ꓢ-ꓟ-ꓡꓲ ꓡꓳ ꓒꓱ ꓚꓱꓹ

ꓖ-ꓡꓲ-ꓡꓲ ꓟꓵꓽ ꓗꓪ ꓐꓰ ꓖꓴ ꓪꓴꓸ ꓗꓪ ꓛꓲꓺ꓾ ꓖꓴ ꓟꓶꓸ ꓕꓲꓽ ꓛꓱꓽ ꓗꓪ ꓟ ꓬꓴ-ꓔ ꓟꓵꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓓꓯꓹ ꓟ ꓢ-ꓟ-ꓡꓲ ꓟꓵꓽ ꓠꓬ ꓬꓲ-ꓢꓷ-ꓡꓲ ꓚꓺ ꓟꓲꓽ ꓗꓪ ꓮ ꓘꓶꓸ ꓟꓬꓱ ꓓꓳꓽ ꓪꓴꓽˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓘꓳꓼ ꓮ ꓟꓬꓹ ꓘꓳꓼ ꓗꓪ ꓛꓲꓺ ꓐꓶꓽ ꓒ ꓞꓳ ꓚꓬꓼ ꓒꓬꓱꓼ ꓗꓷ ꓟ ꓪꓴꓸ ꓠꓬꓲ ꓾ ꓠꓱꓸ ꓐꓯꓼ ꓬꓴ-ꓔ ꓞꓳ ꓫꓵꓽ ꓐꓴ ꓗꓪ ꓐꓰ ꓠꓬꓲꓺ ꓟꓽ ꓟꓵ꓾ ꓛꓳꓽ ꓟꓽ ꓟꓵꓽ ꓗꓷ ꓡꓰꓳ=

ꓦꓲ-ꓐꓱ-ꓣꓴ ꓥꓳꓽ ꓗꓪ ꓐꓰ ꓾ ꓢ-ꓟ-ꓡꓲ ꓠꓬ꓾ “ꓡꓳꓸ ꓖꓴ ꓪ ꓚꓲꓺ” ꓟꓽ ꓥ ꓠꓬ “ꓟꓵꓽ ꓔꓳꓹ ꓤꓲ” ꓐꓰ ꓐꓯˍ ꓟ ꓥ ꓡꓳ= ꓢ-ꓟ-ꓡꓲ ꓐꓯˍ ꓟ ꓠꓬ ꓡꓳ ꓒꓱ ꓐꓰ ꓟꓵꓽ ꓠꓬꓲ ꓫꓵꓽ ꓡꓱꓸꓼ ꓔꓯ ꓐꓯˍ ꓟ ꓥ ꓡꓳ= ꓪꓴ-ꓢ ꓡꓰ ꓙ ꓟꓳ ꓔ ꓟ ꓟꓵꓽ ꓔꓯ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓴ ꓓꓶꓽ ꓧꓪꓸ ꓡꓰˍ ꓕꓯ ꓾ ꓟꓵꓽ ꓕꓱ ꓟ ꓔꓯ ꓟ-ꓠ-ꓢꓲ ꓐꓰ ꓬꓲ-ꓒ-ꓡꓲ ꓞꓳ ꓫꓵꓽ ꓐꓴ ꓔꓯ ꓖꓶꓽ ꓗꓷ ꓟ ꓥ ꓡꓳ=

ꓖꓳ ꓗꓸ ꓠꓯꓸ ꓢ-ꓟ-ꓡꓲ ꓡꓳ ꓒꓱ ꓔꓯ ꓪꓺ ꓔꓲ ꓳ-ꓟꓲ-ꓬ ꓡꓰ ꓪꓽ ꓚꓲ ꓕꓯ ꓢꓲ ꓗꓪ ꓫꓬꓹ ꓜꓶꓻ ꓗꓷ ꓢꓲ꓾ ꓧꓶꓸ ꓕꓯꓽ ꓪ ꓚꓲ ꓢꓲꓺ ꓒ ꓫ-ꓟ-ꓡ ꓟꓬꓱꓺ ꓔꓯ ꓛꓳ ꓢꓲ꓾ ꓢ-ꓟ-ꓡꓲ ꓐꓰ ꓟꓬꓱꓺ ꓖꓶˍ ꓡꓳ= ꓗꓴꓷꓼ ꓬꓲꓸ ꓗꓪꓺ ꓗꓪꓺ ꓡꓰ ꓕꓯ ꓾ ꓢ-ꓟ-ꓡꓲ ꓠꓬ ꓬꓲ-ꓢꓷ-ꓡꓲ ꓖꓴ ꓪꓴꓸ ꓟꓵꓽ ꓗꓪ ꓟ ꓡꓳ ꓒꓱ ꓓꓽ ꓟ ꓒꓬꓱꓼ ꓡ ꓢꓲ꓾ ꓙꓱ-ꓣꓴ-ꓢ-ꓡꓱ ꓠꓬ ꓬꓴ-ꓔ ꓟꓵꓽ ꓖꓴ ꓟꓶꓸ ꓗꓪ ꓟ ꓡꓳ ꓒꓱ ꓓꓽ ꓟ ꓒꓬꓱꓼ ꓡˍ ꓡꓳ=

ꓢ-ꓟ-ꓡꓲ ꓞꓳ ꓫꓵꓽ ꓐꓴ ꓠꓬ ꓾ ꓬꓲꓸ ꓪ ꓐꓴ ꓠꓬ ꓬꓳ-ꓢꓷ ꓬꓲꓸ ꓤ ꓐꓴ ꓥ ꓟ ꓟ-ꓠ-ꓢꓲ ꓐꓰ ꓬꓲ-ꓒ-ꓡꓲ ꓐꓴ ꓗꓪ ꓐꓰ ꓡˍ ꓟ ꓬꓳ-ꓢꓷ ꓞꓲꓼ ꓤ ꓡꓯꓹ ꓤ ꓥ ꓡꓳ ꓐꓰ ꓘꓳꓹ ꓣꓴ ꓔ ꓡꓳ= ꓖꓳ ꓟ ꓡꓰꓽ ꓟꓽ ꓛꓲ ꓫꓱꓸ ꓖꓶꓽ ꓖꓴ ꓠꓬ ꓾ꓬꓳ-ꓫꓴ ꓦꓬꓼ ꓠꓬꓲ ꓕꓯ ꓟ ꓖꓷ-ꓣ-ꓜꓲ-ꓟꓷ ꓪ ꓚꓲ ꓕꓯꓽ ꓢꓲ ꓗꓪ ꓟ ꓫꓱ-ꓘꓷ-ꓟꓷ ꓗꓪ ꓓ ꓠꓯꓹ ꓡꓳ ꓐꓰ ꓙꓵꓻ ꓔ ꓡꓳ= ꓖꓳ ꓡꓱ ꓥ ꓟꓲ꓾ ꓬꓴ-ꓔ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓐꓴ ꓓꓽ ꓪꓴꓸ ꓟ ꓪꓽ ꓘꓴ ꓦꓲ ꓔꓯ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓫꓬꓹ ꓗꓷꓳ= ꓬꓲꓸ ꓪ ꓐꓴ ꓠꓬ Pentateuch ꓐꓰ ꓐꓯˍ ꓔ ꓟ ꓾ ꓟꓳ-ꓫꓲ ꓢꓲꓽ ꓫꓬ ꓕꓳꓽ ꓶꓽ 5 ꓑꓷꓠꓽ ꓔꓯ ꓥˍ ꓟꓲ꓾ ꓬꓲꓸ ꓪ ꓐꓴ ꓡꓰ ꓬꓲꓸ ꓫꓵꓼ ꓐꓳ ꓗꓷꓳ=

ꓝꓮꓲ ꓕꓲ ꓫꓵꓽ ꓠꓬ꓾ ꓬ-ꓫꓵ ꓡ ꓞꓳ ꓐꓴ ꓠꓬ꓾ ꓢ-ꓟ-ꓡꓲ ꓡꓳ ꓒꓱ ꓔꓯ ꓓꓶꓽ ꓧꓪꓸ ꓡꓰ ꓗꓸ ꓠꓯꓸ ꓾ ꓡꓳ ꓒꓱ ꓘꓴꓽ ꓗꓪ ꓐꓶꓽ ꓒ ꓐꓴ ꓔꓯ ꓔꓬꓹ ꓝꓲˍ ꓡꓳ= ꓐꓶꓽ ꓒ ꓐꓴ ꓠꓬ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓴ ꓐꓰ ꓡꓯꓽ ꓒꓯꓹ ꓝꓸ꓾ ꓦꓲꓻ ꓕꓴꓽˍ ꓟ ꓬꓰ ꓗꓷꓳ= ꓐꓶꓽ ꓒ ꓐꓴ ꓠꓬ ꓬꓲꓸ ꓪ ꓐꓶꓽ ꓞꓳ ꓪꓴ-ꓢ ꓔꓯ ꓦ ꓡꓱꓻˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓴ-ꓔ ꓞꓳ ꓫꓵꓽ ꓐꓴ ꓠꓬ ꓢ-ꓟ-ꓡꓲ ꓞꓳ ꓫꓵꓽ ꓐꓴ ꓔꓯ ꓬꓰ-ꓧꓳ-ꓧꓪ ꓪꓴ-ꓢ ꓔꓯ ꓐꓰ ꓧꓹ ꓙꓰ ꓢꓲ ꓠꓲꓽ ꓐꓬꓱ ꓔꓯ ꓦ ꓡꓱ ꓢꓴ ꓐꓰ ꓐꓯˍ ꓟ ꓡꓰ ꓟꓽ ꓛꓲ ꓾ ꓬꓲ ꓪ ꓐꓴ ꓔꓯ ꓐꓶꓽ ꓒ ꓐꓴ ꓐꓯ ꓢꓲ ꓢꓷꓸ ꓙ ꓟꓳ ꓙ ꓗꓷꓳ=

ꓢ-ꓟ-ꓡꓲ ꓗꓪˍ ꓟꓲ ꓚꓺ ꓟꓲꓽ ꓮ ꓟꓬꓹ ꓙꓳˍ ꓡꓳ= ꓪꓺ ꓔꓲ ꓯ-ꓧꓶ-ꓐꓷ ꓠꓬ ꓖꓳ ꓗꓪ ꓑꓸ-ꓡꓲꓽ ꓪꓴ-ꓢ ꓐꓱ ꓶ ꓟꓶ ꓔꓶꓸ ꓦꓲꓻ ꓔꓯ ꓫꓬꓹ ꓔꓶ ꓗꓷꓳ= ꓬ-ꓫꓵ ꓪ ꓔꓲ ꓫꓬ-ꓡꓷ-ꓟ-ꓠꓲ-ꓢ 5 ꓠꓬ ꓡꓳ ꓒꓱ ꓔꓯ ꓓꓶꓽ ꓡꓯ ꓘꓳ ꓧꓪꓸ ꓡꓰ ꓢꓲ꓾ ꓢ ꓘꓳꓼ ꓛꓲ ꓡꓳ ꓒꓱ ꓔꓯ ꓙꓵꓽ ꓗꓷ ꓗꓸ ꓠꓯꓸ  ꓐꓚ 721ꓕꓯ ꓫꓵꓻꓳ= ꓬꓲꓸ ꓙꓵꓽ ꓪ ꓔꓯ ꓝ ꓢꓲ ꓘꓳꓹ ꓣꓴ ꓢꓴ ꓥ ꓟ ꓪꓺ ꓔꓲ ꓢ-ꓘꓷ-ꓠ 2 ꓠꓬ ꓡꓳ ꓒꓱ ꓔꓯ ꓒꓬꓹ ꓦꓯ ꓗꓷ ꓢꓲ ꓾ ꓡꓳ ꓒꓱ ꓗꓪ ꓟ ꓞꓳ ꓫꓵꓽ ꓐꓴ ꓔꓯ ꓬ-ꓫꓵ ꓟꓵꓽ ꓗꓪ ꓖꓼ ꓩꓴ ꓗꓷ ꓡꓳ=

ꓮ ꓠꓱ ꓟ ꓬꓲ-ꓢꓷ-ꓡꓲ ꓟꓵꓽ ꓗꓪ ꓫꓬꓹ ꓜꓶꓻˍ ꓟ ꓗꓪ ꓟꓬꓱꓽ ꓮ ꓟꓬꓹ ꓬꓰ ꓢꓴ  ꓪ ꓔꓲ ꓩꓴ-ꓡꓲ ꓠꓬ ꓡꓳ ꓒꓱ ꓔꓯ ꓝꓮꓲ ꓕꓲꓽ ꓧꓪꓹ ꓫꓬ ꓜꓶꓻ ꓗꓷ ꓢꓲ ꓾ ꓣꓳ-ꓟ ꓪ ꓔꓲ ꓢꓲ-ꓢ ꓮ-ꓗꓴ-ꓢꓶ-ꓔꓴ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓐꓱ ꓶ ꓡꓳ ꓒꓱ ꓔꓯ Sebaste ꓐꓰ ꓟꓬꓱ ꓖꓶˍ ꓡꓳ=

ꓟꓶ ꓦ ꓟꓬꓽˍ ꓟ ꓐꓰ ꓟꓵꓽ ꓙꓲˍ ꓟ ꓪꓴꓸ ꓠꓬꓲ ꓔꓶ ꓜꓽ ꓔꓶ ꓓꓳ ꓚꓱꓹ ꓔꓯ ꓪꓴꓽ ꓡ ꓟꓴ ꓝꓲˍ ꓡꓳ= ꓜꓽ ꓪꓳ ꓡꓳ ꓪꓳ ꓗꓪ ꓠꓬ ꓛꓱꓼ ꓡꓱ ꓢꓶꓽ ꓾ ꓮ ꓛꓬ ꓢꓶꓽ ꓾ ꓤꓴ ꓐꓰ ꓫꓪ ꓐꓴ ꓥ ꓡꓳ=

ꓕꓱ ꓡꓱ ꓜꓽ ꓪꓳ ꓡꓳ ꓪꓳ ꓐꓰ ꓐꓳꓺꓶꓼ ꓮ ꓟꓬꓹ ꓙꓳˍ ꓟ ꓟꓵꓽ ꓥ ꓟ ꓪꓴꓸ ꓠꓬꓲ ꓶꓼ ꓫ ꓠꓲꓹ ꓫꓵ ꓢꓴ ꓘꓴꓽ ꓠꓲꓹ ꓫꓵ ꓢꓴ ꓟꓬꓽˍ ꓡꓳ= ꓢ-ꓟ-ꓡꓲ ꓞꓳ ꓫꓵꓽ ꓐꓴ ꓠꓬ꓾ ꓖꓷ-ꓓꓰ-ꓬꓴ ꓟꓬꓱꓺ ꓔ ꓟ ꓡꓽ ꓞꓳ ꓔꓬꓹ ꓗꓪ ꓝꓲ ꓓꓴ ꓝꓲ ꓩꓴ ꓗꓷ ꓢꓴ ꓪꓴ-ꓢ ꓔꓯ ꓘꓴ ꓓꓰꓽˍ ꓡꓳ= ꓝꓲ ꓓꓴ ꓠꓬ ꓟꓲꓽ ꓕꓯꓽ ꓢꓲꓺ ꓗꓪ ꓒꓬꓱꓹ ꓡˍ ꓟ ꓙꓵꓽ ꓗ ꓫꓬꓹ ꓒ ꓔꓯ ꓒꓯꓼ ꓜꓲ ꓒ ꓕꓲꓺ꓾ ꓛꓱꓼ ꓡꓱ ꓙꓵ ꓠꓬꓲꓸ ꓖꓴ ꓠꓯꓸꓼ ꓗꓪ ꓫꓬ ꓓꓶꓽ ꓔꓬˍ ꓟ ꓔꓯ ꓟꓳˍ ꓡꓳ= ꓖꓰ-ꓓꓰ-ꓬꓴ ꓠꓬ ꓟ-ꓠ-ꓢꓲ ꓞꓲ ꓤ ꓡꓯꓹ ꓤ ꓥ ꓡꓳ=

ꓪꓴ-ꓢ ꓠꓬ ꓢ-ꓟ-ꓡꓲ ꓟꓵꓽ ꓖꓴ ꓪꓴꓸ ꓗꓷ-ꓡꓷ-ꓐꓳ ꓪ ꓚꓲ ꓗꓪ ꓖꓷ-ꓓꓰ-ꓬꓴ ꓐꓰ ꓬꓲꓸ ꓡꓽ ꓞꓳ 300 ꓣꓳ ꓐꓴ ꓔꓯ ꓟ-ꓓꓲ-ꓬ ꓐꓰ ꓮ-ꓟꓷ-ꓡꓷ-ꓘꓷ ꓐꓴ ꓔꓯ ꓓꓶꓽ ꓧꓪꓸ ꓡꓰ ꓝꓲ ꓗꓷꓳ= ꓬꓲꓸ ꓘꓳꓼ ꓟꓶ ꓤ ꓛꓲ ꓗꓳꓸ ꓗꓷ ꓗꓸ ꓠꓯꓸ ꓠꓬ꓾ ꓗꓷ-ꓡꓷ-ꓐꓳ ꓪ ꓚꓲ ꓗꓪ ꓝꓮꓲ ꓕꓲ ꓧꓪꓹ ꓟꓯꓼ ꓓꓶꓽ ꓡꓯ ꓘꓳˍ ꓟ ꓗꓪ ꓪ ꓔꓲ ꓢꓳ-ꓡꓳ ꓬꓲꓸ ꓤ ꓠꓬꓲꓽ ꓣꓳ ꓫꓵꓻ ꓗꓷꓳ= ꓢꓳ-ꓡꓳ ꓪ ꓔꓲ ꓥˍ ꓟꓲ ꓖꓳ ꓗꓪ ꓘꓶꓽ ꓛꓵꓽ ꓫꓵꓻ ꓳ=

ꓢ-ꓟ-ꓡꓲ ꓐꓰ ꓗꓴ ꓙꓲꓼ ꓙꓳ ꓢꓲ ꓾ ꓢꓲ ꓒ ꓬꓰ-ꓢꓴ ꓔꓳꓹ ꓜꓳꓽ ꓗꓷ ꓟ ꓫꓵꓽ ꓪꓴꓽ ꓠꓬꓲꓽ ꓟ ꓔꓯ ꓟꓳꓸ ꓙꓲ-ꓢꓴ ꓢꓲ ꓤ ꓮ ꓟꓬꓹ ꓠꓬ ꓢ-ꓟ-ꓡꓲ ꓔꓯ ꓢꓷꓸ ꓔ ꓟ ꓥ ꓡꓳ= 100 ꓘꓳꓼ ꓟꓽ ꓛꓲ ꓡ ꓢꓰꓽ ꓟ ꓦꓬꓼ ꓠꓬꓲ ꓗꓪ ꓛꓲ ꓢ-ꓟ-ꓡꓲ ꓞꓳ ꓫꓵꓽ ꓐꓴ ꓔꓯ ꓬꓴ-ꓔ ꓞꓳ ꓫꓵꓽ ꓐꓴ ꓟꓽ ꓠꓲꓹ ꓒꓴ ꓟ ꓥ ꓡꓳ=ꓖꓳ ꓟ ꓪꓴꓸ ꓠꓬꓲ ꓢ-ꓟ-ꓡꓲ ꓡꓳ ꓒꓱ ꓘꓴꓽ ꓗꓪ ꓟꓽ ꓗꓳꓸ ꓬꓯꓼ ꓠꓹ ꓟ ꓠꓱꓸꓼ ꓐꓯꓼ ꓕꓲ ꓚꓱꓹ ꓗꓪ ꓐꓰ ꓚꓳꓻ ꓙꓰˍ ꓡꓳ=

ꓬꓴ-ꓔ ꓟꓵꓽ ꓗꓪ ꓐꓰ ꓖ-ꓡꓲ-ꓡꓲ ꓗꓪ ꓙꓰˍ ꓕꓯ ꓬꓰ-ꓢꓴ ꓠꓬ ꓢ-ꓟ-ꓡꓲ ꓡꓳ ꓒꓱ ꓗꓪ ꓐꓰ ꓗꓳꓸ ꓙꓰˍ ꓡꓳ= ꓖꓳ ꓗꓪ ꓟ ꓬꓲꓻ ꓙꓬ ꓘꓴ ꓗꓪ ꓤ ꓟꓶ ꓤ ꓕꓲ ꓣꓳ ꓐꓰ ꓟꓳ ꓡꓯ ꓘꓳ ꓗꓷꓳ= ꓬꓴ-ꓔ ꓡ ꓞꓳ ꓕꓲ ꓣꓳ ꓠꓬ ꓢ-ꓟ-ꓡꓲ ꓤ ꓟꓶ ꓤ ꓕꓲ ꓣꓳ ꓐꓰ ꓙ ꓡꓯ ꓘꓳ ꓢꓲ ꓫꓸ ꓕꓱˍ ꓐꓯꓸ ꓟ ꓠꓬ ꓓꓵꓽ ꓙ ꓮ ꓡꓰ ꓓꓴ ꓕꓲ ꓫꓵꓽ ꓾ ꓟꓽ ꓑ ꓙ ꓠꓬꓲ ꓟ ꓕꓲꓽ ꓫꓵꓽ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓠꓬ ꓢ-ꓟ-ꓡꓲ ꓤꓶ ꓟꓶ ꓤ ꓔꓯ ꓫꓸ ꓕꓱ ꓢꓲ ꓬꓲꓸ ꓠꓬ ꓟꓲ-ꓢ-ꓬ ꓥ ꓟ ꓔꓯ ꓐꓯ ꓖꓶˍ ꓡꓳ= 

ꓬꓰ-ꓢꓴ ꓠꓬ ꓠꓬꓲꓽ ꓠꓬꓲ ꓛꓲ ꓔꓬ ꓗꓷ ꓢꓲ ꓾ꓖꓳ ꓕꓲ ꓡꓳ ꓒꓱ ꓗꓪ ꓟ ꓢ-ꓟ-ꓡꓲ ꓡ ꓞꓳ ꓮ ꓟꓬ ꓠꓬ ꓬꓲꓸ ꓟꓸ ꓖꓶˍ ꓟ ꓔꓯ ꓑ ꓙˍ ꓕꓯ ꓙꓵˍ ꓡꓳ꓾ ꓐꓰ ꓬꓳ-ꓦ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ= ꓢ-ꓟ-ꓡꓲ ꓡꓳ ꓒꓱ ꓢꓴ ꓐꓴ ꓠꓬ ꓬꓰ-ꓢꓴ ꓔꓯ ꓠ-ꓢ-ꓡꓱ ꓢꓲꓸ ꓟꓽ ꓞꓲ ꓘꓳꓹ ꓣꓴˍ ꓡꓳ=  

ꓝꓮꓲ ꓕꓲ ꓫꓵꓽ  ꓟ ꓠꓬ꓾ ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓔꓯ ꓥꓳꓽ ꓥ ꓡꓳ= ꓔꓯ ꓥꓳꓽ ꓕꓱ ꓟ ꓠꓬ꓾ ꓬꓴ-ꓔ ꓡ ꓞꓳ ꓐꓴ ꓡꓰ ꓠꓬꓲ ꓟꓽ ꓟꓵ ꓟ ꓢ-ꓟ-ꓡꓲ ꓡ ꓞꓳ ꓔꓯ ꓙꓲˍ ꓟ ꓡ ꓞꓳ ꓕꓲ ꓣꓳ ꓒꓬꓱꓼ ꓡ ꓝꓲˍ ꓕꓯ ꓾ꓠ ꓠꓹ ꓔꓬ ꓢꓴ ꓐꓴ ꓓꓵꓽ ꓙ ꓔ ꓟ ꓔꓯ ꓒꓳꓹ ꓡꓰ ꓝꓲˍ ꓡꓳ= ꓖꓳ ꓟ ꓡꓰ ꓟꓽ ꓛꓲ ꓮ ꓟˍ ꓟꓲ ꓒꓵꓽ ꓗ ꓬꓰꓹ ꓟ ꓬꓴ-ꓔ ꓡ ꓞꓳ 2 ꓣꓳ ꓥ ꓟ꓾ ꓔꓲ ꓒ ꓐꓰ ꓡꓱ-ꓬꓲ ꓡ ꓞꓳ ꓔꓯ ꓟꓽ ꓙꓲꓻ ꓡ ꓞꓳ ꓡꓰ ꓐꓰ ꓐꓯ ꓔ ꓡꓳ=

ꓔꓯ ꓥꓳꓽ ꓕꓱ ꓟ ꓠꓬ ꓞꓳ ꓜꓴꓻ ꓐꓱ ꓶ ꓮ ꓘꓶꓸ ꓓꓵꓽ ꓙ ꓫꓸ ꓓꓴ ꓕꓲꓽ ꓫꓵꓽ ꓥ ꓐꓭˍ ꓥꓳ= ꓖꓳ ꓡꓱ ꓥˍ ꓟꓲ ꓢ-ꓟ-ꓡꓲ ꓡꓰ ꓐꓰ ꓗꓹ ꓟ ꓡ ꓞꓳ ꓕꓲ ꓣꓳ ꓠꓬ ꓬꓲꓸ ꓬꓲꓼ ꓬꓲꓼ ꓠꓬꓲ ꓐꓴ ꓔꓯ ꓮ ꓡꓰ ꓠꓲꓹ ꓠꓵ ꓠ ꓔ ꓟ ꓔꓯ ꓢꓷˍ ꓡꓳ ꓫꓵꓽ ꓥꓳ= ꓕꓲ ꓒꓳꓹ ꓗꓪ ꓠꓬ ꓞꓳ ꓤ ꓮ ꓟꓬꓹ ꓒꓵꓽ ꓗ ꓬꓰ ꓟꓶˍ ꓟ ꓔꓲꓺ ꓒ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ꓾ ꓕꓲ ꓖ ꓕꓲ ꓧꓪꓹ ꓟꓽ ꓙꓲꓻ ꓟ ꓬꓰ ꓢꓴ ꓐꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ=

ꓬꓰ-ꓢꓴ ꓠꓬ ꓢ-ꓟ-ꓡꓲ ꓡ ꓞꓳ ꓐꓴ ꓔꓯ ꓠꓲꓹ ꓠꓵˍ ꓡꓳ= ꓬꓲꓸ ꓟꓴꓽ ꓗꓪ ꓗꓪ ꓟꓽ ꓓꓯ ꓙꓰ ꓢꓰꓽ ꓕꓯ ꓬꓲꓸ ꓝꓲ ꓓꓴ ꓐꓴ ꓔꓯ ꓐꓯ ꓔꓲꓸ ꓬꓰ ꓟ ꓠꓬ ꓾ “ꓖꓳ ꓡꓱ ꓥˍ ꓟꓲ ꓢꓲ-ꓫꓬ-ꓟ-ꓦ ꓠꓴ ꓪ ꓔꓯ ꓬꓯꓼ ꓡ ꓕꓯ꓾ ꓠꓴ ꓪꓽ ꓠꓽ ꓪꓽ ꓠꓬꓲˍ ꓟ ꓟꓶˍ ꓥꓳ= ꓖꓳ ꓡꓱ ꓢꓲ ꓠꓴ ꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪˍ ꓟꓲ꓾ ꓢ-ꓟ-ꓡꓲ ꓗꓪˍ ꓟꓲ꓾ ꓟꓲ ꓠꓯ ꓑꓶꓸ ꓗꓪ ꓛꓲ ꓥˍ ꓟꓲ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴ ꓬꓰˍ ꓥꓳ꓾ ꓐꓯˍ ꓡꓳ=” (ꓝꓲ ꓓꓴ 1ꓽ8)