ꓢꓲꓽ ꓫꓬ ꓕꓳ ꓶ ꓗꓪ ꓟ ꓫꓬ-ꓚꓬ ꓠꓬ ꓮꓽ ꓟ ꓥ ꓡ꓾

ꓫꓬ ꓚꓬ ꓠꓬ ꓮ-ꓐ-ꓡ-ꓦ ꓬꓲ ꓤ ꓟꓶ ꓢ-ꓣ ꓬꓲ ꓚꓳꓺ ꓟ ꓥ ꓟ ꓬꓲ-ꓙꓲ ꓤ ꓟꓶ ꓤ ꓕꓲ ꓣꓳ ꓥ ꓡꓳ= ꓬꓲ ꓚꓰꓺ ꓬꓲ ꓪꓴ ꓕꓳꓽ ꓶ 16 ꓕꓱ ꓗꓪ ꓫꓬ-ꓚꓬ ꓚꓱꓹ ꓮ ꓟꓬꓹ ꓔꓯ ꓣꓳ ꓟꓳꓻ ꓪ ꓓˍ ꓟ ꓥ ꓡꓳ= ꓪꓴ-ꓢ ꓠꓬ ꓮ-ꓐ-ꓡ-ꓦ ꓔꓯ ꓵꓻ ꓖꓴ ꓟꓽ ꓓ ꓟ ꓞꓲꓼ ꓤ ꓡꓯꓹ ꓤ ꓖꓶˍ ꓥꓳ ꓐꓰ ꓙ ꓟꓳ ꓘꓶꓽ ꓖꓶ ꓗꓷ ꓗ ꓠꓯꓸ (ꓬꓲ ꓚꓰꓺ ꓬꓲ ꓪꓴ 12ꓽ1-4) ꓞꓲꓺ ꓘꓳꓼ ꓛꓲꓺ ꓙꓳ ꓡꓰˍ ꓗꓪ ꓛꓲ ꓬꓲ ꓐꓰ ꓢ-ꓣ ꓔꓯ ꓤ ꓠꓱ ꓕꓲ ꓣꓳˍ ꓟꓲ ꓟꓽ ꓙꓳ ꓡꓰ ꓢꓰꓽ (ꓬꓲ ꓚꓰꓺ ꓬꓲ ꓪꓴ 16ꓽ1)= ꓖꓳ ꓡꓱ ꓠꓬꓲ ꓢ-ꓣ ꓠꓬ ꓠꓲꓹ ꓟ ꓫꓵꓺ ꓟꓽ ꓘꓴ ꓗꓷ ꓡꓰ ꓠꓬꓲ ꓬꓲ ꓤ ꓖꓴ ꓔꓯ꓾ ꓙꓰ ꓢꓲ ꓥꓪ ꓚꓳꓺ ꓟ ꓐꓰ ꓬꓲꓼ ꓔ ꓙꓰ= ꓮ ꓧꓪꓹ ꓬꓲ ꓗꓪ ꓐꓰ ꓤ ꓠꓱ ꓙꓳ ꓡˍ ꓟꓽ ꓢꓷꓸ ꓐꓰ ꓐꓯ ꓖꓶˍ ꓡꓳ= (ꓬꓲ ꓚꓰ ꓬꓲ ꓪꓴꓸ 16ꓽ2-3) ꓮ-ꓐ-ꓡ-ꓦ ꓟꓲ ꓢ-ꓣ ꓐꓯ ꓟ ꓡꓰ ꓬꓰ ꓗꓷ ꓠꓬ ꓫꓬ-ꓚꓬ ꓔꓯ ꓤ ꓶꓻ ꓡꓰꓳ=

ꓫꓵꓽ ꓪꓴ ꓕꓱ ꓟ ꓔꓯ ꓢ-ꓣ ꓬꓲ ꓚꓲ ꓛꓬ ꓫꓬꓹ ꓔ꓾ ꓧꓪ ꓔ ꓐꓯ ꓥˍ ꓟꓲ꓾ ꓬꓲ ꓠꓯꓸ ꓘꓪ ꓮ ꓟꓬꓹ ꓘꓳꓼ ꓣꓳˍ ꓟ ꓤ ꓟꓶ ꓤ ꓠꓬ ꓤ ꓶꓻ ꓡꓰ ꓕꓯ ꓢ-ꓔ ꓠꓽ ꓚꓳꓺ ꓟ ꓔꓯ ꓟꓻ ꓟꓽ ꓟꓵ ꓗꓷ ꓡꓰˍ ꓡꓳ= (ꓬꓲ ꓚꓰ ꓬꓲ ꓪꓴꓸ 16ꓽ4) ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓥꓪ ꓔꓬ ꓖꓴ ꓦꓴꓻ ꓡˍ ꓟꓽ ꓢꓷꓸ ꓐꓰ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓠꓬꓲ ꓢ-ꓣ ꓠꓬ ꓬꓲ ꓚꓳꓺ ꓟ ꓫꓬ-ꓚꓬ ꓔꓯ ꓠꓲꓹ ꓟ ꓦꓶꓻ ꓢꓲ ꓘꓶ ꓙꓵˍ ꓠꓬꓲ ꓬꓲ ꓠꓬ ꓡꓲꓺ ꓛꓲꓺ ꓗꓪ ꓛꓰꓹ ꓙꓰˍ ꓡꓳ= ꓬꓲ ꓚꓰ ꓬꓲ ꓪꓴꓸ 16ꓽ5-6) ꓪꓴ-ꓢ ꓬꓲ ꓝꓲ ꓓꓴ ꓠꓬ ꓬꓲ ꓔꓯ ꓟꓳꓻ ꓡꓰ ꓢꓲ ꓪꓴ-ꓢ ꓠꓬ ꓠꓴ ꓫ ꓙꓵˍ ꓟ ꓔꓯ ꓑ ꓙ ꓗꓷ ꓠꓬꓲ ꓠꓴ ꓬꓲ ꓔꓯ ꓬꓲ-ꓫꓵ-ꓟ-ꓡꓲ ꓐꓰ ꓟꓬꓱꓺ ꓖꓶ ꓠ ꓗˍ ꓡꓳ= ꓬꓲ ꓠꓬ ꓞꓳ ꓤ ꓗꓳ ꓡꓳ ꓗꓪ ꓕꓳꓽ ꓡ ꓟꓴꓽ ꓗꓳꓸˍ ꓡꓰ ꓐꓰ ꓗꓷ ꓡꓰ ꓢꓲ ꓠꓬꓲ꓾ ꓬꓲ ꓡꓯꓽ ꓒꓯꓹ ꓠꓬ ꓮ ꓙꓵꓽ ꓢꓴ ꓔꓯ ꓒꓳꓹ ꓢꓲ꓾ ꓮ ꓙꓵꓽ ꓢꓴ ꓡꓯꓽ ꓒꓯꓹ ꓠꓬ ꓬꓲ ꓔꓯ ꓒꓳꓹ ꓥꓳ꓾ ꓐꓯ ꓢꓲ ꓠꓲꓹ ꓟ ꓗꓴ ꓖꓶˍ ꓡꓳ= ꓬꓲ ꓚꓰ ꓬꓲ ꓪꓴꓸ 16ꓽ11-12) ꓕꓱ ꓟ ꓠꓬ ꓮ-ꓐ-ꓡ-ꓦ ꓪꓴ-ꓢ ꓐꓰ ꓫꓬ-ꓚꓬ ꓬꓲ ꓪꓴꓸ ꓟꓳꓻ ꓡꓯ ꓘꓳˍ ꓟ ꓥ ꓢꓲ ꓬꓲ ꓠꓬ ꓪꓴ-ꓢ ꓔꓯ “ꓥꓪ ꓔꓯ ꓟꓳˍ ꓟ ꓪꓴ-ꓢ” ꓐꓰ ꓘꓴˍ ꓡꓳ= (ꓬꓲ ꓚꓰ ꓬꓲ ꓪꓴꓸ 16ꓽ13) ꓗ ꓠꓯꓸ ꓫꓬ-ꓚꓬ ꓠꓬ ꓪꓴ-ꓢ ꓐꓯ ꓘꓶꓽ ꓙꓳˍ ꓟ ꓡꓰ ꓐꓰ ꓮ-ꓐ-ꓡ-ꓦ ꓐꓱ ꓶ ꓤ ꓕꓲ ꓣꓳ ꓦꓵꓻ ꓡ ꓢꓲ ꓬꓲ ꓔꓯ ꓬꓲ-ꓫꓵ-ꓟ-ꓡꓲ ꓐꓰ ꓟꓬꓱꓺ ꓖꓶˍ ꓡꓳ= ꓬꓲ ꓚꓰ ꓬꓲ ꓪꓴꓸ 16ꓽ15) ꓖꓳ ꓗ ꓠꓯꓸ 14 ꓘꓳꓼ ꓛꓲꓺ ꓙꓳ ꓡ ꓢꓲ ꓮ-ꓐ-ꓡ-ꓦ ꓐꓰ ꓢ-ꓣ ꓐꓴ ꓬꓲ-ꓢ ꓔꓯ ꓦꓵꓻ ꓡ ꓗꓷ ꓕꓯ ꓫꓬ-ꓚꓬ ꓚꓱꓹ ꓔꓯ ꓝ ꓢꓲ ꓐꓯ ꓓꓴ ꓙꓳ ꓡˍ ꓡꓳ=

ꓬꓲ-ꓢ ꓮ ꓚꓵꓹ ꓚꓰꓸ ꓗꓷ ꓗ ꓠꓯꓸ ꓟꓽ ꓟꓶ ꓫꓵ ꓕꓯ ꓚꓳꓺ ꓟ ꓬꓲ ꓤ ꓬꓲ-ꓫꓵ-ꓟ-ꓡꓲ ꓠꓬ ꓬꓲ-ꓢ ꓔꓯ ꓤꓲꓻ ꓔꓬ ꓟ ꓔꓯ ꓢ-ꓣ ꓟꓳꓻ ꓡꓰ ꓠꓬꓲ ꓢ-ꓣ ꓠꓬ ꓚꓳꓺ ꓟ ꓐꓰ ꓬꓲ ꓤ ꓔꓯ ꓖꓼ ꓓꓳ ꓗꓷ꓾ ꓬꓲ ꓤ ꓔꓯ ꓥꓪ ꓤ ꓐꓰ ꓕꓲ ꓪ ꓡꓯꓼ ꓪ ꓐꓱ ꓖꓶ ꓟꓽ ꓐ ꓡ꓾ ꓐꓰ ꓮ-ꓐ-ꓡ-ꓦ ꓔꓯ ꓐꓯ ꓖꓶˍ ꓡꓳ= ꓬꓲ ꓚꓰ ꓬꓲ ꓪꓴꓸ 21ꓽ10) ꓮ-ꓐ-ꓡ-ꓦ ꓠꓬ ꓫꓬ-ꓚꓬ ꓐꓴ ꓠꓬꓲꓽ ꓟꓸ ꓡ ꓐꓱ ꓶ ꓮ ꓘꓶꓸ ꓠꓲꓹ ꓟ ꓫ ꓥˍ ꓟꓲ ꓬꓲ ꓠꓬ ꓚꓳꓺ ꓟ ꓫꓬ-ꓚꓬ ꓐꓰ ꓬꓲ-ꓫꓵ-ꓟ-ꓡꓲ ꓐꓱ ꓶ ꓜꓼ ꓓꓴ ꓕꓲ ꓐꓱ ꓖꓶ ꓗꓷ ꓢꓲ ꓙꓰ ꓝꓲˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓡꓲ ꓛꓲ ꓟꓵꓽ ꓗꓪ ꓫꓱꓽ ꓥꓳꓽ ꓡꓰˍ ꓡꓳ= ꓬꓲ ꓚꓰ ꓬꓲ ꓪꓴꓸ 21ꓽ14

ꓜꓽ ꓓꓴ ꓐꓰ ꓬꓲꓻ ꓙꓬ ꓖꓴ ꓡꓰ ꓕꓯ ꓫꓬ-ꓚꓬ ꓠꓬ ꓬꓲ ꓮ ꓡꓲ ꓬꓰ ꓠꓯꓹ ꓟ ꓟꓽ ꓢꓷꓸ ꓗꓷ ꓡꓰ ꓢꓲ ꓬꓲ-ꓫꓵ-ꓟ-ꓡꓲ ꓔꓯ ꓢꓲꓹ ꓑꓳ ꓠꓯꓸꓼ ꓗꓪ ꓡꓳꓺ ꓔ ꓬꓰ ꓢꓲ ꓮ ꓔꓲꓸ ꓤ ꓶꓽ ꓞꓹ ꓟ ꓗꓪ ꓐꓰ ꓤ ꓠꓱ ꓤ ꓔꓯ ꓡꓳꓸ ꓔꓬ ꓡꓳ= ꓬꓲ ꓚꓰ ꓬꓲ ꓪꓴꓸ 21ꓽ16) ꓖꓳ ꓡꓱ ꓬꓰˍ ꓟ ꓠꓬ ꓤ ꓠꓱ ꓤ ꓫꓵˍ ꓟ ꓔꓯ ꓡꓳꓸ ꓠꓲꓹ ꓟꓽ ꓫꓵ ꓠꓬꓲ ꓶ ꓤ ꓗꓪ ꓔꓬ ꓟ ꓥ ꓡꓳ= ꓫꓬ-ꓚꓬ ꓥꓴꓻ ꓔꓬ ꓕꓯ ꓪꓴ-ꓢ ꓡꓰ ꓬꓲ ꓔꓯ ꓟꓴꓽ ꓗꓪ ꓗꓪ ꓐꓰ ꓘꓴ ꓢꓲ ꓫ ꓕꓱ ꓡˍ ꓡꓳ= ꓗ ꓠꓯ ꓬꓲ ꓔꓯ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶ ꓗꓷ ꓢꓲ꓾ ꓔꓴ꓾ ꓤ ꓠꓱ ꓤ ꓔꓯ ꓖꓳ ꓔꓴ ꓡ ꓢꓲ꓾ ꓬꓲ ꓔꓯ ꓢꓳꓸ ꓔ= ꓥꓪ ꓡꓰ ꓬꓲ ꓔꓯ ꓞꓳ ꓫꓵꓽ ꓓꓽ ꓟ ꓕꓲ ꓫꓵꓽ ꓒꓬꓱꓼ ꓡ ꓝꓲˍ ꓥꓳ꓾ ꓐꓯ ꓖꓶˍ ꓡꓳ= ꓪꓴ-ꓢ ꓡꓰ ꓬꓲ ꓔꓯ ꓟꓬ ꓢꓶꓽ ꓒꓴ ꓝꓲ ꓠꓬ ꓬꓲꓻ ꓙꓬ ꓘꓴ ꓕꓲ ꓘꓴ ꓟꓳˍ ꓡꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ= ꓪꓴ-ꓢ ꓠꓬ ꓫꓬ-ꓚꓬ ꓔꓯ ꓚꓬꓴꓸ ꓙ ꓗꓷ ꓢꓲ ꓬꓲ ꓔꓯ ꓥꓳ ꓡꓳꓸ ꓓꓴ ꓖꓶ ꓢꓲ ꓠꓬꓲ ꓙ ꓖꓴ ꓟꓸ ꓖꓶˍ ꓡꓳ= ꓪꓴ-ꓢ ꓠꓬ ꓬꓲ-ꓫꓵ-ꓟ-ꓡꓲ ꓐꓰ ꓕꓲ ꓪ ꓔꓬ ꓢꓲ ꓤ ꓖꓴ ꓡꓯꓸ ꓠꓬ ꓡꓲꓺ ꓛꓲꓺ ꓗꓪ ꓪꓴꓽ ꓡˍ ꓡꓳ=

ꓫꓬ-ꓚꓬ ꓐꓰ ꓮ-ꓐ-ꓡ-ꓦ ꓐꓴ ꓝꓴꓲꓸ ꓪꓴꓸ ꓠꓬꓲ ꓬꓲ-ꓢ ꓞꓲꓼ ꓤ ꓡꓯꓹ ꓤ ꓥ ꓟ ꓬꓳ-ꓔ ꓞꓳ ꓫꓵꓽ ꓐꓰ ꓬꓲ-ꓫꓵ-ꓟ-ꓡꓲ ꓞꓲꓼ ꓤ ꓡꓯꓹ ꓤ ꓥ ꓟ ꓬꓹ-ꓡꓽ-ꓑꓷ ꓞꓳ ꓫꓵꓽ ꓐꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓦꓬꓼ ꓠꓬꓲ ꓕꓯ ꓡꓰ ꓛꓴꓽ ꓙꓳ ꓡꓮ ꓘꓳ ꓢꓲ ꓮ ꓟꓬꓹ ꓘꓳꓼ ꓢꓰꓼ ꓡꓯ ꓘꓳꓹ ꓟ ꓓꓳ ꓡˍ ꓡꓳ= Islam ꓐꓴ ꓬꓲ ꓪ ꓐꓹ ꓐ ꓥ ꓟ Mohammed ꓠꓬ ꓬꓲ-ꓫꓵ-ꓟ-ꓡꓲ ꓕꓲ ꓪꓳꓼ ꓗꓪ ꓐꓰ ꓡˍ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓽ ꓫꓬ ꓟ ꓟꓵꓽ ꓥ ꓟ ꓬꓲ-ꓢꓷ-ꓡꓰ ꓟꓵꓽ ꓠꓬ Muslim ꓞꓳ ꓫꓵꓽ ꓐꓴ ꓬꓲ ꓪ ꓔꓯ ꓟ ꓥ ꓡꓳ꓾ ꓐꓰ ꓐꓯ ꓔꓬ ꓡꓳ= ꓬꓲ-ꓫꓵ-ꓟ-ꓡꓲ ꓠꓬ Arabic ꓞꓳ ꓫꓵꓽ ꓐꓴ ꓬꓲ ꓪ ꓐꓹ ꓐ ꓥ ꓟ ꓪꓴꓸ ꓠꓬꓲ ꓫꓬ-ꓚꓬ ꓠꓬ Islam ꓙꓵꓻ ꓠꓲꓹ ꓠꓯꓸꓼ ꓗꓪ ꓒꓵꓽ ꓗ ꓖꓶ ꓒꓵꓽˍ ꓟ ꓤ ꓟꓶ ꓤ ꓕꓲ ꓣꓳ ꓦ ꓡꓳ= Quran Islam ꓢꓲꓽ ꓫꓬ ꓕꓳ ꓶ ꓬꓲ ꓪꓴꓸ ꓗꓪ ꓠꓬ ꓫꓬ-ꓚꓬ ꓐꓰ ꓬꓲ ꓤ ꓬꓲ-ꓫꓵ-ꓟ-ꓡꓲ ꓐꓴ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓟ ꓓꓻ ꓒ ꓓꓻ ꓟ ꓐꓰ ꓐꓳ ꓟꓸ ꓖꓶ ꓔ ꓡꓳ=

ꓝꓲ ꓓꓴ ꓒꓳ-ꓡꓳ ꓠꓬ ꓚꓬꓴꓸ ꓙ ꓟꓶˍ ꓟ ꓚꓱꓹ ꓔꓯ ꓟꓸ ꓖꓶˍ ꓕꓯ ꓫꓬ-ꓚꓬ ꓐꓰ ꓢ-ꓣ ꓐꓴ ꓟꓸ ꓟꓲꓽ ꓣꓱꓽ ꓢꓲ ꓔꓯꓺ ꓥꓳꓽ ꓗꓪ ꓐꓰ ꓟꓸ ꓖꓶ ꓔ ꓡꓳ= ꓖ-ꓡ-ꓕꓲ-ꓬ 4 ꓕꓱ ꓗꓪ ꓫꓬ-ꓚꓬ ꓠꓬ ꓘꓶꓽ ꓫꓵꓽ ꓡꓵꓺ ꓙꓵꓽ ꓗ ꓔꓶ ꓐꓬꓱꓽ ꓥ ꓢꓲ꓾ ꓢ-ꓣ ꓠꓬ ꓘꓶꓽ ꓫꓵꓽ ꓫꓵꓼ ꓔꓶ ꓐꓬꓱꓽ ꓥ ꓡꓳ= ꓘꓶꓽ ꓫꓵꓽ ꓡꓵꓺ ꓠꓬ ꓙꓵꓽ ꓗ ꓐꓰ ꓞꓳ ꓤ ꓬꓰˍ ꓟ ꓟꓬꓱꓽ ꓕꓯꓽ ꓢꓲ ꓔꓶ ꓔ ꓟ ꓥ ꓢꓲ꓾ ꓘꓶꓽ ꓫꓵꓽ ꓫꓵꓼ ꓠꓬ ꓣꓱꓽ ꓛꓰꓽ ꓐꓰ ꓚꓬꓴꓸ ꓙˍ ꓟ ꓟꓬꓱꓽ ꓕꓯꓽ ꓢꓲ ꓔꓶ ꓔ ꓟ ꓥ ꓡꓳ= ꓝꓲ ꓓꓴ ꓒꓳ-ꓡꓳ ꓬꓲ ꓔꓯꓺ ꓥꓳꓽ ꓗꓪ ꓙꓵꓻ ꓢꓴ ꓐꓴ ꓠꓬ ꓢ-ꓣ ꓗꓪ ꓐꓰ ꓦꓵꓻ ꓔ ꓟ ꓔꓯ ꓫꓱˍ ꓡꓳ꓾ ꓣꓳ ꓠꓬ ꓩꓴ ꓗꓷ ꓟꓶˍ ꓡꓳ꓾ ꓢꓲ-ꓫꓬ-ꓟ-ꓦ ꓔꓯ ꓛꓳ ꓢꓲ ꓦꓵꓻ ꓔ ꓟ ꓥ ꓡꓳ= ꓚꓲ ꓛꓬ ꓢꓯꓼ ꓗꓪ ꓐꓰ ꓢꓯꓼ ꓕꓵꓼ ꓢꓳ ꓚꓬꓴꓸ ꓟꓶ ꓠꓹ ꓟ ꓢꓯꓼ ꓕꓵꓼ ꓔꓬ ꓢꓴ ꓠꓬ ꓫꓬ-ꓚꓬ ꓡꓰ ꓦꓵꓻ ꓔ ꓟ ꓤ ꓔꓯ ꓫꓱˍ ꓡꓳ= ꓬꓲ ꓪ ꓐꓴ ꓠꓬ ꓚꓳꓺ ꓑ ꓐꓴ ꓥ ꓢꓲ꓾ ꓧꓪꓽ ꓖꓳ ꓓꓱꓽ ꓔꓯ ꓛꓳ ꓢꓲ ꓦꓵꓻ ꓔ ꓢꓴ ꓐꓴ ꓥ ꓡꓳ= “ꓖꓳ ꓡꓱ ꓠꓬ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓐꓴ ꓠꓽ ꓚꓳꓺ ꓟ ꓬꓲ ꓤ ꓠꓱ ꓐꓴ ꓟꓽ ꓥ꓾ ꓢꓲꓺ ꓟ ꓬꓲ ꓤ ꓠꓱ ꓐꓴ ꓥ ꓡꓳ=” (ꓖ-ꓡ-ꓕꓲ-ꓬ 4ꓽ31)

ꓫꓬ-ꓚꓬ ꓟꓸ ꓟꓲꓽ ꓠꓬ ꓪꓴ-ꓢ ꓬꓲ ꓙꓲˍ ꓟ ꓔꓱꓹ ꓟ ꓐꓰ ꓐꓲ ꓜꓲꓼˍ ꓟꓲ ꓥ ꓢꓲ꓾ ꓫꓬ-ꓚꓬ ꓔꓯ ꓪꓴ-ꓢ ꓡꓰ ꓬꓰ ꓖꓶˍ ꓟ ꓟꓬꓱꓽ ꓔꓯ ꓣꓳ ꓢꓳ ꓣꓴ ꓐ ꓡˍ ꓡꓳ= ꓬꓲ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓟꓽ ꓥ꓾ ꓬꓲ ꓠꓬ ꓐꓶꓽ ꓞꓳ ꓗꓪ ꓐꓰ ꓡˍ ꓟ ꓚꓳꓺ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓟꓴꓽ ꓗꓪ ꓗꓪ ꓟ ꓪꓴ-ꓢ ꓠꓬ ꓬꓲ ꓫꓸ ꓙꓵꓻ ꓔꓬ ꓟ ꓔꓯ ꓟꓳꓻˍ ꓠꓬꓲ꓾ ꓬꓲ ꓠꓬ ꓮ-ꓐ-ꓡ-ꓦ ꓬꓲ ꓤ ꓥ ꓟ ꓪꓴꓸ ꓠꓬꓲ ꓫꓬ-ꓚꓬ ꓡꓰ ꓦꓵꓻ ꓔ ꓟ ꓬ-ꓫꓵ-ꓟ-ꓡꓲ ꓔꓯ ꓶꓼ ꓤ ꓫꓱꓹ ꓤ ꓖꓶˍ ꓡꓳ= ꓫꓬ-ꓚꓬ ꓠꓬ “ꓟꓳꓻˍ ꓟ ꓪꓴ-ꓢ” ꓐꓰ ꓐꓯ ꓟ El Roi ꓐꓯ ꓟ ꓐꓯ ꓘꓶꓽ ꓣꓳ ꓔꓯ ꓖꓶꓽ ꓔ ꓡꓳ= ꓝꓮꓲ ꓣꓳ ꓮ ꓟ ꓥˍ ꓟꓲ꓾ ꓮ ꓡꓰ ꓗꓪ ꓥˍ ꓟꓲ꓾ ꓪꓴ-ꓢ ꓠꓬ ꓣꓳ ꓔꓯ ꓡꓳꓸ ꓟꓳꓻ ꓢꓲ ꓣꓳ ꓔꓯ ꓠꓬꓲꓺ ꓙ ꓔꓬ ꓟ ꓔꓯ ꓫꓬ-ꓚꓬ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ= ꓪꓴ-ꓢ ꓠꓬ ꓬꓲ ꓔꓯ ꓟꓳꓸ ꓒꓳꓹ ꓡ ꓢꓴ ꓮ ꓙꓵꓽ ꓐꓱ ꓶ ꓠꓲꓹ ꓟ ꓗꓴꓺ ꓖꓶ ꓗꓷ ꓢꓲ ꓙ ꓟꓳ ꓘꓶꓽ ꓔꓯ ꓮ ꓕꓯ ꓟꓲ ꓐꓲ ꓡꓰ ꓝꓲˍ ꓟ ꓥ ꓡꓳ=