ꓠꓲ-ꓠꓲ-ꓪꓱ ꓡꓳ ꓒꓱ

ꓠꓲ-ꓠꓲ-ꓪꓱ ꓡꓳ ꓒꓱ ꓠꓬ ꓠꓬꓲꓸ ꓠꓬꓲ ꓟ Iraq ꓗꓴꓷꓼ ꓖꓴ ꓪꓴꓸ ꓗꓪ ꓟ Mosul ꓕꓲ ꓛꓱꓽ ꓗꓪ ꓓꓹ ꓟ ꓥ ꓢꓲ꓾ Mesopotamia ꓟꓵꓽ ꓕꓯꓽ ꓢꓲ ꓕꓲ ꓔꓳ ꓗꓪ ꓟ Assyrian ꓡꓳ ꓒꓱ ꓕꓲ ꓟ ꓥ ꓡꓳ=ꓡꓳ ꓒꓱ ꓠꓬ Tigris ꓬꓲꓻ ꓟ ꓐꓶꓻ ꓓꓳ ꓗꓪ ꓙꓳˍ ꓟ ꓥ ꓢꓲ꓾ Neo-Assyrian Empire ꓡꓳ ꓒꓱ ꓓꓽ ꓟ ꓐꓰ꓾ ꓟꓲ ꓠꓯ ꓕꓯꓽ ꓢꓲ ꓗꓪ ꓟꓽ ꓓ ꓪꓴꓽ ꓓꓰ ꓡꓰ ꓟ ꓡꓳ ꓒꓱ ꓥ ꓡꓳ=

ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ꓾ Tigris ꓐꓰ ꓟꓬꓱ ꓔ ꓟ ꓬꓲꓻ ꓟ ꓐꓶꓻ ꓓꓳ ꓗꓪ ꓓꓹ ꓟ Mosul ꓡꓳ ꓒꓱ ꓢꓴ ꓐꓴ ꓔꓲꓽ ꓐꓶꓽ ꓟꓽ ꓛꓲꓺ ꓘꓳꓹ ꓣꓴ ꓔ ꓟ ꓟꓬꓱꓺ ꓥ ꓟ ꓡꓰ ꓟꓽ ꓛꓲ꓾ ꓠꓲ-ꓠꓲ-ꓪꓱ ꓗꓴꓷꓼ ꓢꓲꓽ ꓒꓽ ꓟꓬꓱ ꓥˍ ꓟꓲ ꓕꓱꓻ ꓟ ꓔꓯ ꓖꓴ ꓢꓲ ꓟꓬꓱ ꓔ ꓟ ꓥ ꓡꓳ= ꓡꓳ ꓒꓱ ꓗꓪ ꓠꓬ ꓗꓴꓷꓼ ꓙꓵꓽ ꓚꓱꓹ ꓐꓱ ꓶ ꓔꓬ ꓔꓶꓸ ꓟꓽ ꓙꓳ ꓐꓯˍ ꓥˍ ꓟꓲ꓾ ꓮ ꓠꓱ ꓕꓯ ꓔꓲꓺ ꓒ ꓐꓴ ꓔꓬ ꓔꓶꓸ ꓕꓲꓽ ꓟ ꓒꓬꓱꓼ ꓗꓷꓳ=

ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓾ Nimrod ꓫꓬ ꓜꓶ ꓔ ꓟ ꓠꓲ-ꓠꓲ-ꓪꓱ ꓡꓳ ꓒꓱ ꓠꓬ Assyria ꓡꓳ ꓒꓱ ꓓꓽ ꓟ ꓥ ꓡꓳ= (ꓬꓲꓸ ꓚꓰ ꓬꓲꓸ ꓪꓴ 10ꓽ10) Assyrian ꓪ ꓔꓲ ꓐꓴ ꓐꓰ Sennacherib ꓐꓴ ꓓꓶꓽ ꓡꓯ ꓘꓳ ꓢꓲ꓾ ꓟꓵꓽ ꓔꓯ ꓫꓬꓹ ꓪꓴꓽ ꓗꓷꓳ= ꓠꓲ-ꓠꓲ-ꓪꓱ ꓙꓵꓽˍ ꓟ ꓠꓯꓸ ꓘꓪ ꓗꓪ ꓟ ꓐ-ꓐꓲ-ꓡꓶ꓾ ꓟꓲ-ꓓꓲ ꓾ ꓜꓷ-ꓓꓳ-ꓘꓷ-ꓬ ꓾ ꓒꓽ-ꓫ ꓾ Scythians꓾ Cimmerians ꓞꓳ ꓫꓵꓽ ꓐꓴ ꓗꓪ ꓐꓰ ꓒꓳꓹ ꓔꓳ ꓔꓴ ꓡꓹ ꓟ꓾ Assyria ꓓꓶꓽ ꓡꓯ ꓘꓳ ꓗꓷ ꓟ BC 612 ꓘꓳꓼ ꓗꓪ ꓛꓲꓺ ꓡꓳ ꓒꓱ ꓠꓬ ꓟꓲ ꓠꓯ ꓗꓪ ꓟꓽ ꓓ ꓪꓴꓽ ꓓꓰˍ ꓟ ꓡꓳ ꓒꓱ ꓒꓬꓱꓼ ꓡ ꓗꓷꓳ=

ꓖꓳ ꓡꓱ ꓟꓯꓼ ꓓꓶꓽ ꓡꓯ ꓘꓳ ꓢꓲ ꓬꓲꓸ ꓘꓳꓼ 600 ꓘꓳꓼ ꓟꓽ ꓛꓲꓺ ꓙꓵꓽ ꓗꓷ ꓗꓸ ꓠꓯꓸ ꓾ ꓟꓽ ꓓ ꓪꓴꓽ ꓓꓰˍ ꓟ ꓡꓳ ꓒꓱ ꓠꓬ ꓾ ꓬꓲꓼ ꓟꓬ ꓘꓳꓹ ꓟ ꓡꓰ ꓐꓰ ꓟꓶꓽ ꓬꓰ ꓒꓲꓼ ꓬꓰꓳ ( ꓠꓰ-ꓬꓴ-ꓟꓷ 2ꓽ6-11)= ꓕꓰ ꓡꓱ ꓐꓬ ꓡꓰ ꓟꓶꓽ ꓡꓰˍ ꓟ ꓠꓬ ꓓꓵꓽ ꓙ ꓮ’ ꓡꓰ ꓓꓴ ꓕꓲꓽ ꓫꓵꓽ ꓥꓳ=

Assyria ꓪꓺ ꓔꓲ ꓟꓽ ꓔꓱꓹ ꓟꓽ ꓜꓳꓽ ꓬꓰˍ ꓟ ꓪꓴꓸ ꓠꓬꓲ꓾ ꓪꓴ-ꓢ ꓡꓰ ꓐꓯ ꓟꓴ ꓘꓶꓽˍ ꓟ ꓥ ꓡꓳ=(ꓬꓲ-ꓢ-ꓬ 10ꓽ5-9)= ꓟꓷꓽ ꓠꓷꓹ ꓝꓸ ꓔ ꓟ ꓐꓲꓻ ꓡꓰ ꓠꓹ ꓟ ꓪꓴ-ꓢ ꓠꓬ꓾ ꓕꓱ ꓟ ꓮ ꓙꓵꓽ ꓔꓯ ꓬꓰ ꓗꓷ ꓢꓲ꓾ ꓡꓳ ꓒꓱ ꓠꓬ ꓙꓬ ꓓꓷꓼ ꓓꓷꓼ ꓗꓷ ꓡꓰꓳ=

ꓐꓬ ꓡꓰ ꓟ ꓠꓲ-ꓠꓲ-ꓪꓰ ꓡꓳ ꓒꓱ ꓐꓰꓽ ꓠꓬ Iraq ꓗꓴꓷꓼ ꓘꓴꓽ ꓗꓪ ꓟ ꓠꓲ-ꓠꓲ-ꓪꓱ ꓟꓵꓽ ꓠꓬꓲꓸ ꓠꓬꓲ ꓟ ꓡꓳ ꓒꓱ ꓓꓽ ꓟ Mosul ꓕꓲꓽ ꓛꓱꓽ ꓗꓪ ꓓꓹ ꓡꓳ= ꓐꓬ ꓡꓰ ꓟ ꓠꓲ-ꓠꓲ-ꓪꓱ ꓡꓳ ꓒꓱ ꓐꓰꓽ ꓗꓪ ꓐꓬ ꓡꓰ ꓐꓱꓽ ꓡꓰ ꓟ ꓡꓳ ꓒꓱ ꓚꓬꓹ ꓠꓬꓲꓽ ꓟ ꓙꓳˍ ꓡꓳ= ꓖꓳ ꓟ ꓘꓴꓽ ꓗꓪ Kuyunjiq ꓐꓰ Nabi Yunus ꓐꓯˍ ꓟ ꓦꓲꓻ ꓐꓰꓽ ꓠꓬꓲꓽ ꓟ ꓙꓳˍ ꓡꓳ= ꓦꓲꓻ ꓐꓰꓽ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓟꓳ ꓪ ꓓꓹ ꓟ ꓠꓲ-ꓠꓲ-ꓪꓱ ꓡꓳ ꓒꓱ ꓢꓴ ꓐꓴ ꓒꓳꓹ ꓡꓰꓼ ꓡ ꓠꓹ ꓟ ꓐꓱ ꓶ ꓟꓷꓽ ꓠꓷꓹ ꓝ ꓗꓷ ꓟ ꓟꓷꓽ ꓠꓷꓹ ꓝꓸ ꓒ ꓬꓳ-ꓠ ꓣꓱꓽ ꓗꓷ ꓟ ꓪꓽ ꓘꓴ ꓦꓲꓻ ꓥ ꓡꓳ=

ꓮ ꓠꓱ ꓕꓯ ꓑꓵꓹ ꓔ ꓟ ꓐꓬꓱꓽ ꓐꓰ ꓠꓱꓸ ꓐꓯꓼ ꓣꓱꓽ ꓫꓵꓽ ꓣꓱꓽ ꓙꓰ ꓐꓴ ꓔꓯ ꓖꓳ ꓗꓪ ꓐꓰ ꓟꓰꓹ ꓓꓳ꓾ ꓓꓵꓽ ꓓꓳ ꓡˍ ꓟ ꓥ ꓢꓲ꓾ ꓮ ꓟꓶ ꓟꓵꓽ ꓗꓳꓹ ꓓꓵꓺ ꓓꓵꓺ ꓮ ꓠꓱ ꓟ ꓣꓱꓽ ꓫꓵꓽ ꓣꓱꓽ ꓙꓰꓽ ꓔꓯ ꓟꓳꓸ ꓖꓶ ꓖꓴ (Museum) ꓗꓪ ꓗꓶ ꓔ ꓡꓳ= 2014 ꓘꓳꓼ ꓗꓪ ꓐꓰ 2017 ꓘꓳꓼ ꓘꓴꓽ ꓗꓪ ꓠꓬ Islam ꓟꓵꓽ Iraq ꓐꓰ Levant ꓐꓴ ꓠꓬ ꓖꓳ ꓗꓪ ꓙꓳˍ ꓟ ꓦꓲꓻ ꓮ ꓙꓵꓽ ꓔꓯ bulldozer ꓐꓰ ꓓꓵꓽ ꓐ ꓗꓷ ꓢꓲ꓾ ꓮ ꓘꓶꓸ ꓠꓯˍ ꓟ ꓟꓯꓼ ꓑꓬ ꓖꓴ ꓭ ꓘꓴ 11 ꓟ ꓓꓵꓽ ꓗꓷꓳ=  Iraqi ꓟꓯꓼ ꓜꓴꓻ ꓐꓴ ꓠꓬ꓾ 2017 ꓘꓳꓼ 1 ꓦ ꓕꓯ ꓖꓳ ꓟ ꓔꓯ ꓓꓶꓽ ꓧꓪꓸ ꓡꓰꓳ=

ꓠꓰ-ꓬꓴ-ꓟꓷ ꓐꓰ ꓬꓳ-ꓠ ꓢꓲꓽ ꓫꓬ ꓕꓳ ꓶ ꓗꓪ ꓠꓲ-ꓠꓲ-ꓪꓱ ꓡꓳ ꓒꓱ ꓟꓬꓱ ꓔꓯ ꓮ ꓟꓬꓹ ꓟꓳ ꓪ ꓓꓹ ꓡꓳ= ꓕꓳꓽ ꓶ ꓗꓪ  ꓠꓬ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓰꓽ ꓛꓳˍ ꓟ ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓐꓰ ꓥꓪꓸ ꓓꓽ ꓟ ꓟꓸ ꓟꓲꓽ ꓡꓰꓽ ꓟꓽ ꓛꓲꓺ ꓠꓱꓸ ꓐꓯꓼ ꓟꓲ ꓮ ꓟꓬꓹ ꓐꓻˍ ꓡꓳ=

ꓗꓴꓷꓼ ꓔꓯ ꓛꓳꓸ ꓡꓰ ꓢꓴ ꓕꓲ ꓣꓳˍ ꓡꓰ ꓐꓰ ꓬꓳ-ꓠ ꓔꓯ ꓐꓯ ꓔ ꓟ꓾ ꓕꓳꓽ ꓶ ꓐꓴ ꓢꓴ ꓐꓳ ꓔ ꓟ ꓔꓯ ꓡꓳꓸ ꓠꓬꓲ ꓗꓷ ꓠꓬ꓾ ꓠꓲ-ꓠꓲ-ꓪꓱ ꓠꓬ ꓬꓲꓸ ꓪꓴꓸ ꓕꓯ Assyrian ꓔꓯ ꓒꓳꓹ ꓔꓳꓹ ꓗꓷꓳ= ꓖꓳ ꓡꓱ ꓥˍ ꓟꓲ ꓠꓲ-ꓠꓲ-ꓪꓱ ꓡꓳ ꓒꓱ ꓕꓯ ꓢꓲ ꓗꓪ ꓪꓴ-ꓢ ꓬꓲ ꓠꓵ ꓠꓲꓹ ꓙꓳˍ ꓟ ꓔꓯ ꓢꓷꓸ ꓡ ꓕꓯ꓾ Assyrian ꓐꓴ ꓡꓰ ꓚꓳ ꓑꓸ ꓬꓰ ꓔ ꓟ ꓞꓳ ꓫꓵꓽ ꓐꓴ ꓐꓰ꓾ ꓚꓲꓸ ꓛꓬ ꓠꓲ-ꓠꓲ-ꓪꓱ ꓞꓳ ꓫꓵꓽ ꓐꓴ ꓔꓯˍ ꓟꓲ ꓒꓳꓹ ꓔꓳꓹ ꓢꓲ꓾ ꓟꓯꓼ ꓓꓶꓽ ꓡꓯ ꓘꓳꓹ ꓟˍ ꓟꓲ ꓬꓰ ꓗꓷꓳ=

ꓠꓲ-ꓠꓲ-ꓪꓱ ꓡꓳ ꓒꓱ ꓔꓯ ꓬꓲꓸ ꓚꓰ ꓬꓲꓸ ꓪꓴ ꓕꓳ ꓶ 10ꓽ ꓗꓪ ꓓꓽ ꓪꓴꓸ ꓟꓳꓸ ꓖꓶ ꓔ ꓡꓳ= ꓘꓵ-ꓫꓵꓽ ꓬꓲꓸ ꓤ ꓠꓲ-ꓟꓷ-ꓣꓳ ꓠꓬ ꓟꓲ ꓠꓯ ꓕꓯ ꓢꓲ ꓗꓪ ꓓꓻ ꓒ ꓥ ꓡꓳ= ꓬꓲꓸ ꓠꓬ ꓪꓴ-ꓢ ꓟꓲꓽ ꓙꓬꓼ ꓗꓪˍ ꓟꓲ ꓪꓽ ꓠꓬꓲˍ ꓟ ꓧꓪꓽ ꓢꓰꓼ ꓒ ꓥ ꓡꓳ= ꓬꓲ ꓗꓴꓷꓼ ꓪꓴꓸ ꓔꓴˍ ꓟ ꓠꓬ ꓫꓱ-ꓠ ꓟꓵꓽ ꓗꓪ ꓟ ꓐ-ꓐꓷ ꓾ ꓰ-ꓣꓱ-ꓘꓷ ꓾ ꓯ-ꓘꓷ-ꓓ ꓐꓰ ꓘꓷ-ꓡꓷ-ꓠꓴ ꓗꓪ ꓥ ꓡꓳ=

ꓖꓳ ꓗꓪ ꓐꓰ ꓬ-ꓫꓵꓽ ꓟꓵꓽ ꓗꓪ ꓓꓵꓽ ꓙꓰ ꓢꓲ꓾ ꓠꓲ-ꓠꓲ-ꓪꓱ꓾ ꓣꓱ-ꓧꓳ-ꓐꓳ-ꓣꓷ ꓾ ꓘꓷ-ꓡ-ꓧ ꓡꓳ ꓒꓱˍ ꓐꓰ ꓠꓲ-ꓠꓲ-ꓪꓱ ꓐꓰ ꓘꓷ-ꓡ-ꓧ ꓠꓬꓲꓽ ꓗꓴꓸ ꓚꓸꓼ ꓗꓪ ꓟ ꓣꓱ-ꓢꓷ-ꓠ ꓡꓳ ꓒꓱ ꓓꓽ ꓟ ꓔꓯ ꓜꓶˍ ꓡꓳ= (ꓬꓲ ꓚꓰ ꓬꓲ ꓪꓴ 10ꓽ8-12)

ꓠꓲ-ꓠꓲ-ꓪꓱ ꓡꓳ ꓒꓱ ꓠꓬ Assyrian Empire ꓪꓴꓽ ꓡ ꓟꓴ ꓡꓹ ꓟ ꓡꓳ ꓒꓱ ꓓꓽ ꓟ ꓥ ꓟ ꓐꓰ꓾ ꓞꓳ ꓤ ꓮ ꓟꓬꓹ ꓔꓬ ꓟ ꓡꓳ ꓒꓱ ꓐꓯ ꓢꓲ꓾ ꓬꓳ-ꓠ ꓦꓬꓼ ꓠꓬꓲ ꓟꓽ ꓛꓲꓺ ꓡ ꓢꓰꓽ ꓗꓪ ꓛꓲꓺ ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓝꓮꓲ ꓕꓲ ꓧꓪꓹ ꓟꓳꓸ ꓖꓶ ꓔ ꓟ ꓟꓽ ꓙꓳ= ( 2 ꓪ ꓔꓲ 19ꓽ36ꓹ ꓬꓲ-ꓢ-ꓬ 37ꓽ37)

“ꓬꓳ-ꓠ ꓠꓬ ꓪꓴ-ꓢ ꓐꓯ ꓘꓶꓽ ꓛꓳ ꓢꓲ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓙꓰˍ ꓡꓳ= ꓡꓳ ꓒꓱ ꓖꓳ ꓟ ꓠꓬ ꓮ ꓘꓶꓸ ꓪꓴꓽˍ ꓟ ꓥ ꓠꓬꓲ ꓢ ꓠꓬꓲ ꓛꓲ ꓕꓯꓽ ꓢꓲꓸ ꓡꓰꓽ ꓫꓱꓽ ꓙꓻ ꓙꓰ ꓓꓹ ꓟ ꓥ ꓡꓳ=” ( ꓬꓳ-ꓠ 3ꓽ3)

ꓖꓳ ꓕꓯ ꓪꓴ-ꓢ ꓡꓰ “ꓡꓳ ꓒꓱ ꓓꓽ ꓟ ꓖꓳ ꓟ ꓗꓪ ꓡꓯꓼ ꓶꓸ ꓡꓯꓼ ꓙ ꓟꓽ ꓢꓷꓸ ꓟ ꓡ ꓞꓳ ꓕꓲ ꓫꓬꓹ ꓠꓬꓲꓽ ꓟꓶꓽ ꓣꓳ ꓟꓽ ꓞꓲ ꓟˍ ꓐꓰ ꓙꓱꓽ ꓤ ꓖꓳ ꓟꓬ ꓟ ꓔꓯ ꓥꓪ ꓫꓱꓸ ꓤ ꓠꓯꓹ ꓡꓳ ꓟꓽ ꓥ ꓡ?” ꓐꓯˍ ꓡꓳ= (ꓬꓳ-ꓠ 4ꓽ11)

ꓟꓷꓽ ꓠꓷꓹ ꓝ ꓢꓴ ꓠꓰ-ꓬꓴ-ꓟꓷ ꓕꓳꓽ ꓡ ꓗꓪ ꓠꓬ꓾ ꓡꓳ ꓒꓱ ꓐꓬ ꓡꓰˍ ꓟ ꓔꓯ ꓐꓯ ꓟꓳꓸ ꓖꓶ ꓔ ꓡꓳ= ( ꓠꓰ-ꓬꓴ-ꓟꓷ 1ꓽ4ꓹ 3ꓽ19)

ꓤꓷ-ꓩ-ꓠ-ꓬ (2ꓽ13-15) ꓗꓪˍ ꓟꓲ ꓬ-ꓫꓵ ꓗꓴꓷꓼ ꓐꓰ ꓔꓲꓽ ꓪ ꓠꓲ-ꓠꓲ-ꓪꓱ ꓡꓳ ꓒꓱ ꓐꓬ ꓡꓰˍ ꓟ ꓔꓯ ꓐꓯ ꓔ ꓡꓳ= ꓦꓬꓼ ꓠꓬꓲ ꓖꓳ ꓟ ꓗꓪ ꓐꓰ ꓘꓶꓽ ꓫꓵꓽ ꓫꓵꓼ ꓗꓪ ꓛꓲ ꓡꓳ ꓒꓱ ꓟꓬꓱ ꓔꓯ ꓟꓳꓸ ꓖꓶ ꓔ ꓟ ꓟꓽ ꓙꓳ=

ꓟ-ꓕ 12ꓽ41 ꓗꓪ “ꓐꓯ ꓟꓴ ꓘꓶꓽˍ ꓦꓬꓼ ꓠꓬꓲ ꓖꓳ ꓟ ꓗꓪ ꓠꓲ-ꓠꓲ-ꓪꓱ ꓡ ꓞꓳ ꓔꓴ ꓡ ꓢꓲ꓾ ꓕꓱ ꓕꓲ ꓤꓶ ꓢꓴ ꓔꓯ ꓝꓮꓲ ꓐꓯ ꓞꓷꓹ ꓥꓳ= ꓮ ꓡꓲꓳ ꓐꓯ ꓠꓬ ꓠꓲ-ꓠꓲ-ꓪꓱ ꓢꓴ ꓠꓽ ꓬꓳ-ꓠ ꓡꓰ ꓟꓸ ꓟꓲꓽ ꓚ ꓖꓶˍ ꓕꓯ ꓓꓵꓽ ꓙ ꓒꓳꓹ ꓬꓲꓼ ꓡˍ ꓡꓳ= ꓠꓬꓲꓹ ꓠ꓾ ꓬꓳ-ꓠ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳ ꓕꓱ ꓗꓪ ꓔꓬ ꓡꓳ” ꓐꓰ ꓐꓯ ꓔ ꓟ ꓙꓳˍ ꓡꓳ=

Add new comment

2 + 12 =