ꓠꓲ-ꓬ-ꓟ-ꓬ (ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓫꓬꓹ ꓑꓱ ꓢꓴ)

ꓠꓲ-ꓬ-ꓟ-ꓬ ꓠꓬ ꓐꓚ 5 ꓦꓬ ꓘꓳꓼ ꓟꓽ ꓞꓲꓺ ꓕꓯ ꓒ-ꓫ ꓪ ꓔꓲ ꓯ-ꓕ-ꓫꓱ ꓬꓲ ꓚꓳ ꓑ ꓬꓰˍ ꓟ ꓗꓪ ꓐꓰ ꓡꓲꓹ ꓙꓰ ꓟꓶ ꓗꓷ ꓗ ꓠꓯꓸ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓫꓬꓹ ꓜꓶˍ ꓟ ꓗꓪ ꓧꓳꓽ ꓣꓱꓽˍ ꓟ꓾ ꓧꓳꓽ ꓪꓴꓸ ꓟꓴˍ ꓟ ꓬꓴ-ꓔ ꓪꓴꓸ ꓓꓵ ꓣꓱꓽ ꓢꓴ ꓕꓲ ꓣꓳ ꓥ ꓡꓳ= ꓬꓴ-ꓔ ꓡ ꓞꓳ ꓐꓴ ꓔꓯ ꓬꓰ-ꓧꓳ-ꓧꓪ ꓪꓴ-ꓢ ꓔꓬ ꓗꓪ ꓡꓯꓼ ꓙꓱˍ ꓟ ꓗꓪ ꓞꓳ ꓤ ꓬꓲ ꓫꓱꓹ ꓐꓰ ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓙꓵꓽ ꓗ ꓐꓴ ꓔꓯ ꓥ ꓟꓲ ꓫꓬꓹ ꓔꓱꓹ ꓗꓷ ꓢꓴ ꓥ ꓡꓳ= ꓠꓲ-ꓬ-ꓟ-ꓬ ꓐꓯ ꓟ ꓠꓬ ꓢꓲ ꓒꓽ ꓔꓯ ꓒꓳꓹ ꓬꓲꓼ ꓡˍ ꓟ꓾ ꓐꓯ ꓟ ꓥ ꓡꓳ=

ꓠꓲ-ꓬ-ꓟ-ꓬ ꓠꓬ ꓪ ꓔꓲ ꓔꓯ ꓛꓱꓼ ꓡꓱꓼ ꓙꓵꓻ ꓧꓳꓸ ꓖꓶˍ ꓟ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓡꓳ= ꓪ ꓔꓲ ꓬꓲ ꓛꓱꓼ ꓡꓱꓼ ꓙꓵꓻ ꓧꓳꓸ ꓖꓶˍ ꓟ ꓠꓬ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓟꓬꓱꓽ ꓕꓲ ꓟ ꓥ ꓡꓳ= ꓪ ꓔꓲ ꓓꓳꓻ ꓓꓴ ꓛꓱꓼ ꓡꓱꓼ ꓙꓵꓻ ꓗꓪ ꓠꓱꓸ ꓐꓯ ꓢꓴ ꓕꓲ ꓣꓳ ꓡꓰ ꓪ ꓔꓲ ꓔꓯ ꓫꓵꓻ ꓝꓲ ꓠꓲꓹ ꓫꓵˍ ꓠꓬꓲ ꓪ ꓔꓲ ꓓꓳꓻ ꓠꓯꓹ ꓟ ꓛꓱꓼ ꓡꓱꓼ ꓙꓵꓻ ꓗꓪ ꓫꓵꓻ ꓝꓲ ꓓꓴ ꓓꓳꓼ ꓧꓳꓽ ꓖꓶ ꓠꓹ ꓟ ꓫꓵꓽ ꓪꓴ ꓙꓳ ꓡ ꓗꓴꓸˍ ꓟ ꓪꓴꓸ ꓠꓬꓲ ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓠꓬ ꓪ ꓔꓲ ꓛꓱꓼ ꓡꓱꓼ ꓙꓵꓻ ꓧꓳꓸ ꓖꓶ ꓢꓴ ꓥ ꓟ ꓠꓲ-ꓬ-ꓟ-ꓬ ꓟꓬꓱꓽ ꓥ ꓡꓳ= ꓦꓬꓼ ꓠꓬꓲ ꓖꓳ ꓟ ꓠꓬ ꓯ-ꓕ-ꓫꓱ ꓪ ꓔꓲ ꓣꓱꓽˍ ꓟ ꓦꓬꓼ ꓠꓬꓲ ꓥ ꓢꓲ ꓠꓬꓲ꓾ ꓖꓳ ꓕꓲ ꓙꓵꓹ ꓗꓪ ꓠꓬ ꓩꓱ-ꓡꓲ-ꓫꓵ ꓗꓪ ꓟ ꓬꓴ-ꓔ ꓡ ꓞꓳ ꓐꓴ ꓐꓰ ꓐ-ꓐꓲ-ꓡꓶ ꓗꓪ ꓐꓰ ꓓꓳ ꓡ ꓗꓷ ꓟ ꓬꓴ-ꓔ ꓡ ꓞꓳ ꓐꓴ ꓠꓬꓒ-ꓫ ꓗꓴꓷꓼ ꓫꓴ-ꓫ ꓡꓳ ꓒꓱ ꓗꓪ ꓕꓲ ꓪ ꓔꓬꓹ ꓟ ꓦꓬꓼ ꓠꓬꓲˍ ꓟꓲ ꓥ ꓡꓳ=

ꓙꓱ-ꓣꓴ-ꓢ-ꓡꓱ ꓗꓪ ꓐꓬ ꓡꓰ ꓟ ꓪꓽ ꓘꓴ ꓦꓲ ꓔꓯ ꓠꓬ ꓝꓮꓲ ꓕꓲ ꓧꓪꓹ ꓫꓬꓹ ꓗꓷꓳ= ꓖꓳ ꓡꓱ ꓥˍ ꓟꓲ ꓡꓳ ꓒꓱ ꓚꓬꓹ ꓔꓯ ꓠꓽ ꓟꓽ ꓫꓬꓹ ꓑꓱ ꓔ = ꓖꓳ ꓡꓱ ꓠꓬꓲ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓐꓴ ꓔꓯ ꓚꓳ ꓡꓳ ꓗꓪ ꓔꓬ ꓟ ꓬꓴ-ꓔ ꓡ ꓞꓳ ꓟꓽ ꓥ ꓢꓴ ꓐꓴ ꓡꓰ ꓬꓴ-ꓔ ꓡ ꓞꓳ ꓐꓴ ꓔꓯ ꓟꓳꓻ ꓟꓽ ꓟꓵ ꓬꓰˍ ꓟ ꓑꓶꓸ ꓓꓴ ꓬꓴ-ꓔ ꓡ ꓞꓳ ꓐꓴ ꓠꓬ ꓮ ꓘꓶꓸ ꓫ ꓙꓵ ꓔꓬ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓠꓲ-ꓬ-ꓟ-ꓬ ꓬꓲ ꓠꓬꓲ ꓤ ꓧꓷ-ꓠꓯ-ꓠꓲ ꓐꓰ ꓬꓲ-ꓢꓷ-ꓡꓰ ꓡ ꓞꓳ ꓕꓲ ꓧꓳꓽ ꓠꓬ ꓠꓲ-ꓬ-ꓟ-ꓬ ꓔꓬ ꓗꓪ ꓡ ꓢꓲ꓾ ꓬꓲ-ꓢꓷ-ꓡꓰ ꓡꓞꓳ ꓐꓴ ꓫꓸ ꓙꓵ ꓔꓬ ꓟ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓠꓬ ꓮ ꓟꓶ ꓗꓪ ꓛꓲꓺ ꓟꓽ ꓫꓬꓹ ꓑꓱ ꓗꓷ ꓟ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓓꓳꓽ ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓠꓲ-ꓬ-ꓟ-ꓬ ꓠꓬ ꓠꓲꓹ ꓟ ꓮ ꓘꓶꓸ ꓫ ꓡꓰ ꓠꓬꓲ ꓪꓴ-ꓢ ꓔꓯ ꓪꓽ ꓘꓴˍ ꓡꓳ=

ꓠꓲ-ꓬ-ꓟ-ꓬ ꓠꓲꓹ ꓟ ꓫꓸ ꓔꓬꓹ ꓟ ꓔꓯ ꓕꓲ ꓠꓬꓲ ꓙꓳˍ ꓕꓯ ꓪ ꓔꓲ ꓟꓳꓻ ꓡꓰ ꓠꓬꓲ ꓮ ꓫꓵꓽ ꓪꓴꓸ ꓠꓬꓲ ꓠꓲꓹ ꓟ ꓫꓸ ꓒꓬꓱꓽ ꓶꓻ ꓞꓹ ꓡ? ꓐꓰ ꓠ ꓠꓬꓲˍ ꓡꓳ= ꓠꓲ-ꓬ-ꓟ-ꓬ ꓥˍ ꓟꓲ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓠꓬ ꓫꓸ ꓙꓵ ꓔꓬ ꓟ꓾ ꓡꓳ ꓒꓱ ꓚꓬꓹ ꓠꓬ ꓮ ꓟꓶ ꓗꓪ ꓛꓲꓺ ꓟꓽ ꓫꓬꓹ ꓜꓶ ꓗꓷ ꓟ ꓪꓴꓸ ꓠꓬꓲ ꓠꓲꓹ ꓟ ꓮ ꓘꓶꓸ ꓫꓸ ꓔꓬꓹ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓪ ꓔꓲ ꓡꓰ ꓠꓴ ꓮ ꓫꓵꓽ ꓬꓰ ꓠꓲꓹ ꓫꓵˍ ꓡ꓾ ꓐꓰ ꓠꓺ ꓠꓬꓲˍ ꓡꓳ=

ꓡꓳ ꓒꓱꓹ ꓚꓬꓹ ꓔꓯ ꓫꓬꓹ ꓠꓹ ꓟ ꓐꓱ ꓶ ꓥꓪ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓝꓲ ꓡꓯ꓾ ꓐꓰ ꓠꓲ-ꓬ-ꓟ-ꓬ ꓡꓰ ꓪ ꓔꓲ ꓯ-ꓕ-ꓫꓱ ꓔꓯ ꓓꓰꓽˍ ꓡꓳ= ꓪ ꓔꓲ ꓡꓰ ꓠꓲ-ꓬ-ꓟ-ꓬ ꓓꓰꓽ ꓘꓶꓽ ꓔꓯ ꓠ ꓠꓹ ꓖꓶ ꓗꓷ ꓢꓲ ꓡꓳ ꓒꓱ ꓚꓬꓹ ꓫꓬꓹ ꓜꓶ ꓓꓴ ꓐꓱ ꓶ ꓪ ꓔꓲ ꓢꓲꓹ ꓟꓲ ꓗꓪ ꓟ ꓢꓲꓹ ꓓꓱꓽ ꓔꓯˍ ꓟꓲ ꓣꓱꓽ ꓝꓲ ꓠꓹ ꓟ ꓢꓷꓸ ꓙ ꓟꓳ ꓙˍ ꓟ ꓕꓳꓽ ꓶ ꓐꓳ ꓖꓶ ꓗꓷꓳ= ꓬꓲ ꓐꓱ ꓶ ꓧꓳꓽ ꓦ ꓬꓰ ꓢꓴ ꓟꓯꓼ ꓢꓲꓽ ꓒ ꓠꓬꓲ ꓢ ꓣꓳ ꓐꓰ ꓪ ꓔꓲ ꓡꓰ ꓢꓷꓸ ꓙ ꓟꓳ ꓙ ꓔ ꓟ ꓕꓳꓽ ꓶ ꓒꓬꓽ ꓐꓴ ꓖꓶ ꓗꓷ ꓢꓲ ꓠꓲ-ꓬည-ꓟ-ꓬ ꓔꓯ ꓬꓰ ꓙ ꓗꓷꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓛꓲ ꓡ ꓕꓯ ꓬꓲ ꓠꓬ ꓡꓳ ꓒꓱ ꓚꓬꓹ ꓫꓬꓹ ꓓꓴ ꓡˍ ꓟ ꓔꓯ ꓐꓯ ꓟꓳꓸ ꓖꓶ ꓗꓷ ꓕꓯ ꓑ ꓫꓬ ꓐꓴ ꓥˍ ꓟꓲ ꓮ ꓘꓶꓸ ꓗꓹ ꓛꓲꓽ ꓡꓰ ꓢꓲ ꓡꓳ ꓒꓱ ꓚꓬꓹ ꓔꓯ ꓫꓬꓹ ꓠꓹ ꓟ ꓙꓽ ꓖꓶˍ ꓡꓳ=

ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓡꓳ ꓒꓱ ꓚꓬꓹ ꓫꓬꓹ ꓔꓬ ꓟ ꓔꓯ ꓚꓳ ꓡꓳ ꓗꓪ ꓟ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓠꓬꓲꓺ ꓟꓽ ꓟꓵ ꓢꓴ ꓐꓴ ꓡꓰ ꓟꓳꓻ ꓡꓰ ꓠꓬ ꓬꓲ ꓪ ꓐꓴ ꓔꓯ ꓒꓬꓹ ꓠꓹ ꓟ ꓬꓰˍ ꓡꓳ=

ꓓꓳꓽ ꓕꓱ ꓟ ꓔꓯ ꓠꓲ-ꓬ-ꓟ-ꓬ ꓑ ꓙ ꓡꓰ ꓕꓯ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓮꓸ ꓕꓽ꓾ ꓛꓬꓹ꓾ ꓐ-ꓥꓷ ꓖꓶ ꓢꓲ ꓠꓬꓲ ꓛꓴꓽ ꓙꓳ ꓢꓴ ꓐꓴ ꓗꓸ ꓧꓪ ꓡˍ ꓟ ꓗꓪ ꓐꓰ ꓗꓽ ꓔ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓝꓮꓲ ꓬꓲ ꓪ ꓔꓯ ꓠꓬ ꓕꓽ ꓙꓳꓺ= ꓚꓲꓸ ꓛꓬ ꓬꓲꓼ ꓤ ꓠꓬꓲ ꓤ ꓐꓴ꓾ ꓮ ꓐꓲ ꓮ ꓟꓲꓽ ꓐꓴ꓾ ꓚꓲ ꓛꓬ ꓤ ꓟꓶ ꓐꓴ ꓾ ꓚꓲꓸ ꓛꓬ ꓕꓲ ꓦꓲꓻ ꓕꓲ ꓗꓪ ꓢꓴ ꓐꓱ ꓶ ꓓꓶꓽ ꓡꓯ ꓘꓳ ꓠꓹ ꓟ ꓙꓽ ꓖꓶ ꓔ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓑ ꓫꓬ ꓐꓴ ꓠꓬ ꓮꓸ ꓕ꓾ ꓛꓬꓹ꓾ ꓐ-ꓥꓷ ꓔꓯꓹ ꓔ ꓢꓲ ꓟꓳꓼ ꓡꓳ꓾ ꓢ ꓘꓪ ꓡꓳ ꓒꓱ ꓚꓬꓹ ꓔꓯ ꓦꓴ ꓠꓬꓹ ꓡꓳ= ꓡꓳ ꓒꓱ ꓚꓬꓹ ꓜꓶ ꓢꓴ ꓔꓯ ꓬꓰ ꓙ ꓢꓴ ꓐꓴ ꓠꓬ ꓡꓯ ꓒꓯꓹ ꓕꓲ ꓐꓽ ꓡꓰꓽ ꓟꓬꓱꓽ ꓬꓰ ꓢꓲ꓾ ꓕꓲ ꓐꓽ ꓗꓪ ꓠꓬ ꓟꓯꓼ ꓶꓻ ꓥ ꓟ ꓮꓸ ꓕꓽ꓾ ꓐ ꓥꓷꓹ꓾꓾ ꓛꓬꓹ ꓔꓯꓹ ꓔ ꓢꓲ ꓟꓽ ꓠꓽ ꓠꓽ ꓫꓬꓹ ꓜꓶˍ ꓡꓳ= ꓖꓳ ꓡꓱ ꓢꓲ 52 ꓠꓬꓲ ꓛꓲꓺ ꓫꓬꓹ ꓗꓷ ꓕꓯ ꓡꓳ ꓒꓱ ꓚꓬꓹ ꓔꓯ ꓫꓬꓹ ꓑꓱ ꓓꓳ ꓡꓰꓳ= ꓠꓲ-ꓬ-ꓟ-ꓬ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓪꓴ-ꓢ ꓙꓵꓽ ꓗ ꓟꓸ ꓖꓶˍ ꓡꓳ=

ꓪꓴ-ꓢ ꓔꓯ ꓪꓽ ꓪꓴꓽ ꓘꓳꓹ ꓢꓲ ꓠ ꓡꓳꓸˍ ꓟ ꓗꓪ ꓐꓰ ꓠꓲ-ꓬ-ꓟ-ꓬ ꓠꓬ ꓪꓴ-ꓢ ꓬꓲ ꓡ ꓞꓳ ꓐꓴ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓔꓯ ꓫꓬꓹ ꓜꓶˍ ꓟ ꓗꓪ ꓧꓳꓽ ꓣꓱꓽ ꓗꓷ ꓟ ꓡꓰꓽ ꓟꓽ ꓞꓲ꓾ ꓪꓴ-ꓢ ꓔꓯ ꓦ ꓡꓱ ꓪꓴꓸ ꓓꓵ ꓕꓱꓽ ꓠꓹ ꓟˍ ꓟꓲ ꓧꓳꓽ ꓣꓱꓽ ꓗꓷ ꓟ ꓥ ꓡꓳ=