ꓟꓷ ꓠꓷꓹ ꓝ ꓒ ꓬꓲ-ꓢ-ꓬ ꓟꓸ ꓟꓲꓽ

ꓬꓲ-ꓢꓷ-ꓡꓰ ꓟꓵꓽ ꓗꓪ ꓬꓲ-ꓢ-ꓬ ꓟꓬꓱꓺ ꓔ ꓟ ꓡ ꓞꓳ ꓕꓲ ꓣꓳ ꓠꓬ ꓙꓲꓻˍ ꓟ ꓬꓲ-ꓢꓷ-ꓡꓰ ꓟꓷꓽ ꓠꓷꓹ ꓝ ꓢꓴ ꓕꓲ ꓣꓳ ꓥ ꓢꓲ꓾ ꓪꓴ-ꓢ ꓟꓲ ꓙꓬ ꓗꓪ ꓦꓰꓼ ꓞꓹ ꓐ ꓡ ꓢꓴ ꓕꓲ ꓣꓳ ꓥꓳ=

ꓕꓲ ꓠꓬꓲ ꓙꓳˍ ꓕꓯ ꓪ ꓔꓲ ꓧꓷ-ꓫꓲ-ꓘꓷ-ꓬ ꓮ ꓘꓶꓸ ꓠꓻ ꓔꓬ ꓡꓳ= ꓬꓲ ꓖꓳ ꓡꓰ ꓠꓻ ꓔꓬ ꓟ ꓪꓴꓸ ꓠꓬꓲ ꓬꓲ ꓔꓯ ꓫꓵꓻˍ ꓥꓳ ꓐꓰ ꓡ ꓞꓳ ꓐꓴ ꓓꓵꓽ ꓙ ꓔꓬ ꓡꓳ= ꓬꓲ ꓪ ꓐꓴ ꓠꓬ ꓡꓳꓹ ꓬꓰˍ ꓗꓪ ꓬꓲ ꓔꓯ ꓟꓷꓽ ꓠꓷꓹ ꓝ ꓒ ꓬꓲ-ꓢ-ꓬ ꓔꓬ ꓗꓪ ꓧꓳꓽ ꓙꓰˍ ꓡꓳ= ꓬꓲ-ꓢ-ꓬ ꓡꓰ ꓬꓲ ꓔꓯ ꓬꓰ ꓙˍ ꓟ ꓪꓴꓸ ꓠꓬꓲ ꓪ ꓔꓲ ꓠꓬ ꓫꓵꓻ ꓠꓻ ꓠꓻ ꓔꓬ ꓟ ꓗꓪ ꓐꓰ ꓧꓺ ꓡꓰꓳ= ꓓꓳꓽ ꓕꓱ ꓟ ꓠꓬ ꓕꓲ ꓖ ꓡꓰ ꓕꓲ ꓖ ꓗꓪ ꓒꓬꓱꓻ ꓙꓰˍ ꓡꓳ= ꓗꓸ ꓠꓯ ꓐ-ꓐ-ꓡꓶ ꓪ ꓔꓲ ꓬꓲ ꓝꓲ ꓓꓴ ꓐꓴ ꓠꓬ ꓪ ꓔꓲ ꓧꓷ-ꓫꓲ-ꓘꓷ-ꓬ ꓔꓯ ꓡ ꓢꓲ ꓐ-ꓐꓲ-ꓡꓶ ꓪ ꓔꓲ ꓦꓻ ꓖ ꓩꓴ ꓡˍ ꓟ ꓕꓳ ꓶ ꓐꓰ ꓡꓯ ꓫꓴ ꓬꓲ ꓔꓯ ꓖꓶˍ ꓡꓳ= ꓕꓱ ꓟ ꓔꓯ ꓪ ꓔꓲ ꓧꓷ-ꓫꓲ-ꓘꓷ-ꓬ ꓡꓰ ꓮ ꓘꓶꓸ ꓠꓲꓹ ꓒꓴ ꓡꓰ ꓢꓲ ꓬꓲ ꓪ ꓐꓴ ꓔꓯ ꓬꓲ ꓒꓵꓽ ꓶ ꓫꓺ ꓖꓴ ꓦꓲꓻ ꓮ ꓙꓵ ꓬꓲ ꓪ ꓔꓯ ꓟꓳꓸ ꓖꓶˍ ꓡꓳ= ꓝꓮꓲ ꓬꓲ ꓦꓲꓻ ꓗꓪ ꓙꓳˍ ꓟˍ ꓐꓰ ꓬꓲ ꓙꓵꓽ ꓔˍ ꓟ ꓟꓵꓽ ꓥ ꓕ ꓑꓳ ꓗꓪ ꓧꓷ-ꓫꓲ-ꓘꓷ-ꓬ ꓡꓰ ꓬꓲ ꓪ ꓔꓯ ꓟꓽ ꓟꓳꓸ ꓖꓶ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ=

ꓖꓳ ꓕꓲ ꓠꓬꓲ ꓟꓶꓽ ꓘꓶꓼ ꓗꓪ ꓬꓲ-ꓢ-ꓬ ꓡꓰ ꓪ ꓔꓲ ꓔꓬ ꓗꓪ ꓡ ꓢꓲ ꓐ-ꓐꓲ-ꓡꓶ ꓪ ꓔꓲ ꓬꓲ ꓝꓲ ꓓꓴ ꓔꓯ ꓮꓸ ꓫꓵꓽ ꓟꓳꓸ ꓖꓶ ꓗꓷ ꓟ ꓔꓯ ꓠ ꓠꓬꓲˍ ꓡꓳ= ꓖꓳ ꓡꓱ ꓠꓬꓲ ꓪ ꓔꓲ ꓡꓰ ꓬꓲ ꓪ ꓐꓴ ꓔꓯ ꓟꓳꓸ ꓖꓶ ꓗꓷ ꓟ ꓮ ꓙꓵꓽ ꓐꓯ ꓟꓸ ꓖꓶˍ ꓡꓳ= ꓖꓳ ꓕꓯ ꓬꓲ-ꓢ-ꓬ ꓡꓰ ꓠꓴ ꓦꓲꓻ ꓗꓪ ꓙꓳˍ ꓟ ꓮ ꓙꓵꓽ ꓐ-ꓐꓲ-ꓡꓶ ꓗꓪ ꓔꓯꓹ ꓙꓰˍ ꓟ ꓦꓬꓼ ꓠꓬꓲ ꓛꓲ ꓡˍ ꓥꓳ= ꓕꓲ ꓫꓵꓽˍ ꓟꓲ ꓟꓽ ꓤꓰꓻ ꓡꓰ= ꓠꓴ ꓦꓵꓻ ꓔ ꓟ ꓤ ꓐꓴ ꓕꓲ ꓐꓱ ꓔꓯˍ ꓟꓲ ꓬꓲ ꓪ ꓡꓰ ꓡꓳꓽ ꓔꓯꓹ ꓙꓰˍ ꓥꓳ꓾ ꓐꓰ ꓙꓳꓺ ꓗꓽ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓪ ꓔꓲ ꓠꓬ ꓬꓲ-ꓢ-ꓬ ꓡꓰ ꓐꓯ ꓖꓶˍ ꓡˍ ꓟ ꓔꓯ ꓟꓽ ꓠ ꓠꓹ=  

ꓬꓲ ꓦꓬꓼ ꓠꓬꓲ ꓟꓶ ꓤ ꓗꓷ ꓡꓰ ꓔꓬ ꓕꓯ ꓬꓴ-ꓔ ꓡ ꓞꓳ ꓐꓴ ꓐꓰ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓡꓳꓺ ꓒꓰꓹ ꓗꓷꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓬꓲ ꓪ ꓔꓯ ꓠꓲꓹ ꓟ ꓦꓶꓻ ꓢꓲ ꓬꓲ ꓪ ꓔꓯ ꓟꓽ ꓬꓰ ꓙꓻꓳ= ꓖꓳ ꓡꓱ ꓠꓬꓲ ꓬ-ꓫꓵ ꓟꓵꓽ ꓗꓪ ꓟ ꓟꓯꓼ ꓐꓴ ꓠꓬ ꓖꓴ ꓪꓴꓸ ꓟꓵꓽ ꓔꓯ ꓣꓴ ꓟꓶ ꓡꓰ ꓗꓷꓳ= ꓬꓴ-ꓔ ꓪ ꓔꓲ ꓧꓷ-ꓫꓲ-ꓘꓷ-ꓬ ꓠꓬ ꓪꓴ-ꓢ ꓔꓯ ꓠꓲꓹ ꓠꓵˍ ꓟ ꓙꓲꓻˍ ꓟ ꓡ ꓞꓳ ꓕꓲ ꓣꓳ ꓥ ꓢꓲ ꓢꓰꓼ ꓡꓯ ꓘꓳ ꓠꓲꓹ ꓟꓽ ꓫꓵ ꓠꓬꓲ ꓬꓲ ꓪ ꓔꓬ ꓟ ꓖꓴ ꓟꓶꓸ ꓟꓵꓽ ꓔꓯ ꓟꓯꓼ ꓓꓶ ꓡꓯ ꓘꓳꓹ ꓟ ꓟꓽ ꓬꓰ ꓠꓹ ꓟ ꓐꓯ ꓖꓶˍ ꓡꓳ=

ꓖꓳ ꓡꓱ ꓢꓲ ꓪ ꓔꓲ ꓧꓷ-ꓫꓲ-ꓘꓷ-ꓬ ꓡꓰ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓟꓽ ꓬꓰ ꓠꓹ ꓟ ꓐꓱ ꓶ ꓬꓴ-ꓔ ꓢꓲꓽ ꓫꓬ ꓦꓲ ꓗꓪ ꓟ ꓫꓵꓺ ꓮ ꓟꓬꓹ ꓔꓯ ꓬ-ꓫꓵ ꓟꓯꓼ ꓜꓴ ꓔꓯ ꓖꓶ ꓗꓷꓳ= ꓬ-ꓫꓵ ꓟꓯꓼ ꓐꓴ ꓔꓯ ꓒꓵꓽ ꓡꓳ ꓮ ꓟꓬꓹ ꓖꓶ ꓔ ꓥˍ ꓟꓲ ꓬꓲ ꓪ ꓐꓴ ꓠꓬ ꓟꓽ ꓬꓲꓼ ꓙꓰ ꓙꓰ ꓡꓳ ꓒꓱ ꓔꓯ ꓗꓽ ꓚꓳꓸ ꓔ ꓡꓳ=

ꓖꓳ ꓕꓯ ꓪ ꓔꓲ ꓧꓷ-ꓫꓲ-ꓘꓷ-ꓬ ꓠꓬ ꓮ ꓡꓰ ꓬꓰ ꓠꓯꓹ ꓟ ꓟꓽ ꓢꓷꓸ ꓗꓷ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓮ ꓡꓰ ꓬꓰ ꓠꓯꓹ ꓟ ꓬꓲ-ꓢ-ꓬ ꓔꓬ ꓗꓪ ꓙꓰ ꓢꓲ ꓠ ꓠꓬꓲˍ ꓡꓳ= ꓬꓲ-ꓢ-ꓬ ꓡꓰ ꓡꓳ ꓒꓱ ꓠꓬ ꓬ-ꓫꓵ ꓡ ꓞꓳ ꓐꓴ ꓡꓯꓽ ꓒꓯꓹ ꓗꓪ ꓟꓽ ꓓꓵ ꓡꓰ ꓐꓯ ꓖꓶˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓙ ꓟꓳ ꓘꓶꓽ ꓥ ꓡꓳ=ꓬꓲ-ꓢ-ꓬ ꓡꓰ ꓪ ꓔꓲ ꓧꓷ-ꓫꓲ-ꓘꓷ-ꓬ ꓔꓯ ꓐꓯ ꓖꓶˍ ꓟ ꓔꓯ ꓬ-ꓫꓵ ꓡ ꓞꓳ ꓐꓴ ꓡꓰ ꓑ ꓙ ꓡꓰ ꓕꓯ “ꓥꓪ ꓠꓴ ꓬ-ꓫꓵ ꓡ ꓞꓳ ꓐꓴ ꓠꓬ ꓡꓳ ꓒꓱ ꓮ ꓟꓬꓹ ꓓꓶꓽ ꓧꓪꓸ ꓡꓰꓳ꓾ ꓪꓴ-ꓢ ꓮ ꓡꓰ ꓕꓲ ꓣꓳˍ ꓟꓲ ꓚꓬꓴꓸ ꓙ ꓠꓹ ꓟ ꓟꓽ ꓬꓯꓼ ꓡ ꓠꓬꓲ꓾ ꓐꓯ ꓖꓶˍ ꓡꓳ=

ꓪ ꓔꓲ ꓧꓷ-ꓫꓲ-ꓘꓷ-ꓬ ꓡꓰ ꓮ ꓘꓶꓸ ꓙꓽ ꓫꓸ ꓡꓰ ꓢꓲ ꓢꓲꓽ ꓫꓬ ꓦꓲ ꓗꓪ ꓙꓰ ꓢꓲ ꓬꓲ ꓑ ꓫꓬ ꓐꓴ ꓬꓰ ꓛꓬꓻ ꓗꓷ ꓟ ꓝꓴꓲꓸ ꓮ ꓙꓵꓽ ꓖꓼ ꓖꓶ ꓟꓶ ꓠꓹ ꓟ ꓪꓽ ꓘꓴˍ ꓡꓳ= ꓬꓲ ꓪꓽ ꓘꓴ ꓓꓳ ꓡꓰˍ ꓕꓯ ꓬꓲ-ꓢ-ꓬ ꓬꓲ ꓝꓲ ꓓꓴ ꓕꓲ ꓣꓳ ꓡꓰ ꓪ ꓔꓲ ꓔꓯ ꓡ ꓢꓲ꓾ ꓪ ꓔꓲꓸꓳ ꓕꓽ ꓙꓳꓺ ꓛꓱꓽ= ꓪꓴ-ꓢ ꓡꓰ ꓠꓴ ꓪ ꓘꓴ ꓘꓶꓽ ꓔꓯ ꓑ ꓙˍ ꓠꓬꓲ ꓙꓱ-ꓣꓴ-ꓢ-ꓡꓱ ꓠꓬ ꓟꓽ ꓐꓬ ꓡꓰ꓾ ꓐꓯ ꓖꓶˍ ꓡꓳ= ꓖꓳ ꓕꓲ ꓢ ꓘꓪ ꓕꓯ ꓬ-ꓫꓵ ꓟꓯꓼ ꓬꓲ ꓔꓴ ꓣꓳ ꓛꓲ ꓠꓬ ꓠꓻ ꓢꓲ ꓫꓵꓻ ꓳ꓾ ꓖꓳ ꓡꓱ ꓠꓬꓲ ꓬꓲ ꓪ ꓐꓴ ꓠꓬ ꓬꓲ ꓪ ꓚꓲ ꓛꓬ ꓟꓵꓽ ꓗꓪ ꓬꓲꓼ ꓙꓰ ꓗꓷꓳ= ꓬꓴ-ꓔ ꓟꓵꓽ ꓗꓪ ꓮ ꓕꓯ ꓟꓲ ꓟꓽ ꓡꓺꓳ=

ꓕꓲ ꓠꓬꓲ ꓙꓳˍ ꓕꓯ ꓬꓲ-ꓢ-ꓬ ꓠꓬ ꓙꓱ-ꓣꓴ-ꓢ-ꓡꓱ ꓢꓲ ꓫꓬ ꓦꓲ ꓗꓪ ꓪꓽ ꓘꓴ ꓔꓬ ꓕꓯ ꓪꓴ-ꓢ ꓡꓰ ꓬꓲ ꓔꓯ ꓦꓻ ꓐꓬꓱꓽ ꓕꓲ ꓟ ꓟꓳꓸ ꓖꓶ ꓡˍ ꓡꓳ= ꓪ ꓔꓲ ꓪꓴ-ꓢꓲ-ꓬ ꓫꓵꓻˍ ꓕꓲ ꓘꓳꓼ ꓗꓪ ꓢꓲꓺ ꓒ ꓠꓬ ꓮ ꓟꓴꓹ ꓟꓴ ꓟꓬꓱ ꓓꓳ ꓙꓳˍ ꓟ ꓙꓵꓽ ꓠꓬꓲ ꓕꓲ ꓗꓪ ꓠꓬꓲꓸ ꓠꓸ ꓔꓬˍ ꓟ ꓔꓯ ꓬꓲ ꓟꓳˍ ꓡꓳ= ꓬꓲ ꓐꓵ ꓞꓶ ꓐ ꓢ ꓟꓶꓽ ꓠꓬ ꓢꓲ ꓫꓬ ꓦꓲ ꓓꓽ ꓟ ꓗꓪ ꓐꓲ ꓡꓰˍ ꓡꓳ= Seraphim ꓢꓲ-ꓡ-ꓩꓴ ꓐꓴ ꓠꓬ ꓪꓴ-ꓢ ꓟꓲ ꓙꓬꓼ ꓗꓪ ꓦꓰꓼ ꓞꓹ ꓔꓬ ꓡꓳ= ꓬꓲ ꓪ ꓮ ꓡꓰ ꓕꓲ ꓣꓳˍ ꓟꓲ ꓓꓴ ꓡꓯ ꓛꓳꓼ ꓐꓽ ꓙꓳ ꓢꓲ꓾ ꓓꓴ ꓡꓯ ꓠꓬꓲꓽ ꓐꓽ ꓠꓬ ꓛꓲ ꓒꓯꓹ ꓔꓯ ꓑꓲꓸ ꓔ ꓢꓲ ꓠꓬ ꓝꓮꓲ ꓠꓬꓲꓽ ꓐꓽ ꓠꓬ ꓬꓲ ꓪ ꓖꓳ ꓓꓱꓽ ꓗꓪ ꓑꓲꓸ ꓔ ꓡꓳ= ꓝꓮꓲ ꓜꓰꓻ ꓓꓹ ꓟ ꓠꓬꓲꓽ ꓐ ꓡꓰ ꓐꓬꓱꓻˍ ꓡꓳ=

ꓢꓲ-ꓡ-ꓩꓴ ꓕꓱ ꓕꓲ ꓣꓳ ꓡꓰ ꓖꓳ ꓕꓲ ꓣꓳ ꓔꓯ ꓘꓴ ꓢꓲ ꓾ ꓢꓲ ꓫꓬ꓾ ꓢꓲ ꓫꓬ꓾ ꓢꓲ ꓫꓬ꓾ ꓟꓯꓼ ꓜꓴ ꓐꓴ ꓪꓴ-ꓢ ꓠꓬ ꓢꓲ ꓫꓬˍ ꓡꓳ=ꓕꓲ ꓟꓲ ꓠꓯ ꓡꓱꓸꓼ ꓗꓪ ꓬꓲ ꓟꓬꓱ ꓓꓳꓽ ꓡꓰ ꓐꓲ ꓞˍ ꓡꓳ꓾ ꓐꓯ ꓡꓳ= ꓢꓯꓼ ꓕꓱ ꓟ ꓠꓬ ꓢꓲ ꓫꓬ ꓦꓲ ꓠꓬ ꓓꓵꓺ ꓡꓰ ꓢꓲ ꓟꓴꓽ ꓘꓴ ꓡꓰ ꓐꓲꓺ ꓞˍ ꓡꓳ=

ꓖꓳ ꓕꓯ ꓬꓲ-ꓢ-ꓬ ꓠꓬ ꓙꓽ ꓫꓸ ꓡꓰ ꓢꓲ ꓥꓪ ꓠꓽ ꓟꓽ ꓫꓬ ꓟ ꓟꓷ ꓠꓷꓹ ꓗꓴ ꓙꓲ ꓙꓳˍ ꓟ ꓡ ꓞꓳ ꓥ ꓡꓳ= ꓟꓽ ꓫꓬ ꓟ ꓟꓷ ꓠꓷꓹ ꓗꓴ ꓙꓲ ꓙꓳˍ ꓟ ꓑ ꓫꓬ ꓗꓳ ꓡꓳ ꓗꓪ ꓔꓬ ꓟ ꓪꓴꓸ ꓠꓬꓲ ꓥꓪ ꓠꓽ ꓫꓸ ꓙꓵˍ ꓥꓳ꓾ ꓥꓪ ꓔꓯ ꓮ ꓫꓵꓽ ꓥꓳ ꓡꓳ ꓓꓴ ꓟꓽ ꓙꓳ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓢꓲ-ꓡ-ꓩꓷ ꓗꓪ ꓟ ꓕꓲ ꓣꓳ ꓠꓬ ꓔꓲ ꓖꓴ ꓗꓪ ꓐꓰ ꓬꓲ ꓡꓯ ꓒꓯ ꓗꓪ ꓟꓺ ꓠꓬꓱꓹ ꓡꓰ ꓐꓬ ꓞˍ ꓟ ꓘꓴꓽ ꓟꓶꓽ ꓜꓲꓻ ꓕꓲ ꓟ ꓔꓯꓹ ꓔ ꓢꓲ ꓬꓲ-ꓢ-ꓬ ꓔꓬ ꓗꓪ ꓐꓬꓱꓻ ꓩꓴ ꓡˍ ꓡꓳ= ꓬꓲ ꓠꓬꓲ ꓘꓴꓽ ꓟꓶꓽ ꓜꓲꓻ ꓖꓳ ꓟ ꓡꓰ ꓬꓲ-ꓢ-ꓬ ꓟꓷ ꓠꓷ ꓗꓪ ꓕꓲꓺ ꓖꓶ ꓢꓲ꓾ ꓠꓬꓲ ꓠꓹ꓾ ꓕꓱ ꓟ ꓡꓰ ꓠꓴ ꓟꓷ ꓠꓷ ꓗꓪ ꓕꓲꓺ ꓗꓷꓳ= ꓖꓳ ꓡꓱ ꓢꓲ ꓠꓴ ꓟꓽ ꓙꓲ ꓟꓽ ꓜꓳ ꓟ ꓣꓴ ꓦ ꓗꓷꓳ꓾ ꓠꓴ ꓝꓴꓲˍ ꓟꓲ ꓖꓶꓽ ꓖꓶ ꓟꓶ ꓗꓷꓳ꓾ ꓐꓯ ꓡꓳ=

ꓗꓸ ꓠꓯꓸ ꓪꓴ-ꓢ ꓡꓰ ꓬꓲ-ꓢ-ꓬ ꓔꓯ ꓟꓳꓸ ꓒꓳꓹ ꓢꓲ ꓑ ꓫꓬ ꓐꓴ ꓔꓯ ꓬꓲ ꓐꓯ ꓘꓶ ꓐꓯ ꓖꓶ ꓝꓲ ꓠꓹ ꓟ ꓐꓱ ꓶ ꓬꓲ ꓔꓯ ꓟꓷ ꓠꓷꓹ ꓝ ꓢꓴ ꓐꓯ ꓢꓲ ꓢꓲꓺ ꓗꓷ ꓟ ꓔꓯ ꓐꓯ ꓖꓶ ꓗꓷꓳ=