ꓢꓲꓺ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓧꓪꓸ ꓡꓰ ꓟ ꓑꓮꓲꓽ

ꓢꓲꓺ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓧꓪꓸ ꓡꓰ ꓟ ꓑꓮꓲꓽ

ꓮꓽ ꓠꓱ ꓕꓯ ꓡꓯꓼ ꓐꓳ ꓔꓶꓸ ꓓꓴ ꓠꓬ꓾ ꓟꓽ ꓙꓲꓻ ꓟ ꓟꓬꓱꓽ ꓬꓰ ꓢꓴ ꓔꓯ ꓢꓰꓼˍ ꓗꓪ ꓣꓱꓽˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓣꓳꓽ ꓚꓬꓴꓸ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓗꓹ ꓛꓲˍ ꓟ ꓢꓯꓼ ꓟꓬꓹ ꓙ ꓖꓴ ꓗꓪ ꓙꓰ ꓠꓹ ꓟ ꓓꓽ ꓖꓴꓽ ( ꓖꓳꓽ ꓙꓱꓻ) ꓥ ꓡꓳ꓾ ꓐꓰ  ꓟꓬꓱꓺ ꓓꓳꓽ ꓖꓶ ꓗꓷꓳ= ꓝꓲ ꓓꓴ ꓒꓳ-ꓡꓳ ꓠꓬ “ꓖꓳ ꓡꓱ ꓥˍ ꓟꓲ ꓥꓪ ꓠꓴꓽ ꓠꓽ ꓕꓯꓼ ꓔꓶꓸ ꓗꓷ ꓟ ꓙꓲ-ꓢꓴ ꓟꓸ ꓟꓲꓽ ꓚ ꓟꓸ ꓖꓶˍ ꓡꓳ= ꓕꓱ ꓟ ꓠꓬ ꓬꓴ-ꓔ ꓡ ꓞꓳ ꓛꓲ ꓕꓲꓽ ꓓꓴ ꓥ ꓢꓲ꓾ ꓐꓶꓽ ꓞꓳ ꓔꓯ ꓟꓳꓸ ꓠꓽ ꓙꓲˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓡꓰ ꓘꓴ ꓔ ꓢꓴ ꓔꓯꓸ ꓟꓳ ꓠꓽ꓾ ꓬꓴ-ꓔ ꓡ ꓞꓳ ꓥˍ ꓟꓲ꓾ ꓦꓲ-ꓡꓲ ꓡ ꓞꓳ ꓥˍ ꓟꓲ꓾ ꓙꓲ-ꓢꓴ ꓠꓬ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓐꓰ ꓪꓴ-ꓢ ꓬꓲ ꓙꓽ ꓗꓴ ꓠꓲꓹ ꓥ ꓡꓳ= (1 ꓘꓳ-ꓡꓱ-ꓕꓴ ꓕꓳ ꓶ 1ꓽ23-24) ꓗꓪ ꓐꓳ ꓔ ꓡꓳ=

ꓢꓲꓺ ꓒ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓐꓰ ꓟꓽ ꓥ ꓠꓬ꓾ ꓟꓲ ꓠꓯ ꓡ ꓞꓳ ꓮꓽ ꓟ ꓥˍ ꓟꓲ ꓙꓲ-ꓢꓴ ꓢꓲꓺ ꓤ ꓒꓬꓱꓼ ꓡ ꓟꓽ ꓓ ꓐꓰ ꓐꓯ ꓔ ꓡꓳ= ꓝꓲ ꓓꓴ ꓡꓴ-ꓘ ꓡꓰ ꓐꓳ ꓔ ꓟ (ꓡꓴ-ꓘ ꓕꓳ ꓶ 9ꓽ 23) ꓗꓪ “ꓖꓳ ꓡꓱ ꓢꓲ ꓬꓲ ꓡꓰ ꓮ ꓙꓵꓽ ꓢꓴ ꓔꓯ꓾ ꓮꓽ ꓟ ꓥꓪ ꓔꓯ ꓛꓳ ꓠꓲꓹ ꓫꓵˍ  ꓠꓬ꓾ ꓚꓲ ꓛꓬ ꓙꓲ ꓖꓴ ꓡꓳ ꓗꓷ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ ꓠꓬꓲ ꓥꓪ ꓔꓯ ꓛꓳ ꓠꓯꓹ ꓡꓳ꓾” ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓧꓪꓸ ꓡꓰ ꓟ ꓑꓮꓲꓽ ꓔꓯ AD 620 ꓘꓳꓼ ꓕꓯ ꓢꓲꓺ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓝꓮꓲ ꓡꓳꓸ ꓟꓳˍ ꓟ ꓦꓬꓼ ꓠꓬꓲ ꓗꓪ ꓐꓰ ꓪꓴꓸꓔꓴ ꓩꓴ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓧꓪꓽ ꓖꓳ ꓓꓱ ꓔꓯ ꓣꓳ-ꓟ ꓟꓯꓼ ꓐꓴ ꓡꓰ ꓭꓸ ꓛꓲ ꓐꓰ ꓫꓬꓹ ꓔ ꓟ ꓡꓱꓼ ꓜꓴꓻ ꓗꓪ ꓔꓵꓸ ꓗꓷꓳ= ꓡꓯꓼ ꓐꓳ ꓔꓶꓸ ꓓꓴ ꓔꓯ ꓠꓬ ꓣꓳ-ꓟ ꓟꓯꓼ ꓤ ꓐꓴ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓦꓻ ꓡꓱ ꓢꓴ ꓡꓰ ꓟꓽ ꓡꓳꓸ ꓟꓳ ꓠꓹ ꓟ ꓡꓳ ꓘꓴꓽ ꓗꓪ ꓔꓵꓸ ꓗꓷꓳ= ꓖꓳ ꓡꓱ ꓥ ꓟꓲ꓾ AD 326 ꓘꓳꓼ ꓕꓯ ꓪ ꓔꓲ Constantine ꓬꓲ ꓟꓹ ꓟ ꓙꓲꓻ ꓫꓬ ꓢꓴ Helena ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓣꓳ-ꓟ ꓟꓯꓼ ꓤ ꓐꓴ ꓡꓰ ꓔꓵꓸ ꓔ ꓟ ꓗꓪ ꓐꓰ ꓧꓪ ꓟꓳ ꓡꓰꓳ=

ꓙꓲꓻ ꓫꓬ ꓢꓴ Helena ꓠꓬ ꓢꓲꓺ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓟ ꓪꓽ ꓘꓴ ꓦꓲ ꓓꓽ ꓕꓲ ꓟ ꓫꓬꓹ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓛꓬꓹ ꓗꓷꓳ= ꓖꓳ ꓡꓱ ꓥ ꓟꓲ AD 614 ꓘꓳꓼ ꓕꓯ Persia ꓟꓯꓼ ꓜꓴ ꓠꓬ Palestine ꓗꓴꓷꓼ ꓔꓯ ꓟꓯꓼ ꓢꓰꓼ ꓟꓯꓼ ꓓꓶ ꓗꓷ ꓢꓲ ꓠꓬꓲ꓾ ꓢꓲꓽ ꓫꓬ ꓟ ꓢꓲꓺ ꓒ  ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ Persia ꓗꓴꓷꓼ ꓗꓪ ꓣꓴ ꓔꓯꓹ ꓙꓰꓳ= ꓖꓳ ꓡꓱ ꓥ ꓟꓲ꓾ AD 629 ꓘꓳꓼ ꓕꓯ Constantinople ꓡꓳ  ꓒꓱ ꓔꓯ ꓙꓵꓽ ꓢꓴ ꓪ ꓔꓲ Emperor Heraclitus ꓠꓬ Persia ꓟꓯꓼ ꓜꓴ ꓔꓯ ꓟꓯꓼ ꓢꓰꓼ ꓟꓯꓼ ꓓꓶꓽ ꓡꓯ ꓘꓳ ꓗꓷꓳ= ꓟꓯꓼ ꓢꓰꓼ ꓟꓯꓼ ꓓꓶꓽˍ ꓕꓯ Persia ꓟꓯꓼ ꓜꓴ ꓐꓴ ꓛꓳꓸ ꓡꓰ ꓟ  ꓪꓴꓸ ꓠꓬꓲ꓾ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓝꓮꓲ ꓔꓯꓹ ꓡ ꓪ=

ꓪ ꓔꓲ ꓠꓬ ꓢꓲꓺ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓠꓲꓹ ꓫꓵˍ ꓟ ꓪꓴꓸ ꓠꓬꓲ꓾ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓪ ꓔꓲ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓑꓱꓸ ꓔꓯꓹ ꓡ ꓪ= ꓖꓳ ꓡꓱ ꓥ ꓟꓲ꓾ ꓪꓽ ꓘꓴ ꓦꓲ ꓟꓲꓽ ꓕꓯꓽ ꓢꓲ ꓗꓪ ꓛꓲ ꓡ ꓕꓯ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓔꓯꓹ ꓟꓽ ꓓ ꓗꓷ ꓡꓰꓳ= ꓖꓳ ꓟ ꓔꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴꓸ ꓟꓴ ꓔꓬ ꓟ ꓔꓲꓺ ꓒ ꓓꓽ Zachary ꓟꓬꓱꓺ ꓔ ꓟ ꓔꓲꓺ ꓒ ꓓꓽ ꓡꓰ ꓪ ꓔꓲ ꓔꓯ꓾ ꓪ ꓔꓲꓽꓳ ꓠꓴ ꓖꓪꓽ ꓫꓵꓽ ꓔꓯ ꓑ ꓗꓷ꓾ ꓐꓰ ꓐꓯ ꓖꓶ ꓗꓷꓳ= ꓖꓳ ꓕꓯ ꓪ ꓔꓲ Heraclitus ꓠꓬ ꓫꓸ ꓢꓴ ꓟꓷꓼ ꓢꓴˍ ꓡꓰ ꓐꓰ ꓖꓪꓽ ꓫꓵꓽ ꓖꓪꓽ ꓗꓷ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓡꓯ ꓐꓳ ꓔꓶꓸ ꓓꓴ ꓔꓯ ꓝꓮꓲ ꓪꓽ ꓘꓴ ꓦꓲ ꓘꓴꓽ ꓗꓪ ꓔꓯꓹ ꓓꓵꓽ ꓗꓷꓳ= ꓖꓳ ꓗꓸ ꓠꓯꓸ ꓪ ꓔꓲ ꓠꓬ ꓧꓶꓸ ꓕꓯ ꓢꓲꓺ ꓒ ꓬꓰ-ꓢꓴ ꓡꓯ ꓐꓳ ꓔꓶꓸ ꓓꓴ  ꓛꓬꓹ ꓖꓴ ꓗꓪ ꓝꓮꓲ ꓛꓬꓹ ꓗꓷꓳ=