ꓟꓷ ꓠꓷꓹ ꓝ ꓒ ꓬꓳ-ꓐꓰ

ꓮ ꓠꓱ ꓕꓯ ꓪꓴ-ꓜꓷ ꓟꓵꓽ ꓗꓪ ꓬꓳ-ꓐꓰ ꓟꓬꓱꓺ ꓔ ꓟ ꓡ ꓞꓳ ꓕꓲ ꓣꓳ ꓙꓳˍ ꓡꓳ= ꓬꓲ ꓠꓬ ꓥꓶˍ ꓟ ꓔꓯ ꓐꓰ ꓧꓹ ꓙꓰ ꓢꓲ꓾ ꓓꓰꓺ ꓖꓴ ꓟꓽ ꓙꓳ꓾ ꓝꓴꓲꓸ ꓐꓯ ꓓꓴ ꓟꓽ ꓙꓳ ꓟˍ ꓐꓰ ꓔꓱꓹˍ ꓟ ꓥ ꓢꓲ ꓠꓬꓲ꓾ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓕꓲ ꓣꓳ ꓥꓳ= ꓬꓲ ꓔꓯ ꓮ ꓣꓳ ꓫꓵꓽ ꓔꓴ꓾ ꓡꓳꓽ ꓕꓳ ꓢ ꓔꓴ꓾ ꓮ ꓠꓬꓲꓽ ꓑ ꓥꓪꓽ ꓦꓬ ꓜꓱꓻ꓾ ꓕꓳ ꓡ ꓟꓴ ꓟꓺ ꓥꓪꓽ ꓦꓬˍ ꓐꓰ ꓚꓳ ꓑ ꓚꓳ ꓟ ꓮ ꓟꓬꓹ ꓙꓳˍ ꓡꓳ= ꓝꓮꓲ ꓤ ꓠꓱ ꓞꓲ ꓫꓵꓸ ꓙꓳˍ ꓡꓳ= ꓬꓲ ꓠꓬ ꓐꓶ ꓓꓳ ꓟꓵꓽ ꓢꓴ ꓐꓴ ꓗꓳ ꓡꓳ ꓗꓪ ꓮ ꓓꓲ ꓪꓴꓽˍ ꓟ ꓞꓳ ꓐꓳ ꓕꓲ ꓣꓳ ꓥ ꓡꓳ= ꓬꓲ ꓤꓶꓻ ꓗꓪ ꓠꓬ ꓮ ꓫꓵꓽˍ ꓟꓲ ꓢ ꓢˍ ꓟꓶ ꓔꓬ ꓟ ꓔꓯ ꓢ-ꓓꓯ ꓡꓳꓸ ꓓꓳ ꓡꓹ ꓡꓳ=

ꓖꓳ ꓡꓱ ꓠꓬꓲ ꓢ-ꓓꓯ ꓠꓬ ꓬꓳ-ꓐꓰ ꓔꓯ ꓟꓳꓸ ꓪꓴ-ꓢ ꓔꓯ ꓱꓽ ꓠꓱꓽ ꓢꓲ꓾ ꓪꓴ-ꓢ ꓠꓴ ꓡꓰ ꓬꓳ-ꓐꓰ ꓔꓯ ꓶꓼ ꓤ ꓫꓱꓹ ꓤ ꓮ ꓟꓬꓹ ꓖꓶꓽ ꓔ ꓟ ꓑꓶꓸ ꓓꓴ ꓡꓰꓽ ꓬꓲ ꓠꓴ ꓔꓯ ꓣꓱꓽ ꓙ ꓔꓬ ꓟ ꓥ ꓡꓳ= ꓠꓴ ꓡꓰ ꓬꓲ ꓔꓯ ꓖꓶꓽ ꓔ ꓟ ꓮꓽ ꓙꓵꓽ ꓣꓴ ꓦ ꓗꓷ ꓠꓬ ꓬꓲ ꓠꓴ ꓔꓯ ꓙꓱꓽ ꓡˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓢ-ꓓꓯ ꓔꓯ ꓬꓲꓸ ꓮ ꓡꓰ ꓠꓲꓹ ꓫꓵˍ ꓠꓬ ꓮ ꓡꓰ ꓬꓰ ꓝꓲˍ ꓡꓳ= ꓖꓳ ꓡꓱ ꓥˍ ꓟꓲ ꓬꓳ-ꓐꓰ ꓔꓯ ꓮ ꓡꓰ ꓟꓽ ꓗꓷ ꓡꓰ ꓝꓲ ꓠꓹ ꓟ ꓙꓳꓺ ꓗꓽ ꓖꓶˍ ꓡꓳ= ꓖꓳ ꓕꓯ ꓢ-ꓓꓯ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓳ-ꓐꓰ ꓪꓴ-ꓢ ꓔꓯ ꓧꓹ ꓙꓰ ꓝꓲ ꓠꓹ ꓟ ꓚꓱꓹ ꓧꓪˍ ꓡꓳ=

ꓕꓲ ꓠꓬꓲ ꓙꓳˍ ꓠꓬ ꓬꓳ-ꓐꓰ ꓬꓲ ꓤ ꓬꓲ ꓮ ꓟꓲꓽ ꓐꓴ ꓠꓬ ꓬꓲ ꓪ ꓮ ꓬꓲꓼ ꓦꓲ ꓗꓪ ꓜ ꓜ ꓙꓵꓻ ꓓꓳ ꓙꓰ ꓔꓬ ꓡꓳ= ꓓꓳꓽ ꓦ ꓢꓴ ꓕꓲ ꓣꓳ ꓡꓰ ꓡ ꓢꓲ ꓬꓳ-ꓐꓰ ꓔꓯ꓾ ꓮꓸ ꓠꓬꓲ ꓦꓻ ꓟꓲ ꓟꓽ ꓔꓬ ꓕꓯ꓾ ꓕꓳꓽ ꓡ ꓟꓴˍ ꓟꓲ ꓒ ꓕꓲꓸꓼ ꓗꓪ ꓫꓵꓸ ꓖ ꓜ ꓔꓬ ꓕꓯ ꓫꓵ-ꓐ ꓡ ꓞꓳ ꓔꓷꓹ ꓩꓴ ꓡ ꓢꓲ꓾ ꓙꓱꓽ ꓤ ꓦꓴ ꓔꓯꓹ ꓙꓰˍ ꓡꓳ= ꓚꓳ ꓑ ꓐꓴ ꓔꓯˍ ꓟꓲ ꓢꓰꓼ ꓗꓷꓳ= ꓠꓴ ꓔꓯ ꓐꓯ ꓖꓶ ꓡ ꓠꓹ ꓟ ꓥꓪ ꓕꓲ ꓣꓳˍ ꓡꓰꓽ ꓡꓲꓹ ꓗꓷˍ ꓡꓳ꓾ ꓐꓯˍ ꓡꓳ=

ꓬꓲ ꓫ ꓕꓱ ꓔꓬ ꓢꓰ ꓕꓯ꓾ ꓠꓱꓸ ꓐꓯ ꓚꓳ ꓑ ꓕꓲ ꓣꓳ ꓬꓲ ꓔꓯ ꓔꓷꓹ ꓡ ꓢꓲ꓾ ꓮꓸ ꓔꓳꓸ ꓓꓽ ꓟ ꓠꓬ ꓟꓴꓽ ꓗꓪ ꓗꓪ ꓐꓰ ꓞꓰꓻ ꓬꓯꓼ ꓡ ꓢꓲ꓾ ꓮ ꓣꓳ ꓜꓴˍ ꓐꓰ ꓚꓳ ꓑ ꓐꓴ ꓔꓯ ꓛꓴꓻ ꓖꓴ ꓡꓰꓳ= ꓠꓴ ꓔꓯ ꓐꓯ ꓖꓶ ꓡ ꓠꓹ ꓟ ꓥꓪ ꓕꓲ ꓣꓳˍ ꓡꓰ ꓡꓲꓹ ꓗꓷˍ ꓡꓳ꓾ ꓐꓯˍ ꓡꓳ=

ꓬꓲ ꓫ ꓕꓱ ꓔꓬ ꓢꓰ ꓕꓯ꓾ ꓠꓱꓸ ꓐꓱꓼ ꓚꓳ ꓑ ꓕꓲ ꓣꓳ ꓡꓰ ꓡ ꓢꓲ꓾ ꓚꓬ-ꓡꓷ-ꓔꓲ ꓡ ꓞꓳ ꓐꓴ ꓡꓰ ꓡꓳꓽ ꓕꓳ ꓔꓯ ꓦꓴ ꓔꓯꓹ ꓙꓰ ꓢꓲ ꓚꓳ ꓑ ꓐꓴ ꓔꓯ ꓢꓰꓼ ꓗꓷꓳ꓾ ꓐꓰ ꓐꓯˍ ꓡꓳ= ꓖꓳ ꓡꓱ ꓫꓸ ꓕꓱ ꓔꓬ ꓕꓯ ꓝꓮꓲ ꓠꓱꓸ ꓐꓯꓼ ꓕꓲ ꓣꓳ ꓡꓰ ꓡ ꓢꓲ꓾ ꓠꓴ ꓤ ꓠꓴ ꓮ ꓟꓲꓽ ꓐꓴ ꓠꓬ꓾ ꓬꓲ ꓪ ꓮ ꓬꓲꓼ ꓦꓲ ꓗꓪ ꓜ ꓜꓽ ꓙꓵꓻ ꓓꓳ ꓔꓬ ꓕꓯ꓾ ꓟꓲ ꓦꓲ ꓓꓽ ꓟ ꓠꓬ ꓡꓲ ꓛꓲ ꓗꓪ ꓐꓰ ꓙꓱꓼ ꓡ ꓢꓲ꓾ ꓦꓲ ꓗꓪ ꓙꓱꓼ ꓬꓯꓼ ꓗꓷ ꓢꓲ ꓠꓬꓲ꓾ ꓦꓲ ꓠꓬ ꓬꓲ ꓪ ꓐꓴ ꓔꓯ ꓔꓲꓸ ꓗꓷ ꓢꓲ꓾ ꓬꓲ ꓪ ꓮꓽ ꓙꓵꓽ ꓫꓵꓻ ꓳ꓾ ꓐꓰ ꓐꓯ ꓖꓶ ꓡˍ ꓡꓳ=

ꓬꓳ-ꓐꓰ ꓬꓲ ꓔꓯ ꓙꓳˍ ꓟ ꓐꓳ ꓶˍ ꓐꓰ ꓬꓲ ꓕꓲ ꓦꓲ ꓡ ꓞꓳ ꓐꓴ ꓠꓬ ꓞꓼ ꓐꓰ ꓟꓶꓽ ꓡꓰ ꓖꓴꓳ= ꓕꓱ ꓟ ꓠꓽ ꓠꓲꓹ ꓟ ꓐꓶꓽ ꓡꓰ ꓠ ꓛꓲꓺ ꓫꓸ ꓓꓴ ꓥꓳ= ꓓꓳꓽ ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓬꓳ-ꓐꓰ ꓔꓴ ꓢꓲ ꓬꓲ ꓐꓵ ꓞꓶ ꓐꓽ ꓢ ꓚꓵꓹ ꓧꓽ ꓗꓷꓳ= ꓬꓲꓸ ꓪꓴꓸ ꓓꓵ ꓔꓯˍ ꓟꓲ ꓛꓳ ꓗꓷꓳ= ꓝꓮꓲ ꓟꓲ ꓛꓬ ꓗꓪ ꓟꓳꓼ ꓔ ꓢꓲ ꓠꓬꓲ ꓪꓴꓸ ꓓꓵ ꓕꓱꓼˍ ꓡꓳ= ꓖꓳ ꓡꓱ ꓢꓲ ꓬꓲ ꓡꓰ ꓕꓱ ꓡꓱ ꓐꓯ ꓡꓳ= ꓥꓪ ꓠꓬ ꓥꓪ ꓟꓹ ꓟ ꓤ ꓘꓶ ꓗꓪ ꓐꓰ ꓙꓬꓽ ꓡꓯꓽ ꓡꓯꓽ ꓐꓰ ꓓꓳ ꓡˍ ꓡꓳ= ꓙꓬꓽ ꓡꓯꓽ ꓡꓯꓽ ꓐꓰ ꓥꓪ ꓬꓲꓼ ꓙꓰˍ ꓢꓰ ꓥꓳ= ꓖꓶ ꓡ ꓢꓴ ꓠꓬ ꓪꓴ-ꓢ ꓥ ꓡꓳ= ꓔꓯꓹ ꓙꓰ ꓢꓴˍ ꓟꓲ ꓪꓴ-ꓢ ꓥ ꓡꓳ= ꓪꓴ-ꓢ ꓬꓲ ꓟꓬꓱꓺ ꓔꓯ ꓥꓪ ꓮ ꓕꓯˍ ꓟꓲ ꓫꓱꓸ ꓖꓶˍ ꓥꓳ꓾ ꓐꓰ ꓐꓯ ꓡꓳ=

ꓬꓳ-ꓐꓰ ꓠꓬ ꓬꓲ ꓔꓯ ꓕꓱ ꓟꓬ ꓫꓵꓽ  ꓗꓷ ꓡꓰ ꓥ ꓟꓲ ꓝꓴꓲꓸ ꓟꓽ ꓬꓰ= ꓪꓴ-ꓢ ꓔꓯˍ ꓟꓲ ꓛꓬꓻ ꓖꓴ ꓟꓽ ꓓꓰ= ꓕꓱ ꓟ ꓔꓯ ꓢ-ꓓꓯ ꓟꓳ ꓡꓰ ꓠꓬ ꓪꓴ-ꓢ ꓔꓯ ꓙꓰ ꓢꓲ꓾ ꓞꓳ ꓤ ꓠꓽ ꓬꓲ ꓙꓳˍ ꓟ ꓥ ꓕ ꓑꓳ ꓡꓰ ꓚꓲ ꓛꓬ ꓢꓯꓼ ꓟꓬ ꓐꓱ ꓶ ꓑ ꓖꓶ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓠꓬꓲ ꓬꓳ-ꓐꓰ ꓔꓯ ꓠꓻ ꓡꓰ ꓝꓲ ꓠꓹ ꓟ ꓓꓰꓽˍ ꓡꓳ= ꓖꓳ ꓡꓱ ꓢꓲ ꓪꓴ-ꓢ ꓡꓰ ꓠꓴ ꓠꓲꓹ ꓫꓵˍ ꓟ ꓡꓰ ꓬꓰ ꓖꓶ ꓛꓵˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓔꓯ ꓕꓽ ꓫꓵꓻ ꓝꓲ ꓐꓯˍ ꓡꓳ=

ꓖꓳ ꓕꓯ ꓢ-ꓓꓯ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓐꓰ ꓓꓳ ꓙꓰ ꓢꓲ꓾ ꓬꓳ-ꓐꓰ ꓔꓯ ꓛꓲ ꓗꓪꓺ ꓗꓪ ꓐꓰ ꓪꓴꓸ ꓓꓵ ꓗꓪ ꓛꓲ ꓠꓲꓹ ꓒꓳˍ ꓟ ꓠꓻ ꓛꓴꓽ ꓓꓲꓻ ꓝꓲˍ ꓡꓳ= ꓠꓻ ꓛꓴꓽ ꓠꓬ ꓮ ꓘꓶꓸ ꓠꓻ ꓢꓲ ꓠꓬꓲꓹ ꓟꓵ ꓡ ꓠꓬꓲ ꓠꓱꓸ ꓐꓰ ꓛꓱꓼ ꓕꓲꓽ ꓒꓬꓸ ꓣꓴ ꓔ ꓢꓲ ꓬꓲ ꓖꓳ ꓓꓱ ꓔꓯ ꓚꓳꓹˍ ꓡꓳ= ꓬꓲ ꓤ ꓟꓶˍ ꓟꓲ ꓬꓲ ꓔꓯ ꓮ ꓡꓰ ꓬꓰ ꓙ ꓟꓽ ꓐ ꓡ=

ꓖꓳ ꓕꓯ ꓬꓲ ꓡꓰ ꓬꓳ-ꓐꓰ ꓔꓯ ꓠꓴ ꓠꓬ ꓙꓲˍ ꓟ ꓔꓱꓹ ꓟ ꓔꓯ ꓡꓰꓽ ꓬꓰ ꓠꓹ ꓟ ꓙꓽ ꓖꓶ ꓔꓬ ꓢꓰꓽ ꓡꓺꓽ= ꓪꓴ-ꓢ ꓔꓯ ꓙꓱꓽ ꓢꓲ ꓫꓵꓻ ꓛꓵˍ ꓡꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓳ-ꓐꓰ ꓠꓬ ꓝꓴꓲꓸ ꓟꓽ ꓬꓰ ꓬꓰ ꓪꓴ-ꓢ ꓔꓯ ꓡꓰꓽ ꓪꓴꓸ ꓓꓵ ꓕꓱ ꓢꓲ ꓬꓲ ꓟꓬꓱꓺ ꓓꓳ ꓔꓯ ꓫꓱꓸ ꓖꓶˍ ꓡꓳ=

ꓬꓳ-ꓐꓰ ꓬꓲ ꓛꓳꓽ ꓒꓯꓹ ꓐꓴˍ ꓟꓲ ꓬꓲꓸ ꓔꓯ ꓔꓳꓹ ꓪꓴꓸ ꓔꓴ ꓡˍ ꓡꓳ= ꓬꓲ ꓪ ꓐꓴ ꓡꓰ ꓬꓳ-ꓐꓰ ꓠꓬ ꓖ ꓖꓶ ꓟꓽ ꓠ ꓟ ꓝꓴꓲꓸ ꓓꓽ ꓟ ꓬꓰ ꓗꓷ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓬꓲ ꓔꓯ ꓛꓬꓻ ꓒꓵꓽ ꓖꓶˍ ꓟ ꓥ ꓡꓳ꓾ ꓐꓰ ꓓꓵꓽ ꓙ ꓔꓬ ꓖꓴˍ ꓡꓳ= ꓖꓳ ꓡꓱ ꓢꓲ ꓬꓲ ꓪ ꓐꓴ ꓠꓬ ꓬꓲ ꓔꓯ ꓟꓽ ꓬꓰ ꓙ ꓙ ꓬꓲ ꓮ ꓡꓰ ꓬꓰ ꓠꓯꓹ ꓟ ꓬꓳ-ꓐꓰ ꓔꓯ ꓐꓯ ꓖꓶˍ ꓡꓳ=

ꓖꓳ ꓡꓱ ꓥˍ ꓟꓲ ꓬꓳ-ꓐꓰ ꓠꓬ ꓝꓴꓲꓸ ꓟꓽ ꓬꓰ= ꓪꓴ-ꓢ ꓔꓯ ꓡꓰꓽ ꓙꓵꓻ ꓢꓲ ꓪꓽ ꓘꓴˍ ꓡꓳ= ꓬꓳ-ꓐꓰ ꓠꓬ ꓕꓱ ꓟ ꓔꓯ ꓜꓲꓽ ꓔ ꓟꓽ ꓘꓴ ꓗꓷ ꓡ ꓔꓬ ꓡꓳ= ꓫꓵꓽ ꓪꓴ ꓕꓱ ꓟ ꓬꓲ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓒꓬꓱꓼ ꓡ ꓝꓲˍ ꓟ ꓔꓯ ꓟꓽ ꓙꓽ ꓙꓲꓼ ꓗꓷ ꓡꓰꓳ= ꓮ ꓫꓵꓽ ꓪꓴꓸ ꓠꓬꓲ ꓪꓴ-ꓢ ꓡꓰ ꓕꓱ ꓘꓶ ꓛꓲ ꓬꓲ ꓔꓯ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓝꓲˍ ꓟ ꓔꓯ ꓬꓲꓸ ꓟꓽ ꓢꓷꓸ=

ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓬꓳ-ꓐꓰ ꓔꓯ ꓫꓸ ꓕꓱ ꓡ ꓢꓲ꓾ ꓬꓲ ꓔꓯ ꓠꓴ ꓠꓬ ꓮ ꓫꓵꓽˍ ꓟꓲ ꓐ ꓡ ꓢꓴ ꓪꓴ-ꓢ ꓔꓯ ꓧꓳꓺ ꓡꓯ ꓘꓳ ꓢꓲ ꓬꓲ ꓔꓯ ꓫꓬꓹ ꓔꓱꓹˍ ꓐꓰ ꓬꓰˍ ꓡ= ꓪꓴ-ꓢ ꓡꓰ ꓬꓰˍ ꓐꓰ ꓓꓵꓽ ꓙ ꓞꓷꓹ ꓔ ꓟ ꓔꓯ ꓮ ꓟˍ ꓟꓲ ꓝꓴꓲꓸ ꓓꓰꓺ ꓟꓽ ꓐ ꓡ꓾ ꓐꓰ ꓐꓯ ꓖꓶˍ ꓡꓳ=

ꓬꓳ-ꓐꓰ ꓬꓲ ꓔꓯ ꓫ ꓓꓴ ꓮ ꓟꓬꓹ ꓙꓳ ꓡˍ ꓥ ꓟꓲ ꓪꓴ-ꓢ ꓔꓯ ꓡꓰꓽ ꓙꓵꓻˍ ꓡꓳ= ꓡꓳꓹ ꓬꓰ ꓟ ꓗꓪ ꓬꓳ-ꓐꓰ ꓠꓬ ꓬꓲ ꓠꓻ ꓛꓴꓽ ꓓꓲꓻˍ ꓟ ꓗꓪ ꓐꓰ ꓓ ꓡꓰꓳ= ꓢ-ꓓꓯ ꓠꓲꓹ ꓫꓵˍ ꓟ ꓡꓰ ꓟꓽ ꓒꓬꓱꓼ ꓡꓻꓳ= ꓬꓲ ꓠꓬ ꓮ ꓘꓶꓸ ꓫ ꓟ ꓔꓯ ꓔꓳꓹ ꓜꓳꓽˍ ꓟꓲ ꓪꓴ-ꓢ ꓔꓯ ꓝ ꓢꓲ ꓠꓲꓹ ꓠꓵˍ ꓢꓰꓽ ꓡꓳ= ꓪꓴ-ꓢˍ ꓟꓲ ꓬꓳ-ꓐꓰ ꓬꓲ ꓔꓯ ꓣꓱꓽ ꓙˍ ꓟ ꓔꓯ ꓠꓲꓹ ꓒꓴ ꓢꓲ ꓬꓳ-ꓐꓰ ꓔꓯ ꓠꓻ ꓫꓬꓹ ꓖꓶˍ ꓡꓳ=

ꓝꓮꓲ ꓬꓲ ꓒꓲꓼ ꓬꓰ ꓗꓷ ꓟ꓾ ꓬꓲ ꓔꓯˍ ꓐꓰ ꓣꓴ ꓔꓯꓹ ꓙꓰ ꓗꓷ ꓟ ꓮ ꓙꓵꓽ ꓝꓮꓲ ꓕꓲ ꓧꓪꓹ ꓖꓶˍ ꓡꓳ= ꓕꓱ ꓕꓲ ꓙꓵꓹ ꓗꓪ ꓪꓴ-ꓢ ꓡꓰ ꓬꓳ-ꓐꓰ ꓔꓯ ꓖꓶˍ ꓟ ꓶꓼ ꓤ ꓫꓱꓹ ꓤ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓮ ꓟꓬꓹ ꓖꓶˍ ꓡꓳ= ꓵꓻ ꓖꓴ ꓟꓽ ꓓ ꓠ ꓛꓲ ꓖꓶˍ ꓡꓳ= ꓬꓳ-ꓐꓰ ꓥˍ ꓟꓲ ꓪꓴ-ꓢ ꓔꓯ ꓣꓱꓽ ꓙ ꓢꓲ ꓬꓲꓸ ꓞꓲꓼ 140 ꓘꓳꓼ ꓗꓪ ꓛꓲꓺ ꓔꓬ ꓗꓷꓳ= ꓬꓳ-ꓐꓰ ꓬꓲ ꓤꓶꓻ ꓠꓬ ꓬꓲꓸ ꓪꓴꓸ ꓟ ꓢꓲꓸ ꓟꓽ ꓛꓲ ꓬꓲꓸ ꓟꓶꓽ ꓗꓪ ꓶꓼ ꓤ ꓫꓱꓸ ꓤ ꓮ ꓟꓬꓹ ꓟꓶ ꓡꓰꓳ=