ꓡꓯꓽ ꓒꓯꓹ ꓝꓸ ꓔ ꓟ ꓥˍ ꓠꓬ ꓠꓬꓲꓽ ꓟ ꓡꓽ ꓞꓳ ꓝꓱˍ ꓟ ꓚꓱꓹ (Q & A)

ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓦꓲꓺ ꓢꓲꓺ ꓒꓽ ꓐꓰ ꓦꓲꓺ ꓢꓲꓺ ꓟ ꓧꓹ ꓡꓯꓽ ꓘꓳ ꓓꓳ ꓡꓰ ꓕꓯ ꓡꓯꓽ ꓒꓯꓹ ꓝꓸ ꓖꓶ ꓐ ꓡꓹ ꓟ ꓙꓳˍ ꓡꓳ= ꓖꓳ ꓟ ꓔꓯ ꓝꓮꓦꓳꓴꓣ ꓳꓝ ꓝꓮꓲꓔꓧ ꓥˍ ꓠꓬ ꓝꓮꓦꓳꓴꓣ ꓳꓝ ꓡꓮꓪ ꓐꓯꓹ ꓟ ꓥ ꓪ= ꓘꓴ ꓜꓲꓼ ꓞꓳ ꓡꓰ ꓧꓹ ꓖꓶ ꓟꓽ ꓐ ꓡꓹ ꓟ ꓠꓬ ꓜꓳꓽ ꓓꓲ ꓡꓰˍ ꓟ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓘꓳꓹ ꓣꓴ ꓓꓳ ꓢꓴ ꓠꓬꓲ ꓣꓳ ꓡꓯꓽ ꓒꓯꓹ ꓝꓸ ꓓꓳ ꓗꓸ ꓠꓯꓸ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳ ꓓꓳ ꓡꓲ ꓢꓴ ꓠꓬꓲꓽ ꓣꓳ ꓔꓯ ꓠꓬ ꓧꓹ ꓠꓹ ꓟ ꓙꓵꓽ ꓪ ꓟꓽ ꓙꓳ= ꓟꓗ 10ꓽ 9 ꓗꓪ “ꓪꓴ-ꓢ ꓡꓰ ꓝꓱ ꓔ ꓟ ꓔꓯ ꓞꓳ ꓜꓽ ꓡꓰ ꓕꓽ ꓧꓹ ꓡꓰ ꓝꓲ” ꓐꓯˍ ꓟ ꓪꓴꓸ ꓠꓬꓲ ꓞꓳ ꓜꓽ ꓠꓯꓸꓼ ꓗꓪ ꓧꓹ ꓠꓹ ꓟ ꓙꓵꓽ ꓪꓽ ꓟꓽ ꓙꓳ= ꓖꓳ ꓡꓰ ꓥˍ ꓟꓲ ꓪꓴ-ꓢ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓔ ꓟ ꓠꓬ ꓟꓬꓽ ꓡ ꓐꓶꓹ ꓡ ꓠˍ ꓟ ꓐꓱ ꓶꓽ ꓥˍ ꓡꓳ= ꓖꓳ ꓟ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓔꓶ ꓐꓬꓱꓽ ꓥ ꓢꓲ ꓡꓯꓽ ꓒꓯꓼ ꓝꓸ ꓓꓳ ꓡꓰ ꓗꓸ ꓠꓯꓸ ꓧꓪꓽ ꓗꓳ ꓓꓱꓽ ꓑꓯꓹ ꓡꓯꓽ ꓘꓳꓹ ꓟ ꓟꓽ ꓙꓳˍ ꓟ ꓠꓬ ꓐꓲ ꓜꓲꓼ ꓡꓰˍ ꓟ ꓟꓽ ꓙꓳ ꓢꓰꓼ ꓟ ꓢꓷꓸ ꓡꓰ ꓓꓴ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓫꓵꓽ ꓪꓴ ꓓꓳ ꓡ꓾ ꓝꓮꓲ ꓕꓲꓽ ꓪꓼ ꓔꓬ ꓟꓽ ꓐ ꓡꓹ ꓠꓬ ꓘꓴ ꓜꓲꓼ ꓞꓳ ꓠꓬ ꓧꓹ ꓖꓶꓽ ꓐ ꓡꓹ ꓟ ꓥˍ ꓡꓳ=

ꓝꓮꓲ ꓕꓲꓽ ꓠꓬ ꓧꓶꓸ ꓕꓯ ꓠꓲꓽ ꓡꓲ ꓥˍ ꓠꓬ ꓙꓵꓽ ꓗ ꓡꓲ ꓗꓪ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓟꓲꓽ ꓙꓬꓽ ꓗꓪ ꓡꓯꓽ ꓒꓯꓹ ꓝꓸ ꓦꓹ ꓢꓴ ꓠꓬ ꓧꓹ ꓡꓯꓽ ꓘꓳꓹ ꓟ ꓗꓶ ꓡꓰ ꓢꓲ ꓝꓮꓲ ꓠꓱꓸ ꓐꓯꓼ ꓕꓲꓽ ꓣꓳ ꓡꓰ ꓡꓯꓽ ꓒꓯꓹ ꓝꓸ ꓠꓲꓹ ꓫꓵˍ ꓠꓬ ꓙꓵꓽ ꓪꓽ ꓖꓶ ꓓˍ ꓡꓳ= ꓝꓮꓲ ꓡꓯꓽ ꓒꓯꓹ ꓝꓸ ꓦꓹ ꓢꓴ ꓟ ꓠꓬ ꓜꓳꓽ ꓓꓲ ꓡꓰˍ ꓟ ꓗꓳ ꓓꓱꓽ ꓔꓲꓹ ꓦꓹ ꓢꓴ ꓕꓲꓽ ꓣꓳˍ ꓐꓰ ꓟꓽ ꓦꓺ ꓡꓱ ꓢꓴ ꓕꓲꓽ ꓣꓳ ꓥˍ ꓠꓬ ꓠꓲꓽ ꓖꓴ ꓢꓴ ꓥꓹ ꓠꓬ ꓐꓶꓽ ꓞꓳ ꓕꓲꓽ ꓣꓳ ꓐꓰ ꓡꓯꓽ ꓒꓯꓹ ꓝꓸ ꓔ ꓢꓲ ꓧꓹ ꓡꓯꓽ ꓘꓳ ꓠ ꓗꓶ ꓡꓰ꓾ ꓧꓹ ꓡꓯꓽ ꓘꓳ ꓓꓳ ꓡꓰ ꓠꓬ ꓠꓱꓸ ꓐꓯꓼ ꓕꓲꓽ ꓣꓳ ꓐꓰ ꓡꓯꓽ ꓒꓯꓹ ꓝꓸ ꓖꓶꓽ ꓠꓹ ꓟ ꓓꓰˍ ꓠꓬ ꓖꓶ ꓐ ꓡꓹ ꓡꓳ= ꓜꓳꓽ ꓓꓲ ꓡꓰˍ ꓟ ꓗꓳ ꓓꓱꓽ ꓔꓲꓼ ꓦꓹ ꓢꓴ ꓐꓯˍ ꓟ ꓠꓬ ꓐꓹ ꓐꓽ ꓤꓽ ꓔꓲꓸ ꓢꓲ-ꓫꓬ-ꓟ-ꓦ 3 ꓣꓳ ꓕꓲꓽ ꓗꓳ ꓓꓱꓽ ꓟꓬꓱ ꓗꓪ ꓐꓰ ꓗꓳ ꓓꓱꓽ ꓔꓲꓹ ꓔ ꓢꓴ ꓔꓯ ꓐꓯꓹ ꓟ ꓥ ꓪ (ꓟ-ꓕ 28ꓽ19)= ꓕꓱ ꓡꓰ ꓙꓵꓽ ꓪꓽ ꓖꓶ ꓐ ꓡꓹ ꓟ ꓔꓯ ꓑꓮꓴꓡꓲꓠꓰ ꓑꓣꓲꓦꓲꓡꓰꓖꓰ ꓝꓲ ꓓꓴ ꓒꓳ-ꓡꓳ ꓡꓰ ꓖꓶ ꓔ ꓟ ꓪ ꓙꓵꓽ ꓪꓽ ꓐꓯꓹ ꓟ ꓥ ꓪ (1ꓘꓳ-ꓡꓴ-ꓕꓵ 7ꓽ 12- 15)=

 ꓑꓮꓴꓡꓲꓠꓰ ꓑꓣꓲꓦꓲꓡꓰꓖꓰ ꓝꓲ ꓓꓴ ꓒꓳ-ꓡꓳ ꓡꓰ ꓖꓶ ꓔ ꓟ ꓪ ꓙꓵꓽ ꓪꓽ ꓔꓯ ꓪ ꓠꓹ ꓟ ꓙꓵꓽ ꓪꓽ ꓠꓹ ꓟ ꓠꓬ (1) ꓠꓬꓲꓽ ꓣꓳ ꓗꓪ ꓚꓳꓸ ꓕꓲꓽ ꓣꓳ ꓠꓬ ꓗꓳ ꓓꓱꓽ ꓔꓲꓹ ꓟ ꓟꓽ ꓙꓳ ꓢꓴ ꓗꓶ ꓡꓰ ꓠ ꓡꓳꓼ ꓥ꓾ ꓥꓹ ꓠꓬ ꓕꓲꓽ ꓣꓳ ꓜꓳꓽ ꓓꓲ ꓡꓰꓹ ꓟ ꓗꓳ ꓓꓱꓽ ꓔꓲꓹ ꓦ ꓢꓴ ꓗꓶ ꓡꓰ ꓟꓽ ꓓ= (2) ꓡꓯꓽ ꓒꓯꓹ ꓝꓸ ꓔ ꓕꓯ ꓐꓯ ꓘꓶꓽ ꓛꓹ ꓔ ꓟ ꓔꓯ ꓟꓽ ꓛꓳˍ ꓟ ꓪꓴꓸ ꓠꓬꓲ ꓠꓲ ꓧꓹ ꓡꓰ ꓕꓯꓽ꓾ ꓖꓳ ꓟ ꓡꓰ ꓜꓳ ꓓꓲ ꓡꓰꓹ ꓟ ꓖꓳ ꓓꓱꓽ ꓟꓽ ꓔꓲꓹ ꓦꓹ ꓢꓴ ꓕ꓾ꓽ ꓛꓱꓽ ꓔꓯ ꓢꓲ ꓧꓹ ꓟꓵ ꓢꓪˍ ꓕꓯ (3) ꓧꓹ ꓟꓵ ꓢꓪˍ ꓢꓴ ꓠꓬ ꓜꓳꓽ ꓓꓲ ꓡꓰˍ ꓟ ꓗꓳ ꓓꓱꓽ ꓔꓲꓹ ꓔ ꓟ ꓥˍ ꓠꓬ ꓠꓱꓸ ꓐꓯꓼ ꓘꓴ ꓜꓲꓼ ꓞꓳ ꓐꓯ ꓟꓵ ꓢꓪˍ ꓟ ꓠꓬ ꓜꓳꓽ ꓓꓲ ꓡꓰꓹ ꓟ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓐꓹ ꓐꓽ ꓤꓽ ꓔꓲ ꓢꓲ-ꓫꓬ-ꓟ-ꓦ ꓟꓬꓱ ꓗꓪ ꓐꓰ ꓟꓽ ꓥ ꓥ ꓠꓱꓸ ꓐꓯꓼ ꓘꓴ ꓜꓲꓼ ꓞꓳ ꓗꓪ ꓗꓳ ꓓꓱꓽ ꓔꓲꓹ ꓦꓹ ꓢꓴ ꓕꓱ ꓡꓲꓳˍ ꓫꓵ ꓞꓳ ꓤꓽ ꓕꓲ ꓣꓳ ꓙꓳ ꓕꓯꓽ ꓢꓲ ꓝꓮꓲ ꓕꓲꓽ ꓧꓪꓹ ꓙꓵꓽ ꓪꓽ ꓓꓰ ꓓ ꓥ=