ꓡꓽ ꓢꓯꓹ ꓐꓱ ꓘꓴꓽ ꓗꓪ ꓟ ꓟꓷꓽ ꓠꓷꓹ ꓝ ꓒ ꓓ-ꓠꓲ-ꓡꓰ

ꓪ ꓔꓲ ꓓ-ꓬꓴ-ꓢꓷ ꓡꓰ ꓐ-ꓐꓲ-ꓡꓶ ꓔꓯ ꓓꓶꓽ ꓧꓪꓸ ꓡꓰ ꓗꓷ ꓗꓸ ꓠꓯ ꓦ ꓐ ꓠꓬꓲꓽ ꓢ ꓟ ꓙꓳ ꓡ ꓕꓯ ꓬꓲ ꓠꓬ ꓗꓴꓷꓼ ꓔꓯ ꓙꓵꓽ ꓠꓹ ꓟ ꓡ ꓞꓳ ꓢ ꓣꓳ ꓢꓲꓺˍ ꓡꓳ= ꓓ-ꓠꓲ-ꓡꓰ ꓠꓬ ꓬꓲ ꓪ ꓢ ꓣꓳ ꓘꓴꓽ ꓗꓪ ꓕꓲ ꓣꓳ ꓥꓳ= ꓖꓳ ꓡꓱ ꓥˍ ꓟꓲ ꓗꓸ ꓠꓯꓸ ꓓ-ꓠꓲ-ꓡꓰ ꓠꓬ ꓠꓱꓸ ꓐꓯ ꓠꓬꓲꓽ ꓣꓳ ꓕꓯ ꓢꓲ ꓓꓹ ꓟ ꓔꓯ ꓪ ꓔꓲ ꓓ-ꓬꓴ-ꓢꓷ ꓡꓰ ꓢꓷꓸ ꓡꓰꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓓ-ꓠꓲ-ꓡꓰ ꓔꓯ ꓕꓲ ꓗꓴꓷꓼ ꓡꓱꓸꓼ ꓔꓯ ꓙꓵꓽ ꓝꓲˍ ꓐꓰ ꓬꓰˍ ꓡꓳ=

ꓖꓳ ꓡꓱ ꓠꓬꓲ ꓠꓱꓸ ꓐꓯ ꓫꓴ ꓙꓵꓽ ꓒ ꓐꓴ ꓠꓬ ꓓ-ꓠꓲ-ꓡꓰ ꓡꓰ ꓙꓵꓽˍ ꓟ ꓔꓯ ꓘꓳꓹ ꓣꓴ ꓠꓲꓹ ꓟꓽ ꓫꓵ ꓠꓬꓲ ꓬꓲ ꓔꓯ ꓛꓬꓻ ꓖꓴ ꓧꓪꓸ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓮꓸ ꓫꓵꓽˍ ꓟꓲ ꓧꓪ ꓟꓽ ꓟꓶ= ꓓ-ꓠꓲ-ꓡꓰ ꓠꓬ ꓦ ꓡꓱ ꓐꓳ ꓢꓲ ꓬꓰ ꓛꓬꓻ ꓡꓰ ꓖꓴˍ ꓐꓰ ꓬꓰ ꓐꓬ ꓡꓰ ꓖꓴ ꓟꓽ ꓙꓳ ꓟ ꓪꓴꓸ ꓠꓬꓲ ꓥ ꓡꓳ=

ꓖꓳ ꓕꓯ ꓬꓲ ꓪ ꓐꓴ ꓠꓬ ꓬꓲ ꓦ ꓡꓱˍ ꓟ ꓪꓴ-ꓢ ꓙꓵꓽ ꓗ ꓗꓪ ꓟꓽ ꓥ ꓠꓬ ꓣꓳ ꓠꓽ ꓓ-ꓠꓲ-ꓡꓰ ꓔꓯ ꓔꓳꓹ ꓠꓹ ꓟ ꓬꓲꓸ ꓑꓶꓸ ꓧꓪ ꓟꓳꓻ ꓟꓽ ꓓ꓾ ꓐꓰ ꓐꓯ ꓢꓲ꓾ ꓓ-ꓠꓲ-ꓡꓰ ꓔꓯ ꓔꓳꓹ ꓠꓹ ꓟ ꓬꓲ ꓚꓱꓹ ꓧꓪˍ ꓡꓳ= ꓡ ꓞꓳ ꓖꓳ ꓕꓲ ꓧꓳꓽ ꓡꓰ ꓪ ꓔꓲ ꓔꓯ ꓙꓰ ꓢꓲ꓾ ꓓ-ꓬꓴ-ꓢꓷ ꓪ ꓔꓲꓸ ꓳ꓾ ꓤꓶ ꓫꓵ ꓟꓯ ꓫꓵ ꓝꓲ= ꓪ ꓔꓲꓸꓳ꓾ ꓢ ꓞꓲ ꓠꓬꓲ ꓠꓯꓸꓼ ꓗꓪ ꓠꓴ ꓔꓯ ꓡꓰꓽ ꓟꓽ ꓥ ꓥ꓾ ꓠꓱ ꓐꓯ ꓢꓲꓺ ꓐꓰ ꓞꓳ ꓤ ꓔꓯ ꓶꓼ ꓓꓰ ꓢꓴ ꓮ ꓟ ꓔꓯ ꓥˍ ꓟꓲ꓾ ꓡꓽ ꓢꓯꓹ ꓐꓱ ꓗꓪ ꓡꓳꓺ ꓧꓳꓽ ꓗꓷ ꓠꓹ ꓟ꓾ ꓪ ꓔꓲ ꓠꓴ ꓡꓰ ꓙꓵꓽ ꓚꓱꓹ ꓕꓲ ꓚꓱꓹ ꓔꓶ ꓗꓷ ꓢꓲ꓾ ꓡꓶꓸ ꓟꓽ ꓓ ꓟ ꓕꓵꓼ ꓪ ꓬꓰ ꓠꓹ ꓟ ꓥꓪ ꓠꓴꓽ ꓮ ꓙꓵꓽ ꓠꓬ ꓕꓲ ꓪꓺꓼ ꓐꓰ ꓖꓪ ꓙꓱ ꓗꓷꓳ=

ꓪ ꓔꓲꓸꓳ꓾ ꓟꓲ-ꓓꓲˍ ꓐꓰ ꓒ-ꓫ ꓡ ꓞꓳ ꓡꓶꓸ ꓟꓽ ꓠ ꓟ ꓙꓵꓽ ꓗ ꓔꓯ ꓛꓳ ꓢꓲ꓾ ꓕꓵꓼ ꓪ ꓕꓱ ꓟ ꓔꓯˍ ꓟꓲ ꓕꓶ ꓡꓰ ꓝꓲ ꓢꓲ꓾ ꓟꓽ ꓡꓶꓸ ꓠꓹ ꓟ ꓮ ꓟꓶ ꓕꓳ ꓶ ꓗꓪ ꓠꓴ ꓟꓬꓱꓺ ꓐꓳ ꓡꓯ꓾ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓪ ꓔꓲ ꓡꓰ ꓕꓳ ꓶ ꓐꓰ ꓕꓵꓼ ꓪ ꓗꓪ ꓟꓬꓱꓺ ꓐꓳˍ ꓡꓳ= ꓬꓲ ꓪ ꓐꓴ ꓠꓬ ꓗꓴꓷꓼ ꓘꓴꓽ ꓗꓪ ꓠꓱꓸ ꓐꓯ ꓪꓴ-ꓢ ꓔꓯ ꓦ ꓡꓱ ꓟꓽ ꓓ ꓟ ꓙꓵꓽ ꓗ ꓬꓲ ꓫꓵꓼ ꓕꓲ ꓟ ꓫꓬꓹ ꓠꓹ ꓟ ꓐꓱ ꓶ ꓪ ꓔꓲ ꓔꓯ ꓗꓶꓸ ꓗꓷꓳ=

ꓓ-ꓠꓲ-ꓡꓰ ꓡꓰ ꓙꓵꓽ ꓗ ꓬꓲꓸ ꓫꓵꓼ ꓕꓲ ꓚꓱꓹ ꓫꓬ ꓗꓷ ꓟ ꓔꓯ ꓑ ꓙ ꓡꓰ ꓥˍ ꓟꓲ ꓬꓲ ꓠꓬ ꓪꓴ-ꓢ ꓔꓯ ꓡꓰꓽ ꓦ ꓡꓱˍ ꓡꓳ= ꓬꓲ ꓧꓶꓸ ꓕꓯ ꓬꓰ ꓔꓬ ꓟ ꓕꓲ ꓡꓰꓹ ꓙꓱ-ꓣꓴ-ꓢ-ꓡꓱ ꓔꓯ ꓟꓳꓸ ꓡꓳꓸ ꓔ ꓢꓲ ꓕꓲ ꓠꓬꓲ ꓢ ꓧꓪꓹ ꓪꓽ ꓘꓴˍ ꓡꓳ= ꓖꓳ ꓡꓱ ꓠꓬꓲ ꓙꓵꓽ ꓗ ꓫꓵꓼ ꓫꓬ ꓔꓶ ꓔ ꓢꓴ ꓡ ꓞꓳ ꓕꓲ ꓧꓳꓽ ꓡꓰ ꓬꓲ ꓪꓽ ꓘꓴ ꓔꓬ ꓟ ꓔꓯ ꓟꓳꓻ ꓗꓷ ꓕꓯ꓾ ꓡꓳꓸ ꓠꓬꓲ ꓓ-ꓠꓲ-ꓡꓰ ꓠꓽ ꓪꓴ-ꓢ ꓔꓯ ꓪꓽ ꓘꓴ ꓔꓬ ꓡꓳ= ꓬꓲ ꓠꓬ ꓙꓵꓽ ꓗ ꓫꓵꓼ ꓔꓯ ꓟꓽ ꓛꓳ ꓐꓭ꓾ ꓪ ꓔꓲ ꓔꓯ ꓐꓯ ꓖꓶ ꓙꓰ ꓡꓯ꓾ ꓐꓰ ꓐꓯ ꓡꓯ ꓘꓳ ꓢꓲ ꓪ ꓔꓲ ꓔꓬ ꓗꓪ ꓠꓲꓹ ꓞꓼ ꓙꓰˍ ꓡꓳ=

ꓪ ꓔꓲꓸ ꓓ-ꓬꓴ-ꓢꓷ ꓳ꓾ ꓙꓵꓽ ꓗ ꓫꓵꓼ ꓔꓯ ꓟꓽ ꓛꓳ ꓟ ꓡ ꓞꓳ ꓕꓲ ꓣꓳ ꓧꓪ ꓟꓶ ꓡꓰꓳ= ꓬꓲ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓗꓪ ꓟ ꓓ-ꓠꓲ-ꓡꓰ ꓥ ꓡꓳ= ꓙꓵꓽ ꓗ ꓔꓯ ꓟꓽ ꓛꓳ ꓛꓳ ꓐꓰ ꓬꓲ ꓠꓬ ꓕꓲ ꓠꓬꓲ ꓢ ꓧꓪꓹ ꓪꓽ ꓘꓴ ꓔꓬ ꓟ ꓔꓯ ꓥꓪ ꓠꓴꓽ ꓟꓳꓻ ꓗꓷꓳ꓾ ꓐꓯ ꓖꓶˍ ꓡꓳ=

ꓖꓳ ꓕꓯ ꓪ ꓔꓲ ꓠꓬ ꓓ-ꓠꓲ-ꓡꓰ ꓔꓯ ꓮ ꓡꓰ ꓗꓷ ꓡꓰ ꓝꓲ ꓠꓲꓹ ꓟꓽ ꓫꓵ ꓠꓬꓲ ꓕꓱ ꓟ ꓔꓯ ꓑ ꓙ ꓡꓰ ꓕꓯ ꓮ ꓘꓶꓸ ꓠꓲꓹ ꓟ ꓫꓸ ꓡꓰꓳ= ꓬꓲ ꓠꓬ ꓓ-ꓠꓲ-ꓡꓰ ꓡꓲꓹ ꓗꓷ ꓠꓹ ꓟ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓬꓲ ꓚꓱꓹ ꓧꓪ ꓔꓬ ꓡꓳ=

ꓖꓳ ꓡꓱ ꓥˍ ꓟꓲ ꓪ ꓔꓲꓸꓳ꓾ ꓪ ꓔꓲ ꓗꓪ ꓐꓰ ꓢꓷꓸ ꓙ ꓟꓳ ꓙ ꓔ ꓟ ꓙꓵꓽ ꓗ ꓕꓵꓼ ꓪ ꓐꓴ ꓠꓬ ꓡꓶꓸ ꓗꓷ ꓟꓽ ꓓ= ꓖꓳ ꓡꓱ ꓠꓬꓲ ꓓ-ꓠꓲ-ꓡꓰ ꓔꓯ ꓡꓽ ꓢꓯꓹ ꓐꓱ ꓗꓪ ꓡꓳꓺ ꓧꓳꓽ ꓗꓷ ꓠꓯꓹ ꓡꓳ꓾ ꓐꓰ ꓬꓲ ꓐꓴ ꓡꓰ ꓪ ꓔꓲ ꓔꓯ ꓐꓯ ꓖꓶˍ ꓟ ꓪꓴꓸ ꓠꓬꓲ ꓪ ꓔꓲ ꓡꓰ ꓓ-ꓠ-ꓡꓰ ꓔꓯ ꓡꓽ ꓢꓯꓹ ꓐꓱ ꓗꓪ ꓧꓳꓽ ꓗꓷ ꓐꓯ ꓖꓶˍ ꓡꓳ=

ꓖꓳ ꓡꓱ ꓢꓲ ꓬꓲ ꓪ ꓐꓴ ꓡꓰ ꓓ-ꓠꓲ-ꓡꓰ ꓔꓯ ꓞꓳꓹ ꓢꓲ ꓡꓽ ꓢꓯꓹ ꓐꓱ ꓗꓪ ꓧꓳꓽ ꓛꓲ ꓡ ꓕꓯ ꓪ ꓔꓲ ꓡꓰ ꓓ-ꓠꓲ-ꓡꓰ ꓔꓯ ꓠꓴ ꓡꓰ ꓮ ꓕꓯ ꓟꓲ ꓦ ꓡꓱ ꓪꓴꓸ ꓓꓵ ꓕꓱ ꓔꓬ ꓟ ꓪꓴ-ꓢ ꓡꓰ ꓠꓴ ꓔꓯ ꓚꓬꓴꓸ ꓙ ꓝꓲ꓾ ꓐꓯ ꓖꓶˍ ꓡꓳ= ꓓ-ꓠꓲ-ꓡꓰ ꓠꓬ ꓡꓽ ꓢꓯꓹ ꓐꓱ ꓗꓪ ꓫꓱꓽ ꓓꓵꓽ ꓙꓰ ꓗꓷ ꓕꓯ꓾ ꓟꓯꓼ ꓐꓴ ꓡꓰ ꓡꓽ ꓢꓯꓹ ꓐꓱ ꓘꓴ ꓗꓪ ꓭꓸ ꓛꓲ ꓓꓽ ꓟ ꓡꓰ ꓑꓲꓸ ꓗꓷꓳ=  ꓠꓱꓸ ꓐꓯ ꓮ ꓡꓰ ꓕꓲ ꓣꓳˍ ꓟꓲ ꓡꓽ ꓢꓯꓹ ꓗ ꓘꓶꓽ ꓟꓽ ꓒꓴ ꓗꓷ ꓠꓹ ꓟ ꓪ ꓔꓲ ꓓ-ꓬꓴ-ꓢꓷ ꓡꓰ ꓭꓸ ꓛꓲ ꓒꓬꓸ ꓗꓪ ꓪ ꓔꓲ ꓔꓳꓹ ꓠꓷꓼ ꓓꓴ ꓡꓰ ꓔꓳꓹ ꓠꓷꓼ ꓗꓷˍ ꓡꓳ=

ꓓ-ꓠꓲ-ꓡꓰ ꓔꓯ ꓟꓽ ꓧꓳꓹ ꓟ ꓙꓵꓽ ꓢꓲꓽ ꓒ ꓕꓲ ꓧꓳꓽ ꓠꓬ ꓾ ꓣꓳ ꓠꓬ ꓧꓪꓸ ꓡꓰꓳ= ꓣꓳ ꓚꓲꓸ ꓛꓬ ꓡꓰꓽ ꓟꓵꓽ ꓔꓯ ꓙꓵꓽ ꓐ ꓡꓻ ꓳ= ꓮ ꓟꓶ ꓣꓳ ꓬꓲꓼ ꓙꓰ ꓡꓯ= ꓢꓸ ꓠꓯ ꓠꓬ ꓓ-ꓠꓲ-ꓡꓰ ꓪꓳꓽ ꓔꓳ ꓫ ꓠꓹ ꓟ ꓡ ꓡꓯ꓾ ꓐꓰ ꓐꓯ ꓡꓯꓽ ꓘꓳ ꓢꓲ ꓬꓲꓼ ꓙꓰ ꓗꓷꓳ=

ꓪ ꓔꓲ ꓓ-ꓬꓴ-ꓢꓷ ꓠꓬ ꓓ-ꓠꓲ-ꓡꓰ ꓪꓴꓸ ꓠꓬꓲ ꓕꓲ ꓦꓬꓽ ꓡꓱꓸꓼ ꓓꓵꓽ ꓙ ꓟꓬꓽ ꓢꓲ ꓟꓽ ꓬꓲꓼ ꓟꓶ ꓟꓶ ꓔꓬ ꓡꓳ= ꓮ ꓫꓵꓽ ꓜꓽ ꓓꓴˍ ꓟꓲ ꓬꓲ ꓟꓽ ꓜꓽ= ꓕꓲ ꓦꓬꓽ ꓡꓱꓼ ꓠꓲꓹ ꓟ ꓫꓸ ꓔꓬ ꓡꓳ= ꓝꓮꓲ ꓕꓲ ꓠꓯꓼ ꓬꓲ ꓡꓰ ꓡꓽ ꓢꓯꓹ ꓐꓱ ꓗꓪ ꓞꓼ ꓞꓼ ꓔꓷꓹ ꓙꓰ ꓢꓲ꓾ ꓓ-ꓠꓲ-ꓡꓰ ꓳ ꓠꓴ ꓡꓰ ꓮ ꓕꓯ ꓟꓲ ꓣꓱꓽ ꓙ ꓢꓲ ꓦ ꓡꓱ ꓔꓬ ꓟ ꓪꓴ-ꓢ ꓠꓬ ꓠꓴ ꓔꓯ ꓚꓬꓴꓸ ꓗꓷ ꓐ ꓡˍ ꓡ? ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓓ-ꓠ-ꓡꓰ ꓠꓬ ꓪ ꓔꓲ ꓔꓯ꓾ ꓪ ꓔꓲꓸ ꓳ꓾ ꓤꓶ ꓙꓳ ꓟꓯ ꓙꓳ ꓝꓲ꓾

ꓥꓪ ꓪꓴ-ꓢ ꓠꓬ ꓬꓲ ꓝꓲ ꓓꓴ ꓝꓲ ꓩꓴ ꓡ ꓢꓲ꓾ ꓡ ꓢꓯꓹ ꓟꓷ ꓠꓷꓹ ꓔꓯ ꓛꓵꓽ ꓔ ꓠꓬꓲ꓾ ꓥꓪ ꓔꓯ ꓟꓽ ꓘꓳꓼ ꓡ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓥꓪ ꓛꓬ ꓖꓴ ꓟꓽ ꓙꓳ= ꓠꓴ ꓔꓯˍ ꓟꓲ ꓥꓪ ꓟꓽ ꓛꓬ ꓡꓰ ꓠꓬꓲ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓕꓯ ꓪ ꓔꓲ ꓡꓰ ꓮ ꓘꓶꓸ ꓠꓲꓹ ꓒꓴ ꓢꓲ꓾ ꓓ-ꓠꓲ-ꓡꓰ ꓔꓯ ꓡ-ꓢꓯꓹ ꓐꓱ ꓗꓪ ꓐꓰ ꓚꓵꓹ ꓓꓳ ꓡ ꓝꓲˍ ꓡꓳ= ꓬꓲ ꓪ ꓐꓴ ꓠꓬ ꓓ-ꓠꓲ-ꓡꓰ ꓔꓯ ꓚꓵꓹ ꓓꓳ ꓡ ꓢꓲ ꓬꓲ ꓔꓯ ꓡꓳꓸ ꓠꓬꓲˍ ꓕꓯ꓾ ꓬꓲ ꓔꓯ ꓮ ꓫꓵꓽ ꓠ ꓓꓴ ꓕꓲ ꓟˍ ꓟꓲ ꓟꓽ ꓙꓳ=

ꓖꓳ ꓡꓱ ꓠꓬꓲ ꓪ ꓔꓲ ꓠꓬ ꓓ-ꓠꓲ-ꓡꓰ ꓔꓯ ꓝꓴꓲꓸ ꓧꓪ ꓢꓲ ꓡꓽ ꓢꓯꓹ ꓐꓱ ꓗꓪ ꓧꓳꓽ ꓝꓲ ꓠꓹ ꓟ ꓕꓵꓼ ꓪ ꓖꓶ ꓢꓴ ꓖꓳ ꓕꓲ ꓧꓳꓽ ꓔꓯ ꓬꓲ ꓪ ꓤ ꓟꓶ ꓤ ꓠꓱ ꓐꓴ ꓐꓰ ꓕꓲ ꓪꓺꓼ ꓡꓽ ꓢꓯꓹ ꓐꓱ ꓗꓪ ꓧꓳꓽ ꓗꓷ꓾ ꓐꓰ ꓕꓵꓼ ꓪ ꓖꓶˍ ꓡꓳ=

ꓖꓳ ꓕꓯ ꓪ ꓔꓲ ꓓ-ꓬꓴ-ꓢꓷ ꓡꓰ ꓑ ꓫꓬ ꓐꓴ ꓔꓯ ꓕꓳ ꓶ ꓐꓳ ꓩꓴ ꓗꓷ ꓢꓲ꓾ ꓢꓲ ꓡꓲˍ ꓟ ꓠꓬ ꓠꓴ ꓪ ꓔꓯ ꓮ ꓟꓬꓹ ꓟꓶ ꓝꓲ= ꓥꓪ ꓙꓵꓽˍ ꓟ ꓗꓴꓷꓼ ꓕꓲ ꓗꓴꓷꓼ ꓡꓱꓹꓼ ꓗꓪ ꓔꓬ ꓟ ꓞꓳ ꓤ ꓮ ꓙꓵꓽ ꓓ-ꓠꓲ-ꓡꓰ ꓬꓲ ꓪꓴ-ꓢ ꓟꓲ ꓙꓬ ꓗꓪ ꓙꓳꓺ ꓛꓱꓽ ꓔꓬ ꓠ ꓗˍ ꓡꓳ= ꓮ ꓡꓲꓳ ꓐꓯˍ ꓠꓬ ꓓ-ꓠꓲ-ꓡꓰ ꓦ ꓡꓱ ꓔꓬ ꓟ ꓪꓴ-ꓢ ꓠꓬ ꓠꓱ ꓐꓯ ꓢꓲꓺ ꓮ ꓙꓵꓽ ꓕꓯ ꓢꓲ ꓪꓽ ꓠꓬꓲˍ ꓟ ꓪꓴ-ꓢ ꓥ ꓡꓳ꓾ ꓐꓰ ꓕꓳꓽ ꓶ ꓐꓳ ꓩꓴˍ ꓡꓳ=

ꓓ-ꓠꓲ-ꓡꓰˍ ꓟꓲ ꓓ-ꓬꓴ-ꓢꓷ ꓪ ꓔꓲ ꓣꓱˍ ꓟ ꓦꓬꓼ ꓠꓬꓲˍ ꓒ-ꓫ ꓡ ꓞꓳ ꓘꓴ-ꓣ-ꓫꓵ ꓪ ꓔꓲ ꓣꓱˍ ꓟ ꓦꓬꓼ ꓠꓬꓲ ꓗꓪ ꓛꓲ꓾ ꓪ ꓔꓲ ꓔꓯ ꓣꓱꓽ ꓙˍ ꓡꓳ= ꓬꓲ ꓠꓬ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓥ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓮ ꓘꓶꓸ ꓠꓲꓹ ꓒꓴ ꓢꓲ ꓬꓲ ꓔꓯ ꓶ ꓛꓳ ꓫꓱ ꓛꓳ ꓝꓲˍ ꓡꓳ=