ꓢꓲꓽ ꓫꓬ ꓕꓳ ꓶ ꓗꓪ ꓠ-ꓔ-ꓠ ꓠꓬ ꓮ ꓟ ꓥ ꓡ?

ꓠ-ꓔ-ꓠ ꓠꓬ ꓬꓲ-ꓢꓷ-ꓡꓲ ꓗꓴꓷꓼ ꓗꓪ ꓪ ꓔꓲ ꓓ-ꓪꓵ ꓙꓵꓽˍ ꓟ ꓦꓬꓼ ꓠꓬꓲ ꓠꓯꓸꓼ ꓗꓪ ꓔꓬ ꓗꓷ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓥ ꓡꓳ= ꓪꓴ-ꓢ ꓠꓬ ꓠ-ꓔ-ꓠ ꓗꓪ ꓐꓰ ꓕꓲ ꓝ ꓓ-ꓪꓵ ꓔꓯ ꓮ ꓟꓬꓹ ꓧꓪꓹ ꓫꓸ ꓕꓱ ꓗꓷ ꓟ ꓥ ꓡꓳ= ꓠ-ꓔ-ꓠ ꓠꓬ ꓓ-ꓪꓵ ꓬꓲ ꓪ ꓔꓲ ꓦꓲꓻ ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓢꓲ ꓪ ꓔꓲ ꓬꓲ ꓒ ꓕꓲꓺ ꓗꓪ ꓔꓬ ꓢꓲ ꓪ ꓔꓲ ꓔꓯ ꓚꓴꓽ ꓬꓲꓹ ꓖꓶ ꓢꓴ ꓕꓲ ꓣꓳ ꓥ ꓡꓳ=

ꓠ-ꓔ-ꓠ ꓔꓯ ꓬꓲ ꓪꓴꓸ ꓟꓳꓸ ꓖꓶ ꓔ ꓟ ꓠꓬ ꓠ-ꓔ-ꓠ ꓠꓬ ꓦ ꓡꓱ ꓐꓳ ꓓꓹ ꓟ ꓚꓴꓽ ꓬꓲꓹ ꓖꓶ ꓢꓴ ꓕꓲ ꓣꓳˍ ꓡꓰ ꓐꓰ ꓓ-ꓪꓵ ꓐꓰ ꓙ ꓡꓯ ꓘꓳꓹ ꓡꓳ= ꓓ-ꓪꓵ ꓠꓬ ꓮ ꓘꓶꓸ ꓐꓲˍ ꓟ ꓪ ꓔꓲ ꓦꓲꓻ ꓗꓪ ꓔꓬ ꓢꓲ ꓘꓶꓽ ꓫꓵꓽ ꓢꓲꓹ ꓖꓶ ꓔꓯ ꓠꓬ ꓟꓶ ꓔꓶꓸ ꓦꓲꓻ ꓗꓪ ꓡꓰꓽ ꓓꓹ ꓢꓰꓽ ꓟ ꓑꓶꓸ ꓓꓴ ꓪꓴ-ꓢ ꓐꓱ ꓶ ꓦꓲꓻ ꓕꓲ ꓟ ꓫꓬꓹ ꓠꓹ ꓟ ꓙꓽ ꓖꓶ ꓔꓬ ꓟ ꓔꓯ ꓠ-ꓔ-ꓠ ꓔꓯ ꓐꓯ ꓖꓶˍ ꓕꓯ ꓠ-ꓔ-ꓠ ꓡꓰ ꓬꓲ ꓔꓯ ꓪꓴ-ꓢ ꓠꓬ ꓠꓴ ꓐꓰ ꓔꓬ ꓠꓬꓲ꓾ ꓠꓴ ꓮ ꓡꓲ ꓬꓰ ꓠꓲꓹ ꓫꓵˍ ꓟꓲ ꓬꓰ ꓛꓵˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=(2 ꓢ-ꓟꓴ-ꓬꓰ 7ꓽ2-3) ꓖꓳ ꓕꓲ ꓦꓬꓽ ꓗꓪ ꓪꓴ-ꓢ ꓠꓬ ꓠ-ꓔ-ꓠ ꓔꓯ ꓬꓲꓼ ꓟꓬ ꓗꓪ ꓟꓳꓸ ꓖꓶ ꓡ ꓢꓲ ꓓ-ꓪꓵ ꓔꓬ ꓗꓪ ꓙꓰ ꓢꓲ ꓪꓴ-ꓢ ꓐꓱ ꓶ ꓦꓲꓻ ꓫꓬꓹ ꓟꓽ ꓛꓵꓺ ꓟ ꓔꓯ ꓐꓯ ꓖꓶ ꓙꓰ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓪꓴ-ꓢ ꓠꓬ ꓓ-ꓪꓵ ꓬꓲ ꓤ ꓗꓪ ꓐꓰ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓔꓯ ꓕꓲ ꓞꓲꓼ ꓕꓶ ꓞꓹ ꓝꓲˍ ꓥꓳ= ꓬꓲ ꓤ ꓢꓳ-ꓡꓳ-ꓟꓳ ꓠꓬ ꓪꓴ-ꓢ ꓦꓲꓻ ꓔꓯ ꓫꓬꓹ ꓢꓴ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ= ( 2 ꓢ-ꓟꓴ-ꓬꓰ 7ꓽ4-17) ꓠ-ꓔ-ꓠ ꓠꓬ ꓪ ꓔꓲ ꓔꓬ ꓗꓪ ꓙꓰ ꓢꓲ ꓐꓯ ꓘꓶꓽ ꓕꓱ ꓟ ꓔꓯ ꓐꓯ ꓖꓶ ꓗꓷ ꓢꓲ꓾ ꓓ-ꓪꓵ ꓠꓬ ꓪꓴ-ꓢ ꓣꓱꓽ ꓛꓰꓽ ꓐꓱ ꓶ ꓪꓴ-ꓢ ꓔꓯ ꓫ ꓟꓳ ꓢꓲ ꓪꓽ ꓘꓴˍ ꓡꓳ= (2 ꓢ-ꓟꓴ-ꓬꓰ 7ꓽ18-29)

ꓠ-ꓔ-ꓠ ꓔꓯ ꓝꓮꓲ ꓕꓲ ꓧꓪꓹ ꓟꓳꓸ ꓖꓶ ꓔ ꓟ ꓠꓬ꓾ ꓓ-ꓪꓵ ꓡꓰ ꓐꓯ-ꓫꓱ-ꓐ ꓐꓰ ꓬꓲꓼ ꓔ ꓗꓷ ꓢꓲ ꓐꓯ-ꓫꓱ-ꓐ ꓖꓳ ꓓꓱꓽ ꓡꓲꓽ ꓡꓰ ꓟ ꓔꓯ ꓑꓲꓸ ꓗꓷ ꓠꓹ ꓟ ꓐꓱ ꓶ ꓬꓲ ꓤ ꓖꓴ ꓪꓴ-ꓡꓲ-ꓬ ꓔꓯ ꓫꓵꓻ ꓝꓲˍ ꓟ ꓗꓪ ꓥ ꓡꓳ=( 2 ꓢ-ꓟꓴ-ꓬꓰ 12ꓽ1) ꓖꓳ ꓕꓲ ꓙꓵꓹ ꓗꓪ ꓓ-ꓪꓵ ꓠꓬ ꓐꓯ-ꓫꓱ-ꓐ ꓔꓯ ꓬꓲ ꓤ ꓟꓶ ꓬꓰˍ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓓ-ꓪꓵ ꓬꓰ ꓗꓷ ꓟ ꓔꓯ ꓟꓽ ꓠꓲꓹ ꓒꓴ ꓠꓬꓲ ꓓ-ꓪꓵ ꓔꓯ ꓐꓯ ꓖꓶ ꓬꓰ ꓝꓲˍ ꓡꓳ= ꓖꓳ ꓡꓱ ꓠꓬꓲ ꓠ-ꓔ-ꓠ ꓠꓬ ꓓ-ꓪꓵ ꓔꓬ ꓗꓪ ꓙꓰ ꓢꓲ ꓞꓳ ꓐꓳ ꓒ ꓕꓲ ꓣꓳ ꓐꓰ ꓞꓳ ꓫꓸ ꓕꓲ ꓣꓳ ꓟꓸ ꓟꓲꓽ ꓔꓯ ꓬꓲ ꓚꓱꓹ ꓙꓳ ꓙꓳ ꓡꓰꓽ ꓐꓯ ꓟꓸ ꓖꓶˍ ꓡꓳ꓾ ꓓꓴꓻ ꓓꓳ ꓢꓴ ꓕꓲ ꓣꓳ ꓠꓬ ꓞꓳ ꓐꓳ ꓦꓲ ꓗꓪ ꓛꓲꓻ ꓡ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓚꓲ ꓛꓬ ꓮ ꓣꓳ ꓜꓴꓻ ꓗꓪ ꓐꓰ ꓪꓰꓻ ꓤ ꓔꓯ ꓢꓰꓼ ꓖꓶ ꓜꓽ ꓟꓽ ꓬꓯꓼ ꓠꓬꓲ꓾ ꓕꓲ ꓟˍ ꓡꓰꓽ ꓙꓳˍ ꓟ ꓞꓳ ꓫꓸ ꓮ ꓣꓳ ꓔꓯ ꓢꓰꓼ ꓢꓲ ꓬꓲ ꓪꓰꓻ ꓤ ꓔꓯ ꓖꓶ ꓜꓽˍ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓟ ꓔꓯ ꓑ ꓙꓽ ꓡꓰ ꓕꓯ ꓓ-ꓪꓵ ꓠꓬ ꓠꓲꓹ ꓟ ꓦꓶꓻ ꓔꓴ ꓡ ꓢꓲ ꓞꓳ ꓐꓳ ꓠꓬ ꓫꓱꓸ ꓤ ꓠꓲꓹ ꓟꓽ ꓙꓳ ꓟ ꓪꓴꓸ ꓠꓬꓲ ꓫꓵꓻ ꓒꓵꓽˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ= ꓖꓳ ꓕꓯ ꓠ-ꓔ-ꓠ ꓡꓰ ꓞꓳ ꓐꓳ ꓖꓳ ꓕꓲ ꓣꓳ ꓟ ꓠꓬ ꓠꓴ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ= (2 ꓢ-ꓟꓴ-ꓬꓰ 12ꓽ7)

ꓓ-ꓪꓵ ꓡꓰ ꓪꓴ-ꓡꓲ-ꓬ ꓬꓲ ꓤ ꓟꓶ ꓔꓯ ꓫ ꓗꓷ ꓟ ꓑꓶꓸ ꓓꓴ ꓪ ꓔꓲ ꓠꓬ ꓞꓳ ꓐꓳ ꓤ ꓔꓯ ꓫꓱꓸˍ ꓡꓳ꓾ ꓐꓰ ꓠ-ꓔ-ꓠ ꓡꓰ ꓖꓴ ꓟꓸ ꓖꓶˍ ꓡꓳ= ꓖꓳ ꓗ ꓠꓯꓸ ꓠ-ꓔ-ꓠ ꓠꓬ ꓓ-ꓪꓵ ꓔꓯ ꓪꓴ-ꓢ ꓐꓯ ꓘꓶꓽ ꓙꓳˍ ꓟ ꓡꓰ ꓕꓲ ꓡꓰꓹ ꓕꓱ ꓡꓱ ꓟꓷꓽ ꓠꓷꓹ ꓝꓸ ꓖꓶˍ ꓡꓳ꓾ ꓬꓲ-ꓢꓷ-ꓡꓰ ꓪ ꓔꓲ ꓬꓰ ꓠꓹ ꓟ ꓥꓪ ꓡꓰ ꓠꓴ ꓔꓯ ꓟꓰ ꓞꓶ ꓟꓰ ꓖꓶ ꓗꓷ ꓢꓲ ꓢꓳ-ꓡꓳ ꓡꓯ ꓒꓯꓹ ꓗꓪ ꓐꓰ ꓠꓴ ꓔꓯ ꓚꓬꓴ ꓙ ꓗꓷꓳ= ꓝꓮꓲ ꓢꓳ-ꓡꓳ ꓡꓯꓼ ꓪ ꓐꓰ ꓬꓲ ꓤ ꓟꓶ ꓠꓴ ꓔꓯ ꓖꓶ ꓗꓷ ꓢꓲ ꓠꓴ ꓔꓯ ꓠꓬ ꓬꓲ-ꓢꓷ-ꓡꓰ ꓐꓰ ꓬꓴ-ꓔ ꓔꓯ ꓙꓵꓽ ꓢꓴ ꓬꓰ ꓝꓲ ꓗꓷꓳ= ꓕꓱ ꓟ ꓠꓲꓸˍ ꓕꓯ ꓠꓽ ꓥꓪ ꓡꓰ ꓠꓴ ꓔꓯ ꓟꓬꓽ ꓠꓬꓲ ꓡꓴꓽ ꓖꓶˍ ꓫꓵꓽ ꓥꓳ= ꓠꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥꓶˍ ꓟ ꓬꓰ ꓢꓲ ꓪꓴ-ꓢ ꓕꓵꓼ ꓘꓶꓽ ꓔꓯ ꓟꓳ ꓟꓽ ꓟꓵ ꓬꓰˍ ꓡ?

ꓠꓴ ꓠꓬ ꓪꓴ-ꓡꓲ-ꓬ ꓔꓯ ꓯ-ꓟꓷ ꓡ ꓞꓳ ꓡꓯ ꓒꓯꓹ ꓗꓪ ꓮ ꓕꓽ ꓪꓴꓸ ꓒꓲꓹ ꓡꓰ ꓢꓰꓼ ꓗꓷ ꓝꓲ ꓢꓲ ꓬꓲ ꓤ ꓟꓶ ꓔꓯ ꓠꓴ ꓫˍ ꓡꓳ= ꓖꓳ ꓡꓱ ꓢꓲ ꓠꓴ ꓠꓬ ꓥꓪ ꓔꓯ ꓟꓳ ꓟꓽ ꓟꓵ ꓬꓰ ꓢꓲ ꓧꓷ-ꓕꓷ ꓡ ꓞꓳ ꓪꓴ-ꓡꓲ-ꓬ ꓤ ꓟꓶ ꓔꓯ ꓫ ꓗꓷ ꓠꓬꓲ ꓮ ꓕꓽ ꓪꓴꓸ ꓒꓲꓹ ꓠꓬ ꓠꓴ ꓕꓲꓽ ꓦꓲ ꓢꓴ ꓗꓪ ꓐꓰ ꓮ ꓕꓯˍ ꓟꓲ ꓟꓽ ꓧꓹ ꓙꓰ꓾ ꓐꓯ ꓖꓶˍ ꓡꓳ= (2 ꓢ-ꓟꓴ-ꓬꓰ 12ꓽ7-10)

ꓓ-ꓪꓵ ꓠꓬ ꓪꓴ-ꓢ ꓔꓯ ꓛꓬ ꓗꓷꓳ꓾ ꓐꓰ ꓠ-ꓔ-ꓠ ꓔꓯ ꓐꓯ ꓖꓶˍ ꓕꓯ ꓠ-ꓔ-ꓠ ꓡꓰ ꓠꓴ ꓝꓴꓲ ꓠꓬ ꓪꓴ-ꓢ ꓡꓰ ꓖꓽ ꓖꓶ ꓗꓷ ꓠꓬꓲ ꓠꓴ ꓠꓽ ꓟꓽ ꓫꓵꓻ ꓖꓳ ꓡꓱ ꓥˍ ꓟꓲ ꓠꓴ ꓤ ꓠꓽ ꓫꓵˍ ꓥꓳ꓾ ꓐꓯ ꓖꓶˍ ꓡꓳ=

ꓓ-ꓪꓵ ꓬꓲ ꓤ ꓫꓵꓻ ꓗꓷ ꓗ ꓠꓯꓸ꓾ ꓬꓲ ꓤ ꓟꓶ ꓐꓯ-ꓫꓱ-ꓐ ꓠꓬ ꓤ ꓠꓱ ꓶꓻ ꓡꓰˍ ꓡꓳ= ꓤ ꓠꓵ ꓖꓳ ꓕꓲ ꓣꓳ ꓦꓵꓻ ꓡ ꓕꓯ ꓬꓲ ꓔꓯ ꓢꓳ-ꓡꓳ-ꓟꓳ ꓟꓬꓱ ꓖꓶˍ ꓡꓳ= ꓪꓴ-ꓢ ꓡꓰ ꓠ-ꓔ-ꓠ ꓔꓯ ꓓ-ꓪꓵ ꓔꓬ ꓗꓪ ꓝꓲ ꓩꓴ ꓗꓷ ꓢꓲ꓾ ꓕꓱ ꓕꓲ ꓧꓪꓹ ꓗꓪ ꓠꓬ ꓓ-ꓪꓵ ꓬꓲ ꓤ ꓢꓳ-ꓡꓳ-ꓟꓳ ꓔꓯ ꓪꓴ-ꓢ ꓮ ꓘꓶꓸ ꓠꓲꓹ ꓠꓵˍ ꓟ ꓐꓰ ꓬꓲ ꓔꓯ ꓙꓱ-ꓓꓲ-ꓬ ꓐꓰ ꓟꓬꓱ ꓖꓶ ꓠꓹ ꓟ ꓐꓯ ꓖꓶ ꓬꓰ ꓝꓲˍ ꓡꓳ= ꓙꓱ-ꓓꓲ-ꓬ ꓐꓯ ꓟ ꓠꓬ “ꓪꓴ-ꓢ ꓠꓲꓹ ꓠꓵˍ ꓟ” ꓐꓯ ꓟ ꓥ ꓡꓳ= (2 ꓢ-ꓟꓴ-ꓬꓰ 12ꓽ24-25) ꓗ ꓠꓯꓸ ꓕꓯ ꓢꓳ-ꓡꓳ-ꓟꓳ ꓠꓬ ꓪꓴ-ꓢ ꓦꓲꓻ꓾ ꓪꓽ ꓘꓴ ꓦꓲꓻ ꓔꓯ ꓫꓬꓹ ꓗꓷ ꓢꓲ ꓢꓳ-ꓡꓳ-ꓟꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓒꓵꓽ ꓒ ꓒꓬꓱꓼ ꓡꓺꓳ= 1 ꓚꓺ ꓟꓲꓽ ꓕꓳ ꓶ 3ꓽ5 ꓗꓪ ꓪ ꓔꓲ ꓓ-ꓪꓵ ꓐꓰ ꓪ ꓔꓲ ꓟ ꓐꓯ-ꓫꓱ-ꓐ ꓗꓪ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓦꓵꓻ ꓔ ꓟ ꓤ ꓠꓱ ꓘꓴꓽ ꓗꓪ ꓟ ꓤ ꓕꓲ ꓣꓳ ꓔꓯ ꓠ-ꓔ-ꓠ ꓐꓰ ꓐꓰ ꓟꓬꓱꓺ ꓖꓶ ꓔ ꓟ ꓙꓳˍ ꓡꓳ= ꓬꓲ ꓪ ꓐꓴ ꓡꓰ ꓟꓷꓼ ꓠꓷꓹ ꓝ ꓒ ꓠ-ꓔ-ꓠ ꓔꓯ ꓒꓵꓽ ꓗ ꓬꓰˍ ꓟ ꓪꓴꓸ ꓠꓬꓲ ꓬꓲ ꓪ ꓤ ꓔꓯ ꓠ-ꓔ-ꓠ ꓐꓰ ꓟꓬꓱꓺ ꓖꓶ ꓔ ꓟ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=