓝꓮꓲ ꓬꓲ ꓠꓬ ꓪꓴ-ꓢ ꓬꓲ ꓟꓷ ꓠꓷꓹ ꓝ ꓢꓴ ꓥ ꓟ ꓬꓲ-ꓡꓲ-ꓬ ꓔꓯˍ ꓟꓲ ꓠꓲꓹ ꓜꓳˍ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓬꓲ-ꓡꓲ-ꓬ ꓠꓬ ꓪꓴ-ꓢ ꓡꓰ ꓮ ꓡꓰ ꓬꓰˍ ꓐꓰ ꓬꓰ ꓔꓬ ꓟ ꓔꓯ ꓐꓯ ꓖꓶ ꓠꓹ ꓟ ꓪ ꓔꓲ ꓬ-ꓧ ꓟꓲ ꓙꓬ ꓗꓪ ꓙꓰˍ ꓡꓳ= ꓪ ꓔꓲ ꓡꓰ ꓬꓲ-ꓡꓲ-ꓬ ꓔꓯ ꓟꓳ ꓡꓰ ꓠꓬ ꓮ ꓘꓶꓸ ꓠꓲꓹ ꓟ ꓦꓶꓻ ꓔꓴ ꓡ ꓢꓲ ꓠꓴ ꓠꓬ ꓮ ꓫꓵꓽ ꓠꓲꓹ ꓫꓵˍ ꓡ? ꓠꓴ ꓠꓽ ꓫꓵꓽ ꓪꓴ ꓒꓬꓱꓼ ꓡ ꓝꓲ ꓢꓴ ꓥꓳ꓾ ꓐꓰ ꓐꓯˍ ꓡꓳ=

ꓖꓳ ꓕꓯ ꓬꓲ-ꓡꓲ-ꓬ ꓡꓰ ꓪ ꓔꓲ ꓔꓯ ꓜꓲꓽ ꓜꓲꓽ ꓡꓰ ꓡꓳꓸ ꓠꓬꓲ ꓢꓲ ꓥꓪ ꓠꓽ ꓫꓵꓽ ꓪꓴ ꓧꓪˍ ꓐꓰ ꓡꓹ ꓡꓳ ꓫꓵꓽ ꓟꓽ ꓥ꓾ ꓪ ꓔꓲꓳ ꓠꓴ ꓠꓬ ꓪꓴ-ꓢ ꓔꓯ ꓡꓳ ꓒꓰ ꓗꓷ ꓢꓲ ꓢꓲꓺ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓗꓷꓳ= ꓬꓰ-ꓧꓳ-ꓧꓪ ꓪꓴ-ꓢ ꓡꓰꓽ ꓕꓲ ꓣꓳˍ ꓟ ꓪꓴ-ꓢ ꓥ ꓟ ꓬꓲ ꓡꓰ ꓠꓴ ꓔꓯ ꓟꓳꓸ ꓖꓶ ꓡꓹ ꓥꓳ= ꓖꓳ ꓡꓱ ꓠꓬꓲ ꓑ-ꓡꓲ ꓪꓴ-ꓢ ꓬꓲ ꓟꓷꓽ ꓠꓷꓹ ꓝ ꓢꓴ ꓮ ꓙꓵꓽ ꓔꓯ ꓠꓴ ꓐꓰ ꓕꓲ ꓪꓽ ꓧꓳꓽ ꓔꓯꓹ ꓡ ꓢꓲ ꓘꓹ-ꓟꓱ-ꓡꓱ ꓪ ꓚꓲꓺ ꓗꓪ ꓜꓲꓼ ꓡꓯ= ꓖꓳ ꓗꓪ ꓪꓴ-ꓢ ꓮ ꓡꓰ ꓕꓲ ꓣꓳ ꓟ ꓠꓬ ꓪꓴ-ꓢ ꓚꓵꓺ ꓥ ꓟ ꓔꓯꓺ ꓡꓯ ꓘꓳ ꓡꓯ꓾ ꓐꓰ ꓐꓯ ꓖꓶˍ ꓡꓳ=

 ꓘꓹ-ꓟꓱ-ꓡꓱ ꓪ ꓚꓲꓺ ꓗꓪ ꓛꓲ ꓬꓰ ꓕꓯ ꓬꓲ-ꓡꓲ-ꓬ ꓠꓬ ꓬꓰ-ꓧꓳ-ꓧꓪ ꓪꓴ-ꓢ ꓐꓱ ꓶ ꓔꓲꓺ ꓖꓶ ꓖꓴ ꓕꓲ ꓟ ꓜꓶꓻ ꓗꓷ ꓢꓲ꓾ ꓑ-ꓡꓲ ꓢꓲꓺ ꓐꓱ ꓶ ꓔꓲꓺ ꓖꓴ ꓕꓲ ꓟ ꓫꓬꓹ ꓠꓹ ꓟ ꓑ-ꓡꓲ ꓬꓲꓸ ꓟꓷꓽ ꓠꓷꓹ ꓝ ꓢꓴ ꓐꓴ ꓔꓯ ꓐꓯ ꓖꓶˍ ꓡꓳ= ꓝꓮꓲ ꓬꓲ-ꓡꓲ-ꓬ ꓡꓰ ꓕꓱ ꓗꓪ ꓮꓸ ꓠꓬꓲꓽ ꓑꓸ ꓠꓬꓲꓽ ꓟ ꓔꓯ ꓠꓴ ꓪ ꓔꓲꓺ ꓖꓴ ꓐꓱ ꓶ ꓕꓲ ꓟ ꓥꓪ ꓐꓱ ꓶ ꓕꓲ ꓟ ꓗꓶˍ ꓥꓳ= ꓖꓳ ꓡꓱ ꓢꓲ ꓠꓴ ꓪˍ ꓟꓲ ꓠꓴ ꓪ ꓪꓴ-ꓢ ꓔꓯ ꓪꓽ ꓘꓴ꓾ ꓥꓪˍ ꓟꓲ ꓥꓪ ꓪꓴ-ꓢ ꓔꓯ ꓪꓽ ꓘꓴˍ ꓥꓳ= ꓬꓰ-ꓧꓳ-ꓧꓪ ꓠꓬ ꓪꓴ-ꓢ ꓚꓵꓺ ꓚꓵꓺ ꓥ ꓕꓯ ꓠꓽ ꓔꓲꓺ ꓖꓴ ꓕꓱ ꓟ ꓔꓯ ꓟꓴꓽ ꓗꓪ ꓗꓪ ꓐꓰ  ꓮ ꓔꓳꓸ ꓬꓯꓼ ꓡ ꓝꓲ ꓢꓲ ꓔꓲꓺ ꓓꓴ ꓠꓬ ꓛꓴ ꓖꓴ ꓡꓰˍ ꓥꓳ= ꓑ-ꓡꓲ ꓠꓬ ꓪꓴ-ꓢ ꓚꓵꓺ ꓚꓵꓺ ꓥ ꓕꓯ ꓠꓽ ꓬꓲˍ ꓟꓲ ꓟꓴꓽ ꓗꓪ ꓗꓪ ꓐꓰ ꓮ ꓔꓳꓸ ꓬꓯꓼ ꓡ ꓢꓲ ꓔꓲ ꓓꓴ ꓔꓯ ꓛꓴ ꓖꓴ ꓡꓰˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓑ-ꓡꓲ ꓬꓲ ꓟꓷ ꓠꓷꓹ ꓝ ꓢꓴ ꓐꓴ ꓡꓰ ꓬꓲ-ꓡꓲ-ꓬ ꓐꓯ ꓟ ꓜꓳꓽˍ ꓡꓳ ꓐꓰ ꓒꓳꓹ ꓖꓶ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓐꓴ ꓔꓯꓺ ꓪꓴꓸ ꓔꓴˍ ꓡꓳ= ꓑ-ꓡꓲ ꓬꓲ ꓟꓷ ꓠꓷꓹ ꓝ ꓢꓴ ꓐꓴ ꓠꓬ ꓬꓲ ꓪ ꓪꓴ-ꓢ ꓔꓯ ꓘꓴ ꓢꓲ ꓪꓽ ꓘꓴ ꓪꓴꓸ ꓔꓴˍ ꓡꓳ= ꓝꓮꓲ ꓬꓲ ꓪ ꓖꓳ ꓓꓱ ꓔꓯ ꓮꓸ ꓕꓽ ꓪꓴꓸ ꓒꓲꓹ ꓡꓰ ꓗꓸ ꓠꓬꓲ ꓬꓰ ꓢꓲ ꓘꓴˍ ꓡꓳ= ꓖꓳ ꓡꓱ ꓥˍ ꓟꓲ ꓮ ꓫꓵˍ ꓟꓲ ꓟꓽ ꓒꓬꓱꓼ ꓡ ꓠꓬꓲ ꓮ ꓘꓶꓸ ꓐꓰ ꓮ ꓘꓶꓸ ꓘꓴ ꓠꓬꓲ ꓥꓴꓻ ꓠꓬꓲ ꓬꓰˍ ꓡꓳ= ꓖꓳ ꓡꓱ ꓥˍ ꓟꓲ ꓑ-ꓡꓲ ꓪꓴ-ꓢ ꓠꓬ ꓬꓲ ꓪ ꓔꓯ ꓟꓽ ꓓ ꓔꓳꓹ ꓖꓶ ꓡ= ꓬꓲ ꓪ ꓐꓴ ꓠꓬ ꓠꓯꓼ ꓗꓪ ꓐꓰ ꓟꓶꓽ ꓘꓶꓼ ꓗꓪ ꓛꓲ ꓘꓴ ꓔꓬ ꓟꓲ ꓬꓲ ꓪ ꓔꓯ ꓟꓽ ꓓꓽ ꓔꓳꓹ ꓖꓶ ꓡ=

ꓕꓱ ꓕꓲ ꓧꓪꓹ ꓗꓪ ꓠꓬ ꓬꓲ-ꓡꓲ-ꓬ ꓡꓰ ꓪꓽ ꓘꓴˍ ꓟ ꓙꓵꓹ ꓛꓲꓺ ꓡꓺꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓔꓲꓺ ꓖꓴ ꓗꓪ ꓬꓲꓻ ꓞꓲꓺ ꓠꓬꓲꓽ ꓧꓪꓹ ꓧꓳꓽ ꓝꓲ ꓢꓲ ꓔꓲ ꓖꓴ ꓗꓪ ꓟ ꓢꓲꓹ ꓐꓰ ꓔꓲ ꓓꓴ ꓔꓯ ꓒꓼ ꓡꓰ ꓝꓲˍ ꓡꓳ= ꓬꓲꓻ ꓙꓬ ꓒꓼ ꓓꓹ ꓟ ꓗꓪ ꓮꓸ ꓔꓳ ꓛꓴ ꓖꓴ ꓡꓰ ꓠꓹ ꓟ ꓠꓽ ꓒꓬꓱꓼ ꓡ ꓟꓽ ꓓ ꓡꓳ ꓫꓵꓽ ꓥꓳ= ꓖꓳ ꓡꓱ ꓠꓬꓲ ꓬꓲ-ꓡꓲ-ꓬ ꓠꓬ ꓪꓽ ꓘꓴ ꓪꓴꓸ ꓔꓴˍ ꓡꓳ= ꓪꓴ-ꓢꓺꓳ꓾ ꓕꓱ ꓗꓪ ꓜꓲꓼ ꓞ ꓟ ꓑ ꓜꓬꓼ ꓐꓴˍ ꓟꓲ ꓠꓴ ꓠꓽ ꓪꓴ-ꓢ ꓚꓵꓺ ꓥ ꓟˍ ꓐꓰ꓾ ꓠꓴ ꓠꓬ ꓔꓲ ꓪ ꓔꓯ ꓓꓵꓽ ꓙ ꓒꓳꓹ ꓡꓰꓼ ꓡ ꓝꓲ ꓠꓲ ꓫꓵˍ ꓟ ꓔꓯ ꓢꓷꓸ ꓡꓰ ꓠꓹ ꓟ ꓥꓪ ꓘꓴ ꓘꓶꓽ ꓔꓯ ꓓꓽ ꓔꓳꓹ ꓖꓶ ꓡꓯ꓾ ꓐꓰ ꓪ ꓘꓴˍ ꓡꓳ=

ꓖꓳ ꓕꓱ ꓞꓼ ꓐꓰ ꓟꓴꓽ ꓗꓪ ꓒꓴ ꓡ ꓢꓲ ꓮ ꓔꓳꓸ ꓕꓲ ꓟ ꓠꓬ ꓬꓲ-ꓡꓲ-ꓬ ꓬꓲ ꓔꓲꓺ ꓖꓴ ꓗꓪ ꓬꓯꓼ ꓛꓲ ꓡˍ ꓡꓳ= ꓮ ꓔꓳꓸ ꓖꓳ ꓟ ꓠꓬ ꓔꓲ ꓓꓴ ꓧꓪꓽˍ ꓐꓰ꓾ ꓢꓲꓹ ꓐꓰ꓾ ꓔꓲ ꓖꓴ ꓜꓶ ꓔ ꓟ ꓡꓳ ꓓꓰˍ ꓐꓰ꓾ ꓔꓲ ꓖꓴ ꓚꓳ ꓡꓳ ꓗꓪ ꓟ ꓠꓱꓸ ꓦꓱꓽ ꓔꓯ ꓐꓬꓻ ꓖꓴ ꓡꓰ ꓝꓲˍ ꓡꓳ= ꓝꓮꓲ ꓔꓲ ꓖꓴ ꓚꓳ ꓡꓳ ꓗꓪ ꓟ ꓬꓲꓻ ꓙꓬˍ ꓟꓲ ꓫꓱꓺ ꓡꓰ ꓖꓴꓳ=

ꓖꓳ ꓟ ꓔꓯ ꓜꓲꓼ ꓞ ꓟ ꓑ ꓫꓬ ꓐꓴ ꓟꓳ ꓡꓰ ꓠꓬ ꓟꓳꓼ ꓡꓰ ꓢꓲ ꓬꓰ-ꓧꓳ-ꓧꓪˍ ꓡꓰꓽ ꓪꓴ-ꓢ ꓥ ꓐꓷ꓾ ꓬꓲ ꓕꓲ ꓣꓳˍ ꓡꓰꓽ ꓢꓲ ꓒ ꓥ ꓐꓷ꓾ ꓐꓯ ꓡꓳ= ꓑ ꓫꓬ ꓐꓴ ꓡꓰ ꓬꓲ ꓪ ꓛꓬ ꓗꓷ ꓟ ꓔꓯ ꓢꓷˍ ꓠꓬꓲ ꓬꓲ ꓪ ꓝꓴꓲ ꓖ ꓖꓶ ꓟꓶ ꓠꓹ ꓟ ꓪꓴ-ꓢ ꓔꓯ ꓓꓰꓽˍ ꓡꓳ=

ꓖꓳ ꓕꓲ ꓠꓬꓲ ꓗꓪ ꓡꓰꓽ ꓬꓲ-ꓡꓲ-ꓬ ꓐꓰ ꓬꓲ-ꓢꓷ-ꓡꓰ ꓐꓴ ꓠꓬ ꓪꓴ-ꓢ ꓔꓯ ꓠꓲꓹ ꓜꓳˍ ꓟ ꓑ-ꓡꓲ ꓟꓷꓽ ꓠꓷꓹ ꓝ ꓒ ꓐꓴ ꓔꓯ ꓢꓰꓼ ꓗꓷˍ ꓡꓳ= ꓬꓲ ꓪ ꓐꓴ ꓠꓬ ꓥꓳꓽ ꓡꓰ ꓟ ꓙ ꓖꓴ ꓗꓪ ꓧꓳꓽ ꓣꓱꓽ ꓢꓴ ꓝꓮꓲ ꓟꓽ ꓓꓳ ꓡ ꓠꓹ ꓟ ꓬꓰ ꓗꓷꓳ= ꓑ-ꓡꓲ ꓠꓬ ꓢꓯꓼ ꓟꓬ ꓟꓽ ꓙꓳ ꓟ꓾ ꓟꓽ ꓢꓯꓸ ꓓꓹ ꓟ ꓭꓸ ꓛꓲꓺ ꓐꓰ ꓫꓬꓹ ꓔ ꓟ ꓬꓲ ꓐꓬꓱꓽ ꓘꓴꓸ ꓕꓲ ꓟˍ ꓡꓰꓽ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓧꓳ-ꓧꓪ ꓠꓬ ꓪꓴ-ꓢ ꓚꓵꓺ ꓚꓵꓺ ꓥ ꓟ ꓔꓯ ꓬꓲ-ꓢꓷ-ꓡꓰ ꓮ ꓙꓵꓽ ꓠꓬ ꓖꓳ ꓕꓲ ꓠꓬꓲ ꓗꓪ ꓟꓳꓻ ꓡꓰꓳ=