ꓡꓯꓽ ꓒꓯꓹ ꓝꓸ ꓔ ꓟ ꓠꓬ ꓘꓶꓽ ꓫꓵꓼ ꓥˍ ꓟ (Q & A)

ꓡꓯꓽ ꓒꓯꓹ ꓝꓸ ꓔ ꓕꓯ ꓟꓯꓸ ꓡꓯꓸ ꓟ ꓐꓰ ꓟꓯꓸ ꓡꓯꓸ ꓒꓽ ꓐꓯ ꓘꓶꓽ ꓛꓹ ꓔ ꓟ ꓙꓳˍ ꓡꓳ= ꓖꓳ ꓟ ꓔꓯ ꓘꓶꓽ ꓫꓵꓽ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓘꓶꓽ ꓫꓵꓽ ꓐꓰ ꓐꓯ ꓘꓶꓽ ꓛꓹ ꓔ ꓟ ꓟꓽ ꓪꓽ ꓡꓯꓽ ꓘꓳꓹ ꓟ ꓙꓳ ꓡꓳ= ꓧꓪꓽ ꓒꓴ ꓫꓵꓼ ꓥꓳ ꓗꓪ ꓚꓳꓸ ꓐꓯ ꓘꓶꓽ ꓛꓹ ꓔ ꓟ ꓘꓶꓽ ꓫꓵꓽ ꓛꓹ ꓔ ꓟ ꓚꓱꓹ ꓔꓯ ꓟꓳꓸ 5 ꓫꓵꓽ ꓙꓳˍꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ= 1ꓸ ꓠꓬ ꓑꓣꓳꓟꓲꓢꓰ ꓐꓯꓹ ꓟ ꓐꓯ ꓘꓶꓽ ꓛꓹ ꓔ ꓟ ꓕꓱ ꓟ ꓠꓬ ꓮ ꓡꓲꓳ ꓫꓵꓽ ꓥꓹ ꓡ ꓐꓯꓹ ꓠꓬ ꓥꓪ ꓠꓬꓲꓸ ꓠꓬꓲ ꓟꓶꓽ ꓘꓶꓼ 5 ꓙꓵꓹ ꓕꓯꓽ ꓟꓽ ꓪ ꓟꓽ ꓢꓽ ꓡ ꓓꓴ ꓥꓳꓺ ꓐꓯꓹ ꓠꓬ ꓕꓱ ꓟ ꓠꓬ ꓮꓸ ꓫꓵꓽ ꓥꓹ ꓡ ꓐꓯꓹ ꓠꓬ ꓕꓲꓽ ꓛꓱꓽ ꓔꓯ ꓢꓲꓹ ꓡꓰ ꓐꓯ ꓘꓶꓽ ꓛꓹ ꓔ ꓟ ꓥ ꓪ= ꓥꓪ ꓡ ꓓꓴ ꓥꓳ ꓐꓰ ꓕꓲꓽ ꓛꓱꓽ ꓔꓯ ꓢꓲꓹ ꓡꓰ ꓐꓯ ꓘꓶꓽ ꓛꓹ ꓔ ꓟ ꓥ ꓪ= 2 ꓫꓵꓽ ꓕꓲꓽ ꓫꓵꓽ ꓠꓬ ꓮꓖꓣꓰꓰꓟꓰꓠꓔ ꓐꓯꓹ ꓟ꓾ ꓠꓬꓲꓽ ꓛꓱꓽ ꓠꓬꓲꓽ ꓙ ꓪꓽ ꓡꓯꓽ ꓘꓳ ꓢꓲ ꓛꓹ ꓔ ꓟ ꓐꓯ ꓘꓶꓽ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓖꓳ ꓡꓰ ꓥˍ ꓟꓲ  ꓠꓬꓲꓽ ꓛꓱꓽ ꓠꓬꓲꓽ ꓙ ꓛꓹ ꓔ ꓐꓯ ꓘꓶꓽ ꓥꓹ ꓥˍ ꓟꓲ ꓕꓲꓽ ꓛꓱꓽ ꓔꓯ ꓢꓲ ꓟꓬꓽ ꓠꓬꓲ ꓛꓳ ꓠꓬꓲ ꓔ ꓟ ꓕꓲꓽ ꓛꓱꓽ ꓔꓯ ꓢꓲ ꓠꓬ ꓮꓽ ꓟꓬꓹ ꓟꓽ ꓛꓳ ꓠꓬꓲ ꓔ ꓟ ꓙꓳˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓬꓱꓽ ꓕꓲꓽ ꓟ ꓔꓯ ꓐꓯ ꓥꓳ ꓐꓮꓹ ꓠꓬ ꓬꓰ ꓠꓬꓲ ꓔ ꓢꓴ ꓕꓲꓽ ꓛꓱꓽ ꓔꓯ ꓢꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓐꓯ ꓘꓶꓽ ꓛꓹ ꓠꓬꓲ ꓔ ꓟ ꓗꓶ ꓡꓰꓹ ꓓꓴ ꓟ ꓥ ꓪ= 3 ꓫꓵꓽ ꓕꓲꓽ ꓫꓵꓽ ꓚꓳꓠꓔꓣꓮꓚꓔ ꓐꓯꓹ ꓟ꓾ ꓕꓱ ꓟ ꓥˍ ꓟꓲ ꓠꓬꓲꓽ ꓛꓱꓽ ꓠꓬꓲꓽ ꓙ ꓐꓯ ꓘꓶꓽ ꓛꓹ ꓔ ꓟ ꓚꓱꓹ ꓥ ꓢꓲ ꓕꓱ ꓟ ꓠꓬ ꓚꓵ ꓚꓵ ꓟꓬꓱꓽ ꓔꓯ ꓣꓴ ꓢꓴ꓾ ꓕꓱ ꓟ ꓟꓬꓱꓽ ꓔꓯ ꓘꓳꓹ ꓣꓴ ꓢꓴ ꓟꓬꓽ ꓠꓬꓲ ꓐꓶꓹ ꓠꓬꓲ ꓐꓯ ꓘꓶꓽ ꓛꓹ ꓠꓬꓲ ꓔ ꓟ ꓥ ꓪ= ꓔꓯ ꓥꓳꓽ ꓕꓲꓽ ꓟ ꓐꓯ ꓠꓬ ꓦꓲꓺ ꓕꓲꓽ ꓦꓲꓺ ꓫꓹ ꓔ ꓕꓯ ꓚꓳꓠꓔꓣꓮꓚꓔ ꓣꓴ ꓢꓴ ꓦꓲꓺ ꓫꓹ ꓢꓴ ꓕꓲꓽ ꓛꓱꓽ ꓔꓯ ꓢꓲ ꓟꓬꓽ ꓠꓬꓲ ꓒꓴ ꓮ ꓟꓬ ꓠꓲ ꓮ ꓡꓰ ꓕꓲꓽ ꓙꓵꓹ ꓗꓪ ꓫꓹ ꓓꓳ ꓠ ꓫꓹ ꓓꓴ ꓥꓳ ꓐꓰ ꓐꓯ ꓘꓶꓽ ꓛꓹ ꓠꓬꓲ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓕꓱ ꓟ ꓥˍ ꓟꓲ ꓕꓲꓽ ꓛꓱꓽ ꓔꓯ ꓢꓲ ꓟꓬꓽ ꓠꓬꓲ ꓐꓯ ꓘꓶꓽ ꓛꓹ ꓠꓬꓲ ꓔ ꓟ ꓥ ꓪ=

4 ꓠꓬ ꓦꓳꓪ ꓐꓯꓹ ꓟ ꓥ ꓪ= ꓦꓳꓪ ꓐꓯꓹ ꓟ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓔꓲ ꓒꓽ ꓔꓲ ꓟ ꓐꓴ ꓪꓴ-ꓢ ꓟꓲꓽ ꓙꓬ ꓗꓪ ꓐꓯ ꓘꓶꓽ ꓛꓹ ꓔ ꓟ ꓥ ꓪ= ꓥꓪ ꓕꓲꓽ ꓞꓲꓼ ꓡꓱꓸꓼ ꓦꓲꓺ ꓢꓲ ꓟ ꓟꓽ ꓣꓴ ꓣꓴ ꓔꓬ ꓓꓴ ꓥꓳ= ꓪꓴ-ꓢ ꓟꓬꓱꓽ ꓔꓯ ꓟꓯ ꓓꓴ ꓥꓳ ꓐꓰ ꓪꓴ-ꓢ ꓟꓲꓽ ꓙꓬꓽ ꓗꓪ ꓐꓯ ꓘꓶꓽ ꓛꓹ ꓔ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓕꓲꓽ ꓐꓱ ꓠꓬ ꓕꓲꓽ ꓐꓱ ꓠꓬ ꓕꓲꓽ ꓘꓳꓹ ꓡꓱꓸꓼ ꓥꓪ ꓠꓬ ꓕꓲꓽ ꓦꓬꓼ ꓟꓽ ꓙꓳ ꓕꓲꓽ ꓠꓬꓲ ꓟ ꓠ ꓡꓲ 2 ꓙꓵꓹ ꓪꓽ ꓘꓴ ꓓꓴ ꓥꓳ ꓐꓰ ꓐꓯ ꓘꓶꓽ ꓛꓹ ꓔ ꓟꓹ ꓟꓲ ꓙꓳ ꓡꓳ= ꓕꓱ ꓟ ꓥꓹ ꓟꓲ ꓕꓲꓽ ꓛꓱꓽ ꓔꓯ ꓢꓲ ꓡꓰ ꓚꓵꓸ ꓛꓬꓽ ꓪꓴ-ꓢ ꓔꓯ ꓐꓯ ꓘꓶꓽ ꓛꓹ ꓔ ꓢꓴ ꓡꓰ ꓢꓲ ꓛꓳ ꓠꓬꓲ ꓔ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓚꓳꓦꓰꓠꓮꓠꓔ ꓐꓯꓹ ꓟ ꓘꓶꓽ ꓫꓵꓽ ꓛꓹ ꓔ ꓟ ꓠꓬ ꓕꓱ ꓡꓰ ꓟꓽ ꓥ= ꓘꓶꓽ ꓫꓵꓽ ꓛꓹ ꓔ ꓟ ꓠꓬ 2 ꓛꓱꓽ 2 ꓙ ꓛꓳ ꓠꓬꓲ ꓔ ꓟ ꓥ ꓪ= ꓘꓶꓽ ꓫꓵꓽ ꓡꓵ ꓗꓪ ꓪꓴ-ꓢ ꓐꓰ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ 2 ꓗꓴꓸ ꓚꓸ ꓗꓪ ꓘꓶꓽ ꓫꓵꓼ ꓛꓹ ꓔ ꓡꓳ= ꓕꓱ ꓡꓰ ꓘꓶꓽ ꓫꓵꓼ ꓛꓹ ꓔ ꓕꓯ ꓪꓴ-ꓢ ꓠꓬ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓔꓯ ꓡꓳꓸ ꓙ ꓐꓳꓽ ꓙ ꓠ ꓡꓳꓼ ꓣꓱꓽ ꓬꓯꓹ ꓟ ꓶꓽ ꓤꓼ ꓫꓱꓸ ꓤꓼ ꓡꓴꓽ ꓖꓶꓽ ꓠ ꓡꓳꓼ ꓕꓱ ꓟ ꓠꓬ ꓪꓴ-ꓢ ꓕꓲꓽ ꓛꓱꓽ ꓔꓯ ꓢꓲ ꓛꓳ ꓠꓬꓲ ꓔ ꓟ ꓥ ꓢꓲ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓠꓬꓲ ꓔ ꓟ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓠꓬꓲ ꓔ ꓟ ꓥ ꓪ= ꓟꓽ ꓛꓳ ꓠꓬ ꓮ ꓡꓰ ꓗꓶ ꓡꓰꓹ ꓡꓽ ꓐꓯ ꓠꓬ ꓪꓴ-ꓢ ꓣꓱꓽ ꓛꓵꓽ ꓪꓴ-ꓢ ꓶꓽ ꓤꓼ ꓫꓱꓸ ꓤꓼ ꓔꓯ ꓟꓽ ꓐꓯꓹ ꓟꓶꓹ ꓟ ꓫꓸ ꓙꓲ ꓟꓶꓽ ꓙꓲ ꓓꓴ ꓔꓳꓹ ꓜꓳꓹ ꓟ ꓕꓱ ꓡꓰ ꓗꓶꓹ ꓓꓴ ꓟ ꓥ ꓪ= 

ꓧꓶꓸ ꓕꓯꓽ ꓣꓳ ꓟꓵꓽ ꓣꓳ ꓡꓳ ꓗꓪ ꓘꓶꓽ ꓫꓵꓽ ꓛꓹ ꓔ ꓟ ꓙꓳ ꓡꓳ= ꓞꓳ ꓫꓵꓽ ꓠꓬꓲꓽ ꓫꓵꓽ꓾ ꓔꓯ ꓥꓳꓽ ꓐꓯ ꓠꓬ ꓐꓬꓽ ꓒꓽ ꓐꓰ ꓥꓪꓸ ꓒꓽ ꓠꓬꓲꓽ ꓗꓴ ꓚꓸ ꓗꓪ ꓟꓵꓽ ꓘꓶꓽ ꓡꓯꓽ ꓘꓳꓹ ꓢꓲ ꓘꓶꓽ ꓫꓵꓽ ꓛꓹ ꓔ ꓡꓳ= ꓖꓳ ꓡꓰ ꓛꓹ ꓔ ꓕꓯ ꓭꓸ ꓡꓳ ꓓꓲ ꓥˍ ꓠꓬ ꓕꓲꓽ ꓫꓵꓽ ꓫꓵꓽ ꓞꓳꓹ ꓢꓲ ꓖꓳ ꓕꓲꓽ ꓘꓴꓸ ꓗꓪ ꓮꓸ ꓠꓬꓲꓽ ꓮꓸ ꓛꓵꓼ ꓮꓸ ꓭꓸ ꓕꓱ ꓡꓲꓳ ꓫꓵꓽ ꓙꓱꓽ ꓤꓽ ꓟ ꓞꓲ ꓫꓵꓽ ꓕꓲꓽ ꓢꓲ ꓮ ꓡꓰ ꓐꓯꓹ ꓡ ꓐꓯ ꓠꓬ ꓕꓱ ꓕꓲꓽ ꓘꓴꓸ ꓗꓪ ꓚꓳꓸ ꓙ ꓡ ꓢꓲ ꓟꓵꓽ ꓧꓳ ꓜꓼ ꓢꓴ ꓠꓬ ꓫꓵ ꓝꓲ ꓟꓺ ꓐꓰ ꓕꓱ ꓡꓰ ꓙꓱꓽꓹ  ꓟ ꓥ ꓪ= ꓖꓳ ꓟ ꓔꓯ ꓘꓶꓽ ꓫꓵꓽ ꓛꓹ ꓔ ꓐꓯꓹ ꓟ ꓥ ꓪ= ꓕꓱ ꓡꓰ ꓙꓱ ꓦꓹ ꓟ ꓠꓬ ꓠꓬꓲꓽ ꓛꓱꓽ ꓠꓬꓲꓽ ꓙ ꓛꓳ ꓠ ꓡꓳꓹ ꓥ= ꓐꓬꓽ ꓒꓽ ꓥˍ ꓟꓲ ꓛꓳ ꓠ ꓡꓳꓼ ꓥꓪꓸ ꓜꓽ ꓒꓽ ꓥˍ ꓟꓲ ꓛꓳ ꓠ ꓡꓳꓼ꓾ ꓟꓽ ꓛꓳ ꓛꓳ ꓟꓵꓽ ꓧꓳ ꓤꓼ ꓢꓴ ꓠꓬ ꓫꓴꓽ ꓒꓲ ꓢꓲ ꓫꓵ ꓡꓺꓳ ꓫꓵꓽ ꓟꓴꓽ ꓖꓴ ꓘꓶꓽ ꓫꓵꓺ ꓳ ꓫꓵꓽ ꓕꓱ ꓡꓲꓳ ꓫꓵꓽ ꓫꓵ ꓡꓹ ꓟ ꓔꓯ ꓚꓵ ꓚꓵ ꓔꓳꓹ ꓜꓳ ꓡ ꓓꓴ ꓥꓳ= ꓖꓳ ꓟ ꓪꓴꓸ ꓠꓬꓲ ꓕꓱ ꓕꓲ ꓘꓴꓸ ꓗꓪ ꓘꓶꓽ ꓫꓵꓽ ꓛꓹ ꓔ ꓕꓯ ꓠꓬ ꓠꓬꓲ ꓛꓱꓽ ꓠꓬꓲꓽ ꓙ ꓛꓳ ꓠꓬꓲ ꓔ ꓟ ꓥˍ ꓡꓳ= ꓮ ꓡꓰ ꓪꓴꓸ ꓠꓬꓲ ꓡꓯꓽ ꓒꓯꓹ ꓝꓸ ꓔ ꓟ ꓔꓯ ꓘꓶꓽ ꓫꓵꓽ ꓐꓯꓹ ꓡꓽ ꓐꓯ ꓠꓬ ꓠꓬꓲꓽ ꓛꓱꓽ ꓠꓬꓲꓽ ꓙ ꓛꓳ ꓠꓬꓲ ꓔ ꓟ ꓑꓶ> ꓓꓴ ꓥˍ ꓡꓳ=