ꓢ-ꓣ ꓟꓸ ꓟꓲꓽ

ꓤ ꓟꓶ ꓤ ꓕꓲ ꓣꓳ ꓠꓬ ꓪꓴ-ꓢ ꓬꓲ ꓙꓻ ꓟꓳ ꓘꓶꓽ ꓐꓲ ꓡꓰ ꓝꓲ ꓠꓹ ꓟ ꓬꓲ ꓤ ꓖꓴ ꓐꓰ ꓕꓲ ꓪ ꓬꓳꓸ ꓚꓵˍ ꓟ ꓟꓬꓱꓽ ꓬꓰ ꓪꓴꓸ ꓔꓴ ꓗꓷꓳ= ꓤ ꓠꓱ ꓟꓽ ꓙꓳ ꓟ ꓑꓶꓸ ꓓꓴ ꓮ ꓟꓬꓹ ꓘꓳꓼ ꓠꓲꓹ ꓟ ꓫꓸ ꓪ ꓥˍ ꓟꓲ꓾ ꓬꓲ ꓔꓯ ꓪꓴ-ꓢ ꓡꓰ ꓶꓼ ꓥꓳ ꓙꓱꓽ ꓖꓶ ꓗꓷ ꓕꓯ ꓬꓲ ꓞꓲꓼ 90 ꓘꓳꓼ ꓗꓪ ꓬꓲ ꓕꓲ ꓤꓶꓻ ꓡꓱꓸꓼ ꓥꓳ ꓡꓳꓸ ꓔ ꓟ ꓠꓬ ꓐꓲ ꓡ ꓗꓷꓳ= ꓥ ꓡꓳ꓾ ꓮ ꓟꓶ ꓐꓯ ꓔꓬ ꓟ ꓠꓬ ꓢ-ꓣ ꓟꓸ ꓟꓲꓽ ꓔꓯ ꓐꓯ ꓔꓬ ꓟ ꓥ ꓡꓳ=

ꓢ-ꓣ ꓠꓬ ꓮ-ꓐ-ꓡ-ꓦ ꓬꓲ ꓤ ꓟꓶ ꓥ ꓢꓲ ꓬꓲ-ꓢ ꓬꓲ ꓟꓹ ꓟ ꓕꓲ ꓣꓳˍ ꓡꓰ ꓣꓳ ꓢꓷꓸ ꓔ ꓟ ꓥ ꓡꓳ= ꓖꓳ ꓟ ꓐꓱ ꓶ ꓬꓲ ꓠꓬ ꓙꓵꓻ ꓠꓲꓹ ꓠꓯꓸꓼ ꓗꓪ ꓬꓲ ꓪꓴꓸ ꓟ ꓒꓵꓽ ꓟ ꓐꓰˍ ꓟꓲ ꓮ ꓟꓬꓹ ꓢꓷꓸ ꓔ ꓟ  ꓥ ꓡꓳ=

ꓢ-ꓣ ꓠꓬ ꓧꓶꓸ ꓕꓯ ꓕꓯ ꓮ-ꓐꓷ-ꓡ ꓐꓰ ꓘꓴˍ ꓟ ꓮ-ꓐ-ꓡ-ꓦ ꓐꓰ ꓐꓹ ꓐ ꓕꓲꓽ ꓣꓳˍ ꓟ ꓠꓬꓲ ꓟ ꓥ ꓢꓲ꓾ꓬꓲ ꓪ ꓟꓹ ꓟ ꓠꓬ ꓟꓽ ꓫꓱꓸ ꓡꓯ ꓘꓳ= ꓢ-ꓣ ꓔꓯ ꓧꓶꓸ ꓕꓯ ꓕꓯ ꓠꓬ ꓢ-ꓣ-ꓬ ꓐꓰ ꓟꓬꓱꓺ ꓔ ꓡꓳ= (ꓬꓲ ꓚꓰ ꓬꓲ ꓪꓴ 20ꓽ12꓾ 11ꓽ29) = ꓢ-ꓣ-ꓬ ꓠꓬ ꓬꓲ ꓐꓹ ꓐ ꓕ-ꓣ꓾ ꓬꓲ ꓤ ꓖꓴ ꓮ-ꓐꓷ-ꓡ꓾ ꓬꓲ ꓢꓸ ꓤ ꓡꓳ-ꓔꓷ ꓐꓰ ꓕꓲ ꓪ ꓪꓴ-ꓣ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓢꓲ ꓘꓷꓹ-ꓠ ꓟꓵꓽ ꓗꓪ ꓙꓰˍ ꓡꓳ(ꓬꓲ ꓚꓰ ꓬꓲ ꓪꓴ 11ꓽ31)= ꓖꓳ ꓡꓱ ꓥ ꓟꓲ ꓬꓲ ꓪ ꓠꓬ ꓧ-ꓣ-ꓠ ꓗꓪ ꓛꓲ ꓬꓰ ꓠꓬꓲ ꓖꓳ ꓗꓪ ꓔꓬ ꓡꓳ= ꓡꓳꓹ ꓬꓰˍ ꓗꓪ꓾ ꓪꓴ-ꓢ ꓠꓬ ꓮ-ꓐꓷ-ꓡ ꓔꓯ ꓧ-ꓣ-ꓠ ꓡꓳ ꓒꓱ ꓗꓪ ꓐꓰ ꓓꓳ ꓙꓰ ꓝꓲ ꓢꓲ ꓪꓴ-ꓢ ꓡꓰ ꓟꓳꓸ ꓖꓶ ꓠꓹ ꓟ ꓟꓵꓽ ꓗꓪ ꓙꓰ ꓠꓹ ꓟ ꓮ-ꓐꓷ-ꓡ ꓔꓯ ꓘꓴˍ ꓡꓳ(ꓬꓲ ꓚꓰ ꓬꓲ ꓪꓴ 12ꓽ1-5)= ꓖꓳ ꓟ ꓑꓶꓸ ꓓꓴ ꓢ-ꓣ-ꓬ ꓐꓰ ꓬꓲ ꓢꓸ ꓤ ꓡꓳ-ꓔꓷ ꓐꓴ ꓠꓬ ꓮ-ꓐꓷ-ꓡ ꓐꓰ ꓕꓲ ꓪˍ ꓙꓰ ꓢꓲ ꓘꓷꓹ-ꓠ ꓟꓵꓽ ꓗꓪ ꓮ-ꓐꓷ-ꓡ ꓐꓰ ꓕꓲ ꓡꓰꓹ ꓔꓬ ꓬꓰˍ ꓡꓳ=

ꓢ-ꓣ-ꓬ ꓠꓬ ꓮ-ꓐꓷ-ꓡ ꓐꓱ ꓶ ꓓꓵꓽ ꓙ ꓪꓴꓽ ꓧꓶ ꓓꓴ ꓒꓬꓱꓼ ꓡꓰ ꓝꓲˍ ꓟ ꓒꓬꓱꓽ ꓐꓲꓻˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓡꓳ (ꓬꓲ ꓚꓰ ꓬꓲ ꓰꓴ 12ꓽ11ꓹ14)= ꓘꓷ-ꓠ ꓟꓵꓽ ꓗꓪ ꓦꓰꓼ ꓟꓷꓼ ꓘꓳꓼ ꓓꓳ ꓡ ꓠꓬꓲ꓾ ꓢ-ꓣ-ꓬ ꓐꓰ ꓮ-ꓐꓷ-ꓡ ꓐꓴ ꓠꓬ ꓜꓽ ꓓꓴ ꓟꓶ ꓓꓹ ꓟ ꓟꓵꓽ ꓗꓪ ꓙꓰˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓬꓲ-ꓙꓲ ꓟꓵꓽ ꓗꓪ ꓛꓲꓺ ꓬꓰ ꓢꓲ ꓖꓳ ꓗꓪ ꓟꓶ ꓤ ꓔꓬ ꓗꓷ ꓗ ꓠꓯꓸ ꓬꓲ ꓪ ꓠꓬ ꓖꓲ-ꓣ ꓟꓵꓽ ꓗꓪ ꓙꓰ ꓗꓷꓳ=

ꓮ-ꓐꓷ-ꓡ ꓐꓰ ꓢ-ꓣ-ꓬ ꓐꓴ ꓠꓬ ꓬꓲ-ꓙꓲ ꓟꓵꓽ ꓐꓰ ꓖꓲ-ꓣ ꓟꓵꓽ ꓠꓬꓲꓽ ꓖ ꓡꓱꓸꓼ ꓗꓪ ꓔꓬ ꓢꓴ ꓐꓴ ꓬꓲ ꓪ ꓔꓯ ꓢꓰꓼ ꓡ ꓟ ꓙꓳˍ ꓠꓬꓲ ꓬꓲ ꓪ ꓠꓬꓲꓽ ꓣꓳ ꓠꓬ ꓤ ꓖꓴ ꓤ ꓟꓶꓻ ꓥ ꓟ ꓔꓯ ꓑꓲꓸ ꓔ ꓡꓳ(ꓬꓲ ꓚꓰ ꓬꓲ ꓪꓴ 12ꓽ10-20꓾ 20ꓽ1-18)= ꓕꓱ ꓫꓵꓽ ꓪꓴ ꓠꓬꓲꓽ ꓟ ꓡꓱꓸꓼ ꓗꓪ꓾ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓢ-ꓣ-ꓬ ꓔꓯ ꓬꓲ ꓪ ꓦꓲ ꓗꓪ ꓧꓳꓽ ꓔꓯꓹ ꓙꓰˍ ꓡꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓢ-ꓣ-ꓬ ꓠꓬ ꓮ-ꓐ-ꓡ-ꓦ ꓤ ꓟꓶ ꓥ ꓟ ꓔꓯ ꓬꓲ-ꓙꓲ ꓪ ꓔꓲ ꓩ-ꓣꓳ ꓐꓰ ꓖꓲ-ꓣ ꓪ ꓔꓲ ꓮ-ꓐꓲ-ꓟ-ꓡꓷ ꓐꓴ ꓔꓯ ꓬꓲ ꓪ ꓬꓲꓼ ꓟꓬ ꓗꓪ ꓐꓯ ꓟꓸ ꓖꓶ ꓡ ꓗꓷꓳ=

ꓪ ꓔꓲ ꓖꓳ ꓠꓬꓲꓽ ꓣꓳ ꓡꓱꓸꓼ ꓠꓬ ꓮ ꓣꓳ ꓮ ꓠꓬꓲꓽ ꓐꓰ ꓚꓳ ꓑꓸ꓾ ꓒꓴ ꓮ ꓟꓬꓹ ꓔꓯ ꓢ-ꓣ-ꓬ ꓐꓰ ꓕꓲ ꓪ ꓢ-ꓣ-ꓬ ꓬꓲ ꓤ ꓖꓴ ꓮ-ꓐ-ꓡ-ꓦ ꓔꓯ ꓡꓲꓸ ꓖꓶˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓮ-ꓐ-ꓡ-ꓦ ꓠꓬ ꓐꓳ ꓶ ꓮ ꓟꓬꓹ ꓙꓳ ꓡˍ ꓡꓳ= 1 ꓒꓲ-ꓕꓱ 3ꓽ6 ꓗꓪ ꓢ-ꓣ ꓠꓬ ꓫꓵꓽ ꓪꓴ ꓕꓱ ꓟ ꓗꓪ ꓠꓲꓹ ꓪꓴꓽ ꓪꓴꓽ ꓡꓰ ꓬꓲ ꓤ ꓖꓴ ꓔꓯ ꓠ ꓡꓳꓹˍ ꓟ ꓑꓶꓸ ꓓꓴ ꓬꓲ ꓠꓬ ꓒꓬꓱꓽ ꓐꓲꓻˍ ꓟ ꓡꓰꓽ ꓟꓽ ꓞꓲꓺ ꓮ ꓫꓵꓽ ꓔꓯˍ ꓟꓲ ꓟꓽ ꓙꓳ ꓟ ꓔꓯ ꓖꓴ ꓟꓸ ꓖꓶ ꓔꓬ ꓡꓳ=

ꓮ-ꓐꓷ-ꓡ ꓗꓪ ꓐꓰ ꓞꓲꓼ ꓤ ꓡꓯꓹ ꓤ ꓮ ꓟꓬꓹ ꓟꓬꓽ ꓡ ꓝꓲ ꓢꓲ ꓪꓴ-ꓢ ꓡꓰ ꓖꓶ ꓙꓻ ꓟꓳˍ ꓟ ꓟꓵꓽ ꓔꓯ ꓙꓵꓽ ꓝꓲˍ ꓥꓳ ꓐꓰ ꓪꓴ-ꓢ ꓡꓰ ꓙꓻ ꓟꓳ ꓘꓶꓽ ꓖꓶ ꓔ ꓥ ꓟꓲ ꓢ-ꓣ-ꓬ ꓠꓬ ꓤ ꓠꓱ ꓟꓽ ꓙꓳ (ꓬꓲ ꓚꓰ ꓬꓲ ꓪꓴ 11ꓽ30)= ꓖꓳ ꓡꓱ ꓠꓬꓲ ꓢ-ꓣ-ꓬ ꓠꓬ ꓮ-ꓐꓷ-ꓡ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓧꓳꓽ ꓔꓯꓹ ꓡ ꓟ ꓚꓳ ꓟ ꓐꓴ ꓗꓪ ꓐꓰ ꓕꓲ ꓣꓳ ꓔꓯ ꓢꓲꓺ ꓢꓲ ꓬꓲ ꓗꓪ ꓐꓰ ꓤ ꓠꓱ ꓙꓳ ꓡ ꓝꓲ ꓠꓹ ꓟ ꓙꓽ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓬꓲ ꓪ ꓚꓳ ꓟ ꓫꓬ-ꓚꓬ ꓠꓬ ꓮ-ꓐꓷ-ꓡ ꓐꓱ ꓶ ꓬꓲ-ꓫꓵ-ꓟ-ꓡꓲ ꓟꓬꓱ ꓔ ꓟ ꓤ ꓕꓲ ꓣꓳ ꓦꓵꓻ ꓖꓶ ꓗꓷ ꓥ ꓟꓲ꓾ ꓕꓱ ꓟ ꓠꓬ ꓪꓴ-ꓢ ꓡꓰ ꓖꓶ ꓙꓻ ꓟꓳˍ ꓟ ꓤ ꓟꓽ ꓥ(ꓬꓲ ꓚꓰ ꓬꓲ ꓪꓴ 16ꓽ)=

ꓪꓴ-ꓢ ꓠꓬ ꓢ-ꓣ-ꓬ ꓗꓪ ꓐꓰ ꓕꓲ ꓝꓸ ꓤ ꓕꓲ ꓣꓳ ꓖꓶˍ ꓥꓳ ꓐꓰ ꓝꓮꓲ ꓕꓲ ꓧꓪꓹ ꓙꓻ ꓟꓳ ꓘꓶꓽ ꓖꓶ ꓗꓷ ꓢꓲ꓾ ꓪꓴ-ꓢ ꓡꓰ ꓘꓶꓽ ꓫꓵꓽ ꓬꓰ ꓔ ꓟ ꓬꓲ ꓢꓷꓸ ꓡꓰ ꓓꓴ ꓐꓯ ꓢꓲ ꓠꓬꓲ ꓮ-ꓐꓷ-ꓡ ꓔꓯ ꓮ-ꓐ-ꓡ-ꓦ꓾ ꓢ-ꓣ-ꓬ ꓔꓯ ꓠꓬ ꓢ-ꓣ ꓐꓰ ꓟꓬꓱ ꓝꓲˍ ꓡꓳ (ꓬꓲ ꓚꓰ ꓬꓲ ꓪꓴ 17ꓽ5ꓹ15)= ꓖꓳ ꓡꓱ ꓠꓬꓲ ꓢ-ꓣ ꓠꓬ ꓪꓴ-ꓢ ꓬꓲ ꓚꓲꓸ ꓛꓬ ꓡꓰ ꓟꓬꓱ ꓡꓶꓸ ꓖꓶ ꓔ ꓟ ꓢꓲꓽ ꓫꓬ ꓕꓳ ꓶ ꓗꓪ ꓟ ꓕꓲ ꓣꓳˍ ꓟ ꓤ ꓟꓶ ꓤ ꓥ ꓡꓳ=

ꓬꓲ ꓪ ꓬꓲ ꓞꓲꓼ ꓮ ꓘꓶꓸ ꓟꓳꓽ ꓡ ꓗ ꓠꓯꓸ꓾ ꓢ-ꓣ ꓠꓬ ꓤ ꓠꓱ ꓦꓵ ꓡˍ ꓥꓳ ꓐꓯ ꓟ ꓔꓯ ꓑ ꓙꓽ ꓡꓰ ꓕꓯ ꓢ-ꓣ ꓠ ꓪꓽ ꓫꓱꓹˍ ꓡꓳ (ꓬꓲ ꓚꓰ ꓬꓲ ꓪꓴ 17ꓽ17)= ꓮ ꓡꓲꓳ ꓐꓯ ꓠꓬ ꓖꓳ ꓕꓲ ꓙꓵꓹ ꓕꓯ ꓢ-ꓣ ꓠꓬ ꓗꓴ ꓞꓲꓺ ꓘꓳꓼ ꓙꓳ ꓢꓲ꓾ ꓬꓲ ꓤ ꓖꓴ ꓮ-ꓐ-ꓡ-ꓦ ꓠꓬ ꓕꓲꓽ ꓦꓬ ꓘꓳꓼ ꓙꓳ ꓡꓰ ꓟ ꓪꓴꓸ ꓠꓬꓲ ꓥ ꓡꓳ= ꓗ ꓠꓯꓸ ꓮ-ꓐ-ꓡ-ꓦ ꓔꓬ ꓗꓪ ꓪꓰ ꓤ 3 ꓣꓳ ꓡ ꓢꓲ ꓢ-ꓣ ꓠꓬ ꓤ ꓶꓻ ꓡꓰˍ ꓟ ꓔꓯ ꓝꓮꓲ ꓕꓲ ꓧꓪꓹ ꓐꓯ ꓖꓶ ꓡ ꓕꓯ ꓟꓲ ꓢ-ꓣ ꓪꓽ ꓫꓱꓹ ꓗꓷꓳ꓾ ꓖꓳ ꓡꓱ ꓥ ꓟꓲ ꓬꓲ ꓪ ꓫꓱꓹ ꓗꓷ ꓟ ꓔꓯ ꓪꓰ ꓤ ꓐꓴ ꓢꓷꓸ ꓡꓰ ꓠꓬꓲ ꓬꓲ ꓟꓽ ꓪꓽ ꓫꓱꓹ ꓗꓷ ꓐꓰ ꓒꓳꓹ ꓖꓶˍ ꓡꓳ (ꓬꓲ ꓚꓰ ꓬꓲ ꓪꓴ 18ꓽ12ꓹ15)=

ꓮ ꓡꓲ ꓥˍ ꓟꓲ꓾ ꓪꓴ-ꓢ ꓠꓬ ꓬꓲ ꓙꓻ ꓟꓳ ꓘꓶꓽ ꓙꓳˍ ꓟ ꓡꓰ ꓬꓲ ꓐꓯ ꓘꓶꓽ ꓔꓯ ꓐꓲ ꓡꓰ ꓝꓲ ꓢꓲ꓾ ꓢ-ꓣ ꓠꓬ ꓝꓮꓲ ꓕꓲ ꓘꓳꓼ ꓕꓯ ꓬꓲ-ꓢ ꓔꓯ ꓦꓵꓻ ꓗꓷꓳ (ꓬꓲ ꓚꓰ ꓬꓲ ꓪꓴꓸ 21ꓽ1-2)= ꓦꓲ-ꓐꓱ-ꓣꓴ ꓢꓲ ꓫꓬ ꓕꓳ ꓶ ꓐꓳ ꓢꓴ ꓡꓰ ꓢ-ꓣ ꓙꓵꓻ ꓠꓲꓹ ꓔꓯ ꓟꓳꓸ ꓕꓱ ꓡꓱ ꓐꓯ ꓔ ꓡꓳ “ꓢ-ꓣˍ ꓟꓲ ꓬꓲ ꓘꓳꓼ ꓗꓳꓸ ꓗꓷ ꓗ ꓠꓯ ꓙꓵꓻ ꓠꓲꓹ ꓗꓪ ꓐꓰ ꓤ ꓶꓻ ꓡꓰ ꓠꓹ ꓟ ꓪꓽ ꓠꓬꓲˍ ꓟ ꓟꓶˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓤ ꓖꓶ ꓙ ꓟꓳ ꓢꓴ ꓪꓴ-ꓢ ꓠꓽ ꓦ ꓡꓱ ꓐꓳˍ ꓟ ꓥ ꓡꓳ꓾ ꓐꓰ ꓬꓲ ꓙꓵꓻˍ ꓡꓳ” ꓐꓰ ꓐꓯ ꓔ ꓡꓳ (ꓦꓲ-ꓐꓱ-ꓣꓴ 11ꓽ11)=

ꓢ-ꓣ ꓠꓬ ꓐꓲꓻ ꓢꓲ ꓠꓲꓹ ꓪꓴꓽˍ ꓡꓳ ꓐꓯ ꓥ ꓟꓲ꓾ ꓫꓬ-ꓚꓬ ꓕꓯꓽ ꓢꓲ ꓗꓪ ꓠꓽ ꓟꓽ ꓙꓲꓻ ꓟ ꓬꓰ ꓗꓷꓳ= ꓖꓳ ꓡꓱ ꓥ ꓟꓲ ꓢꓲ ꓫꓬ ꓕꓳ ꓶ ꓠꓬ ꓬꓲ ꓔꓯ ꓬꓲ ꓤ ꓖꓴ ꓐꓰ ꓪꓴ-ꓢ ꓔꓯ ꓦ ꓡꓱ ꓐꓳ ꓢꓴ ꓥ ꓡꓳ꓾ ꓐꓰ ꓦꓲ-ꓐꓱ-ꓣꓴ 11ꓽ ꓗꓪ ꓬꓲ ꓔꓯ ꓫꓱꓸ ꓖꓶ ꓔ ꓡꓳ= ꓖꓳ ꓟ ꓑꓶꓸ ꓓꓴ ꓢ-ꓣ ꓠꓬ ꓙꓵꓻ ꓠꓲꓹ ꓔꓯ ꓡꓵꓹ ꓫꓴ ꓖꓶˍ ꓟ ꓒꓵꓽ ꓟ ꓕꓲ ꓣꓳ ꓥ ꓡꓳ= ꓢ-ꓣ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓠꓬ ꓪꓴ-ꓢ ꓔꓯ ꓙꓵꓻ ꓠꓹ ꓟ꓾ ꓚꓲꓸ ꓛꓬ ꓤ ꓖꓴ ꓤ ꓟꓶ ꓔꓯ ꓞꓳ ꓒꓵꓽ ꓠꓹ ꓟ ꓐꓰ ꓡ ꓠꓹ ꓟ ꓤꓶꓻ ꓔꓯ ꓠꓲꓹ ꓪꓴꓽ ꓪꓴꓽ ꓡꓰ ꓥꓳ ꓡꓳꓸ ꓗꓴꓸ ꓠꓹ ꓟ ꓟꓸ ꓖꓶ ꓡ ꓔꓬ ꓡꓳ=