ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓬꓰˍ ꓟ (Q & A)

ꓥꓶꓼ ꓛꓲ ꓗꓪ ꓥˍ ꓠꓬ ꓠꓺ ꓖꓼ ꓗꓪ ꓥˍ ꓠꓬ ꓟꓬ ꓗꓶꓽ ꓛꓲ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓳꓹ ꓔ ꓟ ꓧꓪꓽ ꓒꓴ ꓫꓵꓼ ꓥꓳꓽ ꓗꓪ ꓐꓰ ꓢꓲꓖꓠ ꓳꓝ ꓔꓧꓰ ꓚꓣꓳꓢꓢ ꓐꓯꓹ ꓟ ꓠꓬ ꓙꓲ-ꓢꓴ ꓢꓲ ꓤꓼ ꓐꓴ ꓮꓽ ꓟꓬꓹ ꓬꓰ ꓔꓬꓹ ꓟ ꓥˍ ꓡꓳ= ꓕꓱ ꓟ ꓔꓯ ꓮꓓ-200 ꓘꓳꓼ ꓖ ꓡꓯꓼ ꓖꓼ ꓙꓵ ꓗꓪ ꓬꓰ ꓡꓹ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓮꓓ-200 ꓘꓳꓼ ꓕꓯ ꓗ-ꓔꓲ-ꓙꓲ ꓐꓯꓹ ꓟ ꓡꓳ ꓒꓱ ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓠꓬ ꓮꓝꓣꓲꓚꓮ ꓟꓵ ꓗꓪ ꓟ ꓔꓴ-ꓠꓲ-ꓫ ꓗꓴꓷꓼ ꓡꓳ ꓒꓱ ꓖꓳ ꓕꓲꓽ ꓘꓴꓸ ꓗꓪ ꓐꓰ ꓪꓴꓸ ꓔꓴ ꓡꓹ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓮꓡꓲꓳ ꓐꓯ ꓠꓬ ꓔꓰ-ꓔꓴ-ꓡꓲ-ꓬꓮꓠ ꓐꓯꓹ ꓢꓴ ꓟ ꓡꓰ ꓮ ꓡꓰ ꓐꓳ ꓔ ꓡ? ꓐꓯꓹ ꓠꓬ ꓥꓪ ꓠꓴꓽ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓥꓶꓼ ꓚꓲ ꓗꓪ꓾ ꓠ ꓖꓼ ꓗꓪ꓾ ꓟꓬ ꓗꓶꓽ ꓛꓲ ꓗ ꓪ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱ ꓔꓯ ꓬꓰ ꓔꓬꓹ ꓟ ꓥˍ ꓡꓳ= ꓶꓽ ꓖꓪꓽ ꓔꓬꓹ ꓟ ꓥˍ ꓡꓳ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓖꓳ ꓡꓰ ꓢꓲ ꓣꓳꓟꓮꓠ ꓣꓲꓔꓰ ꓐꓯꓹ ꓟ ꓪꓽ ꓘꓴ ꓡꓲꓽ ꓒꓲꓼ ꓔꓯ ꓣꓱꓹ ꓕꓯ ꓕꓱ ꓡꓰ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰꓹ ꓟ ꓔꓯ ꓖꓳ ꓕꓲꓽ ꓙꓵꓹ ꓗꓪ ꓡꓳꓸ ꓟꓳ ꓪ ꓓꓹ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓗ-ꓔꓳ-ꓡꓲꓼ ꓘꓴ ꓜꓲꓼ ꓞꓳ ꓠꓬ ꓖꓳ ꓕꓲ ꓙꓵꓹ ꓗꓪ ꓚꓳꓹ ꓡꓰ ꓬꓰ ꓔꓬꓹ ꓟ ꓥ ꓪ= ꓖꓳ ꓟ ꓡꓰꓽ ꓟꓽ ꓞꓲꓺ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓵꓹ ꓕꓯ ꓥˍ ꓟꓲ꓾ ꓢꓲꓽ ꓫꓬ ꓕꓳ ꓶ ꓑꓷꓠ ꓔꓯ ꓥˍ ꓟꓲ꓾ ꓟꓶꓽ ꓠꓷꓹ ꓕꓯ ꓥˍ ꓟꓲ꓾ ꓳꓺ ꓟꓶꓽ ꓗꓪ ꓥˍ ꓟꓲ꓾ ꓥꓶꓼ ꓛꓲ ꓥˍ ꓠꓬ ꓠꓺ ꓖꓼ ꓥˍ ꓠꓬ ꓟꓬ ꓗꓶꓽ ꓛꓲ ꓗꓪ ꓥˍ ꓟꓲ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓜ ꓚꓵꓸ ꓚꓵꓸ ꓔ ꓟ ꓓꓽ ꓪꓴꓸ ꓕꓲꓽ ꓦꓬꓼ ꓥꓶꓼ ꓚꓲ꓾ ꓟꓬ ꓗꓶꓽ ꓛꓲ꓾ ꓠꓺ ꓖꓼ ꓗꓪ ꓘꓴꓽ ꓦ ꓧꓶꓽ ꓡꓰ ꓟꓲ ꓖꓶꓹ ꓕꓯ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓐꓯ ꓢꓲ ꓠꓬꓲ ꓥꓶꓼ ꓚꓲ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓠꓷꓼ ꓖꓶˍ ꓡꓳ= 

ꓧꓶꓸ ꓕꓯ ꓕꓲꓽ ꓞꓲꓼ ꓗꓪ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓐꓹ ꓐꓽ ꓤꓼ ꓔꓲꓸ ꓢꓲ_ꓫꓬ-ꓟ-ꓦ ꓟꓬꓱ ꓔꓯ ꓘꓴ ꓢꓲ ꓬꓰꓹ ꓟ ꓠꓬ ꓗꓳ ꓓꓱꓽ ꓔꓶꓹ ꓔ ꓟ ꓙꓵꓹ ꓗꓪ ꓠꓲꓽ ꓔꓯ ꓖꓼ ꓓꓳ ꓗꓶꓹ ꓟ ꓪꓽ ꓘꓴ ꓘꓶꓽ ꓗꓪ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰˍ ꓡꓳ= ꓝꓮꓲ ꓪꓽ ꓘꓴ ꓙꓵꓹ ꓗꓪ ꓞꓲꓽ ꓫꓬꓹ ꓟ ꓟꓬꓱꓽ ꓬꓰˍ ꓟ ꓖꓳ ꓕꓲꓽ ꓙꓵꓹ ꓗꓪ ꓥˍ ꓟꓲ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰˍ ꓡꓳ= ꓝꓮꓲ ꓤꓹ ꓠꓬꓲ ꓫꓵꓽ ꓠꓬꓲ ꓓꓴ ꓔꓳꓹ ꓜꓳꓽ ꓡ ꓕꓯ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓕꓱ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰꓹ ꓟ ꓠꓬ ꓮꓸ ꓫꓵꓽ ꓥˍ ꓡ? ꓐꓯꓹ ꓠꓬ ꓚꓵꓸ ꓛꓬꓽ ꓔꓬꓹ ꓟ ꓖꓳ ꓕꓲ ꓟꓵꓽ ꓔꓯ ꓢꓲꓽ ꓫꓬ ꓡꓰ ꓝꓲꓹ ꓟ ꓖꓳ ꓟ ꓡꓰ ꓟꓽ ꓞꓲ ꓚꓵꓸ ꓛꓬꓽ ꓧꓪꓽ ꓗꓳ ꓓꓱꓽ ꓔꓯ ꓥˍ ꓟꓲ ꓢꓲꓽ ꓫꓬ ꓡꓰ ꓝꓲꓹ ꓟ꓾ ꓚꓵꓸ ꓛꓬꓽ ꓔꓵꓸ ꓚꓵꓸ ꓛꓬꓽ ꓶꓽ ꓥꓳꓽ ꓙꓱꓽ ꓤˍ ꓟ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓔꓲꓺ ꓒꓽ ꓐꓴ ꓠꓬ ꓶ ꓤꓼ ꓶ ꓟꓲ ꓔꓯ ꓢꓲꓽ ꓫꓬ ꓡꓰ ꓠꓹ ꓟ ꓐꓯ ꓟꓵ ꓫꓱˍ ꓟ ꓠꓬ ꓢꓲꓽ ꓫꓬ ꓕꓳꓽ ꓶ ꓟꓴꓽ ꓖꓪꓽ ꓕꓳꓽ ꓶ ꓑꓷꓠ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓔꓯ ꓢꓲꓽ ꓫꓬ ꓡꓰ ꓝꓲ ꓠꓹ ꓟ ꓐꓹ ꓐꓽ ꓤꓽ ꓔꓲꓸ ꓢꓲ_ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓐꓯ ꓢꓲ ꓶꓽ ꓥꓳꓽ ꓙꓱꓽ ꓖꓶˍ ꓡꓳ= ꓕꓱ ꓡꓰ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓬꓰꓹ ꓕꓯ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓙꓳ ꓐꓶ= ꓕꓲꓽ ꓐꓱ ꓠꓬ ꓡꓯꓼ ꓥꓯ 3 ꓥꓯ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓬꓰˍ ꓡꓳ= ꓡꓯꓽ ꓘꓳꓽ ꓕꓲꓽ ꓛꓱ ꓗꓪ ꓐꓰ ꓡꓯꓼ ꓶꓸ ꓕꓲꓽ ꓛꓱꓽ ꓔꓯ ꓢꓲ ꓕꓱ ꓡꓰ ꓬꓰˍ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓕꓲꓽ ꓐꓱ ꓠꓬ ꓡꓯꓼ ꓶꓸ ꓕꓲꓽ ꓛꓱꓽ ꓕꓯ ꓶꓸ ꓕꓯꓽ ꓬꓰ ꓢꓲ ꓔꓯꓹ ꓫꓵ ꓗꓪ ꓠꓲꓹ ꓟ ꓕꓲꓽ ꓛꓱꓽ ꓔꓯ ꓢꓲ ꓝꓮꓲ ꓡꓽ ꓡ ꓢꓲ ꓡꓯꓼ ꓘꓳꓽ ꓕꓯ ꓢꓲ ꓬꓲ ꓟꓶ ꓢꓰꓼˍ ꓟ ꓥˍ ꓟꓲ ꓙꓳˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓬ ꓥꓶꓼ ꓛꓲ ꓟꓬ ꓗꓶꓽ ꓛꓲ ꓠꓺ ꓖꓼ ꓗꓪ ꓗꓶꓸ ꓕꓯ ꓔꓳꓹ ꓢꓲ ꓳꓺ ꓟꓶꓽ ꓔꓯꓹ ꓫꓵ ꓗꓪ ꓬꓰ ꓖꓳ ꓗꓸ ꓠꓯꓸ ꓡꓯꓼ ꓶꓸ ꓕꓲꓽ ꓛꓱꓽ ꓗꓪ ꓬꓰ ꓢꓲ ꓡꓯꓽ ꓘꓳꓽ ꓕꓲꓽ ꓛꓱꓽ ꓔꓯ ꓢꓲ ꓠꓬꓲ ꓡꓯꓹ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓔꓳꓹ ꓔ ꓟ ꓔꓯ ꓕꓱꓽ ꓡꓰ ꓬꓰꓹ ꓟ ꓙꓳˍ ꓡꓳ= ꓕꓱ ꓡꓰ ꓬꓰꓹ ꓟ ꓠꓯꓸꓼ ꓗꓪ ꓕꓲꓽ ꓐꓱ ꓠꓬ ꓮ ꓡꓰ ꓬꓰˍ ꓡ? ꓐꓯ ꓠꓬ ꓐꓯ ꓡꓳꓹ ꓡꓰˍ ꓟ ꓡꓰ ꓐꓰ ꓕꓲꓽ ꓡꓰ ꓡꓯꓼ ꓥꓯ 3 ꓥꓯ ꓡꓰ ꓬꓰˍ ꓟ ꓙꓳ꓾ 5 ꓥꓯ ꓕꓯ ꓡꓰ ꓣꓱꓹ ꓟ ꓙꓳ꓾ ꓠꓬꓲꓽ ꓥꓯˍ ꓡꓰ ꓣꓱꓹ ꓟ ꓥˍ ꓟꓲ ꓙꓳˍ ꓡꓳ= ꓙꓳˍ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= 

ꓠꓬꓲꓸ ꓠꓬꓲ ꓣꓱꓽ ꓔꓬꓹ ꓟ ꓘꓴꓜꓲꓼ ꓞꓳ ꓠꓬ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳˍ ꓡꓰ ꓟꓽ ꓞꓲ ꓐꓶꓽ ꓓꓳ ꓕꓲꓽ ꓛꓱꓽ ꓗꓪ ꓟ ꓧꓶꓸ ꓕꓯ ꓬꓲ ꓡꓵ ꓥˍ ꓟ ꓗ-ꓕꓳ-ꓡꓲꓼ ꓐꓴ꓾ ꓳ-ꓔꓳ-ꓓꓳꓫ ꓐꓴ꓾ ꓮꓠꓖ-ꓡꓲ-ꓗꓮꓠ ꓘꓴ ꓜꓲꓼ ꓞꓳ꓾ ꓡꓴ-ꓔ-ꓣꓰꓠ ꓘꓴ ꓜꓲꓼ ꓞꓳ꓾ ꓟꓯ-ꓔꓳ-ꓓꓲꓢ ꓘꓴ ꓜꓲꓼ ꓞꓳ꓾ ꓑꓣꓰ-ꓢꓲ-ꓑꓣꓰ-ꓔꓯ-ꓣꓲ-ꓬꓮꓠ ꓘꓴ ꓜꓲꓼ ꓞꓳ꓾ ꓣꓰꓝꓣꓳꓟꓰꓓ ꓚꓧꓴꓚꓧꓰꓢ ꓐꓯꓹ ꓟ ꓘꓴ ꓜꓲꓼ ꓞꓳ ꓐꓴ ꓥˍ ꓟꓲ ꓕꓲꓽ ꓐꓱ ꓣꓱˍ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ ꓟ 5 ꓣꓳ ꓗꓪ ꓚꓳꓸ 4 ꓣꓳ ꓠꓬ ꓝꓴꓸ ꓠꓬ ꓢꓲꓽ ꓫꓬꓹ ꓟ ꓡꓯꓹ ꓐꓳ ꓔꓶꓸ ꓓꓴ ꓐꓬꓱꓽ ꓐꓯꓹ ꓟ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓐꓯ ꓢꓲ ꓔꓳꓹ ꓠꓷꓼ ꓔ ꓟ ꓔꓯ ꓡꓳ ꓟꓳ ꓪ ꓓˍ ꓡꓳ= ꓕꓱ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓳꓹ ꓠꓷꓼ ꓔ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓕꓯꓼ ꓔꓶꓸ ꓫꓵˍ ꓟ ꓔꓯ ꓝꓮꓲ ꓕꓲꓽ ꓧꓪꓹ ꓓꓵꓽ ꓙꓽ ꓛꓲ ꓠꓹ ꓟ ꓢꓲꓺ ꓒꓽ ꓬꓰ-ꓢꓴ ꓬꓲ ꓫꓸ ꓙꓵ ꓟꓶꓽ ꓙꓵ ꓟꓶꓽ ꓙꓵ ꓔꓳꓹ ꓙꓳˍ ꓟ ꓐꓰ ꓫꓵˍ ꓟ ꓗꓪ ꓐꓰ ꓚꓬꓴꓹ ꓙˍ ꓟ ꓣꓱꓽ ꓛꓲ ꓔꓯ ꓝꓮꓲ ꓓꓵꓽ ꓙꓽ ꓛꓲ ꓠꓹ ꓟ ꓐꓱ ꓶ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓕꓱ ꓟ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓔꓳꓹ ꓠꓷꓼ ꓔ ꓟ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓐꓯ ꓢꓲ ꓔꓳꓹ ꓠꓷꓼ ꓔ ꓟ ꓕꓱ ꓟ ꓔꓯ ꓠꓬ ꓮꓓ-300 ꓗꓸ ꓠꓯꓸ ꓢ ꓗꓪ ꓢꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓣꓱꓽ ꓡꓹ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓕꓲꓽ ꓐꓱ ꓠꓬ ꓡꓯꓹ ꓐꓳ ꓔꓶꓸ ꓓꓴ ꓐꓬꓱꓽ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓐꓹ ꓟ ꓢꓲꓽ ꓫꓬꓹ ꓟ ꓡꓯꓼ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓔꓳꓹ ꓠꓷꓼ ꓔ ꓟ ꓡꓰ ꓟꓽ ꓞꓲ ꓡꓯꓹ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓡꓯ ꓐꓲ ꓗꓪ ꓓꓱꓼ ꓔ ꓟ ꓕꓱ ꓡꓲꓳꓹ ꓫꓵꓽ ꓥˍ ꓟꓲ ꓬꓰˍ ꓡꓳ= ꓖꓳ ꓟ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓓꓵꓽ ꓙꓽ ꓛꓲ ꓠꓹ ꓟ꓾ ꓢꓲꓺ ꓒꓽ ꓬꓰ-ꓢꓴ ꓫꓵˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓟ ꓡꓲ ꓐꓰ ꓕꓲꓽ ꓡꓰ ꓥꓳ ꓡꓳꓸ ꓓꓴ ꓓꓽ ꓟ ꓙꓳˍ ꓥ ꓐꓯ ꓔꓯ ꓢꓷꓸ ꓡꓰ ꓠꓹ ꓟ ꓖꓳ ꓟ ꓡꓰ ꓟꓽ ꓞꓲ ꓚꓵꓸ ꓛꓬꓽ ꓕꓲꓽ ꓞꓲꓼ ꓗꓪ ꓘꓶ ꓡꓶꓽ ꓓꓴ ꓔꓳꓹ ꓜꓳꓽ ꓡꓹ ꓟ ꓮꓽ ꓙꓵꓽ ꓔꓯ ꓧꓪꓸ ꓡꓰ ꓓꓴ ꓙꓳˍ ꓥ ꓐꓯꓹ ꓟ ꓔꓯ ꓮ ꓕꓯꓽ ꓥˍ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙꓽ ꓛꓲ ꓠꓹ ꓟ꓾ ꓕꓲꓽ ꓐꓱ ꓠꓬ ꓠꓲꓽ ꓢ ꓓꓯꓼ ꓗꓪ ꓐꓰ ꓗꓽ ꓕꓸ ꓐ ꓡꓹ ꓡꓳ ꓐꓯ ꓢꓲ ꓕꓱ ꓟ ꓔꓯ ꓕꓱ ꓡꓰ ꓣꓱꓹ ꓟ ꓙꓳˍ ꓡꓳ= ꓖꓳ ꓡꓰ ꓥˍ ꓟꓲ ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓠꓬ ꓙꓲ-ꓢꓴ ꓢꓲꓺ ꓤꓼ ꓐꓴꓹ ꓡꓰ ꓟꓽ ꓞꓲ ꓢꓲꓺ ꓒꓽ ꓬꓰ-ꓢꓴ ꓔꓯ ꓟꓽ ꓙꓵ ꓢꓴ ꓐꓴ ꓥˍ ꓟꓲ ꓧꓪꓽ ꓗꓳ ꓓꓱꓽ ꓐꓲ ꓫꓵꓽ ꓠꓹ ꓟ ꓐꓱ ꓶ ꓓꓱꓼˍ ꓟ ꓬꓰˍ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= ꓠꓬꓲꓸ ꓠꓬꓲ ꓠꓬ ꓞꓳ ꓤꓽ ꓮꓽ ꓟꓬꓹ ꓟꓬꓽ ꓠꓬꓲ ꓐꓶꓹ ꓠꓬꓲ ꓑꓹ ꓡꓴꓸ ꓔꓯ ꓑꓹ ꓒꓽ ꓓꓽ ꓐꓴ ꓕꓱ ꓡꓰ ꓐꓹ ꓐꓽ ꓤꓼ ꓔꓲꓸ ꓢꓲ-ꓫꓬ-ꓟ-ꓦ ꓐꓯꓹ ꓟ ꓢꓲꓽ ꓫꓬˍ ꓟ ꓡꓯꓹ ꓐꓳ ꓔꓶꓸ ꓓꓴ ꓐꓬꓱꓽ ꓔꓯ ꓔꓳꓹ ꓠꓷꓼ ꓔ ꓟ ꓮꓽ ꓟꓬꓹ ꓬꓰꓹ ꓟ ꓔꓯ ꓥˍ ꓟꓲ ꓡꓳꓸ ꓟꓳ ꓪ ꓓˍ ꓡꓳ= ꓕꓱ ꓟ ꓠꓬ ꓟꓽ ꓓ ꓢ ꓖꓴ ꓡꓰ ꓟ ꓥꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓔꓯ ꓙꓵ ꓢꓴ ꓙꓲ-ꓢꓴ ꓢꓲ ꓤꓼ ꓥˍ ꓡꓳ ꓐꓯꓹ ꓟ ꓟꓽ ꓓ ꓢ ꓖꓴ ꓡꓰ ꓟ ꓬꓲ ꓢꓷꓸ ꓡꓰ ꓓꓴ ꓕꓲꓽ ꓟ ꓥˍ ꓡꓳ=