ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ_ ꓟ

ꓮꓓ ꓖꓰꓠꓔꓰꓢ ( ꓟꓵꓽ ꓗꓳꓹ ꓓꓵ ꓓꓵ ꓞꓳ ꓫꓵꓽ ꓮ ꓙꓵꓽ ꓔꓬ ꓗꓪ ꓐꓯˍ ꓟ)

ꓮꓓ ꓖꓰꓠꓔꓰꓢ ꓐꓯˍ ꓟ ꓠꓬ ꓟ-ꓘꓳ(16ꓽ 16) ꓟꓵꓽ ꓗꓳꓹ ꓓꓵ ꓓꓵ ꓙꓰ ꓢꓲ ꓐꓯˍ ꓟ ꓔꓯ ꓬꓲ ꓓꓵ ꓛꓹ ꓢꓲ ꓖꓪ ꓙꓱ ꓟ ꓔꓯ ꓐꓯˍ ꓟ ꓥ ꓡꓳ= ꓮ ꓟꓶ ꓕꓲꓽ ꓞꓲꓼ ꓗꓪ ꓠꓬ ꓮꓓ ꓖꓰꓠꓔꓰꓢ ꓡꓰ ꓟꓽ ꓞꓲ ꓲꓠꓔꓰꓣ ꓖꓰꓠꓔꓰꓢ ꓐꓯˍ ꓟ ꓣꓳ ꓠꓯꓸꓼ ꓗꓪ ꓥˍ ꓟꓲ ꓢꓳ ꓡ ꓢꓲ ꓟꓸ ꓟꓲꓽ ꓚ ꓟꓸ ꓔ ꓟ ꓔꓯ ꓠ ꓠꓹ ꓠ ꓡꓳꓼ ꓥ ꓐꓯ ꓔ ꓟˍ ꓟꓲ ꓙꓳ ꓡꓳ= 1500 ꓘꓳꓼ ꓗꓪ ꓚꓳ 1960 ꓘꓳ ꓗꓪ ꓛꓲ “ꓳꓴꓔꓢꓲꓓꓰ ꓔꓧꓰ ꓚꓧꓴꓣꓚꓧ ꓔꓧꓰꓣꓰ ꓲꓢ ꓠꓳ ꓢꓮꓡꓦꓮꓔꓲꓳꓠ” ꓐꓯˍ ꓟ ꓙꓳ ꓐꓶ= ꓬꓲ ꓟꓸ ꓟꓲ ꓠꓬ ꓘ-ꓕꓳ-ꓡꓲ ꓘꓴ ꓜꓲꓽ ꓞꓳ ꓗꓪ ꓐꓰ ꓙ ꓡꓰ ꓢꓲ ꓠꓱꓸ ꓐꓯꓼ ꓘꓴ ꓜꓲꓽ ꓞꓳ ꓠꓱꓸ ꓐꓯꓼ ꓙꓵ ꓠꓲꓹ ꓗꓪ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓟꓽ ꓐꓯ ꓟꓶ  ꓐꓯˍ ꓟ ꓬꓲ ꓟꓸ ꓟꓲꓽ ꓥˍ ꓡꓳ=

1500 ꓙ ꓡꓰ ꓕꓯ ꓟꓮꓣꓔꓲꓠ ꓡꓴꓔꓧꓰꓣ ꓗꓪ ꓙꓳꓸ ꓧꓳꓽ ꓪꓴꓸ ꓢꓲ ꓘꓴ ꓜꓲꓽ ꓞꓳ ꓠꓯꓸꓼ ꓗꓪ ꓐꓰ ꓧꓹ ꓙꓰ ꓟ ꓓꓳ ꓙꓰˍ ꓟ ꓕꓱ ꓡꓰ ꓙꓳˍ ꓡꓳ=  ꓖꓳ ꓡꓰ ꓠꓬ ꓠꓱꓸ ꓐꓯꓸꓼ ꓘꓴ ꓜꓲꓽ ꓞꓳ ꓗꓪ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓟꓮ ꓙꓳ ꓐꓰ ꓐꓯ ꓪꓴꓸ ꓔꓴ ꓡ ꓟ ꓥ ꓐꓶ= ꓮ ꓡꓲꓳ ꓐꓯꓸ ꓠꓬ ꓘ-ꓕꓳ-ꓡꓲ ꓘꓴ ꓜꓲꓽ ꓞꓳ ꓕꓲꓽ ꓟ ꓡꓰꓽ ꓢꓲ ꓢꓲ-ꓒ ꓬꓰ-ꓢꓴ ꓡꓰ ꓔꓶ ꓦꓲꓹ ꓟ ꓘꓴ ꓜꓲꓽ ꓞꓳ ꓥ ꓡꓳ ꓐꓰ ꓐꓯ ꓪꓴꓸ ꓔꓴ ꓡꓹ ꓟ ꓥ ꓐꓶ= ꓮ ꓡꓲꓳꓼ ꓐꓯ ꓠꓬ ꓘ-ꓕꓳ-ꓡꓲ ꓘꓴ ꓜꓲꓽ ꓞꓳ ꓕꓲ ꓟꓹ ꓡꓰ ꓢꓲ ꓬꓰ-ꓢꓴ ꓡꓰ ꓔꓶ ꓦꓲꓹ ꓟ ꓝꓲ ꓓꓴ ꓒꓲ-ꓕꓱ ꓬꓲ ꓛꓲ ꓕꓲ ꓝꓸ ꓡꓰ ꓕꓲꓽ ꓝꓸ ꓙꓳ ꓟ ꓘꓴ ꓜꓲꓽ ꓞꓳ ꓥ ꓡꓳ= ꓖꓳ ꓟ ꓘꓴ ꓜꓲꓽ ꓞꓳ ꓗꓪ ꓚꓳ ꓡꓳꓹ ꓬꓲ ꓢꓲ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓟꓽ ꓐꓯꓹ ꓟꓶ ꓐꓰ ꓕꓱ ꓡꓰ ꓐꓯ ꓡꓳ ꓬꓲˍ ꓫꓵ ꓥ ꓭꓶ= ꓖꓳ ꓡꓰ ꓢꓲ ꓠꓬ 1965 ꓘꓳꓼ ꓙ ꓡꓰ ꓢꓲ ꓠꓬꓲ ꓧꓪꓹ ꓕꓲꓽ ꓧꓪꓹ ꓟ ꓦꓮꓔꓲꓚꓮꓠ  ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓠꓱꓸ ꓐꓯꓼ ꓘꓴ ꓜꓲꓽ ꓞꓳ ꓗꓪ ꓥˍ ꓟꓲ ꓠꓱꓸ ꓐꓯ ꓙꓵ ꓠꓲꓹ ꓗꓪ ꓥˍ ꓟꓲ ꓚꓬꓴ ꓙꓹꓟ ꓣꓱꓽ ꓛꓲ ꓙꓳꓹ ꓐꓶˍ ꓥꓳ ꓐꓰ ꓖꓪ ꓙꓱ ꓡꓳ ꓬꓰˍ ꓫꓵ ꓭꓶ=

ꓕꓱ ꓟ ꓠꓬ ꓬꓲ ꓫꓵꓼ ꓡꓳꓸ ꓟꓳˍ ꓟ ꓚꓱꓹ ꓔꓲꓽ ꓟ ꓥ ꓐꓶ= ꓙꓵ ꓠꓲꓹ ꓮꓽ ꓙꓵˍ ꓐꓰ ꓘꓴ ꓜꓲꓽ ꓞꓳ ꓮꓼ ꓙꓵꓽ ꓠꓯꓸꓼ ꓗꓪ ꓪꓴ-ꓢ ꓐꓯ ꓘꓶꓽ ꓐꓯ ꓟ ꓬꓲ ꓫꓵꓸ ꓠꓬ ꓙꓳ ꓔꓬ ꓡꓳ= ꓠꓱꓸ ꓐꓯꓽ ꓙꓵ ꓠꓲꓹ ꓥˍ ꓟꓲ ꓓꓱꓹ ꓚꓲˍ ꓟ ꓪꓴ-ꓢ ꓔꓯ ꓧꓪ ꓟꓶ ꓠꓹ ꓟ ꓐꓱ ꓶꓽ ꓟꓸ ꓖꓶꓽ ꓔꓬ ꓡꓳ= ꓕꓱ ꓟ ꓠꓬ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓪꓴꓸ ꓔꓴ ꓢꓲ ꓬꓲ ꓫꓵꓼ ꓟꓳ ꓡꓹ ꓟ ꓚꓱꓹ ꓕꓲꓽ ꓟ ꓥ ꓡꓳ= ꓕꓱ ꓟ ꓠꓬ ꓠꓱꓸ ꓐꓯꓼ ꓘꓴ ꓜꓲꓼ ꓞꓳ ꓐꓰ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓠꓹ ꓟ ꓕꓽ ꓡꓯꓽ ꓘꓳ ꓠꓹ ꓟ ꓫꓸ ꓕꓱ ꓡꓯꓽ ꓘꓳ ꓠꓹ ꓟ ꓢꓷꓸ ꓙ ꓟꓳ ꓙ ꓡꓯꓼ ꓘꓳ ꓠꓹ ꓟ ꓗꓸ ꓘꓶꓽ ꓒꓴ ꓩꓴ ꓡꓹ ꓟ ꓚꓱꓹ ꓥ ꓡꓳ= ꓕꓱ ꓟ ꓠꓬ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓚꓱꓹ ꓔꓯ ꓟꓳꓻ ꓟꓬ ꓠꓬꓲ ꓐꓶꓹ ꓠꓬꓲ ꓮꓽ ꓟꓬꓹ ꓪꓴꓽ ꓠ ꓮꓽ ꓟꓬꓸ ꓧꓱ ꓠ ꓟꓳˍ ꓟ ꓚꓱꓹ ꓥ ꓡꓳ= ꓚꓵꓸ ꓛꓬ ꓔꓯˍ ꓡꓰꓽ ꓢꓲ ꓙꓲˍ ꓟ ꓓꓵꓽ ꓙꓽ ꓢꓲ ꓢꓳ ꓔꓯ ꓠꓬ ꓟꓮ ꓙꓲ_ ꓟ  ꓢꓪꓼ ꓟ ꓗꓪ ꓐꓰ ꓮꓽ ꓙꓵꓽ ꓔꓯ ꓘꓳꓹ ꓣꓳ ꓐ ꓡꓹ ꓟ ꓮꓽ ꓙꓵꓽ ꓔꓯ ꓗꓸ ꓘꓶꓽ ꓒꓴꓸ ꓖꓶˍ ꓟ ꓕꓱ ꓡꓰ ꓫꓵꓽ ꓠꓲꓹ ꓟ ꓗꓪ ꓐꓰ  ꓬꓰ ꓡ ꓟ ꓥ ꓡꓳ=

ꓖꓪ ꓙꓱ ꓜꓲꓼ ꓓꓴ ꓗꓪ ꓚꓳ ꓟꓸ ꓖꓶ ꓡ ꓟ ꓠꓬ꓾ ꓟꓽ ꓪꓽ ꓡꓯꓽ ꓟꓽ ꓫꓱꓹ ꓡꓯꓽ ꓘꓳˍ ꓟ ꓡꓲ-ꓒꓲꓼ ꓕꓲꓽ ꓤꓶ ꓡꓰ ꓕꓲꓽ ꓤꓶ ꓕꓲꓽ ꓝꓸ ꓡꓰ ꓕꓲꓽ ꓝꓸ ꓫꓶ ꓡꓹ ꓟ ꓛꓳ ꓚꓱꓹ ꓐꓰ ꓙꓵ ꓠꓲꓹ ꓠꓯꓸꓼ ꓗꓪ ꓪꓴ-ꓢ ꓚꓬꓴ ꓙꓹ ꓟ ꓥ ꓐꓯˍ ꓟ ꓔꓯ ꓡꓬꓽ ꓡꓬꓹ ꓟꓳˍ ꓟ ꓚꓱꓹ ꓥˍ ꓡꓳ= ꓖꓳ ꓡꓱ ꓥ- ꓟꓲ ꓠꓯꓸ ꓐꓯꓼ ꓙꓵ ꓠꓲꓹ ꓠꓯꓸꓼ ꓗꓪ ꓠꓱꓸ ꓐꓯꓹ ꓡꓲꓽ ꓒꓲꓼ ꓠꓯꓸꓼ ꓗꓪ ꓕꓲꓽ ꓤꓶ ꓡꓰ ꓕꓲꓽ ꓤꓶ ꓫꓶꓸ ꓡꓹ ꓟ ꓠꓯꓸꓼ ꓗꓪ ꓚꓵ ꓛꓵꓺ ꓙꓳ ꓥꓺ ꓠ  ꓐꓰ ꓕꓱ ꓡꓰ ꓟꓸ ꓖꓶ ꓟ ꓠꓽ ꓟ ꓥ= ꓙꓳˍ ꓐꓶꓼ ꓥꓳꓻ ꓐꓯ ꓟ ꓥ ꓡꓳ= ꓚꓬꓴ ꓙꓹ ꓟ ꓣꓱꓽ ꓛꓲꓽ ꓐꓯꓹ ꓟꓶ ꓠꓹ ꓟ ꓠꓬ ꓬꓰ-ꓢꓴ ꓥˍ ꓟꓲ ꓣꓱꓽ ꓟꓽ ꓬꓯꓼ ꓘꓴ ꓜꓲ ꓼ ꓞꓳ ꓥˍ ꓟꓲ ꓣꓱ ꓟ ꓛꓲ ꓐꓯ ꓟ ꓟꓽ ꓥ= ꓠꓱꓸ ꓐꓯꓹ ꓙꓵ ꓠꓲꓹ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓲ ꓙꓳ ꓕꓯꓽ ꓢꓶꓸ ꓙꓳˍ ꓐꓶꓼ ꓥꓳ ꓐꓯˍ ꓟ ꓥ ꓡꓳ= ꓚꓬꓴ ꓙꓹ ꓟ ꓣꓱꓽ ꓛꓲꓽ ꓙꓳ ꓥ ꓐꓯ ꓟ ꓠꓬ ꓒꓵꓽ ꓗꓹ ꓬꓲ ꓟ ꓥ ꓡꓳ=